የኢንዱስትሪ ሚኒስቴር አመራሮች የጽዱ ኢትዮጵያ ንቅናቄን ተቀላቀሉ

አዲስ አበባ፣ ሚያዝያ 25፣ 2016 (ኤፍ ቢ ሲ) የኢንዱስትሪ ሚኒስቴር አመራሮች እና ሠራተኞች የጽዱ ኢትዮጵያ ንቅናቄን ተቀላቀሉ፡፡

በዚህም ኢንዱስትሪ ሚኒስቴር 100 ሺህ፣ የኢንዱስትሪ ሚኒስትር መላኩ አለበል 5 ሺህ እንዲሁም ሌሎች የተቋሙ አመራሮችና እና ሠራተኞች የተለያየ መጠን ያለው የገንዘብ መጠን ድጋፍ በማድረግ ንቅናቄውን ተቀላቅለዋል፡፡

ሌሎች የኅብረተሰብ ክፍሎችም በኢትዮጵያ ንግድ ባንክ በተከፈተው የሂሳብ ቁጥር 1000623230248 ድጋፍ በማድረግ ንቅናቄውን መቀላቀል ይችላሉ፡፡

ንቅናቄው ሰዎች በየመንገድ ዳሩ ከመጸዳዳት ወጥተው ንጽህናውን በጠበቀ ቦታ የመጸዳዳት ባህላቸውን እንዲያሳድጉ፣ ለዚህ ደግሞ ደረጃቸውን የጠበቁ መጸዳጃዎች እንዲሠሩ በጠቅላይ ሚኒስትር ዐቢይ አሕመድ (ዶ/ር) ይፋ መሆኑ ይታወቃል።

ፖሊስ 89 ተጠርጣሪዎችን በቁጥጥር ስር አውሎ የተሰረቁ የመኪና ዕቃዎችን ማስመለሱን ገለጸ

አዲስ አበባ፣ ሚያዝያ 25፣ 2016 (ኤፍ ቢ ሲ) 89 ተጠርጣሪዎችን በቁጥጥር ስር በማዋል በተለያየ ጊዜ የተሰረቁ 1 ሺህ 269 የመኪና ዕቃዎችን ማስመለሱን የአዲስ አበባ ፖሊስ አስታወቀ፡፡

በዚህም በልደታ፣ አራዳና አዲስ ከተማ ክፍለ ከተሞች አዋሳኝ ወረዳዎች የመኪና ዕቃ በሚሰርቁ፣ ሕጋዊ የንግድ ፈቃድን ሽፋን በማድረግ የተሰረቀውን የመኪና ዕቃ ከሌቦች በሚቀበሉ በአጠቃላይ ወንጀሉን ተደራጅተው ሲፈፅሙ የነበሩ 89 ተጠርጣሪዎችን በቁጥጥር ስር በማዋል ብዛታቸው 1 ሺህ 269 የሆነ 33 አይነት የተለያዩ የመኪና ዕቃዎችን ማስመለሱን ገልጿል፡፡

ከተያዙት ዕቃዎች መካከልም÷ 528 ልዩ ልዩ ፍሬቻዎች፣ 187 ስፖኪዮዎች፣ 113 የመኪና መብራቶች፣ 172 የዝናብ መጥረጊያዎች እንደሚገኙበት የአዲስ አበባ ፖሊስ መረጃ አመላክቷል፡፡

የተሰረቁ የመኪና ዕቃዎችን የሚገዙ ለወንጀሉ መስፋፋት ዋና መንስኤ በመሆናቸው በእነሱ ላይ የሚደረገው ቁጥጥር ተጠናክሮ እንደሚቀጥልም አስታውቋል፡፡

የመኪና ዕቃ የተሰረቀባቸው ግለሰቦችም በልደታ፣ አራዳና አዲስ ከተማ ክፍለ ከተሞች ፖሊስ መምሪያዎች በመቅረብ ንብረታቸውን መውሰድ እንደሚችሉ ገልጿል፡፡