ሃይማኖት አንድ ናት

Channel photo updated

02:31

👉🏾# ሥርዓት_ ዘሰሞነ_ ህማማት

ሥርዓት_ዘሰሙነ_ሕማማት ( ከሰኞ እስከ ዓርብ )

✍️ሰሙነ ህማማት ማለት :- "ሰመነ፣ ማለት ሳምንት አደረገ ማለት ነው " ይሄውም ከእለተ ሆሳዕና ሰርክ፣ እስከ ትንሳኤ ሌሊት ያለውን ጊዜ እና ቀናት" የሚያመለክት ነው ፡፡

ሀመ - ማለት "ታመመ" ማለት ሲሆን ይህም የሰውን ዘር ሁሉ ከዳያቢሎስ ባርነት ነፃ ለማውጣት ጌታችን አምላካችን መድኃኒታችን ኢየሱስ ክርስቶስ በፈቃዱ የተቀበላቸውን ፅዋተ መከራዎች የሚያሳስብ ነው፣ "የሰሙነ ህማማት እለታት የዓመተ ኩነኔ ወይም የዓመተ ፍዳ ምሳሌዎች ናቸው" ክርስቲያኖች የክርስቶስን ውለታ እያሰቡ እጅግ የሚያዝኑበት፣ የሚያለቅሱበት፣ የሚሰግዱበት፣ ቤት ንብረታቸውን ትተው ከሌላው ቀናትና ጊዜያት በተለየ መልኩ አምላካቸውን የሚማፀኑበት፣ ጠዋት ማታ አምላካቸውን ደጅ የሚጠኑበት ፥ ኃጢያታቸውን በቤተክርስቲያን አደባባይ ለካህኑ የሚናዘዙበት፣ በአመት አንድ ጊዜ ብቻ የሚገኝ ሳምንት ነው ፡፡

መስቀል እንደማይሳለሙት ሁሉ መጨባበጥ፣ መሳሳምና የትከሻ ሰላምታ መለዋወጠን አይፈጽሙም፣ ሰላምታ የማንለዋወጥበት ምክንያት፣ አይሁድ ጌታን ለመስቀል ሰኞ እና ማክሰኞ መከሩ አልሠመረላቸውም፣ ምክራቸው የተፈፀመው ረቡዕ ነው፣ ስለዚህ አይሁድ እያንሾካሾኩ “እንስቀለው፣ እንግደለው ብለው ይማከሩ ነበር" ይህንን ለማስታወስ ሰላምታ አንለዋወጥም፣ "መስቀልም አንሳለምም" ሳምንቱ የክፋት ምክር የተመከረበት እንጂ የፍቅርና የደስታ ሰላምታ የታየበት ባለመሆኑ ይህንን በማሰብ ሰላምታ አንለዋወጥም፡፡

ይሁዳ ጌታን በጠላቶቹ ለማስያዝ “እኔ የምስመው እርሱ ነውና ያዙት” ብሎ በሰላምታው ምልክት ሰጣቸው፣ ይህ ሰላምታ አምሐ ቅድሳት አይደለም፣ ተንኮል የተሞላበት እንጂ፤ የዲያቢሎስም ሰላምታ ተመሳሳይ ነው፣ "ሔዋንን ሰላም ለኪ ብሎ ነው ያታለላት" የዲያቢሎስ እና የይሁዳ ሰላምታ ሰይጣናዊ ነው፣ ስለዚህ ይህንን ወቅትና ሁኔታ ለማሰብ በሰሙነ ህማማት ሰላምታ ልውውጥ የለም፣ ዛሬ እየተስተዋለ ያለው ይኸው ሰላምታ ያለመለዋወጥ ሁኔታ ሥርወ መሠረቱ ይህ ነው፣ ከጥንት ጀምሮ እዚህ ትውልድ ላይ ደርሷል።

በህማማት ሳምንት "ሥርዓተ ፍትሀት አይደረግም"፣ ይኸውም ይህ ሳምንት "ከሞት ወደ ሕይወት የተሸጋገርንበት፣ ከጨለማ ወደ ብርሀን የተጓዝንበት" የመሸጋገሪያ ወራት ምሳሌ በመሆኑ ነው፣
በእለተ ምፅአት መላእክት የመለከትን ድምፅ እንደሚያሰሙ፤ የዳግም ምፅአትን እለት በማሰብ ምዕመናን ጥሪውን ሰምተው፣ ከዚያም አስቀድመው የበአሉ ታዳሚዎች መሆናቸውን ለማጠየቅ "በዚህ ሳምንት ዲያቆኑ ቃጭሉን እያቃጨለ ምዕመናኑን ያሳስባል"

በዚህ የህማማት ሳምንት የስግደት የፀሎትና የፆም ስርዓታችን እንደሚከተለው ነው።

"ስግደት"
በሰሙነ ሕማማት 41 ጊዜ ኪርያላይሶን ፣ 12 ጊዜ አቡነ ዘበሰማያት እየተዜመ እጅግ አብዝቶ ይሰገዳል፣ ይህም ክርስቶስ ስለ እኛ በደልና ኃጢአት በሰው እጅ ተይዞ የቀበለውን መከራና ስቃይ ለማሰብ ነው፣ ክርስቶስ ለእኛ ፍቅሩን አንዴ ሞቶ ገልፆልናል፣ እኛ ግን ስለ በደላችን፣ በፍርድ ሰዓት በግራ እንዳንቆም አብዝተን ንስሐ በመግባት ሥጋችንን እናደክማለን።

"ጸሎት"
በሰሙነ ህማማት ከ24 ሰዓት ውስጥ 10 የጸሎትና የንባብ ሰዓታት ይገኛሉ፣ እኒህም ከጠዋቱ 1 ሰዓት ፣ 3 ሰዓት ፣ 6 ሰዓት ፣ 9 ሰዓት፣ 11 ሰዓት እንዲሁም ከምሽቱ 1 ሰዓት፣ 3 ሰዓት፣ 6 ሰዓት፣ 9 ሰዓት፣ 11 ሰዓት ናቸው፣ በእነዚህም ሰዓታት የጌታን ስቃይ ለማዘከር "መዝሙረ ዳዊትና፣ ግብረ ሕማማት፣ ድርሳነ ማህያዊ አብዝተው ይጸለያሉ" ይህ በቤተ ክርስቲያናችን ውስጥ የሚደረግ የጸሎት ሥርዓት ሲሆን ምዕመናን ተገኝተው ፀሎቱን ተካፋይ ይሆናሉ፣ "የግል ጸሎታቸውም ከመዝሙረ ዳዊት ፣ ከውዳሴ ማርያምና ከውዳሴ አምላክ ፣ ከሰይፈ ሥላሴና፣ ሰይፈ መለኮት" ሲሆን፤ "መልክዓ መልክእና ድርሳናት እንዲሁም ተአምራት በህማማት ሳምንት ባሉ ቀናት ውስጥ አይጸለዩም

ይልቁንም ከቅዱሳን መጻሕፍት የጌታችን የአምላካችንን መከራውንና ድካሙን የሚያስታውሱ "ከትንቢተ ኢሳይያስ፣ ከትንቢተ ኤርሚያስ፣ ከመዝሙረ ዳዊት ፣ ግብረ ህማማት" በየሰዓቱ ይነበባል፡፡

"ጾም"
በሰሙነ ህማማት "ብዙ አዝማደ መባልዕት አዘውትረን የምንመገባቸው ምግቦች አይበሉም" ይልቁንስ በመራብ፣ በመጠማት፣ በመስገድ፣ በመጸለይ በመጾም በየሰዓቱ የጌታችን የአምላካችንን የኢየሱስ ክርስቶስን መከራውን ህማሙን ግርፋቱን ድካሙን በማሰብ ይዋላል። በዚህም "ሳምንት እስከ ምሽቱ አንድ ሰዓት እንድንጾም" ይኸውም ቆሎ፣ ዳቦ፣ ውኃና ጨው ብቻ እንደታዘዙ በግብረ ሕማማት ላይ ተጽፎ ይገኛል።

በሰሞነ ህማማት የሚጸለዩና የማይጸለዩ የጸሎት መጽሐፍት አሉ

"በሰሞነ ሕማማት የማይደገሙ የማይጸለዩ የጸሎት መጽሐፍት" :-

1.ድርሳናት
2.ገድላት
3.መልክአ መልክእዎች

"የሚጸለዩት ደግሞ:-"

1. ውዳሴ ማርያም፣
2.መዝሙረ ዳዊት በብዛት ከወትሮ በተለየ ቢያንስ የየዕለቱን ሙሉዉን፣
3. ሰይፈ መለኮት፣ ሰይፈ ሥላሴ፣ ውዳሴ አምላክ
4. ድርሳነ ማኀየዊ የጌታችን ሕማማትና እንግልቱ ያደረጋቸው ተዓምራትና፣ ዐርኬ መልከአ ማኀየዊ አንድ ላይ የየዕለቱ አለው፣
5.ላሓ ማርያም የእመቤታችን ለቅሶ ሐዘን

እነዚህ የጸሎት መጽሐፍቶቹ ያለን ሰዎች በርትተን እንጸልይባቸው፣ የጌታችንንም የእመቤታችንን ስቃይ እንግልት ሐዘን እንካፈል፣ በረከት እናግኝ ለአገራችንና ለዓለም ሰላም ለቤተክርስቲያናችን ፍቅር፣ አንድነት ተግተን እንጸልይ"
@haymanotanednat
@haymanotanednat
" መልካም ሰሞነ ሕማማት "

435 views02:35