So‘nggi yillarda olib borilayotgan ochiqlik siyosati natijasida yurtdoshlarimizning ijtimoiy faolligi ham ortib bormoqda. Shu bois maktabgacha va maktab ta’limi tizimiga doir ijtimoiy tarmoqlar va bevosita vazirlikka kelib tushayotgan murojaatlar bizni yanada faol ish olib borishimizga undaydi.

Tan olishimiz kerak, joylarda o‘z muammosiga najot topa olmagan fuqarolar bugun shuncha yo‘l bosib vazirlikka kelishga majbur bo‘lmoqda. Agar muammo o‘z vaqtida o‘rganilib, fuqaroga to‘g‘ri tushuntirish berilganida bunday holat kuzatilmas edi.

Buni joriy yilning o‘tgan davri mobaynida maktabgacha va maktab ta’limi tizimiga doir vazirlikka kelib tushgan 30 mingdan ortiq murojaatlardan bilish mumkin.

❗️Ushbu raqamlarni hududlar kesimida tahlil qilganimizda eng ko‘p murojaat Qashqadaryo viloyati 3 797 ta (12 foiz), Toshkent shahri 3 564 ta (11,5 foiz), Surxondaryo 3 154 ta (10 foiz), Toshkent 3 067 ta hamda Samarqand viloyatlari - 2 838 ta (9 foiz) ekanligi ma’lum bo‘ldi.

Kuni kecha vazirlikda hudud rahbarlari va ta’limga mas’ul barcha xodimlar ishtirokida Hay'at yig'ilishi o‘tkazdik va unda ushbu hududlarni shartli ravishda “qizil hudud” deb e’lon qildik.

Yuqoridagi statistikani inobatga olgan holda tizimda oktabr oyini murojaatlar bilan ishlash bo‘yicha “Dolzarb oylik” etib belgiladik va barcha murojaatlarni tahlil qilgan holda qonuniy ko‘rib chiqish va keyinchalik ham ushbu ishlarni tizimli davom ettirish to‘g‘risida topshiriq berildi.

Bundan tashqari murojaatlarni ko‘rib chiqish bo‘yicha vazirlikda maxsus “shtab” tashkil etilib, uning tarkibiga barcha tarkibiy bo‘linmalaridan tajribali mutaxassislar jalb qilinishi to‘g‘risida ko‘rsatma berdim.

Yig‘ilishda murojaatlarni qonun talablari asosida ko‘rib chiqishni o‘z vaqtida nazorat qilmaganligi uchun ayrim hudud rahbarlariga tegishli choralar ko‘rishga ham majburmiz.

Shu o‘rinda maktabgacha va maktab ta’limi tizimiga qarashli murojaatlarni qabul qilish bo‘yicha barcha hududiy boshqarma boshliqlarining maxsus botlari tashkil etilganligini, shuningdek “Vazirga murojaat” portali yo‘lga qo‘yilganligini yana bir bor eslatib o‘tmoqchiman.

Har bir murojaat ortida kimningdir taqdiri yotadi va shu bois biz uchun ularni o’z vaqtida qonun doirasida hal etish juda muhim.

So‘nggi yillarda mamlakatimizda maktabgacha ta’lim sohasini rivojlantirish maqsadida davlat-xususiy sheriklik asosida tadbirkorlar bilan keng hamkorlik yo‘lga qo‘yildi. Prezidentimiz tashabbuslari bilan tadbirkorlarga nodavlat maktabgacha ta’lim tashkilotlarini tashkil qilish maqsadida imtiyozli shartlarda kreditlar ajratilishi yo‘lga qo‘yildi.

Natijada 2018–2023-yillar davomida davlat-xususiy sheriklik asosida 1657 ta nodavlat bog‘chalar tashkil qilinishi orqali 144 mingdan ortiq bolalar o‘rni yaratildi.

Davlat va xususiy sheriklik asosida bog‘chalar tashkil etgan tadbirkorlar tomonidan so‘nggi kunlarda mazkur imtiyozli kredit davrini uzaytirish bo‘yicha juda ko‘plab murojaatlar kelib tushdi. Ushbu tadbirkorlarning muammolarini hal qilish va ularni yanada qo‘llab-quvvatlash maqsadida bugun Prezidentimiz tomonidan imzolangan “Maktabgacha ta’lim sohasida davlat-xususiy sheriklikni yanada qo‘llab-quvvatlashga oid qo‘shimcha chora-tadbirlar to‘g‘risida”gi Qarori (PQ–316-son, 27.09.2023-y.) o‘z vaqtida qabul qilingani ayni muddao bo‘ldi.

Ushbu Qaror bilan 2018–2022-yillarda davlat-xususiy sheriklik asosidagi nodavlat maktabgacha ta’lim tashkilotlarini tashkil etgan tadbirkorlarning ajratilgan imtiyozli kreditlar bo‘yicha imtiyozli davr muddati 2024-yilning 1-oktabriga qadar uzaytirildi.
Imtiyozli kreditlarning tabaqalashgan foiz stavkalari va muddatlari tadbirkorlar uchun qulay shartlar asosida qayta belgilandi. Bunda kredit muddatlari uzaytirilib, foiz stavkalari kamaytirildi.

Shuningdek, mazkur qaror bilan davlat-xususiy sheriklik loyihalarini amalga oshirish uchun tijorat banklarining mablag‘lari hisobidan kreditlar ajratilganda, ular bo‘yicha foiz stavkasining tabaqalashtirilgan foiz stavkalaridan oshadigan (asosiy stavkaning 1,75 baravarigacha) qismi Tadbirkorlik faoliyatini qo‘llab-quvvatlash davlat jamg‘armasi tomonidan kompensatsiya qilinishi belgilandi.

Mazkur Qarorning imzolanishi Davlatimiz rahbari tomonidan ta’lim sohasida faoliyat yuritayotgan tadbirkorlik subyektlarini yanada qo‘llab-quvvatlash, bolajonlarimizni maktabgacha ta’lim qamrovini kengaytirishga qaratilgan yana bir muhim qadam bo‘lib xizmat qilishi shubhasiz.

Shu o‘rinda ta’lim sohasi rivojiga hissa qo‘shayotgan barcha tadbirkorlarimizga faoliyatlarida muvaffaqiyatlar tilab qolaman.

Bugun barchamiz uzoq kutgan "Pedagogning maqomi to‘g‘risida"gi qonun Oliy Majlis Senati tomonidan ma'qullandi.

Mazkur Qonun ta’lim sohasida faoliyat yuritayotgan tarbiyachi, o‘qituvchi va murabbiylarning haq-huquqlarini, jamiyatdagi obro‘-e’tiborini yuksaltirishga, ular orqali farzandlarimiz tahsil olayotgan ta’lim dargohlaridagi ta’lim sifatini yaxshilashga, sog‘lom muhit yaratishga xizmat qilishi shubhasiz.

Davlatimiz rahbarining pedagoglarimiz faoliyatini himoya qilishga qaratilgan bir qator Qaror va Farmonlari mavjud bo‘lib, ular orqali pedagoglarni moddiy qo‘llab-quvvatlash, ularning haq-huquqlarini himoya qilish uchun shart-sharoit va huquqiy asoslar yaratilgan. Shunga qaramay, pedagoglarimizning nufuzini oshirish uchun ushbu Qonun juda muhim edi.

Qonun eng avvalo bugungi kunda juda ko‘p muhokamalarga sabab bo‘ladigan masala, pedagog xodimlarga o‘z kasbiy faoliyati bilan shug‘ullanishiga g‘ayriqonuniy ravishda aralashuvlardan himoyalanish huquqi berilayotganligi bilan ham ahamiyatga molik. Mana shu birgina jihat, ya’ni pedagog o‘z kasbiy faoliyatini amalga oshirish chog‘ida o‘z sha’ni, qadr-qimmati va ishchanlik obro‘sini himoya qilishi, pedagogning nufuzini yangi bosqichga ko‘taradi, deb o‘ylayman.

Fursatdan foydalanib yaqinlashib kelayotgan qutlug‘ sana bilan tabriklayman!

Ўзбекистон Республикаси Президентининг “Ўқитувчи ва мураббийлар куни муносабати билан таълим-тарбия тизимида алоҳида ўрнак кўрсатган ходимлардан бир гуруҳини мукофотлаш тўғрисида"ги Фармони
—
Указ Президента Республики Узбекистан "О награждении группы особо отличившихся работников сферы образования и воспитания в связи с Днем учителей и наставников"

Prezident.uz|Facebook|Instagram|YouTube|Twitter

#Tabriknoma

Aziz ustoz va murabbiylar, qadrli hamkasblar!

Har bir kun o‘qituvchi sha’niga sharaf qo‘shayotgan, ta’lim sifati, maktab masalasi davlat siyosatining ustuvor yo‘nalishiga aylangan Yangi O‘zbekistonda siz bilan bir safda faoliyat olib borayotganimdan behad baxtiyorman.

Ustoz maqomi yanada ulug‘lanib, o‘qituvchi qadr-qimmatini yuksaltirish qonun bilan mustahkamlanayotgan shukuhli damlarda sizlarni bayram bilan qutlash menga cheksiz quvonch va iftixor bag‘ishlaydi.

Muhtaram muallimlar!

Siz har kuni millionlab bolalarga nafaqat ta’lim-tarbiya berasiz, balki ularga o‘z farzandlaringizdan ziyoda mehr-muhabbat ulashib, mamlakatimiz ertangi egalarini kamolga yetkazasiz.

Sizning ko‘z o‘ngingizda kelajak qad rostlaydi, Siz ko‘rsatgan ma’rifat yo‘lingiz avlodlarni nurafshon manzillarga yetaklaydi. Ana shunday mashaqqatli va sharafli kasb egasi bo‘lganingizning o‘zi taqdirning Sizga eng buyuk tortig‘i, Yaratganning siylovi desam yanglishmagan bo‘laman.

Ishonamanki, fidoyilik bilan yurtimizda ta’lim sifatini yuqori darajaga olib chiqib, Davlatimiz rahbari ta’kidlaganidek, farzandlarimizni Vatanimizning taqdiri va kelajagi uchun mas’uliyatni zimmasiga olishga qodir qilib tarbiyalash yo‘lida bor kuch-g‘ayratingizni ayamaysiz.

Bayram bilan barchangizni yana bir bor samimiy qutlar ekanman, buyuk shoirning “muallim desalar meni qaniydi!” degan yuksak orzusi haqidagi mashhur satrlar xayolimdan o‘tyapti. Siz ana shunday buyuklar chinakam havas qiladigan maqomdasiz!

Bejiz jadid bobolarimiz ziyolilarni, o‘qituvchi-muallimlarni millat oydinlari deb atamagan. Siz navqiron nasllar ongu qalbini yoritib, ma’rifat ulashar ekansiz, jismingizga tuganmas kuch-quvvat, qalbingizga adoqsiz quvonch, xonadoningizga fayzu baraka, faoliyatingizga ulkan muvaffaqiyatlar doimo hamroh bo‘lishini tilayman!

Ustoz maqomi hamisha bugunidek sarbaland, bayramimiz boqiy bo‘lsin!

Ehtirom bilan,
Hilola Umarova

✅ Ijtimoiy tarmoqlarda samarqandlik tadbirkor o‘z o‘qituvchisiga 2 xonali uy sovg‘a qilgani haqidagi xabarni o‘qib, rosti juda xursand bo‘ldim.

⚡️ Ustozlarni e’zozlash an’anaga aylanayotgani rost bo‘lsin!

O‘z o‘rnida, biz ham saxovatli yurtdoshimizga minnatdorlik bildirishni niyat qildik.

Bugun Samarqand shahrida o‘tkazilayotgan BMTning Butunjahon sayyohlik tashkiloti (UNWTO) 25-Bosh assambleyasi doirasida “Global ta’lim Forumi” bo‘lib o‘tdi. Forumda 140 davlatdan kelgan delegatlar, turizm rahbarlari bilan bir qatorda ta’lim sohasiga mas’ul rahbarlar ham ishtirok etmoqda.

Bugun turizm va ta’lim bir-biriga chambarchas bog‘liq soha ekanligi barchamiz bilamiz. Shu bois, Forum ishtirokchilariga O‘zbekistonda ta’limi sohasida amalga oshirilayotgan ishlar hamda xalqaro miqyosda erishilgan yutuqlar to‘g‘risida ma’lumot berib o‘tdik.

Xabaringiz bor, yurtimizda “Ta’lim uchun qulay muhit” dasturini amalga oshirish, umumiy o‘rta ta’lim tizimini yangi bosqichga olib chiqish, 1 000 nafar tarbiyachi va o‘qituvchini xorijiy mamlakatlarga malaka oshirishga yuborish, O‘zbekiston Global Innovatsion Indeksda Top-50 talik mamlakatlar ro‘yxatiga kirishiga erishish borasida katta maqsadlar amalga oshirishdagi dolzarb vazifalarimizdan biri.

Joriy yilda Prezident maktablari bitiruvchilaridan 114 nafari, Ixtisoslashtirilgan maktablar bitiruvchilaridan 378 nafari dunyoning nufuzli ta’lim maskanlarida tahsilni davom ettirmoqda. Ular qatorida Colorado State University, Harvard University, TUM (Technical University of Munich), Arizona State University, California Institute of Technology va King‘s College kabi nufuzli ta’lim dargohlarining borligi xorijiy ekspertlarda katta qiziqish uyg‘otdi.

Aytish lozim, 2023-yil xalqaro doirada katta yutuqlar davri bo‘lganligi, xususan o‘quvchilarimiz tarixdagi eng yuqori natijalarni qayd etib, xalqaro olimpiadalarda 8 ta oltin, 24 ta kumush va 37 ta bronza, jami 69 ta medalni qo‘lga kiritishdi.

Qolaversa, joriy yilda Ispaniya, Italiya, Оzarbayjon, Rossiya, Turkiya, Qozog‘iston, Qirg‘iziston, Tojikiston kabi davlatlarda 15 ta xalqaro tanlov, festival va musobaqalarda “Barkamol avlod” maktablarining 500 nafarga yaqin o‘quvchisi Gran pri va boshqa yutuqlarni qo‘lga kiritganliklari haqidagi yutuqlar qayd etildi.

Bugun oldimizda turgan asosiy vazifalardan biri o‘quvchilarimizda erta yoshlardanoq ushbu soha haqida tushuncha hosil qilish hamda ularning qiziqishlarini oshirishdir. Vazirlik tizimida Samarqand va Namangan viloyatlarida bolalar sayyohlik bazalari faoliyat ko‘rsatmoqda. Endilikda Samarqanddagi 20 ta maktabda tajriba sifatida maktabdan tashqari ta'lim sifatida turizm soatlarini yo‘lga qo‘ymoqchimiz. Bu borada Butunjahon sayyohlik tashkiloti bilan hamkorlikda ishlayapmiz.

Xalqaro forum doirasida ta’lim, fan va turizm sohasidagi innovatsiyalarga doir dolzarb masalalar jonli muhokama qilinib, samarali taklif-tavsiyalar ishlab chiqildi. O‘ylaymanki, Forum qatnashchilari tomonidan bildirilgan ta’limga doir fikr va mulohazalar, takliflar maktabgacha va maktab ta’limi rivoji yo‘lida xizmat qiladi. Buning uchun yurtimizda barcha imkoniyatlar yetarli.

Forum ishiga muvaffaqiyat tilab qolaman!

#Tabriknoma

Qadrli yurtdoshlar, aziz ustoz va murabbiylar!

Barchangizni chinakam milliy tantanamiz, g‘urur va iftixorimiz bo‘lgan O‘zbek tili bayrami bilan samimiy muborakbod etaman.

Insoniyat o‘z milliy tilini “ona tili” deb sharaflashi bejiz emas.

Chunki bunday ulug‘ e’tirof bizga har lahzada o‘z tilimizni onamizdek e’zozlab, qadrlashimiz zarurligini anglatib turadi. Ona tilimiz bizning jahonda alohida xalq, millat sifatida mavjudligimizni belgilovchi muhim asoslardan biridir.

Inson tug‘ilajak Vatani va tilini tanlamaydi – bu unga Yaratgan ato etgan bebaho ne’matlardir. Ana shu ne’matlarni qadrlab, Vatanimiz taraqqiyoti, o‘zbek tili ravnaqi yo‘lida sidqidildan xizmat qilish va mehnatlarimiz samarasini ko‘rish saodati barchamizga nasib etsin!

Ona tilimiz ruhiyatimizga nur, tafakkurimizga yog‘du, qalbimizga g‘urur baxsh etib abadiy gullab yashnasin!

O‘zbek tili bayrami yana bir bor muborak bo‘lsin!

Hilola Umarova,
Maktabgacha va maktab ta’limi vaziri

✅ Davlatimiz rahbari Qashqadaryo viloyatiga tashrifi davomida hududdagi maktablar sharoiti bilan yaqindan tanishish uchun kutilmaganda Qarshi tumani markazi — Beshkent shahrida joylashgan 12-maktabga bordilar.

Bu yerda maktab infratuzilmasi, o‘quvchilarning ta'lim olishi uchun yaratilgan shart-sharoitlar bilan tanishdilar, o‘qituvchilar va o‘quvchilar bilan bevosita suhbatlashdilar. Maktab pedagoglari bilan muloqot jarayonida sifatli ta'limni tashkil etish uchun yana qanday imkoniyat va sharoitlar zarurligi bilan qiziqdilar.

Shuningdek, ta'limga juda katta e'tibor berish lozimligi, bilimli va sog‘lom bolalargina kelajakda qoqilmay, o‘z yo‘lini topa olishini alohida ta'kidlab o‘tdilar.

Maktab jamoasi ushbu suhbatdan katta taassurotlar olib, mamlakatimizdagi maktablarda yaratilgan shart-sharoitlar, ta'lim sifati, o‘quvchi va o‘qituvchilarni o‘ylantirayotgan boshqa ko‘plab muammo va masalalar Davlatimiz rahbarining shaxsan diqqat markazida ekanligidan xursand bo‘lishdi.

Ta'limga bo‘lgan bunday yuksak e'tibor, albatta o‘qituvchilarimizni ruhlantirib, ishlashga yangi ishtiyoq bag‘ishlashi shubhasiz.

Aytish lozimki, hozirgi vaqtda Qashqadaryo viloyatidagi 1 280 ta maktabda qariyb 680 ming nafar o‘quvchi ta'lim olmoqda. Davlatimiz rahbarining tashrifidan so‘ng viloyat maktablaridagi mavjud shart-sharoitlarni atroflicha o‘rganish maqsadida maktablar rahbarlari bilan uchrashdim.

Qarshi shahridagi 4-, 10-sonli umumiy o‘rta ta'lim maktablaridagi o‘quvchilar bilan suhbatlashar ekanman, ko‘zlari yonib turgan shijoatli, yangi bilimlarni egallashga tashna yoshlarni ko‘rib xursand bo‘ldim.

Abdulla Oripov nomidagi ijod maktabidagi o‘quvchilarining qo‘shimcha til o‘rganishga doir takliflari meni ayniqsa quvontirdi.
O‘quvchilarning bilimga va kasb egallashga chanqoqligi, albatta biz soha mas'ullarini yanada ko‘proq izlanishga, harakat qilishga undaydi.

Biz xalqimiz farzandlarining baxtu kamoli, yuksak bilim egalari bo‘lib voyaga yetishi yo‘lida mehnat qilishdan doimo xursandmiz.