ء#اولاد مسلم بن عقيل
للدكتور رضا حامد الحسّاني



ســـــلبَو اخيام العقيله و عاينتهم
شردَو الطفلين حــسره من شفتهم
همّه للـمجهول ركضَو واللـه صعبه
مثل ابوهم خــلّصوهه الدنيه غربه

***
آه يـــــــــاجرح اليتيم اشلون يبره
لابد ايخلّص حـياته حسره حسره
لـــــــو نظرته خاطرك لابد يكسره
او جبت طاري ابــوه اتخنگه عبره
اشـــــلون باولاد السفير الحار بامره
الموت يتبعهم صــبَح والدنيه خطره

ابيوم عاشر مـــــــن محرّم هاليتامه
شردَو امـــن الخيم همّه ابلا سلامه
واليتيم الدهر بجروحــــــــه يعذبه
مثل ابوهم خــــلّصوهه الدنيه غربه

***

وابتدت قصّتهم الصعبــــه الطويله
والحياة ابــــــــــلا أبوهم مستحيله
والجسوم امن التعب صارت نحيله
لاظعن عـــــدهم ولا عدهم عقيله
والغريب اشــــــلون بالله اينام ليله
الدنيه مـــو حلوه تراهه ابلايه عيله

مــــــاكو عدهم لا گرايب لا كفاله
والزغير اشـــــــلون يهدأ لحظه باله
يستمع مــــــن الرعب دگّات گلبه
مثل ابوهم خــــلّصوهه الدنيه غربه

***

ظنهم امــــــن الضيم خلصَو الوزيه
عـــــــذّبتهم آ يـــــــگاع الغاضريه
عبد لبن ازياد شـــــــــاهَدهم سويه
الدمعه مــن دم عله الخد لَنهه جريه
إحـــــــــنه اولاد الوصي خير البريه
واشتعل هـــــــــذا الليعن ابنار غيّه

تعبَو امـــــــن الطف تراهم عذّباهم
صَب عليهم حـقده كلّه من لگالهم
تگظي نكبه وتتّبعهه اشــــلون نكبه
مثل ابوهم خـــــلّصوهه الدنيه غربه

***

أُمَر يسجنهم ســــويه ابلايه رحمه
وجـــرح ابوهم بالسجن قرّر يلچمه
ظـــــلّو ابظيم العذاب و دنيه ظلمه
ومـــــــــابقت بشفافهم آثار بَسمه
ســـــــنه ظلّو بالسجن ياويلي همّه
گـــــــــــالو السجّان خلّينه نكلمه

إنته هم تعرفنه لــــــو لا رد علينه
إحنه جدنه الوصي حيدر وانولينه
يــــاضمير الصاحي ناگاه و نعَتبه
مثل ابوهم خــلّصوهه الدنيه غربه

***
مــــــــن عرفهم قدّملهم إعتذاره
وفتح بـاب السجن وادموعه اتّجاره
ابليل طلعو والگلب يجهل مساره
ويدري طيف الموت باچر بانتظاره
للفرات اتعنّو و نـــــــــامَو جواره
كتبو ابدمعة مصايبهم عـــــــباره

يافرات احفظ شكلنه صد وضعنه
بـاچر انموت اعله جرفك تنظر النه
اشـــــلون نامَو وابگلبهم أكو رهبه
مثل ابوهم خــلّصوهه الدنيه غربه

***

مرأه يم النهر نَومى عــــــــاينتهم
منهو انتم جــــاوبو من ناشدتهم
لسيّدتهه بالعجل تالي خـــذتهم
ابكل حفاوه وابدمعهه استقبلتهم
قبّلت اقدامهم مــــــن شاهدتهم
خـــــدمت الطفلين هيّه و دلّلتهم

نامُو يالطفلين نامـــــو فدوه الكم
انتو صــــح ايتام لكن آني اُمكم
ازغار واتحمّلَو كـــل هالظلم عجبه
مثل ابوهم خـــلّصوهه الدنيه غربه

***

اتشابگو كــل طفل منهم چنّه ورده
ايشم باخوه ودمعة اعيونه اعله خدّه
شـــفت ابويه بالحلم والهادي عنده
ايگلّي يبني تفرج و مــــاتبقه شدّه
الظالم لبيته اعتنـــــــه وبنار حقده
و مـن سمعهم عرف بالطفلين عنده

ابچفّـــــه يا وسفه سطرهم چتّفاهم
عالنهر تالي ذبحهم مــــــن خذاهم
كـــل جسم بالنهر ظل يشتكي لربّه
مثل ابوهم خـــــلّصوهه الدنيه غربه

***
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

#مسلم بن عقيل

للدكتور رضا حامد الحسّاني




أدّى الاَمانه باحساس مسلم
اوّل حُسيني يــــاناس مسلم
ابــو الروح الفدائيه ابو الغيره الحسينيه

***

هذا الحُسيني الصدگ واصل الغيره
گال آنه احب احسين ما احب غيره
للكوفه راح وبيهه صــــــــار ابحيره
ومايدري ويــــــن الوجه راح ايديره

أهل الغدر من غدروه مسلم
ثابت بقه و مــا هزّوه مسلم
جهادي و مُخلص النيّه ابو الغيره الحسينيه

***

مسلم إذا ينذكر نذكر طــــــــــــوعه
سإلته و جـــاوَب واصبحت مفجوعه
مــــن العطش والتعب حاني اضلوعه
والونّه ونّة هــــــــــــاشمي مسموعه

گالتله يـــابعد الروح مسلم
آني ابخدمتك مَتروح مسلم
هلا بالگاصد اعليّه ابو الغيره الحسينيه

***

مــــــاتغفه عينه اعله الظُلم ما تغفه
متعنّي بامر احـــــــسين راح ابلهفه
شاف الضماير مَيته كـــلهه و صَلفه
صــاح آني مسلم وآني احب الكلفه

ابسوح الملاحم مــعروف مسلم
أسحگ على هام الخوف مسلم
الأطبهه يعني مگضيه ابو الغيره الحسينيه

***

مــــــن قاله الباب اخذ مسلم عزمه
والنِعم مـــــــن هالفحل هوّه و عمّه
واشگـــــد عدد جيش العده ميهمّه
عنده المهمّ احـــــسين فدوه لإسمه

نادي عليّاً لــــــو صاح مسلم
معناهه طــــارت أرواح مسلم
صرخ صرخه ولائيه ابو الغيره الحسينيه

***

حـــــــاطوه من أربع جهات الاشرار
وامــــن السطوح اعليه يرمون احجار
مسلم أبــــــــــد ما لان مثل الكرار
سيفه غضب واعيونـــــه تتجادح نار

يتبختر ابچفّه السيف مسلم
صاحو حقيقه لو طيف مسلم
وِلانه ابروح ثوريه ابو الغيره الحسينيه

***

أخـــــــــــــــذوه للطاغي و تمنّو ذلّه
مرفوع راســــــــه و مــــــاقبل ينزله
والناس صـــاحت چنّه راعي الحمله
إسلوبـــــه واصراره و كلامه و شكله

گلّوله شتريد الحـين مسلم
گلهم وصيّه لحسين مسلم
إمامي وساكن الريّه ابو الغيره الحسينيه

***

واعــــــله القصر خلّوه واللـه ايعينه
صـــد للحُسين ودمعه يجري ابعينه
مسلم غريب ايسلّم اعلــــه احسينه
مــــــــــــا ساوَم لآخر ثواني بدينه

من القصر من شمروه مسلم
ذلهم وابــــــد ماذلّوه مسلم
صُبَح ثوره جهاديه ابو الغيره الحسينيه

***
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

نعي ليلة اولاد مسلم عليهم السلام


****"*
ذيج المسيه وظلمة الليل
ومصاب عاشر يهدم الحيل
راحو يتامه بحافر الخيل
وايتام ظلت بس العويل
دورت ما بين المجاتيل
مامش خبر لامنهم اثار
ومدوهنه محتاره بالصار
احترگو گلت من شبت النار
لو راحو بنص البراري
آه اعله هضمي وذيج ناري
فراك الولد بيه نار ثاري
ظلمه تصير خلافه داري
وعليه دمع العين جاري
عطشانه اظل ليلي ونهاري
اليعطش اعله ابنه بيش يروه
يوليدي يابو رسوم حلوه
دلالي بفراكك تلوه
وبنارك وبعدك تچوه
لاماي يرويلي دليلي
يايمه ريت انهدم حيلي
ميته ولا ميت تجيلي
مفگود مدري بيا ثنيه
يمه الدهر وشسوه بيه
خلاني اون صبح ومسيه

وبعدها توجهت نحو السيده زينب عليها السلام
وكأني بها تسألها

من هجمو علوج ال اميه
اعله خيامنه ذيج المسيه
فرو يتامه اثنين اليه
هجو لعد صوب الثنيه

تجاوبها السيده زينب عليها السلام
يخيه الطف شده بالي
چومه جروح خلالي
مصاب حسين والتالي
مصاب الصار چفالي

تعيش شلون والميت كفلها
هموم الچانت عليه كفلها
بس واحد لها اللوعه كفلها
يحلها بلا تعب وبلا رزيه
........
يحلها بساع ابو فاضل واليتام
كمر جان بسمه ليلي واليتام
راح وخلف همومه واليتام
هوت وتطشرت فوك الوطيه
..........
من ذا لأطفالي يجود ويعتني
ومضوا الى دربِ المنية حُسّرا
منهم بأسياط الدعية موته
وعلى رمال النهر آخر ينحرا
فكأنهم ولدوا ليوم مصيبة
وكأنهم ولدوا ليفدوا حيدرا
***
ونسألكم الدعاء والتوفيق

لخادم ال محمد ع
الشاعر حيدر كاظم الساري
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4

تحزم بزود ابو فاضل مسلم وطب ع العده
شما يهز سيفه يصيح اسمه ويضل يردده

ترس كوفتهم رگب خله دمها اعله الركب

رد ابو ابراهيم جيش وهو چان لوحده
……………

تحـزم بزود ابـن عمه وصــال بيهــم صولته
شچخ رمحه اعله الصدور بروسهم دگ رايته
مثـل حمـــاي الحمية الكوفه شهدت هدته
جــاهم بــإسـم الكفيل وجاب سيفه ورايته

فات بيهم فوتته. مشّة غصباً چلمته

رد ابو ابراهيم جيش وهو چان لوحده

……………


فــات بيهم ايـــة الله الدارس بحوزة عـــلي
استنبط احكام الشجاعة من علم ذاك الولي
علمــاهم على الگــاع شلون بالـــدم تنملي
گــال هـــاي الزلــم كلها اليوم اوليهم ولي

ونعم منه ومن هلة همة اساس المرجلة

رد ابو ابراهيم جيش وهو چان لوحده

……………

صاح ماتدرون چنكم شگرب انه من الحسن
الچان صگار الرجـال الجيشكم يمه نطحن
العگـــر ناگتها الخبيثة الگاطع احبال الفتن
ابـن عمـي وزودي منه وراح اشهدنه الزمن

راح اعيد امجاده الحسن شيخ السادة

رد ابو ابراهيم جيش وهو چان لوحده

……………

هلهلت طوعة وتهووس گامت لصولاته
هــلا بــراعيهـــا الكلافة المايثن طگاته
المـــايصدون اعله عينه نرعبوا بنظراته
ثگلت ايده اعله الرجال نوجعوا بسطراته

الشايخ اعله ارجالها البالعرك خيالها

رد ابو ابراهيم جيش وهو چان لوحده

……………

گــلهــا ياطـوعــة تبـاهـــي انه ابن خلاسها
عمي ابو الحملة الچبيرة الخنگ جر انفاسها
اورثت طگاتــــه الثگـــال البيها گاطع راسها
الكوفة خافن عوجه اهلها اليوم اعدل ساسها

اليوم اذريّهم رماد اليوم أتوبها العباد

رد ابو ابراهيم جيش وهو چان لوحده

……………

حسين ودانـي عليها وگلـي جــر اذانــها
ذولة زمرة عصت امري تمادت بطغيانها
عروشهم هـدهـا عليهم زلزل بكوفانــها
الكوفــة سويهـا خرابة ادفنهم بتربانــها

خوية هد قصر الچبير وبس علي گلهم امير

رد ابو ابراهيم جيش وهو چان لوحده

……………


خادم ال محمد
محمد عبد الساعدي
قناة الرجوع الى الله    @h_ameer1
قصائد منبريه مكتوبه   @h_ameer2
ملا ابو أمير الفاطمي   @h_ameer3
روح وريحان   @h_ameer4