قصائد الفاطمية القصيدة الاولى ٢٠٢١

كل شي يلمع بالسمة
مــار بســاعـة ضــمه
ورتوه من نور وجهج فاطمة

كلـــها تنخـاج
كلـــها بحماج فاطمة يا فاطمة

~~~~~~~~~~~~~1
بزودج العـالم مشـه يا كبـره زودج
كلشي يضوي تخلد بسـاعة خلودج
اللي يشعر بالشمس يشعر وجودج
لان الله الشمس سـواها عله مودج

واللي ميحس بالشمس
أعمى كلبــه ومـا يحس
وما يميز أيامه باجر من أمس

نتهيه لــولاج
كلـها بحمـاج فاطمة يا فاطمة
~~~~~~~~~
أنتي وجه الله ليشوفه أعلن جنونه
نورج امـلك ألسـمه لبيـتـج يجونه
عالنــجـم وزعـتـي نـورج يالحنونه
والكمر مــن لون وجـهـج اخذ لونه

نورج أنتي شكد مهم
بدونــه نشعر بالعدم
والكمر ما نعرف اسمه و لا نجم

نعيش بضواج
كلــــها بحماج فاطمة يا فاطمة
~~~~~~~~~
أنتي زهره وكل زهور الدنية دونج
أنتي لون الجنة جا شيوصفه لونج
أنتي أحله من العرش حتى بشجونج
الجــنــان تجســدت كـلها بجفـونج

والجـنــان تبخترت
وبـضــواج اطـهرت
وبحروف أسمج يزهره تعطرت

ظلمة لولاج
كلها بحماج فاطمة يا فاطمة
~~~~~~~~~
أنتي حال الله ترى وياعضمه حالج
منـين ابدي وانتـهي أني بخـصـالج
نورج أمبــين يمولاتي بخيالج
يا جمـال يسولف بحضـرة جمـالج

واعد البـاري الصمد
وحاشه يخـلفله وعد
كال مــا اخلق شبيهج للأبد

بيده ســواج
كلها بحماج فاطمة يا فاطمة ~~~~~~~~~
ثمنطعش عمرج يزهره وكلشي صرتي
والله لو عشـــرين عمــرج جه نعبــدتي
رادوا يطـــفــون نـــورج ونعــصــرتي
الكسر ضلعج مـــــــات لا مو أنتي متي

شــالـج بأيــده العرش
طير محمول عله عش
للسماء السابعة ابلايه نعش

ويمه خــلاج
كلها بحماج فاطمة يا فاطمة

~~
حيدر نوري الاسدي

قصائد الفاطمية الرواية الاولى ٢٠٢١

مصحف أنتي بلايه تفسير
وأفكاري يم أوصافج تحير

يا فاطمة يا فاطمة
~~~~~~~
الله من خلق نورج خله أوصـــافه بوصـافج
بكل خطوه الي تمشيها وياج ولحظة ما عافج
الشمس والكمر ونجومه وكفهن على جتافج
اذا عنـــج يبــاعدهن يطفن كـلهن خــلافج

كلشي يضــوي بنورج ينير
وأفكاري يم أوصافج تحير

يا فاطمة يا فاطمة
~~~~~~~
ربج مــا خلق مثـــلج ولا يخـــلق وتدرينه
الوحيدة أنتي مخلوقة من تفاحة مو طينه
بيده صاغج الخـالق وبعيــنج وضع عينه
من وجهه خلق وجهج وخلاج التمثلينه

حيدر بوجــهج لكه الخـير
وأفكاري يم أوصافج تحير

يا فاطمة يا فاطمة
~~~~~~~
شكبرج وشكبر قدرج الكون الاجلج تكون
سبعة بأسمج ادحاهن والسبعة بأسمج ارتفعن
لمن ضلعج اتكسر اوتاد السمه هتزن
لو ما حيدر يكضهن سجيل بغضب مطرن

ويوم القيامة يومج يصير
وأفكاري يم أوصافج تحير

يا فاطمة يا فاطمة
~~~~~~~
صحيح ثمنطعش عمرج بس افعـالج چبيره
قلمي شما كتب عنـــج احســـه واگع بحيره
ما سامع مره بكدج الكـــون بمغـــزل اديـره
ولو رتي السـمه تنـــزل تنــزل يمـــج ازغيره

كل جبـيـر كبـــالــج ازغـير
وأفكاري يم أوصافج تحير

يا فاطمة يا فاطمة
~~~~~~~
جبـريل بعظم شــأنه القريب اليملك القدره
بكل شي يعلم ويــدري ومــا تخـفه عليه ذره
لجن هذا العلم كله يخدم خادم الزهره
زحمه نقــارنه بفضه البحر منـقارن بقطره

يردد اســـمج لو نوه يطير
وأفكاري يم أوصافج تحير

يا فاطمة يا فاطمة
~~~~~~~
يورده الما خلص عطرج يمحلاهن حروف اسمج
تشتم هوى الوادم بس انتي الهوى يشمج
بخرتي الارض كلها بيوم اللامست دمج
حسراتج عطر بيهن رغم حسراتج اتألمج

شـما امدحــج بيه تقصير
وأفكاري يم أوصافج تحير

يا فاطمة يا فاطمة
~~~~~~~
حيدر نوري الاسدي

قصائد الفاطمية الرواية الاولى 1443


صفاتج ماهي مال ثمنطعش عام
لو ما انتي مـاصــخ صـار الاسـلام
--------------------------1
زغيره بس چبيره هواي شخصيتج
متعدي الســماوات السبع صـيتج
حنيـنه ويــاهو يوصل ربــع حنيتج
الكوثر منبــعه وتحـليته مـن بيـتج

السمه بكدها تجي وبيتج تنام
لو ما انتي ماصخ صار الاسـلام
--------------------------2
من اسولف بيج فكري رتاح احسنه
شحـلاته الحجي العنــج يم المحنه
احجي بكل يقــين ومــا اضـن ضنه
انتي الجنــــة مو تفــــاحة من جـنه

منـــج مـــا اكو حتـى بالاحــــلام
لو ما انتي مـاصــخ صـار الاسـلام
--------------------------3
من المـــاي كُل حـــيٍ يخـلـقونه
بس الشيعي مــن نورج يصيغونه
صيت المـــاي لونه الما يوصفونه
ما يــدرون من لـونـــج اخــذ لونه

بلونج الله شنهي مخـلي وشضام
لو ما انتي مـاصــخ صـار الاسـلام
--------------------------4
شبعتي اليتـــامه بخبــزت وليدج
متعوده اليتــامه تاكل مــن ايدج
الفكد امه الوحيدة انتي اليريدج
مو بحضــانــج تنيميــنه بوريدج

يا نسمت محــنــه بريت الايتام
لو ما انتي مـاصخ صـار الاسـلام
--------------------------5
الهظيمة القرروا ضلـعج يكسرونه
الكون بكد ألــج مخــلـوق يـدرونه
والاكثـــر بعـــــد لاجـــن ينــكرونه
الهوء لو ما رحمـــتج مـــا يشمونه

الحق يدرونه انــتي وهـــما ضلام
لو ما انتي مـاصــخ صـار الاسـلام
--------------------------6
مثـل الله انتي لجـن محـد يطــوعج
بأمر مٓن من اجوج وطفوا شمـوعج
شيــــكل الله كل من نـــزل دمـوعج
الف لعنه على ذاك هشم ضلوعج

بس انتي الصحيـح وكلـهم اوهام
لو ما انتي مـاصــخ صـار الاسـلام
---------------------------
حيدر نوري الاسدي

لما يعرفـج مــات كافر
دوره بالطف دور حافر

يا زهراء يا زهراء
~~~~~~~~~~~~~~1
يا اول صبح ما يبدي من ليل
ويا اخر ضوء يشع أعله ناسه

يا نسمة هوى الما شمج يموت
واليشهك وجودج عالي راسه

ما يملك احساس الما يحس بيج
رمل مو حجر يطلع تالي ساسه

مو بس ناس يمج طخت جبال
ألج و لأهلج تلوك الرئاسه

الما ركعلج ماهو شاكر
دوره بالطف دور حافر

يا زهراء يا زهراء
~~~~~~~~~~~~~~2
عفيفه وماكو منج . منهم هواي
شريفه و الظمائر مو شريفه

ترى معرف طبعه الما يواليج
على دك الطبل جدمه خفيفه

جفه عالرسول يكاطف احجار
لِيترضه على افعال الخليفه

لما نصبج حجة ويقتدي بيج
مسقط راسه ردهات السقيفة

وأن ....هم يكول باجر
دوره بالطف دور حافر

يا زهراء يا زهراء

3~~~~~~~~~~~~~~~~~~
لما شافج شمس ما صدك يشوف
مو اعمه النضر اعمه البصيره

يشوفونج فقيره وبيدج الكون
جا خلصتي عمرج ع الحصيرة

صحيح زغير شكلج انتي قران
لعينه زغيره ميشوف الجبيره

عبيد الناس كلها لخالق الناس
وعند الله الوحيده انتي الاميرة

الخالفج لا ماهو طاهر
دوره بالطف دور حافر

يا زهراء يا زهراء
~~~~~~~~~~~~~~4
يا كشخت محمد ياهو يعلاج
صعد جم سمه طه حتى جابج

اذاً قبله انتي يم الله يزهراء
وشتاقيتي أله ومتي بشبابج

الجنه ليش ما شافتها العيون
لان الجنة متحجبه بحجابج

الما دكو الباب بدفعت الباب
ما يدرون بالباب الرحمة بابج

والحرك باب المفاخر
دوره بالطف دور حافر

يا زهراء يا زهراء
~~~~~~~~~~~~~~5
ربج من بنه سبعة سماوات
واراضينه السبع لمن بسطهم

كلج ذني بيدج يأم الحسين
وملائكتي ألج خدام كلهم

والاكثر بعد من ذني الاثنين
ابوج وبعلج لاجلج خلقهم

لو ما انتي موجوده على الكاع
والله ثنينهم محد عرفهم

لما اخذ حجي المنابر
دوره بالطف دور حافر

يا زهراء يا زهراء
............................
حيدر نوري الاسدي

ما خُلِقَت ارضٌ ولا سَماءْ إلا لأجل فاطمه
ما خُلِقَ الماءُ ولا الهواءْ إلا لأجل فاطمه

قدْ فاز مَن والاها
وخابَ مَن عاداها

هي فاطمه هي فاطمه
.................................
الشمس ونجوم السمه وصيت الكمر
عاشرن فاطمــه وصـــــــار الهن قدر
والارض والبيــــها عــــايش والحجر
كلشي والاهـــــا بمــــوالاتــــه فتخر

افتخرَ الــــذي لها يعودْ فهيَ إمامُ المفخره
وجودُها قد مَلأَ الوجودْ فهي إمام المفخره

مَن الذي يعـــلاها
وخابَ مَن عاداها
هي فاطمه هي فاطمه
.................................
وي كعدتها الصبــــح يبدي الصبح
لكل جــرح ام الحسـن بلسم جرح
الما يصح عند الخلك عـدها يصح
ألكلشي ماصخ صارت الزهره ملح

فأصبحت بنتُ الهُدى الرقيبْ بالكونِ وهيَ العالمه
فقسّمت لِكُلِّ حَيٍ نَصيبْ بالكونِ وهيَ العالمه

تُعطي لِمَن رَجاها
وخابَ مَن عاداها
هي فاطمه هي فاطمه
.................................
الله من طينتــها مــــا خــــالق تره
مــــلك هي وزحمـــه تســــمه مره
من ســـواد عيونــها يشـــع الضوه
ومن زفير انفـاســها نشــــم الهوه

بِنُورِها أبصـرَتْ الظُنونْ فهيَ أساسُ كلِّ شيءْ
بِعِلمِها قد دارَت القُرونْ فهيَ أساسُ كلِّ شيءْ

أبدعَ مَن سَـــوّاها
وخابَ مَن عاداها
هي فاطمه هي فاطمه
.................................
مـــن ضواها تكونت جنـة عدن
عدن ضلمه بـلا وجود ام الحسن
الحور من دمعــة هيــج تفصلن
الجنـان السبــعة بيـــها تكشخن

لولاها ما سكنوا بها الجنان فأصبحت بها ضاويه
وانتشـر بأرضــها الامــــان فأصبحت بها ضاويه

الله قـــد جــــلاها
وخابَ مَن عاداها
هي فاطمه هي فاطمه

.................................
والله لو ما فاطمه شاخ الضمه
خلق مايــه من سوالف فـاطمه
عايشـين بخيـرهـا ارض وسمه
عزبت الله ضــــلــوع مهشـــمه

كريمةٌ بالمالِ والبنَونْ للدِّينِ مُحسنُ قَد فَدَت
لِحالهِا قد بكَت العُيونْ للدِّينِ مُحسنُ قَد فَدَت

طوبى لِمَن ينعاها
وخابَ مَن عاداها
هي فاطمه هي فاطمه
...................................................

خادمكم حيدر نوري الاسدي

ضلـعج ملح. بس الغيـور يشيـله بجروحه
مو اي جرح. محلاته جرح الينزف ملوحه

والعنده غـيـره
واضح مصيره يا زهراء يا زهراء

--------------
يسر لجمـاتي وآهـاتي
بيــدج كلشي مـولاتي
لو مــا ضلعج و كسره
تموت بعـيني دمعاتي

ميت والبجي احياني
ومصـابج وين وداني
باول دمعه الـج نزلت
عرفت نفسي غيور اني

الغــيـره رزق. بس التريـدينــه ترزقينـه
والدمعه حق. يبجيها الج بس التقربينه

ترزقينـه حيره
واضح مصيره يا زهراء يا زهراء
--------------
الخــلاج بوسط روحه
بضلعج تكشخ جروحه
ويرتــــاح بوجــع كلبه
لصرتيــله سبب نوحه

ليسلب راحتــه لحالج
يهنــيـــالـه سكن بـالج
شكبره لعيـنـج تشوفه
بدمعتـه واكـف كبالج

وكفت عبد. ما يرمش اكبالـج رمش عينه
وما يبـتـعد. عن مجلسج لو جارت سنينه

صرتيـله ديـره
واضح مصيره يا زهراء يا زهراء
--------------
يزهره لمــا بجت عينه
ودمعته مرافكه وونيه
مــــا لجمـــنه آهــــاتج
من صحتي الولد وينه

يفضه محــسن شلونه
ذبـل لو مـــا ذبـل لونه
بشريـني عــــدل ابني
فتح بعيـــونج عيـونه

مو رافضي. الما يلعن الكسروهن ضلوعج
بحرك العبي. أمشــــارك النـزلــهن دموعج

لميت ضـمـيره
واضح مصيره يا زهراء يا زهراء
--------------
النضيف يشوفج بكلبه
يضيع ويرجــع الـدربه
عليج يكربه احـسـاسه
وحيد وما يحس غربه

اليخدمج يرتفع صيته
يمـوت بمجلس امنيته
وبقت يمـــج يمـولاتي
كل واحــد يجي بنيته

محله العمر من يكضي وي ألكلــها حنيه
مـوتت كمر من يطفه حتمن يرجع لضيه

لشـافج جبيره
واضح مصيره يا زهراء يا زهراء
--------------
الما شــالج هوا بريته
ميـــته بكلــبه حنـيته
يشكد وانتي محروكه
الاهم مو انتي عافيته
َ
النـــار مجلــــبه بثوبج
واليحرك ركض صوبج
ويفتي الما عرف اصله
السبب يافطمه اذنوبج

وبــلا خجل يفتي الزنيم وينكر العصره
بحجة اجل كلــها تموت وماتت الزهره

بنيـته الحقيرة
واضح مصيره يا زهراء يا زهراء
--------------
حيدر نوري الاسدي

ما عطـــشـانه بس مشــتـاكه للماي
اشوفن بي اخوي الجان اللي فياي

قبل لا تغــــــــمض العين
اريد احجي وي الحسين

ما عطشـانه بس مشتـاكه للماي

- - - - - - - - - - - - - - - - - - - -
اذا مـات الحنين تموت المحنه
اخت ومـفــاركه ولموتي اتمنه
ماني بعــازت المـــاي واشربنه
انـه بعازت اخوي المنحرم منه

من كد ماعطش من صوته فحطان
وحق جدي يكــلـهم أني عطشان

وحــــده وهمــــه سبعـين
اريد احجي ويه الحسين
- - - - - - - - - - - - - - - - - - - -
شأسولف عن عضيدي من دنو داره
فزع يزحف زحف بس لحكته الغاره
المعسكر كله هـــــد بزغـــاره وكباره
ذاك برمحـــه يطــــعن ذاك بحجاره

يكوم وبالحـجر ينصـــاب ويطيح
وي كل طعنه اخ اسمع من يصيح

امـيــــز صــــوت الحنين
اريد احجي وي الحسين
- - - - - - - - - - - - - - - - - - - -
من اشوف الماي اشوفن ركضت سكينه
خذتله الماي ما تدري هده ونينه
بنص الموتــه تنشد والــدي وينه
قبل لا يغمض ارد اتبـــاوع لعينه

لكته محاوطينه وصدره ينـداس
ورمح متعالي يمه وكاشخ براس

الشمر كلــــها شتريــدين
اريد احجي وي الحسين
- - - - - - - - - - - - - - - - - - - -
اكو سوالف هضيمه تنحجي هضيمه
وي حـز نحـر اخـوي حتركت الخيمه
شردنه من الخـــيم كل واحد بضيمه
عن لا ننســـبــي اطشـــرنـــه بالهيمه

كل هذا الجره ولا شوغت النوك
نطلع سوك صرنه وندخل بسوك

ننطي وجوهــنـــه الوين
اريد احجي وي الحسين

- - - - - - - - - - - - - - - - - - - -

نزلنـــه من الهــزل ليزيـــد دخلونه
لان نســون بـــين الزلـم كعــــدونه
الشامت ينعرف من تضحك بعيونه
والمـــذبوح اخـــيــه أيبـــين بلونه

القصر الضافه ألنه جروح مطيب
برموش اليتــامــه مخضر الشيب

بعــــد عــزنــــه بدواوين
اريد احجي وي الحسين
- - - - - - - - - - - - - - - - - - - -
حيدر نوري الاسدي

كريم وارد امـشي عليك عباس
اريد بـين اديك تفيض الانفاس

بضريحك موتتي تكون
وزوارك يشيعون

من صحن المحنه لصحن الاحساس
-------١
يالمغركني حنيه اجيت وبالكلب حسره
اعرفك ما ترد سائل ليكصدك خاطره تجبره
وانه جاي بطرك دمعي ومتاعي اللطمه والعبره
كل أحلامي البكلبي اموت بداخل الحضره

وي بوسة ضريحك تطلع الروح
واشوفك مبتسم وانساك مذبوح

بأديك تسدها العيون
وزوارك يشيعون

من صحن المحنه لصحن الاحساس
-------٢
يمولاي بعقيدتنه يعيش المـات بثنيتك
مو انت التسد بابك مشرع للخلك بيتك
يهنياله لهواء كلبك الحر جابته الك نيتك
بأولها وكف ضــدك وتاليــها اخذ صيتك

انه ما جعجعت بالضعن مولاي
بصحنك ارد اموت تفضل بهاي

واهلك عني يرضون
وزوارك يشيعون

من صحن المحنه لصحن الاحساس
-------٣
العمر من يخلص كبالك شمحلاته و صدك يسوه
لتطلع روحه يم روحك شني فكد الاهل فدوه
الحلوه المات يم بابك تشيله بأيدك الحلوه
وتاخذ روحه للحضره ويلكه بحضرتك مأوه

كلي ليا وكت ابقى بهل الاحلام
وانا مشتاكك وما تمشي الايـام

اخذني واني ممنون
وزوارك يشيعون

من صحن المحنه لصحن الاحساس

-------٤
الله يساعد الشافك فراكك سيدي يتعب
انه ما شايفك وبجيك شحال الشافك مسلب
اخذني لعالمك يحسين ضيف وانت المعزب
شأوصف فرحتي والماي حدر رجلينك محدب

تمن عالماي اريدك رغبتي هاي
مثل ما من عليك بكربله الماي

الموت بكربك يهون
وزوارك يشيعون

من صحن المحنه لصحن الاحساس
-------٥
العايش عمره من دونك ما يعرف عن إخيامك
الما يتنفس جروحك ما يتحسس آلآمك
والعاش عله طاريك رخيصه دموعه كدامك
ادعيلي يحقق احلامي مثل ما حقق احلامك

خيعونه اليموت بطاري الارماح
بس هو اليعيش هناك مرتاح

لا تخيبها الضنون
وزوارك يشيعون

من صحن المحنه لصحن الاحساس


حيدر نوري الاسدي

صح اربعة بس ترسو الكاع
ما خيبوا ضن امــهم اسباع
ربيتـهم وربــــاي مـــا ضاع
----------------------1
ما اميــــز بينــهم كلـهم فحول
اربعتهم كسروا ضهور الخيول

مـا تنـثـني خلفت علي
كل الشده بيهم تنجلي
والشافهم خاف

مو ولـــد ســورة زلـزله
ســـواهـــم الله لكربـله
وحط بيهم اوصاف

هذا اللـــي جايبهم خزر
وذاك اللي جايبهم سطر
وذاك اللي سياف

وسيــوفهم بيــــديهم ضيوف
شما جاعت يطعموها السيوف
السيف يــــاكل ركب لــو جاع
ربيتـــــهم وربــــاي مـــا ضاع

----------------------2
ما اخافن ولدي لو طبوا نزال
بيهم اتنومس اذا صار القتال

شاهد كــلامي الكنطره
من ينسى ذيج المجزره
بعمر النده جان

عبــــاس بالعسـكر عبث
بمداسه يسحك عالجثث
من زغره بركان

من يصعد المهره الشهم
تتخـاطف الــوان الزلم
وتشوفه فرحان

مــــا يلتفت عالـــراح والجـاي
الـمــاي راده وراح اخــــذ ماي
ينصــاع كلشي لامـــره ينصاع
ربيتـــــهم وربــــاي مـــا ضاع
----------------------3
ما عصو كلمه اللي ألردته صار
بيهم حرورة علي بالملگه نار

شمحلاها خوتهم دفو
بيضو وجه امهم كفو
أولادي الاحنان


واحـدهم اليــــمه كعد
ما ينســـمع صوته بعد
وتشوفه خجلان

وحســين بيهم مبتشر
رايــدهم لوكت العسر
للعازه الاخوان

ما يصعب عليــــهم الرادوه
لو طلب نجم سهـيل جابوه
يگضون حاجة خيهم بساع
ربيتـهم وربــــاي مـــا ضاع

----------------------4
سافروا ولدي وبقيت بلايه راي
شوكي الهم ضلم بعيـني سماي

من حمل وشال الضعن
ادمـوعي عالكاع نجفن
وبيه النفس ضاك

ما غفت عيني من القهر
والسهر شل حيلي السهر
شينيمه الاشتاك

اغبش واكعد بالدرب
بكلي خبر بيد الغرب
ذابحني فراك

مشتاك كلبي لولدي لحنان
وين اكو منهم هيج خوان
كلشي انسه بس ما انسه لوداع
ربيتـهم وربــــاي مـا ضاع
----------------------5
عايشه بين الحقيقة والضنون
فارشه الهم وانتظر ولدي يجون

هد حيلي من جاني الخبر
فكد اربعـــه كســرت ضهر
انطي الوجه وين

ما صبــــرت روحـي بعذر
كسر الضـنـــه مــــا ينجبر
بس فدوه لحسين

لو عاتبت مــــوش بقصد
يستــاهل حســــين الولد
عالراس والعين

شأنطيه ويهده بكلبي الاحساس
وناطيته كل ما عندي عباس
بجفوفه صيت الربته شاع
ربيتـهم وربــــاي ما ضاع
----------------------
حيدر نوري الاسدي

لا تطـــول نومـــتـــك يولـــيـــدي
ساعة وحده ورايح انت من ايدي

عبد الله يا غالي
عبد الله يا غالي
<><><><><><><><><><>1
بعده ما جاك الضلام
ليش مستعجل تغمض عينك

يمه مـو وكتــك تنام
هاي اخر سـاعه بيني وبينك

حـايره بــين الاكعـدك بـين نوم العافيه
امك انه ورايده اسمع جلمة منك دافيه
جلمة اليمه بلسانك وانت رايح كافيه
فزز احلامي بكعدتك وحك مهدك غافيه

خايف منين وتنام حجيلي
هاي اول نومه تاخذ حيلي

لا تجـــرح دلالي
عبد الله يا غالي
<><><><><><><><><><>2
راح اكعدك يالوحيد
كلبي ما ينطني اودعك غافي

أرد البسنك جديد
وارد اشلنك واشبع اجتافي

يمه اسمع والــدك ينشد عليك يريدك
ليش بيه تعلقت ما ترضي تفتح ايدك
قبل لا يا خذك مني خل اشم اوريدك
جنك تحس بالمنيه وللخــيم ميعيدك

يمه مـا مرتـاح كلي شمالك
جاي احسك تعرف بجتالك

جتـــالك جتـالي
عبد الله يا غالي
<><><><><><><><><><>3
عالسهم نحرك زغير
منين اجيب الماي واروي شفافك

وليدي من بعدك احير
شلون بيه حرمه لو شافك

كلشي بيك يكلي رايح ما اردلج سالم
ما تردلي جني اسمع ضالم يكل ضالم
يمه نحرك لا تطلعه كبال هاي الوادم
بضهرك شأجفي وترد لحضن امك غانم

شوفـتك مرسومة بيها الفاجعه
روحك ادري برجعتك ما راجعه

شأحجيلك عن حالي
عبد الله يا غالي
<><><><><><><><><><>4
وين اضمك والخيام
تحترك من يدنه ابوك الحافر

تاخذك مني السهام
يمه ما حسبت يوم العاشر

زغير عمرك وانت ضامي والسهام جبيره
وين بيك اشرد يغالي ليا كتر يا ديره
والله ما ادري شأسوي حيرة امك حيره
هاي اول مـره احسه الدنيه هيج زغيره

ريت نحري قبل نحرك دامي
وين اكو واحد بحلك ضامي

لا تذبح امالي
عبد الله يا غالي
<><><><><><><><><><>5
منين اجيب لحزني حيل
من ترد و مدممات هدومك

تصعد عله ضلوعي خيل
ولا اشوف مغيرين رسومك

قبل لا ياخذك مني خل ابوس جبينك
عالذبح عبد الله يبني ادعي الله يعينك
يمه لو صابك سهـمهم لا تصدلي بعينك
بهيده ون ماريده يوصل للخيام ونيك

هسه اخر كلمة اريد امروتك
كلي يمه قبل كلشي بصوتك

بس هي تحلالي
عبد الله يا غالي
<><><><><><><><><><>

حيدر نوري الاسدي

صوت مــن النهر هز الصواوين
بأبو فاضل كسرنه ضهر الحسين

طايـــح اسمع صياح
وكلهم خيي مـا طاح
يبو فاضل دخيلك يبو فاضل دخيلك
--------------------1
ما ردت اعتنيلك جرني لإحساس
خفت ألـكـــــاك ميت خويه عباس
لجن من شفت صوبك تركض الناس
اجيتك مسـرع وسبكتني الانفاس

الدرب خلصته حسرات
وخلص حـــيلي عثرات
و اسمعهم يهوسون
الكمر مات الكمر مات

فت كلبي حجيهم من اجه الصوت
واكــل لكلبي جذبـه الكمر ميموت

ويكلولي الكمر راح
وكلهم خيي مـا طاح

يبو فاضل يبو فاضل
--------------------2
اسولف ويه روحي واني الك جاي
اخذ وين الحنين شقصته الماي
كسر ضهري بأخوي الازم كفاي
انه شسويتله وهجي قسه وياي

والرايحله عباس
بي تشمت الناس
حكهم من يفرحون
طايح رفعة الراس

مو وكت الجفه ولا وكت الفراك
كوم احضن اخيك جاك مشتاك

حضني وهمي ينزاح
وكلهم خيي مـا طاح
يبو فاضل يبو فاضل
--------------------3
حكك معرفتني منين الك عين
شلن كلبي خويه هل الجلمتين
لاتذبحني بس خل يوصل حسين
يودعني واودعه وحز الوتين

اطمئن مادامي موجود
لاخيتك زينب تعود
ما ينطيني اخليك
فوك الشاطي ممدود

لا تاخذني فدوه ارجوك لا تكول
بس ابعد عليك تسحكك خيول

راح اشلعها الرماح
وكلهم خيي ما طاح
يبو فاضل يبو فاضل
--------------------4
لا تستعجل اعله الموت وتروح
اذا روحك كصيره مني اخذ روح
مو قصدي اجرحك وانت مجروح
بعد طولك اخوك حسين مذبوح

اذا تبقى انت وياي
ما توصلني اعداي
وإذا ناويها وتروح
اموت بعازة الماي

اتوكل على الله وكسر الاسهام
زينب تنتظرنه بطرف الخيام

وتمشي وياي مرتاح
وكلهم خيي مـا طاح
يبو فاضل يبو فاضل
--------------------5
يكافل لا تموت وبطل الونين
اذا رحنه منو لهاي النساوين
بلا خوان يمشن تعرف لوين
ويدخلوهن اسيرات بدواوين

صح مكطوعه الجفوف
وعينك كلشي متشوف
اذا بأسمك يسمعون
الزلم ترجف والسيوف

ترى الحمل الجبير تشيله خوان
تقبل وحدي ابقى وعندي نسوان

رد يا سابي الرواح
وكلهم خيي مـا طاح

يبو فاضل يبو فاضل
--------------------
حيدر نوري الأسدي

سوالف رقيه تمرد الروح
تحجي ويه ابوي بصوت مبحوح
ليش العليلة ويانه متروح
------------1
النـــوك تجهزن وخواتي صاحوهن
بهوادجهن شفت كدامي صعدوهن

وقبل لا تصعد رقيه
اجتني وكلها حنينه
كالت كومي يا خيه نصعد عالمحامل

رقـيـــه يا بعد جبدي
محد صاحلي صعدي
جني راح اضل وحدي حاجيلي ابوفاضل

كيلـــيه يــا عمي يوفاي
خلي العليلة تروح وياي
تدريها مو مالت بجي ونوح
ليشر العليلة ويانه تروح
------------2------------2
اجت يمي رقيه وراحت بهمه
واسمعها تسولفله وي ابو اليمه

لهســـه اذكـــرها جلمتها
العليــلة حجيلي قصتها
مـــا جهـــزتــوا ناكـــتها ولا جنها اختنه

العليلة لا تعـــوفـــوها
انه ابقى وهي اخذوها
بمجاني اختي صعدوها ولا تبقى بعدنه

اخذوها واني اتحمل فراك
بسجادتك اشتم من اشتاك
اصبر رغم ما كلبي مجروح
ليش العليلة ويانه تروح
------------3------------3
انه ادري بأبوي شكدها حنيته
موش حسين يكسر خاطر بنيته

رقيــه تـدري بهمومي
اذا جنتي بخبر كومي
اكلها محضره هدومي واكوم بحيلي كله

واروح لوالـدي بنيه
واكـله كلشي ما بيه
شتـــريد تـآمر عليه المرض من عندي وله

لتشوف جسمي ضعيف ونحيل
جدامك اوكع وامنع خيل
صار السفر لخواني مسموح
ليش العليلة ويانه تروح
------------4------------4
تكله شقررت وتقبل يمينه
من السفره ايست من دمعت عينه

مسـح دمعاته بردانه
وسمعت الجلمة بلسانه
مـا نـاخـذها ويانه وصحت بعالي صوتي

دخليلك يابو المروه
ضلتي بدونك شتسوه
اروحلك الف فدوه اريد ويـــاك موتي

شفته نهضم من احجي وياه
كتله السفر مو لازم انساه
عطر الهجر من دمعك يفوح
ليش العليلة ويانه تروح
------------5------------5
بعد ما ايست والنوك مشوها
ركضتله حافيه يصيح خلوها

بأول خطوه لناكه
صحت يابويه مشتاكه
رجعلي وجان الملاكه محبوب وحبيبه

شميته وبست خده
ونزلت دمعه من عنده
حضني وعرفت قصده جايتج مصيبه

وتوكل على الله ومشه وغاب
وضليت اتاني شهور عالباب
وجاني الخبر عطشان مذبوح
ليش العليلة ويانه تروح
.......................................
حيدر نوري الاسدي

قصيدة استقبال الضعن


رد يا ضعن بالعـــايله
شـــايل بنــات مدللـه ماخذهن لوين

مو سهله طبتك كربله
ينســـبن بــاجر بالفله من بعد الحسين
___

هـود يا ضــعن بيهن
بنات الزهره تدريهن اميرات

رد لا تســكن الهيمه
بهيــمه اتيه اليتيمه زغيرات

ما يرحـــم يتيم اللــيل لو صار
وهنه زغار تدري بخوف الزغار
الما شايف النار وشافـها يموت
ليش وجوه ترفه تجيسـها النار

طبع الزغير بلا صبر
شيسكته من يسحك الجمر
وما يلكه الحنين

ما يـــدري المـــن يتجه
وليا جسد ينطي الوجه

من بعد الحسين
___
ردهن يا ضعن ردهن
لا تســلبـــها راحتهن عزيزات

الشمس متشوفهن خدر
مو مالت صحاري وبر يتيمات

اليركض شارد وتركض وره الخيل
يضل يتلافت من يخــلص الحيل
شني حـــال اليتـــيم وخيل تدناه
منو يعـالج جروحــه بصفنة الليل

بغير اهله ميطيب الجرح
والخلـصـوا اهـــلـــه ذبح
يكضيها بونين

لليل اليـمر يكضي بجي
وهــمـوم الـمن تنحجي
من بعد الحسين
___
اسولف ياضعن حـاله
الغيـــور تغـير احواله عجيبه

رقيــه التشـبه الزهره
سطره تجيبها لسطره مصييه

تفزع عالتــراجي بخـيلـــها الناس
وتركض خايفه من الخيل تنداس
خطوتـــها زغيـــره والنـــهر وين
وصلت لنـــهر بس مـــاهو عباس

نوخذن تراجيها غصب
ودم الترافه من يصب اتضلم بالعين

ما واحـد عليها نكسر
ما تعرف اليون المفر من بعد الحسين

____
اذا ناوي ورحيلك شد
ليش الكربــله المكصد السبب هاك

لا تـــاخــذهن علـــيها
ما عدهن عـــرف بيها ضمه هناك

اذكرك يا ضعن من ترجع بهاي
والدهن يمــوت بعــازت الماي
والاصعب عليهن ما يجي ابال
فرجـــه وجـوهن لرايح وجاي

مو نوكك يصعدن هزل
ويحمـــلن الـمـــا ينحل
وي حز الوتين

والاصعب يفت الكلب
يحـدون بالنـوك غرب
من بعد الحسين
____
حيدر نوري الاسدي

صح اربعة بس ترسو الكاع
ما خيبوا ضن امــهم اسباع
ربيتـهم وربــــاي مـــا ضاع
----------------------1
ما اميــــز بينــهم كلـهم فحول
اربعتهم كسروا ضهور الخيول

مـا تنـثـني خلفت علي
كل الشده بيهم تنجلي
والشافهم خاف

مو ولـــد ســورة زلـزله
ســـواهـــم الله لكربـله
وحط بيهم اوصاف

هذا اللـــي جايبهم خزر
وذاك اللي جايبهم سطر
وذاك اللي سياف

وسيــوفهم بيــــديهم ضيوف
شما عطشت يرووها السيوف
السيف يــــاكل ركب لــو جاع
ربيتـــــهم وربــــاي مـــا ضاع

----------------------2
ما اخافن ولدي لو طبوا نزال
بيهم اتنومس اذا صار القتال

شاهد كــلامي الكنطره
من ينسى ذيج المجزره
بعمر النده جان

عبــــاس بالعسـكر عبث
بمداسه يسحك عالجثث
من زغره بركان

من يصعد المهره الشهم
تتخـاطف الــوان الزلم
وتشوفه فرحان

مــــا يلتفت عالـــراح والجـاي
الـمــاي راده وراح اخــــذ ماي
ينصــاع كلشي لامـــره ينصاع
ربيتـــــهم وربــــاي مـــا ضاع
----------------------3
ما عصو كلمه اللي ألردته صار
بيهم حرورة علي بالخدمة نار

شمحلاها خوتهم دفو
بيضو وجه امهم كفو
أولادي الاحنان


واحـدهم اليــــمه كعد
ما ينســـمع صوته بعد
وتشوفه خجلان

وحســين بيهم مبتشر
رايــدهم لوكت العسر
للعازه الاخوان

ما يصعب عليــــهم الرادوه
لو طلب نجم سهـيل جابوه
يگضون حاجة خيهم بساع
ربيتـهم وربــــاي مـــا ضاع

----------------------4
سافروا ولدي وبقيت بلايه راي
شوكي الهم ضلم بعيـني سماي

من حمل وشال الضعن
ادمـوعي عالكاع نجفن
وبيه النفس ضاك

ما غفت عيني من القهر
والسهر فت كلبي السهر
شينيمه الاشتاك

اغبش واكعد بالدرب
بكلي خبر بيد الغرب
ذابحني فراك

مشتاك كلبي لولدي لحنان
وين اكو منهم هيج خوان
كلشي انسه بس ما انسه لوداع
ربيتـهم وربــــاي مـا ضاع
----------------------5
عايشه بين الحقيقة والضنون
فارشه الهم وانتظر ولدي يجون

هد حيلي من جاني الخبر
فكد اربعـــه كســرت ضهر
انطي الوجه وين

ما صبــــرت روحـي بعذر
كسر الضـنـــه مــــا ينجبر
بس فدوه لحسين

لو عاتبت مــــوش بقصد
يستــاهل حســــين الولد
عالراس والعين

شأنطيه ويهده بكلبي الاحساس
وناطيته كل ما عندي عباس
بجفوفه صيت الربته شاع
ربيتـهم وربــــاي ما ضاع
----------------------
حيدر نوري الاسدي

تسمع حجيهن زينب وخجــــلانه
عطشانه تطلب ماي من عطشانه
…………………………………
العطش سالب راحة الكافلها مات
كلشي شاخ عليها من شاخ الفرات
بيــا وكت علويه عطشــــانه تبات
فوك ضيم العطش كلــهن خايفات

المـــــات هيبتــــها تضل حيـرانه
عطشانه تطلب ماي من عطشانه
…………………………………
الماي جان شرخصه بوجــود الكفيل
ماكو شي عدهم صعب لو مستحيل
كلشي جــان بجال ابو فــاضل ذليل
وهسه غالي المـــاي ويـدورن سبيل

كلـــشي ســــد بوجـــوهن بيبانه
عطشانه تطلب ماي من عطشانه
…………………………………
ما تصير وصارت ويا وسفه هاي
وحده تنشد وحده ياهي لعدها ماي
كعدت تسولف رقيـه عدهـا راي
راح اروح لعمتي ترويلي ضماي

راح اكلـــها من العطش فحطـانه
عطشانه تطلب ماي من عطشانه
…………………………………
مـــن بعـــد عزتهن وذاك الدلال
صار ثكل همومهن ثكل الجبال
الما يردلــهن طلب يرجع محال
أيسن من رجعته بجيت الحبال

وينه عمنـه لكال اجـي وما جانه
عطشانه تطلب ماي من عطشانه

…………………………………
بوحشة الليل وحزن ذاك الضلام
الذابحين خوتـــها مـــا تكدر تنام
ما تحسب للعطش جايلـــها شام
لوعة الخطوه بسبي حركة خيام

عليــها حتــى الليل طـــال لسانه
عطشانه تطلب ماي من عطشانه

حيدر نوري الاسدي

المشايه لا تـدنــاها
الدنيه الك عفناها

يا خصم الحسين
__١

تتعب لو ردت تحسب
جم زايد وجـم موكب
اعـذرك وانت متعجب
نتنفس هوى الرايات من يهب

بفـكـارك عـلي لا تذب
شوف العـين ميجذب
زغير وشاب ومحدب
شمحلاته التعب لحسين ماي بحب

ما تفـتـهم فحواها
الدنيه الك عفناها يا خصم الحسين

__٢

ٰشتسولف الك ما نسمع
شــما حاولت مـــا تمنع
بغير المـــشي مــا نقنع
مليونيه هـــاي الســـنه ومربع

الحلوه البينه ما نهجع
بطريق حسـين نتكطع
ألما يوصـــله ما يرجع
بينه حرورة العباس ما نخضع

المشايه الله وياها
الدنيه الك عفناها يا خصم الحسين
__٣
اســـمـع هـــاي وتصور
نحـسـده البـدرب يعثر
يواسي بعثرته الخــدر
اليعثر بالطريق بعثرته يكبر

مـيهـمنه البــرد والحر
يخســـه الراد نطـــشر
نفـــزع فزعت الاكـــبر
شما زاد الخصم بعيونه يزغر

والعثره يا محلاها
الدنيه الك عفناها يا خصم الحسين

__٤
وحك وجوهنه السمره
نمشي بدمـعـه وبــعبره
نواسي الما سلم صدره
لو مليون مثلك حاقد نعبره

القدملي هلـــه ونحره
اعشكه بمعرفه وفطره
أله بنـص الكلب جمره
ما تطفى ابد وعمامته الخضره

وشيحصل الطفاها
الدنيه الك عفناها
يا خصم الحسين

__٥

الزايـر لو خلص حيله
الزهـره بأيـدها تشيله
والمـــايل تتـــجـــيـله
زاير زاير ام حسين تمشيله

اليوكع هي تدعـــيــله
نضره مـنــها تكفـــيله
يكوم برجـله الكحيله
تردله العافية وما تسبكه الخيله

مـا خيبو منــواها
الدنيه الك عفناها يا خصم الحسين
-------
حيدر نوري الاسدي

تم ٢٠٢٢/٨/٢١

ان يوم عاشوراء ذل عزيزنا

بهــذا الـعـمر واتسـلب
ليل اهدعش ذل زينب
ياخويه ياخويه
----١
أبصعدتي عالتل كضه الحيل
من حال بيـني وبيــنك الليل
ما شفـتك ولخــيامي رديت
وشلون اشوفك فوكك الخيل

خويه أرجعت لخيامك وما وجدتهن
نارهـــم وانـــي علـى التـل ضَيعتهن
وبنـاتـك لكيت الخـيـول مطـشـرتهن
بلا خيمه ذيج الليلة بعباتي جمعتهن

كلشي بأخيــتك شيب
ليل اهدعش ذل زينب
----٢
حالتــك كسـرت زينب اهواي
الفـــيــاي انت ورايــد افيــاي
بوســــــادتك مـــا قبـــلو اتنام
َومن صدرك الحافر شرب الماي

من ميلوها الخيل عنك خويه تدري
ماخفت من خيولهم خفه عله خدري
وهنا خلص حيل لجن حزمني صبري
من طيحتك ليهسه نـــارك بيه تسري

وبكلبي نـــارك تـلـــهــب
ليل اهـــدعش ذل زينب
يا خويه ياخويه
----٣
شافون وحدي معصبه الراس
وركضت علي بسياطها الناس
وهنا صحت من ثكل السياط
اختك ولوهــا افـزع يا عباس

لمن صحت يابو الفضل خلصني منهم
وصلو للكافل يضـي عيني ضحكهم
متونسين بلوعت اختــك لو شفتهم
منـــين اجيب اليفزع وعنـي يردهم

ضهري بغيابك حـــــدب
ليل اهــدعش ذل زينب
يا خويه ياخويه
----٤
يا خويه ما كلك شني الحال
من عاينت بأيــديــهم احبال
من بعــد جـف الكـافل انكاد
بأحبال خشنه وصبعه تنشال

ليل اهدعش خلصت وانه مو سبيه
تفكيري بـاجر شــني راح يصير بيه
طر الفجــر والنــوك جــابوهن عليه
مــا لحكت بسيــاطهم كعـدت رقيه

وبعـين اصـــد تتعذب
ليل اهدعش ذل زينب
يا خويه ياخويه

----٥
وفيـــتـــك ومــــــا ادري وفيت؟
لا تعـــتـــقـد يـــبن امـــي مليت
عـــن لا تلـــوح النـــــار الزغـــار
جم جمره خويه بجدمي طفيت

شفتك وحيد بعازتي واختك وفيه
بس تـــدري ما اكـدر ارد الاعوجيه
واسيتك بممشه الجمر وحبال اديه
وراح ابقى ابجيلك دمه لحد المنيه

بدم عيني الك راح اكتب
ليـل اهـدعــش ذل زينب

يا خويه ياخويه
___

حيدر نوري الاسدي