#زين #العابدين   

      والدي ضل على التراب
        بلا غطى وبلا ثياب
من غير اضلوع * كلبه موجوع 
راسة مرفوع * آه على حسين

*

أنه زين العابدين * أبن اخو الماعنده ادين * والدي المذبوح

غيرت وجه الشمس * مات من كثر الرفس * بالرمل مطروح

بخيمتي وباقي احترگ * واسمع اعظامة تطگ * ولحسين ينوح

شلت للخيمة طرف * صدر الحسين انخسف * عاري وبلا روح

علية ركض واحد رخيص * نزعه وشال القميص
خلاه عريان * فوك التربان * حسيني عطشان * آه على حسين

****
ناس اجتة بلايه دين * مارعو حال الحسين * لازم اصفاحه

بجبهتة ضربو حجر * يمسح الدم ما كدر * كثرت اجراحه

حلكه صابو بالسهم * ومتلن شيباتة دم * واسمع صياحه

والدي اكبالي انذبح * ولونه كله احمر صبح * فرح ذباحه

نحره سولف كلمتين * ياعلي مات الحسين
اسمع نوحه * اهواي جروحه * طلعت روحه * آه على حسين

*

حسين من ضل يحتضر * نحره بي حر الظهر * يابس السانه

على عيونه الدم نشف * على اركبه شكد زحف * روحه تعبانه

باوع علينه بألم * سمع طفله من الخيم * بوية عطشانه

كلهه يبنيتي تعاي * والو ما عندي اني ماي * فتح ذرعانه

عكب كل ذاك الحنين ☆ اتكرب الشمر اللعين
كض سيفه وصاح * إني الذباح * يحسين ارتاح * آه على حسين

**

من بعد ذاك الذبح * راسة شالو على الرمح * مختلف لونة

السانه بي لسه نفس * خده بي سطرت فرس * وما يتركونة

منه كمت اسمع أنين * كتله بوية أنت زين * حالك اشلونة

اسمع اوداجه تصيح * كض رقية لا تطيح * اندارت عيونة

يارقية بنيتي صاح ☆ من الرمح چم مره طاح
الوالد مخنوگ * اتأذه من السوگ * واحنه على النوگ * آه على حسين

***

الكوفه أبد ما تحترم * شبعوني شكد هظم * اشمتو بية

الوادم تروح وتجي * هذا أبن الخارجي
يأشر علية

وجهي درتة للنجف * وجه عماتي انكشف * حامي الحمية

ياعلي شفنه العذاب * نكوم نكعد على التراب * كلهه مسبية

بالخرابة وبالشمس ☆ صوتي من يعله انرفس
جرحوني اهواي * الرايح والجاي
طگ ذيچ وهاي * آه على حسين



الشاعر أمير السعيدي

#القاسم #أبن #الحسن


لاسـامح الله ونــفـتــرگ * كـبلك أريدن أنسحگ

يــحــسـيـنـي نـــاذر ** يــسـحـكـنـي حـافــر

*

القــاسم أنه أبن الحـسن * شمعاتي كبلي شـيـبـن * مـــات البخور بدمي

غطيني عمي بصايتك * يل ريحة الله بريحتك * غيرأنت أعز من أمي

عنك يسولفلي ألابو * كلي يضل بلا أخو* بــديــرة غـــرب مو يــــمي

دليني عمي على الشمر* عليه أرد أكله خل يمر * أرفسني وترك عمي

مــوصـدره صدري الينرفس * بالك تدوس على ألشمس

حـســيـن الــمـشاعـر ** يــشـبكـنـي حـافر

**

أنت بمثابة والدي * من ياجرح راح أبتدي * من الخيل ياعمي أحذر

يحسين باجر موعدل * الحافر يسحكك مو سهل * والشمر فوكك يفتر

يابو علي أتوسلك * أنطيني عمي محبسك * خل يكطع أيدي الخنجر

خليني كبلك أنسلب * خل راسي ينجر بالترب *ولا من لحيتك تنجر

ســجــاده جــواك أنـفــرش ** يـل مـايشيلك كل نعش

ألـلــيــلـه عـــاشـر ** يــشـبـكـنـي حـافـر

*

الموت أحلى من العسل * أذنلي أقاتل ونقتل * أحسبني عــبــدلله أبـنــك

أتمنى شابكني السهم * ولاشوف عماتي بخيم * مــن تــوكــع يـشوفنك

خليني أموت أنه الكبل * أملي أذاني بالرمل * ماريدن أسمـــع ونــــك

تنذبح تنصاب بحجر * وثنعش طبره بالنحر * وراسك يفارك حضنـك

والـــلـحـيـه كــلهـه مـتـربه ** الــخـيـل التـجـيـك مـعـصبـة

تـــعــمي الـــنــواظـــر** يــشـبـكـنـي حـافـر

** 

النفسي ماهمن أبد * الشمر لو يمك كعد * يــحـسـيـن يـاخـذ حيلك

ثوبك أبد ما ينعطى* تتغطى كلي بيا غطى* منو اليجي يــفـيـيلك

تطلع رقيه من الخيم * بابا تصيح بكل ألم * الــشمر شـمـسويـلــك

وتكلك بعازت حضن * يابويه أسمعنك تؤن * للخيمه منهو ييجبك

يــلـبـيـك طـبــرات أثـنـعـش * وشفافك تسولف عطش

والــوحشه بـاچــر ** يـشـبـكـنـي حــافـــر

**

أبداعة الوالد علي * ماريدك أتـبـاوع ألــي * مــن تـنـضرب خــاصرتي

من أنحني فوك الشسع * خل راسي وياه ينكطع * ولاتبجي زينب عمتي

لمن تحس بيه متت * لتشيل جسمي من وكت * الزهرة تجي بجـــائزتي

العماتي لتسولف ألم * خذني أضل خلف الخيم * والشمس تحرك جثتي

غـسلـني عـمي بـدمـعـتـك * وبــوجـهي أمسح لحيتك

لا تبقى حاير ** يشبكني حافر

 

الشاعر أمير السعيدي

ساعد الله قلب مولاتي زينب
لما رأت الحسين مسجى على الأرض
  ممزق الاعضاء  ،، سليب الرداء ،،    تريب ،،  غريب ،، حسيناه ،،

اهنا شالت ايدهه السيدة وصاحت
،،،،،،،،،،،،،،،،،،،،،،

رايح وعايفني وين * أوداعت الله يا حسين
                    اوداعت الله
*

والله ما عندي گلب يحسين أودعك

امنيتي يم رأسك اجي واكعد أجمعك

الله لا ينطي الشمر شفتة يدفعك

من گطع رأسك تؤن واني اسمعك

گلبي مات من الأنين * أوداعت الله ياحسين

*

عميه كون ولا اشوفك عاري بالبر

من الدمه لا ما عرفتك گلك أحمر

ياحسين وليش أصبعك گصه خنجر

شنهو ذنبك حافر بصدرك تگسر

وانت مگطوع الوتين * اوداعت الله يا حسين
****

بنعله أبن جوشن تربع فوگ صدرك

وجهك على الرمله داره وحزه نحرك

آه من شمس الظهر باچر تغيرك

وأنت عاري بلا قميص وتچوي ظهرك

نايم مسبل الادين * اوداعت الله يا حسين

**

يالبقيت مطشر بعازت حصيره

سهم البلحلگك محنته شكد چبيره

ياحسين شفافك محيرتني حيره

كون ماي بخيمتي وفوگك أديره

نحرك الضامي حزين * اوداعت الله يا حسين

**

اوداعت الله ولو مشينه من يوسدك

بلا اخو وبلا اخت تبقى أنت وحدك

أيدك على جروحك وأيد على چبدك

او رأسك الضل عالرمح يبچي على ولدك

گلبك أملوعه الحنين * اوداعت الله يا حسين



الشاعر أمير السعيدي

#ظهيرة #العاشر
ساعد الله قلب العقيلة


شفت الحسين بظيمه
من شلت طرف الخيمة
مدد لكيت الغالي ☆ أنذبح رأسه كبالي

☆☆☆

أنه اخت الطاح توه * ودم بچى على خيامه

زينب أنه وموش زينب * أنه أم ايتامه

طاح أبو سكينه على وجه * وضل بدون عمامة

الخيل آه الخيل ركضن * داسن على عظامة

ياويلي سحكنه اهواي ☆ حافر مشى وحافر جاي

ما ينسي من بالي ☆ أنذبح رأس كبالي

☆☆☆

گبل ميذبحه أبن جوشن * راد ماي يشُربة

حرمله من سمع صوتة * خل سهمه بگلبة

المار والجاي على جسمه * ضل بخوي يسبة

السانه المفطر يردد * آه من الغربة

والخصم شافوه صوبين ☆ يزحف على ارگبه حسين
ماكدر يتعنالي ☆ أنذبح رأس كبالي

☆☆☆

ضل يون بصوت عالي * بالخيم ونسمعة

هذا الي ينزعه قميصه * برمحه ذاك يدفعه

شسوه بحسين ابن جوشن * من يگوم يوگعه

على الترابة دار راسة * وبده نحره يگطعه

كطع أوداجه وعافه ☆ وحرگ حسين شفافه
زينب أمانة أطفالي ☆ أنذبح رأسه كبالي

☆☆☆

أه يالوعة حبيبي * من بقى بذاك البر

الحجر من صاب اخيي * عظم گصتة تفطر

حسين مات وريگة يابس * السانه خشبة من الحر

وسفه ذاكه الحلو طولة * من السحگ
ضل يگصر

صارن اهواي جروحة ☆ من الخيل طلعت روحة
على الرمله ثلث الليالي ☆ أنذبح رأسه كبالي

☆☆☆

الاخو صعبة على الاخية * من يطيح گباله

وانه شفت حسين كله * سحگتة الخياله

عاري ضل بلا ملابس * شخص ما فياله

أكرامن الميت بدفنه * وهوه محد شاله

أبن أمي ضل مدد ☆ عاري ولا يمه أحد

شسوه الحسين بحالي ☆ أنذبح  رأس كبالي




الشاعر امير السعيدي

# آه يازين العباد #أيام #السجادية


آه يـــا زيـن العـبـاد * ماتـرك ثوب الـسواد
   يـلطم على هامة * ويمتـزج طعامة
            من بكائه على الحسين

**
   
بـــعــد مـــقــتــل والده وســبـي الــيــتامـة

لحظه مـا مـرت على أشــفـافـة أبــتـسامة

ماي من يـشـرب يــشوف حـســيـن أَمـامة

وبـــدمـع عــيــنــة بــقـى يــمــزج طــعـامة

آه يـادمــع الامــام * مخـتـلط وي الـطـعـام
    دمـعـتة يـتـيمة * قـصتة أليـمة
           مـات أبـو الـبـاقـر حـزين

**   

عـــن أبو الـبـاقـر حـديـث أهـوايـة يــرووه

يــســأل الجـزار شـــاتـك مـــن تـــذبـحــوه

هـــم تــقـدمولــة طـعــام ومـاي تــنــطــوه

كـلة نــنــطـي ونـهـضـم حــيـل عـلـى أبـوه

الناس ضجت بـالبكاء * حولة مجلس عزاء
        والـدي بـدمـائـة * سلبـو ردائة
             وكام يلطم على الجبين

***          

يــعــين گلـبـة أشاف يـوم  الــغـاضـريــــــة

حـنـت الـشـيـلة بـدمـة حـسـيـن  الــزجـيـة

وشــاف ظـــالــم بـيدة تـرچـــيــة رقـــيــة

ودمـــهــة يــصـرخ الله يــلـعـن ال أمــيـة

شنهـي چا ذنب الزغار * حافية مـچويـتهة نار
مسلوبة تراچي * ميتة من البواچي 
          والحبل ينعى ألادين

**

أنــكــسـر ظـهـره أعـلـة عـمـاتـة بـسـبـيـهـن

الــشـمـر يــمــهـن أجـــة يـبـــاوع عـلـيـهــن

كـــلــه ألـــه أحـــرك گلـــب عـبـاس بـيـهــن

ألـــه أصــعــدهـــن هـزل وجــتـف أديـهـــن

أه يا حـال العلـيل * صـعـدو فـوك ألـهـزيل
     ونـسـبن عماتة * أو روعو خـواتـة
              عـلي ظل بلامعين

      مـــن بــكــائــــة عـلـى الـحـسـيــن

**        

عــمـيـة صارت عــين يـعـقـوب عـلى أبـنـة

يــدري عـايش يــوسـفـة مـن غـاب عـــنــة

عـلي شـــاف حــسـين عــاري وعـالـي ونـة

والــخــيـــول الـعــشــرة صــدرة كــســرنـة

والدة بأخـر نـفس * والشـمـر فـوگة جـلس
بنحرة خلة سيفة * وموتة على كيفة
               والنحر ينزف أنين

**

بــعـيـنه راس حـسين شافة وراس عـباس

يــبــچــن اعـلـة الحرة زينب راس يم راس

وشـاف أبــوة گـلـه اعـلـة طولـة كـام يـنـداس

يـا هـضـيـمـة وچــان نــحـر حــسـيـن يـنـباس

طــة بـاسـة مـن النحر * ولـسـه مـا راح الاثـر
وعـگـب طه عـاري * مكطع بالبراري
              أنجرح كلب الأمين


             خادم الحسين (ع)
           ألشاعر أمير السعيدي

#دفن #الأجساد #الطاهره
#زين #العابدين


يوليدي ريحني ☆  احفرلي ودفني
لملمني من الگاع ☆ لفني بحصيره بساع
     
       ياعلي يبني ٭ ياعلي يبني

**

مره أيام وليالي  * وانـه بـالــبر نـايــم

لاصدر لا رأس عندي *  كلشي ماضل سالم

خنصري المبتور باقي * جوه نحر القاسم

الماي ما مر على نحري * يبس گد ما صايم

محد وصل ليه ☆ أبطاسة أميه
ما شفت واحد جاي☆ دار علنحري الماي ☆ ياعلي يبني

*
شلون راح اتلمني بويه * تحير راح بجسمي

الخيل من داست عليه * اختلط لحمي وعظمي

چبدي والخنصر تلاگن * سابحات بدمي

ثلث تيام اني عاري * بويه محد يمي

طايح ثلث چبدي ☆ ضامي وحق
جدي
حسينك بقى مفجوع ☆ وماعنده حتى أضلوع * ياعلي يبني

*
بويه شو ما جبت رأسي * احچيلي گلي شلونه

بعده بي بوسة محمد * لو تغير لونه

خولي من شاله على رمحه * الدم يبس بعيونه

حساس عندي يكول رأسي * مكسرات سنونه

هم بعده شيبه احمر * ويحن على المنحر
بذيچ الخرابة أشكال ☆ وتتصارخ الأطفال ☆ ياعلي يبني

*
احفرلي يابوية حفيره * احترك عظمي من الحر

نحري وسده على الترابه * الرأس اضن يتأخر

تحت جدمي سوي حفره * يبني خلي الأكبر

وخلي عبدالله على صدري * ولو صدري مگسر

روح ادفن القاسم * يم الخيم نايم
واشعله يبني شموع * گلبي عليه موجوع
                 ياعلي يبني

***
ياعلي شوف ابو فاضل * لسه عالي اونينه

بماي برد بوية نحره * وروح دور عينه

لاتكله اخذونه أسره * ولحبل بيدينه

وخاف عن زينب يسألك * كله زينب زينه

لا تذكر السياط * وزينب گلبهه شاط
لتسولف العباس * حرگو خيمهه أرجاس
                    ياعلي يبني

*
بويه اوصيك برقية * بنيتي من تشوفهه

ياعلي داوي أذنهه  * وشد جروح چفوفهه

من تنام بهل الخرابه * ادري يگثر خوفهه

ومن تفز تسأل عليه * يمهه ضل لتعوفهه

    أرحم بواچيهه * ودور تراچيهه
بلا ذمه هاي الناس *  يموتوهه فوگ الرأس
                 ياعلي يبني



الشاعر أمير السعيدي

#زيـــن #العابدين #دفن #الأجساد



دفــنت أهلي وبــچيت بـدم عـلى حسـيـني

شـفـت خـنـصـر عـلى الـغـبره يـواســيـني

      حـســـيـن واه حــــســـيـــنـــــاة

**

إنــة وجــفـوفــي حـرت مـن رت أجـمــعـة

جــسـم أبوي حسين صاير قـطـعه قـطـعــه

بـگـلـبه مـن شفت السهـم بـجـانـي وضـعـه

أنـــحنيـت وكـــلــبــي مــا أنـطـانـي أودعه

أمـسـحت وجــه بـوجة بـثـوبـي وبـچـت عيـني

****

بـوالـدي أحـــتـــاريـــت مــن نـزلـتـة لـحده

شلون أوســده وهــوه مـاكـو راس عــنـده

جـــوه نــحــره تـــراب خــلـيـت ارد أوسده

ما كـدرت وشـــاهـدت أيــــده عـلى چبده

صـــحـت بــويـه ســـهـم جـبـدك يــأذيـنـي

★★★★★★★**★


حــافـــي رحـت أركـض وادور عمي عباس

جـثـتـة عـمـة شـفـتـهـة تـنـوح على الراس

المـثل ابــو فـاظل هضيمة أظلوعه تنداس

چـان أذا يـخـزر عــدوة اجــفـوفه تــنباس

بــست نـحـره وعـلـى جـفوفه بـده ونـيـني

***

جـــسـم أبـو فـاظـل جـرحني مخضبة دمة

ألـزمـت عـمـة قـمـيـصة وگـمـت أشـمـــة

صــوت مـن عـبـاس أجـاني وگـلي كـلمة

جـودي أخـذة ويـاك عـمـي لخـتـي سلمة

أدفـنت عمي وشلت جـودة عـلى يـمـيـنـي

**

عــلـي ألاكبر من أجـيـتـة وشـفــتـة دامـي

جــثــتــة بــيــهــة نــفــس وگــفـت أمـامي

كــلـي لا مـو من عطش خوية أني ضامي

لــعـمـتـي زيـنـب يــاعـلـي وصـل سلامي

دمـع زيـنــب عـلـى أخــوتـهـة يـــچـويـنـي

★*★*★*★*★*★*★

الــطـــفــل عـبـد الله شـفـتـة بـحـاله صعبه

مـا كـدرت أصــبــر وعـوفه ضامي گلبه

جـبـت جــربــة أبـو فـاضـل ردت أشـربه

شــفـــتـــة مــشــغـول بــعــبــاده وي ربه

يـــعـــبــد الله أصــيـح ومـا يــنــاغـــيـنــي

**

جــــاســــم الــعــريــس لـمن ردت أدفـنه

أنــچـــوه گـــلــبــي أحــسة بـنــار حـزنه

شــمـعـة أزفــافـــه بـدت تحـجـيـلي عـنه

يـــاعــــلــي تـكــلي لــهـســه بـجـفه حنه

الــعـرس عـــافــه وداع أمــــه يــبـچـيـني



           لخادم الحسين

       الشاعر أمير السعيدي

#أيام #السجادية #زين #العابدين


أمنين ما باوع لبوي
عثرت فرس ألكه * سهم بوسط حلكه    باللحيه أثر سحكه * أبوي  ☆  أبوي

***      

أنه زين العابدين * أنه أبن ذاك الحزين الريكه يابس

أنه أبن ذاك الغريب * الفوك نحره قامت الزهره مجالس

صدر أبوي بلا قميص * عاري  خلو على الرمل وبلا ملابس

ونخسف صدره نخسف * من كثر ما أبن جوشن فوكه جالس

             والشمر آه يالشمر

متمسك بنحره * وكاعد على صدره * حسيني خلص عمره

أمنين ما باوع لبوي 

****

أنه بالخيمه عليل * وصوت ابوي الدافي خلاني أسمعه

يصيح ألا من ناصراً * ضل وحيد بلا أخو مكسور ضلعه

شلت للخيمه طرف * وشفتة رايد سهم البگلبه يشلعه

الخيل اجت من كل مكان * حافرينزل الجسم حافر يرفعه

          السلام على الغريب

ما ضل ضلع عنده * الحافر سحك خده * وحافر مرد جبده

**

من الگفة ذبحو أبوي * وعلى الرمل راسه بقى يباوع علية

عيونه أسمعهن تصيح * ياعلي عينك على بنيتي رقية

تغطي عين أختك أريد * عاري خاف تشوفني وتركض الية

خايف الذبحي تجي * والشمر يضربهة أذا لزمت أدية

            بوية أختك لا تجي 

أشبگهة ما أكدر * شيبي غده أحمر* ومطبر المنحر

أمنين ما باوع لبوي 

*** 

السلام على الغريب * مدد بحر الظهر وبهل الترابة

الرمل على اللحيه حار * جوه بخدوده لحد ما لحمه ذابه

والشفاه الذابلات * سولفلي نالتقي بذيچ الخرابة

ونقطع ذاك الحديث * شخص كام أدنه ليه رايد ثيابه

            بخنجره الظالم اجاه 

واكف بقة كباله * عينه على سرواله * حسيني نسبى حاله

أمنين ما باوع لبوي 


**

الرؤؤس صلت على الرماح * واني يغمه عليه مره ومره اصحه

حسين هذا العلرمح * هذا لا مو رأس أبوي أهواي جرحه

تقربت يم راسه حيل * الرمح شالعله چن  من رأسه صفحه

بچف سنان أبن انس * رأس أبو سكينة الغريب العالي رمحه

            كتلة مهلاً يا سنان

خليني أضل يمة * نزلي أبو اليمة * أمسح ردت دمة 

أمنين ما باوع لبوي 





الشاعر أمير السعيدي

تقول السيدة زينب (لقد قتل الحسين ، بالسيف، والسنان، وبالحجارة، وبالخشب، وبالعصا، ولقد أوطأوه الخيل بعد ذلك). المجلسيّ: بحار الأنوار ج 45 ص 91. 

أشكالت اهنا السيدة


حسيني على الرمله نام
       بنحره الشمر يذبح كام  
                  عاري بقى على أتلتيام
                          حبيبي حبيبي حسيناه

**

اختة زينب أنه *  حسين عشت احزانه
   خشبه سوه السانه ☆ العطش

وجه أخوي أتچوه *  الشمر بيهه شسوه
   طبر نحر الخوه  ☆ أثنعش

رجع داسه بصدره *  وسب علي والزهره
   حسين فوگ الغبره   ☆ انفرش

الشمر مابي رحمه * من لحيتة يلزمه
   حسين لا ميلمه ☆ نعش

يموت على ذيچ التربان * بلا ثوب يبقى عريان
سابح بدمه وعطشان ☆ حبيبي حبيبي حسيناه

****

مات أخوي أكبالي *  الغالي راح الغالي
على الرمل بالتالي ☆ أنطرح

مفطرات شفافه  *  والشمر ما عافه
صعد فوگ أجتافه  ☆ وذبح

ضل يطبره بسيفه *  يذبحه كام بكيفه
ردته بس يعيفه  ☆ انجرح

ما يتركه بحاله  *  رجع ودناله
كطع راسه وشاله   ☆ فرح

موتني من شال الرأس *  يضحك يراوي للناس
حسين انذبح جسمه انداس *  حبيبي حبيبي حسيناه

*

انسلب ياعالم *  شكد أناني ابنادم
أخذ منه الخاتم  ☆ غصب

حسين آه ومصابه * گلف حيل اصوابه
خذو حتى ثيابه  ☆ الغرب

ذبحو اهله وناسه *  وچم شمر الداسه
عمامه ماكو برأسه  ☆ صعب

عالي أخوي اونينه *  نصيحه ميحاچينه
يحرك برجلينه  ☆ الترب

بعد السلب جتي الخيل ★ صعدت عليه داست حيل
كلشي ضوه اصبح ليل ☆ حبيبي حبيبي حسيناه

***

آه يوم العاشر *  كمت احاچي الحافر
كتله عوفه الباچر ☆ اعتذر

اهواي أخوي تعذب * جروحه كامت تصعب
على الحسين تگرب  ☆ عثر

الحافر تخيلتة  *  شلع مدري أشفتة 
عظم من خاصرتة  ☆ انكسر

فلا قدر وضعه  *  كام جلده يشلعه
رفس رفس بضلعه  ☆ انحفر

ابن امي صدره محفور ★ ودم النحر ضل يفور
يقره زيارة عاشور  ☆ حبيبي حبيبي حسيناه

**

راحو الخياله *  لكن بيا حاله
حسين محد شاله  ☆ يون

بكل مكان مطشر  * ذبل جسمه من الحر
صدره گله اتكسر  ☆ طحن

عنه باجر نرحل  * ويانه رأسه معلعل
يباوعلنا ننذل  ☆ يحن

الشمر من يسبينه  * يحط حبل بيدينه
حسين يبچي علينه  ☆ حزن

على الرمح رأسه وينوح ★ يبچي علينه المذبوح

حي باقي اشوفه وبي روح ☆ حبيبي حبيبي حسيناه



الشاعر أمير السعيدي

#زيد #الشهيد


مثل أبن مريم زيد صلبوه 
            ونحفر گبره وجسمه حرگوه
چان على صدره أسم الحسين
                 أصبح رماد وصدره ذروه

**

       كلمن يموت بساعتة وحد يومه
        ما شفت ميت سالبين هدومه
       زيد أنصلب عريان گلفه همومه
     والشمس تحرگ بي تغير أرسومه

      ضل على الجذع ياناس عريان
      والنحر خشبه من العطش چان
       يعذبونه كلما يذگر حسين
     ورأسه الشريف الضامي گطعوه

☆☆☆☆

سهم البجبهت زيد عذب گلبه
كالو اذا يطلع يموت بغربه
ماتت أطرافه الكومه صارت صعبه
جابوله ماي ورفض زيد يشربه

         بالماي شاهد وجه الحسين
         وذيچ العطاشه البصوايين
        غمض عيونه من الحزن مات
             وصحابه يم النهر دفنوه

☆☆☆☆

زيد الشهيد أوسفه خانو ناسه
دلو بگبره وأجو گطعو رأسه
بس مو مثل جده الشمر من دأسه
وتربع بصدره وكطع أنفاسه

            نفس الحسين أتحمل ألام
              ونذبح رأسه وراح للشام
          أسنين ضل جسمه على الجذوع
             واهل الحقد رفضو ينزلوه

☆☆☆☆

أكبال الجسم وكفتله حرمه چبيره
تحشم بزيد وروحه حارت حيره
ما عنده رأس اوجهة الهه يديره
أهتز الجزع ياناس من الغيره

     صح جسمه ضل مفارك الرأس
       بس بعده عايش چنه عباس
         يشبة محمد بالوجه زيد
        يا وسفه جسمه عاري خلوه

☆☆☆☆

إني ادري گلبك هل المصيبه أتألمه
شسوي زيد ويحترك كل جسمه
ولد الشمر ياناس طحنوه عظمه
وبالنهر ذروه وبعد شيلمه

أبزيد اجرك عظم الله
هذا أبن فاطم احيي ذكراه
طوف على گبره وشم التراب
زيد الشهيد اهوايه ضلموه




خادم أهل البيت
أمير السعيدي

#رقية #بنت #الحسين

رقية مخاطبة اخاها زين العابدين.ع..  


ياعلي راسمن فوك الرمح ☆
ياعلي سـتوه چنه منذبح ☆
هذا يشبة وجة أبوي "" "" يا علي

****

الشال راسة * خوية سأله * مودي گله الرأس وين

كلمة لجلي * خل ينزله * اردن أشوفن وجة زين

شو أحسه * بعده عايش * يبچي وعلية حزين

هذا يشبة * رأس أبونة * هذا لا هوه الحسين

      ياعلي الرمح ما ينحمل ☆
    ياعلي برأسه يدخل مو سهل ☆
      شنهو ذنبة والدي  ،،،،، ياعلي

****

علي خوية * جسمة وينة * انة ما شفتة من امس

كمت اشمن * عطر جسمة * ومو بعيد عليه أحس

خوية أوكف * ذاكة هوه * الحافر موتة رفس

صدره ذاكة * الچنت أشبكة * ليش حاركتة الشمس

         ياعلي ضل حبيبي عالتراب ☆
         ياعلي أمشينة خلبسة ثياب ☆
        عنه ما ودي اروح،،،،  ياعلي

"" "" "" "" "" "" ""

خلني أمشي * جوه رمحه * أمتلن رجلية شوك

ويه راسة * ارد اسولف * بوية كلشي سلبوك

أشچان ذنبك * يا حبيبي * ثنعش طبره طبروك

چنت أسمعك * تصيح ضامي * ماي گلي شربوك

ياعلي جاوب وذاني حيل ☆
ياعلي اهواية صعدن فوكي خيل ☆
ونسحكت وانه عطشان،،، ياعلي

"" "" "" "" "" ""

ليش أدية * مچتفيهه * ويني وين الحبل

من أذاني * دمي يجري * شكثر طحت من الهزل

رأس ابوية * أكبالي يمشي * يميل رأسه وينعدل

شفافة بيضه * وجه ذابل * العطش ما ينحمل

ياعلي ولو صعبة عدنه هاي ☆
ياعلي نزل أبونة نشربة ماي ☆
ناشفه ارياك الحسين،،،  ياعلي

"" "" "" "" "" "" "

مدري عدلة * مدري ميتة * ياعلي كلي متت

من اطيحن * كمت اصيحه * عليه راسة يلتفت

شفتة حرك * شفافه الية * وبس كلمتين أسمعت

يا رقية * أستعدي * نالتقي فوك الطشت

ياعلي تدري وشكال الحسين ☆
ياعلي اشلون أشبگچ ماكو أدين ☆
فوك راسة اتمنه اموت،،،  ياعلي


الشاعر أمير السعيدي


https://www.tg-me.com/dhjgdsswfgh

#لسان #حال..
#عزيزة #الحسين #رقيه .ع.


بـويـة لا موعـادتـك ☆ أفـرشت ســجـادتـك

بـالطشت نايم بـقـيت ☆لـيش ما صليت أجيت

** 

أنه طفله وكلبي شيب
أفـراك وجهـك صعـبـة مـوسهله علية

ما أصدك تنسى بنتك
أشـلون روحـك صافـحـت چف المنية

بــويـة أكعد ليش نايم
 صـلي فـرض أوداع وي بـنتـك رقية

قـدمـتـلـك بيدي تربة
أدري ما عنـدك جسم صلي أعلى أدية

رأسك مبچيني ☆ أگعد وحاچيني

بالحمد أني أبتديت ☆ ليش ما صليت أجيت

**** 

بـــالخرابة من ذكرتك
رادو يـسـكـتـونـي وبـراســك ياغالي

فجأة أسمع بذني صوتك
يــارقـــيــة تــكـلـي يـبـنـيتي تعالي

مـغـطه شفـتك ماعرفتك
شـوفــت الـمـنـديل ذبحت كل دلالي

ومن رفعتة وشفت راسك
بويه جبرائيل ظل يبجي اعلى حالي 

من شـبكـتـة الـراسك ☆وكمت أشم بـنفـاسك

وي وحي الله بچيت ☆ ليش ما صليت أجيت

***

يـاهـظـيـمـة بـلايـه والد
النار حركت ثوبي وسنيني وعمتني

من سبوني وچـتـفــوني
أبچي فوك الناكه ونحب چي عفتني

الحادي أجاني سياط بيده
كـلي لاتـبچـين أحذري وضرب متني

الناكه عثرت من ضربني
ونـحـنـه الـناكه ظهرهه وطيحتني

بـويه شاغت روحي ☆ وكمت ألم بجروحي

عالارض وحدي أنحنيت ☆ليش ما صليت أجيت

* 

سنيني كصرت وانه طفله
من عگب ماچان حضنك هو عرشي

وهسه حضنك باقي عاري
وراسك براس الرمح وكبالي يمشي

عيوني تبچي أعلى ابوفاضل
الدمعه تسبيحت علي  أتمر أعلى رمشي

أدعــي الله بـأنـبـيـائة
أتمنه ميتة وينحمل عالناكه نعشي

كون أموت أبــأيدك ☆ ويـالرضيع أولـيدك

وبنفس سهمه أندعيت * ليش ما صليت أجيت

* 
        
بوية أصعب لحظه مرت
أطـاول يـزيد أعلى عمتي وجزه حده

كـلهه الله شـفـى كـــلبي
من ذبحت حسين عطشان وي ولده

أشكد دمع شربت عباتي
مـن بچيت وحاولت عن عمتي ارده

مالي قدره شرد اسوي
كــمـت اقره البسمله بوجـه أبن هـنـده

بحـسره أقره أيـاتي ☆ وگبرن دمعاتـي

بوجه چم أيه قريت * ليش ما صلـيت أجيت

* 

أبـمنامي چـن أجـتـنـي
الـزهـره أمك وبحضنهه طفل ضامي

لانــه عـبـدلله أخـيــي
راسه بچـفوف الـزچـيه ونحره دامي

يارقيه الزهره صاحت
حـسـين أبـوچ تـكطع وذبحـوه أمامي

شبكي نحره بوسي خده
من تشوفـينه بطشت وصلي سلامي

لبني جيبي عمامتة * وسبحتة وسجاتة

وبوصيتهـة أعتنيت * ليش ما صليت أجيت



    الـشـاعـرأمـيـر الـسعيدي


https://www.tg-me.com/dhjgdsswfgh

#حب #الحسين #جنني
#ولائية #بحب #الحسين


أمروتك حسين خليني خادم عندك
أمروتك حسين احسبني ولد من ولدك
بمجلسكم اقبلني،، وبكد حمزه حبني

☆☆☆☆☆

انه ازغر خادم ،، شكد تحبني الوادم
چي أحبك إني

يا حسين امروتك ،، إسمي كوله بصوتك
يالملكت ألساني

والله أبد ما تنمل ،، عيشتني مدلل
مجلسك رباني

الخادم ادري اتعزه ،، فدوه اروح الحمزه
احسبني حمزه الثاني

حمزه الچبير ،، خليني امشي بدربة
حمزه الچبير ،، ارزقني فطرة گلبه
يحسيني لتردني،، وبكد حمزه حبني

☆☆☆☆☆

اوياي تحچي الوالده * يبني منك رايده * لا تعوف حسينك
سوي موكب بأسمه * بالعزة تشوف أمه
وهيه راح تعينك
بخدمتة لا تبرد * البس عليه أسود
وابچي والطم عينك
حسين أعز من والد * حسين مو اي واحد * بحبه كمل دينك

يمه الحسين ازعل اذا متخدمة
يمه الحسين سميتك انه على اسمه
بحب فاطمه ارزقني * وبگد حمزه حبني

☆☆☆☆☆

من اجيلك حافي * والحچي بشفافي
كمت اشوف خيالك
چن وكفت أكبالي * تگلي يبني اقرالي
وانه أون وقرالك
الشمس چوت ظهرك * الشمس حرگت نحرك * ولاشخص فيالك
يبو الشيبة الحلوه * يسحگك المايسوه
وتالي محد شالك

آه ياحسين كون اني داسو صدري
آه ياحسين والشمر يگطع نحري
وياك أبتده حزني * وبگد حمزه حبني

☆☆☆☆☆

بطيفي وجهك شفتة * تحچي وياي أنت * حزمتني برايتك
كتلي لا تتكبر * بخدمتي تصير أكبر
واني اخذت حچايتك
الراد زله يدور * الخدمة حيل تشور
الله حب اقرايتك
أقبلني ورحم حالتي * ادري موش بعازتي * حسين إني بعازتك

اتمنه أموت وحسين راضي عليه
اتمنه أموت أباب الحسينية
يا سيدي أوعدني * وبگد حمزه حبني

☆☆☆☆

الما عرف تقديرك * الراح صافح غيرك
أباله أقبح نية
بدينه ضل يجامل * سبع اوجهه شايل
كل وجه يومية
يدعي بالخدمة * الخدمة لا يمه * أشجابة على اللطمية
المنافق گله * العزة لا يوصله * ترضه على البعثية

يبچي عليك ويصافح الي ذله
يبچي عليك ومن مات يترحمله
عن ملتة أبعدني * وبگد حمزه حبني


الشاعر أمير السعيدي


https://www.tg-me.com/dhjgdsswfgh

#مجنون #الحسين


مـثلـه ما الگـه ☆ حسين أبو الـملگـة
مفخره عشگـه ☆ صار الحسين

☆☆☆

الف شكرا يالهي * بطينتة مسويني

بعيني إذا ماشوف وجه * بيدي افگس عيني

اغله إنسان بحياتي * بخدمة مربيني

والله ابيعن كل جهالي * وما ابيع حسيني

غيره ما عندي ☆ أنه أله جندي
اغله من ولدي ☆ صار الحسين

☆☆☆☆☆

كل حواسي بي شغلهه * عيوني آله مشبوحة

اني والصرت ابطنهه * نروح فده الروحه

حسين ياعالم صحبتة * من الله بيهه ملوحه

أبنادم يسد بابة عني * وبابة الي مفتوحة

عني ما يبخل ☆ أنـي الـمدلـل
حـبـي والأول ☆ صار الحسين

☆☆☆☆☆

بخارطة عقلي رسمتة * حبه حب رباني

خدمتة خدمة عظيمة * مجلسة روحاني

حسين أبو الروح الحنينة * يسوه كل أخواني

الساني اذا ما يحچي بأسمة * والله أكص ألساني

منخلق لجله ☆ عمري ما مله
باب للقبله ☆ صار الحسين

☆☆☆☆☆

بنادم يمن بعطائه * حسين موش بمنه

دومه فارشلي شليله * يگلي أخذ واتمنه
عندي موكب بي اخدمة * أحلى من الجنة
ياالهي بروح فاطم * منه لا تحرمنة

بضله جامعنة ☆ رتبة رافعنة
انحبه ويحبنة ☆ صار الحسين

☆☆☆☆☆

أنه الاشوية بوجوده * حسين عندي أهواية
گلبي رجلية ظميري * تمشي آله مشاية

وياه كل مصلحه ماكو * حبه هوه الغاية

چفي أحس قرأن يقره * من يشيل الرأية

فدوه اله حيلي ☆ دومه يدعيلي  كمرتي بليلي ☆ صار الحسين

☆☆☆☆☆

أنه بالدنيا وشعندي * هوه بس هلواحد

حسين من يرضه علية * من الله أنه شرايد

خيمة ومفي عليه * عندي أعظم والد

كل أحاسيسي ملگة * براسي أحسن كاعد

آيـة الـكـرسي ☆ واعــز مـن نـفسـي
هلالي بل شمسي ☆ صار الحسين



الشاعر أمير السعيدي


https://www.tg-me.com/dhjgdsswfgh

وداع #الحسن مع #الحسين


            عـيـون الحـسين أنـعـمـن ☆
            من البواچي على الحسن ☆
    شلون راح يدفنه ☆ مات اخية بحضنه
               الله يساعد حسين

**
الحسن من وضع راسة بحضن أخية
كله بالطف كون احط رأسك بدية
كون أني الشمر يتربع علية
باچر أدوسك خيول الاعوجية

عشر خياله تمر ☆ كل فرس فوكاة شمر
كلهم يسحگونك ☆ بلا غطى يخلونك
               ألله يساعد حسين

***
فتح عيونة الحسن ومعصب الهام
حسين يومك ما تشبة كل الأيام
صدرك الكله محنه يمتلي أسهام
باچر بحضن الحصيره مكطع تنام

انه وضعي اهواية زين ☆ گلبي يمك يا حسين
هله هله بروحك ☆ شيبتني جروحك
الله يساعد حسين

*
حسين من حس بأخية صوتة خافي
بلا عمامة ركض شاله وطلع حافي
يصيح يابومحمد أكعد نوم كافي
قاسي گلبي وشلت جسمك على أچتافي

يا چبير العائلة ☆ ضني تمشي الكربلا
رتك تضل يمي ☆ تلم بقايت جسمي
             الله يساعد حسين

****
للگبر شاله الحسين يبچي وضعة
بوصله بيضه لفه بس يؤن يسمعة
حسين حط ايده على صدره وباس ضلعة
كله اخيك ضلعه باچر من يجمعة

إنت ضلعك يندفن ☆ وأني ضلعي ينطحن
شيبتي تتچوة ☆ وكوه الم كوة
              الله يساعد حسين

**

الحسن من مات اكو خوان عنده
بس أبو سكينة الغريب يموت وحده
ثلث تيام بشمس محد يوسده
حسين باچر من يحط ايدة على خده

ويلي يبقى بلاية رأس ☆ محد بلوعاتة حاس
نحره عالي أونينة ☆ حسينة مطشرينة
               الله يساعد حسين


الشاعر أمير السعيدي


https://www.tg-me.com/dhjgdsswfgh

#الحسن #المجتبى (#رسالة #الزهراء)


لا تفرق بين ولدي ☆ عليك لتزعل المهدي
الحسن إبني الچبير وفتشت العين
ليش متقيموله مجلس مثل الحسين

***
يخدامي * يبو الهيئة * لا تكسرولي ضلعين

الحسن ذكره * بمجالسكم * هاي بركبتك دين

بصفر أخدم * فلا تبرد * دور على العزه وين

أذا تحبني * الحسن أبني * حبه بگد الحسين

ضلعي لازمتة وجيكم ☆ المهدي لتزعلو عليكم
المهدي بالمجلس يصيح ومحمر العين
ليش متقيموله مجلس مثل الحسين

***

اكو وادم * تحب حسين * الحسن وياه بخيله

واكو ودام * لجن قله * عزاهم ليله ليلة

البعض منكم * يشيعتنه * مو صاحب طويلة

مقاهيهم * اهم صارت * مجالسهم قليلة

ما اجبرك على المجالس ☆ ما اريده الماله واهس
أنه اريدن واحد يكول العزه وين
ليش متقيموله مجلس مثل الحسين

****
يشاعرنا * يا ملتنه * باجر شنو عذرك

قصائدكم * طرف واحد * بـبـنـي ما تذكرك

يبو الموكب * وحق ضلعي * المجلس ما يخسرك

الف تنطي * ضعف تاخذ * بين الناس اكبرك

علي شانك بين الاخوه ☆ الحسن نفس حسين هوه
همه واحد لا تكلي صارو اثنين
ليش متقيموله مجلس مثل الحسين

****
الحسن مني * وانه منه * قيمولة عزية

على حسيني * فقط تبجي * وما تبجي على اخية

جلد كلبك * على اوليدي * لتبرر الية

بمجالسكم * اجي والطم * وجبده ابين ادية

شكثر مظلوم إبني الأكبر ☆ وجاي هسه اتظلمه أكثر
هذا أبن بطني وحبيبي وماله وجهين
ليش متقيموله مجلس مثل الحسين

****

اوصيكم * العزه ذمه * لتخلوني اعاني

ترى الخدمة * تحب واحد * ميكول اني واني

تعال اخدم * تعال الطم * بس لتصير أناني

تذم مجلس * تحب مجلس * وتتدخل عزه ثاني

اهواية عثرو ترى كبلك ☆ بلا تواضع ما نقبلك
خدمة حسين وحسن مو لطم أدين
ليش متقيموله مجلس مثل الحسين


الشاعر أمير السعيدي


https://www.tg-me.com/dhjgdsswfgh