ليالي الغريبه

يمه زينب *ضمي دمعه وضمي حيل وضمي لونح
يمه يزينب* باچر انتي بنص شماته ايطلعونچ

باجر انتي ابلا كفيل
وسبي دربه طويل
يمه زينب
**
اول وصيه* ضمي حيلج يالعزيزه للمصايب
ودمعات العيون *لا تهليهه عليه اهناكه واجب

ضمي حيلج يمه وستمعي اليه
هاذي چلماتي حرز للغاضريه
دمعتچ عالتل تهل يالهاشميه
اوكون حيلج يصمد اگبال اعوجيه

يمه انتي*بنص جثث مذعوره وبنص المناحر
يمه انتي *كون يبقى صبرج الدوس الحوافر

ولخلگ بيكم تعيل
ولسبي دربه طويل
يمه زينب
****
اگدر اگلچ*كل مصيبه اتهون يم امصاب گلبج
گدامچ اشلون*ينذبح شيخ الهواشم يمه يمچ

انتي يازينب تشوفينه ابغربته
ابعينچ اتنضرينه من صارت وگعته
ولشمر من اعتله ويگص رگبته
اخر انضاره الج ايودع اخته

يالعزيزه*كون گلبج يحتمل ذيج الرزيه
يالعزيزه*اترافجينه اعله الرمح ونتي سبيه

امصابچ الماله مثيل
ولسبي دربه طويل
يمه زينب
*
وهاي المحطه*وجعت گلبي عليج وبيه ناري
ابعني اشوفج*من اميره هاجه ابذيج الصحاري

زينب اتركضين لاچن ركضت الخوف
ونار من خيمه لخيمه صارت اتطوف
ابلا محامي وعالشريعه الرايه وچفوف
وسهم صوب عين جانت مصدر الشوف

انتي كعبه *لاچن الله قدر احزانچ تطوفج
انتي كعبه*وخدرج المضموم ضل يشرح ضروفج

العاشر اعليكم اثگيل
ولسبي دربه طويل
يمه زينب
*****
يمه المصيبه*امذبحه اخوانج يحضرولج هزيله
وخدرج اشوفه*عالهزل وي روس اخوتج يالعقيله

امكدره ومچتوفه في درب المصايب
اولو ندهتي اعله اخووتچ منهو الجاوب
ومن بعد ضل الشيم ذيچ الخرايب
وفرجه للعذال هاي اصل النوايب

ولتجرحچ*ابأذنچ اتسمعين هاي انتي الاميره
ولتجرحچ*ها يمضمومة علي صرتي اسيره

وهالحچي يدمي الدليل
ولسبي دربه طويل
يمه زينب
****
زينب اشوفج*واگفه بديوان ولدمعه جريه
وراس ابني لحسين*ينضرب باخيزرانه يالسبيه

هنانه كل صبرج تلمينه اعله جرحچ
ودري ياعباس ينبض صار گلبچ
ودري اضلم يغدي يمه اعليج صبحچ
وانه ادري للشماته اشيحچي دمعچ

دمعه تجري *بحضرت الشمات انه ادريهه صعبه
دمعه تجري* لا محامي عنچ ومتروسه غربه

ولي سولفته قليل
ولسبي دربه طويل
يمه زينب
****
علي سليم الحسناوي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

موشح

هاي زينب يالتريد اخبارهه
عالمهازل طالعه امن اخدارهه
---------------------
الف ياحيف اووسافه اعله الخدر
من بعد عباس رافجهه الشمر
هاي جانت لو هوه منهه يمر

رخصه. ياخذ من گمر اسرارهه
-----------------------
امخدره ومتحاوطه بذيج الشيم
وبو فاضل يمسح اثار الجدم
اشلون زنيب باقيه ابلايه خيم

بليل وحشه وميته كل اقمارهه
----------------------
اشلون طلعت لليسر ومكدره
هاي اخت عباس سبع الگنطره
هاي زينب ياخلك مو اي مره

هاي دنيا اتعجبت بستارهه
---------------------
اشلون بت حيدر تتطر ذاك الدرب
امچتفه وصوبين تنضرهه الغرب
المالمحهه انسان تالي تنضرب

هاي ماچانت تجي ابأفكارهه
----------------------
عاشت ابضل الكفاله امدلله
تطب زينب سوگ هاي المشكله
اشلون تنطي انسان موضع مو اله

ناس ماعرفت شنو مقدارهه
----------------------
من كهف خوانهه دخلت قصر
وياحسافه طبت ابمجلس كفر
بين وادم كل نواياهه الغدر

امگبعه ابهمهه وغرب بكتارهه
-----------------------
علي سليم الحسناوي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

انا العزيزة اخت عباس
تالي الغريبة تصيلحي الناس
واليجرح احساسي
ال بالشام مو ناسي
.........
الوكت غربني وبعدني عن هلي
وراحت ويخواني خوية اتدللي
انه ما استاهل الي صار إلي
شلون ادخل قصر وانه بت علي

لا چلمة الي ولا ظل الي راي
وكتال أخُوتي بضعني حداي
لو تخلص انفاسي
ال بلشام مو ناسي
......
تالي بالغربة أنه وحالي أختلف
وچفي لمدلل بالحبال أنجتف
مو نفس حالي رجعت اعله النجف
بين غربة بالدرب طولي انوصف

انه الهظمني بأسمي يحچون
يكولون زينب موش ام عون
درب اليسر قاسي
البلشام مو ناسي
..........
ويه كل نگلت جدم اكبر عمر
وبين خطوة وخطوة ألعن بالشمر
أنه اجدامي عادي لو داست جمر
بس ثگيلة اعليها خطوات اليسر

مو صعبة جدمي يسحگ النار
الصعبة تصدلي كبار وزغار
وأيدي على راسي
البلشام مو ناسي
........
مو عجيبة لو اموت بحسرتي
طاحن اعلى النهر خدري وهيبتي
ويه راية أهلي طاحت چلمتي
ماكو بالدنيا مثل في أخْوتي

لو عيش هاي الدنيا عمرين
ماكو مثل عباس وحسين

ماجرحو احساسي
البلشام مو ناسي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

الشاعر علي الرماحي

الذي أُعدم بالمثــرامة بسبب قصيدته الخالدة "نور عيني يا حسين".

طلب منه أحد البعثيين وقال أكتب قصيدة تمدح فيها صدام واقرأها في قاعة الخلد وسوف تتحسن أمورك المعيشية ونخصص لك سيارة ومكافئات.

تحدّى البعثيين قائلاً: "والله لو قطعتموني سبع مرات، لن أكتب كلمة لصدام".

له ديوانا شعرِ لم تتم طباعتهم وقد صادرتهما السلطات البعثية أثناء اعتقاله.

بعد سقوم النظام المقبور
عرف أخوه أنه تم إعدامه ثرمًا ...💔
هنيئاً له الجنة شفيعك الحسين الشهيد ...

حسين متعود علينه بكل صبح
خلني بمجانك اشيله يارمح
تعبه هواي الدرب
وارد اشيله اعله الكلب
خلني بمجانك اشيله يارمح
..................................................
آنه بحسين أولى منك يلي ماتعرف غلاته
ليش راسه ابلا عمامه ومنهو اخذ منه عباته
تعّب اعيونه يدوّر جي نقص عنده ابناته
جاب كل الدرب يبجي وارد اضمه امن الشماته

ابكل عزيزه لكلبه ابو الأكبر يحس
نزله أفيله چوت راسه الشمس
كافي دمعاته تصب
وارد اشيله اعله الكلب
خلني بمجانك اشيله يارمح
.................................................
انته والشالك سويه ابلا كلب وابلايه ذمه
اثنعش طبره بنحره تنزف ترس كاع السبي بدمه
ما فزع واحد يضمده ومالكيت اليسوه احشمه
الما يداوي جروح اخيي شعنده حاسب روحه زلمه

انته شايل راس ابن أشرف مره
منين أجيب النايم اعله الكنطره
يجري دمه اشكد صعب
وارد اشيله اعله الكلب
خلني بمجانك اشيله يارمح
................................................
اعله طولك صار دمه ويستحي يطلعها ونته
حتى ما لحكت أشمه امن الذبح وانته اخذته
كلبه ما شال اعله واحد ليش فوك الرمح شلته
شلون ابريك انه ذمه وحارم حسين امن اخيته

راسه وين تريد بي شو ما كلت!!!!!!
حضني دافي ومو مثل حضن الطشت
توه غافي من الحرب
وارد اشيله اعله الكلب
خلني بمجانك اشيله يارمح
.................................................
جسمه ضل للخيل بالطف وانته راسه الصار حصتك
ليش عليته اعله بنته من ركض يمك اجتك
مو ابو وما ضكت لوعه اكبالك ايحرموك بنتك
بخت ماعندك واكلك رمح بسك واعله بختك

حسين طيب حيل ليش اتعذبه
انته حالك حال ذاك السلبه
ولا يصد اعله الضرب
وارد اشيله اعله الكلب
خلني بمجانك اشيله يارمح
..................................................

رمح بهداي اعله كيفك لا تلجمه الكله غيره
كضه عمره ايداري بيه وجهي عنه اشلون اديره
متني أكبر من ضربهم ماتطخ راس الاميره
ما اهتم جي بيه عطره حسين بس راسه عشيره

بخير زينب كله منك والنعم
خل يحير بنحره خافن ينلجم
شلون للشام من اطب
وارد اشيله اعله ألكلب
خلني بمجانك اشيله يارمح

احمد ماجد الكلابي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

الطف بيتك وانت فيه انشوف
جسمك كعبه وراسك حوله ايطوف
طحت بكسر اضلوع
ظل راسك مرفوع
الطف بيتك وانت فيه انشوف


يمن عافت حياة الذل جراحاته
ورفع راية معزة في شعاراته
يعيش الميت ان مات ابشرف ذاته
ويموت الحي اذا عاش ابمذلاته
تصرخ منا هالذله هيهات
إنت الثابت والحي الما مات
بهالمبدا المرفوع
ظل راسك مرفوع
الطف بيتك وانت فيه انشوف


يمن لجل الكرامه ضحى إبعمره
وسقاها من فدا نفسه بدما نحره
رسم مبدا وعليه اتحلى ابصبره
وفتح جبهة كرامه والحجر طره
شج الهامه وظل راسك ماطاح
صاحت دنيا ودلالك ماصاح
رغم الحر والجوع
ظل راسك مرفوع
الطف بيتك وانت فيه انشوف


يمن جاله الممات بكل جهه وراده
فتحت صدره الشريف وعرى أفّاده
إجا السهم المثلث والعزم زاده
وقع واقف وثغره بالمدى نادى
(الموت اولى من ركوب العار)
(والعار اولى من دخول النار)
بهالصوت المسموع
ظل راسك مرفوع
الطف بيتك وانت فيه انشوف


يمن چنه أسد في حومة الميدان
صريع ايجبّن بهالمصرع الفرسان
ختم عمره ابمعزه وانذبح عطشان
أبي واتوضت ابدم منحره التربان
قدّم راسه وظل عالي مانداس
والغير الله مايحني هالراس
بهالجسم المصروع
ظل راسك مرفوع
الطف بيتك وانت فيه انشوف


بقى جسمه طريح وعاري وامخضّب
عليه الأعوجية تصعد وتلعب
تفرّى لحمه وعظمه غدى امسلب
على ظنهم يموت وينمحي ويذهب
شالوا راسه عالرمح ورفوعه
حتى الخنصر من چفه قطعوه
بهالصبع المقطوع
ظل راسك مرفوع
الطف بيتك وانت فيه انشوف



إلى عالي السما راسه ارتفع إيمان
اهو العالي ويظل عالي مدى الأزمان
أبد ماينحني واستصغر العدوان
مشى فوق الرمح ويرتل القرآن
طاف الدنيا بكل عزه واجلال
هز العالم هالراس الما مال
وابكل معنى ايضوع
ظل راسك مرفوع
الطف بيتك وانت فيه انشوف


حسين البوحسن
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

مثل هيج ليله وصف حال مولاتي

مقدمه


صاحب الزمان ع ينعى جده الحسين ع

السلام على تلك النساء البارزات
السلام على تلك الوجوه اللاطمات
السلام عليك ياحبيبي ياحسين
-------------------------
ياجدي يوميه اختنك وبدمعي اكسر خاطر
الناس تتنطر شهر يوميه بيه العاشر
عايش صور طحن الجسد موتني ذاك الحافر
اشلون داس اعله الصدر انضر محمد حاير


السلام على كل گطره سالت من دماك
السلام على من ضحه بجفوفه وحماك
السلام عليك بالحنين وبالأنين
--------------------------
بالناحيه عشتك جرح ونضر ابعيني آلامك
اشلون من طحت وشفت وادم غرب بخيامك
اشلون عمتي امن اسمعت ذاك الصدى البعضامك
من ركتك خيل العده وعالنهر طاح احزامك


السلام على الشيبات النصبغت دمه
السلام على إلبجه كل اهل السمه
السلام عليك وعلى ذاك الجبين
-----------------------------
الناس تبجي من دمع وانه الدمع دم ينزل
انضر اعيالك من تطّش بذيج الصحاري التكتل
اهواي ياجدي شفت ياگلبك اشگد يحمل
مرفوع راسك ع الرمح بالكهف انت اترتل


السلام على كل طفله ضاعت بالفله
السلام على هضمك وهضم العايله
السلام عليك وعلى صبرك حسين
-------------------------------
الموت عاده النه نعم وحبينه هاي العاده
بس عاده ماعدنه گبل مجتوفه عمْت الساده
السوگ ذابحني ذبح كل حيلي مني اتراده
بت خير عمتي اوبت شرف ع السبي مامعتاده


السلام على المجتوفه بحبال الزجر
السلام على المسببه من بعد الخدر
السلام على الشافت اهلهه امذبحين
-------------------------
ابنحرك اتوسل خالقي ايعجل ضهور اعليه
وشفي إلصدور الي انجوت العاشت هضم ليليه
وبثار عبد الله الطفل. وبثار كل علويه
وحگنه ارده ابصارمي وگطع اجذور اميه


السلام عليك من گلب عاش القهر
السلام عليك مني ياشوف النضر
السلام عليك ياذبيح الودجين
--------------------------------
علي سليم الحسناوي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

#تراث

يبن أمي عالتربـان عفتك رميه
عين العمه إو لا شوف ذيچ المسيه
* * *
يا خويه خليناك عالغبره عاري
إمغسل إبفيض إدماك والچفن ذاري
روحي بگت وياك والجدم ساري
أمشي وأدير العين للغاضريه
* * *
أدري إبسهم مسموم چبدك تگطع
وإصوابه مگبل صار والمگفه مطلع
إبذاك السهم يحسين گلبي تلوّع
سمه إبضمير إحشاي ناره سريه
* * *
يبن أمي أدري الخيل هشّمت صدرك
إو بيدي عله التربان وسدت نحرك
يا خويه وإبممشاي حيرني أمرك
لاچن إفراگك صار غصبٌ عليه
* * *
غصباٌ علي يحسين عالغبره عفتك
والحجر لو ما چان يفضخ جبهتك
ما چانت إمن السوط تتلوع إختك
نوب أنطي متني ونوب أشگف بديه
* * *
إبحالة غصب يحسين عنك مشينه
يبن أمي منهوبين وإمگيدينه
إتجدد عهدها إوياك رادت إسكينه
مانعها ضرب السوط من آل أميه
* * *
يبن أمي من إعداك أرد إشتچيلك
مثل السهم يحسين أمرد دليلك
وإنجرحت إمن الطوگ رگبة عليلك
گلبي إحترگ من نار ونته الخفيه
* * *
لو طفل من الجور تغمض إعيونه
من عله الناگه إيطيح لمّن يجونه
من عوض ميسلوه ويرچبونه
بالخيزرانه إيگوم من عالوطيه
* * *
يبن أمي يا هي إتهون وأصبر عليها
إشحال الحرم لو راح منها وليها
إو طبت الكوفه إشلون يبن أمي بيها
إصواب الشماته إصواب علته خفيه
* * *

وإلما عليها العين تغمض جفنها
والنايبات إبنار روحي سلنها
يبن أمي طبت الشام ما أشد منها
وافتني گبل الشام ريت المنيه
* * *
يبن أمي سوط البيه متني تألم
يبن أمي ذاك إيهون لاچن ألأعظم
سوط إبن هنده إلبيه ثغرك توسم
(ثغر اليقبله چان سيد البريه)
* * *
وإصواب فوگ إصواب ماضي إبگلبي
إبقسمة الباري إرضيت والباري حسبي
وإگضيت وعد إلبيه واعدني ربي
وإمن اليسر رديت وإصوابي بيّه
* * *


للشاعر المرحوم
كاظم المنظور الكربلائي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

(( #چلچل_الليل ))

……………………………………………………………

الله اليعينج چلچل الليل
ومن الركض ماظل بعد حيل
ماعندج اخيام •• وتخاف الايتام
چلچل الليل . چلچل الليل

……………………………………………………………


قبل الليل أشگد متعوبه . انهارج هم ليل ابلا نور
التله وسوّت عمرج ميه . من شفتي ابن امج منحور

خلّص يم المصرع عمرج
چن السيف ايحز ابنحرج
مثل اهلال امحدب ظهرج  • عميه العين
وي گطع الراس اختنگيتي
ومن الچتال انضربيتي
صعبه الگومه وما گدريتي  •  تتوچين

وشلون بيج وصار الغروب
ارماد الخيم  وفراش منهوب
الليل اشألج ضام ••  وتخاف الايتام
چلچل الليل . چلچل الليل

……………………………………………………………


ليل الهيمه ايريد امناطر . شد احزام وشد الحيل
وانتي الخلصتيها امراكض . من النار ومن الخيل

خوف وهيمه وهندس ظلمه
وگاع انعدمت بيها الرحمه
وكلها اتصيحج زينب عمه • شصيرين
لازم اطفال اسكتيها
اطلعين الشوچ ابرجليها
وضربات السوط اداويها  • تحتارين

هذا اليگلج عمه جوعان
وذاك اليريد الماي عطشان
ما يكدر ينام •• وتخاف الايتام
چلچل الليل . چلچل الليل

……………………………………………………………


لازم تفترين اعليهم . نسوان وايتام اتنوح
وانتي ومن گد مارگضيتي . حمره اجدامج كلها جروح

كلشي الصار احنه استوعبنه
بس شي واحد و معذبّنه
زينب تركض ما صدگنه  • هاي شلون
شصار ابروحج من ركضيتي
چم مره العباسچ صحتي
عذراً چم مره انهطريتي  • آ يم عون

كعده يزينب من تصلين
تلچم اسياطج من تركعين
و امورمه الجدام •• وتخاف الايتام
چلچل الليل . چلچل الليل

……………………………………………………………


عندج نسوان ومفجوعه . مهضومات ومضروبات
مامش سد وبس اعبيهن . السوط وخط بيهن طبعات

رمله وليله ايصب المدمع
وام عبدالله الاكثر تفجع
عدها گماطه وبي تتطلّع  • اعليه اتنوح
اداوين ابسكنه المچويه
لو بذن المظلومه ارقيه
حيل مأذيتها الترجيه   • تدي جروح

لو بالعليل امعذَّب الحال
بس هو من ريحة هلج ظال
روحج باليمام •• وتخاف الايتام
چلچل الليل . چلچل الليل

……………………………………………………………


گلبج ما ينطيج امفرفح . لازم للحومه تروحين
ليل وبس وادم مذبوحه . وادورين احسينج وين

عرفيته من عطر الزهره
وبس هو المگلوب ابنحره
وتسعه البچفوفه ومو عشره  • وبلا راس
چم جثه العثراتج بيها
بس جثه او ما حسيتيها
الدوس او يالگاع امساويها  • ابخيل انداس

الف وتسعميه جرح بيه
و چتّاله ماخذ ثوبه العليه
بيه كثره الاسهام •• وتخاف الايتام
چلچل الليل . چلچل الليل

……………………………………………………………


باجر مصباحج هم اظلم . اشوه الليل واستر حال
تدرين الهزله امتانيتج . اتصعدين ابسوط الجمّال

باجر كل الجيش ايشوفج
اطلعين وحبلج بجفوفج
موش اخوان الغربه اطوفج  • خدرج راح
تمشين وتتلفت عينج
امخلّيه اعل التربان حسينج
ولحجار وسوگ امودينج  •  مكسوره اجناح

انسيها جلمة هاشميه
باجر يصيحون السبيه
يا غربة الشام •• وتخاف الايتام
چلچل الليل . چلچل الليل

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4