وطاحتلك الفرگة مورده الخدود
وانا طاحتلي كلش دمعة العين
شو طالع تخبل من الفراگ
وانا طالع مخبل بالدرابين
كل هذا واكول مقصر وياك
وانا الباچي بچي يسواله شطين
وماتبچي واعذرك وحقك بهاي
دمعك مايعرف خدودك منين
كون اموت اليوم واعدل ثاني يوم
ارد اشوف شلون تصبح عازتي
ارد اشوف ياهو يشگ ثوبة حيل
وياهو يتمضحك بنص ولايتي
امنيتي اشوف الناس شتكول من اموت
حييل
خطية
هيَ هاي طلابتي
رايد احلفلي بشر غالي
بحيث من اچذب يهدر الدم مالتي
خلصت عمري ماحالفلي بصديق مرا بأأهل البيت مرا بداعتي

أجيت تگضي وقتك ما أجيت تحَب
وأصدگنك وأعرفك بالحجي تجذب
ولو وياي كلك لو بعَض ماريد
أنه برزق وادم غُربة ماجلب
ما عفتك تنام وأنتَ ما مرتاح
وتنيمني بسوالف نار بيه تشَب!

اكابر كوه اجيب الراس عالراس
وأعاند دنيتي عناد المجانين
وأكل للروح كل ما اطيح لا باس
على جروحي توجي ولا تصيحين
شربني الزمان اسموم من كاس
اقسى وأمر من سم الثعابين
وتجرعته بصبر ما سمعت ناس
لجن يا حيف فضحتني النياشين
انه الروحي جبل يطريهه يا فاس
وانه المرمر التنحد بيه سجاجين
لخلي جفوني على الدمعات حراس
وكل للعين فنج بعد تبجين
ولو نارج جبيره وعيب تنقاس
لجنها كواي بيج شكد تحملين
ولو وصلت منيتي لكطع الانفاس
واجب من يمر شامت تضحكين
مرمر سكف روحي واصلب الساس
ولا من جام بيتي وساسي من طين
وطبع بالروح يشبه وركة الياس
يتكاثر عطره بفرك الايدين

ذبحنيَ الهَواجس بيع لتبِيع!
گتلهن گبلها هواي خَسران
وعتگن ما يفَيدن طلِعن صوف
ومشوهن عَلي گلولي كاشان
سَمت جوة السَعر بهواي ماريد
شَايل وأرد أبيع بَيش ما چان

لـ سَمير صَبيح

اخاف يفوت عمري عليك
ويعرسة الهوى ويعتك
تره الديوان لو هجرو
بس البوم بي ينغك
وتره من يكبر الرمان
طبعة يهيج يتفشك
وتره من يبرد التنور
تلتم خبزتة وتلزك
وبعد من يلتوي البسمار
مابي حيل من يندك
ترد عمري ترد ردود
تحوي شراعي لملزك

أحضني لأن ما غافي صار هواي
مد أيدك وطفي الصوت البراسي

تِمساح بنهرهم صاحوا من الخُوف
وجازفت بحياتي من سَمعت الصاح
صارعت المنيه وهَزني بيدة الموت
ومدمه طلعت صفگوا للتمساح .

ياهو مثلي
يريد يوگع مَدري وين
ياهو مثلي
يريد يبچي ، و ما لگه لدموعه عين
ياهو مثلي
يصرف عَلىٰ الدنيا زين
و تالي يلگه الناس دين
ياهو مثلي
اليختنگ من الحنين
ياهو مثلي
بداخله ضجّة مدينة
و شكله يضحك
ما يحلّ مُشكلة لروحه
و لمّن تحچيله ، ينصحك
ياهو مثلي
هوسة بي ، بس دمّه ساكن
الدنيا إذا تحترگ يمّه ، تشوفه صافن
ذكرياته تگود جدمه
و تعثر بجرحه الأماكن
ياهو مثلي
الينفعل من كِل شي ، لـٰكن گلبه خالي
الينسىٰ بس يعرضه غالي
التاكل بروحه الليالي

بس گلي شگطع خاطر انساك
دشوف شكم گلب من صدري جريت

لحد الآن
أحسك عايش بروحي
لحد الآن واحچي
بصيغة الموجود
مو بالچان
ولحد الآن ما ناسيك
على گد المحبة
يطول النسيان
شلون انسى يناسيني ؟
المواقف وگفت بكلبي
قبل لا توكف بعيني

مامفتهم روحي وما أعرف وين
عشت بسمار بفطور الحياطين
لا أحد فگدني ولا شفت ناس
عيشوني بظلام بصور مَيتين
عموها عيوني فدوه وما كلت ليش
مثل ماتعمى ذيج السچاچين
النهَار يمُر عليهم وانه فانوس
الساعه تمُر عليه تعادل سنين
تعبت ، وروحي جزعت من العتاب
كل ما أريد اسولف تغرگ العين
انه بيه سوالف تشتهي الموت
ويكلي الموت لا موهسه بعدين
يسئلوني واكلهم عايش بخير
انه جذاب عشت العمُر مو زين
هاي الناس تضحك وانه مَهموم
عشت حُر بس شلت ضيم المساچين
بَعدني بعز شبابي وبيّن الشيب
ويني ووين شيبي وعُمري عشرين
بَعدني صغير مو مالت حِزن دوم
ما شابع لعب وي الجوارين
ياروحي أصبري سنين وتهون
وإذا ماهانت اكطَعها الشرايين

بّعدك تحِن وشبأقيْ
عندِك غيّر سلهَ صغيَره
لأورأِق ألحَزن بْعدك تِحن؟
موٰ بْس شوأطَي ألذكريأت
محِرگه بيهْأ ألسُفِن
سأكِن ببّيت ألنار كِل هذهَ
الوْكت سأكن ببّيت ألنار مُو
مأ ينِسكن توزع غنأك بوَحشِه
الحٰيطأن وألعوَد نكسِر وبألك
أكثر مْن لحِن بْعدك تحّن؟
ليْش ألحزن ربأك صَأيُرلك أبو
وأنتَ بْرضأتك صأير لْحزنك أبن؟.
وبعدهَ ألخلاف ويَ الزمْن
وهوهْ صعُب وأنتَ مرَن
شنِهي أليجُبرك علِصبُر؟
وشنِهي أليجبُرك تنتظُر؟
مْأ دأم خلِوك ومٰشو
ووزنِوك مْن بأعو وزِن.

جنها هالمره صدك متفارگين
اليوم اودي وين كل هذا الحنين
مره فارگتك دقايق ومن اجيت
گتلك شعطلك كل هاي السنين
انه مرجوحه بمحرم وحدي اعيش
مثل وحشة رحم بفراك الجنين
وانت جنك جرحي اذا اداوي يروح
ع كيفك عاد يبن المسعدين
ساعه وداعك ذيج والمغربيه
مثل اليجيها وليد ويموت ابيه
هيج اريدن شوفتك من اعتنيك
لاغرام ولا هوى ولا مشتهيك
انه ذاك الشايل دموعه بگفاك
وانت ذاك الشايل الخنجر بديك
وانه ذاك المشتري البايعني دوم
وانت ذاك الي تبيع اليشتريك
الدنيا ماتوگف ع احد ياهو گال
من درت وجهك اشو وگفت عليك
يادوه جروحي اليوم شو وگفت عليك
ترفس تلث اوكات روحي ع طاريك
والله تعبني السهر يوم ارد انام
الشوارع فارغه وراسي ازدحام
احنه لو متخاربين احسلي عاد
ولا علاقتنه تضل بس السلام
وصدفه نتلاگه وغريبين ونروح
جنه مانعرف بعض والله حرام
فرگتك يحملها جا گلبي الرجيج
وعلي يريدلها صبر مالت امام
مستعد لو رديت من الجاهليه
ذنوب العرب لليوم كلهن عليه .

دك الحجر بالحجر
يطلع شرار ونار
وهز الشجر بالشجر
تنملي الگاع اثمار
گرب نهر من نهر
تلگاه قوي التيار
وانا التقيت بـ بشر
چن لاگي كومه احجار

الفرگه نار توج وسط
گلبي وتريدك مرني ماي
الليل جوع .. اعزمي مره علَى النهر
قشمر جروحي بـ أجيتك حتى انام
دزلي كلماتك وهَم بيهن سلام
يلي بيني و بين بيتك
شارع الفرگه طويل
و بطوله محتله الظلام
منين اجيبن صم نظر
مگدار شارع حتى اجيك؟
منين اجيبن عين ساعه
وساعه اضل صافن عليك
كون اجيك .. كون اصيرن جار شِفتك
ضحكه اريدن بيها اعيش
وحتى لو تحسبها أجار
انت نظراتك حبال
تجر عقل كلمن يريدك
عكس نظرات الصغار
عندي نظرات على گدي
تباوع لأبعد مكان تشوف خدي
فرگة ضعونك يغالي تريد حيل
وانا گاعد اعثر بجرحي وأميل
واعزف بلحن السوالف واشتهيتك
شحت الكلمات واذني تريد صوتك
يمي واگف .. ألزم حروفك جفاف
شما المهن اقرى كلمة راح اروح!
ادخل لعالم خيالي ألگاك أمير
ارجع لواقع حياتي الگاك غير
تحبني بس تحب عذابي
تردلي بس توگف الخطوه گبال شامت
وما تعبره وتنحني وتحضن الباب
گلبي أجّل نبضه الا يمر هواك
نمت ليلي وهو گاعد
نسى ينام وما نساك
وعشت انا وگلبي حيره
نروح ذله والبقاء يولد بنص گلبي علّه
و وگفن بنص الدرب خطوه وكرامه
عبّر الخطوه وتعال وفرح اللحظات بيك
ما أجيت وگلت اجيك
وگلت اعوفن نظر عيني احساسي يندل
لكن اعثر بالكرامه وما اجيك

عاملني بغرابة وأنة مصدوم
مَرة يدزلي بوسة ومَرة سهمة
ومَرة بگل لطافة يسولف وياي
ومَرة بنص كلام يخَلي سمة

‏وينك انتَ
احَجي لاتُكضيها سكتهَ
المَاضي عفتهَ
المَوت شفتهَ
المُر جُرعتهَ
وكلَت يمته تحَن اليّه
وانتَ ماتدرَي برحيلَك
صرت اخرَس
صوتي بكَته
ههَذا كُله الصَار بيَه
شلَونك انتَ؟