و دكاكين العزاهم خلص من كم يوم
هيچ عيوننا گوة فتحناها
هاي عيوننا لو ما فراگك، چان
يگدر هالسواد يصير جواها ؟
غلطتك ما تجي، و غلطتنا منتظريك
و كتبنالك قصائد ما قريناها
احنا الي بالمگابر دمعة ما يبچون
و عليك المغرب تنگع لحاياها
هسَة احنا چذب، ما عايشين بخير
بنص الفوضوية الما فهمناها
نركض، نلتفت
تركض ورانا وجوه
ما ناسينها، بس ردنا ننساها
إذا جابوا اخبارك، نبچي
إذا جابوك؟ نذبحلك الاصيلة الما ركبناها
و نگعدك وين ما ظلينا نبچي إعليك
لأن أكثر برودة هناك تلكاها..

مادام انتهت وارمادهن حار
خلي احجيلك الما تدري بيهن
الهدايه الچانّ بعينك رخيصات
ذني بتعب روحي مشتريهن
اقصر ويا اهلي حتى اراضيك
تالي انباع يا وسفه العليهن
عيوني المايشوفن غيرك بطيف
عساهن بحفظك وبختك بچيهن

انه احَبك حتى لو
غيري الخذاك
انتَ تبقى بداخِلي ومالك
غرض
وكُلشي بالدنيا
حَلو يذكرني بيكِ
ياخسَارة عُمري يالمالك عوض
وكت كَمت اسمك
اسِمعه من الغَريب
كَبل جِنت أسمك
اسمِعه وي النبض
انتَ خَلي ونجَمي البعِيد
انتَ يقرونك عَلي وكت المرضِ
ولله مابيه نقص ولله العظيم
انا حظ ماعندي
بس عايزني حظ .

ياگلبي جنك شو توازيتَ
واليله من غروب حنيت
انثويِ مطروحَ ضليت
طبِك وجعَ مادامَ حبيتّ
هضيمُه الزلم بلَ شوك ِتنهان
ويبلعَ السانةَ الجانِ ابو لسان
جيلةَ عدُو ولاضِيم نسوانَ
عوفَ الرسِائل لاتانيّ
گلبيّ التريدةَ يريد ثانيِ
مَوت ؏ كاسك والاغاَني
الَـليلة ضايِع منيّ آنـي .

فِلم ليليهَ بيك
يصير وتنام
بس ياهُو اليشوفك
مثل الافلام
وتعبر يومك
بتَركيز وبخوف
چنك عابر
مِن الشارع العام
بفراشي واخلص
الليل فزات
ناس بنص مخدتي
تدگلي دمَام
وأنهَ بيتنة
وكالساعهَ مدعوم
لان احلامي كِلها بشارع العَام .

وطفة الشارع ضواه
ونعست كل الدروب
وآنه علىٰ المامش تلوب
وآنه أذوب
يا بحر
يا ليل
يَمعود
روحِي بالظلمة تذوب
والخطاوي متيهة دمي
والعيون تبوگ حلمي
والأزقة الغافية وكل الدروب
يا فوانيس المحلة أشتعلي مني
هاچ دمي
هاچ دمعي
هاچ كل هذا الحنين
أشتعلي مني
روحي بالظلمة تذوب
يا بريد الليل ما يرهم رسالة
خاطر گليبي يتوب
وآنه علىٰ المامش ألوب

چنت ألمع بصفك والليالي تغار
واذا لاح البرد حُضني
أجيسن گلبي وأرجع نار

اتِعيبان ومتوني رچيچه
وبيه الوجع چمرة بغليجه
عويناتي هاي دلي ذيچه
مگروه مثل إبن الشريجه
ياهوّ مثلي ألضيم ضاگه
وگت الضحك من سنه باگه
توه الفجر بين شفاگه
وشالوني تابوت علِه ناگه
سولفت بيك ونشف ريجي
وطريت جلدي وعفت زيجي
چا هاي عود انته رفيجي
ما جيتني بايام ضيجي
عليمن تجذب بالمراسيل ؟
وتضحك عليه وبالحجي تعيل
عل شيله ضلت باجر نشيل
ما زال صارت بالتواسيل

انه دين النوارس والهدوم البيض
قسة وياي گلبك يا ترف كِله
وياخد الجنت ابوسه
كليلي منين اجيبن طين
من يغلط شحطن بوسته تردله
اشبعك وادري عزة نفسي راح تجوع
اجيتك والكرامة تگود بالفشلة
حي الذلة مامريت بي فد يوم
ابشرك بيت بيت خلافك كمت اندله
الجاسن شفتي بس اسمك ودخان
الشابع من غيابك بالاكل شلة؟!
اليكلي شلونك يدفعني كفارات
وانه شلون حالي وشراح اسولفله
انه شيبة واحطن وين كلها صغار
انه وردة بوكت بي شاخت السلة
بعدني صغير اني شجابني على الشيب
خلصت وكت المراية وميلة الكذلة
همومي من البعد تنشافلك تلة
وگلبي واختلالك والدمع نهرين
بعد عوزلك علم وتصيرلك دولة

ما كلتلي من البداية
الحُبّ ضلالة الشوگ لعنة
حتى لا أكفر وأحبّك
وما كلتلي
عيونك الحلوات ما بيهن قرار
وما كلتلي
الليل شيع كل محطات الضوا
وصارت مكابر
حتى ما تاني القطار
وليش ترسمني شبابيج إنتظار
وتخنگ خيوط الشمس
ويذوب وي روحي الوعد
وليش تصلبني أعله بابك
وأنت تدري الشمس ماتت
ما كلتلي الصبح ما يطلع بعد

بَس وحَگك
باجر يعوفوك كُلهم
وَحدك ترجعلي ذابل
باجر آثار الغرب هوسه على خصرك
اكثر من آثار بابل

ما دامتلي فرحه و لا دمعّتي تروح
مدري شعده وكتي وياي متعاند
صرت حتى من أنام احلامي مو حلوات
لو مكتول افز لو كاتل و شارد
ما حبيت نوم الليل بس مجبور
المن ينطي وجهه الماله كل واحد
غيري بنگره هَـفهه وطلعت شگبان
واني بشط اهفهه وكلشي ماصايد
ازرع خير گالوا تحصد انتَ الخير
زرعتلهم ورد ، بس شوكـْهم حاصد
عفت اليفتهمني وبالندم غطيت
وهويت المايعرف بگلبي وشرايد
كل شيبات صدري احلام مدفونات
انام واگعد مچملهن بواحد
مو زايد على اهلي من الوجع حسيت
لا حسيت روحي على البشر زايد
اذا كل التريده يغيب عن العين
بعد ياجفني اخيطك من تضل كاعد..

باجر من ترد
وتخونك احلامك
ترد تفرش ندم
وافرشلك اسهامك
واتعبك بالعتب
كد ما بروحي اعتاب
كد ما خيبتني
الخاطر امالك .

الليلة مَدري شصار بيه
هيچ فجأه لوحدي گاعد
و اشتهيت تكض اديه
و گمت من فراشي اعاين
وينك انتَ و ما اجيت
و فَجأه كُل شي انطفى بعَيني
بهالدقيقة تذَكريت
چنت ناوي وياي تبقى
أي نوَيت
وللأسف بس ما بُقيت
چان عندي البوم كامل من صوَرّك
گُلت من أفرغ اشُگهن
ما فرغت، أشگگيت؟
چنت ما تدري انه أحبك
و درت وجهَك من درَيت
گتلَك ابقى گبال عيني
و عمَت عيني وما بقيت .

أكبر من أحلامي أشوفك
حيرتي الما يمها حيرة
قانع بكلشي يخصك
و أبد ما محتاج خيرة
خشن گلبي و من عرفتك
بيّن الطبعك حريره
منين ما تندار أحبك
بحر و يحاوط جزيرة
يا طموحاتي الأخيرة
و يا معاناتي الچبيرة
المهم حبني إعلى مودك
وين تلگة انسان مثلي
حبّك بگلبه و ضميره

مشتاكلك والليل وحشة
ودمعتي التنزف ثكيلة
وصوتها من اطيح عالي
وحتى محد يدري بيها ،،
اركض اتلكاها بيدي لمن تمر علبالي
انت وين ؟ وانه نص موعد بدونك
مدري ياهو يسد مكانك
وحشة فراكك جبيرة
بكد عشرتك نار تكبر
تحرك بروحي امنيات
ويعلى دخان الظنون
وطيري مذبوح واحس بي يختنك
كل هذا وانه باقي ادور
بلكت الكالي حلم مامحترك
بلكت الكالي وعد مانفترك
لو جمرة منك حتى اشوفك
واصبر وتنشف دمعتي
وترجع بروحي الحياة
انت موجود بحياتي تروح تبقى
حتى بعيوني من ادور الكه
تارك ذكريات ،،
جفي بعده باقي اثرعزفك عليه

انه وياك واحد يم الاخر ضاع
انهُ وياك غيمه وگاع
لا موعد يلمنه ولا يطشنه وداع .

عيوني تلمع من اشوفك
روحي تلمع من اشوفك
وابدي ارتب بيه كلشي
هيج اوكف
وهيج اباوع
وهيج اگول
وابقى اعيد براسي حچي
شمعنه هسة احساسي صار!
شمعنه اجيلك لو ضجت؟
شمعنه اتحجج اشوفك..
شمعنه يمك دنجت
مدري بيك شضيعت
ومدري بيك شلملمت
والمحك
وابدي انساها السوالف
واصفن بجيتك عليه
توصل انت و
يدفى گلبي
واحضن ايدي بنص اديه

حَبة حَبة
وشذرة شذرة
وگطرة گطرة
وبالرسم طول خلك بيج الأله
صور عيونج موانئ
وبيها عاف الليل نومه وذب غطاه
والشكر ماجان مزروع على كاع
الكاع خصبة للشكر هاي الشفاه
عيوني ما تجذب علية
العسل يم الاشارة جدى منج
كسر گلبج واخذ من خدج حلاة
من بعيد إنتِ جميلة
ومن قريب إنتِ جميلة
والحلو وجهة يبين من كفاه
لأن ملفتة للأنتباه