((#وارث_حيدر ))              #محرم_1447
…………………………………………………………….

إنَّ الماءَ و ليسَ العسكر
هوَ مَن قامَ بقتلِ الأكبر
لو لمست ماءً شفتاهُ . يُمحى الجيشُ و لا تلقاهُ
وراثُ حيدر

……………………………………………………………


الاكبر نسخه الوجه امحمد . مو سيف ولازم قران
چن احمد من طب المكه . وظل يتناكث ابو سفيان

الاصنام كسرها النبي . لات و هبل و العُزه
والأكبر ايكسّر رگب . ياراس يدنه ايحزه
امن احمد قريش اتراجفت . من اسمه بيهم فزه
و من طب علي و ظل يرتجز . بالكوفه صارت هزه

قالوا طلعَ البدرُ علينا
بالموتِ ومَن ذا يُنجينا
هو عزرائيلٌ نخشاهُ . يُمحى الجيشُ ولا تلقاهُ
وراثُ حيدر

……………………………………………………………


ابن العاص الذب اهدومه . خوفاً من سيف الفقار
برض الطف اجلود انزعت . لمن مهر الاكبر غار

حيدر وبس ابيمنته . باب الحصن قلعاها
والأكبر اشوارب زلم . من العرج شلعاها
بن ود تگنطر من علي . و رجلينه حش حشاها
وابن الحسين ابمنجله . روس الزلم حصداها

هل أحيا اللهُ الكرارا
سيفُ أحمرُ يقذفُ نارا
قد عادَ حفيدٌ ذكراهُ . يُمحى الجيشُ ولا تلقاهُ
وارثُ حيدر

……………………………………………………………


عمه الشيخ الكارم ضيفه . و مشرّع باب الديوان
ولعزريل الاكبر عزب . مد سفره ابنص الميدان

العم الفارت دلته . سوده بجمر تتجوه
وابن الاخو ادلاله تصب . روس الجند مو گهوه
جاسم يصدله و مفتخر . و تضحك عيونه الحلوه
شافاه ايشمّر بالزلم . صاحاه يل الاكبر تگوه

صبت دلتهُ الفرسانا
عزريلٌ هزَّ الفنجانا
هذا الفارسُ ما اسخاهُ . يُمحى الجيشُ ولا تلقاهُ
وارثُ حيدر

……………………………………………………………


حسين البي هيبه ومن يمشي . اظل اتبوس اجدامه الگاع
مثله الأكبر من طباهم . صوت القاده و رأسن ضاع

هالشبل من ذاك الاسد . الحسين خلّف قائد
من بني هاشم للحرب . اتقدم علي اول واحد
شي شردت الصوب النهر . شي بالنخل ظل لابد
والبقه مو معناه بطل . ماتن اجدامه و گاعد

ماتَت اقدامي و يَديني
موتٌ في سيفِ أبنِ حسينِ
قلبي خوفاً يترجّاهُ . يُمحى الجيشُ و لا تلقاهُ
وارثُ حيدر

……………………………………………………………


اكثر واحد بيه الأكبر . متأثر من كل هالناس
تلميذ ايقلّد استاذه . والاستاذ اسمه العباس

عباس ينظرله ابفخر . شافاه امطشر العسكر
چن القمر عاف السمه . وبالحومه لابس اخضر
و بعتاب احباب و رَبع . ناده عمه الازهر
ياعمي خلّصت العدد . اشبقيت ألي يالأكبر

دعهم لي حراسَ النهرِ
احفرُ نهراً بالدمِ يجري
في الكوفةِ يمتد مجراهُ . يُمحى الجيشُ و لا تلقاهُ
وارثُ حيدر

……………………………………………………………


قائد منهم ظل يتبختر . انا الاذبح ابن حسين
تالي رد بس جثه وسألوا . يا جثه وجا راسج وين

يا بكر ابن غانم تره . لو ساكت انت احسلك
لو شارد اوي الي اشردوا . سالم ترد لأهلك
تخسه ولك تذبح علي . والفين واحد مثلك
ياهو اليخلصك يا تره . لو عنتر اليفزعلك

و أكيدٌ لا تملكُ عقلا
مجنونٌ و اخترتَ القتلا
رأسُكَ للوالدِ أهداهُ . يُمحى الجيشُ و لا تلقاهُ
وارثُ حيدر

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

ليلة التاسع من محرم 1447 هـ
نزلة لمولاي علي الأكبر ع


دخـيلـه من يـقاتـل
عـلـي وبيهم يـنازل
بـجـمالـه چنه طـٰـه بقتاله أبو فاضل
======================
خصاله..
ياهو اليوصل خصاله..
نـادر كـلـه اسـتـحالـه..
يشـبـه جـده بجـماله.. مثل حيدر أسد

يديره..
الكون بكـبـره يديره..
يشبه شيخ العـشيره..
يـا هـنـيـال الأمـيـره.. زينبنه بهالسند

بـرق يخـطـف دخل عـازم مُلك بـيـده الـزمـن
الـتـكـتـر ينـجـه والــعـايــل يــراويــه المـحـن
الحرب صهوه وعلي الاكبر كمش بيده الرسن

إلى الناس العجـوله
يشـوفـها الـرجـولـه
سبع راعي الشهامه.. يسطرها البطوله
======================
بقيامه..
چن حل يوم القيامه
جـاعـل بيـهم عـلامه
مشّـه الكـل بنـضـامه.. منو اليگدر يزل

رساله..
وصّـل ألـهم رساله
إنّي اليصعب مَناله
ياهو اليوگف قِباله.. إحسبه منچتل

أبن خـيـر العمل حيدر غنم بيـهم يـكـر
سبع من سيفه ما واحد گدر يهرب يفر
بتمامه كـر ابن غانم رجـع مـنـه بقُـصر

كحل عين العقيله
أبو الروح الأصليه
رمز عز والشجاعه.. على الأكبر قليله
======================
شهوده..
بالـطـف عـاين شـهـوده
وشاف الناس الحسوده
واضـح شـايـع صـموده.. يطگ بيهم يطگ

يحامي..
عن دين الله يحامي
لا مـتهـمه الأسـامـي
لبـن السـيد سلامـي.. أذوب بـهـالعشگ

على الفطره أحب دربه أبن مولا حسين
أتـركه حاشا لـو حتـماً يگطعون اليـدين
إذا عـفـته الوجه تنـطي يبـن آدم لـوين

سليـل اهل المكارم
عليها الحومه عازم
عدو الكلـمن يعادي.. سلم كلمن يسالم
======================
رسومه..
وجهك طه برسومه
مـنك ماخـذ علومه
ما تگربله خـصومه.. الا بحيـله وغدر

نـزاله..
يـشبه عـمـه بنـزاله
قـافـل مـثله بقـتاله
صفت وجهة شماله.. جابه العوده النصر

يطيح الگاصد بخزره وتجلجل بي علي
تگابل هـوه والكافل مِـلاه الـطـف ملـي
أنـا الأكبر يصيح الـحـر أصل ثابت هلي

الحبـيبه يگرله عينه
شفه گلـوب الحزينه
التعده اعله الهواشم.. سهم خله بجبينه
======================
سموّه..
بـارز أسـمـه وسمـوّه
مـاخـذ راسـه التـلوه
يحسين ابنك يسلوه.. يشذّبها المحن

جريه..
يل دمعتكم جريه
زلـزلـهـا الغاضريه
بيكم ثـار القضيه.. يـأعداء الزمن

انه ابـن الحر حسين العـصر اعاهد حيدره
على الطاعه وشرف موتي بسبيله وكوثره
سـعـادة ابـركب ابـو اليـمه اذا امـوتـن تره

إله ما يغله غالي
إلى الناكر سؤالي
إذا مو هذا دربك.. النتيجه شنهو تالي
======================
23/5/2025 يوم الجمعه
25/ ذو القعده 1446 هـ
خويدم آل محمد
الشاعر الميرزا محمد الساعدي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

نزله
(#أخو_سكنه)            #محرم1447
……………………………………………………………

نزل و النيه عاگدها . قصاص الزلم يجلدها
             اخو سكنه .. اخو سكنه

……………………………………………………………


اي نعم شنو قياسه بذوله
وهو يتنفس عزم وارجوله
اقزام شاف الجيش ضاعوا بالتراب
يشوفهن علو الجراد  اخيوله

اي نعم سبعين الفاً لچن شافاهم صفر
الاسد لو طبها ايتمشه الغابه اجمع تنصگر
السمه و الگاع و وجهم  كلهن انگلبن صفر
اسيوفهم رجفت وماتت كل غمد اصبح گبر

صفه نص جيشهم خاتل . و الأكبر بعده ما واصل
            اخو سكنه .. اخو سكنه

……………………………………………………………


دره والرب للحسين انطاها
ابروحه من عين الحسد غطاها
بالحرب شيّاب كالو للشباب
هذا من يثرب اجاكم طه

وقسم گالو هذا حيدر طلع من گبره وعدِل
روسكم حسبوها طارت يرد صولات الجمل
وقسم ثالث كال لاله هذا الاكبر هل نزل
يعني عزرائيل اجاكم بيده جابلكم أجل

يحب ارگاب بتاره . والكم ماكو كل چاره
           اخو سكنه .. اخو سكنه

……………………………………………………………


من نزل وبچفه عصة موسى
وظلت انفاس الزلم محبوسه
مثل حال الغنم لو طباها ذيب
امراكض وللشرده صارت هوسه

دگة اكلوب العساكر بالمعسكر تنسمع
اگلوبهم بالخوف شردت لچن لزماها الضلع
صگر وجناحته تذبح طشّر اگباله الجمِع
ركضاهم و صّلاهم يمكن الخان الربع

الخيل امن الركض طاحت . دخيل ابن النبي صاحت
           اخو سكنه .. اخو سكنه

……………………………………………………………


والشمر يتوسل ابكل قائد
العلي يبرز بلكي منهم واحد
منهم اللي انسحب لذيال الصفوف
ومنهم البين العساكر لابد

عوده صاير خوش زلمه بكر ابن غانم طلع
اطمئن يا شمر گله احسب الاكبر وگع
تالي بس خزراه الاكبر وگف كلبه وانصرع
ابلايه راس وفقط جثه عالفرس ليهم رجع

يتنومس ذبح قائد . ويقدم راسه للوالد
            اخو سكنه .. اخو سكنه

……………………………………………………………


تره مامش زلمه يدنّاله
روحه ما رايدها هذا شماله
ابد مو بالسيف من گدروا عليه
الماي هو اللي فطر دلّاله

ولله لو شارب الاكبر ماي و گليبه ارتوه
چا حفر بيده الدماهم نهر ثاني ابـ نينوه
جا مثل  ورقة رساله الجيش بيمينه انطوه
وبقت سبعين الف ريّه مِنه تستجدي الهوه

يفرهم محبس ابأيده . ابجثثهم يترس البيده
               اخو سكنه .. اخو سكنه

……………………………………………………………


صح علي ما رحم بي ذبّاحه
و الارماح اتشتّلت بصفاحه
لچن بالميدان من صاح اعل ابوه
جان يعني الانتصار اصياحه

الموت من اجل العقيده نصر بي الاكبر عِلن
همه نزلوا نص جهم وارتفع هو العدن
لابس السندس الاخضر لان ظل ابلا چفن
راح ذاك العطش كله وشرب من ايد ام حسن

شهيد ومنتصر دمه . علي بعلو النجم أسمه
            اخو سكنه .. اخو سكنه

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

ليلة التاسع من محرم 1447 هـ
قصيدة رئيسية لمولاي الأكبر ع


ياروحي لاتـنـسـاني.. بالخيمه گلبي ايناطر
يمه وغلاة حسينك.. مكسور مـني الخاطر
يمته وعليّ جاي. أدعيلك اهواي..لا تجفي يبني
======================
گــاعــده واذكــر دلالــي
حالي چان شلونه حالي.. تذكر ايام الربه

عاشـرت بعـدك مصـيبه
گلي صبري منين اجيبه..گلبي هجرك عذبه

دعيت الله تجيني يا هوى اسنيني
عـگـبـك دمـعـتي اتـردني وتوديني

يمـتـه بـعـد نـتلاگـه.. يا كل هلي واحبابي
خليني اشوفك مره.. يبرد دخلي اصوابي
ماريدن الماي. أدعيلك اهواي..لا تجفي يبني
======================
يمه اطشن واهليه
لو تـرد سـالـم ألـيه.. يادوه اجروح الگلب

روحي تعبانه واتاني
خبر منك مـا أجـاني.. والبُعد تعرف صعب

ألرباب اتون دللول الولد واسـمع
وآنه اگليـبي لحزانك صبح مرتع

يالأكبر بدمـعاتي.. رد حتى اودع اعيونك
تدري الفگد أذاني.. شلونك ييـمـه شـلونك
ماظل الي راي.أدعيلك اهواي..لا تجفي يبني
======================
ردلي بس مو ذاك لونه
والعـطش ذبّـل جفونه.. ربي مارد دعوتي

گـلـي يـمـه العذباني
الكافر بسهمه رماني.. وصاح ليه ولخوتي

خوارج صاح واحنه المصطفى جدنا
وغـيـر الله ورسـولـه بدنـيا مـا عـدنا

يحچي وتغورگ عينه.. يا يمه لا تنسيني
للموت اشيع اولـيـدي.. هذا الأمر يكفيني
ومصيبتي هاي. أدعيلك اهواي..لا تجفي يبني
======================
راح والـغـصـه چـبــيــره
عگبه وجهي وين اديره.. والأمل راح الأمل

تالي اسمع طاح الأكبر
والحـسين بكبـره كـبّر..ثاري محبوبي انكتل

بگيت اجويعده وعيني على الباب
وسـفه اولـيدي اوسـدنـه بالـتـراب

عشت بنحيب ايامي..يالتسأل اعله احوالي
مكتوب اعيش بحسره. كل ليله اودع غالي
يبني يرجواي. أدعيلك اهواي..لا تجفي يبني
======================
گـوم تعـبـني زمـانـي
والبچي عگبك عماني.. والدهر آه يالدهر

صرت ما اندل طريجي
والقـهر اصـبح رفيـجي. وانعمه يبني النظر

رحت مني بوكت بي عازتك عازه
ردتـك يـوم موتـي اتشيل الجنازه

وآخر وداع اتوادع.. ويه الذي عافاني
ياعـلي الاكـبر يمه.. هم انته لا تنساني
يالگاطع اشلاي. أدعيلك اهواي..لا تجفي يبني
======================
16/5/2025 يوم الجمعه
18/ذو القعده 1446 هـ
خويدم آل محمد
الشاعر الميرزا محمد الساعدي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

((#آ_يا_مهر ))                #محرم_1447
لسان حال الحسين ع مع مهر الاكبر . لأن مهر الأكبر ذهب به الى معسكر الاعداء
……………………………………………………………

يا مهر منك نشف دم اوريدي
لسيوف ما ترحم خذيت اوليدي
گلبي جمر .. آ يا مُهر
راح الولد من ايدي

……………………………………………………………


يا مهر رحتوا للحرب . فوگك علي اشمحلاته
من گلبي احس يوگف نبض . ابكل نظره من نظراته
يامهر و ارماح الزلم . ولاچن علي امسوياته
اعليه السيوف اتعاركت . وشگنهن أهديماته

ردتك علي وهذا العمر ما ردته
الدنيا ظلمه و الشمس بيها انته
شلي ابعمر .. آ يا مُهر
راح الولد من ايدي

……………………………………………………………


عيونك عمن من الدمه . يا مهر لاچن تسمع
صوت السيوف الجايعه . امن اوليدي رادت تشبع
المفروض خيّالك علي . بي للمخيم ترجع
وديته والتمت زلم . فرهود صار المصرع

لو جايبه وبيدي اضمد اجروحه
مرتاحه لو بحضيني تطلع روحه
صدر ابصدر .. آ يا مُهر
من ايدي راح اوليدي

……………………………………………………………


جاوبني يا مهر الحزن . من فتت بين العسكر
بالگاع لو فوگ اظهرك . ذبحوا اوليدي الاكبر
خبرني اكو ابصدر سهم . لمن وگع و اتگنطر
معناها من طاح السهم . طب بالاضلاع اتكسّر

طاح اعل وجهه وهاي اكبر شده
والرمل حار ويچوي ظل ابخده
ظل ينسعر .. آ يا مُهر
من ايدي راح اوليدي

……………………………………………………………


يا مهر هم صوت اعتله . لو ناصي چان اصياحه
ابسرعه صارت ذبحته . لو بي بطه ذبّاحه
امن التعب واسموم وعطش . للذبح مامش راحه
الرماح تلهب بالشمس . وشچّوها شچ بصفاحه

وبصدره للحافر أثر شاهدته
ابنيّي يمكن خيلهم ساحگته
ناح اشكثر .. آ يا مُهر
من ايدي راح اوليدي

……………………………………………………………


يمكنها فزعه و للذبح . صارت عالأكبر وليّه
واسيوف الـ اعليه حدّبت . اكثر اضن من ميه
كل خنجر ايغرس غمگ . ايضغطه ابحقد راعيّه
وجروحه مو حمره اصبحت . سوده ابشمس مچويه

يامهر انشدك ابني ساعه موته
چم مره يا بويه يصيح بصوته
ظل ينتظر .. آ يا مُهر
من ايدي راح اوليدي

……………………………………………………………


وصليته مخنوگ النفس . ضاعت عليه النسمه
امطشّر وچن طش النوه . بالگاع طشّوا جسمه
والحل شنو و گال الگمر . خل ابحصيره انلمه
هالواحد ومامش بعد . واشلون اودّيه لمّه

جبته وصحت يا ليله هذا الاكبر
مو سالم ابنج جبته ليج امطبّر
راح الذخر .. آ يا مهر
من ايدي راح اوليدي

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4