#dolzarb90ku #karyera_kuni #mehnat_yarmarkasi

Guliston davlat universitetida “Karyera kuni” doirasida navbatdagi bandlik tadbiri o‘tkazildi

Guliston davlat universiteti Registrator ofisi tomonidan “Dolzarb 90 kun” loyihasi doirasida bitiruvchi talabalarni ish bilan ta’minlashga qaratilgan “Karyera kuni” mehnat yarmarkasi tashabbusi boshlab yuborildi. Ushbu loyiha O‘zbekiston Respublikasi “Aholi bandligi to‘g‘risida”gi Qonuni hamda Prezidentning 2025-yil 14-fevraldagi PQ–61-son qarori ijrosini ta’minlashga qaratilgan.

2025-yil 30-iyun kuni Guliston davlat universitetida talabalar va ota-onalarni universitet faoliyati, ta’lim yo‘nalishlari, ishga joylashish imkoniyatlari bilan yaqindan tanishtirish maqsadida “Ochiq eshiklar kuni” doirasidagi tadbir bo‘lib o‘tdi.

Tadbirda Sirdaryo viloyati kambag‘allikni qisqartirish va bandlik boshqarmasi mas’ul xodimi B. Xo‘jamqulov hamda Guliston shahar bandlik bo‘limi bosh mutaxassisi A. Bobomurodov so‘zga chiqib, viloyat va shahar miqyosida mavjud bo‘sh ish o‘rinlari haqida ma’lumot berdilar. Jumladan, Sirdaryo viloyatida 4800 dan ortiq, Guliston shahrida esa 500 dan ortiq vakant ish o‘rni mavjudligi, shundan 100 dan ortig‘i pedagogik yo‘nalishlar bo‘yicha, xususan 2-, 11-, 15- va 17-sonli umumta’lim maktablarida mavjud ekani ta’kidlandi.

Tadbir yakunida rus va ingliz tili yo‘nalishlarida tahsil olayotgan 10 nafarga yaqin bitiruvchi bilan ishga joylashish bo‘yicha dastlabki kelishuvlarga erishildi. Bu esa universitetda olib borilayotgan bandlik siyosati natijadorligini yaqqol namoyon etadi.