هظيمة يغربك عاشر...وحدك ما ألك ناصر
اه يا غربة حسين...اه يا غربة حسين
........
واعيتك تفطر گلوب روحك بالحچي طلعت
صوتك منكسر عطشان حگها ام وهب فزعت
ألا من ناصرٍ ناديت وچلمتك خالية رجعت

هظيمة حسين حتى اطفال فزعولك
والعطشوك كلهم فدوه يرحولك

وحدة تنخت بوحده
ظل حسينچن وحده

وحده يكسر الخاطر...هظيمة يغربك العاشر
اه يا غربة حسين...اه يا غربة حسين
........
كلشي محظر لعاشور وكلشي حاسب حسابه
ولابس ثوب ما مرغوب ما يعجب السلابه
بس تالي بكتر جسمك وبيد الوادم ثيابه

الناس شبيها بالطف رادت تلوعك
ما فلت المحبس ليش كص صبعك

انترست اسهام تتلوه
الٱخ تجرها بالگوه

وبعد ما تنعرف صاير...هظيمة يغربك عاشر
اه يا غربة حسين...اه با غربة حسين
.....
ماذبحوك رادو كون صوت امن الحرم تسمع
صبراً موتوك حسين روحك قبل لا تطلع
ردت تفزع لچن ياحيل عندك حتى بي تفزع

على سيفك كمت من زينبك صاحت
ارفعت ايدك لچن من التعب طاحت

اذا بعدك عدل گلي
افزع بلكي توصلي

اهنا ماتگدر تكابر.. هضيمه يغربك العاشر
............
كلهم أشرو للخيل هذا حسين هذا حسين
ودلوها دربها اعليك حتى يسحگنك زين
اول مرة هاي تصير ميت ينسمعله أونين

گبل الخيل روحك سيدي طلعت
ومن گد الألم اهاتك انسمعت

توجع سحگت الحافر...هظيمة يغربك العاشر
اه يا غربة حسين ...اه ياغربة حسين
......
طايح على حر الگاع وأرماد الخيم لاحك
حر الشمس مدري الكاع مدري شيلچم جراحك
وشال أسهام من صدرك بس مو لله ذباحك

حتى بالذبح ما ينشغل بيهن
ما يعدل گعدته لو مخليهن

حسرتك مو على حالك
اگبالك تركض أطفالك
ولزمو حاير بحاير....الهظيمة يغربك العاشر


مرتضى يوسف
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

مولاي الحسين يخبر مولاتي زينب عن عبدالله الرضيع


حسبة جم سهم وارجع للاخيام
جايبلج طفل مذبوح توه
جايبلج اكماط منگع الغيم
ماتت على شفافة ضحكة حلوه

ــــــــــــــــــ

زينب مطمئن عبدالله وياي
يباوعلي واعرفه رايد الماي
ما نزلت دمعته والسهم جاي
فرفح بيدي زينب رافس هواي

راية بريح رفرف ما سكت دوم
وتنكع اكماطة وحتى الاهدوم


طير بجفي زينب غمض العين
عباله ارتوه من دمه هوه
جايبلج اكماط منگع الغيم
ماتت على شفافة ضحكة حلوه

ــــــــــــــــــ

كاروكة جفوفي بصدري هلكان
الغيمة اشربت دمه وهو عطشان
من فك الاقماط تگول قران
من حر السهم طلعلي ذرعان

حتى اعيوني خلصن قلبي موجوع
لو باجي للوليدي ويشرب دموع

أندهه بوية بوية وصوتي مبحوح
صوتي من الضمى من عندي گوه
جايبلج اكماط منگع الغيم
ماتت على شفافة ضحكة حلوه

ــــــــــــــــــ

جنة غافي زينب مدري مجتول
وانده بي يبوية اكعد يمدلول
أشدا نحرك بجفيتي محمول
بوية بية مخنوگة الدللول

وردة وذابلة مابين الاورود
من السهم اصبح نحره ممرود

حاولت وي سهمة مثلث الجان
جف وخنك نحرة السهم بلوه
جايبلج اكماط منگع الغيم
ماتت على شفافة ضحكة حلوه

ــــــــــــــــــ

ما أيست بلكت يبجي وينوح
كتلة مو تحب ارقية بالروح
حتلو تبجي بوية بصوت مبحوح
ولا اختك تشوفك بوية مذلوح

من يشوف اخيتة يحرك الايد
وهية تشوف أخيها جية العيد

حاير بالوليد البيدي مذبوح
امشي وحاير وما عندي تجوة
جايبلج اكماط منگع الغيم
ماتت على شفافة ضحكة حلوه

ــــــــــــــــــ
مات اوليدي بيدي شمعه البيت
وحنيت الاجفوف بدمة حنيت
ناغيتة من أخذته وليدي ناغيت
ورديتة نحر مذبوح رديت



حر وضمى ودم واتراب وخيول
ومغوش الشوف وبيدي مجتول

صعبة وحيرة والله وماكو اليعين
وجهي وجهة بالحر يتجوة
جايبلج اكماط منگع الغيم
ماتت على شفافة ضحكة حلوه

ــــــــــــــــــ

صبريلي الرباب وزيلي الاوهام
قلبها جمر صاير والله محتام
خل ادفن أوليدي خلف الاخيام
وارجع يالعقيلة بحزني الف عام

قلبي الي تگطع وي الاقماط
ودم من عندن صار بوجهي نقاط

أمه تموت لو شافتني مفجوع
لسبحاح القلب عبدالله سلوه
جايبلج اكماط منگع الغيم
ماتت على شفافة ضحكة حلوه

ــــــــــــــــــ

قلب الأم شگلة بأي عذر غاب
شجرة وذابلة الگاها على الباب
موقف صعب وشما احسب احساب
واني بجفي دم اكماط واتراب

يا زينب دفنته وقلبي محتار
يم قلب الرباب المشتعل نار

من تسالني عنه تسولف العين
وماينذبح نحرة وتبقي فجوة
جايبلج اكماط منگع الغيم
ماتت على شفافة ضحكة حلوه

ــــــــــــــــــ

الشاعر زين العابدين الشمري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

يالمفارك دليلي ورايح ما ترجع بعد ليه
عفتني خاليه احظاني بيمن أقنع ايديه

يالرايح من ايدي... عبدالله يوليدي.... يمه
..........
ربيتك لجن مني خذاك الماي
وبحظ السهم ووبخته راح ارباي
ردتك يمه باجر الي تصير فياي
بس تموت كبلي ما حسبت لهاي


يمه شلون بجفوفي تلولي وانت مو بيها
تعال وردلي معروفي رد لمك وحاجيها

يالرايح من ايدي... عبدالله يوليدي... يمه
.......
دللول الولد ما ابطل لساني
هدومك يمه مفروشات بأحضاني
ترا امك حنينه وكاعده اتاني
ارجع يابعد كل اهلي وخواني

ألّف اكماط فوك ايدي وأتخيلك واحجيلك
وأكلها شبيك يوليدي يمه السهم هد حيلك

يالرايح من ايدي... عبدالله يوليدي
..........
يالما كملت ولا سنة من اسنينك
حتى شلون تمشي ما معلمينك
عليك نخاف تزحف ما مخلينك
ترف والكاع خاف اتجرّح ايدينك

من حضن لحضن مشيول خواتك ما يهدنك
ومن رديت الي مجتول مذبوح ويلعبنك

يالرايح من ايدي... عبدالله يوليدي
............. َ.
كلت لحسين اخذه بلكي يروونه
غافي اوليدي كلهم لا يكعدونه
السهم جي حار رد امفتح اعيونه
شمسويلهم حتى يذبحونه؟؟

يمكن ماي منطينه رد امفتحه عيونه
من نومته امكعدينه كلتلك لا يكعدونه

يالرايح امن ايدي.... عبدالله يوليدي
..............
رقية ما يعوفج يرجع تكلي
اذا ما رد الج عبد الله يرجعلي
ازغر مني بس هو اليدللني
عطشانه واتاني ماي جايبلي

بعده زغير بس كلبه جبير وكله حنيه
الماي العنده ميشربه اهم شي تشرب أرقية

يالرايح من ايدي.. عبد الله يوليدي... يمه


مرتضى يوسف
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

زينب حزينه وتهمل العين
بالحومه نصبت ماتم حسين
وامه الزجيه تعنته وتگابلن يم جثته
* *
بعد ماچل الضلام وشمس الطفوف انطفت
وذبلت عيون الاطفال ومن الدموع اكتفت
اجت تتعثر الحره ويم الحسين اوگفت
حطت الراس عله صدره وغمضت العين وغفت
شافت الزهره بدمع همال
شالت قميصه مگطع اوصال
وضلت تون لمصيبته وتگابلن يم جثته
* *
گالت الزهره عله كيفج خل يطول مأتمه
احجيلي عن كل جرح منه يأذي أمج فاطمه
ياهو خله حسين ملعب للسيوف تقاسمه
شفتي راسه وذاك رمحه الناگع بفيض الدمه
من العطش متفطره الاشفاف
وبلحيته دم النحر جاف
والرمح فاتح رگبته وتگابلن يم جثته
* *
تنشد الزهره بدمعها وزينب ترد الجواب
تگلها ضل حسين وحده وكثرت عليه الحراب
وصابه المثلث بگلبه وطيح حسين الصواب
و وگعه من فوگ مهره وفتح ميزاب العذاب
خله بلحيته من الدمه خضاب
ووساده جمّع من التراب
وانمزج دمه بترتبته وتگابلن يم جثته
* *
انا فوگ التل واسمع بالمنادي وصيحته
انزلو اعليه ريحوه وخلي تسكت علته
وكثرت عليه السهام احتار حته بنومته
من الضهر يطلع اسهامه لان تصعب طلعته
وابن الضبابي تگرب عليه
وعلى الوجه لازم يخليه
وگدامي صارت ذبحته وتگابلن يم جثته
* *
يشوفني ويذبح باخيي وضل يگطع رگبته
شال راسه وجاب رمحه بگلبي جانت وخزته
تجمعت خياله عشره گبال عيني وسحگته
تگلب حسين الحوافر بالسنابك رضته
تتناهشه چفوف الغنايم
وسلبو حسيني وهو نايم
هذا الحسين وقصته وتگابلن يم جثته
* *
لخادم الحسين ع
علي العزامي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

هظيمة يغربك عاشر...وحدك ما ألك ناصر
اه يا غربة حسين...اه يا غربة حسين
........
واعيتك تفطر گلوب روحك بالحچي طلعت
صوتك منكسر عطشان حگها ام وهب فزعت
ألا من ناصرٍ ناديت وچلمتك خالية رجعت

هظيمة حسين حتى اطفال فزعولك
والعطشوك كلهم فدوه يرحولك

وحدة تنخت بوحده
ظل حسينچن وحده

وحده يكسر الخاطر...هظيمة يغربك العاشر
اه يا غربة حسين...اه يا غربة حسين
........
كلشي محظر لعاشور وكلشي حاسب حسابه
ولابس ثوب ما مرغوب ما يعجب السلابه
بس تالي بكتر جسمك وبيد الوادم ثيابه

الناس شبيها بالطف رادت تلوعك
ما فلت المحبس ليش كص صبعك

انترست اسهام تتلوه
الٱخ تجرها بالگوه

وبعد ما تنعرف صاير...هظيمة يغربك عاشر
اه يا غربة حسين...اه با غربة حسين
.....
كلهم أشرو للخيل هذا حسين هذا حسين
ودلوها دربها اعليك حتى يسحگنك زين
اول مرة هاي تصير ميت ينسمعله أونين

گبل الخيل روحك سيدي طلعت
ومن گد الألم اهاتك انسمعت

توجع سحگت الحافر...هظيمة يغربك العاشر
اه يا غربة حسين ...اه ياغربة حسين
......
طايح على حر الگاع ولهب نار الخيم لاحك
حر الشمس مدري الكاع مدري شيلچم جراحك
وشال أسهام من صدرك بس مو لله ذباحك

حتى بالذبح ما ينشغل بيهن
ما يعدل گعدته لو مخليهن

حسرتك مو على حالك
اگبالك تركض أطفالك
ولزمو حاير بحاير....الهظيمة يغربك العاشر


مرتضى يوسف
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

خِيَرَةُ اللهِ مِنَ الخَلْقِ حُسَيْنٌ
#########
خِيَرَةُ اللهِ وَحِيدًا فِي الفَلَا
إِنَّهُ الْوَتْرُ بِجَمْعِ الْعَسْكَرَيْنِ
جَاءَهُ شِمْرٌ بِحِقْدٍ مُقْبِلًا
وَلِدِينِ اللهِ بِالْحِقْدِ الدَّفِينِ
#########
وَعَلَى صَدْرِ الْهُدَى شِمْرٌ عَلَا
وَرَقَى الشِّرْكَ عَلَى صَدْرِ الْأَمِينِ
وَرَقَى بِالْحِقْدِ وَالسَّيْفِ الصَّقِيلِ
سَيْفُ أَهْلِ الْكُفْرِ أَرْدَى الْفَرْقَدَيْنِ
############
فِيهِ دِينُ اللهِ مَنْحُورًا غَدَا
وَكِتَابُ اللهِ يَنْعَى بِالْأَنِينِ
وَلِدَمِ الدِّينِ قَدْ أَبْدَى مَسِيلٌ
مُذْ هَوَى بِالسَّيْفِ حَزَّ الْوُدَجَيْنِ
##############
وَاحُسَيْنَا! جِسْمُهُ بَيْنَ الْعِدَا
وَلِسُمْرِ الْجُنْدِ قَدْ أَضْحَى رَهِينِ
مِنْهُ لَمْ يَبْقَ وَلَا عُضْوٌ سَلِيمٌ
أَظْهَرُوا فِي الطَّعْنِ حِقْدَ الْأَوَّلِينَ
###############
خِيَرَةُ اللهِ وَبَعْدَ النَّحْرِ صَارَ
لِخُيُولِ الْكُفْرِ دَرْبَ السَّائِرِينَ
وَطَأَتْهُ الْخَيْلُ فِي مَيْدَانِهِ
كَسَرَتْ أَضْلَاعَ شِبْلِ الطَّاهِرِينَ
#############
وَبِكَسْرِ الضِّلْعِ فِي رَمْضَائِهَا
كَسَرُوا ضِلْعَ نَبِيِّ الْعَالَمِينَ
وَبِطَعْنِ السِّبْطِ فِي ذَاكَ الْمُصَابِ
طَعَنُوا صَدْرَ أَمِيرِ الْمُؤْمِنِينَ
############
ونسألكم الدعاء لتعجيل الفرج

لخادم محمد وآل محمد عليهم السلام
الشاعر حيدر كاظم الساري


---
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

#اهوازي

ماضل كل صبر بالروح
دگ ثايه الحزن والنوح
آه يـحسين ياخوية آه يـحسين ياخوية


طول ياسواد الليل باجر ينخطف كل لون
ياريح الصبا يحسين هاي اخر مسية شلون
باجر كل بني عدنان فوگ العلگمي يضلون
وانت اظل طريح تراب وعليك العده يسحگون
مايرحم الحافر بيك
تلتم كل امية عليك
آه يـحسين ياخوية آه يـحسين ياخوية

گلي شلون اصبر الروح بيش الخيمة اطفيها
شيسكت الحرم يحسين الحرمه تريد واليها
سكنة خلاف عمها الحيد لو سلبوا تراچيها
من بعد الدلال نشوف مدمعها وبواچيها
مو هين عليها الصار
طفله وخايفه من النار
آه يـحسين ياخوية آه يـحسين ياخوية

باجر بالفله ايطشن من ايجن علينه الليل
اطفال وصوت نوگ ونار ماضلي بعد كل حيل
ماخله الوكت فزاع ودموعي على خدي تسيل
شيخلص العمر يحسين بعدك بس مناحه اويل
ماتنشف دموعي عليك
عيني على الدرب تربيك
آه يـحسين ياخوية آه يـحسين ياخوية

مااسمع بعد كل صوت بيه تدللين وصار
اسمع بس زجر وصياح وارماح وعذاب ونار
گد دوس الحوافر راح جسمك من المه احتار
وعلى العلگمي العباس صعبه وموش هين الصار
باچر توگع الخيمه
ونطش كلنه بالهيمه
آه يـحسين ياخوية آه يـحسين ياخوية

الحرمة بلاية والي شلون رچبتها على ضهر النوگ
وحدي ومايصح امعين مابين البشر مخلوگ
شيصبرني وبيا حال نسوان ونطب للسوگ
شوصف حالة السجاد مگيد وبهظم مخنوگ
ماحسبت هيج يصير
نمشي وي الغرب ونحير
آه يـحسين ياخوية آه يـحسين ياخوية


احمد ديوان الخيكاني
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

ليلة العاشر من محرم 1447 هـ
لمولاي رضيع الحسين ع


على اوليدي اليحن.. دمه يجري الجفن
يـعـبـدالـلـه الــگلب.. ألك يــبــقـه يـون
======================
ربــيـتـك انــه لــيـام كـــبـــري
ردت بيدك ييمه اتحفره گبري

مـجـروح الگلب واعليك يـنعه
وافـراگك من اهروشه يشلـعه
يـمـه المنـحـرك مـا بـيّه فزعـه
حزن امصيبتك گلي شيجرعه

مفطوم بسهم.. شيجرعه الألم
فدوه المنحرك.. بـالحـر انلچم
======================
أفز بالليل مرعوبه
حسبالي بچه اوليدي وگعد يرضع
غير الونه والأهات يازينب فلا أسمع

يازيـنـب دمـه يـجـري دليـلي
بس دمع الحزن صاير خليلي
عبـدالله انـذبح زينـب أويلي
حيلي منـهدم يحبيـبه حيلي

كل هذا الجره.. بعدني مناطره
كسرة خاطري.. ذبحة منحره
======================
يبني الضيعتني بضيعتك مني
دوهـنـي زمـاني بـيك دوهنـي

دوهنـي زماني بكل مسيه
يوم الشاهدت ذيچ الرزيه
وسـفه تـنـذبح بالغاضـريه
هيچ وتاخـذك مني المنيه

بـعـدك بالـعمـر.. ما يـبـقـه صـبر
عاشرت الدمع.. العذر يمه العذر
======================
وين الفاجده الشبان وين الضايگه اللوعه
خل نتگابل اني وياچ ننعه بروح مفجوعه

يم جاسم على الويلاد ننحب
وعالفوگ الرمل جسمه تسلب
والعـبـاس بسـهامـه ايتـعـذب
وفـوگاها شمر بخيامه ينهب

يمن فدوه العمر.. ألك صدري جمر
يـسـباح الگـلب.. جزه وكت الصبر
======================
أهـز  مهدك يـعـبـدالله
وعاين عالمهد خالي ..  يبني وثمر دلالي
أهـز   مهـدك  يـعـبـدالله

بـكل هـزة مـهد ينهز كـياني
تـانيـت الولد بس ما أجـاني
ولمن رد عليه بسهم مفطوم
بوليدي وسف دهري رماني

انه بـعازة سند.. الولد يمه الولد
لو عني ارحلت.. ما يبقالي احد
======================
الـوادم لـو لـفـاهـا الليل .. تعد الليل للونسه
وانه چم ليل چم انهار .. يجي ويروح من نفسه

من بعد الجره يا حيل أشيله
حـالي صـار چن حـال العليله
ليلي الفات متونسه بالدموع
والـدارن عـلـيـه مـو قـلـيـلـه

بگيت امحيره.. عگـب ذاك الـجره
عزيزي مندفن.. وانه اعليه ساهره
======================
3/6/2025 يوم الثلاثاء
6/ذي الحجة 1446 هـ
خويدم آل محمد
الشاعر الميرزا محمد الساعدي

آه يحسين ياابن امي … آه يحسين ياابن امي

شيصبر الگلب يحسين هاي الما اتحملها
سولفلي يماي العين تعوف اختك منو الها
حرمة ابنص غرب ابقى هاي الما حسبتلها
شجاوب من ينشدني سكنه شراح اگللها
راح حسين مايرجع .. الحافر بالصدر يطبع
آه يحسين ياابن امي … آه يحسين ياابن امي

شحالك باچر ابنص جيش مالك بالخلگ نغار
الكافل واخوته يطيحون تتوذر وذر الانصار
كلها تهجم اعلينه وبخيامي تشب النار
وتفر بالفله من الخوف ياهو يلمها كلها ازغار
دخان الخيم يعمي .. وتچوه بالجمر جدمي
آه يحسين ياابن امي … آه يحسين ياابن امي

تمنيت العمر يخلص گبل فجرج يهل ليله
ولا شوفاً اخوي حسين طايح محد ايشيله
تبقى على الترب ياحيف راح الچنت انا اشكيله
واسمع بس بچي النسوان ماضل بيدي اي حيله
ادري على الهزل تالي .. وراسك ع الرمح عالي
آه يحسين ياابن امي … آه يحسين ياابن امي

من گد دوسهن يحسين باجر تترس الهيمه
ويطشرونك على الگاع ناس المالهم قيمه
وتفرهد اعضامه الخيل اخوي وصاحب الشيمه
بيمن راح افييلك وسويلك بعد خيمه
عباتي تحترگ بالنار .. وبلم اليتامى احتار
آه يحسين ياابن امي … آه يحسين ياابن امي

ماضل كل صبر بالروح زاد على العمر عمرين
هظيمه مدللت عباس گصه عليها الهضم والبين
الچانت بالدلال اتعيش راح على الهزل تمشين
بناتك ياعزيز الروح تبچي وتهل دمع العين
بنات وتكسر الخاطر .. مامش كل رحم باچر
آه يحسين ياابن امي … آه يحسين ياابن امي

احمد ديوان الخيكاني
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

قصيدة﴿ مأتم عزاء ﴾

مأتم عزاء إبن فاطمة
روحي بدمعها مغيمه
بكل المجالس متحزمه
مولاتي حزنچ بالضمه

متوسد الرمال الظهر
دم من كل جسمه يخر
يا ويلي ما ضل صبر
سيوف الكفر بيه طبر

الطبره فوك الطبره صارت
زينب تشوف وعينه دارت
خيل عوجية بجسم غارت

حسين آه آه آه حسين آه آه آه

ناحت عله مصابه الزجية
هاي المصيبة طاري الرزية
دم النحر تشوفه السبية
ما ضل صبر تعثر رميه

يفج جزع ريح المصاب
متوسد حسين التراب
شمس ظهر والهوى هاب
يا روحي هذا العذاب

ما ينوصف جرح أبو الأكبر
حرگ الخيم والخيل تفتر
جرح الغريبة جرحها يكبر


حسين آه آه آه حسين آه آه آه

غريبة تمشي زينب سبية
هاي الأميرة و الهاشمية
إخوتها ضلت بالغاضرية
شوك والألم أرض الرزية

تمشي بديار الغرب
تشاهد رأس وصعب
دم من الرمح يصب
والنار بزينب التشب

يطك صبرها من السبي
يحدي بظعنها الأجنبي
تعبها الشام بنت الٓ نبي

حسين آه آه آه حسين آه آه آه

هضم السبي أشد من كربله
حبل والسياط بالعايله
تموت بچلمت لا هله
بيت النبي هذا بفله

ديرت غرب بيه والألم
من بعد الكفالة والشيم
هذا الحزن طاري الخيم
وطايح لهن چم علم

أون و أريداً كافلي
ما ضل صبر يا هلي
أخ يا بويه يا علي

حسين آه آه آه حسين آه آه آه

عضيد هادي الصالحي
﴿ﺎللھُمۘ ؏َـجۚل لِوليۧڪَ ﺎلفَرجۚ﴾
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

#قصيدة_ليلة_العاشر

#ياصاحب_الزمان

هذه انته المندفن جوه الحجر
هذه انته المابقه منك اثر

ما اشوفه وينه جسمك
ليش ضايع خويه رسمك
هذه انته
---------------------------------
وين طولك ياحبيبي وين ضايع ياعمر
وين جسمك خويه گلي وين انته ييا كتر
خويه ادورك بالحوافر انه اشمن بس عطر
انه اريد ابچي اعله جثتك گلب اختك چن جمر

وينك انته ماشفت بس الدمه
وشفت اثار الضلوع امهشمه

گمت المن بيدي عضمك
ليش ضايع خويه رسمك
هذه انته
-------------------------------
دوريتك خويه وينك مالگيتك عالارض
بس بقايه انسان خويه ولعده بيهن ترض
شي مشن ويه الحوافر راحن بطول وعرض
جم فرس عاثر بصدرك جم رمح صله الفرض

هذه انته خويه لو شوفي انطفه
لاملامح باقيتلك لاصفه

حرت من ياصوب المك
ليش ضايع خويه رسمك
هذه انته
-----------------------------
ردت احضنك خويه اضمك بيك ماباقي صدر
امطشر ابدوس الحوافر امطبر وصاير وذر
گلت اخلي بيدي راسك انته باقي بس نحر
حسين وينك ياحبيبي گلبي ياخويه انفطر

اشلون احضنك يالضعت في كربله
وهذه اوصالك تطشرت بالفه

گمت اسولف ويه دمك
ليش ضايع خويه رسمك
هذه انته
----------------------------
شنهو صاحي بيك باقي كلك انته منهشم
ماكو طعنه وطبره خويه ماشفته عله الجسم
وين امك كون تحضر جثتك خويه تلم
ابيا گلب زينب تلمك يلي متخذم خذِم

البيك شفته عمره ماصار ويمر
الضهر مطبوگ شفته اعله الصدر

ياهواي الجنت اشمك
ليش ضايع خويه رسمك
هذه انته
---------------------------
غير خلصت ولنهايه ولدفن لازم يصح
فوگ هذه الصار كله زادو اجروحك جرح
مارضو دفنك حبيبي عاري ولدم منسفح
وراسك اگبالي اشوفه يعتلي صار برمح

ونته تدري بزينبك تنطر يسر
اترافج ارسومك على رمح الغدر

واني ادري اجبير حلمك
ليش ضايع خويه جسمك
هذه انته
-----------------
علي سليم الحسناوي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

(( #مهد_خالي ))   .          #محرم_الحرام
……………………………………………………………

مهد خالي .. نوحي عالي
غالي يا عبدالله غالي
……………………………………………………………


يمه غشاوة الخضره الفوگ مهدك
يمه اشمنّها وتفوح ابعطر خدك
امچانك الكاروك يمه وموش لحدك
وينك اوين المگابر طفل بعدك

ابعمر ست اشهر يمه . الهوه ما شبعيت منه
شوغه بيك الحضن امك . ابليل وبشبگة محنه

يل تلالي .. نوحي عالي
غالي يا عبدالله غالي

……………………………………………….……………


متت بس للماي ظلت بيك حسره
امفطره اشفافك عطش وتريد گطره
اشگد بجيت اعليه تلهب بيك جمره
اخدوك اليضون صفت مخطوفه صفره

آه اسم الماي لوعه . لو سمعته ايزيد وني
امروي كل الدنيه مايك . ليش ما رويت ابني

شوف حالي .. نوحي عالي
غالي يا عبدالله غالي

……………………………………………………………


رحت ليهم وادري ما ترجع اليه
شربوك ولچن مو طاسة اميه
ودوا النحرك سهم بيه المنيه
رگبتك عالسهم يمه ازغيره هيه

فرفحت بالذبح يمه . كماطك ابيدك تحلّه
داير اعله حسين ادينك . ابنحرك امعلگه النبله

شده بالي .. نوحي عالي
غالي يا عبدالله غالي

……………………………………………………………


رد الحسين ويخط بالگاع جدمه
وخافي عبدالله عليه ابحدر هدمه
حيل محتار ويريد ايشيل سهمه
تنفصل خافن رگبته و يظل جسمه

اوليدي يا هالناس شفته . امن الذبح شابح عيونه
گبل لونه ابلون ورده . وهسه مدري شلون لونه

يا دلالي .. نوحي عالي
غالي يا عبدالله غالي

……………………………………………………………


راحن اهديماته بيض وهسه حمره
صفن مصبوغات من ادموم نحره
كله احمر حته عينه ولون شعره
اگماطه وينگط دمه فوگ اعله صدره

راح حار ورجع بارد . يعني نازف دمه كله
ذابل واصفر اوليدي . وجان من الكمر احله

غيره مالي .. نوحي عالي
غالي يا عبدالله غالي

……………………………………………………………


المثلك الرضعان وسط المهد تلعب
اله يهفون وغشاوه اعله تنذب
مو يظل للماي حسره اعليه يشرب
ولا سهم شچ ابرگبته وبي تعذب

اوليدي كلش ترف خده . والكبر وترابه يحرگ
موش بفراش ومخده . فوگه راح الرمل يطبِگ

ردته والي . نوحي عالي
غالي يا عبدالله غالي
……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

(#ليلة_وتعادل_عمر )            #محرم_1447
……………………………………………………………

ليله و اتعادل عمر .. ريت ما يطلع فجر
هسه خيمه اتحيط بيها اخواني
باجر ابيا هيمه يصفه امچاني

……………………………………………………………


يا صبح ظل لا تجينه
اضواك لا يطلع علينه
باچر انفارگ ولينه   . وبعده أنتيه
ريت ليل العمر يبگه
و لا اشوفن سمه زرگه
باچر الحافر يسحگه   . وصدره يمحيه

الليله اخر ليله وي اوجوه اهلنه
وباجر وياهم تره اتشيل المحنه
سبحه باجر تنگطع ياهو اليلمنه

رحمه باجر ما أكو . اليمي چتّال الأخو
شامت او وين اخوتج نشداني
باجر ابيا هيمه يصفه امچاني

……………………………………………………………


حسيني باجر يظل حاير
اوحيد و آلاف العساكر
ايدير عينه وماكو ناصر . و ظهره مكسور
وِحده وِحده ينادي أسمنه
براس كل وحده يحبنه
رايح وما يرجع النه . اينام منحور

ريت باجر لا يجي ولا شوف ظهره
اثنعش طبره الشمر يا وادم يطبره
امن الگفه وبهداي يتلذذ ابنحره

وجه ابن امي السمح . ذابل وفوگ الرمح
يظل يهتز لو شمر شتماني
باجر ابيا هيمه يصفه أمچاني

……………………………………………………………


باجر ابترس اذني أسمع
أه أظل من نحره تطلع
سحگ خيل ابصدره يطبع.  احديد لسعات
ابلايه روح اتباوعلهن
اثگال و يغرس سحگهن
ايجيبن أگليبه ابرجلهن  . ينبض آهات

حسين بالحومه الحوافر يطشرنه
جسم اخوي اوي التراب ايضيّعنه
ابكل شبر بالگاع توجد وذره منه

وخافن اسكينه تصد . صدر ابوها المنمرد
و مدري لرّ قيه اشيگول لساني
باجر ابيا هيمه يصفه امچاني

……………………………………………………………


طوّل ابوكتك يليلي
صبحك ايعذب دليلي
يموت خدري وي چفيلي . طولي ينشاف
كون وي عباس اموتن
عيوني هو وبي اشوفن
حرمه بعده وين اروحن  . زرگه الاچتاف

باجر ايظل ع النهر و الروح يمه
اتگله گوم الزينبك و اظل تحشمه
على الخيمات المعسكر صار لمّه

أكعد و رد الخدر .. اعليها مد ايده الشمر
انعه خدري وهو هم ينعاني
باجر ابيا هيمه يصفه امچاني

……………………………………………………………


شكثر يا خيمه انا احبچ
من عطر عباس عطرچ
نارهم باچر تحرگچ . وحدرج اطفال
حايره ومن هسه اهمّن
لو وراي الخيل ركضن
اركض و خافن اطيحن . ابمد الاحبال

باجر ابثگل الجبال اعليه همّه
ضعن اطفال و حرم لازم ألمه
امن السياط وكلها تصرخ عمه عمه

ذيج مجروحة إذن .. وهاي مچويه و تون
ايصح عمه الجمر هل حرگاني
باجر ابيا هيمه يصفه امچاني

……………………………………………………………


ابليل باچر الله يعلم
ماكو خيمه او وين نلتم
هيمه محد بينه يهتم . فراشنه اتراب
باجر اليحرسنه چاتل
اعلينه حقد الدنيه شايل
نتجه صوب ابو فاضل . انودي العتاب

صبح حادي العشر ضيمه اشلون احمله
والشمر يندهني اطلعي وبيده حبله
وشدة الشدات يا صعدة الهزله

ويبتدي ضيم السبي . فره يبنات النبي
الما شتم امي ابحجر ضرباني
باجر ابيا هيمه يصفه أمچاني

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

((#بس_هالليله ))  .    #محرم_الحرام
……………………………………………………………

بس هالليله .. النه اويه اوجوه السادات
بس هالليله .. و باجر هيمه ابلا خيمات
باجر صعبه .. وحشه و غربه
و أتيهن يا علويات

……………………………………………………………


باچر والينه امن المگفه  .  وبهيده اينحره الذباح
يظل بس راس ايصد اعلينه . ومعلياته الفوگ ارماح

عباس يروح وما يرجع
يم الشاطي ايظل امگطع
من يشوف الجود اتصوب . روحه اتسيل ابحسره وتطلع

باجر يصبح جسم الاكبر
فرهود اعل الكاع امطشر
باجر جاسم يرجع النه . شابع طعنات امن العسكر

خل كل وحده .. اتودع واليها ابدمعات
خل كل وحده .. تدعي اظل هاي النجمات
صُبح الكُربه . وحشه و غربه
و أتيهن يا علويات

……………………………………………………………


لو رد الميمون اعلينه . ابلايه حسين ويصهل حيل
ايريد ايگلچن ذيج اياها . راح اتهد نيران و خيل

باجر والسجاد ايگلچن
شردن وبهذا البر هيمن
مامش گعده ومامش ممشه . يا خيّاتي ويعني اتركضن

ابخمسين وهم اركض آنه
مو خوف ولاچن حيرانه
ابقه اعل التل يم ابن امي . لو يم اخيام السعرانه

أكبر حيره .. منا خيل ادوس حسين
أكبر حيره .. و اطفال وتصرخ لاوين
شتمه و ضربه . وحشه و غربه
و أتيهن يا علويات

……………………………………………………………


الخيمات السووها الساده . النه و چنها اقصور أكبار
همّه اسيوف التذبح بيهم  . و هنه التذبح بيهن نار

لو نار اگتربت شفتنها
كل خيمه ابسرعه اتركنها
لو حرگوهن وانتن جوه . وحدتچن ما تطلع منها

اتسحگن لو شوج ولو جمره
و رجليچن من الدم حمره
ولو ما شفتني آنا احذاجن . صيحن وينج يمنه الزهره

إلچن تفزع .. بس امحنبه امن البسمار
إلچن تفزع .. هم ترجع تتچوه ابنار
هم متعذبه . وحشه و غربه
و أتيهن يا علويات

……………………………………………………………


حسين امدللچن گل عمره . ومن الكافل محميات
باجر سوط اعليچن يفتر . بعبيجن يرسم طبعات

الذابح عبدالله امن اوريده
سهله ومن تطّاول ايده
سوط الضربوا بيه الزهره . شمر اعليجن راح ايعيده

عمه اسكينه و عمه ارقيه
من چفوفي و چلبن بيه
عمه وحدر اعباتي اطبن . وخلن ضرب السوط اعليه

انا أتحمل .. بس انتن يا عمه شلون
آنا أتحمل .. خل ايشل من عندي امتون
سوط اللهبه . وحشه و غربه
و أتيهن يا علويات

……………………………………………………………


يضوَن بدرين ابهل الليله . آل امحمد  والاصحاب
ليلة باجر ظلمه و حارس  . لو چتّال ولو سلّاب

طول الليل انظل بالهيمه
مكشوفين ومامش خيمه
هالاطفال و شبه أگلاده . ابخوف وحولي الكل ملتمه

اطفال وعل العز معتاده
ابلا فرشه اتبات و لـوساده
يهتز عرش الباري امن يصد . جوعانين ايتام الساده

كسرة خاطر .. شافوا ماي الهم جابوه
كسرة خاطر .. عگب حسين ولا شربوه
اتفطر گلبه . وحشه و غربه
و أتيهن يا علويات

……………………………………………………………


و الاصعب بعده امتانينه . من الضيم انشوف اشكال
خشنه اظل تحفر بيديجن . من هسه امحضرين احبال

هزله النوگ وهل تنطرنه
واهنانه اصير اكبر محنه
اجفوف وظلت برض الحومه . ماكو ولا چف ايصعّدنه

حسبنها وياهم ماهيه
بعد انسن جلمة علويه
ذبحاها الشمر اويه الكافل . و بدلها ابچلمة مسبيه

فوگ الناگه .. وانودّعهم من ابعيد
فوگ الناگه .. امودّينه انگلهم ليزيد
الشام و دربه . وحشه وغربه
و أتيهن يا علويات

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

الخيمه أتريدني أحميهه
وريد الخيمه تحميني
حرت أبين نار وخيل
وعساكر حاوطت عيني
كلهه أمتانيه عللباب
تهضمني وتبجيني

أكبر صعبه الناس الغربه من اتلم اتحيط عيونك
مالك ناصر يوم العاشر كلهم يتنون يشوفونك
محد حارگ گلبه أخيامك من شافاهن بيهن نار
حرگت خدرك عثرت زينب بيهن يردون يتعبونك

يبن أمي :: أخبرك نار المخيم
يبن أمي :: هيه الطلعتني
يبن أمي :: تتدري بزينبك جانت
يبن أمي :: قله أمرار شايفني

——————————————————

گلت خل أبعد من النار
عن لاتوصل أعيالي
طلعت أتعثر بممشاي
وشفته أمحدب أخيالي
تذكرته ولزمته أگفاي
وعثرت وكلهه تبرالي

مامش خوه ولامن كافل يوگف وياي أيباريلي
أنشد زينب ياهيه أنه ليش الوادم ما تحچيلي
وكل ماأصفن أذكر خويه مذبوحه بحلگ الخوان
وذكر كلشي ووگع ومشي وتنخه أبنيني أتچيلي

طف ضيمي :: منه أنسيت ياهي أنه
طف ضيمي :: وذكر أخوه ونخاهم
طف ضيمي :: بيه أتذكر أخواني
طف ضيمي :: العاشر وين وداهم

——————————————————

العاشر كلشي بيه يكسر
هوه العاشر شخله
الغرب خلاهم يگولون
زينب صعدت التله
آه ياعاشر أهمومي
عملتك بيه مو سهله

آه يالعاشر داس الحافر حد ماخلص صدر حسيني
كافل روحي وخيمة طولي گطعو نحره شوفت عيني
ماضل بيه حيل أشويه خلص كل حيلي وخياتي
ماعرفني من شافني زينب صح بس مو بسنيني

بالحومه :: عبايه متربه وترگض
بالحومه :: خواتي ينشدن عليه
بالحومه :: زينب ياكتر طاحت
بالحومه :: علويه علعلويه

——————————————————

من كل كتر حاطتني
خيل وموزمه اوادم
وكلفه ياخلگ تحتار
المثلي المن نسل فاطم
الحيره تسمع يگولون
مايگعد گمر هاشم

ياهو يلمني يخفف حزني حافر حافر لچمن روحي
هذا أمگطع ذاك اموزع هذا يصيح خويه أجروحي
أكبر هظمه بذيچ الضلمه وسمع گالو وين أم عون
ضعنج زينب ياهو يحرسه أشمتو بيه وزادو نوحي

منخواني :: خذوني گوه للهزله
منخواني :: وصعدي گالو الناگه
منخواني :: بعدني أتأمل أموادع
منخواني :: ولهم والله مشتاگه

رسول رياض

قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4