نقل راروي المعاناة..الجروح الطف طفلتين
يتيمة المسلم تنوح..يتيمة تون للحسين
#################################
وحدة بالكوفة ابوهة يضل غريب
وحدة خد والدهة عالغبرة وتريب
اثنين عاشن جرح فكد الحبيب
الراح ابوهة امن الزغر بالهم تشيب
التيتم يعرف احساس..جرح هاي القضيتين
يتيمة المسلم تنوح..يتيمة اتون للحسين
#################################
العاش نفس جروحن نفس المصير
يعرف اهات الزمن لمن يدير
اليتم كلش صعب وية الزغير
الكون اسود كلة بعيونة يصير
الشبع من دنيتة جروح..عرف بالقصة جرحين
يتيمة المسلم تنوح..يتيمة تون للحسين
#################################
العندة غالي وجدمة خط اعلة الكبر
وية طولة ايريد يتفصل صبر
والحزن مر بيهن ابوكت الزغر
صار منجل حش الهروش الخضر
الابوهة للكبر راح.. دمعهة ايذبل العين
يتيمة المسلم تنوح..يتيمة تون للحسين
#################################
يعرف اوجاع البعد بس الجريح
العاش عمرة ابلا ابو عاش بشحيح
الناعي يكتل لوخبر غالي يصيح
الدافن ابجفة الورد مايستريح
التوادع وية الورود..ونينة ايبجي صوبين
يتيمة المسلم اتنوح..يتيمة اتون للحسين
#################################
الحالهن حتى القهر ميت قهر
الثكل حملة ايريد ليشد الضهر
يكثر الشيب الوداع شما كبر
وهنة كل ساعة وعليهن مر خبر
عليهن مرن اخبار..الخبر ياخذلة عمرين
يتيمة المسلم تنوح ..يتيمة تون للحسين
#################################
ذوالفقار الزيدي

عاشر بس معانتة بعواشر
موتني اويه لحضاتة الاواخر

رسملي انحور كلهن دم
عليهن صلى ماسلم..ياهلنه
#################################
مر عليه ومن صباحة جنة وحشت مغربية
مر خريفة ابتوت كلبي وضياعكم من اديه

عجبة كلبي ايضل يدك
من اذكر ايام العشك
والخيم شبعت حرك ..من بعدكم

دخان الخيم تارس هوايه
وعمية عيوني من ضيعت ضوايه

الجرحة اخوانة مايلتم
عليهن صله ماسلم ..يا هلنه
#################################
احبال ودكم من بعدكم صارت احبال ابئدينة
انتهينة ايام حلوة وبالمدامع ابتدينه

ذيج الايام انتهت
اوقصت الجروح ابتدت
والنساء اتسلبت.. وي خيمهن

سلبو نوكنه وحتى المحامل
وصحت لمن شفتهن يابو فضل

خذاهة الشمر بعد العم
عليهن صلة ماسلم..ياهلنه
#################################
شاب كلبي وشاب كلبي وشاب كلبي وشيبوني
ناس تشتم وناس تضرب وناس فرحت من خذوني

من شماتتهم متت
وطاح حيلي وماطحت
اجروح اضم وشيبت..من جروحي

امنادس بينهم يحجون عني
كل جلمه بعمر مبيوك مني

الشمت بجروح يتكلم
عليهن صله ماسلم ..ياهلنه
#################################
هايه عمتي وذن خواتي طلعوهن وانتوسادة
الطعنه عادة الذبحةعادة بس سبيهن موش عادة

الومت جان بمطلبي
روحي شيبهة السبي
النار مارحمت عبي..موتتني

شدوهن سبية ابجف سبية
الحبل موعادة ياهل الهاشمية

الورد بالشدة يتألم
عليهن صله ماسلم ..ياهلنه
#################################

كلشي ينطر جيه منه السوك والشام وجراحة
كلشي يجرح حضرولي وذني يحتاجن نياحة

كلشي يجرح راح اصد
موت يرسملي البعد
راح للضيم استعد ..بهالمسيرة


راح امشي بدرب حيرة وعجايب
ندخل سوك وانام ابخرايب

واروح ابنسوة موكب هم
عليهن صله ماسلم ..ياهلنه
#################################
ذوالفقار الزيدي

بسمة وزودة ايشابه جدة
ايعادل سبعين الطف وحدة
ومن كالو طب ليهة الاكبر
اوجه الحومة تحول اصفر

#########################

عگرت اوجوه الفوارس واكبر حسين ارتجز
وكبل طبكت عين اصف شاهدوه بالمرتكز

منطب ليهة ابن سبع المثاني
حيدر هذا لو عباس ثاني
من سألو عليه كللهم اني
كطاع انفاس الضدوني

كلهم وارث جدي وعمي
وحالف لودمكم لو دمي
واشرب صيف بيوم التحتر
اوجه الحومة تحول اصفر

#########################

كلهم اختاريتو سيفي وخلصت ايام السلم
وفاج بيهة وخلة طفهم يمطر بروس الزلم

شمس والروس تفتر ابمدارة
خلة اركابهم رهن الاشارة
كتب بالسيف برض الطف عبارة
من طبهة الاكبر بجاهة

راي الطف خلاه ابكيفة
حيف وطالع ياخذ حيفة

وبكيفة الطف يكبر يزغر
اوجه الحومة اتحول اصفر

#########################

بالجمال اعدال يوسف بالطبر يشبه علي
وعلي ثاني بيوم كلهم همة كالو لولي

كالو حيدرة الشافو حركتة
جدة وحقة يتوارث شمرتة
صياد وعرف بالصيد وكتة
ومشروط ايكص راس الصيدة

صياد وما يخطي الطبرة
اليطلع راسة يضل بكترة
والطالع رد ابلا منحر
اوجه الحومة تحول اصفر

#########################

الصكر لو راد يغنم تذبح اعيونة الهوة
وعلي الاكبر لو خزرهم عرفو الجيش انحوه

املهم جان بس بكر ابن غانم
وعلت غبرتهة واتنطرو علايم
وجلاهة وراس بيدة وذاك نايم
ماطول دزلهم راسة

من شافوه ما طاح انصدمو
دورو مشراد وماعثرو

ومنين المشراد اليدبر
اوجه الحومة اتحول اصفر

#########################

هذا كله وهوة ضامي اشسوه جا لو مرتوي
من العطش ماخوذ حيله وطاوي كاع الطف طوي

يطوي الكاع جن طويت عباتة
العطش ماحرك الشعرة بثباتة
مطلك مايهم هوة وفراتة
والطالق جانت بتلاثة

يابس مثل الخشبة السانة
وماهنة الطف ابفر سانة

ليث وكل ما شدت يزئر
اوجه الحومة اتحول اصفر

#########################
ذوالفقار الزيدي

حسين دربك موت رد ابعيلتك
والكتب خنجر يفكر ابطيحتك
تنذبح يحسين باول جيتك
واعلة زينبكم خيمكم تحترك

#########################

وهية مو بس حركت اخيام وتفض
هول خوف ونوح واسياط وركض
وتاخذ اختك كربلة بطول وعرض
حايرة تلم لو تشاكف باليطك

#########################

حسين كلشي يعيش شخصك لورجع
كربلة محضريلهة اهوال وفزع
شراح بيك يصير لكبر لو وكع
تموت تعدل وي علي من تفترك

########################

ارجع ايرضون صدرك يالدفو
وجسمك من الخيل ميضل بي علو
ايصير هذا ابيوم تبقى بلا اخو
المالة اخ بالطف يحسب للسحك

#########################

حسين منضر وحدتك كلش صعب
اوكعتك من مهرك الوجه الترب
وين زينب راح عدهة ايضل كلب
من تشوف اسهام جسمك منرشك

#########################

انته نيتك خير نيتهم ذبح
وضامين ابكل شبر جيتك جرح
حتى طوعة اهناك يمك ماتصح
ناس سدت بابهة ابوجه الصدك

#########################

شحت الطراش حشمت الهوة
وكتلة مر بحسين وكصد نينوة
كلة كاع اجروح ماتعرف دوة
وكتلة كلة اطبولهم كامت تدك

#########################

كتلة لحك روحلة ولا تستريح
وكلة ما شبه لهم مثل المسيح
كلة مسلم باقي لحضات ويطيح
من القصر والدم يريد اهلة التحك

#########################
ذوالفقار الزيدي

ثورة شرف بعبايتج ..معكودة يازينب
راية الكافل رايتج ..منصورة يازينب
ماعطلاج حرك الخيم
للانتصار شلتي العلم
#################################

بت هاشم ..ياشيخة ..وجلماتج
جانت رسل حرب

واخيامج .. حركوهة..واعلامج
عيشهم برعب

مكسورة ..ومقهورة ..بس حزنج
مايعبر الكلب

ضميتي..دمعاتج ..كابرتي
رغم الضرف الصعب

من صارت اخيامج جمر..كابرتي يازينب
من صبرج انذل الشمر.. ياعفه يازينب

ماحشموج انتي الحشم
للانتصار شلتي العلم
#################################

بن جوشن..بعيونه..بالحيرة
لمكابرج يصد

كلالج..خوانج ..ذبحوهم
مابيهم اليرد

كلتيله ..قرباني..الوجه الله
حر جاوب ابرد

ضل صافن ..من ردج ..متفاجئ
مايعرف اشيرد

محروكة جاوبتي ابرد ..ياعجبة يازينب
كتيله عزبنه ابورد.. رد الله يازينب

ابهذا الجواب ذاك انصدم
للانتصار شلتي العلم
#################################
اتحزمتي .. وشديتي ..العصابه
ياشدت البخت

يا آيت ..حك الله.. وبثارج
ايد الله طالبت

علوية ..اطلبيهم ..دم غيرة
وثورتكم ابتدت

ياجمرت ..خوانج.. والسانج
بي منبرج ثبت

شديتي ثار بمعصبج ..ثار الله يازينب
ذلت اميه بمطلبج .. لبوة اسد زينب

ثار الاله بيج انفهم
للانتصار شلتي العلم
#################################
صار اسود ..مي عينج ..لحسينج
ماشمت العدة

ضل شيبة ..اعله اجفونج .. ماطايح
جيف انتي قائدة

ياالصرتي..العز هاشم ..سالوفت
ترنيمت الفدة

عالناكه ..بس هيبه.. بضعونج
جن حيدر الحدة

جن حيدر ايقود الضعن ..ياهيبة يازينب
عفة وحجاب اتجمعن ..صرتي انتي يازينب

انتي الوجود همة العدم
للانتصار شلتي العلم
#################################

جف ايدج .. من موسى ..متوارث
اضرب بها الحجر

ومن عيسى ..واعجازة ..بي خصلة
البي يرجع البصر

ومن صالح ..بالناكة.. تتوارد
ارجوزة القدر

ابراهيم ..وبيت الله ..بس وسفة
اسماعيلج انحر

اسماعيلج انحز منحرة ..ياوسفة يازينب
بس انتي عندج مقدرة ..اتثأريلة يازينب

عن الرماح وعن كل سهم
للانتصار شلتي العلم
#################################
ذوالفقار الزيدي

كعدت اموادع بالخيم..خوان ثالثهم الألم
زينب والحسين
كللهة باجر نفترك..واخيامج ايشبعن حرك
وي غمضت العين

صدت للحسين وبجت
وحسين هل دمع البخت..وي غمضت العين
#################################

امزاحم اجروح وروج الدموع
من العين ينزل يجوي الضلوع
ذايب كلبهم ذوبه اشموع
موجوع يتوجه اعلة موجوع

بيناتهم حتى الهوى من نار الموادع صفن
من تشاباكو ضلع بضلع والموت جلماته انحجن

كلتله شتضم نينوى..كللهة نسمات الهوة
اتشميهة دخان
يالبيج خدر الله انحلف..اتضلين ياشيخة سلف
ماعندج امجان
كلتله ضيعه اتوصفت
وحسين هل دمع البخت..وي غمضت العين
#################################

يخال عون اشتكفي شبكة
خليني اموت الروح زركة
ابروحي تعرف مومال فركة
تريد الاخو وتريد ملكه

مخنوكة روحي اوزركت والموت حسيته اقترب
شلة بحياتة الضيعك والبيته من بعدك خرب

تدريني ماضل بي حمل..يحسين فكدك موسهل
لتسلوف اوداع
سولفلي اضل يمج ذخر..وياج اخلص هالعمر
موترحل ابساع
عن طاري ضلتهم حجت
وحسين هل دمع البخت..وي غمضت العين
#################################
كللهة مو تدرين بية
افراكج كلف يصعب علية
بس هذا امر الله اشبديه
اني انذبح وانتي السبية

مكتوب الي بذبح القفة ومكتوب الج درب اليسر
وباجر الي حافر فرس يركز بحيله اعلة الصدر

ضميه ياخوية الدمع ..باجر علة اكسور الضلع
ينراد الج حيل
تبجين من بعدي اشكثر ..ماطول حدايج شمر
اه والف ويل

بدمعاتهة الكاع انسكت
وحسين هل دمع البخت وي غمضت العين
#################################

كللهة عالتل من تصعدين
رفقاً عتب بجروح الحسين
اوكف واطيحن من تنادين
لاضل اخوي ولا السبعين

كللهة باجر عندي امر يازينب استمعي الخبر
عالتلة من عندج الي ليطول يازينب نظر

عيناج لا يصدن علي..للكومه ميعينني ادي
وافزعلج ابروح
الف وتسمعيه جرح.. بين الحجر بين الرمح
واشكال الجروح

سمعت مصيبه ودنكت
وحسين هل دمع البخت..وي غمضت العين
#################################

كللهة امانه اخذيهة يمي
تدرين يمهةاندار همي
هاج اخذي زينب سبحت امي
سلابهم مكصودة ضمي

باجر يخويه امن انذبح ايسلبون كلشي ايضل علي
ياخويه ماريد العدة ايسلبون هالسبحة مندي

ماريد سبحة فاطمه..يلزمهة جف الشرذمه
ويلجمج ابهاي
عود امنوتن فكرت.. تحضرين بالمدفن ردت
ادفنيهة وياي

اخذتهة زينب وانحنت
وحسين هل دمع البخت..وي غمضت العين
#################################
ذوالفقار الزيدي

علي يبني ..آخر روحتك ماشابع اشباك
علي يبني..والد وادري ذن لحضات الفراك

وبعد عينك الجاي اتصد عليه
الزمن رحه ويدير افراك بيه
#################################
فك ايدك علي وضم روحك ابصدري
اورد بيه الكبل يالصوفرت عمري
رد بيام زغرك واسرح ابفكري
وشوف شكد تعبت اعليك ياذخري

علي يبني.. تذّكر زغرك وذنيج الايام
علي يبني.. من شلتك عله ايدي ابنية احلام

حلم وبروحتك شيضل اليه
الزمن رحة ويدير افراك بيه
#################################
يامحبس يميني وشذرته الدره
يامضمام ابوك العازته وكبره
يا اكبر اولادي وفركتك مرة
يفلتة اصيار هاشم محد ايكره

علي يبني..ردتك بيدك اتغمضلي لعيون
علي يبني..الابو يرتاح لو ولده اليشيعون

صعبه ابأيدي اقدمك للمنيه
الزمن رحة ويدير افراك بيه
#################################

بعد مارايح انته وشيبت عيني
اول تالي يالاكبر تبجيني
اكابر بس ثكل حزنك يحجيني
صعب يدخل اجل مابينك وبيني

علي يبني..ليش ابينك وبيني الاجل فات
علي يبني..وليضيع عزيزة ايعيش حسرات

علي اليرسملي روحه ارسمله جيه
الزمن رحه ويدير افراك بيه
#################################
بيضت الجفون وانته مارايح
اشلون اتخيلك فوك الرمل طايح
علي عالغالي تكتل سمعت الصايح
مالح دمعي جي راح افكد المالح

علي يبني..الماي ابروحته ايحز منحر الياس
علي يبني..واحسب وي طلعتك طلعت انفاس

شسبلك وانه ناوي اتسبل اديه
الزمن رحة ويدير افراك بيه
#################################

مكانك خالي راح ايضل وسط روحي
وابو الاكبر جنت بس هسه ابو اجروحي
علي يافرحتي الصارت الم نوحي
اووحي ادموعي ابتده بعيني البعد يوحي

علي يبني..الله اوياك وانه النوح وياي
علي يبني..بجيت اعيون وشل بيهن الماي

ماضل ماي بعيوني الخليه
الزمن رحة ويدير افراك بيه
#################################

اعله كيفك بالمشي ابكل خطوه تكع بت
تره بمكفاك عايف روحي التعذبت
اعرف ماترد والهلبت انكتلت
زرعهة التانه بس ماخضرت الهلبت

علي يبني.. الاتاني انذبحت ابلحضات الوداع
علي يبني.. جاي اتخيلك متوسد الكاع

ادري ابكربله محضرتلي اذيه
الزمن رحة ويدير افراك بيه
#################################
ذوالفقار الزيدي

مسلم وبشخصة تمثل مرسول الانسانيه
مبعوث احسين اتجسد ايات الرحمانية
#################################

حسين اشار اعلة الثقة ان ياثقه دورك جهز
ياأخو الملحه الصدك وادري العشك بيك ارتكز

انته اخو الميعوف اخوتة
الماكو تشبيه النخوته
ايرخص الدين الله موته..يامثال الغيرة

العندة لحسين اشغلاته
المستعد يرخص حياته
يابخت تنفض عباته ..يامثال الغيرة

عرفاني بحب حسينك ياروح العرفانيه
مبعوث حسين اتجسد ايات الرحمانية
#################################

كله مسلم تبتشر دك الصدر غيره انمله
اتقلد ابدور السلم والو نعم لاكت اله

كله ياخير الله تأمر
اني انفذ وانته اشر
راح اضحي والله يذخر..قربتاً للزهرة

خلهة شتفصل قسمتي
حسين مرضاتك نعمتي
انه المقدم ركبتي ..قربتاً للزهرة

واجب شرعي ابكلماتك كلماتك ربانيه
مبعوث احسين اتجسد ايات الرحمانية
#################################

سبلتهة الروح الك والكل هلك نيه وفه
انته ملاج النفس من زغري احس ياعاطفة

اوداعت الشيب ابلحيتك
اني من زغري وهويتك
الخدمتك من رافكيتك..والنفس منذورة

وانته تذكر من زغرنه
جنت اناديك بذخرنه
حسين من يافع عمرنه..والنفس منذورة

وتدري من العمر اليافع بايعت الروحانية
مبعوث حسين اتجسد ايات الرحمانية
#################################

ودع احسينه ورحل بس الاجل حضر سهم
طب عله الكوفة بسلم بس الفهم جان بعدم

وطوعه جانت بس اميره
ابمبدء اشيوخ العشيره
تدري مسلم جيته غيره.. همه ميفهمونة

همة غدرو هيه وكفت
همه عادو هيه نصرت
همه نكرو هيه عرفت ..همه ميفهمونة

انسانية وتتفهم الام الوحدانيه
مبعوث احسين اتحسد ايات الرحمانية
#################################
وصلّو حد الذبح اواكف صرح مامنكسر
همه كلوله انتهت كلهم بدت ثوره نصر

امرو بقصر الامارة
وهوة جاوب يابشارة
ذبحتي تصبح شرارة ..منطلق للثورة

سوو كلهم مانويتو
هذا بحساب انتهيتو
ابمذبحي انتم حققيتو..منطلق للثورة

جُهّال وماتنفعكم كل هاي العدوانية
مبعوث حسين اتجسد ايات الرحمانية
#################################
ذوالفقار الزيدي

نتباهة نتباهة ..ابخدمتك نتباهة
################################
يحسين من الذر عهد عاهدناك
انعيش ونموت وننشر واحنه اوياك
انتة السفينة والخلاص ابمرساك
وهناك بس انته الامل عدنه اهناك

منجاهة منجاهة ..الشيعتك منجاهة
#################################
فتشنه لعيون اعلة دربك بونين
وفزت ضمايرنة ابقصيدت ياسين
ايمر الوكت واحنة اعلة حزنك باقين
ابكد ماعطشت المجلسك عطشانين

ذكراهة ذكراهة ..اشينمسح ذكراهة
#################################
يحسين فتشنه اعلة حبك لعيون
وبجانه حمزة الجان يقرة الميمون
عيشنه الم راس وجسم يتحاجون
لمن قرة امسة اوصفك بالمضمون

نماهه نماهة..فكرتك نماهة
#################################
يحسين واكبرنه اويه جرحك دمعات
وعفنه الحياة وماتركنه العزيات
وكل مانقيم المجلس اتمر هجمات
ايصيحون عوفو حسين وانرد هيهات

منوهة منواهة..نتركك منواهة
#################################
نسل اليهود اشما يبث سم اخبار
ويضن خدمتك راحت وراح الثار
نوكفلة بالعزيات وكفت لنصار
وكل ما ندك اصدورنه ايعيش انذار

ننساهة ننساهة ..اشيعتقد ننساهة
#################################

ذوالفقار الزيدي

الايام ادور وجروحك هنة
من ايمر عاشور يتجدد حزنة
مر عاشور وجم هلال
طال وجرحك وياه طال
#################################
تمر اسنين فكدك والجرح بعدة
وبجمرك طبع لايخمد ويبرد
طواريك ذبح بس منتصر عالموت
ودمة الغيرة ابشراين الخجل يجمد
اصدلك منتصر بس توجع الدلال
شما اتخيلك ذاك انتة الموسد
موقف جروحك كلساعة اذكرة
صدرك ابالي دايستة عشرة
ذن اكبال العين عاشن بخيالي
وجروحك يحسين ماعافن بالي
ليل الذكرة اشكد كتال
طال وجرحك وياه طال
#################################
اعيش افراك كل مايصح بيك افراك
واشوفك من توادع ربع ابحركة
متفرد وداعك مدري من يالون
تضم ضلع بضلع بحرورة الشبكة
مثلك ماشفت يمحير التاريخ
شامخ بالشدد مو جفك اتصفكة
واكف اتكابر وتضم جروحك
وماتهل دمعك حتة ويروحك
كل ساعة توديع تاخذ نص حيلك
ماتشكي من جروح جرحك يشكيلك
نص حيلك راح ومامال
طال وجرحك وياه طال
#################################
كضو ربع ذبح وابوحدك ضليت
وقربانك لخير اعليه حليب انشح
كمر بيدك رفعتة اداعي كطرة ماي
وسهام العدة ماتفتهم وكح
وكفلك حرملة والله المعين بهاي
ودالك سهم منة الطفل فرفح
فكلك اكماطة وضنك رويتة
ربك ايعينك من شاهديتة
سهم مثلث جاي واني تخيلتك
موعبدلله انصاب صوب عاطفتك
دم عبدالله بجفك سال
طال وجرحك ويا طال
#################################
علة ذبحك شفت متحضرة الف سبعين
ورفعت اشراع صبرك والمعسكر حار
انتة الهاشمي الماتنثني ايعرفوك
ضلو ناس ترمي اساهم ترمي احجار
لحد ما كل كتر منك جمعلة اجروح
ولوة سرج المهر والزمن ويا دار
كل كتر منك ماباقي سالم
صعبت الكومة وعالغبرة نايم
كل ماردت اتكوم توكع عالغبرة
وللخيمة اتصد عين خاف اخر نضرة
همك جي بالخيمة اعيال
طال وجرحك وياه طال
#################################
اعلة خاصرتك رمح متوجي تجوة غيض
وبكلبك سهم بس انتة مامهتم
عليك اندارت الموخوش والموخوش
وجفنك مارمش من سيف المحتم
يالخوفك شرف ماخايف من الموت
خفت لاعبر واحد حد المخيم
صفنت اعيونك مو سكرة غيرة
اتخيلت زينب ماخوذة اسيرة
واتخيلت اشلون من ايجتفوهة
وبسوط الضلام راح يضربوهة
والحال ايمر بختك حال
طال وجوحك وياه طال
#################################
ذوالفقار الزيدي

جينة ..شدينة للطف احزام
جينة.. بكلوبنه الطير اينام
جينة ..لخيامك انصير اخيام ..جينة
#################################
الروس كشفناهة..الدنية طلكناهة
ياحسين ارواح جينة تدري امارة النفس

الحلو عني انساهة..الرجعة مانرضاهة
والارواح امحظريهة انتاني بس طلعت شمس

الجية موتة واحنة ندري بهاية
ونشكر الله الحقق النه الغاية
حسين باجر عدنة بيهةاسواية
انطبهة والعباس يرفع راية

رايه ..يرفعه جف العباس
راية..المن صفة اعتبره انداس
راية.. شدتهة جن شدة راس ..جينة

#################################

شتحجي عن الروحة..اوية النذرلك روحة
شتحجي وية الخلة روحة امسجلة الحبك وقف

فوت بيهم غانم..انطيح وانتة السالم
اوحات شيبك عالمذابح تشوفنه اعيونك نصف

الدنية خاف تردنة طلكناهة
جلبت بذيالنه وعفناهة
الموتة وياك ابصدك ردناهة
يالشريت اروحانه البعناهة

انته..البوجوهنة مخلي الماي
انته.. باجر تصير النه فياي
انتة..شفناك خير الله الهاي..جينة
#################################

وحك شيب الحيتك..وخدرك النص ريتك
عدنة شوك اعلة المناية شوك طفل المرضعة

اطينه من روحيتك..خيط من خاجيتك
حرز ينشد عالبواتر خل نصفن الواقعة

واليجيك امسح اديك ابيدة
حتى ضرباتة تصير ارعيدة
حسين بس توفيقك احنة انريدة
خاطر انمليهة روس البيدة

ايدك ..من غير حولتنه الغير
ايدك.. بالغار ما جفلت طير
ايدك.. جي ندري بيهة اشكد خير ..جينة

#################################
حانت الملزومة.. لحك زرع الحومة
للحصاد مجهزيهة سيوفنه ابواهس فلح

الميمنه ويسراهة..امذبحة تلكاهة
وخلي بالطف تربي عينك فزعت الشافك ملح

حسين ملحك بينه خضر غيرة
اتعيش الطف ورجالة بحيرة
طلعت افعل يبو اسكينه الخيرة
يعني راح الكون بيهة انديرة

فزعة..وللحطب حضرنه النار
فزعة..ودكينه ناقوس انذار
فزعة..فزعت اكبار ويه ازغار ..جينة
#################################
كض حبيب الشيبة..وكال يهل الطيبة
عدكم اويحسين فزعة زينب اتاني الخبر

هوسينه اكبالة.. وهوة شال اعكالة
وكال رايح حتى اكلهة كلمن امحضر نحر

لبن ضاهر جلمه بس كلناله
وهوة يشرح راح لختك حالة
يكلهة كلشي حسين بالطف مالة
واحنه جينة انعيدلك ما كالة

عدنة..وياك يحسين انفوس
عدنة ..انموت وانته المحروس
عدنة..منك يالحسين ادروس..جينة
#################################
ذوالفقار الزيدي

((موشح لمولاي مسلم ابن عقيل))


حسين دربك موت رد ابعيلتك
والكتب خنجر يفكر ابطيحتك
تنذبح يحسين باول جيتك
واعلة زينبكم خيمكم تحترك

#########################

وهية مو بس حركت اخيام وتفض
هول خوف ونوح واسياط وركض
وتاخذ اختك كربلة بطول وعرض
حايرة تلم لو تشاكف باليطك

#########################

حسين كلشي يعيش شخصك لورجع
كربلة محضريلهة اهوال وفزع
شراح بيك يصير لكبر لو وكع
تموت تعدل وي علي من تفترك

########################

ارجع ايرضون صدرك يالدفو
وجسمك من الخيل ميضل بي علو
ايصير هذا ابيوم تبقى بلا اخو
المالة اخ بالطف يحسب للسحك

#########################

حسين منضر وحدتك كلش صعب
اوكعتك من مهرك الوجه الترب
وين زينب راح عدهة ايضل كلب
من تشوف اسهام جسمك منرشك

#########################

انته نيتك خير نيتهم ذبح
وضامين ابكل شبر جيتك جرح
حتى طوعة اهناك يمك ماتصح
ناس سدت بابهة ابوجه الصدك

#########################

شحت الطراش حشمت الهوة
وكتلة مر بحسين وكصد نينوة
كلة كاع اجروح ماتعرف دوة
وكتلة كلة اطبولهم كامت تدك

#########################

كتلة لحك روحلة ولا تستريح
وكلة ما شبه لهم مثل المسيح
كلة مسلم باقي لحضات ويطيح
من القصر والدم يريد اهلة التحك

#########################
ذوالفقار الزيدي

بعدة جرحك..لولي وما طايب
هذا راسي ..من مصابك شايب
حسين من عاشورك يمر لينة
تلكة جرحك ذاك لخضر بينة
#################################
اخضر تعاين للجرح عاشورك من يمرنة
ماجن المواداع زمن جن توك مفاركنة
تلكاه يتيم بلا ابو بمصيبتك واحدنة
ايتام ..من عاشرك والهسة
ايتام..رايح ابونة انحسة
بينة حسرة..والد مضيعينة
وياحسيني..المابجة اعلة حسينة
جيف ابونة وخيرك مدفينة
تلكة جرحك ذاك اخضر بينة
#################################
يحسين مرنة بأي وكت تلكانة ماناسينك
ماطابن جروحك بعد ودموع ما وافينك
الضحة بنحر يطلب نحر ونريد فكة دينك
نوفيك..بلكي بجرح عالهامة
نوفيك..لمن نشيل القامة
كعبة شوكك..حضرينة ا حرامة
وحتة نوفي..صرنة الك لطامة
ولأن حزنك لحضة ماناسينة
تلكة جرحك ذاك لخضر بينة
#################################
البين المجالس منزرع منك يتاني النضرة
عطر الله انتة وبي بخت كلمن حضة بشم عطرة
يحسين ماعافك ابد ذاك اليحبك فطرة
تلكاه ..ماناسي نعمة حبك
تلكاه..عن حبة شَهَدْ ربك
لوتمرنة..بالعزة وتشاهد
اتشوف عابس..بينة واحد واحد
مثل عابس وكثر انجنينة
تلكة جرحك ذاك لخضر بينة
#################################
اطوريج شاهد عالعشك لمن نجيلك فزعة
وجعة ابكلبنة النصرتك شمسوية هاي الوجعة
اه ياحسين امن الكلب تطلع بحيث اتشلعة
حفاي ..للحضرة نركض كلنة
حفاي..حب نصرتك جايبنة
من نطبلك..نحس جنة انصارك
وبكلبنة ..تشب جمرة ثارك
وبعزة طويريج من تلكينة
تلكة جرحك ذاك لخضر بينة
#################################
ماننسة طفك للابد يمضحي لينة بكلشي
بعروكنة حب خدمتك والخدمة بالدم تمشي
يحسين وانة لومتت انصب عزاك بنعشي
يحسين ..مو انة لتمناهة
يحسين..كل الخدم تلكاهة
بكبرة تحضر ..امنية كل خادم
من تطبلة..اتشوفة مجلس قايم
بالكبر زاير لون جايينة
تلكة جرحك ذاك لخضر بينة
#################################
ذوالفقار الزيدي

باقي ريحة من الحسن
اشلون اعوفك للمحن
يبني قاسم روحتك تجويني
ونتة تعرف بعدك ايأذيني
#################################
بوية من ودعت ابوك اودعت ذيج الهلة
كمت احس ضهري خلة
وهسة جاي ابكربلة..اتزيدلي حسرة
بوية والفاكد اخية وانكسر من الزمن
اتعاين اسنينة المضن
بذكرة العشرة انكضن..ذكرة اعلة ذكرة
لاتروح..لاتخليني ابقة اتاني
من جروح ..فكد ابوك الهسة اعاني
لاتخليني الزماني ..يبي قاسم
مالي حيل ابقة انتضر
اعليك اخاف امن الشمر
اعليك خايف بوية لتخليني
ونتة تعرف بعدك ايأذيني
#################################
للحسن لوهام كلبي وهامت الشوفة النفس
من اشوفك شفتة احس
توة خضر هالغرس..وتريد حشتة
اورود عمرك توهة فتحت بعدة مالاحك ندة
وين نيتك راشدة
جرحي يلتم ابتدة..خلة اعلة لمتة
لو مشيت..تذبح احلامي بمشيتك
بلاية لاروح.. راح اضل لو فاركيتك
انتة حلمي وضيعيتك..يبني قاسم
توة ملتم الجرح
ليش رايح للذبح
راح اموت بروحتك تدريني
ونتة تعرف بعدك ايأذيني
#################################
كلت اعرسلك وشوفك جفك ابحنة انصبغ
كلت كل همي فرغ
بس علينة الطف بزغ ..رايد منيتك
لوبدي جا ماتركتك للمنية اتخط جدم
روحي مو مالت لجم
من شبابك تنحرم ..لو ما وصيتك
اجتيفت..من اجيت بهالوصية
تدري هاي ..روحتك من بين ادية
راح اشوف اشجم منية..يبني قاسم
بالوصية اتجتفت
بس اكلك لورحت
دير وجهك مو عدل تلكيني
ونتة تعرف بعدك ايأذيني
#################################
امشي جم خطوة المنيتك يبني قاسم ولتفت
راح تلكاني متت
ونتة بعدك ماطحت..بس هذا حالي
لودرت وجهك علية ما اريد اتهل دمع
لوشفت هذا الوضع
ايذوبلك كلبي شمع ..يبني انتة غالي
لوبجيت .. ابجفني ماتصبر دمعتي
والجفوف..اتطيح من فركت حسرتي
روحي تطلع وي عبرتي ..يبني قاسم
لودرت وجهك تصد
بينت اثار البعد
ولوتهل دمعات اتبجيني
ونتة تعرف بعد ايأذيني
#################################
بوية هاي الغاضرية وهاي ضمات الدهر
ايرد كسران الضهر
اعلينة مكتوب القدر ..منشوف راحة
ياهو ايد انحط عليه وكلنة راح ايضل ذخر
وعود صالحنة العمر
ايبوكة من عدنة الكبر ..وتضل جراحة
شما تطيب ..جروحنة الدنية تردهة
للسنين..تمرهة وتذبل وردهة
معاندة ويانة بعدهة ..يبني قاسم
شما تلم بينة الجروح
تمرنة تاخذ اغلة روح
وهسة رادت روحي لبجنبيني
ونتة تعرف بعدك ايأذيني
#################################
ذوالفقار الزيدي

اشمحلة خادمكم هويتي
وبس مجالسكم قضيتي
من الولادة الحد منيتي
#################################
يحسين هذا الخير من جف خيرك
شلت يمينة الشاف واحد غيرك
الكاك والد لوردت تفسيرك
يالذنبي شديتة وشمرتة ابيرك
بير مال اسرار شفتك
ساتر اعيوبي برحمتك
عايش بلذة نعمتك
اهنانة احس نعمة رضائك
جا هناك اشكد عطائك
حسين بيك شكبرة صيتي
من الولادة الحد منيتي
#################################
الدين رايد دم اجة ويختبرك
فاجأتة من انطيتة ذبحت نحرك
انوب شاف الخيل تسحك صدرك
ماشاف واحد شايل ابكد صبرك
انتة يا اعضم مناضل
موفقط قائد يقاتل
عزب بجف ابو فاضل
الموت من قرر يضيفك
انحور مديت بمضيفك
منهة ونتة انفاس ريتي
من الولادة الحد منيتي
#################################
موقفك بالطف خادمك خلاني
حتى ويعدوانك جنت انساني
مجنون صرت بطيبك الرباني
يالبشدد مهموم ما عافاني
القابل بحركة خيامة
وعايف اولادة يتامة
حتى ننعم بالسلامة
بكلبي غيرك ماكو واحد
عالعشك بس الله شاهد
شمعة حبك ضاوي بيتي
من الولادة الحد منيتي
#################################
لوابقة كل طول العمر اقرالك
ودموعي تنشف كثر ما انعالك
ما اوفي ذرة بركض خوف اطفالك
لوصرت خيمة وبيهة الم اعيالك
حسين ياوموقف اوافي
ونتة عالتربان غافي
وهية بس التلة كافي
لوعشت كل عمري خادم
ما اوفي وية الهواشم
خدمة لو خلصت دنيتي
من الولادة الحد منيتي
#################################
يحسين جمرة انه المصابك صاير
وترجمهة راسي اعليك يوم العاشر
تتطبر انتة وانة اضل ماطابر
يابو الحساس المايحس بي شاعر
العاشر معيشني جمرة
وماتطيب اجروحي طبرة
اعليك نحري ايريد نحرة
يالكتر مابيك سالم
لو احس وافيك واهم
حروفك تضل بوصيتي
من الولادة الحد منيتي
#################################
ذوالفقار الزيدي

دربك يحسين ..علمني اصاحب عن فكر
دربك يحسين..ما اصاحب اشباه الشمر
مدرسة انتة وعلمتني بطينة اصحابي
###########################

البشر مثل المعادن والطبع من معدنة
والكلب موطن تصرف كل قياس بموطنة
وذني مضمومقات كلهن جوة طي الالسنة
وكل شخص ينقلة صورة عن صبغتة وديدنة
ونة ابدربك لكيت الروح تحب المثلي فاهمني
القنعتة ابفكرتي اعلة حسين وفكرتة عليك قنعتني
اوياه تساويت ..نفس الفكر نفس الدرب
اوياه تساويت..نفس العشك نفس المحب
بهذا دربك جمعتهم ناسي واحبابي
مدرسة انتة وعلمتني بطينة اصحابي
###########################
علمتني اشلون اميز الليل من وجه الصبح
الكلبة اسود ما اريدة اختار صحبان الملح
عايف اصحاب المساوء ربعي لتطيب الجرح
صاحب الخدمة لكيتة وغيرة صاحب مايصح
شفت خدامك ايوافون مواقف ترسو الخوة
اهل وكفة يربع حسين ويكضهم ملح المروة
شفت الخدام..اهل الصدك اهل الشرف
شفت الخدام..خوتهم احساس وترف
الكيت ليوافي الصداقة بخدمتك رابي
مدرسة انتة وعلمتني بطينة اصحابي
###########################
قد تركت الخلق طراً ياحسيناً في هواك
وكمت ادور عالصداقة البيهة يشملني رضاك
ماتهمني الناس كلهة ايهمني كون ابقة معاك
وية لطامة مصابك وية كل واحد نعاك
ادور الي يمر حسين اعلة كلبة وتنزل دموعة
ودور ابن الوكفلك عون وادور الامة جن طوعة
والكيت اصحاب..الهاي القضية مناصرة
والكيت اصحاب..ولد الحليبة الطاهرة
البيهة اصبعي ما اشوفة عضة انيابي
مدرسة انتة وعلمتني بطينة اصحابي
###########################
صاحب النية السليمة صاحب الخدمة يضل
كلبة طيب جنة كلبك طبعة اسهل من سهل
مايطش بعيوب ربعة ايروف للخوة ويشل
الخادم يعثر اليضدة وشارتة براعي الفضل
لكيت ابخادمك ميزة ابكثرماطيب ايشور
يدور الزينة للصحبان وغير الزينة ميدور
ليدور الزين..جملهة صورة صاحبة
ليدور الزين..من حاضرة ومن غايبة
موش ذاك الكال حزني ابصبغة اثيابي
مدرسة انتة وعلمتني بطينة اصحابي
###########################
باجر ابيوم القيامة اتبين الوان الكتب
وتطلع اصحاب الخباثة ويطلع الابيض كلب
باجر المحشر يشاهد لمن الزهرة تطب
تنادي وينة الناصر ابني والمجالسنة محب
باجر بالحشر فاطم تنادي وين اليحبنة
ابمواكبنة ونصيح اهناك يحسين ابضمايرنة
ونقيم اهناك..مجلس عزة وي فاطمة
ونقيم اهناك..ابذيج الحشود اللاطمة
ياحسين ايضل شعار ابنبرة جوابي
مدرسة انتة وعلمتني بطينة اصحابي
###########################
ذوالفقار الزيدي

((نزال اهوازي))

وين اجفوف ابو فاضل زينب تنشد اعليهن
برض الغاضرية ادور ..زينب تنشد اعليهن
#################################
طلعت من خيمهة ادوراعليهن
موش اعتاب بس رادت تحاجيهن
الخيم محتركة جا ياهو اليطفيهن
كلتهن نار محتاجات راعيهن
وفواطم فرت من الخوف..زينب تنشد اعليهن
برض الغاضرية ادور..زينب تنشد اعليهن
#################################
تريد اجفوفة خاطر زينب اتكلهة
شنهي الهامهة من صعدت التلهة
وي راعيهة اجت ياهو اليوصلهة
النوك انسلبت وحركو محاملهة
اجفوف الي ترد النوك ..زينب تنشد اعليهن
برض الغاضرية ادور ..زينب تنشد اعليهن
#################################
تدور بالضحاية الحرة مالومة
تسأل ياشماتة اعليهة بالحومة
ولا عباس يملك حيل للكومة
ويرجع للحرب ويردن اعلومة
واعلوم الكمر عباس ..زينب تنشد اعليهن
برض الغاضرية ادور..زينب تنشد اعليهن
#################################
تريد اتلم يمين اخويهة واليسرة
وتكلهن ياوكت دست انة عالجمرة
راعيجن كلف ميهوّن العشرة
متوكفة الفزعتي الضربة والطبرة
تريداتعاتب الضربات..زينب تنشد اعليهن
برض الغاضرية ادور ..زينب تنشد اعليهن
#################################
تريد اتكلهن اعلة اصاير اعليهة
وحتى اجفوف ابو فاضل تبچيهة
تريد اتلمهة تشبكهة وتشم بيهة
عطر الخوة من اثار راعيهة
الشمت ريحة الخوان..زينب تنشد اعليهة
برض الغاضرية ادور ..زينب تنشد اعليهن
#################################
ذوالفقار الزيدي