شعاع الشمس لو إنه يشق السور،
أنا احسّه ظلام إن ماشرق وجهك.

جاني من الروعات وملاوع البين
شيٍ يخلّي العصفر أحلى من الماء

بطون الايام مهما خيبت ظني
بتلف و تدور ماني ناشدٍ عنها

حتا لو انها خذتك و ردتك عني
ما ردها تزين وارجع واخذك منها

‏«انا عقب موتك استمع صوت ترحيبك
واجيك ابتسم لو إنها بسّمتي قلّت

يقولون كثر بكاي يثّر بـ تعذيبك
واداريك حتى في دموعي ليا هلّت»

واحدٍ ما يستريح إلا محارب
لو تسولف له عن الراحه جرحته
— سلطان حجاب.

معك من وين ما ودّك بلا مرسّى ولا ميقاف
معك لو مالت أوراق الشعور المنهّك الذاوي

معك حتى لو سّنين الحنين الماضيات عجَاف
معك حتى وانا مدّري علينا الوقت وش ناوي

‏"أضحكي لأجل الربيع يصير طول العام عاده
وأرجعي دام المواجع ثايره والوجد كوّد

غادةٍ لا قبلها غاده.. ولا بعدين غاده
تربك اللي في عُرى الإيمان والدين متجود

سامحي من ماتت حروفه على كبوة جواده
ماقدر ينسى هواك، ولا يعيش، ولا تعود"
- عبدالملك الخربوش

‏أثر البنآدم على هفوات نفسه دليل
لا صار بعد الوسيلة / تنجّهل غايته

شلون بـ ألقى بعد مسرى الليالي حصيل
والليل ثلثه ضياع بـ عين سرَّايته

مسلسل العمر هذا بالرتابة طويل
من فيكم الواعي اللي يحرق نهايته؟

‏مايجيبك طيب حظ ولا تجيبك طيب سمعة
‏أنت نعمة ما تجيبك غير دعوة مستجابة

‏أذكر أني قبل أعرفك داعي الله عصر جمعة
‏وجابك الله والله أعلم وافقت وقت استجابة❤️
‏

‏من الضحى وانا عن المجتمع صاد
اخفي طعوون الصدمه اللي تموّت

عفت العرب والدار والنوم والزاد
وقنعت وخياام الهقااوي تطوّت

الفرصه اللي خيرً من الف ميعاد
فااتت وهي مفروض ما تنتفوّت

وامسيت اردد كل مااوحيت نشاد
الله على الاياااااام وشلون سوّت

ومن عزتي لو يكسِر الشوق ساقي
أعرج بها وامشي .. ولا اقول تكفى

‏"السحاب اللي جحدني يوم اجي له ظامي
لا يجيني لا ارتويت و دمعته مصبوبه"

‏" أبوس أنا راس الخطأ يوم اتضح لي انك ردي "

«حاولت أحبك زودٍ عن باقي الناس/
وأثري نسيت الناس من زود حبك»

لو طموحي قريب من زمان استرحت
مير خابر محلّي فوق روس الجبال*
-متعب التركي

‏على قطار الصبا مرّت عجاف السنين
يذكرك بالخير يا زهرة سنين الصبا

الأرض في عين غير المهتوى ما تزين
لو إنها جنةٍ خضرا؛ تصير شهبا

‏«يوم أصبحت للشمس غنَّى لها المجد/
لفَّت شعرها في يديها وقامت»

دربٍ يهين النفس ماني بماشية
لو قام خفاقي على الضيق وامسى

العزّ له ساسه .. قوية مبانية
والذل ماله عند الأجواد .. مرسى

واللي تربى بالوفا في مبادية
يبقى على عهده لو الوقت يقسى

‏خلوني آسجّ وأسلى من ربوع لربوع
لعيون من تارد أشواقي على عدّها

يغمرني الزين وتسيطر عليّ الطبوع
يوم إنّي أدوزن أبياتي على قدّها

رقيقةٍ ما تطاوعني عليها الضلوع
تاقف على شفاهي الكلمات وآردّها

عن كلمةٍ ما بعدها غير زرق الدموع
يْردّني منظر الدمعة على خدّها