اليوم كانت نهاية الامتحانات ونهاية السيم

السيم الخامس ⏳😶‍🌫

املأ قلبك يقينًا بأنّ نتائج صبرك ستكون أيامًا عذبة ومطمئنة وأن إنسكاب دمعك من شدّة التجشّم أوّل آية البُشرى، عيشوا يومكم مطمئنين آمنين واثقين بالله متوكلين عليه.

مع الوقت حتكتشف إن الكثرة تغلب الشجاعة في كل شيء، حتى كثرة اللسانات اللي تدوي عليك وبيك وكثرة اصواتهم، قادرة تغلب شجاعتك ووضوحوك،
وتخلي أي حد يصدق أي شي عليك لمجرد إنه سمعه من هلبا ناس بس، وما تعبش روحه حتى يسمعلك.

⁣نتيجتي نزلت ناقصة لكن تقدرو تباركوا على ال3 اللي نزلت نتيجيتهم وصفيتهم 🥳💙

ديما كانت عندي فكرة إن مهما تعبت ممكن تاخد اقل من تعبك، لكن مستحيل ما تحصل شي، مستحيل تطلع فاضي، وحتى لو صار وكنت شايف هكي فا في قصة تانية كاتبهالك ربي انت ما تعرفهاش، واحسن من توقعاتك بهلبا.

حتفوت ايام مش حتقدر تشارك صحابك فرحتهم، حتراجع فيها الاسباب لو لقيت المقنع واللي يرضيك حتفوت، ولو ما لقيت شي برضو حتفوت، وفرق المعنى كبير هلبا.

ديما في مكان لجوي المليح في زحمة الحاجات الاخخي من هلبا سنين لتوا، حصيلة التجارب كانت تعلم فيا إني ومزاجي فوق كل شي، حاجة بدت تكلف فيا هلبا لكن عمري ما فكرت نغيرها ولا نتغير.

اليوم الذي يمرّ بستر وعافية، نعمة من الله، لا تغفل عن شكرها، فالحمد لله الذي لطف وستر، وتتجدد النعم بأمره، اللهمَّ احفظ علينا نعمتك وزدنا منك فضلاً وخيراً يا كريم.

„بجري لوحدي جوا السبق
ماضي شكلني وإنتهى
نفسي ما أبقاش زي ما أنا“

في حاجات واضحة بلا ما توضحهالك المواقف، فا ما تتغاضاش عليها باش ما تعيشش مضغوط.

في هلبا ردود أفعال اديرها فوق من قلبك ومش راضي، على تصرفات اخخي أنت عارف كويس إنهم راضيين عليها هلبا وإنهم رضو فيك، مافيش إنسان طبيعي يهون عليه حد ما جمعاش بيه الا الخير، الا وهو عارف إنه طلع يهون عنده رغم كل شيء وإن في حاجات هلبا غير الخير اللي كان شايفه

حاجات اكبر ما يقدروش يمحوها مهما دارو من خير في الجاي، حاجات خلاتك تقرر إنه ماعاش في جاي من الاساس.

لما ادير معاي موقف كويس أو معروف، أنا اهني بنبدأ نشوفلك على إنك شخص دار معاي موقف كويس ومعروف بس، وحنحطه في بالي وحتلقاني في موقف زيه ومرات اقوى

لكن مش حيخليني نكون الشخص اللي حيسعى ديما إن يرضيك، ولا حيخليك الشخص اللي عنده صلاحيات لا محدودة معاي.

- أنا ديما عندي فرصة نقول شن نبي وندير شن نبي، ديما عندي حق نحكي وديما ضامن إن المجال مفتوح ليا، بغض النظر على قوتك وجبروتك لو في حاجة نبي نوصلها حنعرف نوصلها وكويس هلبا، لكن لما نتكلمش وما نتصرفش يعني إنه إختياري ويعني إني مش مهتم.

ما نتفكرش إني عطيت حاجة وأنا غافل وبلا ما نحسبها، حتى أيام كانت ماعنديش الجرأة الكافية اللي تخليني نرفض بوضوح هلبا نتكلم اصلا زي ما ندير توا، كنت نتعمد نكون متناقض مع الأشخاص اللي مانبيهمش يعرفوني كويس.

﴿يا أيّهَا الإِنسانُ ما غرَّكَ بربِّك الكَريمِ﴾

ورا كل شخص اخخي مواقف كويسة ما يتفكرهاش الا اللي يبي يعطيه فرصة، و ورا كل فرصة تنعطى للشخص الاخخي هذا احتمالين، يا إما يغير من نفسه شوية ويشد روحه على خاطرك يا إما يتمادى، وفي النهاية نية كل واحد هي اللي حتخدمه في الاخير وحتخليه يطلع من العلاقة هاذي بأقل الاضرار أو اكثرها.

افضل حاجة ممكن تتعلمها هي إنك تعرف تطلع من اي موضوع بلا ما تعطي رد فعل إيجابي ولا سلبي، مش لازم يكون عندك موقف واضح في المواضيع اللي ما تأثرش عليك ولا أنت جزء منها، حتى لو يهمك الشخص اللي يحكيلك فيها فا اللي عليك إن تعطي رأيك بس بدون ما تتصرف بدله أو تشارك في التصرف اللي بيديره، مش لازم تكون القدع والبطل طالما الموضوع ما يهمكش، فا ما اديرش رد فعل لأن رد فعلك غالبا بيخليها تأثر عليك وبيخليك جزء منها.

اسوء حاجة نمر بيها انا واغلب جيلي هي صدمة الواقع، واللي بسبب إن كنا حاطين توقعات قوية هلبا للفترة هاذي متاع بداية العشرينات، ولحد اللحظة هاذي العمر يجري وما شفناش ولا حسينا ب ولا حاجة من اللي كان في دماغنا.