#ليلة_اكتمال_القمر_4
#بقلمي_مشاعر_مبعثره

فجاءة قرب مني لمن انخلعت ، كنت في الباب ، عاوزه الزو كدا قال لي : أهدي ! فستانك اتعلق في الشجره ، بعد شويه بعد عني ، وسمعت لي صفاره عاليه ، اتلفت كدا القاه لك أحمد ، وشايل تلفونو في يدو هزاه قدامي كدا وهو بعاين اتجاهنا ، نظام شفتك وصورتك وانا طوالي بعدت شديد عن أنس ، أحمد غمز لي ودخل الوزاره قدامي.
انا طبعاً خلاص شلت نفس وبقيت ارجف من فوق ل تحت
انس قال لي : دا مالو؟
: أنس امشي لو سمحت
: وريني الزول دا قاعد يضايقك؟
: ما بضايقني امشي لو سمحت وما تكبرا.

قبل يمشي انا دخلت ، ومباريه أحمد بس ؛ لمن وصل مكتبو وهو يصفر ساااي
: احمد اقيف لو سمحت خليني اشرح لك
: تشرحي شنو؟ ما قاعده تودعي حبيبك في باب الوزاره ، بالحضن ، عادي يعني😉
: الموضوع ما كدا ، هو كان بفك لي فستاني الاتعلق في الشجره
: ياتو شجره دي كمان القدام الباب؟
دي كانت وقفه بالنسبه لي ، بس ما عندي زمن للتفكير
غمضت عيوني وقلت لاحمد بجديه : احمد! بالجد مافي شي من الفي بالك
: انا علي بالشفتو ، لكن طلعتي ما هينه ياخ ، حبيب وجبه وعربيه 4x4 انتي طلعتي اكتر موظفه مفتحه هنا وانا ما جايب خبر
: انا حلفت ل! وبعدين أنس دا خطيبي اسأل الناس دي كلها ، خطبني وح نتزوج قريب
: امممم ومالو مستعجل كدا مدام العرس قريب؟
: إنت بس عاوز تستغل الفيديو عشان تبتزني صح؟
: ايوا يلا امسحي الفيديو المعاك
: واضمن كيف انك تمسح المعاك؟
: اسي بوريك
طوالي طلعت تلفوني ومسحتو قدامو ، قال لي : احذفيه من السله
حزفتو منها ، وقلت له : يلا دورك
قعد يضحك وطلع لي تلفونو وقال لي : انا ما صورتك اصلاً هههههه انا بجي بتلفوني مقغول من البيت وبفتحو هنا في المكتب وشوفي بعينك ، فتحو واداني له ، الاستوديو كلو صور بنات وعفن ، حمرت له قعد يضحك
قال لي : خليني افتحهم لك واحد واحد ، رايك شنو؟
طوالي جدعت له تلفونو ، صباه قبل يقع
قلت له : يا تافه فاكرني زيك بشاهد العفن دا
: ههههههه ، تافه انا ولا انتي البتحضني في حبيبك قدام الباب ، اسي ما خفتي زول يشوفك ويفضحك؟

عيوني رغرغت وانا بقول له : والله العظيم ي أحمد الفي بالك دا غلط ، جيب لي مصحف اسي احلف لك عليه ، انا وآلله العظيم ما ذي ما انت فاكر ، ولا حصل عملت لي اي علاقات ذي دي
: خلاص خلاص مصدقك ، عارفك طيره ساي والامور دي أكبر منك.
: واسي ح تعمل شنو؟ انا ما عندي شي ابتزاك به و ..... ح تطردني من الشغل صح؟
: ذي م انتي حلفتي لي اسي ، انا بحلف لك انو ما صورتك ، وشغلك باشريه عادي ما عندي معاك مشكله ، بس نصيحه للزمن ، زولك دا اعملي حسابك منو ، مافي راجل بعمل في خطيبتو كدا ، وانتي شكلك بريئه شديد وما عندك خبره في العلاقات ، ساهل انو واحد زيو يستغلك.

طلعت بدون م ارد له وانا بفكر في البحصل معاي دا ، أنس دا عاوز مني شنو؟ فعلاً ما كان في اي شجره يتعلق فيها فستاني ، هو كان بتحرش بي حرفياً ، وبرضاي كمان ، كل الناس ملاحظه للشي دا ، الا انا بعزرو واقول ما قاصد ليه؟ ليه؟
ما قدرت اركز في الشغل نهائي ، ونور لمن جات مسكت سيرتو ، قالت لي عديل : ابعدي منو دا ما زول عرس
قلت لها : بس هو البعجل في الموضوع
: عشان عارف والدك مافي وم ح توافقو على التوقيت دا ، قصدو يعشمك بس لحدي م يصل ل الهو عاوزو.
ختيت راسي في الدرج ب يأس وقلت لها : واااي يا نور ما بصدق
: دا رأيي وانتي ادرى بنفسك

عديت اليوم كلو سرحانه ، وأنس لمن جاء وصلني ما اتكلمت معاه نهائي ، بس ساكتين لحدي ما وصلنا ، غير السلام ما قال لي شي ولا انا قلت له ، نزلت ودخلت البيت ، امي نقت في راسي كدا لمن فترت ، وعادل اخوي جاء شاكلني برضو وقال لي : تاني لو شفتك راكبه معاه بك*سر لك راسك دا

بليل تلفوني رن ، قلت اكيد أنس وما عاوزه اتكلم معاه ، بس مكالمه واحده وما رجع لي تاني ، ولا يقول ساي الزول دي ما سمعتو ولا بعيده ، ولا اهتم زاتو ، انا انحرقت ، شلت التلفون وعاوزه احظر رقمو ، بس اتفاجأت بانو المتصل أحمد م أنس ، طوالي رجعت له
وقلت له بغضب : عاوز شنو مني؟
: كدي قولي بسم الله ، مالك اسي؟
: مافي شي ، خير انت متصل ليه اسي؟
: عايني يا سمر ، انا ما بحب اتدخل في خصوصية زول بس مضطر اقول لك الكلام دا ، سواء رضيتي او لا
: قول ي أحمد
: اول حاجه حابي اسألك ، الزول القلتي خطيبك دا ، عارفه موقع شغلو وين؟
: ما بعرف
: طيب العربيه المعاه دي تبع الشغل ولا حقتو هو؟
: بالجد ما عندي علم ، انت لو عارف حاجه احكي لي ، بس تقريباً تبع الشغل ، وهو شغلو ما بعيد عننا

: انا طلبت ترحال وجاني هو!
: وانت تطلب ترحال ليه؟ مش عندك عربيه؟
: ما تكوني نيرڤز ، حبيت بس اوصل لك فكرة انو في شوية غموض حوليه

قربت اقفل فيه بس جاء في بالي سؤال وقلتو بدون تردد
: احمد انت ك راجل شايف الزول دا فهمو شنو؟
: لو خطبك وعاوزك بالجد صدقيني ما بعمل معاك حركات ذي دي

طوالي اتشجعت وحكيت له بموضوع الخطوبه وانو ابوي مافي ورأي اخواني وامي ونور ، يعني سرد كدا بدون تفاصيل
: عايني ، انتي ببساطه ممكن تتأكدي من نواياه ، بس اقبلي بقرار تعجيل الزواج دا وانتظري ردة فعلو ، لو جادي بعمل العرس ، ولو هو زي م انا متوقع ح ينسحب ، وكدا بتكوني حميتي نفسك منو وطلعتي منها بالسليم ، ياهو تبكي لك يوم يومين وتنسي
صريت وشي وقلت له : انا اسي بحكي لك ليه؟
: انتي حره ، يلا باي
قفلنا على كدا وانا شلت الليل كلو تفكير ، أنس نهائي م اتصل ، زاد شكوكي فيه
___
( عند احمد )
: اها يا أحمد ، انا المفروض امشي ابلغ ولا .......
: لا ، ما تعمل كدا ، انا بحلا لك المشكله دي
: انت بتعرفو يعني؟ عاوز تتوسط له
: والله ممكن تقول م حبيت دور ( الصواطه )، اسمع ، الموضوع دا خليه سر ، ما يطلع مننا
: تمام يا مان ، انا ح اتعامل معاك انت بس تاني
: موافق
: اها معانا الليله؟
: لالا تعبان شويه
: ماشي ، يلا نتلاقى
كان قاعد في الكرسي بتاعو ورا اللابتوب ، غمض عيونو واتزكر لمن كان طالع من الشغل والعربيه بتاعتو اتعطلت به فجاءة
*
: يا الله ، اسي دا زمنك؟ يعني اسي الواحد مجبور يطلب ترحال
فتح التطبيق وطلب عربيه ، بعد نص ساعه تقريبا جاه أنس واي واحد اتفاجئ بشوفة التاني
أحمد قال له : يعني العربيه دي شغاله ترحال؟
: عاين ما تكتر كلامك ، وتاني حاجه ، سمر دي طلعا من راسك بالتي هي احسن
قعد يضحك باستهتار شديد وقال له : على أساس انا قاعد احضنا قدام الأبواب
طوالي أنس قبض فرامل
قال له : انزل من العربيه دي ، وقروش منك ما عاوزا ، بس لو بالغلط شفتك حولين خطيبتي ما تلوم إلا نفسك
: ظابط ، معناها انت امسكا عندك وما تخليها تجي الشغل ولمن تشوفني واقف معاها قدام باب ؛ خلينا نتواجه راجل ل راجل
: انت يا ...... انت أحسن تبعد عن طريقي بس احسن لك ، لانو انا ، انا ، انا ما عاوز اشوف وشك دا
: ولا أنا
نزل خلاه
_____
(في بيتنا)
انا شكيت في أنس بعد اتصال احمد دا ، وتاني يوم من جاء اتكلمت معاه بحزم شديد
قلت له : ما تجيني جنب الباب تاني ، ولا توصلني الشغل بمشي وبجي براي ، عادل اخوي زاتو ما برضى
سكت مسافه وقال لي : طيب اركبي قبل يجي يشوفك
شلت نفس وركبت معاه ، من وصلنا الظلط وبقيت بعيده عن البيت قلت له : انا ما خايفه عادل يشوفني ، ولا زول غيرو ، اصلا م حابه اعمل حاجه هو رافضا
: بس .........
: ما بس في حاجات كتيره غلط قاعده تحصل وانا ما كنت منتبهة لها ، بس تاني م حأسمح انها تتكرر
مد يدو علي ، قلت له : أنس انا لسه قايله لك انو ما بسمح بالغلط

لحظتا هو عرف اني فهمتو ، وقعد يتعزر ويقول انو ما قاصد شي غلط ، وعشان مشتاق لي وووووو
قلت له : تاني ممنوع نطلع مع بعض الا بالحلال
: بس انتي رفضتي الحلال!
: انا ما رفضت ، بس قلت لك ابوي ما موجود
: يعني انتي ما عندك مشكله نتزوج قريب؟
: لا
: جداً يا سمر ، انا بتصل به وبفهمو اني مستعجل ، بالجد والله يا سمر مستعجل شديد

انا كنت بس قاعده منتظره النتيجه ، اما هو ما كذب ، طوالي اتصل بأبوي قال له مستعجل على العرس وانو انا ما عندي مانع

خلى ابوي زعل مني لمن شاكلني بالتلفون وقال انا اتجاوزتو وما المفروض ادي رأي في موضوع ذي دا من غير ما ارجع له ، واخواني واخواتي نفس الشي ، رجعنا تاني لموضوع الزعل والمقاطعه في النهايه ابوي زعل وقال لهم : انا بعمل لها الهي عاوزاه ؛ عشان ما تجي تلومني في يوم من الايام وتتهمني بانو انا وقفت قدام سعادتا ، بس هي الوحيده المسؤوله عن البحصل لها مع الراجل دا ، ان شاءالله يدقا زاتو ، نهائي ما تجي تشكي لي ولا تقول عمل لي ، لأني ما ح احل لها اي مشكله بتخص الراجل دا

ودا كان رأي اخواني الاولاد ، والشي دا خوفني شديد ؛ لأني عارفه كويس انو ممكن تحصل لي مشاكل معاه ، ف حكاية انهم ما ح يقيفو معاي دي صعبت علي الموضوع ، اخواتي البنات ياما اتكلمن معاي ونصحني بس كنت مصره ، امي دي بكت عديل من زعلا ، ابوي قال بحاول يجي في الشهر الجاي عشان يشوف انس ويعقد لي ؛ وكمان أنس كان مصر شديد انو ما بنتظر شهر زياده ، أهلو زاتهم ما جو قالو بجو للعقد بس ، واخواني يسألو ساااي عنهم ، بس ما قدرو يوصلو ل الهم عاوزنو ، ذي مثلاً طريقة تعاملهم مع بعض او مع الناس ، او حتى البيت فيه منو ومنو

عادل قال لي : الناس ديل ما ساكنين بعيد ، بس ما قاعدين يتداخلو مع الناس ، بيتهم دا مليان ، اظن العائله كلها ساكنه مع بعض وفيه اطفال كميه بقرو في المدارس ، بس مافي مدارس الحي القريبه ، مافي زول عارفهم بقرو وين ، ورغم انو البيت دا مليان ، هادئين واصواتهم ما قاعده تطلع نهائي ، وما بستقبلو ضيوف نهائي ، خاصة الرجال ديل ممنوع يدخلو بيتهم ، يعني عايشين في عزله غريبه امكن مع بعض ما بتونسو ، انتي بتقدري تتعاملي مع نسابه زي ديل؟
: بقدر ان شاءالله ، اصلاً ما ساكنه معاهم
يلا أنس طوالي اداني قروش قال لي تشتري الشنطه ، لمن استغربت! والقروش والله بسيطه شديد ، لمن سألت نور اذا كانت بتكفي قالت لي : والله شنطة عزباء ما تجيبا ؛ ولو أهلك عرفو والله يوقفو العرس دا ، هو مالو ما عارف السوق كيف؟
: امكن ظروفو صعبه وما عندو
: مافي حاجه اسما ظروفو ، انتي قلتي شغال في شركه وهدا عندو عربيه وبيتو شقه عديل الناقصو شنو يضيقا عليك كدا؟
: مرتو متوفيه قريب
: معناه ينتظر لمن يكمل حدادو ، عايني يا سمر ، رجعي له قروشو دي وقولي له يشتري الشنطه بطريقتو ويجيبا لك ، عشان يعرف بتجيب ولا ما بتجيب
: تمام ، بس خلي الموضوع دا سر بيننا
: ح اقول لامك يعني؟ ولا دا شي بتقال؟ غايتو الله يهديك ، انتي ما بايره لدرجة انك تقللي من نفسك كدا
: انا لاقيه نفسي مع انس وبنتو ، ما تبقي زيهم عليك الله وتقت*لي فرحي اكتر
: الله يسهل لك يا سمر

تيسير جات لقتنا بنتونس ، غزت يديها في نصها وقالت لينا : انتو ما بتعرفو تشتغلو من غير ضجيج؟ ولا عشان المدير مافي؟ والله تاني صوتكم دا يعلى كدا احكي لأحمد وخليه يتصرف معاكم ، ما ممكن ياخ ، نحن في وزاره ما سوق
نعست عيوني وقلت لها : لو منزعجه خالص كدا ركبي لك سماعه ، لأنو انا مستوى صوتي ثابت ما بنخفض ، ولو ما لعلعت كدا ما بعرف اشتغل
: يعني دا تحدي يا سمر؟
: اتحدى منو؟ وبعدين انتي بتهدديني ب أحمد؟ عليك الله لو عندك صلاحيه امشي اكتبي فيني تقرير
: والله بقيتي تتمادي كمان
نور قالت لها : انتي الجيتي لحدي مكتبنا ، وبتتفاصحي بصفتك شنو ما عارفه ، اسي نحن حصل يوم جينا سألناك من شغلك؟ ما قاعده معدياها في مكاتب الناس
: قصدك شنو يا نور؟
: السمعتيه بس دا ياهو قصدي

زعلت زعل وقعدت تجوط معانا وتشاكل لمن احمد جاء ، نادتو وتحكي له بصيغة مبالغة شديده حتى انها غيرت الحقائق ، هو يعاين لي ساي ، وانا رافعه له حاجبي
قال لي : مشاكلك كترت يا سمر
قلت له : ما براي العندي مشاكل هنا
تيسير طوالي نطت قالت له : بس كدا؟ يعني دا تعليقك على الموضوع؟
قلت لها : انفعلتي اكتر من اللزوم والموضوع طلع ما مستاهل

عاوزه تتكلم قال : اي زول يشوف شغلو خلاص ما عاوزين جوطه ، مافي موظف يتعدى على التاني في مكتبو ، واشتغلو بصمت

عاينت لها وقلت له : ان شاءالله

هي زعلت زعل لحقتو لباب مكتبو وتشاكل ، قال لها : انا ما فاضي لك اسي تمام ، وما تعملي لي قصص مع اي زول ، اسي في سبب بخليك تمشي تسأليهم؟
: يعني انت واقف في صفها؟ وشايفاك الايام دي راخي الحبل ، خير ، بقت تعرف درب المكتب؟
قال لها بحزم : جنب مكتبي دا تاني ما تجي ، سمر دي شاكه فينا وممكن تعمل لينا قصص ، ما تقعدي تتناقري لي معاها كل شويه وتنادي فيني ، انا لابعرفك لا بعرفا مفهوم؟
: كيف شاكه؟ اوعا تكون هي الصورتنا
: لا ما هي ، بس بطريقتك دي اكيد ح تعملا يوم ، يلا امشي شوفي شغلك

انا ونور ضحكنا عاد ضحك ، لاننا كنا بنعاين لهم بالشباك وباين من حركاتو انو بشاكلا ، المهم رجعت البيت ولمن انس اتصل فهمتو انو لازم يشتري الشنطه براه وانا ما عندي اعتراض على اي شي يختارو

قال لي : بس انتي الح تلبسيها ، ونحن ما شفع ؛ يعني قصة انو العرسان يسوقو اهلهم ويمشو السوق يعزلو دي مافي لها داعي ، سوقي نور واشتري الانتي عاوزاه يا سمر
على اساس مديني مليار ، المهم سكت على خشمي وقلت خلاص بس اتما من قروشي مضطره عشان امي ما تقوم تعمل منها موضوع ، وهي كل يوم تسأل ، وانا ساكته عن الموضوع ، حتى نور قلت لها : ذاد القروش
المهم مشينا انا وهي وامي وواحده من اخواتي ، ولمن سألو عن انس قلت لهم : مشغول
اها قعدو يعزلو في التياب الغاليه وخمسه خمسه طوالي رجعتهم وامي زعلانه
قالت لي : هو مديك كم اصلو؟
قلت لها : ما حدد ، مفتوحه بس قال برسل القروش في حساب بتاع المحل
: معناها تشتري كل النفسك فيه
: بالجد ما عاوزه شي ، الراجل مرتو ميته ، والعرس مفاجئ له
: هو المستعجل ؛ خليه يدفع
وقالت لبتاع المحل : يلا نزلي التياب دي
: لالا ، لو سمحت ما تنزلهم ، انا عاوزه توبين بس

عاد حصلت جنس جوطه ، وانا اصلاً ما عندي قروش كتيره للدرجة دي لمن اكملا شنطه ، بعد تعب شلت ثلاثه تياب وجلبابين وتوب هزاز وسفنجه والملابس الداخليه والحاجات التانيه دي واحد واحد بس ، اما الميكاب بس تميت المكياب العندي ، يعني لا جبت روج ولا ماسكارا ولا اي لاينر ولاغيرا من لاوازم الميكاب اليومي لانو عندي ، بس جبت فاونديشن وشادو ومانكير واحد وبرايمر ، حاجات بسيطه شديد ، وبتاع المحل من حرقتو ما كان عاوز يدينا هديه زاتو ، والتوب الهديه دا بس طقمتو لامي توب ام العروس ، كانت حاجه مخجله شديد بالنسبه لي ، بس اشتريت ل نور شنطة يد صغيروه كدا من حقات الجرد ديل عشان جات معاي والا هي البتهدي امي مني ، لمن جينا البيت تشاكل وعرفت انو انس ما اداني قروش كويسه ، ونور فهمت اني تميتا براي
لكن سكتت

طبعاً هو خلاها عندو في البيت عشان اهلو بجو مره واحده للعقد وبجيبوها معاهم ، انا اشتريت حاجات حبستي براي كريمات وطلح وغيرو ، ابوي حدد زمن جيتو قبل العقد ب اسبوع ، اول مره يجي ويسلم علي بجفاف كدا ، ما كان راضي نهائي خاصة لمن قعد مع امي واخواني وبقو يتكلمو في الموضوع ، انا دخلت الغرفه بس خليتهم ، أنس جاء اليوم داك سلم عليه وقعد اتونس معاه عشان يديه الامان ، ما كان عندو مشكله معاه ك شخص ، بس طريقة العرس دي ما عاجباه

المهم عد الاسبوع وامي كانت مجهزه الريحه وكل شي مع الأهل والجيران ، طبعاً الريحه رسلا براها ، انا كنت بمشي الشغل لحدي يوم الأربعاء قررت اقيف ، مشيت لأحمد في المكتب بعد الفطور
دقيت الباب ، قال : اتفضل
طوالي دخلت سلمت وواقفه ، قال لي : عاوزه حاجه يا سمر؟
: انا كان طلبت اجازه وانت قلت لي عندك اسبوعين ، ف اذا ممكن ابدأ من اليوم ، وح اعوض الشغل بتاعي ان شاءالله
: إجازه لشنو يعني؟
: أحمد انا قلت لك زواجي الجمعه الجايه
: ايواا صح؟ مبروك يا زوله ، والله طلع منك بس ما عزمتيني
: ا انا عزمت كل الموظفين انت معاهم طبعاً
: لالا خير ربنا يوفقك ان شاءالله ، ابشري وخلي الشغل في غيرك بكملوه ، انتي انبسطي بعرسك
: شكرا ، عقبالك كدا ان شاءالله
قعد يضحك ضحكه فيها نوع من الألم ، خلاني اسألو بفضول : انت متين ناوي تتزوج ي احمد؟
: لمن القى واحده تقبل بي
: عزرك مافي محلو ، مستحيل تكون اترفضت ، على الاقل كم مره يعني؟
: م حاولت في الاساس ، لأني عارف انو مافي واحده بتقبل تعيش وضعي
: ح تزعل لو قلت لك عيبك بكل صراحه؟
غضب حواجبو وقال لي : قولي
: انت طبعاً عارف نفسك كازانوفا وامكن البنات يخافو من الخيانه ، بس شايفه انو عادي الرجال المن نوعك دا قاعدين يتزوجو ، والغريبه انو البنات بتهافتو عليهم
: هههههه مخك مشى بعيد يا بنت ، شنو كازانوفا وبتاع ، دي ما مشكلتي أبداً طبيعي انو الراجل الاعذب يعيش علاقات متعدده لأنو مافي علاقه بتحكمو ، بس بعد الزواج بخلص لواحده
: طيب في شنو تاني؟
: في قيود ، اسريه! عموماً الف مبروك يا سمر ، وان شاءالله ربنا يهنيك مع ..... أنس
: انت لسه عندك تعليق عليه؟ ما هدا طلع جادي ومستعجل على الزواج وما قاعد يغشني ذي ما قلت ، وموضوع الشغل دا انا ما بحب اتدخل فيه ، اي زول بظروفو ، والظروف مقدره
: تمام ، ممكن تمشي ، وكملي باقي مواضيعك ، نتلاقى وانتي في عالم النساء
: اسي امشي قصدك؟
: ههههه ايوا اتفضلي ، وكملي فطورك في البيت
: شكرا احمد ، وبتمنى تشرفنا يوم العقد ان شاءالله
: ان شاءالله ، انتي بس كتري من الصور في الحالات ، نشوفك بالزفاف حلوة ولالا
: لالا مافي زفاف ، عقد وعزومه بس ، لكن عندي حفلة حنه بكرا ، دي ممكن ارفع منها صور
: تمام ، بالتوفيق
: شكرا
طلعت طوالي ، ونور كالعادة زوغت معاي ، غشت جابت اولادا من الروضه والمدرسه وجات ، كان يوم حافل ، شالو لي وشي بليل ، وتاني بوم من الصباح حننوني اما المساء كانت الحفله ، ابوي اجر لي صاله ظابطه ركبوها ، للحفله والعزومه تاني يوم ، اها انا كنت في الكوافير حاجزه فستان ظابط ، واخترت المكياج والتسريحه براي ، طلعت ظابطه واتصورت ، وختيت الصور ، طبعاً رسلت منهم ل أنس ، قبل نطلع اتصل بي
: شفت الصور الرسلتا لك؟
: سمر انتي مجنونه؟
: ليه؟
: امسحي الصور النشرتيها دي اولا ، تاني حاجه اياك تطلعي بالمنظر دا ، انا ما ديوث عشان اتفرج على زوجتي طالعه قدام الرجال بشعرا وصدرا برا كدا
: بس الفستان نظامو كدا ، وانا م أول واحده تطلع كدا
: ولا اول ولا أخر ، مافي بنت ناس بتطلع كدا ، ولا تقولي لي عروس ، شعره واحده ما تطلع ، وتلبسي حاجه تغطي صدرك دا انتي فاهمه ولالا

كلامو كان حار شديد وانا غلبني الرد ، بسرعه حذفت الصور وقعدت افك في التسريحه ، صاحباتي والميكاب ارتست كلهم مستغربين وبسألو
قلت لهم : أنس رافض اطلع بدون حجاب
: والا اسي جاي يتكلم؟ ولا انتي اول عروس تطلع كدا؟ شفتي اوعك تخليه يتحكم فيك من اسي
: بس كلامو صح يا نور
: وانتي ما كنتي عارفه يعني؟ الحكايه قناعه ، انتي ما طفله ، ومدام عارفه كدا ما كان من الاول تسرحي وتحجزي الفستان دا ، اما انو هو يفرض عليك رايو دا الغلط ، لقدام بلزمك بحاجات كتيره
: في النهاية ما بقدر اناقشو لأني الغلط
: لا تناقشيه طوالي ، دا حقك
: نور انا ما عاوزه مشاكل ، خليني البس طرحه بس واريح نفسي
: الطرحه دي بتخرب لك النظام كلو
بعد نقاش طوالي خليتهم بس يعملو لي ربطه بطرحتين وطلعت كدا ، وطبعا ما رفعت اي صوره ، يلا هو طلب يشوف الصور ، رسلتا له برضو ما راضي ، شغال لي صدرك برا واليدين ضيقه وكدا
قلت له : أنس ، انا قبيل احترمت رأيك واخدت منو الصح ، حتى اني لومت نفسي ، بس ممنوع تتحكم في لبسي ، انا ما زوله جاهله ، بعرف الحلال من الحرام والساتر من المكشوف ، انت ما من حقك تلزمني بأي لبس لقدام ، انا فعلاً غلطت ، بس دا عشان مفهوم انو العرس مره واحده والعروس بتعمل الحاجه دي مره واحده ، ودا غلط عارفه ، وحتى اني في العادي ما قاعده اطلع ولا سبيبه واحده وانت عارف
: ما هو انا لو سكت لك بكرا بتجي بغيرو ، دا شي مفروض تفهميه عشان نواصل
: عاين طبيعتي انا ما بتتغير بناءا على رغباتك انت ، دا لو انت حابي نواصل

هو طبعاً فهم انو ما بقدر يهددني وعادي اوقف كل شي ، قام هبط وقال لي : يا بنت افهمي انو انا بغير عليك ، وما عاوز زول غيري يشوف مفاتنك
: عوراتي انا ساتراها ، وصدري ما برا ذي ما انت قاعد تقول
: طيب ما تزعلي ، ما بتحكم فيك تاني البسي الانتي عاوزاه ، بس ما ترفعي صورك استوري ممكن؟
: ما عندي مشكله
: وما تزعلي مني ، نحن بكرا ح نتزوج ، وما بهون علي نبداها بزعل وتنومي وانتي شايله في نفسك مني
: لالا مافي زعل
: بكرا ح نجتمع اخير ، انا وانتي ووتين ، ح نتلم كلنا في بيتنا ....... يا وجه القمر !

يتبع

#ليلة_اكتمال_القمر_5
#بقلمي_مشاعر_مبعثره

: طيب ما تزعلي ، ما بتحكم فيك تاني البسي الانتي عاوزاه ، بس ما ترفعي صورك استوري ممكن؟
: ما عندي مشكله
: وما تزعلي مني ، نحن بكرا ح نتزوج ، وما بهون علي نبداها بزعل وتنومي وانتي شايله في نفسك مني
: لالا مافي زعل
: بكرا ح نجتمع اخير ، انا وانتي ووتين ، ح نتلم كلنا في بيتنا ....... يا وجه القمر !
: وجه القمر؟
: جذابه وبعيده زيو ، مهما الواحد يمد يدو ما بقدر يصل لك ، ولو وصل بلقى ممانعه ، انا راجل بحب النوادر يا سمر! وبستمتع بانتزاع المستحيلات ، ما تفتكري انو يوم بكرا دا جاء بالساهل.
: انا اكتر واحده عارفه مدى صعوبتو ، بكرا القمر بكون مكتمل
: ايوا ، وانتي حاتكوني زيو عروس ، ح تكون اكتر ليله مختلفه في حياتي كلها ، وانتظرتا كتير
: بديت تخوفني
: مافي شي بخوف غير العادي ، اما النادر والنفيس ، بفضل مميز دائما ويلقى الإهتمام
المهم اليوم داك سمعت اغرب كلام ، واقسى عبارات غزل ، كأنو بقول لي كوني مميزه وصعبه في نفس الوقت!
عدت ساعات الليل وجاء الصباح بتفاصيلو الكتيره ، وموضوع الشاي والفطور ، لمن هو اتصل وقال لي : نحن اتحركنا ، وبنصل قبل الصلاة ان شاءالله جهزي نفسك

انا طوالي حكيت لناس البيت ، جهزو امورهم ، وانا لبسوني التوب الأحمر والجدله ومكيجوني ، وطبعا ما طلعت ولا خصله واحده عشان عارفاه ما بقبل

كانت معاي اختي ونور ، اي واحده بترمي كلمه براها ، فاهمه انهم كانو متمنين لي عرس احسن من كدا وحفله وزفاف ، الجماعه اتأخرو شديد لمن الاذان الاول اذن حتى وصلو ، قلت لأختي : عليكم الله ما تغنو ومافي واحده تزغرد ، المرحومه قريبتهم ، واحتمال يكونو أهلا معاهم برضو ، احترمو بس حزنهم.
: عايني هم لو حزنانين ما كانو عملو عرس في الزمن دا واستعجلو كمان.
: أنس استعجل عشان بنتو ، وانا بحترم الحاجه دي
: انا ما بقدر امنع لي واحده تزغرد والله ، وبعدين نحن من قبيل بنغني ومشغلين جهازنا
: اقفلوه واتكلمي معاهم ، عليك الله ، لو زغردتو ، انا البطلع امنعكم
: والله دا كلام دا ، حتى الفرح ممنوع؟ دا عرس ولا جنازه هو؟

قامت مشت زعلانه ، ونور تعاين لي بس بحسره ، انا عيوني لمن رغرغت ، قالت لي : خلاص ما تزعلي نفسك
فجاءة بقيت اسمع صوت الغناء والزغاريد ، عرفتا دي اختي عاملاها لي قصدا عاينت لنور ، قالت لي : خلاص انا بمشي اتكلم معاهم

مشت وقعدت مسافه حتى جات قالت لي : ديل اهل العريس البغنو يا ختي ولسه من عربيتهم ما نزلو
: بالجد؟
: ايوا والله ، اسمعيهم
كانو بالجد بغنو لمن ناس امي طلعو عليهم
ﺩﺍ ﺍﻟﻌﺮﻳﺲ ﻭﻳﻦ ﻣﺜﻴﻠﻮ
ﻭﺣﺎﺕ ﺃﺑﻮﻱ ﺍﻟﺸﻜﺮﺓ ﻫﻴﻠﻮ
ﺃﻡ ﺍﻟﻌﺮﻭﺱ ﺟﻴﻨﺎ ﻫﺪﻳﻞ ﻋﺠﺒﻮﻧﻲ
ﺃﻣﺮﻗﻲ ﻗﺎﺑﻠﻴﻨﺎ ﻫﺪﻳﻞ ﻋﺠﺒﻮﻧﻲ
ﺑﺎﻟﺮﺣﺔ ﺭﻭﺷﻴﻨﺎ ﻫﺪﻳﻞ ﻋﺠﺒﻮﻧﻲ
ﺟﻴﻨﺎﻙ ﻋﺒﺎﺭﺓ ﺗﻘﻴﻞ
ﻭﺟﺒﻨﺎ ﻟﻴﻚ ﺻﺒﺎﺡ ﺍﻟﺨﻴﺮ
ﺍﻟﺮﺍﺳﻲ ﻭﺯﻧﻮ ﺗﻘﻴﻞ
ﻭﻗﻤﺮ ﺍﻟﺴﺒﻌﺔ ﺿﻮﺍ ﺍﻟﻠﻴﻞ
ﻳﺎ ﺃﻡ ﺍﻟﻌﺮﻭﺱ ﺟﻴﻨﺎ ﻫﺪﻳﻞ ﻋﺠﺒﻮﻧﻲ
ﺟﻴﻨﺎ ﻟﻴﻚ ﺟﻴﻨﺎ ﻫﺪﻳﻞ ﻋﺠﺒﻮﻧﻲ
ﻏﻨﻦ ﻳﺎ ﺑﻨﺎﺕ ﺍﻟﺤﻲ
ﻟﻠﻌﺮﻳﺲ ﻗﻤﻴﺮ ﺍﻟﻀﻲ
ﻋﺮﻭﺳﻮ ﻫﻴﺒﺔ ﻭﺯﻱ
ﻭﺧﻠﻔﺖ ﻟﻠﻌﻮﺍﺯﻝ ﻛﻲ
ﺟﺒﻨﺎ ﻟﻴﻚ ﻋﺸﺎ ﺍﻟﻀﻴﻔﺎﻥ
ﻭﺩ ﺍﻟﺨﻠﻮﺓ ﻭﺍﻟﻘﺮﺁﻥ
ﺍﻟﻌﺮﻳﺲ ﻋﻈﻴﻢ ﺍﻟﺸﺎﻥ
ﻭﺩﻋﺘﻮ ﻟﻠﺤﻲ ﺍﻟﻤﻨﺎﻥ

امي فرحت شديد من الحركه دي ورشو فيهم الريحه وموية صفق النيم.
استقبلوهم استقبال حار وسلام حلو ، جات امو ومعاها كم مره كدا واطفال ، اما الرجال ديل تقريباً اتنين بس ، مشو طوالي يعقدو .

النسوان اول حاجه عملوها سألو مني ، وانا قاعده في بيت جيرانا بالحيطه ، فاتحين فيهم باب كأنو نفس البيت يعني
امي قالت لهم : قاعده مع صاحبتا

وقعدتهم اكرمتهم ، جابو لهم العصير والغداء ، فجاءة سمعنا صوت الرصاص والزغاريد ، طوالي نور قعدت تزغرد وحضنتني
: الف مبروك يا سمر
: الله يبارك فيك

المهم اخواتي جو يباركو لي وصحباتي وانا دموعي نزلت ، تلفوني رن وكان انس طبعاً
: الو
: عقدنا قبل شويه ، الف مبروك
: الله يبارك فيك
: ربنا يكتب لينا السعاده ، والاستمرار في الزواج دا
: امين
: انتي قاعده وين؟ جاي اخدك
: في بيت الجيران ، نحن فاتحين معاهم باب ، بس الا تجو بالباب الكبير ، عادل بوصف لك
: خير

وفعلاً ما تمينا دقائق جو يبشرو وانا جسمي دا كلو قعد يرجف ، دخل جوا الغرفه ووقف قصادي قومني وفتح لي وشي ، ما قدرت ارفع راسي نهائي واعاين له ، بس شايفه رجولو لابس بدله بيج ، بس ما متحنن ، مسك يدي وطوالي طلع رفض انو زول يصورنا حتى اخواتي ونور ، ركبنا في العربيه ورا مشينا بيتنا اصلا لفه واحده ، الباب كان مكتظ ، والناس كلها بتعاين والزغاريد ومتابعننا لحدي ما دخلنا جوا لأبوي وامي ، تبكي سااااي ، لمن بكتني معاها ، قعدنا شويه جابو لينا عصير ، طوالي قال لي : خلينا نمشي عشان الزمن

: ما جبتو وتين؟
: لا ، هي منتظرانا في البيت
: كيف يعني؟ قاعده براها؟
: لالا في ناس ، البيت عمران

قام على حيلو وقومني طلعنا ، ودعت امي وابوي واخواني وصاحباتي ، اهلو كانو جايين بشريحه ، وعربيه صغيره لينا نحن ، اتحركنا وهو ساكت ، نحن قدام والشريحه ورانا
قلت له : اهلك ماشين معانا؟
: ما ماشين كيف يا سمر؟ هههههه سؤالك غريب
: لا دقيقه ، في طقوس تانيه ح نعملا يعني؟ انت ما قلت لي حاجه ذي دي
: مافي طقوس يا سمر ، ما خلاص عقدنا وبقيتي مرتي نمشي بيتنا
: ك ك كنت ......
طبعاً صدمني شديد لمن الرد غلبني ، كنت فاكراه مؤجر لينا شقه اسبوع ساي على الاقل ، طلع ما مفكر في الموضوع اصلا قلت له : بس نحن فتنا البيت ، ولا قصدك نمشي بيت أهلك؟
: بيت أهلي ياهو بيتي وبيتك
قلعت عيوني وريقي دا نشف في دقيقه ، اصلو ما ممكن كمية الصدمات دي واحده ورا التانيه
قلت له : أنس دقيقه ، انت ما قلت لي انو ح نسكن في بيت اهلك
: قلت لك
: لا ما قلت ي أنس والله ما بتزكر انك قلت لي كدا
رفع حاجبو باستنكار وما رد لي
فجاءة اتزكرت الحوار الدار بيننا لمن قلت له انو عندي مشاكل في الشغل
__
: عايني ، انا بلقى شغل في اي مكان تاني ونرحل من هنا زاتو
: ن نرحل وين؟
: بصراحه يا سمر في إحتمال انو نرحل من البيت دا ، بزكرني بالحصل ووتين ما مرتاحه فيه
: طيب نمشي وين؟
: قريب ما تخافي
_
عاينت له وقلت له : انت قلت ح نرحل قريب.
: وبيتنا ما بعيد ، انا اساساً ساكن فيه ، طلعت لمن اتزوجت رفقه واسي راجع له تاني
: يعني بعت البيت داك؟ انا انا كنت فاكره اننا ح نعيش في بيتك مع وتين برانا
: انتي مش عاوزه وتين؟ ح تلقيها منتظراك في البيت ، وتشوفيها وقت ما عاوزه ، ما تخافي

بقينا متحركين كدا وانا خايفه شديد وتفكيري مشلول ، ما عارفه زاتو اقول له شنو ، اصلو دا ما الشي الكنت منتظراه ، ولا دا اليوم الحاربت اهلي عشانو ، فضلنا متحركين كدا لمن الشمس غابت والدنيا ليلت انا قعدت اعاين بالشباك للقمر ، ابيض ومدور ، شكلو حلو شديد
فجاءة بقيت اسمع اصوات غريبه شديده ، اتلفت لقيتا طالعه من أنس ، ذي الزول المتضايق وما قادر يتنفس ، حركتو زادت شديد وبدا يفك ازار قميصو من الرقبه لحدي نص صدرو ، وخت يدو على رقبتو بقى يمسح عليها وهو بحمحم بنفس عاااالي ، قلت له : أنس مالك؟
اتلفت علي ونظرتو ما عجبتني ابدا ، عيونو قاسيه شديد ، والسواد قرب يختفي منهم ، وبعاين لي بتركيز شديد ووعيد ، ما شال عيونو مني ، حسيتو بقى مفترس وح يهجم علي فجاءة
قلت له ب تمتمه : اانس انت اتضايقت؟ نقيف تشرب لك مويه؟

كان بحرك يدو في المقعد ذي البخرش فيه ، فجاءة مداها علي وسحب يدي بقوة ، قعد يضغطا تقول يكسرا ، وكل شويه يقرب علي وهو ساكت وما غير نظرتو الغريبه ديك ، انا لمن قلبي دا وقع في يدي ، بتكلم معاه وهو ولااااا كأنو هنا ، يدي وجعتني وجع شديد وما قادره احررا ، وهو ما بستجيب لي ، مد يدو التانيه سحبني بها من خصري ؛ لمن حسيت بضهري اتخرش ، ساعتا صرخت ، طوالي السواق قبض فرامل انا قربت اقع من المقعد ، الحركه دي خلصتني من قبضة أنس ، وبقيت معصوره على باب العربيه ، بحاول افتحو وانا بعاين لأنس بخوف شديد

هو امكن صحى على نفسو في اللحظه ديك ، لمن عيونو اتسعت شويه بعد كانت ضيقه وظاهر فيها الشر ذي عيون الحيوان المفترس

قال لي بصوت ضعيف ومبحوح : اهدي خلاص ما تخافي
: انا عاوزه انزل
: لالا استني انا النازل
السواق قال لينا : مالكم يا جماعه؟
انس عاين له بالمرايه بس ومارد ، بعداك نزل خلاني ، وانا قلبي دا بدق بدق بق*وه! عاوزه امو*ت من شدة الخ*وف

عاينت بالشباك ، لقيت انس واقف مع امو اظنها نزلت له ، وعربيتهم زاتا واقفه ، مدت له قارورة موية شربا ، وغسل منها وشو ، كان مديني ضهرو طبعاً ، وقفو مسافه بعداك هو جاء ، وانا بعاين له بخوف لحدي ما ركب ، ابتسم وقال لي : كنت مرهق شديد.
: لا دا ما إرهاق ، انت ما كنت انس اصلاً
: لا ياهو أنس ....... يا وجه القمر
عيونو بقت نص ، وهو بعاين لي ، بعداك نزل راسو وختاه على رجولي
قلت له : انت بتعمل في شنو؟
: اشششش خليني انوم شويه
: أنس عليك الله ما تعمل كدا ، انت خوفتني شديد ، وبعدين قوم انت ما شايف السواق دا؟
: دا صاحبي ما تشتغلي به كتير

ولا اشتغل بي طبعاً ، ختت راسو دي نام ، عاينت له عامل ذي الطفل الصغير البفتش للحنان ، يعني في لحظه اتحول لمفترس واسي نعس ونام ببراءة ، ما عارفه أنس دا مالو ، شكلو جن على يد مرتو المرحومه.
عاينت للسواق وخجلانه طبعا من الوضع دا ، قال لي : ولا يهمك خليه نايم ، تعب شديد اليوم

تاني م اتكلمت معاه لمن وصلنا ، بيتهم دا حسيتو بعيد شديد ، والله كنت فاكره انو نحن طلعنا من البلد عديل
لمن العربيه وقفت ، جاء السواق فتح الباب وبدا يصحي في أنس قبل يصحى جات امو ، قالت لي : انزلي
انس رفع راسو وبقى يتثائب
: أخيراً وصلنا
عاوز يمسك يدي سحبتا منو ، امو قالت له : خليها معاي ، يلا ادخل

دخلت وانا ماشه معاها ، البيت فيه كم غرفه امكن اربعه ولا خمسه ما بعرف ، بناه عادي جدا ، من دخلنا لقينا شفع كميه في الحوش والمعانا مشو انضمو لهم اي واحده مشت قعدت جنب كم طفل
وهم بقولو : ماما جات ماما جات
شكلهم ديل اخوات انس وساكنات في البيت !
امو قالت لي : تعالي يا عروس اوديك غرفتك
: تمام
مشيت معاها ، ودخلنا من باب صغير كدا ، لحوش تاني ، برضو فيه ذي ثلاثه غرف ، دخلتني واحده منهم وكان فيها مرا نايمه ، امو شالت المخده جدعتا فيها ونهرتا بصوت يخوف
: قومي اطلعي برا طلعت روحك
المرا قامت مخلوعه وعاينت لي قالت لام انس : جبتو العروس؟
: ايوا جبناها يلا ادينا خاطرك بالله
: انوم وين يعني؟
: شوفي لك اي مكان اترمي فيه
لمن طلعت ، قلت لها : دي بنتك؟
: لالا ، دي طليقة ولدي ، قاعده مع اولادا ، اخدي راحتك نحن ماشين نتعشى ، بعد شويه بجيب لك عشاك
: بتعشى معاكم عادي
: لالا الليله ليلتك ، تتعشي مع راجلك
قبل تطلع قلت لها : يا خالتو .......
قالت لي : قولي ماما فاطمه
: ماما فاطمه
: ايوا
: عاوزه امشي الحمام ، من وين؟
: استني شويه بس ، أنس عاوز يشوفك كدا ما تغسلي وشك
: بس انا ...... انا متضايقه
شالت نفس وقالت لي : طيب تعالي معاي ، بس ما تغسلي وشك فاهمه؟
: تمام
مشيت معاها ، ودتني حمام كدا صغير مافيه ماسوره زاتو الا دخلت ب إبريق

اول ما طلعت اتفاجأت ب وتين قدامي ، جات جاريه علي جري اول ما شافتني ، بس كانت ضعيفه ومبهدله ما زي ما بعرفا ، وعندها جرحه في وشا ، لمن شفتها قلت لها
: وتين؟
حضنتني وقعدت تبكي سااااااي
ضميتا وقلت لها : اهدي حبيبتي ، انا اشتقت لك شديد
: سمر اخديني معاك ، ارح نمشي بيتكم
: بس انا جيت هنا عشانك

قبل ترد علي بقينا نسمع صوت انس ، كان صوتو صاخب وهو بنادي ب اسمي ؛ لمن خفت ، قلت بكون مشى الغرفه ولقاني مافي

وتين دفنت راسا في حضني لمن سمعتو ، وانا عاينت لماما فاطمه
قعدت تنادي هي زاتا : حليمه يا حليمه

على صوتا دا جات مارقه مرا ضخمه كدا وملامحا قاسيه ، جرت وتين دي مني تقول ترميها ، وهي تصرخ سااااي
قلت ل ماما فاطمه : خليها معاي الليله عليك الله.
ضحكت بخبث وقالت لي : هو انتي نفسك دي ما ليك اليوم ، يلا اتحركي ، ما سامعه راجلك بناديك؟ من الاول قلت لك ما تطلعي ما سمعتي الكلام.
انا ما كنت عارفه زاتو دا شنو البحصل دا ولا مستوعباه ، كأني بحلم ، ولا بتخيل اقلاها ، هي لمن لقتني واقفه ما اتحركت ؛ بقت تجرني عديل قداما ، ووتين لسه بتصرخ ، صوتا يوجع القلب
قالت لي : ما تمشي له يا سمر ، ما تمشي ل بابا اسي ما تمشي له ب ........
قبل تكمل كلمتا ، المرا الضخمه ديك قفلت لها خشما ، وشكلا ض*ربتا زاتو لاني سمعتا بتصرخ بعداك ب ألم ، قلبي دا وجعني شديد ، ولا عارفه افكر فيها ولا في نفسي

وصلت الغرفه متين ما عارفه ، بس هو ما كان قاعد فيها ، استغربت شديد ، معقول يكون زعل ومشى؟
قطعت تفكيري امو الجات شايله صينيه مغطيه بطبق ، قالت لي : هاك امشي انس منظرك من قبيل.
: امشي وين؟ مش قلتي دي غرفتنا؟
: غرفتك انتي ، اما أنس غرفتو هديك هناك ، لمن يطلبك تمشي له ، هو ما بجيك.
اشرت لي عليها من بعيد ، غرفه عاليه وشكلا أعمده ، الوحيده المرمله ومطليه من برا
قلت لها : يا خالتو ..... ا.. اقصد ماما فاطمه ، انا بالجد ما فاهمه كيف يعني اي زول فينا يقعد في غرفه؟ وانا امشي له؟ دا كلام غريب ، حاسه انو انا في مسلسل تركي تاريخي
: ما تكتري كلامك واتحركي يلا قبل يزهج منك ، وتروحي يوم دخلتك.
قلعت عيوني ، وهو رجع تاني ينادي بأعلى صوت عندو ؛ لمن قفلت اضاني من بشاعة صوتو ، وكرهت إيقاع اسمي.

ماما فاطمه مسكتني الصينيه في يدي ومشت قدامي ، تبعتها بخطوات متثاقله ، لمن بقيت قدام الباب بتاع الغرفه ، قربت اقع ، هي دقت الباب ومشت
بعداك سمعت صوتو اهدأ شويه من قبيل
: ادخلي يا سمر

دخلت وانا برجف ، واول ما فتحت الباب دا شفتو قدامي! راقد في نص سرير دبل خالف رجلو وخاتي يديه الاتنين ورا رقبتو ، السرير كان جميل شديد وعالي ، مفروش بمفرش راقي والغرفه كلها ديكورا حاجه مميزه ، الأرضيه سراميك وفيها مكيف ومبرد وترابيز راقيه وكنبه ، ما بتتقارن بالكنت فيها ، وواسعه شديد وفيها حمام داخلي
انس كان لابس عراقي خفيف ، قال لي وهو في نفس وضعيتو ديك بدون ما يحرك اصبع
: جيبي التربيزه وختي العشاء هنا ، ح اموت من الجوع.

حسيت نفسي ذي الجاريه بتاعتو ، يعني دا فهمو للزواج كدا؟ استعباد؟
عاين لي بطريقة امر عديل ، طوالي غمضت عيوني في ضيق وختيت الصينيه الشايلاها دي في اقرب تربيزه لي ، وشلت واحده تانيه ختيتا قدامو ، كان بعاين لي بتركيز شديد اثناء حركتي ، وعليه نفس النظره القاسيه ديك خوفني اكتر ، بعداك رفعت الصينيه ختيتا قدامو
هو استعدل في قعدتو ، وانا عاوزه امشي ، قال لي : ماشه وين؟
جاوبتو بنظرة غضب بس وما فتحت خشمي
قال لي : اقعدي هنا
وهو باشر على السرير القاعد فيه
قلت له ب كبرياء : انا ما عاوزه
: ليه؟
: ما جعانه
: حتى لو ما جعانه اقعدي هنا ، ما شايفاني قاعد اكل؟ ممنوع تقومي تخلي زوجك بياكل ، المفروض تنتظري لمن اخلص تغسلي لي وترفعي الصينيه
قلت له بجديه : أنس انت جادي في كلامك دا؟
: كيف ما جادي؟ امي ما شرحت لك وفهمتك النظام؟

زهجت منو قلت له : تشرح شنو؟ ودا شنو البحصل هنا دا ي انس؟ نحن الليله اتزوجنا واي واحد فينا عندو غرفه براه ، وامك بتقول المفروض اجي هنا لو عاوزه اشوفك و ......
قاطعني : قولي ماما فاطمه يا سمر ، وبعدين انا البطلبك ، ما انتي البتجي ساي علي كيفك

عيوني رغرغت وانا بقول له : انس الله يخليك قول لي انك قاعد تهاظر فيني؟ مستحيل النحن فيه دا يكون حقيقي ؛ لاني ما بقدر اعيشو ، براك شفت انا ضحيت بشنو عشان نتزوج.
مد يدو فجاءة ومسك يدي قال لي : اقعدي طيب خلينا نتكلم وانا باكل ؛ لاني بالجد جعان شديد
قعدني غصب ، بقوة يدو ، وبدا ياكل بنهم شديد ، وكمان رسلني اجيب له مويه ، جبتها له وواقفه
نهرني : اقعدي
قعدت مع الكلمه دي ، والقعدني الخوف ، وقوة الكلمه دي على نفسي
لمن لاحظ لخوفي دا ابتسم ، وخت يدو ب أكلها في وشي
بعداك قال لي : ما تخافي يا وجه القمر ، انتي ما بتشبهي مرا تانيه ، انا فتشك ولقيتك
: الله يخليك اتكلم بوضوح ، ما كفايه انك ما قلت لي اننا ح نعيش مع عائلتك كلها ، ب اخواتك واولادهم
: انا ما عندي اخوات يا سمر!
: والبرا ديل منو طيب؟ والاولاد الكتار ديل اولاد منو؟
: ديل اولادي انا يا سمر .... والمعاهم امهاتهم !!
طوالي قمت على حيلي ، حمر لي ونظرتو دي خلتني اهبط في السرير تلقائيّا ، بقيت ما حاسه بنفسي أصلاً ولا مصدقه حجم الصدمه من الكلام السمعتو دا ، لمن نفسي ضاق قلت له ، بتمتمه : انت متزوج غيري ي أنس؟
: ايوا طبعاً ، انتي الرابعه بعد رفقه الله يرحما

يتبع

#ليلة_اكتمال_القمر_6
#بقلمي_مشاعر_مبعثره

: الله يخليك اتكلم بوضوح ، ما كفايه انك ما قلت لي اننا
ح نعيش مع عائلتك كلها ، ب اخواتك واولادهم
: انا ما عندي اخوات يا سمر!
: والبرا ديل منو طيب؟ والاولاد الكتار ديل اولاد منو؟
: ديل اولادي انا يا سمر .... والمعاهم امهاتهم !!

طوالي قمت على حيلي ، حمر لي ونظرتو دي خلتني اهبط في السرير تلقائيّا ، بقيت ما حاسه بنفسي أصلاً ولا مصدقه حجم الصدمه من الكلام السمعتو دا ، لمن نفسي ضاق قلت له ، بتمتمه : انت متزوج غيري ي أنس؟
: ايوا طبعاً ، انتي الرابعه بعد رفقه الله يرحما

دموعي قعدت تنزل لأنو الكلام غلبني بعد فهمت وعرفت حجم المصيبه الانا وقعت نفسي فيها دي ، لمن بقيت اشهق ، مد يدو عشان يمسح لي دموعي ، بعدت عنو وبقيت ابكي بصوت مسموع
قال لي : ما تبكي يا وجه القمر! يلا بسرعه امسحي الدموع دي وما تزعليني منك
: انت اسي ما خجلان من نفسك؟ ما حاسي بالذنب لأنك غشيتني واتزوجتني بالطريقه الخبيثه دي؟ انا زعلت اهلي عشانك واتزوجتك غص*باً عنهم
: انا زاتي اتزوجتك غص*باً عن نسواني الثلاثه وامهات اولادي ، بس ما تخافي انتي مميزه! كل النسوان ديل كوم وانتي كوم براك ، ومستعد اطلقهم كلهم لو اشترطتي علي
: انت غشيتني يا انس ؛ لأنك ما قلت لي انك متزوج وعايش حياة ذي دي.
: انتي ما سألتي يا سمر ، انا كان عندي هدف محدد ، اول ما شفتك قررت انو انتي لازم تكوني لي ، لأنك مميزه ذي القمر.

طوالي قمت على حيلي وصر*خت فيه : لا لا م ح اكون لك ولا تحلم بالشي دا ، انت واحد مجنون ، ما عارفه كيف النسوان ديل عايشات معاك كدا ، بس انا ما رخيصه ولا غبيه زيهم ، وما بقعد معاك ولا دقيقه ، طلقني يا انس! طلقني اسي دي انا راجعه بيت اهلي.

رفع جفونو بطريقه مايله على اتجاهي ، وبقى يعاين لي بالجنبه من غير ما يحرك حتى وشو ، وقال لي : وطي صوتك دا يا مرا.
: ما بوطيه ، وما تقول لي مرا ، انا ما مرت زول ، وغص*با عنك ح تطلقني ، لو تم*وت ما بعيش معاك ، حتى لو طلقت نسوانك ديل كلهم فاهم؟ لو فرشت لي الأرض ورود ، لو جبت لي لبن العصفور يا أنس انا ما بعيش معاك ، امي وابوي واخواني ونور ، كلهم كانو صح وانا الغلط ، انا الغبيه البستاهل ض*رب الجزم ؛ لاني اتجاوزتهم كلهم وعرستك انت يا كذا*ب

وطوالي قمت ماشه على الباب ، بس هو كان اسرع مني ، اظنو جاء جاري عديل ، وجرا لي يدي من مقبض الباب بعد وصلت له وعاوزه افتحو ، قرب يرميني ، شكلو كان بخوف شديد زي قبيل
عاوز يض*ربني كف الا غطيت وشي بيدي

قال لي : مافي طلاق اسي ، انا اليوم اتزوجتك وبموافقتك ، ولسه م اخدت حقي اصلاً ، كلامك دا سابق لأوانو ، ممكن انا الأطلقك بنفسي قبل تطلبي .
: انت شنو يا أنس؟ لو سمحت كفايه ياخ ، ما تخليني اكرهك اكتر من كدا ، خلي بيننا شوية احترام وطلقني من غير ض*رر
: ض*ررر؟ يعني اسي انتي عاوزه تطلعي من الباب دا ذي ما دخلتي؟ ناسيه انو انا عقدت عليك ودفعت مهرك؟ انتي حلالي ومافي قانون في الدنيا دي بمنعني منك ، ولو تم*وتي في يدي اسي دي ، انا بعمل الفي بالي ، ولمن اقنع منك براي بطلقك ، الا تجيبي لك ولد يربطك بالبيت دا ، ذي ما شايفا مافي واحده قاعده هنا مجبوره ، كلهن قاعدات ب إرادتهن ، حتى الطلقتا قاعده هنا تربي اولادا
: البتعملو دا حرام ي أنس ، دا إسمو زواج متعه ، زواج مؤقت وما عندو اي اساس ، وانا م ح أكون جزء منو ، زح من قدامي لو سمحت وخليني امشي
: انتي بتفهمي كيف يا بنت الناس؟ ما قلت لك طلعه من هنا مافي الا بشروط؟ حققتيها انا بنفسي بطردك برا الغرفه دي.

عاينت على السرير وقلت له : لازم اشاركك السرير دا صح؟ ذي الجاريه ، كل ما تطلبني اجهز نفسي واجي البي رغباتك كأنك ملك علي ، وبعد تخلص تطردني برا الغرفه دي عشان تنوم مسترخي وبكرا تطلب البتعجبك من نسوانك الثلاثه ، وامكن حتى المطلقهم.

بعدت عنو وهو بعاين لي ، مشيت على السرير ، رفعت المفرش الفيه قلبتو على الأرض ، وجدعت المخدات وصينية الاكل قلبتا.

ما كنت واعيه لنفسي في اللحظات ديك ، واتصرفت زي المجنونه وانا بصرخ فيه : انا مستعده ام*وت على اني انوم في السرير دا.

هو طبعاً غضب شديد ، جاء علي زي المست*ذئب ، وما باقي له الا يزأر في وشي ، كفتني ولزاني بقو*ة ، رماني في السرير لمن ضهري وجعني ، وبقى يقرب مني بالغص*ب ، لمن شهقت ؛ حبست نفسي دا شدييييد ، لأني ما طايقه حتى ريحتو البقت قريبه لي وبتنفسا بدل الهواء النضيف ، ومن الشهقه بتاعة الخلعه ديك ما عملت زفير ، وبقيت ما قادره اتنفس ، لمن غمضت عيوني ، وحركتي انعدمت ، هو لمن بقى ما حاسي بي ، قعد يصحي فيني وانا صاحيه أصلاً بس ما عاوزه اطلع من الحاله دي ؛ عشان ما اعيش الواقع الفرضو علي ، قعد يهز فيني زي المجنون ، بغض*ب بعمل كدا! راسي دا قرب يكس*رو لي.

قعد يص*رخ عديل وبصوت عالي : قومي ، قومي يا وجه القمر ، قومي اتكلمي معاي ، قاومي براحتك ، واتمنعي ، بس ما تسكتي كدا.

بقى يضر*بني كفوف عديل ، لمن وشي حمر ، قربت اصر*خ بس مصره ما اخد نفس ، خت راسو في صدري عشان يتأكد انو انا عايشه ، لمن سمع ضربات قلبي قام دخل الحمام ، وانا اتنفس بسرعه في اللحظه ديك ؛ عشان ما اموت ، بس خايفه افتح عيوني ، فكرت اقوم اجري بس قلت اكيد ح يمسكني

ما اتحركت لحدي ما جاء شايل ريحه في يدو ، ومويه من المبرد رشاني بها وشممني الريحه لمن قعدت اكح واعطس

: صحيتي خلاص؟ انتي كويسه
كنت ببعد عنو واصر*خ
: زح مني ي انس ، ما تقرب مني ، والله العظيم تقرب مني ان*تحر
: لا ما تقولي كدا ، سمر انا بحبك ، انا عاوزك
: بس انا ما عاوزاك طلقني ، طلقني بس ، ما عاوزه منك اي حاجه تاني ، انت كيف تخوفني بالطريقه دي؟ وبعدها تجي تطلب مني اكون مرتك ، بياتو فهم؟ بياتو فهم يا أنس؟ انت بتموت فيني بس ، ولا حايكون في زواج ولا استقرار ، ولا حياة أصلاً

فجاءة قعد وقال لي بصوت ضعيف ومايل للبكاء : ما تمشي تخليني يا سمر ، أنا عاوزك انتي حبيبتي ، مستعد اعمل اي حاجه عشانك ، انتي ما بتعرفي انا ضحيت قدر شنو عشان اصل لك.
: بس م بالطريقه دي ، انا ما بعيش معاك كدا ، انت استغليت حبي ل وتين ، خليتني اتعلق بها كدا ؛ عشان اتزوجك
: ايوا دي حقيقه ما بكذب عليك ، لمن اتلاقينا في الشارع ما كانت المره الاولى ، انا شفتك قبلها بكم يوم ، وكنت كل يوم بتحين الفرص عشان اصادفك ، واستجمع شجاعتي عشان اقدر اظهر قدامك واتكلم معاك ، لمن سمعتك بتقولي انك عاوزه تتزوجي وما بفرق معاك الشكل ولا السن ولا الحاله الإجتماعيه ولا حتى السكن ، قررت ادي نفسي الفرصه ، وهدا بقينا لبعض ، انا انا ح اعيشك ملكه ، ما تخافي من البرا ديل لأنك م حاتكوني زيهم أبداً. انتي وجه القمر ، حبييتي

قعدت ابكي واقول له : ياريتني لو انصميت ولا قلت الكلام دا بخشمي! ياريتني لو ما شفتك ولا عرفت وتين ، ياريت لو زوجتك ما ماتت عشان تحجبك عني.

ضيق عيونو وقال لي : مافي حاجه بتحجبني عنك ولا حتى زول
: بعد عني بس ، ولا ح انت*حر واريحك
: لالا لا ما تقولي كدا ، انا زاتي بمو*ت وراك
قعدت ابكي بصوت مكتوم وانا دافنه راسي في يدي

قال لي : سمر عليك الله ما تبكي ، طيب انتي عاوزه اعمل لك شنو عشان تبطلي بكاء؟
: بس خليني امشي.
: لا ما بخليك تمشي اهلك ، دا مستحيل ، حتى لو انتح*رتي ذي ما بتقولي.
: طيب ما عاوزه اقعد معاك هنا.
: ماشي ، الليله نومي في اي مكان تاني وبكرا تجي هنا.

عاينت له ، قال لي : ما في خيارات تانيه ، بكرا ، بعدو ، او بعدو ، المهم انو يوم جاي.
: ما ناوي تطلقني يعني؟
: سمر الطلاق دا ما وقتو اصلا ، ولو مشيتي للقانون زاتو ما بطلقك مني كدا.

طوالي قمت ماشه اتجاه الباب وبعاين له ، لأني ما ضامناه أبداً
قال لي : امشي ما تخافي.
طلعت لقيت ماما فاطمه جنب الباب لمن خلع*تني
هي شالت نفس وقالت : بسم الله الرحمن الرحيم
: ماما فاطمه؟
: أنس خلاك تطلعي؟
: ايوا

كانت بتعاين لي بغرابه ، قلت لها : امشي اتأكدي منو لو ما مصدقاني.
: طيب تعالي معاي

مشيت معاها ودتني غرفه غير القبيل ، ضيقه ومعروشه بزنك قديم شديد لمن مصدي و مقدد ، فيها سريرين ، واحد منهم فيه مرتبة اسفنج صغيره ، راقده فيه مرا بطفلا ، والثاني فيه مرتبة قطن كبيره بس فاضي ، جات داخله مرا ، ماما فاطمه قالت لها : دخلي سرير للعروس يا صفاء
: ح تنوم هنا معانا؟
: ايوا ، حليمه قالت ما عاوزه تنوم معاها في نفس الغرفه ، اصلاً مكانا معاكم.
قلت لها : كيف يعني؟ انا ما فاهمه شي ، حليمه منو؟ وليه مافي زول عندو مكان ثابت في البيت دا؟
: انتي دا مكانك ، ما تعلقي ونومي وانتي ساكته

الاسما صفاء مشت جابت السرير دخلتو لي ، وقالت ل ماما فاطمه : حليمه رفضت تديني فرش من غرفتا
: خلاص خليها تتخمد كدا لحدي بكرا
عاينت لي وقالت : اتغطي بتوبك ، هديك شنطتك ختيتا لك هناك

بعداك طلعت ، انا قعدت في السرير طرف ، حاضنه رجولي ودموعي جاريه ، جات صفاء شايله فرش قالت لي : ما تزعلي ، حليمه دي اصلاً كدا منزوعة بركه ، لا بترحم كبير ولا صغير ، عشان كدا البتطلق وعندها اولاد ، بتختار تقعد هنا بإرادتا ترعى اولادا ما تعذبهم لها حليمه
: حليمه منو؟
: الزوجه الاولى ، قومي افرش لك المرتبه دي

عاينت اتجاه السرير التاني ما فيه فرش ، وشكلو سريرا هي قلت لها : لا مستحيل ارقد في مرتبتك واخليك تنومي في الحبل
: بس انتي عروس..
: عروس ولا جثه؟
: انا ما مصدقه ، أنس طردك من الغرفه؟
: انا الطلعت ، لأني ما طايقاه الكذاب التافه

كانت لسه بتفرش في المرتبه ، انا طوالي رفعتا وقلت لها : والله العظيم ما ارقد في فرشتك ، اصلا انا ما قاعده كتير ، بكرا بتصل ب أهلي يجو يسوقوني

المرا ام الولد رفعت راسا وصرخت فينا : اسكتو خلونا ننوم ياخ ما ناقصين ازعاج ، انا ما صدقت ولدي نام وبكرا عندنا صحيه بدري
صفاء قالت لها : طيب اتخمدي
خليتا رجعت فرشا لسريرا ، وانا رقدت في الحبل متغطيه بتوبي ، جاتني قعدت معاي في السرير
وقالت لي : ما تخلي واحده تسمعك بتنبزي أنس لانو والله بتكلمو لك يض*ربك
: في قدامو نبزتو انا ما خايفه منو ، والله العظيم بكرا ابوي لمن يجي الا يقط*عو حتت ويجبرو يطلقني
: انس مستحيل يطلقك قبل يدخل عليك ، لازم يمرمطك في البيت دا ثلاثه اربعه شهور وبعداك ممكن براه يقنع منك يطلقك ، انتي ما بتعرفيه لسه شكلك
قعدت ابكي قالت لي : انتي بنت ناس وشكلك ما وش بهدله ، الخلاك تتور*طي مع الراجل دا شنو؟
: كذب علي
حكيت لها كل الحصل معاي ، قالت لي : أنس دا واحد ما طبيعي وعندو هوس بالنسوان ، كل ما يشوف له واحده تعجبو يمشي يلعب عليها ويخليها تحبو لمن تعرسو ، ولو قنع منها بسرعه بطلقا ، ما بفرق معاه ، تقعد تمشي ، المهم هو بعيش العاوزو معاها وخلاص ، وبعرف كمان كيف يجيب الواحده عرفتي؟ بلعب عليك حسب ظروفك
: لأنو عارفني م بقبل به بوضعو دا كذب علي ، ولا أهلي كانو ح يدوه مهما انا ضغطت عليهم.
: انا برضو ظهر في حياتي فجاءة ، وخلاني اتعلق به واحبو ، في الفتره ديك ، كانت اسرتي بتغرق! وضعنا المادي صعب شديد وعلى وشك اننا نشحد ، انا نفسي ما بقدر اصرف عليها خلي أهلي ، عشان كدا اتزوجتو ، ورضيت اكون الزوجه الثالثه ، المهم القى مكان انوم فيه ، واكل واشرب بدون ما اكلف اهلي ، لمن جيت هنا ، ستغربت الوضع وما حبيتو أبداً ، اول يوم خلاني اجهز نفسي وامشي له في غرفتو ، بس اتفاجأت بانو بطلب مني اطلع من الغرفه بعد خلص ؛ عشان اخليه ينوم مرتاح ، بعد اخد حقو ، كانت صدمه كبيره بالنسبه لي ، جيت نمت هنا مع ضراتي ، وحليمه عاملتني ب ابش*ع طريقه ، ما نمت لحدي الصباح وهو ما اهتم بي ولا حتى شفتو طول اليوم ، الا بليل طلبني ، ونفس حكاية اليوم الاول ، في البدايه كان حنين شديد معاي لمن اكون معاه في غرفتو وبطلبني باستمرار حتى بعد كملت اسبوع العسل ذي ما بتقول ماما فاطمه ، بطلبني اكتر واحده ، دا الشي الوحيد الكان مصبرني وبقول لاهلي اني تمام ، طبعاً ممنوع يخلي اهلك يدخلو هنا حتى النسوان ، وممنوع المبيت ، الزيارات بتاعتك كلها بتستقبليها في الحوش التاني ، محل قاعده ماما فاطمه والاولاد والمطلقات ، انتي تمشي تقعدي مع أهلك وتودعيهم لانو مافي بيات ، بعد عديت فتره بقيت عاديه عندو وما شغال بي ، حسيت اني جاريه ، وظيفتا بس تشتغل في البيت دا ، حملت وجبت ولد وبنت ، كنت بفكر اني اطلق بس ما بقدر ارجع لاهلي وازيد هموهم ، غير كدا هو ما بخلي لي ولدي ، انا تعبت شديد بس مجبورة اتحمل عشان اولادي ، بالمناسبه الشغل في البيت دا ما بنتهي ، واولادو ذي ما شايفا كتار ، تشتغلي لمن حيلك يموت ، من نضافه لغسيل لطبيخ ، اما وجباتو هو بتعملا ماما فاطمه ، ممنوع اي واحده تمد يدها ، بس لمن يكون اليوم عليك توديه له صينية الأكل وتاكلي معاه ، بعرس وبطلق كتير مستعد يطلق زوجاتو الثلاثه ويتزوج ثلاثه غيرهم
: قصدك الأربعه
: لا ، حليمه ما بطلقا ، دي زوجتو الاولى واظنو بحبها او عامله له عمل ، الله اعلم ، بس رغم انها ما بتنجب ، وبتعامل اولادو معامله كعبه شديد ، ما بطلقا ، وبسبب معاملتا الكعبه دي حتى المطلقات بقعدو عشان اولادهم ، اتخيلي حتى اختا بنت خالتا وقعت في شباك انس دا وبقت واحده من ضراتا ، بس هي بسرعه اتخلصت من منافستا وخلتو يطلقا ، عندها ولد طبعاً وهدي قاعده هنا بتربي فيه ، بس بعد الطلاق حليمه بقت حنينه عليها وخلتا تنوم معاها في غرفتا
مسكينه البنت وتين الصغيره دي ، قاعده تعاني معاناة شديده مع حليمه ، حتى ماما فاطمه بتعاملا كعب وبتض*ربا ، مرات بحبسوها عديل ويمنعو عنها الاكل لو بكت ولا صرخت
: وليه بعملو كدا معاها؟
: امها كانت اخر زوجه ، والوحيده الما جابا البيت هنا وسكنا برا في إيجار ، للسبب دا هم كرهوها ، بس امها اتوفت
: ايوا ، بس كانت مريضه ، وهي قريبتو صح؟
: مريضه ولالا انا ما عندي علم ، بس ما قريبتو أبداً قريبتو بوين؟ انا والله حاولت كتير اضم البنت المسكينه دي لي ، بس ما بخلوني عازلنها عننا تماما ، مره حكيت ل أنس انو حليمه ض*ربتا ، قلبو الموضوع علي انا ، مسكو البنت هددوها واجبروها تقول انو انا الضر*بتا ، أنس طوالي ضر*بني وفي قدام اولادي ، لمن قررت اخلي كل شي وامشي ، بس اتراجعت ، امشي وين؟ واعمل شنو؟ انا شهاده ساي ما عندي ، مجبوره انتظر اولادي يكبرو ويطلعوني من الانا فيه دا

: لا مافي اي واحده مجبورة ، انتو العاجبكم العايشنو دا وبتتنافسو في واحد ذي دا ، دا المفروض تبلغو عنو وتدخلوه السجن ، اصلا دا ما سكن شرعي ، انتي كيف تقبلي على نفسك كدا؟ امشي اشتغلي اي حاجه وربي اولادك
: ما بخليهم لي ، اقلاها بدخلني محاكم ، وانا حق محامي ما عندي ، اهلي البياكلوه ما عندهم يا بنت الناس الا انا بجاسف من هنا وارسل لهم ابوي مكسور ، وامي تعبت خلاص ما بتقدر تشتغل تاني ، والله الا مقعده معاها قريبتي صغيره كدا تهتم بهم ومقابل مبلغ باخدو من أنس.

فضلت طول الليل تحكي لي عن المعاناة العايشنها ، وانا ابكي ، قلبي واجعني على وتين من جهة وعلى نفسي من جهة ، كيف ح اواجه اهلي ب دا كلو بعد حزروني؟ اقول لهم شنو؟ اواجه الناس كيف وانا بنفصل عن زوجي من تاني يوم؟ اقول لابوي شنو؟ وعادل ح يعمل فيني شنو؟ والموظفين في الشركه! ونور العارفه انو انا دفعت من قروشي عشان اكمل الزواج المشؤووم دا؟ دي أخرتي؟ نايمه في سرير حبل بدون حتى مخده مع ثلاثه ضرات يوم دخلتي؟ حتى وتين الضحيت عشانا ممنوع اشوفا ، وهي بتتعرض للتعذيب وانا ما بقدر اعمل شي ، استفدت شنو من العرس دا؟ غير دمرت نفسي ، كيف أنس دا اتحول ل ذئب بشري؟ كيف انا ما كنت شايفاه؟ كيف غلطت؟
اسي انا بقدر اتصل ب أمي احكي لها؟ بقدر احكي لزول اصلا؟

قعدت ابكي للصباح بعد صفاء مشت مني

اول ما سمعت الاذان قمت من مكاني ؛ عشان امشي اصلي ، لقيت الباب فاتح لزيتو بس ، وانا ماشه على الحمام الدخلتو قبيل ؛ لقيت الباب الفاصل مقفول من برا ، غلبني البسويه ، قاعده اتلفلف بس ، الناس ديل كلهم نايمين زول قام يصلي الصبح مافي
عاينت اتجاه غرفة أنس ، الانوار مطفيه ، قعدت بس اكابس لمن لقيت لي محل صغير كدا مربع بابو فاتح ، دخلتو لقيتو الحمام ، وبابو ما بقفل ، ما فيه ماسوره! الا طلعت تاني فتشت لي ابريق ومليتو من الماسوره حتى دخلت ، وطلعت اتوضيت ، خشيت الغرفه افتش في مصلايه برضو ما لقيت ، والغرفه ضلام ، الا مشيت على شنطتي ، طلعت تلفوني ضويتو برضو ما شايفاها

في النهايه فرشت توبي صليت فيه وقمت رجعت السرير تاني لقيت مكالمه من امي ، ونور قعدت ابكي واتزكرت البيت ، والله نفسي كتم عديل من شدة النخامه في انفي بسبب البكاء ، الا طلعت نضفتا ورجعت تاني حضنت رجولي في السرير لمن نمت ما بعرف لحدي متين ، أنس لمن صحى من نومو ، وطلع من غرفتو الملكيه اتزكرني وجاء يفتش فيني ، لقاهم صاحين طبعاً وباديين شغل ، مشى غرفة حليمه اول حاجه ، لقاها نايمه ، ما صحاها وجاء غرفتنا ، كنت انا راقده معاي صفاء وواحده بترضع في ولدا ، لمن شافني راقده في الوضع داك عيونو حمرت وقعد يعاين لهم واحده واحده
: نايمين في المراتب ومتغطين و « مرتي » راقده الرقده دي؟

بصوت عالي قال كدا ؛ انا لمن انخلعت ، صحيت بشهقه وما فاهمه اي شي ، نسيت زاتو اني اتزوجت وعايشه الوضع دا ، عيني لمن وقعت عليه ، استعدت زاكرتي وبقيت خايفه شديد منو ، قال لي : ما تخافي مني.

اتلفت عليهم ، وقال بصوت صاخب : اطلعو برا كلكم سريع
طبعاً ما كرر الكلمه لانهم طوالي طلعو ، عيونو اتسعت وبقى فيها حنيه وهو بقعد جنبي في السرير

قعدت اصر*خ فيه : انس ابعد مني.

: ما تخافي مني يا سمر ، انا مستحيل ا اذيك ، اسف لأني ارع*بتك امس وعيشتك الحاله دي ، بس ما كنت قاصد والله العظيم ما بيدي ، كنت عاوزك شديد ومستني اليوم دا بفارغ الصبر وانتي رفضتيني وقلتي كلام قاسي خلاني أزعل
: كلامي في مكانو يا أنس ، انا ما بعيش معاك طلقني
: اطلقك كيف؟ الليله صباحيتك حبيبتي ، شوفي ، كل شي بنحل بالنقاش ، بس ما بقدر اطلقك سامحيني
مد يدو علي بعدتها وقلت له : انا عرفت كل حاجه عنك من زوجاتك ، بتكون حنين في بداية العلاقه وتعيش الواحده في وهم ، وفجاءة تبعد وترميها ذي اللعبه القديمه
: بس انتي ما زيهم ، انتي وجه القمر ، انا ما سعيت لاي واحده فيهم ، بس انتي عملت المستحيل عشانك ، انا بحبك
: كلامك دا م حايخليني اصدقك ، طلقني وبس
غمض عيونو في ضيق وشكلو زهج من التحنيس ، قال لي : من الاخر كدا ، طلاق دا انسيه اسي ، ومافي اي قانون ولاحتى قوة في الدنيا دي بتجبرني اطلقك ، على الاقل الفتره دي ، بس انا عاوزك دائماً ، عاوزك تكوني معاي وما تمشي ، لا اليوم ولا بكرا ولا بعدو ، ولا بعد سنوات ، انتي ما زيهم صدقيني ، انا بحبك وعاوزك معاي دائماً
: م حاتقدر تجبرني اعيش معاك
: عارف ، بس عاوز

بعد شويه رجع ضعف وقال لي : انا بتوسلك عديل يا سمر ، ما تمشي تخليني ، انا مستعد اعمل لك كل العاوزاه ، واحاسب اي زول يزعجك ، المهم تكوني معاي ، انا ووتين محتاجين لك ، عاوزه تمشي تخلي وتين؟ اسي اطلبي اي حاجه وانا بنفذا لك ، عاوزه تشاركيني الغرفه واكون لك براك؟ موافق! وامشي شغلك ، اعملي كل الأنتي عاوزاه ، بس ما تبعدي عني ارجوك يا سمر ، انا ما صدقت لقيتك .

طبعاً قرب يبكي عديل ، وانا من البكاء ما عارفه اعمل له شنو المجنون دا ، فعلاً م حايطلقني لو ما دمر حياتي وبشتني ذي نسوانو ديل ولاصق فيني ما عاوز يزح

قلت له : ما عاوزه اقعد معاك في غرفتك ، وما تقرب مني بدون ارادتي .
: حاضر ، انا موافق ما بعمل شي إلا برضاك ، وم حاقرب على اي واحده من النسوان ديل قبل يحصل كدا ، انا لك براك

يتبع

تابعنا ليصلك كل جديد

https://www.facebook.com/share/1YHW59jqru/