Bir çin hikmətində deyilir: Tayşan dağında oturub müqəddəs olmaq çox asandır. Bazarda oturub, müqəddəsliyini saxlamaq daha çətindir.

Deyir, bir zaman insanları anladığımı güman etmişdim. İndisə güman etdiyimi anlamışam.

Hər bir insan bu üç şeyin siyahısını tutmalıdır:
1. Arzuları (hədəf)
2. Ehtiyac (hədəfə çatdıran vəsaitlər)
3. Özünü necə görmək istəyir ( - və + cəhətlər)

Bir gün bir adam psixoloqun yanına gəlir və dərin depressiyada olduğunu deyir.Çox bitgin və ümidsiz , qəmgin həyat tərzinin onu uçuruma apardığını psixoloqa bildirəndən sonra,həkimin cavabı qısa və net olur: "Sizin dərdinizin çarəsi çox sadədir.Məşhur kloun Paqliaçi şəhərdədir.Onun əyləncələrini izləyin."
Xəstə həkimə deyir : " Həkim, həmin kloun Paqliaçi mənəm..."
©"Watchmen" filmindən.

Evə gəlirsən, uşaq soruşur: "Mənə nə almısan?" Desən, ərzaq, meyvə-tərəvəz - qane olmayacaq, ağız büzəcək. Çünki xüsusilik istəyir. Mənə ümumi və müştərək şeydən danışma. Şəxsən məni nəzərə almısanmı?
Allahla bizim münasibətimiz də bu cürdür. Xüsusiliyi, dəyərli olmağı hiss etmək istəyirik.

Bir nəfər danışırdı: Mən çox gözləyirdim ki, həyatım dəyişəcək. Amma sonra anladım ki, sən demə, o mənim dəyişməyimi gözləyirmiş...

Qəşəng hikmətlərdir: Keçidən - ön tərəfdən, atdan - arxa tərəfdən, axmaq və cahildən isə - hər tərəfdən qorx.
Şirin olma, yeyərlər. Acı olma, tüpürərlər.

Qorxma ki, alınmayacaq. Qorx ki, heç yoxlamamış olacaqsan.

Psixoloq və psixpterapevtlərin ən çox işlətdiyi suallardan biri "nə hiss edirsən?" sualıdır. Yolgöstəricidir, tanıdıcıdır. Çox suala cavab tapmaq olur. Ən çox qaçdığımız sualdır.

İlahi, məni sevirsənmi

Həzrət Peyğəmbər buyurub: Üç xüsusiyyət var ki, kim malik olsa, təsiri ona qayıdacaqdır:
1. Zülm etmək;
2. Aldatmaq;
3. Vədinə xilaf çıxmaq.
* Biz buna Bumeranq qanunu da deyirik.

Deyir, həyat foto kimidir: gülümsədikdə daha yaxşı alınır

Ac adamla həyatın mənası barədə danışmaq yersizdir, çünki onun daha çox yeməyə ehtiyacı var.

"Mühakimə etməyin, mühakimə olunarsınız; çünki hansı məhkəmə ilə ittiham edirsinizsə, o şəkildə ittiham olunacaqsınız, hansı ölçü ilə ölçürsünüzsə, o şəkildə də ölçüləcəksiniz". (Matfey, 1-2)

Deyir ki, açıqsözlü olmaq çox yaxşıdır. Belə ki, daha sonra itirə biləcəyinizi bəribaşdan itirmiş olarsız.

Deyir, insanları xarici görünüşə görə təhqir etmək ən axmaq və xaincəsinə bir addımdır. Çünki insanlar hansı görünüşdə doğulacaqlarını seçmək iqtidarında deyillər.

İnsanların ən yaxşısı odur ki, sənin həyatına daxil olur və əvvəllər bulud gördüyün yerdə sənə günəşi göstərir. O insanlardır ki, sizə o qədər möhkəm inanırlar ki, nəticədə siz də özünüzə inanmağa başlayırsız. O insanlar ki, sizi sadəcə var olduğunuz üçün sevir və istəyirlər.

Deyir ki, heç vaxt sevdiyin bir kəsi tərk edərək xoşlandığın insana tərəf getmə, çünki xoşlandığın insan bir gün səni tərk edərək sevdiyi kəs tərəfə gedəcəkdir.

Çox vaxt insanları maraqlandıran şeylər onlara aidiyyati olmayan şeylər olur.

Vilyam Barkley deyir, hər bir insanın həyatında iki əsas əlamətdar gün var: Birinci - onun doğulduğu, ikinci isə - nə üçün doğulduğunu anladığı gündür.