​​Gohida sodda, odmi kitoblar ham kishini o'ylantirib qo'yadi. Hoqon Menguchning "Hech bir uchrashuv tasodif emas" kitobini bir zamonlar tarjima qilaman deb olib qo'ygandim. Keyin bilsam barcha kitoblarining tarjima huquqi olinib, ish boshlab yuborilgan ekan. Shu-shu o'qilmay qolib ketgandi. Kecha tasodifan bir varaqlab, anchasini o'qib qo'ydim. Kishiga ba'zan o'nta aqlli gap emas, bitta tasalli kerak bo'lib qolarkan... Dastlabki sahifalarda rizqni oʻylab xavotirlanmaslik, shoshmaslik haqida gap boradi.

O'zimni eplab boqolmayman-u xotinni qanday boqaman, deb uylanishni ortga surib yurgan yigitlarga ko'pincha kattalar shunday deyishadi: xotin baraka olib keladi, uylanaver.

Haqiqatan ham, umri mobaynida bir so'm pul ishlab topmagan, davangirday bo'lib uydagilaridan pul olib yurgan yigitlar uylangach o'zini ham, xotinini ham, ko'payishgach farzandini ham boqa boshlaydi.

Xudo shu damgacha faqat o'ziga rizq bergandi, endi esa butun oilasiga rizq bera boshlaydi. Bitta farzandi bo'lsa bittaga, o'nta farzandi bo'lsa o'ntaga rizq beradi, kimdadir kamroq, kimdadir ko'proqdir balki bu, lekin hech kim oʻz holiga tashlab qoʻyilmaydi.

Boshqa tomondan, tuyani avval boylab, keyin tavakkal qilish buyurilganini hisobga olsak, barokot ham harakatga qarab keladi. Biz ayollarga qiyinligi haqida ko'p gapiramiz, ammo erkaklarga ham oson emas.

Erkak shunchaki sevilmaydi, u sevilish uchun ancha narsani uddalagan bo'lishi kerak. Jamiyatning erkakka qo'ygan talabi ko'p.

Ayniqsa uylangach endi yelkaga juda katta mas'uliyat tushadi. Buni otalarimiz misolida yaqqolroq ko'rsak bo'ladi. Deyarli hamma ota bir xil.

Otalar oilasiga o'n sarflasa, o'ziga bir sarflaydi. Imkon qadar hammaning ehtiyojini qondirishga harakat qiladi. Ammo gohida ayrim narsalarga yo'q deyishiga to'g'ri keladi.

Bunga sabab pulni yaxshi ko'rgani, xasisligi emas, u yo'qchilikdan qo'rqadi. Ha, har qanday boy erkak ham oyog'ini cho'zib xotirjam yotolmaydi. U faqat bugunni, ertani emas, ancha yillar keyinni ham o'ylaydi.

U eng muhim ehtiyojlarga pul topolmay qolishdan, oilasi kimdandir kam bo'lib qolishidan, uyga to'rtta non ko'tarib kirolmasligidan, kimdandir qarz so'rashga majbur qolishidan qo'rqadi. Erkak psixologiyasi shunday.

Erkak har qanday sharoitda ishlashga majbur. U ayoli bilan urishsa ham, farzandlari tomonidan behurmat qilinsa ham bariga qoʻl silkiy olmaydi, mas'uliyatni yelkasidan soqit qilmaydi. Har qanday sharoitda va har qanday kayfiyatda baribir oilani boqishga harakat qilaveradi.

Aynan mana shu narsa uning halovatini o'g'irlaydi. Ko'ngil xotirjamligini olib qo'yadi. Yerdagi qumursqada, ko'kdagi qushda, suvdagi baliqda ham yemish tashvishi bor, ammo ular ertaga nima yerkinman, och qolmasmikinman deb xavotirlanmasa kerak. Bunday baxtsizlik faqat insonga berilgan.

Ammo o'sha qumursqa ham, o'sha qush ham, o'sha baliq ham och qolmaydi. Qay bir shaklda rizqi beriladi. Shunga qaramay, otalar ertasidan xavotirlanaveradi, oilasini o'ylayveradi, rizqning sababini qilaveradi. Otalarga oson emas. Ularga yordam, dalda kerak. Shunda hayoti osonroq boʻladi. Qilayotgan ishidan koʻngli toʻladi.

@salimov_blogi