خلص عمري بِين الادري والمدري
مِن ادنك راسي انه اتخير
ألم دموعي مَدري الطاح مِن شعري
وبِين الادري والمَدري عِشت دايِخ
حَبل اهدوّم چني مِن الشمس تايخ !
كِلت امشي اعلى وِلفّي لخاطِر اشكيلة
وعَلى هذا الحِلّم اكعِد واحجيلة
يدز أمَه تِكِلي نسافِر الليلة !
يابةة الحَسرّة البصَدرّي
بِين الادري والمدري ارجَعت مَكسور
رُغُم فايدته محَد عاشگة التَنّور
كِلت ارجَع وادِك الباب
دَگيت افتَحَتلي الباب
مِنو هَل شايِب التَعبان !
ياشايِب ترا انه فلان
سَدَت بابها بوَجهي
ولهَسه متاني بالشارِع
لهَسه مشَتت وما ادري
هذا الصار ، حِلِم - واقِع ؟

وبده يتغير عليه وأكولن
ليش؟
شنو السويته خاطر ينكر
أحساني
ويجيني بحجة المختنك والمتعوب
واجيله منين مااجاني
وهسه لو طرف ثالث خذاك
تهون
طرف ثالث طلعت اني؟

01.
صفر ع اليسره
مالك قيمة مِن تنحط
عطشان انجبرت اشرب
بماي الشط
ما اكدر أعدلك طبع منجل بيك
اجي من ارد اعدلك
ارجع مخيط
وما نرهم بعد روح
بجسد مكتول
أقلام الحبر شيفيد بيها القط؟
وما يتعب المثلي وهل مثال أفرض
جبت كل عمري اركض
بالجيديد افحط؟
حجله بيت عاجز مو
سهل تنحط
چنك نومتي شماعدللك مخربط،

ألسكتة چذبه
بروحي نار

و إذا بيناتنا بعيدة المَسافات
على النسمات توصلني الوصية
حبيبي لو ردت وصّي الهَوى الهاب
أشم بيه ريحتك من يُمر بيّة
و إذا وَحشة عليك تصير بالليل
علية الوَحشة تبدي من المِسية
و إذا دمعَك علَي ينزل بالخدود
عليك عيوني طاحن بين ايدية

علمني الزمن ما أضم
حلم بالغيم
ولا أبني وطن بگلوب محتلة
عرفت الينسحب من الحرب
خسران
وهنة ثنينهن
لو موت لو ذلة
البكلهن خسر يقنع بكلشي الجان
الما حصل عنب
يقتنع بالسلة
أحسب لليضل
ما أشيل هم الراح
ما أدلي اليروح
الباب يندلة

ويكضي بطلاع الروح يومي
وصاير مخربط حتى نومي
يطردوني كل ما اروح كومي
وصارت تغثهم يا علومي
خلاها يمي للضرورة
باكت ضحكتي وهيه صورة

وين رَايح
أبقى يا گلبي بزَويتك
ساعة تَحچي وساعة تَصفن
ساعه ترسم ضحكة فوك أوراق نيتك
وَين رَايح
ذولة يَردون الحَزن
يطفح عَلى عيونك بچي
مَامِش بعشرتهم الجذابة حايط شوك
مِن يثگل حنين البيك
عدمن تنتچي
أبقى يا گلبي بزَويتك
ماكو نية صدك بحچاية عشگهم
ذولة بياعة حچَي

‏وينَك أنت؟
عيُوني مابيهِن بَعد
ينتظرٍ أكثَر
حتىٰ هاي اللَيلة
بَعدَك
مو نفسها
لَيلة لَيلة گُبالي تصغر
ردّلي يا واهِس سِنيني
الخلَّصتهن ريت
أشوفك
ردلي يا أول إبن آدم
مشتهي شلون المراقد
كون أطوفه
ضَمضميتك
بالصراير حَاجة زينة
وما لگيتك
لَيش؟
مو چنت انه بيتك!

شوفي منج وين اغضة؟
يا مسافة البيهة جدمج ما توضة؟
ويا طريق الما مشيتة وما عبر ظهري وتشضة؟
يا ندى المنطيج عمرة شكبرة حظة؟
فكي شباج الوجع وانطيني روح
يالمشيتي الغير ديرة
السما زغيرة على عيني وروحي اسيرة
الما يشبهونج شكلهة هية حيرة!
كل بعيد بعيني يصغر وانتي بعيوني جبيرة
جنهة حال الغيمة تلهث بالجزيرة
الوحشة ناس بغيبتج ماعدهة غيرة
شلون اسدة يالفراغج وين حدة؟
بيا عطش تلكين سدة؟
بكل جزر تلكين وجهي بلاية مدة
انا خاطر لهفتي بكل طيف اشدة
وكل جرح يندارلي ويلكاني عدة
كل مكان العوز وبنادم غريب
وغربة العاشك طويلة بلاية ردة
حاصرتني الفشلة سكرانة على وجهي تريد تلكالج عذر
كون يعرفني الحطب جا صار ماي
ولا يورث بية كل حيلة الجمر
جا ولا باغصان خلكي غيابج يمرهة بكسر

يونس زين عمي بحوت مبلوع
انه بحلگ الشماته الما يرحمون

انه أجيتك والدرب يمطر رصاص
وگل رصاصه تثور يم راسي أنجتل
أفتح الباب برضاتك حتى أفوت
كسرت الشباج هينه على الخبل
أنه راي بديرة أهلي وگل مضيف
ومَن اشوفك مني يتبرة العقل
يا غرامك بيه سوه الما يصير
ويا رخَاوه حضنك تردني طفل..

من يشوفنا
يتواره بين الياس
ويتيهنا ما بين النده وخده
رسايل للگمر
لو ينقرن ينلاح
قراهن ،،
والسكت هم ينسمع رده
رسايل ما كتبناها برهاوة ايد
ما چانت علينه هواي لو وده
راحن وينهن ،،؟
لمزاحمات البال
شني هاگدة شاغل بالنه الوحده
غير اسوالفه
ما عدنا شي ينگال
اي موضوع
خارج شامته نسده

ياسر فليح

اخافن روحي تخلص بيش اتانيك
ضهري و للخناجر صاير گراب
تعال و كلها غربة الشجر و الطير
كلشي خلاف عينك لابس حجاب
كلها جروحي فاتح بس جرح طوخ
عرفته متاني جيتك خزن عتاب
تعال و خل اشبگك مثل الوداع
الشبگه البيها تلفت كل الأعصاب
انا احسب خنجرك من احسب ضلوع
بعد ما اميزه منهن تاه الحساب
متت چم مرة تسأل ميت هواي
ضگت الموت انا بكل الأسباب
وحاير من يجي الدفان شنطي
مني شيندفن خل يدفن تراب
فارغ گبري بس حجارة تذكار
خافنك تجي و ما افتح الباب
على گبري انكتب لو يدري ما عاش
هذا الگضه عمره بيوم الحساب

عثروني بس ما وگع من وزني بيت احساس
كرهوني بس من ضجت حبيت كل الناس
فليعلموا إني على قيد الحياة
قد بان على وجهي القدوم شبابي
لن يستطيع الوقت قطع مسافتي
لا زال في عيني الذهاب ايابي
من لم يروا نوري ففي اعينهم ضيق
فلآ عيباً يرى بشهابي
لو لاي في جوفي الظهور تعتقت
اجيالهم فأستيقضت بخطابي
رباااه ضيق الارض ادمى قدمي
عطشوني وحطوا بأيدي الرضيع
موتوني وضلوا يثوبولي ماي
وللعلم من اطلعت سألوا الرضيع
ما حسبت شجم نهر ذبو وراي
حيرة وحلهة يمك ذب زحل فوگاي
على طاري الگبر تتونس امثالي
ما ردت انتحر مو خوفاً من النار
خفت اگطع رزق سچين كتالي
وصي مايك يا نهر يلعب بعيد
ماكو شي يعبر على عيون الشبچ
انا ما جوعان من اطلع اصيد
طالع بسليتي الم شمل السمچ
ضامهن والسكتة حزورة حكيم
الما يحلهة سوالفة يحرمن علي
بصغري ما متهجي حتى اكتب هجاء
لكن وي اهل الله عال ابن الشوي
اليشمر بوجهي سهم يرجع بخور
سيوفهم گصت صور بچفوف ادي
حچاية مو حلوة اذا اسمع اضوج
حتى لو الحچاية چانت مو علي
اهلي علموني احترم بس ما اخاف
الضيف انگيلة هوى من يگلي هي
يا سفينة حجابچ قماش الشراع
احترمي نفسچ لا تدبچين على مي
اعصف شما عندك اعلى اطرافي ريح
وبلكت الله يرف طرف ثوب العلي
صار عندي ادمان اذا ما اموت اضوج
ويمتة ما يعجبني ارد البيتي حي
لا تهددني بعطش عاش الحسين
من اچفي جفني احلامك يبللها مي
بيركم مو گدي لا تدفعني بي
خاف اطيح وينكسر ظهرك يخي
حار في قصرك حرگ دم الوريد
ما اريد فيايكم برموشي في

مُِراتَ ألِوردَ مِٰاينِزرعَ ينگِالَ
ذِبلَ بيِنهَ ألاحِساسَ شِوكُت تحَچيِهنَ؟
شِربهَن ضِواُك‌َ أعُِيونهَ متيِهاتَ
هِوُىٰ أتنِفسهَ ألليِلكَ وأختنگَ بيِهنَ
صهِيلَ جُِروحَ بيِنه تِريدَ أمِانكَ وينَ؟
شِد ألچِامهنَ وألثمَ سواجُِيهنَ
هِزَ جِذعَ ألگصِصَ حِتىٰ ألمِذلة تِطيحَ
وألرِوسَ ألتخِونكَ مِاي وچفِيهنَ
بحِرورةَ صِوابكَ تنِشفَ ألطُِعناتَ
فِك‌َ بيِبانَ جِرحكَ بيِك دليهِنَ
عِلىٰ خِدودَ ألسواتِرَ سِومرَ ألدِخانَ
بيِك وينطعِنَ كُِل مِٰا تچوِيهنَ
ألعِلم ليلكَ ودمُِنه ودِفوا گِلوبَ ألنِاسَ
يبِس كُِلشي وخِضاركَ مِٰا يطگ بيِهنَ .

عفتني وگمت اشوف الليل شدة
واحس يمشن عگارب ع المخدة
واخاف يخلصن ومانزل ثنين
كل شوية اطيح دمعة وحدة
من يطيح گلبي شلون المه؟
ذبحني فراگك بسچين اعمى
كون العمر هذا يصير عمرين
لان مايكفي احبك مرة وحدة
عفتني وگوه صاير بعدك امشي
لمن گلت رايح راح كلشي
اخذت مرايتي وصافن على الشيب
بعدلة شوية يوصل حتى رمشي
بعدك جاي احس الدنيا غربة
اذا تنطيني بيدك سم اشربه
احس الناس بعدك مو مهمين
بغيابك صار ما يقنعني اي شي
انتَ الدوه بهجرك والله ما فاد
حبك مثل بغداد!
ميصير ومينعاد.

شكالولك علية وصار وجهك سيف
وتعرفني التكتلك والحجي مصدگه
شجره ومو بديه وتدري وكتك ريح
وتحملني ذنب من طيحت ورگه
خلك ساتر ولك سويت خلگي وياك
شكد موت وجثث ماضيجت خلگه
مو من صالحك عالجرف تزرع عود
ماتدري اعله ساعه يفيض ويغرگه
ومن شفت الخناجر خذت دور السيف
كلت ياروح صيري بهالوكت درگه
وتسالني تگلي شسوه وكتك بيك
شسولفلك شأكلك ؟! تكتل الحرگه
ذبني ابير بيده وكال اكلني الذيب
ورسم للذيب صوره وجثتي بحلگه
وطفاني وعالجمر بچفوفه رش الماي
ورد ينفخ رماد ويا جمر يلگه
ما يدري الوكت لو عكس هدة خيل
اللي يطيح بدربهه جدامهه تسحگه
وذبحني مناطرك غيم ومطرها يطيح
گظت شوغات روحي لهفة الملگى
مثل فزة مفارك من تجيني بطيف
اشبكنك وافز وكلشي ما ألگى
مو ذنبي ترى لبعض البشر مالوك
لان طبعي صريح وراسي مادنگه
اللؤلؤء باللضم كلش جميل يصير
بس هو الحجي عالرگبه التعلگه