Эрон Исроил ҳудудидаги нишонларга муваффақиятли зарбалар берилганини маълум қилди

Эрон оқшомда Исроилга уч марта, жами 300 га яқин баллистик ракеталар билан ҳужум қилди. Расмий баёнотга кўра, ракеталар Тел-Авивдаги режалаштирилган мақсадларга — жумладан, ҳарбий базалар ҳамда Мудофаа ва Миллий хавфсизлик вазирликларининг биноларига бориб урилган.

Fox News телеканали эфирида берилган маълумотда келтирилишича, зарбалар Исроил пойтахти марказида жойлашган Қуролли кучлари муассасалари тўпланган стратегик аҳамиятга эга ҳудудга қаратилган.

Бироқ Исроил расмийлари ҳужум натижасида асосан фуқаролик объектлари зарар кўрганини таъкидламоқда. Мамлакат Бош вазири Биньямин Нетаняҳунинг баёнотига кўра, Исроил Эроннинг баллистик ракета захираларининг "салмоқли қисмини" йўқ қилишга эришган.

Эрон Ташқи ишлар вазири Теҳрон АҚШ билан янги музокаралар бўйича маслаҳатлашувлар олиб борганини, бироқ Исроилнинг зарбалари мамлакатни "дипломатик йўлдан чекинишга" мажбур қилганини қайд этди.

🔥@fayzboguz

Эрон ва Исроил ўртасидаги тўқнашувлар давом этмоқда. Бугунгача қайд этилган қўшимча маълумотлар:

▪️ The Jerusalem Post хабарига кўра, Эрон томонидан амалга оширилган ҳужумлар натижасида камида 4 киши ҳалок бўлди, тахминан 70 киши жароҳат олди. Тел-Авив округи қўмондони «зарбалар оқибатида етказилган зарар жуда катта» эканлигини айтмоқда. Зарбалар, шунингдек, Қуддус, Беэр-Шева, Гуш-Дан ва бошқа шаҳарларга йўналтирилган;

▪️ МАГАТЭ раҳбари Рафаэл Гроссининг маълум қилишича, Исроил томонидан нишонга олинган Натанздаги Эрон уран бойитиш заводининг ер усти қисми ва унинг электр инфратузилмаси бутунлай йўқ қилинган;

▪️ Доналд Трамп Эроннинг АҚШ билан музокаралар олиб бораётган барча вакиллари Исроил томонидан йўқ қилинганини таъкидлади;

▪️ Эрон расмийларининг маълум қилишича, кеча амалга оширилган зарбалар 150 дан ортиқ нишонга қаратилган бўлиб, улар орасида F-35, F-16, F-15 қирувчи самолётлари, ёнилғи қуйиш ва транспорт учоқлари жойлашган ҳарбий авиабазалар ҳам бор;

▪️ Эроннинг БМТдаги доимий вакили Исроилнинг ҳаракатларини "уруш эълон қилиш билан баробар" дея баҳолади;

▪️ Исроил ҳарбий-ҳаво кучлари Эроннинг баллистик ракеталари ва уларнинг учириш мажмуаларига зарбалар беришда давом этишини маълум қилди.

🔥@fayzboguz

Исроил ва Эрон ўртасидаги ҳарбий қарама-қаршилик тобора кескин тус олмоқда

Исроил ва Эрон ўртасидаги кенг кўламли ракета ҳужумлари алмашинуви учинчи кундан буён давом этмоқда. Эрон зарбалари тобора ҳалокатли тус олмоқда ва Исроил фуқаролари орасида жиддий талофатларга олиб келмоқда.

Исроил армияси эса бомбардимон қилинаётган объектлар тармоғини кенгайтирмоқда — ҳарбий ва ядровий инфратузилмадан ташқари, энди Эрон иқтисодиётининг асосий тармоқларидан бири бўлган нефт-газ саноати ҳам ҳужум остида қолмоқда.

Можаронинг учинчи куни Исроил Эронга навбатдаги йирик ракета зарбасини берди

14 июн оқшомида Ислом Республикасининг энг йирик газ кони — Жанубий Парс ҳужумга учради, натижада у ерда газ қазиб олиш вақтинча тўхтатилди. 15 июнга ўтар кечаси эса Теҳрондаги Шаҳран нефт омбори, Эрон Мудофаа вазирлиги штаб-квартираси, Мудофаа инновациялари ва тадқиқотлари ташкилоти (SPND) биноси ва бошқа объектларга зарбалар берилди.

Халқаро Атом Энергетикаси Агентлиги (МАГАТЭ) маълумотларига кўра, нишонлардан бири Исфаҳон шаҳридаги уранни қайта ишлаш заводи бўлган, у ерда уранни конвертация қилиш ва ёқилғи пластиналари ишлаб чиқариш цехлари ҳамда яна тўртта муҳим бино жиддий шикастланган. Эрон матбуотига кўра, баъзи зарбалар тинч аҳолига тегишли объектларга ҳам зарар етказган — Теҳроннинг шимоли-шарқида жойлашган турар жой биноси ракета зарбасидан бутунлай вайрон бўлган. Fars агентлиги хабар беришича, бинонинг қулаб тушиши оқибатида 10 нафар бола ҳалок бўлган.

ЦАХАЛ маълумотларига кўра, бу тунда Эрондаги 80 дан ортиқ объект нишонга олинган. Сўнгги уч кун давомида Исроил ҳарбийлари Эронда 170 дан ортиқ нишонни йўқ қилган.

Эрон эса ўз ҳудудига қилинган ҳужумларга жавобан сўнгги уч кун ичида энг ҳалокатли ракета ҳужумини амалга оширди

ЦАХАЛ маълумотларига кўра, 15 июнга ўтар кечаси Исроил ҳудудига 80 га яқин баллистик ракета учирилган. Мазкур зарбалар натижасида камида 10 нафар тинч аҳоли ҳалок бўлган. Хусусан, Эрон зарбаси натижасида Тел-Авив яқинидаги Бат-Ям шаҳридаги кўп қаватли уй бутунлай вайрон қилинган. 15 июн куни эрталаб Бат-Ямдаги қутқарув ишлари кетаётган ҳудудга Исроил бош вазири Бинямин Нетаняҳу ташриф буюрди ва Эронни жазолашга ваъда берди.

Ҳужумлар натижасида Исроил бўйлаб 200 дан ортиқ киши жароҳат олган. Эроннинг Ислом инқилоби қўриқчилари корпуси хабарига кўра, зарбалар Исроил қирувчи самолётларига ёқилғи ишлаб чиқарувчи корхоналар ва энергия марказларига қаратилган бўлган, аммо ЦАХАЛ бу маълумотларни тасдиқламади.

Иккала давлатда ҳам тинч аҳоли орасида қурбонлар сони ошиб бормоқда

Исроил учун сўнгги тун энг ҳалокатлиси бўлди. Эрон зарбалари оқибатида мамлакатда уч кун ичида камида 13 киши ҳалок бўлди. Исроил зарбалари эса Эроннинг 80 дан ортиқ фуқаросининг, жумладан, ядро дастури олимлари ва юқори мартабали ҳарбийларнинг ўлимига олиб келди. Исроил уларни қонуний нишонлар деб ҳисоблашини таъкидлаган.

15 июн куни кундузи Исроил Эрон ҳудудига ҳужумларни қайта бошлади. ЦАХАЛ вакили форс тилидa Эрон фуқароларига мурожаат эълон қилди. Мурожаатда фуқаролардан қурол ишлаб чиқариш корхоналари ва уларнинг атрофидаги ҳудудлардан хавфсиз жойларга вақтинчалик эвакуация қилиш тавсия этилди. Орадан бир неча соат ўтиб, Теҳронда бир неча кучли портлашлар юз берди. Тhe Jerusalem Post нашрига кўра, зарбалардан бири пойтахтнинг Меҳрабад аэропортига қаратилган бўлиши мумкин.

Эрон АҚШ билан ядровий битим юзасидан музокараларни давом эттиришга тайёрлигини билдирди

Мамлакат ташқи ишлар вазири Аббос Ароқчи 15 июн куни берган баёнотида, Эрон Қўшма Штатларнинг Исроил зарбалари режалаштирилишидаги иштирокига ишонч билдираётганини, аммо шунга қарамай, Трамп маъмурияти билан Эрон ядро дастури бўйича муросани излашга тайёрлигини айтди. Айни пайтда Оқ уйдан бу баёнотга жавоб берилганича йўқ.

🔥 @fayzboguz