‏حاولت اعديها مع الصدر الوسيع
وارسم على وجه الزعل وجه الرضا

لكن بعض الاحيان قلبي ما يطيع
بعض الخطا يضيق به وسع الفضا

‏«همومي بحر وأشوف قربك فريق انقاذ
أربك مع الايام بتحاول انقاذي»

— صالح النشيرا

‏" يا رب أنا قلبي عزيز وحياويّ
شي يهين النفس لا تقسمه لي

حتى لو إني له شفوق وشفاوي
تغسل فؤادي منه قبل اغسل يديّ "

‏«الهبوب تجيب طاريك من كل اتجاه
ولاقدرت ارسل سلامي على متن الهبوب»
— علي ال صبيح

أذكريني لا أنتهت للشمس رحلة مع نهار/
وأذكريني لا صحى للصبح ورد الياسمين*

‏« أذكر يديني لوحت لك بإرتجاف
من بعدها ما شفت بالدنيا وضوح »

مع غيرك أقسى من الحجر وأثقل من الطود
ومعاك النسانيس الخفيفه تمرجحني

‏"دخيلك لا تحاصرني بين شمس وظلّ
‏أنا مثل القدر، مثل المطر، مثل الشعر: حالة"

‏«حانت الفرصه ولكن ما انتهزت الفرصه
جيت أبغنمها وعيّت شيمتي وأخلاقي»

‏«عساك فداي يا حلمٍ سرى ما يلحقه سرّاي/
تجيبك ليلةٍ فيها السحاب يلاعب كفوفيّ»

‏"أنا ما همِّني لا صار سيلي عارفٍ مجراه
أبفرش ضحكتي بعيون كل اللي يمروني

أنا لاني طريقٍ محدٍ صابر على ممشاه
ولاني دربٍ أخضر كل من جوني تمشُّوني

وأنا ماني بـ بحرٍ كل من جاني شرب من ماه
أنا صفحه من التاريخ تذكرني ما تنساني"

والتمني ما يحقق هقوة القلب إن تمنّى
بس قلبي ما يداني تبعد الهقوات منه*

‏إن غبت غيبة زوال الشمس يمّ الغروب
رجعت صبحٍ جبال طويق ما تحجبه!
— عويّد النجود.

‏«ديرةٍ ما أنتي بها ماهيب ديره/
لو ثراها عشب وأعلاها سحايب»*

‏ماعاد باقي لك بصدري بقايا ، عدى
قصايدً تستحق اعجاب قرّايها

كتبتها في حوْر عينك وراحت سدى
والحين بلي ورقها واشربي مآيها

—فهد العيبان.

على قِل الأمل ماني بخايف من شديد اليأس
أنا خايف أكون اللي صبر ولا نفع صبره

‏"جالس أجاهد الدّنيا وأهلها وأجاهد
وصلك المنقطع وطيوفك المستمرّه"
— بندر الدويش

شي ماجا بالرضى مايجي بلوي الذراع
لو قعدت العمر كله بلا أصحاب ووليف

الهزيمه في عيوني و انا أدري اني شجاع
أفضل من الفوز عندي وانا أدري أني ضعيف

أنا من حديث شفاك ومشاهدك ما أمل
إلى شاف وجهك ضايق البال .. يستانس

‏"أرق من ورد الجناين فـؤادي
و أقسى من الجلمود قلبي ليا صد"