በቀይ አበቦች መስክ ላይ መመላለስ እንዴት መንፈስን ያድሳል? እነዚህ የቤተ ክርስቲያን ልጆች የእናታቸው ቅድስት ቤተ ክርስቲያንን ጉልበት ስመው ሲሞሸሩ ማየት እንዴት ደስ ያሰኛል? ሰማንያ ስምንት ወጣቶች በሥጋ ወደሙ ከብረው በመላእክት ታጅበው በዝማሬ ባሕር ሲዋኙ ማየት እንደምን ያለ ደስታ ነው? ከእነዚህ አርባ አራት ሙሽሮች የሚወለደውን አዲስ ክርስቲያን ትውልድ ማየትስ እንዴት ያጓጓል? ልጆቻችን በእናንተ መታዘዝ ኮርተናል:: ሰይጣን የሚዋጋውን የቤተሰብ ቤተ መቅደስ ስትገነቡ የዓይን ምስክሮች ስለሆንን ደስ ይለናል:: እልፍ ሁኑ! እናንተን ለመዳር ወገባቸውን የታጠቁ እጅግ የሚወዷችሁ የቤተክርስቲያን ልጆች የኢትዮጵያዊው ጃንደረባ ትውልድ ወጣቶች ሁሉ የእናንተን ደስታ አይተው ነፍስ አልቀረላቸውም! ትዳራችሁን እንደ ሰርጋችሁ ያማረ ያድርግልን!
#share
@diyakonhenokhaile

በስዊዘርላንድ የምትገኘው የኢትዮጵያ ኦርቶዶክስ ተዋሕዶ ቤተ ክርስቲያን በመቄዶንያ ለሚገኙ 8500 አረጋውያንና የአእምሮ ሕሙማን ለእያንዳንዳቸው አንድ አንድ ሺህ ብር በመሥጠት ሥጦታዋን ስምንት ሚልዮን አምስት መቶ ሺህ አደረሰች:: ቤተ ክርስቲያን ሁልጊዜም የድሆች መጠጊያ መሆንዋን ባስመሰከረችበት በዚህ የመቄዶንያ የእርዳታ ማሰባሰብ ዘመቻ ላይወንጌልን በፅንሰ ሃሳብ ብቻ ሳይሆን በተግባር አሳይታለች:: “እናንተ የሚበሉትን ሥጧቸው እንጂ ሊሔዱ አያስፈልግም” ብሎ ጌታ ለደቀ መዛሙርቱ የተናገረውን ቃል የማትረሳዋ ቅድስት ቤተ ክርስቲያን በስዊዘርላንድ የሚኖሩ ልጆችዋን እጅ እጅ አድርጋ የመቄዶንያን አረጋውያን ጎብኝታለች:: መቄዶንያ 8500 አረጋውያንና የአእምሮ ሕሙማንን አቅፎ የያዘና በፍጥነት ወደ ጤናቸው መመለስ የቻሉትን እዚያው ወደ ሥራ እያሠማራ የሚገኝ ውድ ተቅዋም ነው::

ከወራት በፊት በመቄዶንያ አምባሳደር ሆኜ በተሰየምኩበት ወቅት በመቄዶንያ 7000 አረጋውያንና የአእምሮ ሕሙማን የነበሩ ሲሆን በመላ ሀገሪቱ የነበረው የመቄዶንያ ቅርጫፍም 44 ነበረ:: አሁን ያሉት የመቄዶንያ ሕሙማንና አረጋውያን 1500 ጨምረው 8500 ሲሆኑ የቅርጫፎቹም ቁጥር 46 ደርሶአል:: እግዚአብሔርበገሐድ እየሠራ ያለበት ይህን ቅዱስ ሥፍራ እባካችሁ መጥታችሁ ጎብኙ::

በዚሁ አጋጣሚ ሙሉ ገቢው ለመቄዶንያ የሚውለውን ባዚልያድ የተሰኘ መጽሐፌን ለተቅዋሙ ማስረከቤ ይታወቃል:: መጽሐፉ አርትዖቱ እየተጠናቀቀ ስለሆነ ይህንን ሙሉ ትኩረቱን ነገረ ምጽዋት ላይ ያደረገ መጽሐፍ ለማሳተም በኅትመቱ ዘርፍ ያላችሁ ወገኖቻችን እንድታነጋግሩን ጥሪ እናቀርባለን::

ሰውን ለመርዳት ሰው መሆን በቂ ነው!

ዲያቆን ሄኖክ ኃይሌ
የመቄዶንያ ብራንድ አምባሳደር
ግንቦት 28 2017 ዓ.ም.
#share
@diyakonhenokhaile