ذايبة الروح ابصفاتك...يا رسول الله شغلاتك
نبض كلبي الكاه....يارسول الله
##########################

ترف شفتك ثكل جدمك منة ما فزت حمامة
اه يرقتك. دست بيت العنكبوت وضل نضامة
شنهي جفك. كلة رحمة ويطش عالوادم سلامة
شرد اوصفك. ضابط انسانيتك بدور الزعامة
سيدي اوصافك عجيبة....سيرتك مليانة طيبة
ذكرك شمحلاه....يارسول الله
##########################

شنهي ذوقك. عفت كل الجنة وختاريت ثمرة
واليلومك. ماعرف ناتج ثمرتك طلع زهرة
مايعوفك. العرف منك خضرت للدين شجرة
وبنزولك. جبت من الله هدية وياك عترة
جبت من الله هدية.....هالبدور الفاطمية
فضلك شينساه...يارسول الله
##########################

ياقرابة. بينك وبين الله قوس ويمكن اقرب
ياهذابة. شكد خلوق وحبك اعلة اخلاقك الرب
ياخطابة. السانك يطش ورد لو عالناس تخطب
يا اجابة. كبل ماتطلب من الله يكلك اطلب
ياقريب الله يشوفك.....قبل ماترفع جفوفك
يحقق التنخاه...يارسول الله
##########################

ياجمالك. نور من وجه الله بخدودك يشع
وبمثالك. بس علي ومنك علي ماخذ طبع
من خلالك. كلمة اقرء للعلم خطت فرع
وبوصالك. الباري مدلنة حبل ماينكطع
انتة سيد الانبياء.....ياصلتنة البسماء
شكثر عندك جاه....يارسول الله
##########################

يانبوة. كلفك بيهة الله هالكد ما امين
يا اخوة. البينك وبين الوصي ثبتت دين
يامروة. تنطي ثوبك لوشفت متعففين
ياابوة. من رحمتك صرت ابو للمسلمين
مالي كلبك بس حنان.....ياملاذ ويا امان
الوصف يمك تاه...يارسول الله
##########################
ذوالفقار الزيدي

شما تصد للباب عيني.....اترس البيت بونيني
الباب سواهة صدك...كسّر ضلوع العشك

#################################
تنفطر حيطان حيلي من اصد وتذكرة
يالزجية شوفي كلبي قطعة قطعة مفطرة
ماحجيتي بكسر ضلعج بين من الخاصرة
ماحجيتي..وبينيتي..تغيرتي..يازجيتي
من شفت حانيتة ضهرج ...ايست ميطول عمرج
كمت بالذكرة اختنك ..كسّر ضلوع العشك

#################################
جم منية تمر علية ابيوم عالبسمار اصد
قاسي مابي كل ترافة شخلة بهروش الورد
مري بية وشوفي حالي بية شمسوي البعد
بيتي ضلمة..بروحة امة.. وكلبي همة..وين اضمة
المن احجيهن همومي...فاطمة عينيني كومي
مو وكتهة ونفترك..كسّر ضلوع العشك

#################################

كمت ادور وين حيلي بياكتر من بيتي طاح
ثاري يوم الشلتي مني بالنعش وياج راح
شلون حيل يضل عليك ودمج اعلة الباب ساح
راح حيلي..انطر دليلي..وبس عويلي..ايعرفة ليلي
اليل من يمر علية ..ياخذ شما حيل بية
للعمر ماضل خلك..كسّر ضلوع العشك

#################################
اطبك اليل بنهارة وجفني مايطبك ينام
الصبح تكتلني الطواري اليل يكتلني الغرام
اثمنطعش وردة حياتج بلجفن تلف حرام
ازغير عمرج..وردة جنج..ليش اجفنج..وبيدي ادفنج
عالكبر بعدج زغيرة..المثلج ايعيشوهة اميرة
مو يجازوهة بحرك..كسّر ضلع العشك
#################################

الدفن بجفوقة عزيزة ايكضي كل سنينة ون
وشنهي عمرة الراح عمرة وحضنتة جفوف الجفن
البلترب وسد حبيبة هذا يعرف شندفن
الوسد احباب..جوة لتراب..وهلة غياب ..جرحة ماطاب
وانة دافن بيدي روحي..والله يعرف شنهو نوحي
الهوة اشتمة ابشهك..كسّر ضلوع العشك
#################################
ذوالفقار الزيدي

انة وية الحسين وحسن
لمن غدر بينة الزمن
قمنالج ابمجلس عزية
واحنة البدينة الفاطمية

#################################
مجلس عزائج مبتدي ورادودة جان حسينج
ابفتحت عزة يافاطمة والحسن يصرخ وينج
وطب للمصايب وانتحب وجاب الحجي الخدينج
يافاطمة وعيني انطفت لمن وصل حد عينج
كلة الحسن خوية استمر
بس اعلة هونك بالكسر
وحسين ون وي ون اخية
واحنة البدينة الفاطمية
#################################
زينب اجتنة وشاركت وكلتلة عيد اشكايل
سولفلي جايب ياجرح شو ضهرك شبي مايل
كللهة ما اعيد استمر بالقصة واحد عايل
ماواصل الهذا الجرح زينب يخيتي شناقل
كلتلة اخوي اشبي غضب
كلهلة اسوالف عالحطب
والنار من شبت سرية
واحنة البدينة الفاطمية
#################################
وحسين ضل يروي القصص وعلخد دمعتة اتلالي
اهتز كلة من كتلة لمن كلي الجرح دلالي
حسيت بالغالي صدك لمن يودع الغالي
كلالي اذيتك احس كتلة استمر واقرالي
كلالي اذيتك احس
كتلة انة لمضيع نفس
مضيع اعز مخلوقة الية
واحنة البدينة الفاطمية
#################################
عالمنبر وضل يرتجل والحانة مامسموعة
والنفس يطلع جن جمر من ريتة الموجوعة
حسيتة كدما محترك متفرد ابموضوعة
ولمن وصل يم لضلع ضل يلطم اعلة ضلوعة
ضل عالضلع بالجف يدك
ويصيح ياضلع العشك
اوويا نصيح اه يالزجية
واحنة البدينة الفاطمية
#################################
ابهذا العزة وتخيلت وابالي مر فد احساس
شيسوي يلطم ينتحب لو جان حاضر عباس
بضهري واحسنة جمر ويتوعد الذيج الناس
ايكلي يطلعني الزمن اوطبكه راس اعلة الراس
يكلي يطلعني الزمن
والناس اشدلهة الرسن
ويكلي غيض الزهرة بية
واحنة البدينة الفاطمية
#################################
ذوالفقار الزيدي

بجفوفك اتوسد الورد اه ياحسافة
وتلامس اخدود الرمل خد الترافة
بيدك دفنت الورد ..شيصبرك اعلة البعد..علي ياعلي
#################################
حلمك الوردي دفنتة واجمل سنين
وبلّيالي انباك حيلك من الونين
الوحدك الله يعينك مالك معين
وعلة نوحك تبجي خليت الحياطين
بجيت حيطان السكن منكد ونينك
دافن بجفك زهرتك الله اليعينك
للفركة دمعك يعد ..شيصبرك اعلة البعد علي ياعلي
#################################
ترفة فاطم ياعلي والكاع خشنة
اشلون خليت الرمل عمرك يحضنة
صعبة عالعاشك حبيبة من يجفنة
وبالاخص لو بعدة ما شبعان منة
بعدك بعازة زهرتك من فاركتهة
وتوادعت وي ضحكتك من وادعتهة
راحت بعد ماترد..شيصبرك اعلة البعد علي ياعلي
#################################
ياعلي بس الدفن بيدة حبيبة
يعرف اشمرت عليكم من مصيبة
الراح منك شاعل بكلبك لهيبة
الماخذة جف الكبر كلي اشيجبة
ماترجع الزهرة بعد ياحيدر الكم
ماخذهة جف المكبرة وطشر شملكم
ماخذهة جف اللحد ..شيصبرك اعلة البعد علي ياعلي
#################################
ياحسافة زهرتك دفنو عطرهة
اندفنت وضل عالكبر واضح كسرهة
شنهو ذنب الزهرة والضالم عصرهة
بين باب وحايط يخلص عمرهة
خلصت اسنين ام الحسن ياوسفة بكسور
وطبع الورد ماينشتل بلحود الكبور
ونتة علة كل ذن تصد ..شيصبرك اعلة البعد علي ياعلي
#################################
موش طبعك تارس البيت بونينك
وبس دمعتك ياعلي بجرحك تعينك
حقك اتون مابقت ضحكة سنينك
ياحنين وبيك شمسوي حنينك
ياكتلة احساس وترف ونوبة فاكد
واليل بيك شمايمر يلكاك كاعد
من الحزن منمرد ...شيصبرك اعلة البعد علي ياعلي
#################################
ذوالفقار الزيدي

امنة اجمل احلام..وبمكبرة اتنام
لحسين يحجي وية الحسن
ليش امنة غطاهة الجفن..وبمكبرة تنام
#################################
ابحضن امنة..حنان الله..ونحس ابرحمتة اتضمنة
دفو الدنية..ابسولفهة..ابترافتهن تنومنة
اعلة بسمتهة ..الكلب يفرح..ومشاعرهة ابمشاعرنة
جلمت اليمة امن الصبح تترنم
اسوالفهة للمجروح تصلح بلسم
صلى اعلة طيبتهة الاله وسلم
منبع وفة وطيب..مانحمل تغيب
اسولفهة طيب وينحجن
ليش امنة غطاهة الجفن..وبمكبرة اتنام
#################################
بعد بينة..اعلة شوفتهة..عمر نوح وبعد اكثر
ولانحمل..تفاركنة..لانكدر ولاتكدر
الحزن ياكل..بالمفارك..اشكثر بعُدة الجرح يكبر
يعكوب حزنة الابنة بيض عينة
وابنة عدل واخبارة توصل زينة
شيسوي لوبي صار هذا البينة
البينة اعلة يعكوب..لوصاير يذوب
مادافن اوليدة وحزن
ليش امنة غطاهة الجفن..وبمكبرة اتنام
#################################
ولاشيبة..اعلة راس امنة..كبل ماشيبت راحت
مثل وردة..بدت تزهر..ومثل ذوبت شمع ذابت
مثل وركة..ابخريف اضلم..غمضت عينهة ونامت
يكسر الحيل الرايح ابمو وكتة
الريحان صبعة من اهلة يرحل سكتة
ابحظ الكسر ضلع الزجية وبختة
ازغيرة علة التراب..مات الفكد شاب
ادموع العزيز ايجرحن
ليش امنة غطاهة الجفن..وبمكبرة اتنام
#################################
طبع وردة.. واضن اترف..ضلعهة شيحمل العصرة
نذل يدفع..عفيفة اتصد..ستر ويحامي عن سترة
الحدود الله ..ضلع ضحت..ونطت محسن وعمرة
ابيت الله واباب الله لاذت كوثر
اوعرفو وصية القيدت جف حيدر
دفعو الباب اعلة الضلع وتكسر
وطاحت علة الكاع..مكسورة اضلاع
لجروح مايتضمدن
ليش امنة غطاهة الجفن.. وبمكبرة اتنام
#################################
التروح امة ..شلة ابعمرة.. الحياة ابلاية ام صعبة
وسط ناسة..واهل بيتة .يحس مرورة الغربة
ميتعوض ..مكان الام..الله ايعين المجربة
والراحت امة ايحسهة راحت روحة
ايشيب وتنزف ماتطيب اجروحة
والدوح مايوصل ثلث من نوحة
والام اذا اتروح..شتخلف اجروح
شيشلهن اجروح الزمن
ليش امنة غطاهة الجفن..وبمكبرة اتنام
#################################ذوالفقار الزيدي

بيت الاحزان ..بعدة ماشال
جايب اجروح..كلهن اثكال
بعدة نفسة الاولي..وبي عليج ايون علي
بيت الاحزان..بيت الاحزان
################################
البيت بعدة بحطتة..وزايدة اكثر ضلمتة
ومايبين من علي بس المشيب
خدة عالجف منتجي..الذكرة تترجم بجي
مري شوفي ابحيدر اشسوة المغيب
اكبالة يرسم صورتج..ويمهة يرسم غيبتج
ويرسم جروح وكلب فاكد حبيب
ايكابل الرسمة ويون..ودمعتة اتشك الجفن
وتنزل اعلة الكاع وتشب ابلهيب
جفنة مجروح..كلبة مكسور
وحشت الليل..وحشت كبور
والحزن ماينجلي..وبي عليج ايون علي
بيت الاحزان..بيت الاحزان
#################################
الواهس وحيلة انكسر ..ماشبع منج نضر
وبالچفن كلش صعب يتغطة شاب
الكاعد ابنص الكلب..صعبة ينحط ابترب
وجف حبيبة ايذب على اسنينة التراب
كلشي بالدنية اختلف..الهيل شايل بالسلف
والتجاعيد ابعلي ايرسمن غياب
صاير البعدج شمع..وعمرة يذبلج دمع
يعني كل دمعة ابعمر من حيلة ذاب
دمعتة بحيل..صار الحساب
حيدر اعليج..عايش اغياب
بيتة من عندج خلي..وبي عليج ايون علي
بيت الاحزان..بيت الاحزان
#################################
حكة حيدر مختلف..عاشك مضيع ترف
وحتة سنّة اعلة الفرح صايم حداد
امبين ابطولة الثلم..ضاع منة اجمل حلم
الحلمة وردي اتحول ابحزنج سواد
ابالة بابج من يمر..الشيب ياكل بالعمر
صعبة نار اتنوخ اباب المراد
البيت المشبع العرب..ابابة ينشب الحطب
والهلة المعروفة تتحول رماد
دخلت النار..خلفت ارماد
ماجزة الطيب..ناكر الزاد
اجروح بابج ممتلي..وبي عليج ايون علي
بيت الاحزان ..بيت الاحزان
#################################
حكة وضعة اصعب وضع..جفة جايسلج ضلع
بالغسل شاف الضلع صاير حطام
ابنار شوكج محترك..وفوك مادافن عشك
ضالمج يشتم هوة وعينج تنام
ابثار ضلعج يشتعل..ابذكرياتج ينكتل
ساعة ميت ثار ساعة من الغرام
اعيونة من حزنج عمن ..يبجي جي لفج جفن
اثمنطعش وردة ابجفن تلف حرام
زهرتج ليش.. ذبلت ابساع
حلم السنين ..ضمتة الكاع
وحزنة يشرح مايلي..وبي عليج ايون علي
بيت الاحزان ..بيت الاحزان
#################################
صوتة بالون اعتلة..طير ومضيع هلة
ولاغصن زيتونة ويسكت الونين
عش حياتة مهاجرة..اصوابة فوك الخاصرة
رايح ومحبوبة ميت بالحنين
اشمايصد باب انكسر..اشمايصد نار انعصر
بالمنية ايضل يعاتب ماتجين
اهلال ضهرة من الحزن..بُعدج امثكل المتن
وموهذاك الجان ابو الحيل المتين
يوم الوداع..ضيع الحيل
ذَبلت الروح..وحشة اليل
ايطول ليل المبتلي..وبي عليج ايون علي
بيت الاحزان ..بيت الاحزان
#################################
ذوالفقار الزيدي