Сайлов фуқароларнинг у ёки бу номзодни ёхуд сиёсий партияни ёқлаб овоз бериши орқали давлат ҳокимияти органларини шакллантириш жараёнидир.

Сайлов халқ ҳокимиятининг бевосита олий ифодасидир. Сайлов орқали фуқаролар жамият ва давлат ишларида бевосита ва ўз вакиллари орқали иштирок этади, сайлаш ва сайланиш ҳуқуқини амалга оширади. У ҳар бир фуқаронинг ўз келажаги, Ватан равнақи ва халқининг фаровонлигини таъминлашда иштирок этишига имкон берувчи сиёсий жараёндир.

Сайлов натижасида фақат мамлакат Президенти ва вакиллик органларининг депутатлари сайланибгина қолмай, жамият аъзоларининг мамлакатда олиб борилаётган сиёсатга, амалга оширилаётган кенг кўламли ислоҳотларга нисбатан муносабати аниқланади.

Сайлов – фуқароларнинг умумий, тенг, тўғридан-тўғри сайлов ҳуқуқи асосида яширин овоз бериш орқали сиёсий партиялар томонидан кўрсатилган номзодлар орасидан давлат раҳбари лавозимига, парламент ва маҳаллий Кенгашлар депутатлигига сайланиш.

Тўғридан-тўғри сайлов ҳуқуқи – Ўзбекистон Республикаси Президенти, Қонунчилик палатаси депутатлари, маҳаллий Кенгашлар депутатларининг фуқаролар томонидан бевосита сайланиши.

Ўзбекистон Республикасида сайлов ўтказишнинг асосий принциплари:
– умумий сайлов ҳуқуқи;
– тенг сайлов ҳуқуқи;
– тўғридан-тўғри сайлов ҳуқуқи;
– яширин овоз бериш;
– сайловга тайёргарлик кўриш ҳамда уни ўтказишдаги очиқлик ва ошкоралик.

Тенг сайлов ҳуқуқи – сайловда иштирок этувчи ҳар бир фуқаронинг бир овозга эга эканлиги. Суд томонидан муомалага лаёқатсиз деб топилган фуқаролар, шунингдек суд ҳукми билан озодликдан маҳрум этиш жойларида сақланаётган шахслар сайланиши мумкин эмас. Суд томонидан муомалага лаёқатсиз деб топилган фуқаролар, шунингдек оғир ва ўта оғир жиноятлар содир этганлик учун суднинг ҳукмига кўра озодликдан маҳрум этиш жойларида сақланаётган шахслар сайловда иштирок этиш ҳуқуқидан фақат қонунга мувофиқ ҳамда суднинг қарори асосида маҳрум этилиши мумкин. Бошқа ҳар қандай ҳолларда фуқароларнинг сайлов ҳуқуқларини тўғридан-тўғри ёки билвосита чеклашга йўл қўйилмайди.