ذايبة الروح ابصفاتك...يا رسول الله شغلاتك
نبض كلبي الكاه....يارسول الله
##########################

ترف شفتك ثكل جدمك منة ما فزت حمامة
اه يرقتك. دست بيت العنكبوت وضل نضامة
شنهي جفك. كلة رحمة ويطش عالوادم سلامة
شرد اوصفك. ضابط انسانيتك بدور الزعامة
سيدي اوصافك عجيبة....سيرتك مليانة طيبة
ذكرك شمحلاه....يارسول الله
##########################

شنهي ذوقك. عفت كل الجنة وختاريت ثمرة
واليلومك. ماعرف ناتج ثمرتك طلع زهرة
مايعوفك. العرف منك خضرت للدين شجرة
وبنزولك. جبت من الله هدية وياك عترة
جبت من الله هدية.....هالبدور الفاطمية
فضلك شينساه...يارسول الله
##########################

ياقرابة. بينك وبين الله قوس ويمكن اقرب
ياهذابة. شكد خلوق وحبك اعلة اخلاقك الرب
ياخطابة. السانك يطش ورد لو عالناس تخطب
يا اجابة. كبل ماتطلب من الله يكلك اطلب
ياقريب الله يشوفك.....قبل ماترفع جفوفك
يحقق التنخاه...يارسول الله
##########################

ياجمالك. نور من وجه الله بخدودك يشع
وبمثالك. بس علي ومنك علي ماخذ طبع
من خلالك. كلمة اقرء للعلم خطت فرع
وبوصالك. الباري مدلنة حبل ماينكطع
انتة سيد الانبياء.....ياصلتنة البسماء
شكثر عندك جاه....يارسول الله
##########################

يانبوة. كلفك بيهة الله هالكد ما امين
يا اخوة. البينك وبين الوصي ثبتت دين
يامروة. تنطي ثوبك لوشفت متعففين
ياابوة. من رحمتك صرت ابو للمسلمين
مالي كلبك بس حنان.....ياملاذ ويا امان
الوصف يمك تاه...يارسول الله
##########################
ذوالفقار الزيدي

شلون اغمض اعيونك انته اعيوني
اوين الاكي المثلك ايفهموني
يابو روحي الشيب لاح اجفوني
روحتك كسرة ضهر
#################################

يا اول مهاجر في سبيل الله نور موطن الهجرة
يمخضر العقول بمنطق التوحيد الجانت بالفكر صحرة
يا اول قريب الواصل القوسين الله امقربة ابأمرة
يالطب جنة ادم بس نزل مبخوت جايب فاطمة الزهرة

يابو جف العيش الناس بنعيم
انتةبسم الله الرحمن الرحيم
وصدرك اأوى امن الكهف واهل الرقيم

روحتك كسرة ضهر

#################################

بيت العنكبوت ابغارة شاهد جان عن اترف بشر انتة
وجدمك من وطت ياترف اوهن بيت نسمه الما مخلبصتة
وشاهد عن مرورك جان نسمت ريح الطير الما مجفلتة
ساك العرش ساكك فرزناهة الطير ومن مريته امنتة

مو سليمان الجفل منة النمل
العنكبوت الشافك ايريدك تضل
بنه بيته وجان بسمك يبتهل

روحتك كسره ضهر
#################################

يا اول صديق بطعم ابو الكرار كل اسنيني عاشرني
ياكشخة الدين ولذة التوحيد وابيض نية سايرني
يمشارك احساسي بخوة الاسلام من اعيوني فاهمني
ياكلمة الآقرء في لسان الله بكل ماتحتوي وتعني

انته اعظم منطلق دين وعلم
وانته جفك ياس يرمز للسلم
الخوتك ينكال بس الونعم

روحتك كسرة ضهر
#################################

يبديرت اعيونك كلشي بيه ايموت موش ابجفي اغمضهن
رد معجزة خيبر رمدن لعيون جفك خله يمسحهن
رد حيل السواعد راح منهة الجان لمقفلات يشلعهن
متبسم واشوفك بالجفن مرتاح بس دموعي شيكضهن

انته تعرف مدمعي الياهم يسيل
الملكه راح يصير جن نار الخليل
فقط برداً والسلام ايضل قتيل

روحتك كسرة ضهرة
#################################
ماسبلت ادينك سبليت الخير والرحمة ومعانيهة
مالفك جفن لفيت انه الايام واجمل طيف مر بيهة
ماشلتك شلت اجمل حلم مذبوح واسنيني ومواضيهة
ماودعتك اني اودعيت الروح روح وشال راعيهة

انته شايل وانه شلي بهالحيات
بعد عينك اهون اعليه الممات
النعمة من تروح تنعد بالوفات

روحتك كسرة ضهر
#################################
ذوالفقار الزيدي

ذكرياتي..باب دمعة ضلوع نار
ذكرياتي.. شيب و احزان اوزغار
##############################

الذكرة ليل.. غمض عيون الصبح
بي وداع..راسم بطولي الجرح
ياهواي..الشهكة من بعدج رمح

شهكة .. وروحي ..توصل الفركت حياتي

وذكرة..الصوتج .. يا آميرة ذكرياتي

الحجرة ..السبحة ..ذني ميتات امنياتي

وشوغة ..وحسرة ..الباقي عن لحضة وفاتي

عن مماتي ..احساب جم دمعة التطيح
عن مماتي .. الناعي بس لحضة ويصيح

###############################
الحسرة باب .. كاسر اضلوع الورد
الدفعة اه..الثالث ازغار الولد
الصعبة حيل ..مو مهد نام ابلحد

زينب ..جانت..امنيتهة اتناغي اخوهه

واخت ال ..محسن ..اخوتهة عود ايلقوبهة

وتكعد ..يمة ..اتلولي اله ابأمجاد ابوهة

لكن ..وسفة..موتوه..وعذبوهة

اووية زينب ..اذكر المحسن وانوح
اووية زينب.. افتح ابواب الجروح

###############################
الخنكة شوك ..وانه من شوكي اختنك
والغروب..يعني اجت ذكرت عشك
بعد اديج ..بثوبي ضل عطر الحرك

رحتي ..وصارت..بس تشم دخان ريتي

وكلشي ..ضلمة.. وفقط شيبي بلون نيتي

ليلي ..ايمرني..ايشوفني بعازة زجيتي

شنسة ..وانتي ..اهنا كعدتي اهنا حجيتي

اتكلي بابج ..روحي ونفيض بدموع
اتكلي بابج..وانه اكللهة الضلوع
###############################
الدار ماي..عالحبيب وغسلة
السدلة عين..ايضل غريب بنص هلة
شيقرة ليج..اليختنك بالبسملة

شقرة..الروحج.. الفاتحة اقراهة اعلة روحي

الماتت ..بعدج ..والعدل بس باقي نوحي

غالي ..افراكج..وكمت اثوبله ابجروحي

كسرج ..بية..واضح ويشبه وضوحي

وبخيالي .. كام ينشاف الوداع
وبخيالي.. راسم اسنين الضياع

###############################

والله موت..شيلت الزهرة بنعش
بالتراب..انتي لوحيلي انفرش
يابخور..انشعلة لبن اثمنطعش

شيعلك ..يمج..الماشبع منج سوالف

الكلبه ..بعدة ..يحسج اسوالف مضايف

انه ..شحالي..بعيني لوعرضن مواقف

شبقة..العمري..وانه كلشي اعليج عايف

انتي رحتي.. وصغت عمري ادموع عين
انتي رحتي.. وانه رايح مدري وين

###############################
ذوالفقار الزيدي

اتواردت عدكم بالضلوع وادموع يالمهدي الصور
فاطمة انسطرت علة العين وحسين مصيوب ابحجر

وصورة للنار ..تطلب الثار ..يابو صالح
###############################

بيمن ابدي ابيا توارد وانته ياذيك الجرة
يابو دمع الدم تهلة الكل جرح تتصورة
راح اكلك عن توارد للحزن مو تذكرة
العشرة لعلة الباب هجمت ردت الجدك ترة

العشرة ذيج التدفع بحيل بالخيل رد بيهة الزمن
والتشابه ضلع الحسين مابين ضلع ام الحسن

اجروحة الكبار ..تطلب الثار ..يابو صالح

###############################
الفطرت الحايط دفعتة وكسّر اضلوع الورد
فطّر الجدك شفاهة من كثر حر الچبد
الخلة فاطم كلهة دمعة الثالث ازغار الولد
خلة الحسين الرضيعة ايشبكة شبك المايرد

المحسن الماشاف الكماط بنياط عبدالله انرسم
والمثلث جان بسمار والصار بي نفس الالم

ادموم الزغار ..تطلب الثار ..يابو صالح

###############################
الزهرة كضت خاصرتهة اويه الضلع من انعصر
حسين كض ضهرة اعلة اخية من وكع يم النهر
الزهرة فضة السندتهة كبل ما حيدر حضر
حسين يتوجه اعلة صبرةالمنكثر حملة انكسر

التجوة جانت كسرة اضهور لبخور ماتسوة الكسر
وايه الحسين اتواردت هاي بالماي من ضيع عمر

كسرت الصار ..تطلب الثار ..يابو صالح

###############################
اللم حطب للباب بيدة نفسة شب نار الخيم
الحرّك اجفوف الزجية حرّك اجفوف الحرم
الآلم الزهرة ابضربتة كرر بزينب للم
حتى بسمار الضربهة بالطفوف اصبح سهم

اشمرت الزهرة بمعانات واهات مرت عيلتك
لجن زادت امهة بالنوك والسوك تدري بعمتك

الشافت اخطار ..تطلب الثار ..يابو صالح

###############################

الزادت اعلة امصيبت امك الزينب اجروح اليسر
الزهرة وسط البيت ضلت وطلعوهة من الخدر
طفة نار الباب حيدر والخيم صارت جمر
الزهرة محد صد عليهة وهية بس جفهة الستر

يابو صالح جنك اتشوف لجفوف ستر العمتك
الهاي بينه اشتعلت النار للثار ندعي الطلعتك

وهاي الاحرار ..تطلب الثار ..يابو صالح

##############################
ذوالفقار الزيدي

دفع باب ونار..وفلك عمري اندار

الوأن جرحي الجبير..الذبح حلم الزغار

###############################

كل هذن ..يم بالي ..جرح بليلي يبرالي

من الم ..حسراتي ..العمر مودمعتي اتلالي

بالوجه..الشيب اصبح..الم ويغير ابحالي

حالتي ..شبه الي ..ميت والنفس عالي

نفس ريتي الضاك..حلم عمري انباك

مغيبج مرني شيب ..الذبح حلم الزغار

###############################

اليمج..يشتيكي. ويه البير سالفتة

وي ماية ..هل دمعي.. وفطّر دمعي عاطفتة

اشكيلة ..ويسمعني..وحتى الماي نشفتة

هالكلتة.. وانه اشعر.. حجي البلساني ماكلتة

العلة الساني انجاب .. عُشر جرح امصاب

الحجي الضمة الدليل .. الذبح حلم الزغار

###############################
كل طفل ..يتناغه..ومحسن ماوصل مهدة

للعصر ..فك عينه ..وسدهة وسير اللحدة

مالحك..يم حضني ..يوصل مبتغة الكعدة

يبتسم ..واضحكلة ..وخدي ايحس تَرَفْ خدة

ابعصر محسن ضاع..مشة الكبرة ابساع

والم هذا الرحيل ..الذبح حلم الزغار

###############################
للحسن ..من انظر.. جبير اجروح خوانة

ياهمة..من بعدج..يضم عن خوتة احزانة

بلحزن ..وارثني ..يعرف ابدمعتة امجانة

لخوتة ..اسوالفة ..صبر بس مرطب اردانة

دمع عينه الحار ..على اخوانه اسرار

يضم هم الوداع ..الذبح حلم الزغار

###############################

فاطمة ..وحسينج..دمعت زينب اتألمة

وبجفة ..يمسحهة..واحس ضم بالكلب ثلمة

يتوجع ..من اتكلة..ردت من امي لو كلمة

يتحضر ..للدمعة.. ويرد للمدمع يضمة

يضم دمع العين ..ايا صبر حسين

يفاطم هالمصاب ..الذبح حلم الزغار
###############################

ذوالفقار الزيدي

علي اذا ماشاف وجهج يعني مات
وياحيات التبقة من بعد الحيات
حتى اذا بحلامة وتمرينه
فاطمة من الشيب متعرفينة
#################################
بيتج مضلم وخالي..جرحج كاعد ابالي
فاطم نضرة اطفالي..مضيعة النوم من عيني

اليتم مر بيه وبولدي..وبس الليل الي بوحدي
ايدي امشابجة بخدي..واتخيلج تحاجيني

من يخلص الليل اختنك وبريتي مايبقة الهوة
من اذكر ابطرت الفجر نتوضة ونصلي سوة


الفرض يخلص هسة ويمرني الذبول
من اريد انوي اعلة تسبيح البتول

اليذكر التسبيح التسبحينة
فاطمة من الشيب متعرفينة
################################
على السجادة احط عيني..واون مابينهة وبيني
السبحة الطين تجويني..العطر جفج بعد بيهة

شما اصدلهة والزمهة ..بشوغت روحي اشتمهة
تألمني وألمهة ..وتبجيني وابجيهة

الطين جامد مو نفس بس مطية روح السبحتج
وكلما عليهة اتكربت تشكيلي فاطم عازتج

المن حنان اجفوفج امدينته روح
ضامهة الصدري وعليج وياهة انوح

لو تجين ورايدة اتشوفينة
فاطمة من الشيب متعرفينة
#################################
الجنت وياج اسولفهن..صرت للبير اسمعهن
اسولفله ويضل ايون..ويموت واحجي للثاني

اضم عن لا بشر يدري..وانه المابقي من صبري
انملة ومابي حمل صدري.. وسوالف تارسة الساني


ويامن احجي بعازتج والمثلج اهنا مايصح
والكلمة ليضمهة الكلب تدريهة تتحول جرح

بيت مال جروح فاطم كلبي صار
وشيضم ابروحة ليحركولة دار

الجان يحجي جروحة وتسمعينة
فاطمة من الشيب متعرفينة
#################################
من اريد البيتي اتعنة..وبابي من ارد افتحنة
كمت يالزهرة افز منة.. احسج لايذة ابكترة

من افتحة اشعر الم كسرج..واعيش احساسج ابعصرج
واكض ضهري بشكل ضهرج.. ومنو اليسندي يالزهرة

من فضتج ردتي السند بس انه بيمن نخوتي
الباقيلي حيلي المنكسر والمنكسر ضل تجوتي

اوكف اعلة الباب ويهزني الحنين
كام يتلكاني يالزهرة الونين

البل هلا من الباب تتلكينة
فاطمة من الشيب متعرفينة
#################################

وعلي الي تلجم اجروحة..ونار وتاكل ابروحة
اعيونج ليش مفتوحة.. وهضم مرسوم بعيونج

لان محد حجة بثارج..لو نار الكلت دارج
لو يتم العلة ازغارج ..لو ردتي اليريدونج

نزلتج الحضن اللحد وحسيتج بكلبج حجي
يافاطمة ومن هالوكت مابطلت اعيوني البجي

اعليج من هليت يالزهرة التراب
وفتحت اعيونج علي اكبر مصاب

الدفن خلة وبعدة فاتح عينة
فاطمة من الشيب متعرفينة
#################################

ذوالفقار الزيدي

الراضية المرضية ..الحوراء الأنسية..جنت اسميهة
رجعتلي مقهورة..بضلوع مكسورة.. ولاثر بيهة

يافاطمة ..يافاطمة ..يافاطمة

##############################
لتباهلت بيهة..وامي اني اسميهة
وكلت اليأذيهة.. عد الله اذاني

السموني بالابتر..ورادوني اتحسر
جبتلهم الكوثر..وخير الله اجاني

يم الله من اسريت بشرني بيهة
كلالي بضعة وزيد ليهة ام ابيهة

وجيت انه بالبشرة ..وجبتلكم الزهرة ..سورة شاهدهة
وبس غمضت عيني..شفت اليأذيني..منسطر خدهة

يافاطمة ..يافاطمة ..يافاطمة
###############################

تحت الكسة اللمنة ..جبريل بشرنة
هُم فاطمة المعنة..سر محتوانة

لاسوة مبنية..ولاكاع مدحية
الخاطرهة بس هية..تالي الرضانة

السوة الفلك والكون ربي الأجلهة
تنشكر مو بالباب يوكع حملهة

ماتت وهية اتحن ..لملاعب المحسن.. المات ضنوتهة
بالمهد مانايم..ثالث ولد فاطم.. اه يابلوتهة

يافاطمة ..يافاطمة ..يافاطمة
###############################
راحتنة راحتهة ..فرحتنة شوفتهة
انعيش اعلة بسمتهة ..انه اويحيدر

حبل المودتنه ..وامحلية كعدتنة
ايسميهة عشرتنة .. السماهة كوثر

البعيونة يقوة الشوف جان ابنظرهة
يتخوصر ومكسور صار الكسرهة

كسرت ضهر روحي.. صارت سبب نوحي..عينهة الحمرة
المحنية احنتني.. ضرباتهة ابمتني.. بروحي السطرة

يافاطمة ..يافاطمة ..يافاطمة

###############################
الممتحنة محَنوهة.. العلويه ضربوهة
الصبحية عصروهة.. هاي المصيبة

الجفهة انفتح نعمة ..التبري الهوة الذمة
الماتجرح النسمة ..تنطك عجيبة

داينت مريم دين شَي مانقيسة
وخلفت بت عمران روح الله عيسة

حب هاجر وسارة ..والخل طفت نارة.. من كرامتهة
وانتم قهرتوهة ..وانتم ضلمتوهة ..وخذتو نحلتهة

يافاطمة ..يافاطمة ..يافاطمة

###############################
الحرة السماوية .. وليلة قدر هية
رجعتلي محنية.. مغصوبة حقهة

مابيهة شي سالم ..دافعهة جف ضالم
بكلمة وأن فاطم..للأمة شقهة

الينكل حطب للنار مايرضة تخمد
حط جرح ماينراف جفة المحمد

الدار انه لوبيهة..هم يهجم اعليهة.. بحقدة وبنارة
وهاي التأذيني..ليه فضة اسنديني..جانت ابشارة

يافاطمة ..يافاطمة ..يافاطمة
###############################

ذوالفقار الزيدي

شيًب جفن عيني..يالزهرة كلميني
مخنوك الهوة ابريتي..مضيع وياج عافيتي

###############################

كلمي الحسرتة بفراكج اتذبحة
ويمر بي موت كل ما يلزم السبحة
البعد عينج فراغ امجانج ايجرحة
ويخّضر بي دمع مايكدر ايمسحة

هذا طبعج ماعرفتة..انه اسولف وانتي سكتة

ماتضمد اجروحة..الماجاوبت روحة

جوابج صاير امنيتي..مضيع وياج عافيتي
###############################

انه الطكات دهرة مانوّلة ايعيش
كلهن بالجنح ماسيرن بالريش
انه اتمنيت كون الموت مايبطيش
لان بحر الحزن كل ساعة بية ايجيش

العايش من الغبشة خنكة..بليلة ياجفن اليطبكة

الماطابك اعيونة..امضيع اليواسونة

وانه امصيبتي ابيتي ..مضيع وياج عافيتي

###############################

ادري افراكج اعلة النوم يبعدني
وراح اتصير خوة اعيوني وي ردني
استندتي بفضة بس ياهو اليسندني
الزغار الباقية اشتكدر تساعدني

لا محمد باقي يمي..حتى اسولفلة اعلة همي

لايمي ضل طه ..يساعد علي ابآ هة

واكلة الكبرج امشيتي..مضيع وياج عافيتي

###############################

اذا بليل زينب حنت الشوفج
شطّلع يام حسن ماعندي بس ثوبج
متطلعين من كبرج واجي الصوبج
ولاينسمع صوت ايهدي محبوبج

لوتفز بالليل زينب..شرد اكلهة وهية تنحب

لمن تحاجيني..شقنعهة قنعيني

اكلهة وياي ماجيتي ..مضيع وياج عافيتي

###############################

اقرة الفاتحة عد ياطفل مكسور
انه المقهور واقنع ياكلب مقهور
روحة مكبرة ماترهم الهة انذور
نحرك بالنفس مايكفي حرك ابخور

فاطمة ويوم اربعينج..راح بينه تحير عينج

تشوف الورد ذابل ..تشوف الضهر مايل

وراح تشوف تاليتي ..مضيع وياج عافيتي

###############################
ذوالفقار الزيدي