"أنا كذا —— مثل الشغف.. لا توارى
‏من عاشني لحظة، يسولف بي سنين"

"هي عظيمة بس والله ما دريت إنها عظيمة
‏لين قالوا.. ما يعرف الحاجه الّا من فقدها"
‏
__مطرف بن شارع.

"على كثر ما كانت ليال الوصال قصار
‏على كثر ما كانت طويلة.. بـ ذاكرتي"
‏
__عبدالله السراهيد.

"عندي شهود بإن عيونك اللي رمنّي
‏لو أنا يوم شفتك، قلت محدٍ رماني"

"حبيبي.. من يقول اني رضيت اطيح؟
‏مطيحي في غرامك كان.. في غَفله

‏مثل عطرٍ لفت به.. كفّتين الريح
‏طرق قلبٍ ورا صدري، و سرق عَقله

‏عشقتك كنّ ما ثلث الهوى.. تجريح
‏ولا كنّ المحبه ما هي بـ سَهله

‏طمعتك كنّ ما ذقت الوله تبريح
‏ولا كنّ الليالي… باللقى خَجله"

"ودي ارد قلبي بالغزل ياغزاله
‏لايسوي سوات اللي يهمّل رفيقه

‏الهوى لذّته في طيشه وفي هباله
‏ولذّة اول شعور وربكة اول دقيقه

‏وجهٍ اللي يشوفه ينبهر من جماله
‏وطلةٍ تجعل الرجال يشرغ بـ ريقه!

‏ودي امثل مثول المتهم للعداله
‏ماعلي دامني بين اليدين الرقيقه

‏العفو "ياشبيه اللي جفل من ظلاله"
‏نظرتي في التفاصيل الدقيقه دقيقه

‏انت حتى الذهب يزهاه جيدك لحاله
‏ويتلاشى على غيرك ويفقد بريقه"

__جابر النشيرا.

"تمايل عودك المايل على عوج الضلوع وذاب
‏كأن الله خلق صدري وطنْك وضحكتك بيتي

‏تباهي في قصيد اللي قصيده يسرق الالباب
‏يجيب اللي عجز غيره يجيبه لا تعدّيتي"

"استلذِّيت الغياب وتركت اللي يبيك
‏مادريت أن المفارق بدايات العناء

‏كل حاجهٍ في غيابك على حطه يديك
‏الحزن والهم - والجرح - والحب - وأنا"

"أنا محتاج شي أشمل من النسيان
‏أنا النسيان وحده ما ينسيني!"

"تطاوعك القوافي كلها بالوزن و التركيب
‏بشعرٍ مقصده يرضيك في لونه و تلحينه"

"ياقلبي لو إن الناس ماعاد تدري عنك
‏يعزّيني انّك لو قسّوا فيك.. ما تقسى

‏تعيش التفاصيل الصغيرة وتاكل منك
‏تحاول على نسيانها بس ما تنسى"

"في مثل هذي العيون اللي هدبها كثيف
تسّلم الروح ويموت الشجاع بشرف

راحت بقلبي مثل ما راح حكم الشريف
مراح غرسً جرفه السيل يوم انجرف

وان مال ذاك القوام المنصهر يالطيف
غصن لا هب النسيم يميل منه طرف

اطيح طيحة قوي ماهيب طيحة ضعيف
طيحة شجاعٍ هزمه الحب لين اعترف"

__جابر النشيرا.

"‏إذا حزنتي من يبي يسعد الناس؟
‏الحزن ماهو زين لاتزينينه

‏من البديهيّات في علم الاحساس
‏لايمكن تكون السعاده.. حزينه" 💘

__عفاس بن حرباش.

للحين وطيوفه تمرّ، وتبارى
كنها تذكّرني.. وأنا ما تناسيت

ليت الدموع الي تبين، وتوارى
تغسل بقايا الذاكرة لا تواريت

وليت الظنون أن ما نفعها المدارى
تنفع غريبٍ في نحا ضيقته: "ليت"

__عبدالله البديري.

"اتحرّى يمكن الليل يطلع منه نور
ولّا يمكن تنطق شفاك: لبّيه وهلا"

__بندر الدويش.

"بنيّات العيون إن سالت بـ خدك تجيب أقصاي
‏لا تنثرها.. واحارب لك زماني طالبٍ ثاري

‏لا تهزمني دموعك، والزمن لا مثلي وْ شرواي
‏تشيّم عن مطيحي، صد دمعاتك عن انظاري

‏أجيك؛ المنهك اللي ما يبي منّك رجّاحة راي
‏أبيك؛ المنصت اللي جاوبت شرهاته، أعذاري" ):

__طلال الصقيه

يقولون العواذلْ؛ وين عقلك؟ والهوى مجنون
وانا وإن جيت كلي، ويش أسوي هذي أطباعي

__ضيدان المريخي

"آه يالفاتنة.. لو تدركين أختلافي
‏أنا فرصة عمر ماني بفرصه سعيده"
‏
__بندر الدويش.

"اجمل ثياب السما، ثوب الغروب
‏كل يوم اتأمله… و أصوّره

‏شمسه تصبّ السطوع بكل صوب
‏حتى لا راحت… تروح منوّره"