Аралаш сайлов тизими пропорционал ва мажоритар сайлов тизимларининг ижобий хусусиятларини уйғунлаштирган ўзига хос сайлов тизимидир.

Мазкур сайлов тизимида вакиллик органидаги депутатлик ўринларининг бир қисми бир мандатли сайлов округларидан кўрсатилган депутатликка номзодларга берилган овозлар натижасига кўра, иккинчи қисми эса ягона сайлов округи бўйича партия рўйхатига мувофиқ сиёсий партияларга берилган овозларга мутаносиб равишда тақсимланади.

Сайлов кампанияси – бу сайловларга тайёргарлик кўриш ва уни ўтказиш бўйича тадбирлардан иборат жараён. Сайлов кампанияси Марказий сайлов комиссияси томонидан оммавий ахборот воситаларида эълон қилинади. Сайлов кампанияси расмий эълон қилинган кундан бошланиб, сайлов натижалари эълон қилинган кунга қадар давом этади.

Қонунчилик палатаси депутатлари сайловини ўтказиш бўйича бир мандатли сайлов округлари вилоят, туман, шахар хокимларининг тақдимномасига биноан тегишли ҳудудий, туман, шаҳар сайлов комиссияси томонидан, қоида тариқасида, сайловчилар сони тенг ҳолда ҳар беш йилда бир марта тузилади. Сайлов округларининг чегаралари вилоятлар, туманлар ва шаҳарларнинг маъмурий-ҳудудий тузилиши инобатга олинган ҳолда белгиланади

Маҳаллий Кенгашларга сайлов ўтказиш бўйича бир мандатли сайлов округлари халқ депутатлари туман, шаҳар Кенгашларининг тақдимномасига биноан тегишли ҳудудий, туман, шаҳар сайлов комиссияси томонидан, қоида тариқасида, сайловчилар сони тенг ҳолда ҳар беш йилда бир марта тузилади. Сайлов округларининг чегаралари вилоятлар, туманлар ва шаҳарларнинг маъмурий-ҳудудий тузилиши инобатга олинган ҳолда белгиланади.