الليلة الثانيه من محرم الحرام


هيه هيه كربله مثل ما كال النبي
هيه هيه كربله آيه صارت للسبي
*؟
هالحوار الـدار اسمعه ابين زينب والحسين
وصلو لــــدار المنيه مـــــا درت ترتحل وين
تكله خويه انلجم كلبي بها الارض دِمعة العين
صاح ابو الغيره اعله هونج عسى ماشفتي الونين
وانه السمعت الخبر
من ثغر خير البشر..
.بيها تتساقط درر
خويه لاتترهبي...........مثل ما كال النبي
*.
خويه باللوح المقدس منكتب هذا الامر
جدمي عن الغاضريه ما تمر ومــــاتمر
منكتبلي بهالوطيه خويه ينحز النحر
وكال جدي بهالعباره عله الصدر يصعد شمر
كال ويهل الدمع
شحال لو صار الفزع
.بيها يبني تنصرع
وبيها زينب تنسبي.....مثل ما كال النبي
***

خويه بارض الغاضريه بهالارض نزلت رسل
ذكروا مصابي بفجيعه وظلت تنوح وتهل
شفت ايوب ويه موسى بكربله وي ذي الكفل
ناحو سنين اعله يومي مــن كبل لاانجتل
يوم شافو لوعتي
.روو بالحك قصتي.
.هناك ذكرو غربتي
بجوا دم لمخضبي.........مثل ما كال النبي
*.**
خويه راح اروي المصايب بس اعهديني بصبر
تكله خوي انت تعرفني الصبر عندي اسهل امر
كال اول هالفجـــــــــايع علي الاكبر ينطبر
عكب ما جبده يخيتي من العطش يصبح جمر
عكب ماشل الحرب.
على الهامه ينضرب.
يطيح ابن خير العرب
يصيح يابويه الابي .....مثل ماكال النبي
.***

والفجيعه الخذت روحي منها الم كلبي انترس
عرس جسام الصميده بدمـه يتحنه العرس
لساحة الطف من يطبها يخلس العرس خلس
بسيفه يمحيها العساكر وبالحرب ينطي درس
لجاسم انحز منحره.
امه سوده وغادره.
.تريد تمحي الطاهره
لجن لاتستغربي............مثل ماكال النبي
*,****
والرضيع المرد كلبي بجفه موته استقبله
بسهم اتباع السقيفه يروح دامي بكربله
جيت اله بشربة اميه من العطش كلبه امتله
لنه ياسهم المنيه بنحره شجه حرمله
بالنحر. صاب الطفل.
بهاي يختي وشالعمل.
.ناس مابيها امل
بطفلي خويه تقربي...........مثل ماكال النبي
*.***

والكمر من نطق باسمه تكول هذا كافلي
روحي للعباس فدوه تكول زينب بت علي
كــــــــــال كفالج يزينب بالعطاشى مبتلي
بالحياه يترس جربته وعالمنايه يعتلي
العمد وي سهم الغدر..
لجوده والراس انطبر
.بالعطش كلبه استعر
وابقى وحدي بموكبي........مثل كال النبي
*.
وحدي جن ابقه بارضها لانصير ولاسند
انصاري طاحو عالوطيه والكمر صابه العمد
اطب وحدي بكل بساله والسبع بيهم شرد
ابن ابوج بهالمواقف ما يهاب من العدد
سيفي باقي بيمنتي..
خل يشوفو صولتي
بيها طفحت غيرتي
سيفي ذل الناصبي.....مثل ما كال النبي
*.""*

تحاشمو بارض المنيه من عكب سيل الدمه
فرقه ترميني بحجاره وبالنبل جسمي انرمه
بصدري اتلكه المثلث ياوديعة فاطمـــــه
وصار جسمي شبه كنفذ من نبال الظالمه
جسمي ظل بلا ردا..
داست عليه العدا.
والشمر بمهنده
بدمي خضب مشيبي............مثل كال النبي
*.**
الشمر لو شفتيه يخويه لـراسي بيده رافعه
للسبي تحزمي يزينب يومي جنه الـواقعه
وحضري الجفوف الغوالي لبس ذيج الجامعه
لا تشكي اعليه جيبج مـــــا اريدج دامعه
خاف يشمت عاذلي.
.يكول هذي بت علي.
خلي نوليها ولي
وخل نجرها للسبي..........مثل ما كال النبي
*.
ونسالكم الدعاء لتعجيل الفرج

لخادم ال محمد(ع)....
.الشاعر حيدر كاظم الساري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4