#dolzarb_90_kun

Denovda yozgi “Biologiya” kursi samarali davom etmoqda

Denov tadbirkorlik va pedagogika instituti Aniq va tabiiy fanlar fakultetining “Biologiya va qishloq xoʻjalik mahsulotlari texnologiyalari” kafedrasi qoshida tashkil etilgan “Biologiya” fani kursi yozgi taʼtil davrida ham oʻz faoliyatini samarali davom ettirmoqda.

Mazkur kurs Denov tumanidagi 2-son Politexnikum bilan hamkorlikda tashkil etilgan boʻlib, institutga biriktirilgan ushbu muassasaning 1-kurs o‘quvchilari – Tursunova Mashxura va Sattorova Munisa yozgi taʼtil davrida biologiya fanini chuqur oʻrganish maqsadida ushbu kursda faol ishtirok etishmoqda. Ular dars mashgʻulotlarida muntazam qatnashib, ustozlari tomonidan berilgan nazariy va amaliy bilimlarni puxta oʻzlashtirishdi.

E’tiborga molik jihati shundaki, bu ikki iqtidorli o‘quvchi Biologiya fanidan oliy taʼlim muassasalariga kirishda imtiyoz beruvchi milliy sertifikatlarga ega bo‘lishdi. Bu esa kursda olib borilayotgan ta’lim jarayonining samaradorligi va sifatini yana bir bor tasdiqlaydi.

Darslar Islom taraqqiyot banki tomonidan moliyalashtirilgan xalqaro grant loyihasi doirasida taqdim etilgan zamonaviy oʻquv-laboratoriya jihozlari yordamida olib borildi. Bu esa o‘quvchilarga biologiyaning nazariy asoslari bilan bir qatorda, amaliy ko‘nikmalarni ham chuqur o‘zlashtirish imkonini berdi.

Mazkur yozgi kurs nafaqat bilim olish, balki o‘quvchilarni oliy ta’limga tayyorlashda, ularda ilmga qiziqishni shakllantirishda muhim o‘rin tutmoqda. Bunday tashabbuslar yosh avlodni ilm-fanga yo‘naltirishda muhim qadamlardan biridir.


Denov tumani hokimligi
Axborot xizmati

✅ gov.uz/denov

🕊Telegram 📱Instagram 📱Facebook 📺YouTube