#محرم_1446
(( #طاعة_الأم ))  أم البنين ع
……………………………………………………………

طاعة الام واجـبه   .  و انا اريد الطـاعه
حسين مو يوم وشهر . خدمته ابكل ساعه
الهمه يا اولادي .. الهمه يا اولادي

……………………………………………………………


هاي ابدن مو وصيه بل امر يولادي
احنا مخلوقين يمه وقف لبن الهادي
جبل ابن الزهره وانتو حدره مثل الوادي
اگبال عينه و خاف يطلب ما اريده اينادي

گبل لا يطلب و اقروا اعيونه
الغيم من بطن السمه اتجرونه

افياي من هاي الشمس . ما اريد اتلوحه
تره واحدكم عبد  .  خله يحسب روحه
الهمه يا اولادي .. الهمه يا اولادي

……………………………………………………………


عين وتشابگ رمشها هيجي وتحيطونه
وخيلكم هم عدها واجب تخدم ابـ ميمونه
دربه گبل ابميل يمه لازم اتفحصونه
والهوه الگاصد انفاسه واجب اتفتشونه

لو نزل من مهره واصبح گاعد
اربعه اتهفوله مو بس واحد

وگفه مامش گعده ابد . و خلفه مو جدامه
للخدامه اترقبوا  .  بس يحرك الهامه
الهمه يا اولادي .. الهمه يا اولادي

……………………………………………………………


يمه وكت الليل ظلمه انتو صيروا اقماره
ما اريده ابوحشه يشعر چنه وسطة داره
ينام يانوم العوافي لچن انتو اسهاره
تره هذا الكون بيته و ننحسب خطاره

يمه مصباح السعد مصباحه
شوفة عيونه اساس الراحه

والشمس وكت الصبح . تشرگ امن اجبينه
اليوم ما يبدي ابد . امتاني يفتح عينه
الهمه يا اولادي .. الهمه يا اولادي

……………………………………………………………


لو سمتعو ماي رايد حاضر اتگلوله
اسرع امن الصوت ركضه زمزم اتجيبوله
وخاف تمشون ابصحاري و قطره ما تلگوله
نهر من النيل اطول بالعجل حفروله

واحه كل واحد تشيل اجتافه
ولا يغير العطش لون اشفافه

مثل اسمكم واحفظوا . راح أكول احجايه
ابد ما حسبه اولدي . الگبله يشرب مايه
الهمه يا اولادي .. الهمه يا اولادي

……………………………………………………………


فدوه لا سبعين فدوه الزينب السلطانه
الناگه كون الهودج ابدن ما تهز اركانه
الخدر كل واحد اريده عايش ابوجدانه
كون واحدكم و يفحط من اسمها السانه

ما اريدن هودج اتحرسونه
كعبه بحرام الفده اطوفونه

فوگ كل هذا الحچي . يمه اريد ازياده
من اجل زينب تره . اتموت كل الساده
الهمه يا اولادي .. الهمه يا اولادي

……………………………………………………………


يمه هذا الضعن قدسي كلها ضنوة فاطم
يمه موتوا اثنعش موته كون الاكبر سالم
بزودكم وانتم عمامه امدلل ايظل جاسم
كون عبدالله شحلاته وعلى اديكم نايم

عاملوا السجاد مثل احسينه
بعده يتنصب امام اعلينه

ما اريدن تنهظم . بالسفر علويه
اطيح روس الاربعه . و لا دموع ارقيه
الهمه ياولادي .. الهمه يا اولادي

……………………………………………………………
✍️ ( سيد خضر الزاملي )
قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4

[[ اخو العلويه ]]




لسيدي ومولاي ابا الفظل العباس ع




فگره الچفه يلوحه
خلي تأيــس روحه
مــوت احمـر يمنته

◾◽◾◽◾◽◾◽◾

الشايل خشمه يفركه
بحافر مهـــره يــركـه
نشمي وگــد العـــركه
ما ترحـــــــم خزرتــه

◾◽◾◽◾◽◾◽◾

تتباهــى العــــــلويــه
بــــــــرباة البـــدويــه
يطــبگ ميــــه بميـــه
وتــــــــزلزل صولتـــه

◾◽◾◽◾◽◾◽◾

دخيلك صاحـو كافـي
قــــائدنــه المتــعافـي
وشارد منك حـــــافي
وبــوجـــــهه خوفتـــه

◾◽◾◽◾◽◾◽◾

الحومه بچف يگلبــها
والعـادت يـــــصلبــها
حيدر گـــالو طبـــــها
قد جـــــــاء اللا فتى

◾◽◾◽◾◽◾◽◾

صگــــــــار العــــياله
رجفو مــن اخــــياله
طگ خيــــل بخـياله
مــــن فــارت غـيرته

◾◽◾◽◾◽◾◽◾

مـــات اليمــه اتدنــه
وامشـــيم الينــخنــه
فوگ الشط مـن ثنــه
الشط لمــه بجــــربته

◾◽◾◽◾◽◾◽◾




عبد العليلـه
✍حيدر ابو كيان الفاطمي
قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4

#قصائد_محرم_
#محرم_الليلة_الثانية_

وصول ضعن الحسين(ص) الى أرض كربلاء يوصل الضعن ومولاي سيد الشهداء يدير عيونة لمولاتنا زينب(ص) والضعنة وبناتة ويدري بلي راح يصير مولاتي زينب(ص) تسولف نضرات اخوها الحسين وتگول…


وصلنة لكربلة
ودارالي النضر..
نضراتة حچن
حسيتة انكسر..

يباوع علضعن
يطولّ نضرتة..
اهنانة بكربلة
تبدي غربتة..


گدامة تمشي ينضر رقية…تكسر دليلة هواي
لو مرة يتعب تركض تجيلة..تجيب بأديها الماي
كسراتة كلش تصبح چبيرة…باچر يشح سگاي


يدير بعيونة__وعيونة__تسولف ضياع
لخولة وصفيه__نضراتة__كلهن وداع
هاي النهاية__وبلهيمه__خدرة يشاع


اه ياكربلة
اه ياكربلة

_______________________________________

يفتر علضعن
ودموعة كلام…
يدري بليصير
يحرگولة خيام…

لعبدلله يروح
يشمه بمنحره…
باچر؟ بلعطش
يكسر خاطره…


بحضنة يناغي عبدلله هسة..وحيره بعيونة تصير
يرسم أماني لعبدلله ابنة..يذكر عطش ويحير
معقولة نحرة يذبحونة باچر..عمرة يناس زغير


محد يشربك__يابوية__يذبحك عطش
بيدي ارفعك__بس دمك__بيدي انفرش
فوگ الترابة__ميلمنة__بوية نعش


اه ياكربلة
اه ياكربلة

__________________________

ياخوية حسين
يانعم الأخو…
بوداعك اموت
يهضمني العدو…

أيام وتصير
وحدك بلترب…
أشمن منحرك
يذبحونك غرب…


تصبح غريب وأنة غريبة…ترهم يخوية شلون
كربلة تحرگ خوية خيامك..وين الحرم يرحون
احچيلي خوية ألمن اروحن..لو كلكم تموتون


هنانة المصيبة__والغربة__ألمن نروح
يذبحونك انتة__علغبرة__وكلك جروح
اركض اشوفك__علتلة__اوكف ونوح


اه ياكربلة
اه ياكربلة

__________________________

اركض بلفلة
وخيامي تطيح…
مايبقه الكفيل
يصبح هم ذبيح…

كلشي ينتهي
ويجيبوها الهزل…
مسبية اروح
يچتفوني بحبل…


مسبية خوية مشتاگة اعوفك..فوگ الهزيلة لشام
مذبوح اعوفك خوية وروحن…راس برمح جدام
وتالي بخرابة انة وعيالي…فوگ التراب إنام


تكبر غربتي__علهزلة__گبالي لرماح
انة الاميرة__يسبوني__بطرت الصباح
يذبح هدوئي__بلغربة__يعلة الصياح


اه ياكربلة
اه ياكربلة

___________________________
#محرم_1446هـ_

خادم الزهراء ص

✍️محسن الباوي
___________________________

لحن القصيدة 👇👇

((#و_أنتصر_مسلم ))  #محرم1446
……………………………………………………………

لا تقيس اعل البدايه
و الأهم نصر النهايه
جان عالي بس نزل قصر الاماره
وهسه گبه وللگمر تنطي الاناره
يحيا مسلم .. يحيا مسلم

……………………………………………………………


روح شوف الواقع الـ بالكوفه
مو كلام و منظر انت اتشوفه
قصر حدر الگاع غاطس بالتراب
و مرقد يلوح النجم بجفوفه

روح يمه وشوف شنهو اخباره
چنها حج البيت موش ازياره
هو گعبه اعليه آلاف التطوف
وعلى قصر ابليس ترمي حجاره

واحد ابعلو الثريه
او واحد ابقعر الوطيه
شارة المظلوم هايه شلون شاره
وهسه گبه و للكمر تنطي الاناره
يحيا مسلم .. يحيا مسلم

……………………………………………………………


العرشه من الذهب جان امچانه
تعبد الوادم كلام السانه
وهسه مجتوف بسلاسل من حديد
تاكل النار ابـ أبن مرجانه

ومسلم الفردوس كلها ابكيفه
بيته صارت و الملائك ضيفه
اله اعظم جائزه امن الله الكريم
رابع ابواب الدعاء تصنيفه

امنصب امن الباري مسلم
عل الحوائج بيده يختم
( اقضي حاجة كل محب) رافع شعاره
هسه گبه و للگمر تنطي الاناره
يحيا مسلم .. يحيا مسلم

……………………………………………………………


الظل وحيد وليل وحشه ادروبه
بوجهه كل السلف اغلگ بوبه
وهسه من كثر الألوف التعتنيه
الخدم بالحضره اصبحت متعوبه

السال للغربه دماء ادموعه
اعليه شربة امن العذب ممنوعه
وهسه دمع الشيعي طاسة ماي صار
المسلم وكل عين صارت طوعه

نقش والشريان حافر
عالگلب اسم ابو طاهر
انت لحسين الثقه و راعي السفاره
وهسه گبه و للكمر تنطي الاناره
يحيا مسلم .. يحيا مسلم

……………………………………………………………


وينها الدارت عليه ابخيلها
سيوف كوفان اليدوّي اصليلها
همه گوم الأمرو ابصلب المسيح
وهو عيسى ايرتل بإنجيلها

الحفروا الحفره ابغدر تدبيرهم
لجن ما حسباها صح تفكريهم
موش للعمه علي الحفره تصير
صارت الهم و اندفن طاريهم

الاسد منه الغابه حذره
حتى لو طايح ابحفره
دوم رافع راسه يعلن بنتصاره
وهسه گبه و للگمر تنطي الاناره
يحيا مسلم .. يحيا مسلم

……………………………………………………………


امن القصر ذبوه عبيد الساسه
ظنوا اعل الگاع طايح راسه
للسماء السابعه صاعد شموخ
اتعطرت جنة عدن بنفاسه

الجبل عالي و ثابت ايعرفونه
مستحيل ابحبل و يجرونه
هو جرهم و صّلاهم للجحيم
و سقر گالت شكرا و ممنونه

ما يطيح الخله باله
ابخدمه حسين وعياله
عالي كلمن للعقيله اتفور ناره
وهسه گبه و للگمر تنطي الاناره
يحيا مسلم .. يحيا مسلم

……………………………………………………………


مثل مسلم منهم اتأذينه
اتفجرينه اشكثر و انذبحينه
لچن منصورين باجر لا محال
بروسهم تسحگ رِجل مهدينه

الله گال ابـ آيه من أكتابه
المهدي يورث هالارض و اصحابه
القارات السبعه كلها اتظل تصيح
آه يحسين و عظيم امصابه

تسقط اعروش النواصب
ويعتلي صوت المواكب
الخدم دوله وعالدول الها الصداره
وهسه گبه وللگمر تنطي الاناره
يحيا مسلم .. يحيى مسلم

……………………………………………………………
✍️ ( سيد خضر الزاملي )

قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4

"""" """" """"
ياوريثَ المُصْطفى دونَ الورى
لنْ نُوالي غَيركَ مهما جَرى
عَقَدَ القلبُ الوَلاءْ   أنتَ خيرُ الأوصياءْ
لن نُوالي غيركَ مهما جرى

يا أهم شخصية عاشت من بعد طه الرسول
بطل الإسلام الأوحد إنته يافحل الفحول
وانته يا مولاي كامل حسب ميزان الأصول
تمتلك روحية عذبة واسحرت لبّ العقول
خصَّكَ اللهُ تعالى بِصِفاتْ
دونَ طه وامْتَلْكتَ المَكْرُمات
وإلهُ الكونِ شاءْ   أنت خيرُ الأوصياءْ

إنته يالمولى مثال العظمة او رمز الكمال
شانك اسمى اوشَرَفيتك حولها ايدور الجمال
ياعلي او أعجوبه وصفك جاوزِ احدود الخيال
ذايب ابحب الإله اوأمرك انعرفه محال
أيها المَكسو بهاءاً أقْدَسا
ويُضاهي أَقْمُراً وَأَشْمُسا
كاشِفاً أمرَ الخفاءْ  أنت خيرُ الأوصياءْ

مَلَكوتِ الباري يُوضَحْ لو تأملنه ابعلاك
اعليك مِسحه امن القداسه وبفضل سامي حباك
إنته نَوراني الخليقه اوعالوجود ايعم سناك
ياعقل يگدر يفسر سرك اويدرك مداك
يانزيلَ العَرْشِ سبَّحْتَ البَديعْ
قبلَ بدأِ الخَلْقِ والكَوْنِ الوَسيعْ
لَسْتَ مِنْ طينٍ وماءْ  أنت خيرُ الأوصياءْ

ياعلي عمرك بذلته اوغايتك هَديِ العباد
تدفع الأمه الوعيها وتمضي بدروب السداد
يامُرَبي البَشَريه بالسلم لو بالجهاد
حكمتك حكمة نبينه اومثله تحرص عالرشاد
يامُحيطاً شامِلاً صِدقَ الهدى
ساطِعَ المَجدِ بآفاقِ المدى
وَأَتى فيكَ الثناءْ   أنت خيرُ الأوصياءْ

ياعلي نستوحي منك منهج العز والشرف
إنته قُدسِيِّ ابكيانك وبأجل وصف انوصف
چان مشروعك رسالي اوبين الاجيال انعرف
شفنه تاريخك بطولي اومحد ابهاي أختلف
أَنْتَ قُطْبُ الحَقِّ والنُّورُ المُبينْ
واهبَ الأجيالِ أَسْرارَ اليَقينْ
وَلَكَ نَمْضي فِداءْ  أنت خيرُ الأوصياءْ

من سبات الجاهليه إنته صحيت البشر
كل تعاليمك عظيمه واتركت أعظم أثر
وانته سنيت الفصاحه والبلاغة ابكل فخر
واردة أقوال عنك زاخرة ابأسمى العبر
(وَسلوني) شاهدٌ ياسيدي
وَبِنورِ اللهِ هادٍ مُهٌتَدي
يامُغَطَّىً بالكِساءْ   أنت خيرُ الأوصياءْ

أعظم اعياد العقيده عيدك ابلايه اشتباه
وإختيارك للولايه كان من أمر الإله
توجك ربنه بعِصِمته وانته محروس ابحِماه
واحنه للبيعه نؤدي او مايغيرنا اتجاه
ياوَلِيَّ اللهِ في طَيِّ الكِتابْ
حُبُّكَ المُنْجي إذا جاءَ الحِسابْ
وَعَلى الحَوْضِ اللقاءْ  أنتَ خيرُ الأوصياءْ

أخوكم

خادم أهل البيت عليهم السلام

حامد البدري

١٤٤٥ - ٢٠٢٤


قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4

[[ ساقي العطاشى ]]



موشح نجفي

لأبي الفظل العباس ع







من وصل عـباس يم ماي النــهر
ما شرب گطره غرف ماي وشمر

◾◽◾◽◾◽◾◽◾

گله يا مـاي النهر عنـــــدي كلام
ليش ما تزحف زحف يم الخيام
هناك اريد اتروي اطفال وامـــام
كل طفل من العطش گلبه انفطر

◾◽◾◽◾◽◾◽◾

ما اشربـــنك يــــماي العلگــــمي
والله لو فـــــوگ الترايب انرمي
ما اضوگـك قسم گبل امخيــمي
خاف ما تدري انه عباس الگمــر

◾◽◾◽◾◽◾◽◾◽

شلون اشربك والحسين بلا شرب
ما وفه للخـوه باچــــــــر انكتــب
انه عندي حسين احله امن العذب
وخدمتـه ليـه تراها اكــبر فخـــــر

◾◽◾◽◾◽◾◽◾◽

امي من ربــتني رضــعتني وفـــاء
وگالت اسمك ينكتــب يم الســماء
بشرط تفدي حسينك بطف كربلاء
وتبقى خالد يبني بطـــول الدهـــر

◾◽◾◽◾◽◾◽◾◽

اتلاطمت جرف بجرف من الرعـب
ولون ماي المشرعه كــــله انـــگلب
ما شـــرب عـــباس مـــنه ما شرب
وما حنه يمه ابو فاظـــــل ضــــهر

◾◽◾◽◾◽◾◽◾◽






         عبد العليلـه
✍حيدر ابو كيان الفاطمي

قناة الرجوع الى الله    @h_ameer1
قصائد منبريه مكتوبه  @h_ameer2
قصائد منبريه مكتوبه  @h_ameer3
قصائد نسائية مكتوبه  @h_ameer4