*મોર્નિંગ મ્યુસિંગ્સ:*


માણસો અરીસામાં જોઈને તેમના દેખાવ વિશે ચિંતા-ફિકર કરતા હોય છે, પણ તેમના ચારિત્ર્ય અથવા વ્યક્તિત્વ વિશે વિચાર નથી કરતા.

લોકો પોતે કેવા દેખાય છે તેને લઈને જેટલી અસલામતી મહેસૂસ કરતા હોય છે, એટલી અસલામતી તેવો કેવા છે તેની કેમ નહીં હોય?
થોડાં કારણો સમજવા જેવાં છે:
પહેલી વાત: દેખાવ વિશે તાબડતોબ અભિપ્રાય બાંધવામાં આવે છે કારણ કે તે દેખીતો હોય છે, જ્યારે વ્યક્તિનું ચારિત્ર્ય છૂપું અને ગહેરુ હોય છે અને તેને સમજતાં સમય લાગે છે. એટલે લોકોને તે તત્કાલ જાહેર થઈ જવાની ચિંતા નથી હોતી.

બીજું, ઘણી બધી વખત, જેમ કે લગ્ન અથવા જોબ ઇન્ટરવ્યૂમાં, દેખાવ પરથી જ વ્યક્તિત્વનું અનુમાન કરવામાં આવે છે. એટલે આપણે એવું પણ માનતા હોઈએ છીએ કે જે સુંદર અને આકર્ષક છે તે બુદ્ધિશાળી અને ગુણવાન પણ હશે. એટલે દેખાવ અને વ્યક્તિત્વ એક જ છે એવું આપણે માનતા હોઈએ છીએ (અનુભવે આ વાત ખોટી પડે છે).

ત્રીજું, મીડિયા, ટેલિવિઝન, સિનેમા અને સોશિયલ મીડિયા સતત એક "આદર્શ દેખાવ"ને બતાવાતાં રહે છે. એટલે, માણસો સતત પોતાને એ સ્ટાન્ડર્ડથી માપતા રહે છે અને દેખાવમાં કમી અનુભવતા રહે છે.

ચોથું, દેખાવ છુપાવી શકાતો નથી, જ્યારે ચારિત્ર્યની ખામીઓ આસાનીથી છુપાવી શકાય છે. બીજા લોકો ચારિત્ર્યને જલ્દી પકડી શકવા સમર્થ પણ નથી હોતા. ઉપરાંત, પોતાની ચારિત્ર્યની ત્રુટિઓ પકડવી માણસ માટે સરળ નથી હોતી કારણ કે માણસો ભાગ્યેજ તેમાં કમી સ્વીકારે છે. સૌને એવું લાગતું હોય છે તેમનું ચારિત્ર્ય શ્રેષ્ઠ છે.

બીજી રીતે વિચારીએ તો, જે લોકોનું વ્યક્તિત્વ સોલિડ હોય, તેઓ ભાગ્યેજ તેમના બાહ્ય દેખાવ બાબતે ચિંતા કરતા હોય છે અને જે લોકો તેમાં કમજોર હોય તેઓ દેખાવ બાબતે વધુ સતેજ હોય છે.

*Happy Morning*