شهادة الامام الحسن ع
.
.
.

كسرتك كلش چبيره .. چني فاگدلي عشيره
ومن دفنتك يالحسن
چـن بقــت ابلا وطن
يخويه
-----
يخمتـنـه الچبيــره البيهـا ملتـمـين
خويه اخلاف عينك مثل المتيهين
يالمبعـد دهــر هـم فكرت بحـسين
زحمه ظهر اخيك ينــكسر مــرتين
 
الدنــيـته كلها شمــاته .. الماله اخو ماتت حياته
ومن كسر ظهري الزمن
چــن بقــيت ابـلا وطن
يخويه

-------

الگاع ابلا اخـو جواي احـس رخوه
يتچوه ومن رحت ماضل الي تچوه
مايبـــچي الـــذي مامــچوي بالخوه
وشيـــصبره الـذي دافـــن اخـو توه
 
جروح هجرك خويه بيه .. چنــهن الف وتسع ميه
ولمن اعيــونك غفن
چن بقيت ابلا وطن
يخويه

--------

اخيك مولحت من البچي اخدوده
چبدتي موچـبدتك خـويه ممروده
تراها حسين عگبك دنيتــه سوده
اعمه وداعتـــك والوادم اتگـــوده
 
حالي لاموذاكه حالي .. هدلت امتوني الليالي
اعليه من هنه انچفن
چن بقيـت ابلا وطن
يخويه

-------

يشيخ الـطايفه التبچيلك الـسبعه
كل لحظه اعله گبرك انچفي دمعه
يبو الفزعات اخوك بحاجة الفزعه
مكسـور الظــهر مايــحمـل الوگعه
 
الماله اخو ياخويه باچر .. تطحن اظلوعه الحوافر
بكربله حســيت اذن
چن بقيت ابلا وطن
يخويه

__

يسئلوني عــليك ومـن يسـئلوني
وحقك چـن الف ذبحه يذبحوني
صعبه ابلا اخو الوادم يشوفوني
بالطف باجر اهـــناك اشيراووني
 
حسين بالطف لو تمدد .. تنسلب نسوة محمد
اتصيح اختك بالضعن
چــن بقيت ابلا وطن
يخويه
-------
حيدر تركي الكربلائي

للامام الحسن ع
.
.
.

اتـذكـرت مصابه .. وانــه بــالخــرابه
مـانســيته
ابــو محــمد اخــوي

_____________

قصــتي كلــمن سمــعها يبچــي مــن عنـوانها
والخـرابه امـن اسمـعتني اتفــطرت حيـطانها
أبــد مــو سهـــله بــواچــي الــفاگده خــوانها
العدها مثل اخواني موته خل تحظر اجفانها

واليـسر تـركـته .. الحسن من ذكرته
ودم بچيته
ابــو محــمد اخــوي

_____________

المــات لا مــامات حــزنه والحزن مايعــتگ
الظيعت مثلي اخــوها حــگهـا بالهــم تـغرگ
رغـم ذنـي احبال اديـه ورغـم متـني الازرگ
الحـسن مـن ايـمـر مصابــه يـهالوادم اشـهگ

شهـگـة الشماته .. الشاهدت خواته
من نخيته
ابو محمد اخوي

______________

للحــسن ونــيـت واهــل الشام سمـعو بــيه
وگــفـو ابــاب الخــرابه ايــبـاوعــون اعـليه
بســچ امــن النــوح گــالو كــافي يالمـسبيه
اليبچي يوم اثنين خـوب البـچـي مويوميه

للحرس شكوني .. وبالعجـل اجـوني
ويمي ريته
ابو محمد اخوي

___________

امن البواچي على اخوتي تشتعل جمـراتي
ذاكـره جـرحي الچـبــير الـرافگ احچاياتي
للحـسن سويـت مـاتـم رغــم كــل مأساتي
وبــثـــوابه عاليــتـامــه وزعـــت دمــعـاتي

للحـسن ثـوابي .. دمعتي ومصابي
وماوفيته
ابو محمد اخوي

______________

مثل ما لحسـين ابچـي وحــزنه كـاسر ظهري
الحسن نفـس الشي احسه همه تارس صدري
وحـق چبده الي اتگـطع ابقـه اون كـل عمـري
ومـا ابطل النــوح ابــدن حــتى وانــه بگـبري

والخــرابــه تشـهد .. امن البچي حيلي انهد
الخد سگيته
ابو محمد اخوي

___________

غفت عيني لحظه وحده وبالحلم چن شفته
ماعــرفني حـقـه هـــوه لــكن انـــي اعــرفته
گـتله هـيچ ايصير بـيها كلمــن ايـعوف اخته
لاتــروح اويـــاي ابـقـــه وبـالــدمع حـــلـفته

گتله والاميره .. اصبحت اسيره
ومالگيته
ابو محمد اخوي

___________
تمت والحمد لله
حيدر تركي الكربلائي

شهادة الحسن ع
.
.

جبل يالماتطـخ الراس اول مـــره ياعـــباس
تبچي
شو محني الـظهر جاي
مبيــن فــاگــد اهــواي
يابو فاضل
---------

عــباس ترسانة حـرب .. عباس ماكــــو بكبرك
طاريك ايرجــف الزلم .. يامحـنه هاي اتكسرك
شخيرك تگوم وتنچفي .. وعطـر المقابر عطرك
الرايحلك امبـين ظــهر .. مــن هاي لازم ظهرك

حــيلك ماخذه الــتابوت اتنازع چـن تريد اتموت
حقك
ياهو ايلومك ابهاي
امبين فاگد اهواي
يابو فاضل

-----------------

الاخ الچبير امن الله شو .. تلگاه نبـع حنيه
وانتـــه چــبيرك دافـــنه .. وتتـعثر ابطاريه
يالمنــحرم من الضوه .. من تعمه ثق عاديه
ندري الصبر لجل الحسن .. يــرادله امكانيه

حاسر عالترب گاعد تلــطم لطــمة الفـاگد
هايم
يالمتبدي چن ماي
امبين فاگد اهواي
يابو فاضل

-----------------

بــين الــبقـــيع ومــــنزلـــك .. ينحسبن اچم خطوه
ابهاي المسافه اشگد طحت .. چيه بيك ماضل قوه
الماينكـــسر لجـــل الاخـــو .. ماينحـــسب عالخــوه
دمــعـك اذا مـــو للـــحسـن .. چا گـــول المن يسوه

اتواسي دمعة احسينك غـــرگـــانات خديــنك
مدمع
اليبچي وصاح رجواي
مــبين فاگـــــد اهواي
يابو فاضل

______

اتجـــالع اشعــندك ياگمـر .. وي كــل نفـــس تتالم
هوه انته لو خوك الحسن .. گــللنه ياهـــو اتـسمم
تلطم على اعيونك گمت .. وجفنك امن الدگ ورم
وتگول من عگب الحسن .. بــيمن بـعـــد اتشــــيم

حقــك تلطـــم وحافي كشختك بالترب غافي
وسفه
معلعل بيك الف داي
مــبين فاگــد اهواي
يابو فاضل

-----------

عباس ياطــود الــمجــد .. يالماكو ادين اتلوحك
معقوله راجع بس جسد .. چـا وين دافن روحك
بدلالك اشسوه الحسن .. وبانت عليك اجروحك
شتسوي بالطف لوشفت .. فوگ الـثره مذبوحك

يمكن تنــذبح مــرتين من اتشوف صدر احسين
امهشم
امأكد تفگد الراي
امبين فاگد اهواي
يابو فاضل
------------
حيدر تركي الكربلائي

للامام الحسن
.
.
.

البالگـبر دافــن أخــيه .. هذا وحده اليدري بيه
انكسر ظهري عالحسن
ويمكن اعيوني عـمـن
من الدموع

_________

حرامات .. ضوه اعيوني بالگــبر حطيته
حرامات .. وســفه بيدي بالترب غطـيته
حرامات .. وياي اخويه ابكــربله اتمنيته
حرامات .. هسه ظــهري منكـسر حسيته

الشال بالتابوت صبحه .. لاتسألونه اعله جرحه
ابشيلته اضلوعي انحنن
ويـمكـن اعيــوني عـمـن
من الدموع

_________

بالتراب .. ذكـرياتــي اتطـشــرن وامــالي
بالتراب .. ايروح كلشي ويبقه هوه ابالي
بالتراب .. اليـوم ياهالنـاس دافــن غـالي
بالتراب .. النــوم ويــاه باللــحد يحـلالي

اليبچي لجل احزام ظهره .. هذا بس الله اليصبره
الهالسبب لجـله جرن
ويمكن اعيوني عـمـن
من الدموع

_________

يعباس .. انحنه ظهري وشوف انته ابعينك
يعباس .. والحــچي ياخـويه بيــني وبيــنك
يعباس .. مــن تطــيح اعلــه النهــر چفــينك
يعباس .. ابطيحــتك ينكسر ظهـر احسـينك

الماكشخ بخوانه مكسور .. هذا حالي بعشره عاشور
راح اعتــب عالـــزمن
ويمكن اعيوني عـمـن
من الدموع

_________

تره العين .. امــن البواچي للاخــو اعميها
تره العين .. شلـي بيـهــا والحـسن مابــيها
تره العين .. بــقـه بـس المــدمــع ايســليها
تره العين .. ذابــله چــيـه بالگــبــر راعـيها

اجنازته من نزلتها .. روحي بيديه ادفنتها
جسمي وي جسمه اندفن
ويمــكن اعيـــوني عـمـن
من الدموع

_________

تمنيت .. من اطيح اعله التراب امخضب
تمنيت .. زينـــب ام الـخــدر ماتـتـــســلب
تمنيت .. الحسـن يمها وفنه واحـد يگـرب
تمنيت .. ماكو واحـــد يوصل الحـد زينب

حتى زينب تبقه اميره .. وحتى ماتمشي اسيره
بالله شحچي اويه المحن
ويمكــن اعــيونــي عـمـن
من الدموع
_________
تمت والحمد لله في ٢٦/ ١٠ /٢٠١٧
حيدر تركي الكربلائي

للامام الحسن ع
.
.
.
ماناسيني .. اعرف بيكم كلش زين
ماناسيني .. مادام تـذكرون حسين
شكرا بسم الحسن
الكل خادم مؤتمن
ماناسيني

***

الرايــد يرضيني وحـــيران .. ليــروح يدگ بالبـــيبان
خل يبذل لجل العطشان
الآلـم
اليطمح يبچي اعله المسموم..خل اينوح اعله المضلوم
راعي الـــدلال المثــلوم
بسهم

نوحو حسين وعياله   السحگت صدره خياله
من دمـعاتــكم تــنزل   الحســـن يرتــاح دلاله
اليحس ابداخله قصر   اتجـــاهي لا لـيـــتعذر
الرايدني عليــه ارضه    خل يبـچي لبو الاكبر
 
ماناسيني .. مـوبس هالعام وكل عام
مانسيني .. ممنــون الــــكم يالخـدام
امن الواجب ينحچن
الكـــل خـادم مؤتمن
ماناسيني

***

ماقصرتو ومتقصرون .. ياليوميه انتو اتلطمون
عاشـورا لا ماتنســـون
ابــد
يالبـالحل وبالتـــرحال .. مدمعكــم مثل الشلال
شكرا يلي انطيتو الآل
عهد

اليبچي المنهشم صدره    ايفـــرح ســـائر العتــره
اليگلكم هـــذا لاميجوز     تجــازيه فاطمه الزهره
حسين مسلبه هدومه     حسين ضلوعه مهشومه
اليبچيله الســنه كـلها      محـــد يـــگــدر يلـــومه
 
ماناسيني .. الســـم الصوبني اتذكرون
ماناسيني .. كل ما عالضامي اتنوحون
هذي الكلمات اذن
الكل خادم مؤتمن
ماناسيني

***

اسمع بعض المنتـقدين .. شـــو للحسن انتم ناسين
عـــوفوهم يالمشغولين
نعم
الينقدكم ماواصــل هاي .. ماغص يوم بشرب الماي
يالمحروگين انتو هواي
بخيم

يلي اتفـانيــتو بالخدمه    وحزنتو لجل ابو اليمه
بچيتو الجسمه المطشر     البــالبـــر محد ايلــمه
الــى كــل خادم اتـــألم      الحـــسن وياه يتكلم
اگــــله دمعـــتك هــذي     تداوي چبدي المسمم
 
ماناسيني .. ذكر حسين شما تحيوه
ماناسيني .. معـــناها ذكري اتعيدوه
بالـــسر وبالعـــلن
الكل خادم مؤتمن
ماناسيني

***

يالقدمتو اروع مضمون .. يهل الدمعات اتعيشون
بالخدمه اتمنه تمكثون
دهـر
تبچون النـه زغار كبار .. حسيتو اعلينه شما صار
عدكم بالحــافر والنار
خبر

واحــدكم احـــس گلـــبه     بـــيه خيـمات ملتهبه
اشيصـــبره على هاللوعه     الفگد عباس والجربه
واليحـــس ابــمعانــــاتي    اكـــيد ايعيش مأساتي
ماقـــصـــرتــو ادريــــكم     تــونون اعــله ونـاتي
 
ماناسيني .. بالحــاظر انتو وبالفات
ماناسيني .. كل ما تتجاره الدمعات
وعويــناتي جرن
الكل خادم مؤتمن
ماناسيني

***

يلي اربيتو اعله الاهات .. وتأقلمتو اعله اللچمات
يالعشتو ابين الجمرات
لهب
الـــسويتو محـــد سواه .. لامايمـــكن اني انــساه
محفوظ الكم إي والله
التعب

تــعبكم باچـــر نــقــدره     الكــل واحـد اله اجره
شگاكم بالقيامه اهــناك     صـدگو باچــرانـــذكره
البچه لحسـين ومصابه     ودمـــوعه تجـري لهابه
اذا محــد يـــدگ بابـــه     نجيله احنه وندگ بابه
 
ماناسيني .. يالـخدام بكل عاشور
ماناسيني .. من اتذكرون المنحور
ونوگف وكت المحن
الكــل خـــادم مؤتمن
ماناسيني
****
حيدر تركي الكربلائي
 
 
 
 
 
 

من البحرِ الى النحرِ .. فراتك بالعكس يجري
سـيلُ الاوفياء
گاصد كربلاء
من البحرِ الى النحرِ
---------
يا اول واخــــر كـــلمه .. لو گـــبرك يم النجـمه
نمـشــيلك يابــو الـــيـمه .. واحــنـــه الممـــنونين
 
لو شباچـــــك عنـــوانه .. مجــــاور درب التبانه
نگصـــدلك يارجــــوانه .. ونــحــس مقـــصـرين
 
غير انته احسين الشمعه .. الماينطي ابناسه وربعه
عـــهدك بالـــدم نـــوقعه .. ونشــــعر مديـــونيـــن
 
اليحجلك هالسنه ينوي       يحج العالم العلوي
بهيئه وكبرياء
گاصد كربلاء
من البحر الى النحر
-------
يالـــتتفايض حـــنـيه .. ويـارمز الانـــسانيه
بحبك عدنه امكــانيه .. تـريـد انموت انموت
 
چانت تهمـه المشـــايه .. اليمشي وشايله رايه
ايوصي اهله كون بهايه .. يحظـروله التابوت
 
وماچلينــه وملـــيــنه .. وعـــيونك يابو سكينه
عـــن گبرك متخلــينه .. من چـــانت بــسكوت
 
بوكت چان اليلزمونه      اليجي ممشه يعدمونه
نهـر الشهداء
گاصد كربلاء
من البحر الى النحر
_____
گالو نـشوه وينســـوها .. يوم اثنـــين ايملوها
جـاوبنـــاهم شــوفوها .. المشــايه بهــالعـــام
 
بحيل الكافل متحزمه .. وتگول برسم الخدنه
بقوة العباس وعزمه .. بدربـــك نمـشي ايام
 
إي خادم منهم سئله .. حزامك يايــوم اتحله
ايگلك يم باب القبله .. تــرد روح الــخـدام
 
اليشاهد قبتك التلمع      دمعته بوجنته تركع
المتبدي عطاء
گاصد كربلاء
من البحر الى النحر
---------
روح وريحان واكــثر .. بدروبــك يــابو الاكبر
ليش اليمــشيلك يكبــر .. صيتــه ابـــين النـــاس
 
اليمشيلك خطوه تكبره .. وتوفقه وتشرح صدره
وتسجل اســمه الزهره .. بچـــفـــوف الـعبـــاس
 
عن گبـرك مانتـــخلف .. نتعـــنالك لـــو نزحف
نبـعد ويقـــربنه الطـف .. طفــــك رفعـــة راس
 
عصارة هالعشگ هيه    الزياره الاربعيــنيه
حبنه ابلا فناء
گاصد كربلاء
من البحر الى النحر
-------
ياحبنه المايتـكرر .. وياصاحب اطهر منحر
عن هالحب مانتغير .. يحــسين اشــما صار
 
عاشورك ماناسينه .. وجمراته التسعر بينه
مروتك بس لتطـفينه .. نـــارك ابـرد نــــار
 
من نستشعر آلامك .. نستشعر نار خيامك
تعلم زين بخــدامك .. تتــــفايــض ايثــــار
 
غرامك بالسمه نكتبه     اليوم وباچر وعگبه
وعنوان السخاء
گاصــد كـربلا
من البحر الى النحر
--------
حيدر تركي الكربلائي
 
 

  للاربعين
.
.
.

زينـب من يتلــگاها .. ردت والروس اوياها
يهل الدمـعه ويهل النوح
خل نتلگه اخت المذبوح
ردت والــــروس اويـاها

***

مثل جابر .. مـن اتلـــگــة آل الله
مثل جابر .. ظعن ام عون نتلگاه
 
گوه الله العيون الذابله امن الون
گوه الله الچفوف البالحـبل لطمن
وصلن كربله امن النـــوگ مانزلن
على اگبور الاهل ارواحـن شمرن
 
شهگن بس شنو من شهگه .. امأذيتــهن حيـل الفرگه
بلوعه وبالدمع المسفوح
خل نتلگه اخت المذبوح
ردت والـــروس اوياها

***

اجت زينب .. لكن شنهو من جيه
اجت زينب .. ضعنها ناقص ابنيه
 
الظعن بيه من رقيه بس عبايتها
اهل الشــام بنــت حسين ذبحتها
اشيتحمل صـــبر ياگلــب عـمتها
ابخــرابه اهناك يم الغربه دفنتها
 
اشيتحـمل دلال ام عون .. عدها هموم ابگد هالكون
مادام الدمـــعات اتـــلوح
خل نتلـگه اخت المذبوح
ردت والــــروس اويــاها

***

اشيصبرها .. وجـروح الشام تاذيها
اشيصبرها .. وجابت روس اهاليها
 
زينـــب ياتـــرى اشســـولفت وياهم
يامــــوقف فجعـــهــم حــيل واذاهم
الشــامت لو الــحادي دمــــه بچاهم
الوكت للساده خوش مجازه جازاهم
 
عرض الله وشرف العباس .. صارت فرجه گبال الناس
كافلها اعله الشط مطروح
خـل نتلگــه اخت المذبوح
ردت والــــروس اويــــاها

***

اجت يمه .. وتبـــدت سالـــفة زينب
اجت يمه .. وگبر عباس ضل ينحب
 
اويه الغربه الظعن گالتله من سافر
الصار الـــنه اعله بالــك لاميـــتبادر
ياهو الچــان گــام اعلينه يتــجاسر
خواتـــك للاســـف بحجـــار تتشامر
 
اتطـــيب الظربات ابأيام .. بس شيطيب اجروح الشام
الظعن الراجع كله جروح
خل نتلـكه اخت المذبوح
ردت والـــروس اويــاها

***

سوالفها .. تـحير زينـــب الحيره
سوالفها .. تــزلزل گبر ابو الغيره
 
تگلــه الشفـــته خويه صعبـه يتوضح
اخافــــن تنلـــچم وادريبــك امجــرح
الشمر دمعاتي من طاحن علّــي صيح
گامت على امتوني سـياطه  تتمرجح
 
صاح احنه الذبحنه اهلچ .. يمته الكافل يفزعلچ
حچيّ المســبيه مشروح
خل نتلكه اخت المذبوح
ردت والــــروس اوياها
***
حيدر تركي الكربلائي
 
 

ردت والروس وياهه

للاربعين
.
.
.

عطشانه اهـواي .. بـس مـو للـماي
الوجهك يحسين
عطـشانه اهـواي

_____________

صــار اچــم يـوم امفـارگني
وخدي امن المدمع يحرگني

اســئــل عــنــك يـامـاي الله
يـالوجــهـك چـان امــغرگني

محــروگــه ابــدلالي الـخيمه
وگـلــي اســئل عـنك ياغيمه

يـامــاي اعيــوني الشـيــلمك
يـالمــتبدي بحظــن الـهــيمه

اشتاگت عيناي .. بـس مـو للـماي
الوجهك يحسين
عطـشانه اهـواي

_____________

ميته امن الشوگ امخليني
مـن عذبك يمــته اتـرويني

حارگني افــراگـك حارگني
ومحـد ياخــويه ايطـفيني

شمـات اهــواي الـشـافوني
وعنـك كـل ساع ايسئلوني

يابس حسيته امن اغيابك
يابو اليمه السان اعيــوني

ثــق يارجـواي .. بـس مـو للـماي
الوجهك يحسين
عطـشانه اهـواي

_____________

احتاجيتك بــدروب الــغربه
چــتالــك من مـتنـي ايظربه

دورت اعــلــيـك ابأشــيــائي
المــاضلت منهن بــس تــربه

سلبـوهن كـلهــن مــن عنـدي
وضلت بس دمـعاتي ابخدي

اشعر كل دمعه امـن افـراگك
يمـكن يابــو اليــمــه ابگــدي

احچـيلك هاي .. بس مو للماي
الوجهك يحسين
عطشانه اهواي

_____________

بحچايـاتــك جــاي اتــذكر
وافـرك بچفـوفي واتحـسر

من سمعت حسراتي الناگه
شـو گامـت تمشي وتتـعثر

شــوگك موتنــي وتدريني
راح اغـفـه وبلـكت تلفـيني

اول مــاغمــضت اعــيوني
لن سوط ابمـتني ايوعيني

هـمــي وبلـواي .. بـس مـو للـماي
الوجهك يحسين
عطـشانه اهـواي

_____________

اشتاگيــتك ياروحــي وعــمري
وشوگك مدري اشسوه بصدري

اعلــه افــراگـك لا مـامتــعـوده
وكلــش زيــن ابـزيــنب تــدري

ابهجـرك مــدري اشـصاير بــيه
اختــك بخـــلافــــك مــعـــميه

مــن يـوم الشـفــتك عالغـــبـره
اتطــشــر وانـــلـــم يــــومـــيه

ملهوفه اعظاي .. بـس مـو للـماي
الوجهك يحسين
عطـشانه اهـواي

_____________

تعــبنـــي افراگــك تـعــبني
شمـعه وهجــرانـك ذوبــني

احلــم ترجع واگـعـد والـگه
راس گــدامــي ايــعـــذبـني

راسك من ابـچي ايضــمونه
ومن اسكت همه ايطــلعونه

ماكفــاهـم جــرح امــتوني
رادو دلالـــي ايجـــرحــونه

نوحي ومبچاي .. بـس مـو للـماي
الوجهك يحسين
عطـشانه اهـواي

_____________
تمت والحمد لله
حيدر تركي الكربلائ

 نزال
.
.
.

 
احچايه احچيها ياناس ومنها انــي واثق
من لـم يشكـر حسـين لم يشـكر الـخالق

***
جميل حسين وشـكبره جـميله
وكـلــمـة شـكراً انحـسها قليلـه
حيره شلون ابواليـمـه نجـازيه
وغيـر الشـــكر ماعدنـه وسـيله
نطانه شكد نطانه
تعب گلبه وحنـانه
بساعة ذبحه الحسين وهوه مانسانه
 
يالـما تـقـبل بـهاي تـوافــق ماتـوافق
من لم يشكر حسين لم يشكر الخالق

***

ما لـف وادور واحـچــي مـكشـوف
الماشـاف ابواليـمه كـلشي ميشوف
يالتــجـحد نعــمــته اتدبــر شـبـيك
تره صدره لجلنــه بخــيل مخسوف
اليعرف قدره خير
وعقـله يكـون نيـر
حسين ايكبر الزغار مثل حمزه الزغير
 
يالخـادم اوصـيك خـلك كون حـادق
من لم يشكر حسين لم يشكر الخالق

***

لو ما طاح عالغبره ابوسكـينه
چــا ضلـينه جـوه وماعــليـنه
لهــذا لو نضحي احنه بالاعمار
الگــطع خنصر يمينه ماوفينه
العطــاياه الكـبـيره
الشـكر كلمة زغيره
شكرنه وينه اوين النايم عالحصيره
 
نابع هذا الإحسـاس من كل گـلب صادق
مـن لـم يشـكر حسـين لم يشـكر الخـالق

***

جميل حسين لا ميقيسه مقـياس
ومال انــرد جميله انسوها ياناس
هنـــه هواي عـن يـاهــي نـجازيه
عــلى الأكـبر اولـيده لــو الـعباس
يناس الما يشكره
المهــدي مايـذكره
اليكسر گلب الحسين الله هم يكـسره
 
مع فارق التشبيه وهوه شلون فارق
من لم يشكر حسين لم يشكر الخالق

***

جزه الاحســان بالاحسان ينـرد
ولا مـومسـتحب واجـب مـؤكد
لون اعـمـارنه انطـيـناه قليـلات
حسين نطانه كـلـشي ومـاتـردد
مـن انـقيـم العـزيه
بنظـرنه شگد قويه
مقابل هذا الحسين مشت اخته سبيه
 
بمغــارب كل الأوطان وفـي كل المشارق
مـن لـم يشـكر حسيـن لـم يشكر الـخالق
***
لولا حـسيـن لادنـيــه ولا ديـن
ابوالسـجاد ســـوانه سـلاطيـن
التقصير اتجـاهه ما اله احدود
بس يبقـى املنه چبير بحسين
الكريم اعليه بعيده
عـنــه يشــيل أيـده
هاي اطباع الحسين واصلاً مو جديده
 
رسالة لليـعشقون من انـسان عاشـق
من لم يشكر حسين لم يشكر الخالق
***
حيدر تركي الكربلائي
 

حجايه احجيهه ياناس

نزال ليلة ام البنين
.
.
.

حي الله خدام الحسين / حياكم
يـــاتربــــية ام الــبنيــن / حياكم
***

ياجيل معجون بتعـب .. يا اثقـــــف واعظــم شعب
مادام قلـــدتو الكـــفيل .. فــــزتـــو كـــما فـاز وهب
تفانـــيتو بالخدمة نعم .. منـــكــــم ولا زل الجـــدم
الثابت يقينه بالحسين ..اتسجله الزچيه اويه الخدم
 
قد افلح المؤمنين / حياكم
ياتربـية ام البنين / حياكم
 
***
الهالدرب كلمن ينتـسب .. وخـدام أبو اليمه يحب
الماترضه عنه ام البـنين .. عالخـدمه لا ماينحسب
العايـــش حـياته كـــربله .. ام عباس هيه اتــدللـه
بصف حمزه الزغير يصير .. بجــنة البــاري منــزله
 
بالجنه باجر فرحين / حياكم
ياتــربية ام البنـــين / حياكم
 
***
 
انتم فصل واصل العشگ .. وگلوبكم بالحـــب تدگ
واحـــدكم بـــگــد الهيـــام .. بنــــار المخيم محترگ
ونستكم الـون والبـــچي .. وبحسينكم بس الحچي
المنكم هفت حيله وتعب.. بحيل اخو زينب ينتچي
 
وبزود عباس الحنين / حياكم
ياتـربيـــة ام البنيـــن / حياكم
 
***
 
يامن نذرتو هالعـــمر .. لحســـين مهشــوم الصدر
عفتو جميع المغريات .. وللخــدمه جــيتو بلا اجر
ماضاع تعب ام الوفـه .. بـــيكم يأهـــل المـــعرفه
يسمونكم ربع الحسين .. وهاي الصفه اجمل صفه
 
انتو العباد الصالحين / حياكم
ياتــربـــية ام البنــين / حياكم
 
***
 
المطيه لبوا ليمه ظـهر .. وجهه مثل وجه الگمر
تعلمك اذا يعطش اخوك .. مد روحك اگباله نهر
امــن ادروس ام الاربــعه .. لازم نحـصل منـفعه
والمـــنفعه آن الحسـيـن .. رحمة الباري الواسعه

وعالخدمه يامن ثابتين / حياكم
ياتــربيــــة ام البنـــين / حياكم
 
***
 
العاشورهم طـــول السنــه .. ذولـــه اهـــل ياليـتنا
الينعون همه بــكل مكان .. واحــدهم تحس مأذنه
الينعون أبو اليمه الشهيد .. ام عباس تعرفهم اكيد
هنيالكم يـهـــــل الــعزاء .. وصرتو لبوا ليمه عبيد
 
بالخدمه يامن موقنين / حياكم
ياتــربيــة ام البنــــين / حياكم
*
حيدر تركي الكربلائي