#ليلة_اكتمال_القمر_6
#بقلمي_مشاعر_مبعثره

: الله يخليك اتكلم بوضوح ، ما كفايه انك ما قلت لي اننا
ح نعيش مع عائلتك كلها ، ب اخواتك واولادهم
: انا ما عندي اخوات يا سمر!
: والبرا ديل منو طيب؟ والاولاد الكتار ديل اولاد منو؟
: ديل اولادي انا يا سمر .... والمعاهم امهاتهم !!

طوالي قمت على حيلي ، حمر لي ونظرتو دي خلتني اهبط في السرير تلقائيّا ، بقيت ما حاسه بنفسي أصلاً ولا مصدقه حجم الصدمه من الكلام السمعتو دا ، لمن نفسي ضاق قلت له ، بتمتمه : انت متزوج غيري ي أنس؟
: ايوا طبعاً ، انتي الرابعه بعد رفقه الله يرحما

دموعي قعدت تنزل لأنو الكلام غلبني بعد فهمت وعرفت حجم المصيبه الانا وقعت نفسي فيها دي ، لمن بقيت اشهق ، مد يدو عشان يمسح لي دموعي ، بعدت عنو وبقيت ابكي بصوت مسموع
قال لي : ما تبكي يا وجه القمر! يلا بسرعه امسحي الدموع دي وما تزعليني منك
: انت اسي ما خجلان من نفسك؟ ما حاسي بالذنب لأنك غشيتني واتزوجتني بالطريقه الخبيثه دي؟ انا زعلت اهلي عشانك واتزوجتك غص*باً عنهم
: انا زاتي اتزوجتك غص*باً عن نسواني الثلاثه وامهات اولادي ، بس ما تخافي انتي مميزه! كل النسوان ديل كوم وانتي كوم براك ، ومستعد اطلقهم كلهم لو اشترطتي علي
: انت غشيتني يا انس ؛ لأنك ما قلت لي انك متزوج وعايش حياة ذي دي.
: انتي ما سألتي يا سمر ، انا كان عندي هدف محدد ، اول ما شفتك قررت انو انتي لازم تكوني لي ، لأنك مميزه ذي القمر.

طوالي قمت على حيلي وصر*خت فيه : لا لا م ح اكون لك ولا تحلم بالشي دا ، انت واحد مجنون ، ما عارفه كيف النسوان ديل عايشات معاك كدا ، بس انا ما رخيصه ولا غبيه زيهم ، وما بقعد معاك ولا دقيقه ، طلقني يا انس! طلقني اسي دي انا راجعه بيت اهلي.

رفع جفونو بطريقه مايله على اتجاهي ، وبقى يعاين لي بالجنبه من غير ما يحرك حتى وشو ، وقال لي : وطي صوتك دا يا مرا.
: ما بوطيه ، وما تقول لي مرا ، انا ما مرت زول ، وغص*با عنك ح تطلقني ، لو تم*وت ما بعيش معاك ، حتى لو طلقت نسوانك ديل كلهم فاهم؟ لو فرشت لي الأرض ورود ، لو جبت لي لبن العصفور يا أنس انا ما بعيش معاك ، امي وابوي واخواني ونور ، كلهم كانو صح وانا الغلط ، انا الغبيه البستاهل ض*رب الجزم ؛ لاني اتجاوزتهم كلهم وعرستك انت يا كذا*ب

وطوالي قمت ماشه على الباب ، بس هو كان اسرع مني ، اظنو جاء جاري عديل ، وجرا لي يدي من مقبض الباب بعد وصلت له وعاوزه افتحو ، قرب يرميني ، شكلو كان بخوف شديد زي قبيل
عاوز يض*ربني كف الا غطيت وشي بيدي

قال لي : مافي طلاق اسي ، انا اليوم اتزوجتك وبموافقتك ، ولسه م اخدت حقي اصلاً ، كلامك دا سابق لأوانو ، ممكن انا الأطلقك بنفسي قبل تطلبي .
: انت شنو يا أنس؟ لو سمحت كفايه ياخ ، ما تخليني اكرهك اكتر من كدا ، خلي بيننا شوية احترام وطلقني من غير ض*رر
: ض*ررر؟ يعني اسي انتي عاوزه تطلعي من الباب دا ذي ما دخلتي؟ ناسيه انو انا عقدت عليك ودفعت مهرك؟ انتي حلالي ومافي قانون في الدنيا دي بمنعني منك ، ولو تم*وتي في يدي اسي دي ، انا بعمل الفي بالي ، ولمن اقنع منك براي بطلقك ، الا تجيبي لك ولد يربطك بالبيت دا ، ذي ما شايفا مافي واحده قاعده هنا مجبوره ، كلهن قاعدات ب إرادتهن ، حتى الطلقتا قاعده هنا تربي اولادا
: البتعملو دا حرام ي أنس ، دا إسمو زواج متعه ، زواج مؤقت وما عندو اي اساس ، وانا م ح أكون جزء منو ، زح من قدامي لو سمحت وخليني امشي
: انتي بتفهمي كيف يا بنت الناس؟ ما قلت لك طلعه من هنا مافي الا بشروط؟ حققتيها انا بنفسي بطردك برا الغرفه دي.

عاينت على السرير وقلت له : لازم اشاركك السرير دا صح؟ ذي الجاريه ، كل ما تطلبني اجهز نفسي واجي البي رغباتك كأنك ملك علي ، وبعد تخلص تطردني برا الغرفه دي عشان تنوم مسترخي وبكرا تطلب البتعجبك من نسوانك الثلاثه ، وامكن حتى المطلقهم.

بعدت عنو وهو بعاين لي ، مشيت على السرير ، رفعت المفرش الفيه قلبتو على الأرض ، وجدعت المخدات وصينية الاكل قلبتا.

ما كنت واعيه لنفسي في اللحظات ديك ، واتصرفت زي المجنونه وانا بصرخ فيه : انا مستعده ام*وت على اني انوم في السرير دا.

هو طبعاً غضب شديد ، جاء علي زي المست*ذئب ، وما باقي له الا يزأر في وشي ، كفتني ولزاني بقو*ة ، رماني في السرير لمن ضهري وجعني ، وبقى يقرب مني بالغص*ب ، لمن شهقت ؛ حبست نفسي دا شدييييد ، لأني ما طايقه حتى ريحتو البقت قريبه لي وبتنفسا بدل الهواء النضيف ، ومن الشهقه بتاعة الخلعه ديك ما عملت زفير ، وبقيت ما قادره اتنفس ، لمن غمضت عيوني ، وحركتي انعدمت ، هو لمن بقى ما حاسي بي ، قعد يصحي فيني وانا صاحيه أصلاً بس ما عاوزه اطلع من الحاله دي ؛ عشان ما اعيش الواقع الفرضو علي ، قعد يهز فيني زي المجنون ، بغض*ب بعمل كدا! راسي دا قرب يكس*رو لي.

قعد يص*رخ عديل وبصوت عالي : قومي ، قومي يا وجه القمر ، قومي اتكلمي معاي ، قاومي براحتك ، واتمنعي ، بس ما تسكتي كدا.

بقى يضر*بني كفوف عديل ، لمن وشي حمر ، قربت اصر*خ بس مصره ما اخد نفس ، خت راسو في صدري عشان يتأكد انو انا عايشه ، لمن سمع ضربات قلبي قام دخل الحمام ، وانا اتنفس بسرعه في اللحظه ديك ؛ عشان ما اموت ، بس خايفه افتح عيوني ، فكرت اقوم اجري بس قلت اكيد ح يمسكني

ما اتحركت لحدي ما جاء شايل ريحه في يدو ، ومويه من المبرد رشاني بها وشممني الريحه لمن قعدت اكح واعطس

: صحيتي خلاص؟ انتي كويسه
كنت ببعد عنو واصر*خ
: زح مني ي انس ، ما تقرب مني ، والله العظيم تقرب مني ان*تحر
: لا ما تقولي كدا ، سمر انا بحبك ، انا عاوزك
: بس انا ما عاوزاك طلقني ، طلقني بس ، ما عاوزه منك اي حاجه تاني ، انت كيف تخوفني بالطريقه دي؟ وبعدها تجي تطلب مني اكون مرتك ، بياتو فهم؟ بياتو فهم يا أنس؟ انت بتموت فيني بس ، ولا حايكون في زواج ولا استقرار ، ولا حياة أصلاً

فجاءة قعد وقال لي بصوت ضعيف ومايل للبكاء : ما تمشي تخليني يا سمر ، أنا عاوزك انتي حبيبتي ، مستعد اعمل اي حاجه عشانك ، انتي ما بتعرفي انا ضحيت قدر شنو عشان اصل لك.
: بس م بالطريقه دي ، انا ما بعيش معاك كدا ، انت استغليت حبي ل وتين ، خليتني اتعلق بها كدا ؛ عشان اتزوجك
: ايوا دي حقيقه ما بكذب عليك ، لمن اتلاقينا في الشارع ما كانت المره الاولى ، انا شفتك قبلها بكم يوم ، وكنت كل يوم بتحين الفرص عشان اصادفك ، واستجمع شجاعتي عشان اقدر اظهر قدامك واتكلم معاك ، لمن سمعتك بتقولي انك عاوزه تتزوجي وما بفرق معاك الشكل ولا السن ولا الحاله الإجتماعيه ولا حتى السكن ، قررت ادي نفسي الفرصه ، وهدا بقينا لبعض ، انا انا ح اعيشك ملكه ، ما تخافي من البرا ديل لأنك م حاتكوني زيهم أبداً. انتي وجه القمر ، حبييتي

قعدت ابكي واقول له : ياريتني لو انصميت ولا قلت الكلام دا بخشمي! ياريتني لو ما شفتك ولا عرفت وتين ، ياريت لو زوجتك ما ماتت عشان تحجبك عني.

ضيق عيونو وقال لي : مافي حاجه بتحجبني عنك ولا حتى زول
: بعد عني بس ، ولا ح انت*حر واريحك
: لالا لا ما تقولي كدا ، انا زاتي بمو*ت وراك
قعدت ابكي بصوت مكتوم وانا دافنه راسي في يدي

قال لي : سمر عليك الله ما تبكي ، طيب انتي عاوزه اعمل لك شنو عشان تبطلي بكاء؟
: بس خليني امشي.
: لا ما بخليك تمشي اهلك ، دا مستحيل ، حتى لو انتح*رتي ذي ما بتقولي.
: طيب ما عاوزه اقعد معاك هنا.
: ماشي ، الليله نومي في اي مكان تاني وبكرا تجي هنا.

عاينت له ، قال لي : ما في خيارات تانيه ، بكرا ، بعدو ، او بعدو ، المهم انو يوم جاي.
: ما ناوي تطلقني يعني؟
: سمر الطلاق دا ما وقتو اصلا ، ولو مشيتي للقانون زاتو ما بطلقك مني كدا.

طوالي قمت ماشه اتجاه الباب وبعاين له ، لأني ما ضامناه أبداً
قال لي : امشي ما تخافي.
طلعت لقيت ماما فاطمه جنب الباب لمن خلع*تني
هي شالت نفس وقالت : بسم الله الرحمن الرحيم
: ماما فاطمه؟
: أنس خلاك تطلعي؟
: ايوا

كانت بتعاين لي بغرابه ، قلت لها : امشي اتأكدي منو لو ما مصدقاني.
: طيب تعالي معاي

مشيت معاها ودتني غرفه غير القبيل ، ضيقه ومعروشه بزنك قديم شديد لمن مصدي و مقدد ، فيها سريرين ، واحد منهم فيه مرتبة اسفنج صغيره ، راقده فيه مرا بطفلا ، والثاني فيه مرتبة قطن كبيره بس فاضي ، جات داخله مرا ، ماما فاطمه قالت لها : دخلي سرير للعروس يا صفاء
: ح تنوم هنا معانا؟
: ايوا ، حليمه قالت ما عاوزه تنوم معاها في نفس الغرفه ، اصلاً مكانا معاكم.
قلت لها : كيف يعني؟ انا ما فاهمه شي ، حليمه منو؟ وليه مافي زول عندو مكان ثابت في البيت دا؟
: انتي دا مكانك ، ما تعلقي ونومي وانتي ساكته

الاسما صفاء مشت جابت السرير دخلتو لي ، وقالت ل ماما فاطمه : حليمه رفضت تديني فرش من غرفتا
: خلاص خليها تتخمد كدا لحدي بكرا
عاينت لي وقالت : اتغطي بتوبك ، هديك شنطتك ختيتا لك هناك

بعداك طلعت ، انا قعدت في السرير طرف ، حاضنه رجولي ودموعي جاريه ، جات صفاء شايله فرش قالت لي : ما تزعلي ، حليمه دي اصلاً كدا منزوعة بركه ، لا بترحم كبير ولا صغير ، عشان كدا البتطلق وعندها اولاد ، بتختار تقعد هنا بإرادتا ترعى اولادا ما تعذبهم لها حليمه
: حليمه منو؟
: الزوجه الاولى ، قومي افرش لك المرتبه دي

عاينت اتجاه السرير التاني ما فيه فرش ، وشكلو سريرا هي قلت لها : لا مستحيل ارقد في مرتبتك واخليك تنومي في الحبل
: بس انتي عروس..
: عروس ولا جثه؟
: انا ما مصدقه ، أنس طردك من الغرفه؟
: انا الطلعت ، لأني ما طايقاه الكذاب التافه

كانت لسه بتفرش في المرتبه ، انا طوالي رفعتا وقلت لها : والله العظيم ما ارقد في فرشتك ، اصلا انا ما قاعده كتير ، بكرا بتصل ب أهلي يجو يسوقوني

المرا ام الولد رفعت راسا وصرخت فينا : اسكتو خلونا ننوم ياخ ما ناقصين ازعاج ، انا ما صدقت ولدي نام وبكرا عندنا صحيه بدري
صفاء قالت لها : طيب اتخمدي
خليتا رجعت فرشا لسريرا ، وانا رقدت في الحبل متغطيه بتوبي ، جاتني قعدت معاي في السرير
وقالت لي : ما تخلي واحده تسمعك بتنبزي أنس لانو والله بتكلمو لك يض*ربك
: في قدامو نبزتو انا ما خايفه منو ، والله العظيم بكرا ابوي لمن يجي الا يقط*عو حتت ويجبرو يطلقني
: انس مستحيل يطلقك قبل يدخل عليك ، لازم يمرمطك في البيت دا ثلاثه اربعه شهور وبعداك ممكن براه يقنع منك يطلقك ، انتي ما بتعرفيه لسه شكلك
قعدت ابكي قالت لي : انتي بنت ناس وشكلك ما وش بهدله ، الخلاك تتور*طي مع الراجل دا شنو؟
: كذب علي
حكيت لها كل الحصل معاي ، قالت لي : أنس دا واحد ما طبيعي وعندو هوس بالنسوان ، كل ما يشوف له واحده تعجبو يمشي يلعب عليها ويخليها تحبو لمن تعرسو ، ولو قنع منها بسرعه بطلقا ، ما بفرق معاه ، تقعد تمشي ، المهم هو بعيش العاوزو معاها وخلاص ، وبعرف كمان كيف يجيب الواحده عرفتي؟ بلعب عليك حسب ظروفك
: لأنو عارفني م بقبل به بوضعو دا كذب علي ، ولا أهلي كانو ح يدوه مهما انا ضغطت عليهم.
: انا برضو ظهر في حياتي فجاءة ، وخلاني اتعلق به واحبو ، في الفتره ديك ، كانت اسرتي بتغرق! وضعنا المادي صعب شديد وعلى وشك اننا نشحد ، انا نفسي ما بقدر اصرف عليها خلي أهلي ، عشان كدا اتزوجتو ، ورضيت اكون الزوجه الثالثه ، المهم القى مكان انوم فيه ، واكل واشرب بدون ما اكلف اهلي ، لمن جيت هنا ، ستغربت الوضع وما حبيتو أبداً ، اول يوم خلاني اجهز نفسي وامشي له في غرفتو ، بس اتفاجأت بانو بطلب مني اطلع من الغرفه بعد خلص ؛ عشان اخليه ينوم مرتاح ، بعد اخد حقو ، كانت صدمه كبيره بالنسبه لي ، جيت نمت هنا مع ضراتي ، وحليمه عاملتني ب ابش*ع طريقه ، ما نمت لحدي الصباح وهو ما اهتم بي ولا حتى شفتو طول اليوم ، الا بليل طلبني ، ونفس حكاية اليوم الاول ، في البدايه كان حنين شديد معاي لمن اكون معاه في غرفتو وبطلبني باستمرار حتى بعد كملت اسبوع العسل ذي ما بتقول ماما فاطمه ، بطلبني اكتر واحده ، دا الشي الوحيد الكان مصبرني وبقول لاهلي اني تمام ، طبعاً ممنوع يخلي اهلك يدخلو هنا حتى النسوان ، وممنوع المبيت ، الزيارات بتاعتك كلها بتستقبليها في الحوش التاني ، محل قاعده ماما فاطمه والاولاد والمطلقات ، انتي تمشي تقعدي مع أهلك وتودعيهم لانو مافي بيات ، بعد عديت فتره بقيت عاديه عندو وما شغال بي ، حسيت اني جاريه ، وظيفتا بس تشتغل في البيت دا ، حملت وجبت ولد وبنت ، كنت بفكر اني اطلق بس ما بقدر ارجع لاهلي وازيد هموهم ، غير كدا هو ما بخلي لي ولدي ، انا تعبت شديد بس مجبورة اتحمل عشان اولادي ، بالمناسبه الشغل في البيت دا ما بنتهي ، واولادو ذي ما شايفا كتار ، تشتغلي لمن حيلك يموت ، من نضافه لغسيل لطبيخ ، اما وجباتو هو بتعملا ماما فاطمه ، ممنوع اي واحده تمد يدها ، بس لمن يكون اليوم عليك توديه له صينية الأكل وتاكلي معاه ، بعرس وبطلق كتير مستعد يطلق زوجاتو الثلاثه ويتزوج ثلاثه غيرهم
: قصدك الأربعه
: لا ، حليمه ما بطلقا ، دي زوجتو الاولى واظنو بحبها او عامله له عمل ، الله اعلم ، بس رغم انها ما بتنجب ، وبتعامل اولادو معامله كعبه شديد ، ما بطلقا ، وبسبب معاملتا الكعبه دي حتى المطلقات بقعدو عشان اولادهم ، اتخيلي حتى اختا بنت خالتا وقعت في شباك انس دا وبقت واحده من ضراتا ، بس هي بسرعه اتخلصت من منافستا وخلتو يطلقا ، عندها ولد طبعاً وهدي قاعده هنا بتربي فيه ، بس بعد الطلاق حليمه بقت حنينه عليها وخلتا تنوم معاها في غرفتا
مسكينه البنت وتين الصغيره دي ، قاعده تعاني معاناة شديده مع حليمه ، حتى ماما فاطمه بتعاملا كعب وبتض*ربا ، مرات بحبسوها عديل ويمنعو عنها الاكل لو بكت ولا صرخت
: وليه بعملو كدا معاها؟
: امها كانت اخر زوجه ، والوحيده الما جابا البيت هنا وسكنا برا في إيجار ، للسبب دا هم كرهوها ، بس امها اتوفت
: ايوا ، بس كانت مريضه ، وهي قريبتو صح؟
: مريضه ولالا انا ما عندي علم ، بس ما قريبتو أبداً قريبتو بوين؟ انا والله حاولت كتير اضم البنت المسكينه دي لي ، بس ما بخلوني عازلنها عننا تماما ، مره حكيت ل أنس انو حليمه ض*ربتا ، قلبو الموضوع علي انا ، مسكو البنت هددوها واجبروها تقول انو انا الضر*بتا ، أنس طوالي ضر*بني وفي قدام اولادي ، لمن قررت اخلي كل شي وامشي ، بس اتراجعت ، امشي وين؟ واعمل شنو؟ انا شهاده ساي ما عندي ، مجبوره انتظر اولادي يكبرو ويطلعوني من الانا فيه دا

: لا مافي اي واحده مجبورة ، انتو العاجبكم العايشنو دا وبتتنافسو في واحد ذي دا ، دا المفروض تبلغو عنو وتدخلوه السجن ، اصلا دا ما سكن شرعي ، انتي كيف تقبلي على نفسك كدا؟ امشي اشتغلي اي حاجه وربي اولادك
: ما بخليهم لي ، اقلاها بدخلني محاكم ، وانا حق محامي ما عندي ، اهلي البياكلوه ما عندهم يا بنت الناس الا انا بجاسف من هنا وارسل لهم ابوي مكسور ، وامي تعبت خلاص ما بتقدر تشتغل تاني ، والله الا مقعده معاها قريبتي صغيره كدا تهتم بهم ومقابل مبلغ باخدو من أنس.

فضلت طول الليل تحكي لي عن المعاناة العايشنها ، وانا ابكي ، قلبي واجعني على وتين من جهة وعلى نفسي من جهة ، كيف ح اواجه اهلي ب دا كلو بعد حزروني؟ اقول لهم شنو؟ اواجه الناس كيف وانا بنفصل عن زوجي من تاني يوم؟ اقول لابوي شنو؟ وعادل ح يعمل فيني شنو؟ والموظفين في الشركه! ونور العارفه انو انا دفعت من قروشي عشان اكمل الزواج المشؤووم دا؟ دي أخرتي؟ نايمه في سرير حبل بدون حتى مخده مع ثلاثه ضرات يوم دخلتي؟ حتى وتين الضحيت عشانا ممنوع اشوفا ، وهي بتتعرض للتعذيب وانا ما بقدر اعمل شي ، استفدت شنو من العرس دا؟ غير دمرت نفسي ، كيف أنس دا اتحول ل ذئب بشري؟ كيف انا ما كنت شايفاه؟ كيف غلطت؟
اسي انا بقدر اتصل ب أمي احكي لها؟ بقدر احكي لزول اصلا؟

قعدت ابكي للصباح بعد صفاء مشت مني

اول ما سمعت الاذان قمت من مكاني ؛ عشان امشي اصلي ، لقيت الباب فاتح لزيتو بس ، وانا ماشه على الحمام الدخلتو قبيل ؛ لقيت الباب الفاصل مقفول من برا ، غلبني البسويه ، قاعده اتلفلف بس ، الناس ديل كلهم نايمين زول قام يصلي الصبح مافي
عاينت اتجاه غرفة أنس ، الانوار مطفيه ، قعدت بس اكابس لمن لقيت لي محل صغير كدا مربع بابو فاتح ، دخلتو لقيتو الحمام ، وبابو ما بقفل ، ما فيه ماسوره! الا طلعت تاني فتشت لي ابريق ومليتو من الماسوره حتى دخلت ، وطلعت اتوضيت ، خشيت الغرفه افتش في مصلايه برضو ما لقيت ، والغرفه ضلام ، الا مشيت على شنطتي ، طلعت تلفوني ضويتو برضو ما شايفاها

في النهايه فرشت توبي صليت فيه وقمت رجعت السرير تاني لقيت مكالمه من امي ، ونور قعدت ابكي واتزكرت البيت ، والله نفسي كتم عديل من شدة النخامه في انفي بسبب البكاء ، الا طلعت نضفتا ورجعت تاني حضنت رجولي في السرير لمن نمت ما بعرف لحدي متين ، أنس لمن صحى من نومو ، وطلع من غرفتو الملكيه اتزكرني وجاء يفتش فيني ، لقاهم صاحين طبعاً وباديين شغل ، مشى غرفة حليمه اول حاجه ، لقاها نايمه ، ما صحاها وجاء غرفتنا ، كنت انا راقده معاي صفاء وواحده بترضع في ولدا ، لمن شافني راقده في الوضع داك عيونو حمرت وقعد يعاين لهم واحده واحده
: نايمين في المراتب ومتغطين و « مرتي » راقده الرقده دي؟

بصوت عالي قال كدا ؛ انا لمن انخلعت ، صحيت بشهقه وما فاهمه اي شي ، نسيت زاتو اني اتزوجت وعايشه الوضع دا ، عيني لمن وقعت عليه ، استعدت زاكرتي وبقيت خايفه شديد منو ، قال لي : ما تخافي مني.

اتلفت عليهم ، وقال بصوت صاخب : اطلعو برا كلكم سريع
طبعاً ما كرر الكلمه لانهم طوالي طلعو ، عيونو اتسعت وبقى فيها حنيه وهو بقعد جنبي في السرير

قعدت اصر*خ فيه : انس ابعد مني.

: ما تخافي مني يا سمر ، انا مستحيل ا اذيك ، اسف لأني ارع*بتك امس وعيشتك الحاله دي ، بس ما كنت قاصد والله العظيم ما بيدي ، كنت عاوزك شديد ومستني اليوم دا بفارغ الصبر وانتي رفضتيني وقلتي كلام قاسي خلاني أزعل
: كلامي في مكانو يا أنس ، انا ما بعيش معاك طلقني
: اطلقك كيف؟ الليله صباحيتك حبيبتي ، شوفي ، كل شي بنحل بالنقاش ، بس ما بقدر اطلقك سامحيني
مد يدو علي بعدتها وقلت له : انا عرفت كل حاجه عنك من زوجاتك ، بتكون حنين في بداية العلاقه وتعيش الواحده في وهم ، وفجاءة تبعد وترميها ذي اللعبه القديمه
: بس انتي ما زيهم ، انتي وجه القمر ، انا ما سعيت لاي واحده فيهم ، بس انتي عملت المستحيل عشانك ، انا بحبك
: كلامك دا م حايخليني اصدقك ، طلقني وبس
غمض عيونو في ضيق وشكلو زهج من التحنيس ، قال لي : من الاخر كدا ، طلاق دا انسيه اسي ، ومافي اي قانون ولاحتى قوة في الدنيا دي بتجبرني اطلقك ، على الاقل الفتره دي ، بس انا عاوزك دائماً ، عاوزك تكوني معاي وما تمشي ، لا اليوم ولا بكرا ولا بعدو ، ولا بعد سنوات ، انتي ما زيهم صدقيني ، انا بحبك وعاوزك معاي دائماً
: م حاتقدر تجبرني اعيش معاك
: عارف ، بس عاوز

بعد شويه رجع ضعف وقال لي : انا بتوسلك عديل يا سمر ، ما تمشي تخليني ، انا مستعد اعمل لك كل العاوزاه ، واحاسب اي زول يزعجك ، المهم تكوني معاي ، انا ووتين محتاجين لك ، عاوزه تمشي تخلي وتين؟ اسي اطلبي اي حاجه وانا بنفذا لك ، عاوزه تشاركيني الغرفه واكون لك براك؟ موافق! وامشي شغلك ، اعملي كل الأنتي عاوزاه ، بس ما تبعدي عني ارجوك يا سمر ، انا ما صدقت لقيتك .

طبعاً قرب يبكي عديل ، وانا من البكاء ما عارفه اعمل له شنو المجنون دا ، فعلاً م حايطلقني لو ما دمر حياتي وبشتني ذي نسوانو ديل ولاصق فيني ما عاوز يزح

قلت له : ما عاوزه اقعد معاك في غرفتك ، وما تقرب مني بدون ارادتي .
: حاضر ، انا موافق ما بعمل شي إلا برضاك ، وم حاقرب على اي واحده من النسوان ديل قبل يحصل كدا ، انا لك براك

يتبع

تابعنا ليصلك كل جديد

https://www.facebook.com/share/1YHW59jqru/

#ليلة_اكتمال_القمر_7
#بقلمي_مشاعر_مبعثره

اطلبي اي حاجه وانا بنفذا لك ، عاوزه تشاركيني الغرفه واكون لك براك؟ موافق ! وامشي شغلك ، اعملي كل الأنتي عاوزاه ، بس ما تبعدي عني ارجوك يا سمر ، انا فتشتك كتير وما صدقت لقيتك .
طبعاً قرب يبكي عديل ، وانا مت من البكاء ما عارفه اعمل له شنو المجنون دا ، فعلاً م حايطلقني لو ما دمر حياتي وبشتني ذي نسوانو ديل ولاصق فيني ما عاوز يزح
قلت له : ما عاوزه اقعد معاك في غرفتك ، وما تقرب مني بدون ارادتي
: حاضر ، انا موافق ما بعمل شي إلا برضاك ، وم حاقرب على اي واحده من النسوان ديل قبل يحصل كدا ، انا لك براك
: لا انا ما عاوزه كدا
: بس انا عاوز ، يلا اطلبي
: ما عاوزه منك شي
: طيب ليه ماجيتي وقلتي لي انهم خلوك تنومي هنا وبدون مرتبه كمان؟
: ليه اقول لك؟ ما هنا بنومو زوجاتك وانا منهم ، ماما فاطمه قالت انو انا لازم انوم هنا
: انتي ما زيهم افهمي ، وقولي امي نومتك هنا ليه ما جابو لك فرش؟
: انا اصلا كنت في غرفة تانيه ، قالو في واحده اسمها حليمه رفضت قعادي معاها ، وكمان ما خلت صفاء تجيب لي فرش من غرفتا
: حليمه؟

قام مشى لها الغرفه بغض*ب شديد ، رزع لها الباب
: انتي يا حيوانه؟ كيف تطردي مرتي من الغرفه وتخليها تنوم في الحبل؟
: اانس ، لي انا الكلام؟
: ايوا لك! انتي فاكره نفسك منو عشان تتصرفي كدا؟ انا موكلك تنظمي البيت دا تقومي تعاملي مرتي كدا؟ يلا قومي بنت اهلك دي ، ومن يوم الليله سمر ح تقعد معاك هنا ، وعندها نفس الميزات بتاعتك ، لو ضايقتيها انا بغلط معاك فاهمه؟

انا استغربت طبعاً ، هو بتكلم كأنو ملك ودا قصرو ونحن جواريه ، صلاحيات وتنظيم ، دا مجنون دا؟

وهي كمان زعلت شديد ، وشكلو ما قاعد ينهرا في العاده ؛ عشان كدا استنكرت اسلوبو ، بس ما قادره ترد ، حمرت لي شديد وانا خفت منها

كنت بعاين وانا في الباب ، شافني قال لي : تعالي كملي نومك حبيبتي
وجاء داخل شال لي شنطتي دخلا لي ، وهي تحمر لي سااي
قال لها : رتبي لها ملابسا في الدولاب دي عروس
قلت له : لالا انا انا براي بظبط اموري
قال لها : امشي شوفي شغلك
بعداك هو قام رفع الفرش بتاع قريبة حليمه ونزل واحد جديد من فوق الدولاب ، قال لي : استني اجيب لك مفرش من امي
: لالا انا عندي ملايه هنا في الشنطه
مشى فتحا وطلع الملايه وقاعد يفرش فيها رغم اني حاولت امنعو
: أنس لو سمحت ما تعمل كدا ، انت بتحاول تأثر على قراري يعني؟
: انا الحابي اعمل كدا ، قلتها لك يا بنت بحبك ليه ما عاوزه تصدقي؟ والله اسي لو حابه اطلق لك النسوان ديل كلهم وتبقي انتي زوجتي الوحيده ، اصلا فقدت الرغبه فيهم ووجودهم من عدمو ما بفرق عندي
: عاين انت ما قاعد تساعدني كدا ، بس بتخليهم يكرهوني اكتر ، خاصة حبيبة القلب حليمه
: ايواا ، يعني صفاء ادتك تقرير مفصل
طوالي قعد ينادي فيها جات خايفه
قال لها : ليه خليتي سمر تنوم في الحبل وانتي في مرتبه؟
: والله قدر ما قلت لها تشيل مرتبتي رفضت ، اسي اسألا ، انا فرشتا لها عديل رفعتا
: وليه ما حكيتي لي؟ والله يا صفاء ما تنعدلي تلحقي صاحبتك المشت

طوالي نزلت راسا ومشت ، قلت له : حرام عليك ي أنس ، صفاء دي أطيب واحده في البيت دا ، وبالجد ادتني فرشا
: طيبتا دي لنفسا واولادا ما لك إنتي ، اهتمي بنفسك وبس ، يلا حبيبتي ، غيري ملابسك دي ونومي
: تمام

طلع خلاني وانا مكسله شديد كان المفروض اقوم اتحمم بس ما قادره من شدة التعب ، بس رقدت نمت ، صحيت قريب الضهر ولقيت حليمه في السرير التاني وبتعاين لي بتركيز شديد لمن قلبي نقزني
: ان شاءالله ارتحتي في نومتك؟
: ا.. لا ، ما في راحه في البيت دا
: طيب امشي أهلك.
: ودا الحايحصل ، بس لازم أقنع أنس يطلقني لأنو ما موافق
: أهربي بس ، امشي لأهلك أحكي لهم انا بساعدك
كانت نظرتا خبيثه شديد ، وانا خفت اناقشا ، قلت لها : عاوزه اتحمم
: الحمام ورا الغرفه النمتي فيها امس
طلعت طوالي ، ولقيت صفاء برا بتأكل في طفل صغير برا ، مشيت قعدت جنبها وحكيت لها بالقالتو لي حليمه
: اوعك تسمعي كلاما دي عاوزه تورطك مع أنس ، عشان شافت كيف عاملك احسن منها وشاكلا عشانك ، والله يا سمر أنس دا لو قلب عليك بخليك تتمني الم*وت ، ما تغشك ظرافتو دي ، وزي ما قال لك طلاق اسي ما بطلقك ، لو عاندتيه بعيشك اسواء تجربه في حياتك ويطلقك بعد يكون خلاص حقق غايتو من الزواج دا ، وفقد رغبتو فيك ، في المقابل انتي ح تكوني مدمره نفسياً وجسديا صدقيني ، أنس ما بعرف الرحمه واتوقعي منو اي حاجه ، أحسن إنك تكسبيه الفتره دي لحدي ما تلقي لك مخرج

مشيت منها محبطه ودخلت الحمام اتحممت وجسمي برد شويه ، بعداك دخلت الغرفه ، كنت لابسه جلباب عادي اكمامو نص ، لأنو مافي غيرنا هنا بس أنس ونسوانو ، حتى اولادو في الجزء التاني من البيت مع حبوبتهم وطليقاتو

حليمه كانت واقفه بتعاين لي بس لمن متنحه ، وانا بجفف في شعري بعد غسلتو وبطلع علبة الكريم بتاعتي عشان اتمسح ، خفت شديد من نظراتا ، وحاساها ح تقوم تاكلني ذي الوح*ش
عاوزه اطلع ، قالت لي : ماشه وين؟ انتي المفروض تكوني قاعده هنا في الغرفه دي وما تحومي كتير.
: عاوزه اشوف وتين
: وتين دي مسؤليتي انا ، انتي ما عندك فيها سبب فاهمه؟
: انا شفتك ، وعرفت طبيعة معاملتك لها ، قا*سيه شديد ، انتي ما عندك رحمه؟ تض*ربيها وهي يتيمه ؛ عشان ما عندها زول يحميها منك؟ انتي المفترض تعتبريها عوض لك ، لأنك ما عندك اولاد

طوالي قامت لي فوق على حيلا ورفعت اصبعا طول مدتو لي قصاد عيني وقالت لي : انتي عاوزه تعلميني كيف امشي بيتي؟ انا لو جبت ولد ولا ما جبت ح افضل مرت انس وعمرو ما حايطلقني ، حتى لو انتو جبتو له مية طفل ، اياك تتجاوزي حدودك معاي يا بنت ، ولا عشان وقف معاك اسي مليتي يدك منو ، عبارات الحب السمعتيها دي كلها مكرره وفي كل زواج بقولا وبدلع العروس لمن يزهج منها وتبقى زي الباقيات ف ما تفرحي ، قال وجه القمر قال

ثورتا دي خلتني اعرف انها بالجد موجوعه من الحاجه دي ، قلت لها : انا ما بهمني انس ، لكن وتين دي طفله ، وانا ما برضيني البحصل لها دا ، وح أحكي لانس كيف بتعامليها
: هههههه اسي امشي كلميه ، وخليه يناديها يسألا
: اكيد مهدداها ومخوفاها بالض*رب ؛ عشان بتقعد معاك اغلب الوقت
نزلت اصبعا وربعت يديها قصادي ، بعداك قالت لي
: انا ما بهدد ، وانتي جايه امبارح يا بنت ، ولسه عايشه الصدمه ، ما تخليني اختك في راسي ، لو عاوزه تعيشي مرتاحه في البيت دا ، خليك قاعده زي صفاء وأميره ، مسكينه يعني ، مفهوم يا ....... هه وجه القمر

اتجاهلتا وانشغلت عنها بنفسي ، وهي بتعاين لي بدون ما ترمش
لمن خوفتني ، احساس انو زول منتظر حركه منك ؛ عشان يه*جم عليك ، ما قدرت استمر في السكوت ، قلت لها : ممكن تبطلي تعايني لي؟

رفعت حاجبا وقالت لي : بعاين في الدولاب ما لك انتي.

وفعلاً ما بطلت تعاين لي لمن انا حولت نظري عنها وخايفه منها مو*ت ، كل شويه اتلفت عليها بخوف القاها بتعاين لي ، لمن إحساسي بالخوف منها دا وصل لها

وانا بس بفكر ، دي اعيش معاها كيف؟ م أنقذني منها الا صوت التلفون ، رفعتو باستعجال شديد وفتحت الخط ، كان انس ، قبل يقول شي ، انا استعجلت ونطقت اسمو في لهفه لانو كان منقذي لحظتا
: أنس!
اما هو فرح ، وفسر الموضوع ذي ما هو حابي ، والشي دا ظهر في كلامو
قال لي : عيون أنس ، وروحو ، وعمرو المضى والجاي!

سكت! وانا بتحاشى اعاين ل حليمه ، عارفاها بتعاين لي بكره شديد في اللحظه دي
قال لي : صحيتي خلاص؟
: ايوا.
: طيب تعالي افطري معاي يا قلب ، من قبيل منتظرك.
: ب بس انا ما جعانه
: كيف ما جعانه؟ امس ما اتعشيتي ، والليله شاي الصباح ما شربتيه ، بطلي دلع وتعالي حبيبتي ، انا اشتريت لك اكل جاهز ، امشي جيبي الصينيه من ماما فاطمه وتعالي لي الغرفه
: انا ما عاوزه اكل قلت لك.

قعد يحنس فيني وانا رافضه لمن زهج ، طبعاً عارفه اني لو مشيت له الغرفه م ح يكتفي بالفطور معاي ؛ عشان كدا اتجنبتو ، وبقيت بعمل كدا كل ما يتصل بي ، ما بسمح له يجرجرني على غرفتو لأي سبب كان ، بس ما عارفاه ح يصبر لحدي متين

: حبيبتي انا ح ازعل منك كدا ، بطلي عناد وتعالي
: انت غشيتني وانا لسه م مستوعبه العملتو دا ، انا اساسا قبلت بالزواج دا عشان وتين! طيب وين وتين؟ مانعني حتى اشوفا ، ولو بالغلط فكرت تجيني بجروها مني بالغص*ب
صرا وشو وقال لي : منو القاعد يعمل كدا؟
رفعت حاجبي وقلت له : الإنت مؤمنهم عليها
: سمر بالجد زودتيها بطلي خلاص ، انتي نازله فيني اوامر من أمس ولحدي اسي ما عملتي اي حاجه عشاني ، رافضه حتى تقعدي معاي في صينية اكل ومجوعه نفسك تعالي ياخ
: ما عاوزه اكل ، وطالما انت قاعد تعاملني كدا زي الجاريه ومانعني من وتين الاتزوجتك عشانا ، ح افضل اجوع نفسي لمن ام*وت

طق قفل فيني ، لمن انخلعت ، ختيت التلفون وبقيت قاعده على اعصابي ، لمن جاتني بنت صغيره من الحوش التاني ، اظن من بنات أنس ، انا كنت طبعاً في سريري القصاد حليمه البتعاين لي طول الوقت ، قالت لها : ماما فاطمه قالت لك ختي الفطور.

قامت زهجانه منفخه وشها وانا بعاين لها بقعر عيني

بعد شويه جاتني صفاء قالت لي : انتي قاعده هنا؟
: أنس طلب مني اجي افطر معاه ، بس ما ماشه
: طيب تعالي اكلي معانا هنا
: لا ما عاوزه اقعد في نفس الصينيه مع حليمه ، اسي ماما فاطمه نادتا تخت الفطور
: حليمه ما بتاكل معانا ، هي نادتا تخت فطورهم هم الاتنين ، على اساس بتثق فيها بعني ، حليمه ما عندها شغل غير تع*ذب الاطفال بإسم انها بتربيهم ، وحتى الغرفه دي ح تخليك تنضفيها انتي وتغسلي ملابسا ذي ما كانت قريبتا القاعده معاها بتعمل ، اما الطبيخ ورص الاكل لينا وللأولاد وغسيل والنضافه ، دا شغلنا نحن الحبشيات ديل

: والمطلقات قاعدات يربن اولادهن بس.
: المطلقات؟ ديل عايشات اسواء عيشه ، خليك من النكد دا عليك الله وتعالي اكلي ، انتي عيونك واقعه من الجوع
: صدقيني ما عندي نفس ، وبعدين لو أنس جاء بالغلط ولقاني باكل معاكم وانا قلت له ما عاوزه اكل ، بطين عيشتي
: كلامك صح ، لكن خليني اجيب لك صحن ختيه بالجنبه ، لو انعصرتي اكلي بالدس ، ما تجوعي نفسك ساي
: لالا اعملي لي ساندوتش بس
: ساندوتش؟ من وين نجيب العيش؟ نحن هنا اكلنا كسره وقراصه العيش دا بياكل منو انس واولادو وامو والغندوره حليمه نحن لو فضل بس بخلونا نرص كم عيشه
: انتي جاده يا صفاء؟
: والله العظيم ، اسألي اميره
: بس دا حرام ، طيب اشترو من قروشكم مش بديكم مصاريف؟
: مافي مصاريف ، حتى البامبرز والاولويز بتجيبهم ماما فاطمه وتوزعهم علينا
: وبتجيبو قروش من وين طيب؟

شالت نفس في ضيق وقالت لي : لمن تنومي معاه ياسمر ، ممكن يديك قروش ؛ ودا عشان تشتري ريحتك وبخورك وكدا ، يعني برضو عشانو ، اتخيلي ماما فاطمه بتعمل الحاجات وتبيعا ، لكن حتة دلكه ساي ما بديك لها الا تشتري منها بحقك ، وهو كمان عاوزك دايما حلوة ومجيهة ما يشوفك شينه خاصة لمن يطلبك ، بنبزك عديل ويطردك لو جيتيه وشكلك ما عجبو ، وممكن يطلقك عديل لو بقيتي مبهدله طوالي
: هه ما متوقعه منو غير كدا الانسان المريض دا ، خلاص امشي افطري يا صفاء انا بالجد نفسي مقفوله من الاكل
: خلاص انا بس بعمل حسابك وقت ما جعتي تعالي ، ماشي؟
: شكراً يا صفاء
: العفو ، نحن زي الاخوات في العيشه دي

مشت خلتني ماسكه التلفون اقلب فيه وامسح في الصور البتجمعني ب أنس

جاتني مكالمه من أمي ، دموعي دي لمن نزلت ، حسيت بالشوق لها من شوفة اسما بس ، وحنيت للبيت كأني مفارقاه سنين ، قاومت دموعي دي مسحتا حتى رديت لها
: الو امي كيفك؟
: انا تمام الحمدلله ، وين انتي من امس يا بنتي؟ وصلتي كيف؟ وكيف عامله؟
: الحمدلله
: قاعدين في شقه صح؟
: لا........... انا ، انا بحكي لك كل شي اسي.
: انتي كنتي عارفه انو مؤجر الشقه بتاعتو دي؟
: الشقه إيجار؟

ابتسمت بالجنبه وكملت كلامي : هه جايز ، ما نحن اصلاً ح نسكن في بيت أهلو وتاني ما جايين عليها.
: ما جايين شنو؟ نحن ما اتفقنا على كدا ، وبعدين خليه يدفع قروش الايجار اول ، من الصباح جانا سيد الشقه وسمعنا كلام ذي السم ، ما فضل له الا يسجننا
: ليه في شنو؟
: راجلك له سته شهور ما دافع الايجار ورافض يطلع من الشقه؟
قلعت عيوني وقلت لها : ب الجد؟
: ايوا ، امشي كلميه عليك الله ، خليه يدفع للراجل دا نحن ما ناقصين فصائح ، شفتي؟ انا من البدايه كلمتك يا سمر ، قلت لك الراجل دا ابعدي منو ، اسي عاجبك الوضع دا؟ لقاك بومه ملهوفه على الزواج ذي التقول عمرك 50 سنه! كذب عليك ذي الغبيه وكمان مسكنك في بيت اهلو ومع امو! ويا عالم عندك كم عديله في البيت ، وحاتلقي كم طفل عايش معاكم ، براك الجبتيه لنفسك ، اها خمي وصري ، والله اسي ابوك دا زعلان زعل يا سمر من قصة الشقه دي ، اسمك دا ما عاوز يسمعو.

عيوني رغرغت ، وصوتي عاوز يطلع الا قفلت خشمي ،والله العظيم قلبي دا شدة ما انجر*ح ، حسيتو انش*ق نصين عديل 💔!

هي بتعتبر موضوع الشقه الإيجار والسكن مع النسابه دا بس كذبه؟ ولو عرفت الانا عايشاه دا تقول شنو؟

ما قدرت اسيطر على نفسي وقعدت ابكي ، عادل كان قريب شال من امي التلفون وقال لي : انتي بتبكي لمنو؟ دي الحياة الانتي اخترتيها يلا اتحملي ، قدر م اتكلمنا معاك قلتي لا ، بعرسو ، وبقدر اتحمل مسؤوليتي ، حتى ابوي كسرتي كلامو ، اوعك تجي تشكي لينا من نسابتك وتقولي عملو لي وعملو لي ، انتي مش مرا وقدر مسؤوليتك؟ يلا قلعي شكوكك بيدك ، والزمي بيتك ما تفكري تجينا فاهمه؟

امي شالت منو التلفون وشاكلتو سامعاها مع انها غطت السماعه بيدا

بعداك قالت لي : ما تشتغلي به ، وما تزعلي نفسك ، الحياة مع النسابه صعبه انا عارفه ، بس نحن واقفين معاك يا بنتي ، اسمعي وصيتي لك ، عليك بزوجك وبيتك وبس ، امو دي تعتبريها ذي امك ، وباقي الناس الفي البيت ما تشتغلي بهم ، جوك اهلاً وسهلاً عملو حركات اقط*عي علاقتك بهم كلهم ، واعتبريهم جيران كعبين ، سامعه كلامي دي يا سمر؟

قلت لها بصوت فيه قوة مزعومه : م ح اجي اشكي لكم اطمني ، ذي ما قال عادل ، اي زول يق*لع شوكو بيدو ، مافي زول محبور على التاني.
: بطلي هبل وفكري في كلامي ، وما تنسي تكلمي أنس دا يدفع الايجار.

سكت قالت لي : ح تجو تعملو الكرامه هنا صح؟ ولا ماشه بيتك طوالي
: ما بعرف
: طيب ما تنسي تتصلي وتطمنينا عليك يا بنتي
: حاضر
: خلي بالك من نفسك الله يرضى عليك

دي كانت المصيبه التانيه ، انا اعيش كيف في بيتنا بعد الحصل لي دا؟ كلهم حزروني من أنس ، بس اانا عاندت واتحديتهم ، بياتو عين ح ارجع البيت؟ كيف احكي لهم دا كلو اصلاً؟ انا لو ما مت زله في البيت دا ، اكيد ح اموت تجري*ح في بيت اهلي ، وفي الطالعه والنازله ح يزكروني بالشي دا ، دا غير شماتة الناس فيني ، الأهل والموظفين والجيران! واخد لقب مطلقه بعد بايره ، وفرص الزواج الكنت شايفاها ضيقه ديك ح تضيق أكتر ، أعمل شنو؟ يعني المفروض اتحمل الوضع دا؟ وهو دا وضع بتحملوه لكن؟ انا مصيري اتطلق من أنس ، بس بياتو صورة ، وكيف ح يكون شكل رجعتي للبيت؟ اهلي مصيرهم يعرفو الحياة الانا عايشاها دي، سواء حكيت أو لا! ويشمتو فيني ويزكروني انو دا اختياري انا
كنت بسأل وبجاوب بسؤال! عقلي بقى دائر حولين دائره مفرغه وما عندها نهاية

ورجعت تاني لدوامة البكاء
بس فجاءة سمعت صوت الباب ، رفعت راسي في خوف شديد وعيوني متسعه ، اتوقعتو يكون انس بس لا! كانت مفاجأة بالنسبه لي ، وامكن جرعة شفاء

« يا وجه القمر ، ي أجمل مافي الكون! خففت من ألم قلبي! رؤية وجهك البريئ وعيناك الملائكيتان ، بفستانك الاحمر ، وجديلتيك الملتفتين خلف ظهرك. »
دا الكلام الكان بوصف الموقف دا جوا عقلي

شوفة وتين وهي جاريه في اتجاهي ، ومسلمه نفسا لاحضاني بدون خوف ، كأنو انا الملجاء الوحيد قداما ، في حين انو انا الكنت بلتجئ لها لحظتا وبتخبى جوا حضنا الصغير دا! في لحظة نسيت معاناتي وبدت نار اشواقي تتخمد ، كانت لحظه م اتمنيت انها تنتهي أبداً ، ساعتا بس حسيت انو انا ما مرت اب! ولا حتى زوله حنونه عليها بس ، حسيت اني امها وهي بنتي الما جبتها من بطني ، بحب ثقتا في محبتي لها ، ولجوئها لي في خوفا ، بحب حبها لي!

وفي المقابل انا خايفه اخزلا بسبب وضعي ، خايفه شديد لمن افكر في نفسي تتأذى هي ، لحظتا انا فكرت في حاجه واحده بس ، انو انا منقذ ربنا رسلو للبنت البريئه دي ؛ عشان يخلصا من المعاناة الهي عايشاها دي؟ هي اصغر من الشي دا بسنوات كتيره.

ممكن كل الحصل معاي دا يكون لحكمه؟ خلاص لها واجر لي! وكمان درس قاسي ينبهني ل حاجات كتيره ، نعم كتيره ، انا كنت عايشه فيها وما مقدراها ، حياة كريمه انا كنت شايفاها ناقصه ، عيوني كانت بتعاين برا دائما ، عمري ما فكرت انو الانا كنت عايشاه دا شي مميز ونعمه بتمنوها غيري ، ما قدرتها لحدي ما فقدتا كلها
: وتيني
: سمر انا اشتقت لك ، عليك الله سوقيني معاك ، وارح نمشي من البيت دا ، ولا نقعد مع بعض ، بس ما تخليني براي

كانت بتبكي ، حاجه توجع القلب ياخ ، طفله ذي دي دموعا جاريه ذي المطره ما بتقيف! ما عشان عاوزه حلاوه ما ادوها ولا طالبه فسحه ولا زياره ولا لعبه ، ولا حتى توبيخ من امها! لا! دي بتبكي لسبب حقيقي ببكي!

مسحت دموعا بيدي وابتسمت لها ، قلت لها بقناعه ، وانا محاوطا وشها الصغير بيدي الاتنين : لو ربنا مقدر لينا نكون مع بعض يا وتين ، انا راضيه بالقدر دا ، ومفوضه امري وامرك لربنا .
: انتي لو قعدتي معاي ؛ انا بتحمل اي شي وما بشكي والله العظيم

انا زاتي دموعي نزلت وقلت لها : انا زاتي ما بشكي
مدت يديها الصغار ومسحت لي دموعي بعدها قالت لي : طيب ما تبكي
هزيت وشي وانا منزله عيوني لتحت من القهر وقلت لها : انا ما قاعده ابكي
: بابا قال لي انو انتي جعانه من امس ما اكلتي ، وطلب مني اجي افطر معاك عشان افتح نفسك
ابتسمت وانا بقعدا في رجولي بعد كانت واقفه قدامي وانا قاعده على رجولي على الارض قداما

طبعاً انا عملت الحركه دي تلقائيا لحظة شفتها وهي جات علي حضنتني ، انا بادلتا الحضن بالوضعيه دي ، عشان اكون اقرب لها
بعداك قلت لها : شوفتك براها بتفتح النفس على الدنيا كلها

رفعت راسي ، لقيت أنس واقف في الباب ، وعيونو فيها دموع مع الابتسامه ، سألتو بعيوني
لوح لي بيديه نظام انا تمام
قلت له : شكراً أنس
: انا ما كذبت عليك في شي ، كنت جادي في موضوع الحياة المشتركه بيننا نحن الثلاثه ، انا بحبكم اكتر شي

قلت له : ممكن تخلي وتين تقعد معاي هنا في الغرفه وانا الاهتم بها بنفسي؟
: طبعاً ، بس امي امكن ما تقبل لانها....
وتين قالت له : ما عاوزه اقعد مع ماما فاطمه عاوزه سمر بس
: طيب اهدي ، انا ما مانعك من سمر ، بس حبوبه برضو بتهتم بك لأنها بتحبك ، وخالتك حليمه
اتخبت في حضني وهي مغمضه عيونا لمن سمعت اسم حليمه ، قلت له بجديه : أنس انا عندي شرط
: اتفضلي
: ما عاوزه اي زول يتدخل بيني وبين وتين ، ولا ياخدا غص*با عنها ، هدي قدامك لو حابه تمشي ل ماما فاطمه او حليمه ما عندي مانع ، بس انو واحده تاخدا مني غص*باً عنها ما بقبل
: مافي زول بجبر وتين على شي ، وتين دي وردة البيت ، هم بس بهتمو بها
: انا بهتم بها ي أنس ، براي ، موافقه يا وتين؟
: ايوا عاوزه سمر بس

قرب منها ونزل تحت مسك يديها الاتنين وقال لها : طيب يا بابا معناها المفروض تناديها ماما صح؟ ماما سمر
قال كدا وهو بعاين لي
قالت له : حاضر ، بقول ماما سمر ، انا بحبها
: الإنتي عاوزاه بحصل ، بس تاني ما تخاصمي بابا
هزت راسا بالموافقه
قلت له : خليني اجيب لها ملابسا هنا
: ما تتعبي نفسك انا بجيبهم لك وارتبهم في الدولاب وكمان بدخل لها السرير ، انتو اقعدو هنا حليمه جايبه لكم الفطور
عاينت لها ، لقيتا برضو بتعاين لي ، ضحكنا ، وقلت له : نحن بننوم في سرير واحد ، وما من جديد على فكره ولا شنو يا وتين؟
وتين قالت له : لمن كنت بنوم معاها في بيتهم ، كانت بتنومني في سريرا
: اعملو الأنتو عاوزنو

بعد شويه جات داخله حليمه صاره وشها وشايله صينية اكل مغطيه بطبق ، ختتا وماشه تقعد في السرير ، انس قال لها : حليمه امشي جيبي ملابس وتين كلها من غرفة ماما فاطمه

رفعت حاجبا

قال لها : وتين ح تقعد مع سمر من اليوم ، وهي المسؤولة عنها ، انتي وامي ما قصرتو معاها ، وسمر ح تكمل الواجب
: هي شكت لك مننا يعني؟
عاينت لوتين بخباثه وقالت لها : نحن عملنا لك شي يا بنت؟

وتين خافت واتخبت فيني ، قلت لها : انتو ما عملتو شي ، بس هي اختارت تقعد معاي انا ، وانا حابه اخفف عليكم ، انا الح أهتم بأكلا وشرابا وملابسا وحماما وكل شي بخصا ، هي لو عاوزه حاجه منكم بتطلب ، بس ما مجبوره تمشي معاك لأي مكان غص*باً عنها
: قصدك شنو؟
انس قال لها : باختصار سمر حاتكون ام وتين ، واي ام مسؤله عن طفلا مافي زول يتدخل في تربيتا ، لو ضر*بتا عديل ممنوع انتي ولا امي تحجزوها ، هي حره معاها ووتين موافقه ، لو ما عاوزه تطلع برا الباب دا مافي زول يجبرا
قالت له ب لوم : براحتك ي أنس
: براحة وتين يا حليمه

رفعت حاجبا ومشت ، وانا متاكده انها مبيته لي النيه ، وانا خايفه بس اعمل شنو؟ الوضع دا انا انجبرت عليه ولازم اتحمل عشان اعيش

قعدت في السرير وخاته وتين في رجولي بأكل فيها بيدي وهي برضو بتمد يدها لي عشان تعمل نفس الشي ، لمن اقرب واكل من يدها
انس كان بعاين لينا قبضتو حول نظرو ، قلت له : إنت م فطرت صح؟
ابتسم وقال لي : دا فطوري الأنتو بتاكلو فيه دا.
وتين قالت له : تعال اكل معانا.
قال لها : انا منتظر الإذن من ماما
قلت له : تستاذن مني؟ لا هو اصلاً نحن المفروض نستأذنك ، تعال اقعد

جاء قعد جنبي وهو بعاين لي وانا بأكل وتين ، بعاين اكتر مما بياكل
فجاءة قال لي : دا الكنتي متمنيه تعيشيه صح؟
ابتسمت وما رديت له ، أضاف : وانا برضو عاوز كدا ، ح أحقق لك كل البتتمنيه ، المهم تفضلي معانا وما تفكري تمشي تخلينا

وتين قالت لي بخو*ف : انتي عاوزه تمشي؟ سوقيني معاك لو ماشه.
خت يدو في راسا وقال وهو بعاين لي : ما بتقدر تسوقك معاها اي مكان ، مافي حل غير تفضل معانا لو بتحبنا

انا فاهمه قصدو كويس بس ما عاوزه اتناقش معاه قدام وتين ، بعد خلصنا اكل ، طلعت معاها غسلنا يدينا وجيت ارفع الصينيه ، عاجلني ومسك يدي ، قال لي : خليها هنا ، تعالي اقعدي
عاينت له بالجنبه وقلت له : لازم احمم وتين واسرح لها ، شوف منظرا كيف؟

طبعا مخلنها وسخانه وشعراتا امكن لهم كم يوم م اتسرحن
قال لي : تعالو استخدمو حمامي ، وانتي زاتك اتحممي واخدي لك غفوه تحت المكيف
: لالا هنا في حمام
كالعاده قعد يصر وانا رفضت لأنو دخولي لغرفتو معناه اقبل اكون معاه
مشى خلانا بدون ما يحقق شي ، انا ووتين قضينا وقت حلو ، بس كل م اسألا عن امها بتغير الموضوع ، خاصة لو سألتا عن علاقتا ب أبوها ، هي بتحب ابوها شديد بس بتخاف منو ما عارفه ليه؟

المهم نمنا شويه جنب بعض ، والعصر مشينا قعدنا مع صفاء واتونسنا معاها ، عندها بنت اكبر من وتين بشويه لعبو مع بعض ، واميره برضو شاركتنا الحديث ، كان اول تعارف بيننا ، هي برضو ما كعبه وقلبا ابيض ذي صفاء ، بس شكلا بتحب أنس وما عاوزه زول ينافسا فيه ، خايفه كمان انو يجي يوم يستغنى عنها ويطلقا ، عشان كدا بتبزل جهدا عشان تفضل حلوة ومميزه في نظرو ، اتغدينا معاهم برضو ، اصلا فضل باقي عيش وشوية اكل من فطورنا

القبيل ذردنا بهم ، قالو أنس ما بتغدا لمن يفطر متأخر هو غالباً بفطر الصباح مع الشاي ، ودا لمن تكون معاه واحده من نسوانو طبعاً ، غير كدا بنوم لوقت متأخر ووقت ما يقوم بفطر وتاني غداء مافي

قلت لهم : هو أنس دا ما شغال ولا شنو؟ قاعد 24 ساعه في البيت
صفاء ضحكت وقالت لي : هههههه ما قاعد لك انتي ، ناسيه انك عروس؟
وأميره أضافت : بعد تتمي اسبوع تفتشي ما تلقيه
قلت لها : بتمنى يحصل والله ، وما بفتشو
طوالي صفاء لكزتني ، فهمت انها عاوزاني اعمل حسابي في الكلام قدام اميره
قالت لي : أنس شغال في مجال الدواجن وعندو اقفاص بربي ويبيع
: بس ما ظاهر عليه انو عندو قروش
: البيت كبير والمسؤوليه اكبر
: بالإضافه لاجور العمال

أميره قالت لي : العمال نسوانو المطلقات ديل ياختي ، ينضفن ويرعن الفراخ ذي ما برعن اولادهن ، دا غير الشغل ل ماما فاطمه في ريحتا ، لا شكراً ولا بارك الله فيكن ، وبعد دا يشتغلن لأولادهن ، غسيل ومكوه ونضافه ، عشان كدا يا سمر ، افضل تكوني زوجتو من طليقتو في البيت دا
: ما شايفه افضليه

قعدت معاهم لحدي المساء مشيت ، وهم مشو حوش ماما فاطمه يغسلو العده ، لأنو في حوش أنس هنا قالو ممنوع مويه تتكشح ساي ولا تنطبخ حاجه ، يعني مكان لراحتو وبس ذي الحرملك بتاع السلطان.

سقت وتين ومشينا غرفتنا ، لقينا حليمه قاعده ، ما عبرتها ولا بنظره ، حضنت وتين ونمت ، صحاني صوت الباب ، قمت مخلوعه ، لقيتا ماما فاطمه ، قالت لي : أنس بناديك ، تعالي شيلي صينية العشاء وامشي له

قلبي قعد يدق زي جرس الانزار ، وابيت امشي طبعاً ، تاني رسل لي صفاء ، قلت لها : قولي له نامت هي ووتين
: كيف اقول كدا يا سمر؟ ممكن يض*ربني عديل ويقول لي صحيها
: خلاص امشي نومي بس وما تشتغلي به
: سمر ما تعملي كدا ، والله العظيم ما بحصل خير لو ما مشيتي له
: انا بتصرف ما تخافي علي

كنت بارده شديد في الكلام رغم الخوف المتملكني ، بس دي تصرف لابد منو ، وهو الح يحكم شكل حياتي لبعدين ، حليمه كانت صاحيه وبتراقب ، لابسه قميص نوما الما بتناسب مع حجما ، طبعا في الجزء دا من البيت كل النسوان ماخدين راحتهم لانو مافي غير أنس بدخل ويطلع وهو زوجهم ، وماما فاطمه نسيبتهم ، بالنهار بلبسو الجلبابات وملابس البيت العاديه من غير طرح مع الحنه والجيهة اي واحده بتكون عاوزه تلفت نظرو ، يعني مسموح يلبسو اي شي ، وبليل في البتنوم بلبسا العادي دا وفي البتلبس قميص نوم ، مافي اي قيود

وحليمه لابسه ومظبطه نفسا ، ريحتا دي تخنق بس تقول عروس ، ولا خجلانه من وتين ، المهم انا رقدت وطفيت النور قام تلفوني رن

لقيتو أنس صمتو ، امكن اتصل كم مره ، تاني رفعتو لقيت منو رساله
: سمر انا منتظرك من قبيل تعالي بسرعه ، عارف انك صاحيه ما تخليني ارسل لك تاني.

برضو م اشتغلت بالموضوع قعد ينادي فيني بصوتو العالي داك لمن خفت ، بس راسي ما رفعتو ، وتين حست وصحت بس ما فتحت عيونا ، اكتفت بإنها تتدسى جوا حضني ، وانا قلبي بدق
حليمه قالت لي وهي بطق في اللبانه : انتي امكن يومك تامي وما عارفه

قلت لها بصوت ضعيف لأني حرفياً خايفه : مافي زول بموت ناقص عمر ، ويومي لو تامي بموت في سريري دا.

ضحكت باستهتار ورقدت

بعد شويه هو سكت وانا غمضت عيوني ، عاوزه انوم كدا اسمع لك الباب دا بنفتح بقوة ، قمت مخلوعه واول م اتلفت النور ضوا جوا عيوني بعد كان مطفي
: أنس؟
كان هو فعلاً ، عاين لحليمه وهي بتستعرض في نفسا قال لها : اطلعي برا

مع الكلمه ديك انا انص*دمت اكتر منها ، وقمت على حيلي وقفت ، كان زعلان وصاري وشو قال لي بصوت خشن : يعني دي حقاره منك صح؟ اناديك اكتر من مره وارسل لك واتصل ما عاوزه تجي ، فاكراني ما بقدر اصلك محل قاعده؟
انا من الخوف ما قدرت ارد ، قال ل وتين : اطلعي برا يا وتين عاوز امك شويه

هي كانت بتتمسك بي وما عاوزه تطلع خايفه شديد وبترجف ، مسكتني من يدي وعاوزه تطلعني معاها بس هو شالا وطلعا برا

بعداك رزع الباب لمن جسمي كلو قعد يرجف ، وبقيت ارجع لورا رغم اني قريبه شديد للسرير ؛ لمن وقعت فيه وهو بنفس الغضب جاء باتجاهي وقال لي : انا الدلع بعرفو ، وبميز بينو وبين الاستغلال والحقاره ، ولسه م انولدت مرا في الدنيا دي بتقدر تحاقرني ؛ حتى امي خلي انتي

يتبع

السلام عليكم اول مره انزل حوجه بس عشان الحال مؤثره وانا متاكد من مصداقيه الحاله

دي كاتبه تعتبر من افضل عشر كاتبات في السودان وتمر بظروف صعبه جدا  وقاعدين في الخرطوم رغم الحرب دي وهي البنت الوحيده لا امها  هي ما  عندها غير امها فيا ريت البقدر يساعد ولو بالقليل  ولو بعرف زول ممكن يساعد  ويتكفل بعلاجها وفي ميزان حسناتكم إن شاء الله وربنا يحفظ جميع الامهات ويعافيهم يا رب لانه ماف اغلي منهم

✳️رقم حساب بنكك  1224080
وسام الدين حمدان

#ليلة_اكتمال_القمر_8
#بقلمي_مشاعر_مبعثره

: اطلعي برا يا وتين عاوز امك شويه
هي كانت بتتمسك بي وما عاوزه تطلع خايفه شديد وبترجف ، مسكتني من يدي وعاوزه تطلعني معاها بس هو شالا وطلعا برا

بعداك رزع الباب ، لمن جسمي كلو قعد يرجف وبقيت ارجع لورا رغم اني قريبه شديد للسرير لمن وقعت فيه وهو بنفس الغضب جاء باتجاهي وقال لي : انا الدلع بعرفو ، وبميز بينو وبين الاستغلال والحقاره ، ولسه م انولدت مرا في الدنيا دي بتقدر تحاقرني حتى امي الولدتني خلي انتي .......

قلت له بصوت مبحوح ؛ بس مسموع وفيه نوع من الصرامه
: وانا مافي راجل في الدنيا دي قدر يقنعني به! ويخليني احبو واحترمو واميزو الا ابوي الله يطول لي في عمرو

عيونو بقت اضيق وهو بقرب مني ، رفعت يدي الاتنين ختيتهم في أكتافو وانا خايفه شديد ، وما عارفه كيف عملت كدا ، قربت منو ، وقلت له : انت ما قدرت تميزني ، كيف جاي تطلب التمييز؟

هو طبعا بقى ضعيف شديد قدامي ، ما قادر يتكلم زاتو ؛ بدون ما يحرك عيونو بنظرات تايهة جوا عيوني البطلت ترمش ، كان مأسور جواها ، حسيت اني مسيطره عليه عديل

قال لي : كيف ما ميزتك؟ ناسيه كل العملتو عشانك؟
ضيقت حدقات عيوني شويه من غير ما أغير نظرتي ، ولا حتى أرمش ، وقلت له باستفسار : عملت شنو غير انك خليتني اشوف وتين ؛ الانا اصلاً اتزوجتك عشانا؟ ودا حقي ما شي انت عملتو ......

بلعت ريقي وكملت بجديه مصطنعه : واسي مخليني في نفس الغرفه مع زوجتك الاولى

هو طبعاً بتكلم بدون تردد ، بقول كل الفي بالو بدون تفكير وعيونو في عيوني ، بتتحرك هنا وهناك ، اما عيوني ثابته ، ونظرتا واحده وقويه
قال لي : قلت لك تعالي شاركيني الغرفه انتي الرفضتي.

المؤكد انو فاقد السيطره على نفسو وتصرفاتو ، مد يديه الاتنين على خصري عاوز يرفعني ، وهو بتنفس في وشي قال لي : خلينا نمشي غرفتنا .

نزلت يديه مني بقسوه ، ولسه محافظه على النظرات الثابته ، بس نزلت يدي من كتفو ، وهو لصق جيبنو مع جبيني اثناء الحركه دي.
قلت له بحزم : ما عاوزه اشارك اي زول في غرفتي ، ذي م أنت عندك غرفه منفصله انا عاوزه غرفه منفصله بتقدر تعمل كدا؟
دخل حواجبو في بعض وقال لي : قصدك شنو؟ ابني لك غرفه يعني؟
: ما بعرف ، بس انت قلت انك مميزني على نسوانك وانا شايفه اي تمييز ، كمان بتطلبني لغرفتك في العلن كدا زيهم؟
: انا اتصلت بك ، ورسلت لك رساله ابيتي تردي
: دا بعد رسلت ماما فاطمه وصفاء ، وعاوزني اخد لك العشاء ، واقعد تحت رجليك ي أنس ، دا مكاني؟
نظرتو بقت بارده شويه وحسيت انو طلع من سيطرة عيوني ، قال لي : عاوزاني اعمل لك شنو يا بنت؟ انتي بس عاوزه تجننيني صح؟
رديت له بصوت هادئ : لا ، انا زيك ، عاوزه ابقى لك براك ، بس لمن انت تبقى لي براي ، وابطل اخاف من غدرك!
عيونو اتسعت وقال لي ب حنيه : عمري ما بغدرك ، انا بحبك يا بنت.
: معناها خليني اطمن ، ولمن اكون مطمنه لك ما بتحتاج انك تناديني بالطريقه الساقطه دي ، انا بنفسي ح أعمل العشاء واجهز نفسي واجيك في غرفتك عشان اكون لك براك ، او ممكن انت تعمل كدا بدون رضاي ، تاخد حقك بس ........ عمرك م ح تملكني
: انتي ليه صعبه كدا؟ ذي القمرا ، كل م اقول وصلت لك ترجعيني ورا؟
: م ح تحتاج تمد يدك انا بنفسي بنزل لك ، وبجيك
: سمر....
رجع مغيب تاني زي الاول ، كأنو ضارب حاجه او مسحور ، وبسمع كلامي زي الطفل ، يعني كان مطيع لدرجة تخوف ، حاول انو يبوسني ، بعدت عنو ، وقمت من السرير نهائي ، ساعتا هو امكن بدا يصحى على نفسو : قال لي : يعني انتي عاوزه شنو اسي؟
: ذي ما قلت لك ، انا لمن اتزوجتك ، اتزوجتك على اساس نعيش انا وانت ووتين برانا ، مش يكون في حليمه في نصنا وكل م اتلفت القاها بتعاين لي لمن قلبي يقيف ، افتكر دا حق من حقوقي ك مرتك ، انت ما قدرت تديني له ، وجاي تطالب بحقك الشرعي.
: يعني اسي انتي عاوزه تكوني في الغرفة دي براك؟
: انا ووتين.
: تمام ، وح تجيني متين؟
: بجي ، بس انت ما تجر*حني تاني وتناديني ، و م اليوم ، م شايف وتين خايفه كيف؟

اخد نفس ورفع حاجبو بعداك قال لي : الانتي عاوزاه بحصل يا سمر ، بس انتبهي ، انا صبري عندو حد
: انا زيك يا أنس منتظره

طلع من الغرفه و لقى حليمه في الباب قدام وشو ، قال لها : الغرفه دي خليها ل وتين بنتي وسمر ؛ عشان عروس ، خليهم ياخدو راحتهم وانتي اقعدي مع صفاء وأميره
الكلام دا وقع على راسا ذي الصاق*عه ووقفت ناقشتو ، بس ما طلعت بنتيجه ، لأنو مقرر خلاص ، دي كانت كسره كبيرة لها ، وذادت من كرهها لي.

اول ما هو طلع مشى ، جات ناطه لي في السرير ، مسكتني من شعري ، جرتو ورجعت لي راسي ل ورا ، في اللحظه ديك ، حسيت بالدم اتجمد في نص راسي ، وشعري دا قرب يطلع في يدها
: انتي فاكره نفسك منو يا بنت؟ جايه ورا وعاوزه تحجزي الضرا؟ عاوزه شنو انتي بالضبط؟ بتمثلي دور المسكينه قدام أنس وتتشيطني معاي

عضت نواجزا وقالت لي بحرقه : تطلعيني من الغرفه؟ ناسيه انها حقتي انا؟ انا الما كنت قبلانه انك تشاركيني فيها أصلاً ، تقومي تاخديها كلها لنفسك؟ انتي فاكره نفسك منو؟
بقيت احاول اتفك منها ؛ بس ما قدرت ، قعدت اصرخ ، جوني اميره وصفاء ، ووتين معاهم قامت جاريه تنادي ابوها طوالي حليمه نهرتا بصوت غليظ خلتا وقفت في مكان واحد ذي الجماد

ورجعت للبتعمل فيه ، بعد تعب فكوها مني وهي زي التور ، تصارع وتتوعد فيني

: والله العظيم يا بنت انا لو ختيتك في بالي اطلعك من البيت دا جنازه ، جايه تتحديني انا وتاخدي حياتي مني؟
: انتي انسانه كعبه! وما بتستحقي تكوني وسط الناس المساكين ديل وتقعدي تعذبي في البنت اليتيمه دي
: انتي مالك؟ وكلوك محامي لهم؟
كانت جايطه شديد وأنس امكن سمع ، مع انو مشغل التكيف عالي ، بس حسينا بحركتو من فتحة الباب بتاع غرفتو ، وهي واقفه قدامي ذي التور ، وانا شعري منكوش
جاء داخل علينا ، لقاها هي متوسطه اميره وصفاء ، وبتصارع فيهم
قال لهم : في شنو هنا؟

مافي زول نطق وهي بتحمر لي ، عاين فيني وقال لي : شعرك مالو عامل كدا حبيبتي؟ في واحده هبشتك؟
قال كدا وهو بعاين ل حليمه ، وعارف انها هي ، بس انا قلت له : لا .

رفع حاجبو وعاين لمسافه طويله وهو بكذب في كلامي ، بس انا نزلت عيوني لتحت وما قلت شي ، قام عاين لأميره وصفاء
اميره قالت له : جينا ن نساعد حليمه ترتب ملابسا
كان بعاين لي وانا ساكته صرخ فيني : اوعا تكذبي يا سمر.

مشى جنبها وقال لها : إنتي مديتي يدك على مرتي؟
: ما هدي قالت لك ما لمستا ، واميره وصفاء شهدو ، حتى اسأل وتين

وتين سكتت طبعاً لأنها خائفه

عاين لي ، قلت له : كانت جايه تشيل ملابسا عشان تاني م ح تدخل الغرفه
قال لها : شيليهم براك ليه تنادي صفاء وأميره؟ امشو نومو

أميره كانت بتتجدع ساي بقميصا وتحاول تلفت نظرو ، بس انا لاحظت انو بعاين ل صفاء ، و بسرعه حول نظرو عنها

وقف انتظر حليمه لمن شالت ملابسا وطلعت ، قال لي : ما تخبي عني اي حاجه تحصل معاك ، ولا تتستري على عمايل زول
: ما قاعده اتستر

خت يدو في راسي وبقى يمشي يدو على شعري المنكوش وقال لي : لو سمحتي لهم يئذوك انا ما بسامحك ، وشك دا وشعرك ، كلك امانه المفروض تحافظي عليها مفهوم؟
: مفهوم
: اقعد معاكم شويه؟
: لالا امشي نوم بكون عندك شغل الصباح
: انا عريس ما عندي شغل
: بالمناسبه ي أنس ، انت دفعت إيجار البيت؟
: انا ما مؤجر
: قصدي الشقه الكنت ساكن فيه جنبنا ، صاحبا جاء لناس امي وطالبهم بقروش إيجار وكدا
: مافي زول عندو قرش عندي ، انا دفعت له مقدم كمان ، لاني اصلاً كنت طالع
: يعني هو بكذب؟
: ايوا بكذب يا سمر ، لو عندو كلام خليه يجي يواجهني ، واهلك خليهم يطردوه لو دق بابهم تاني ما عندو اي حق يجيهم
: تمام
: تصبحي على خير
: وانت من أهلو
عاوز يبوس خدي بعدتو وقلت له : وتين شايفاك.
: تمام

بعد مشى حتى انا قدرت انوم ، وطبعاً قفلت الباب بالمفتاح ، صحيت بدري ماشه على الحمام ، اشوف لك حليمه شايله ابريقا وتتقدل دخلت قدامي وابت تطلع نهائي وانا عاوزه اموت😣 ، وتين قالت لي : امشي حمام بابا ما بمنعك
قلت لها : لالا خليه نايم
: طيب الحل شنو؟ الشريره دي ما ح تطلع لك هي قاصده تأخرك اصلاً
: وزمن الصلاة بروح علي
: طيب ما عندنا حل ، غير حمام ماما فاطمة
: يلا

فتحنا باب النص ومشينا الحوش التاني ، لقيناهم لسه ما صحو ، طبعاً اتفجأت لمن شفت النسوان ديل راقدات في البرنده ، مبشتنه وعرشا متهالك ، حتى المراتب الراقدين فيها ، دي عفا عليها الزمن ، وفي واحده راقده من غير مخده ، وفي منهن المتغطيات بس بتيابهم ما عندهن ملايات ، والله وضعهن يحنن
ويهرشن من الباعوض ، مروحه ساي مافي فوق رأسهن

في ثلاثه غرف طبعاً ، سألت منهم وتين قالت لي : واحده حقت ماما فاطمه وواحده للبنات والتانيه الجنب الباب دي حقت الأولاد

مشيت دخلت الحمام في واحده صحت بصوت الباب بتاعو ، ورفعت راسا مخلوعه
قلت لها : اسفه كملي نومك

قامت من رقدتا قعدت وحكت عيونا قالت لي : لالا اصلاً لازم نصحى بعد كدا ، عندنا شغل
عاينت لي من فوق ، لحدي رجولي وقالت لي : العروس؟
: ايوا
: الجابك هنا شنو؟ أنس لو شافك بشاكلك
: ليه؟

في وقفتي ديك سمعت لي صوت ولد ، يعني ما صغير ، اتلفت عليه لقيتو طويل امكن مراهق لمن انخلعت
هي صلحت توبا وقامت طلعت له ، قال لها : امي وين؟
: نايمه اقيف اصحيها لك
: لالا ، خلاص خليها مرتاحه ، جيت اشوفا بقت كيف من المعده ، امس م اكلت.
: لالا اسي أحسن يا ولدي
: امس ابوي اداني اجيب لها حبوب من الصيدليه بس لقيتا مقفله
: ما مشكله برسل خالد ، انت امشي اقرا يا ولدي عندك امتحانات
: خالد زاتو عندو مدرسه يا خالتي ، انا بمشي
: وليه يعني؟ انتو اخوان ، الله يرضى عليك اقرا وانجح عشان تريح امك
: وباخدك انتي برضو معاي

عاين اتجاهي ولمن شافني نزل راسو ومشى ، قلت لها : دا منو؟ وخالد منو؟

اتنهدت وقالت لي : ديل اولاد راجلك يا عروس! وخالد بكون ولدي انا ، م اصغر دا بكتير ، عمرو 13 سنه ، عشان كدا قلت لك ما تجي بهنا ، اولاد راجلك مراهقين ، وهو ما بقبل نسوانو العلى زمتو يتحوامن قدامهم عشان الفتنه وكدا.
: بس كيف؟ كيف تقبلو على نفسكم وعلى اولادكم العيشه دي؟
: هو غير اولادنا الجابرنا شنو؟ تمشي أهلك وتخلي ولدك هنا يبشتنوه لك ، الحاجه الانتي ما عارفاها انو أنس ما بخليك تاخدي ولد من اولادو برا البيت دا ، لو طلقك تمشي أهلك براك وتخليهم هنا براهم ، للعذاب ، وتموتي حسره عليهم

عاينت على وتين ومشت دخلت الحمام

اما انا مسكت وتين من يدا ومشيت بهناك ، دخلت الغرفه لقيتا مقلوبه وملابسي كلها في الأرض وملابس وتين والملايات ، مرمدات عديل والأرض تراب اصلاً ، حتى الريحه مجدعه ، وتين قالت لي : اكيد دي الشريره حليمه
: بس كيف تعمل كدا؟ دي مجنونه ولا شنو؟

طلعت برا ومشيت لها هناك في الغرفه بتاعتهم ، لقيت صفاء بتكنس وهي راقده خاته رجل على رجل
قلت لها : انتي القلبتي لي الغرفه كدا صح؟
: اسألي نفسك؟ انتي كنتي وين لمن حصل كدا في غرفتك.
: انتي واحده حقوده وما عندك اي احترام لزول
: انتي بتتكلمي عن الاحترام؟ انا عمري ما لاقيت مرا خبيثه زيك كدا ، عامله نفسك مغصوبه على العيشه ، وما عاوزه أنس ، بس في الحقيقة انتي قاعده تمثلي وتخططي عشان تاخدي كل شي وتطلعينا نحن برا ، مستغله قصة انك عروس ونفسو فيك ، فاكره نفسك ح تفضلي مدلعه كدا لحدي متين يعني؟ اي شي جديد بقدم ، وانك تكوني مكاني دي انسيها ، اسألي غيرك.
عاينت لصفاء وقالت لها : وانتو العاملين نفسكم متعاطفين معاها ديل ، اقعدو كدا مغمضين عيونكم لمن تلقو نفسكم في الحوش التاني مع ماما فاطمه وهي المرا الوحيده هنا.
قلت لها : انا ما زيك! ولا باقيه على بيتكم دا ، انا لو لاقيه طريقه كان طلعت اليوم قبل بكرا ، بس قاعده عشان وتين
أميره جاتنا جاريه من برا وقالت لينا : وطو اصواتكم ، انس جاء

وفعلاً سمعت صوتو بنادي فيني ، اظن مشى الغرفه وما لقاني ، طوالي جانا وانا ساكته وباين علي الإنزعاج
قال لي : بتعملي في شنو هنا؟ وليه قالبه الغرفه كدا؟
قلت له : انا زاتي عاوزه اعرف القلبا كدا منو؟ طلعت وجيت لقيتا كدا

حليمه عاينت عليه وقالت له : جايه ترمي بلاها علي انا ، المن سريري ما قمت

قلت لها : كذابه شفتك ماشه على الحمام
قالت لي : شفتيني بعينك بعمل كدا في الغرفه وسكتي؟ ولا عندك دليل على اني عملت كدا ، ولا شاهد؟ هديل اميره وصفاء اسأليهم لو شافو شي ، دي الكديسه حبيبتي! لقتك مافي دخلت عملت العمله دي ، عادي يعني كم مره حصلت معاي كدا
أنس نسى موضوعو وقبل علي ، قال لي : مشيتي وين انتي؟
: الحمام بس.
حليمه قالت لي : انا كنت في الحمام ، وقلتيها بخشمك اسي ، وانتي طلعتي برا بالباب دا ، انا شفتك
صرا وشو بقاه ذي السحاب وقال لي : انتي البوديك ب هناك شنو؟ ما تطلعي بالباب دا مالم يكون عندك ضيف ولا ينادوك انتي فاهمه ولالا؟
: بس الحمام .......
: ما تقولي لي حمام ولا زفت

لمن لقيتو زول شكل ؛ مشيت خليتو زعلانه ، وديك تضحك ، جاء وراي وانا قاعده في السرير لسه بشاكل
قلت له : كنت تضر*بني كفين قدامهم وتبرد قلبك اكتر
: انتي قاعده تستفزيني بتصرفاتك ، هنا دا بيتك وفيه كل حاجه تحتاجي لها ، غرفتك ، وحمامك ، وحتى اكلك بجيك في مكانك تطلعي ليه فهميني؟
: حمام واحد لينا كلنا وننتظر بعض صح؟ لو كل واحده تمت ساعه انا اقعد انتظر هنا؟
: طيب ما كنتي تجي تدخلي حمامي؟
: ما بجيك من الصباح واصحيك عشان الحمام
: انا راضي انتي مالك؟ ومن الاول قلت لك تعالي اقعدي معاي في الغرفة
: يعني ي اما اقعد معاك او اعيش الوضع دا؟ دا بيت ولا سجن؟

جاء قعد جنبي وقال لي : انتي هنا دي مساحتك ، ومن حقك تقعدي بحريتك وتعملي كل الانتي عاوزاه ، ان شاءالله تتحممي في نص الحوش دا ، م بسألك ، لكن هناك في اولادي! انا عندي اولاد كبار في العمر يا سمر ، يعني مراهقين ، وما عاوز واحد فيهم يشوفك وينفتن فيك ان شاءالله حتى بنظره ، النفس غلابه وانتي عارفه ، وديل اولاد مراهقين ،

ونسواني ذي ما شايفا ، بكونو مهتمين بنفسهم طول الوقت ، وملفتين للنظر ، الواحده لو ماشه بهناك بتستر نفسا وتمشي لغرض محدد ، وفي زمن محدد
: وطليقاتك النايمات برا ديل؟ ما بفتنو؟
: ما في مرا فيهم بترقد برا ، وديل اغلبهم اولادهم هم ، مافي واحد بدخل بدون ما يستأذن ، غير كدا انتي شفتيهم ، مافي فرق بينهم وبين الراجل الا الاسم
: النسوان ديل انت عاشرتهم في يوم من الايام ، وكل واحده كان عندها زكرى جوا غرفتك هناك ، كيف بقو عادي في نظرك ، وذي الرجال كمان؟
: كانو زمان ! يعني زكرى زي ما قلتي ، ورغبتي فيهم ماتت ، ذي كل شي عادي
: وانا زيهم.....
: ما ترجعينا لنفس الموال ، وقومي تعالي افطري معاي
: ما عاوزه فطور ، ما صليت لسه وعندي شغل
: خلي حليمه ترتب لك الغرفه او صفاء ، انتي تعالي استعملي حمامي وصلي
: ما عاوزه
شال نفسو في ضيق وقال لي : سمر انا بديت ازهج
نزلت حواجبي ل تحت ممثله الحزن وقلت له : انت ازهج براحتك ، وانا ممنوع حتى اقول كلمه واحده
: انتي من امس ما سكتي ، عاوزه وعاوزه ، اقلاها تعالي اكلي معاي بس ، وبوعدك م أقرب منك ، إلا لو انتي وافقتي
: اسي ما ظابطه ، وعندي مسؤوليات تانيه ، ناسي انو دا اول يوم لي مع وتين ولازم اكسبا؟
: انتي عارفاها بتحبك.
: لو سمحت خلينا مع بعض شويه ، على الاقل بالنهار
: خير يا زوله
: انا ح اكل وجباتي مع صفاء واميره ومعانا وتين ، حبيتهم وهم ظريفات معاي
: ما تحاولي تعملي علاقات وهميه ذي دي ، انا بعرف يعني شنو ضرات.

عاينت له جوا عيونو ذي البفتش في حاجه جواهم ، وقلت له بصوت هادئ : انت بس اديني فرصه وح انظم لك الحرملك بتاعك دا ، تاني م حايكون في زعل ولا مشاكل ، كلنا ح نتفق ، ونسعدك .

اخد نفس عميق ، وطلع هارب من نظراتي ، قبل ما اطلب شي تاني

وانا قعدت مغطيه وشي بيدي الاتنين ، ونفسي فوق ، ما عارفه زاتي انا بتصرف كدا كيف؟ خايفه الامور تفلت من يدي ، اتناولت تلفوني من وسط الفوضى واتصلت ب نور ، عاوزه احكي لها لأني بالجد ما قادره اتحمل

بس اول ما هي فتحت ؛ انا قعدت ابكي
انخلعت وقالت لي : قولي بسم الله ، مالك يا بنت؟ في شنو؟
قلت له بصوت مبحوح : اشتقت لك

وسعت عيونا ، ابتسمت وقالت لي : وانا برضو اشتقت لك ، من امس عاوزه اتصل ؛ بس قلت ما ظريفه اتصل بك وانتي في الشقه
هزيت راسي وقلت لها بإحباط : مافي اي شقه ، أنس وداني بيتو طوالي
: ما كويس ؛ جنب اهلك.
ابتسمت في يأس وقلت لها : داك كان بيت إيجار ، اهلو ساكنين في مكان تاني.

نططت عيونا وهي بتقول لي : سجمك يا سمر ، قعدك مع نسابتك؟ اوعا يكون عندو اخوات بس ، ولا عديلات
جفوني نزلت بدمعه حاره وانا بقول لها : اي حاجه في يا نور
: اوعك تسكتي له يا سمر ، احكي لأهلك طوالي ، دا واحد كذب
: كنت عارفه انو ح نرحل من البدايه
سكتت مسافه بعداك قالت لي : سمر دا شنو العملتيه في نفسك دا؟ في البدايه راجل مرا ، وبنت صغير ه تربيها ، وقروش للعرس ما عندو ، اسي كمان يقعدك مع نسابتك؟ وليه مرتو الاولى ما سكنا معاهم ويسكنك انتي؟
: كان مؤجر بس..
: اسي برضو يأجر لك ، المافي شنو؟ ذي ما مرتو ديك قدرتو وخلتو يرحلا انتي اقدريه ، واوعك ترحميه في المصاريف
: أنس جاء يا نور ، مع السلامه
قفلت منها ؛ لاني اتخنقت وخفت احكي لها تشاكلني ، وما عارفه اعمل شنو

قمت صليت ورتبت الغرفه مع وتين ، بعداك اتحممنا ورقدنا شويه لمن جابو لينا الفطور ، جابتو صفاء طبعاً
قلت لها : معاكم حليمه؟
: لا طبعاً ، الغندوره مشت لحبيتا ماما فاطمه هي مسموح تخش وتطلع على كيفا اما نحن لا
: طيب تعالو اكلو معانا الاكل كتير
: لالا ممكن أنس يجي في اي لحظه
: طيب انا بجيكم ، مش قلتي هو بفطر من الصباح مع الشاي؟
: احتمال فطر

قمت شلت الصينيه ومشيت معاها غرفتهم ، فطرنا مع أميره ، طبعاً بتعاين لي ساااي
أنهيت الحاله دي ب سؤال : انتي عندك اولاد كبار يا أميره؟
شالت نفس وقالت لي : ولدين وبنت ، وياهو الفي يدي دا
: ومالهم ما بجوك هناك؟
: بنتي بتجي ، اما ولدي الكبير من كمل ال 8 سنوات ، أنس حماه يدخل هنا تاني ؛ عشان نسوانو المجيهات ، الا انا استاذنو واطلع اقعد معاه هو واخوه هناك
: وليه ما بتاخذي قرار جادي؟ هدديه عديل يا زوله ، يا كدا ، يا تمشي بيت اهلك ، وشوفي كيف ح ينكسر لك.
ضحكت باستهتار وقالت لي : ينكسر لمنو؟ مالي بقيت وجه القمر؟ انا لو اتطلقت ما حايخليني اخد معاي اولادي ، واضطر اجي راجعه واقعد مع البرا ديل ، احسن لي كدا

دي كانت اول مره اتكلم فيها مع أميره في موضوع ذي دا ، وخليتا تحكي لي كيف اتزوجت أنس ، قالت انها غلطت معاه زمان! وللسبب دا اتزوجتو ، واهلا طبعاً غضبانين منها وما صدقو خلصو من همها وفضيحتا ، انجبرت تعيش معاه بوضعو دا ؛ رغم انها عارفاه من البدايه ، وبعد ولدت تاني له ولدين خلاص اتربطت يديها وكرعيها

انا لمن سمعت منها ومن غيرا ، عرفت انو الاسباب متعدده ؛ بس المشكله واحده ، انو الواحده منهم بتصبر على الوضع دا على أمل انو يتصلح ، بس ما بتصلح ، بالعكس بسؤ! وهي بتتورط اكتر ، ومع كترة الاولاد ببقى من المستحيل انها تطلع من مستنقعو ، ما بعرف اذا كنت ح اقدر أعمل فرق في حياتي مع الورطه دي ، بس البفكر فيه حالياً اني عاوزه أعرف أكتر ، وافهم طبيعة حياة الناس ديل وليه عايشنها كدا؟

اليوم مر ذي سابقو ، وهو كالعاده اتصل بي بليل وبحاول يسحبني لغرفو ، قلت له مصدعه

كانت معاي صفاء ، خليتا في الغرفه وهي بترص لي في العطور ، لمن أنس دخل لقاها قاعده ، عاوزه تمشي لمن شافتو ، قام سألها : سمر وين؟
: في الحمام
وعاوزه تطلع قال لها : خليك

كانت لابسه جلباب قطني حلو شديد ، ومتحننه ومسرحه شعرا ، بقى يسألا عن احوالا واولادا وأهلا ، ما شال عيونو منها اثناء الكلام ( كلهم واحد وممشياهم غريزتهم ) انا لمن جيت شفتهم وقفت مسافه قبل ادخل بالباب ، اتمنيت يحصل الفي بالي


: عندك مصاريف ولا مفلسه الايام دي؟
: انا مفلسه من انت اتزوجت وطلعت من البيت؟
: طيب لسه يديك بارده في المساج؟ ولا قسو شويه؟
: مافي شي اتغير
: ح أحتاج لمساج! قريب جداً

حليمه كانت قريبه برضو فجاءة لقيتا وراي لمن انخلعت ، قالت لي : مالك واقفه في الباب؟
هم لمن سمعو صوتا اتلفتو ، صفاء قامت على حيلا من الخلعه وهو زاتو اتوتر ، كأنهم اغراب مسكوهم مع بعض😅
صفاء بقت تتكلم ب تمتمه وهي بتعاين في الارض وتتحاشي عيوني : م...... م ماشه انا ، الزمن اتأخر
قلت لها : استني ما كملنا شغلنا
: لبكرا يا سمر
: لا اسي دي
عاينت لأنس وقلت له : أنس عاوز حاجه؟
: اتصلت بك من قبيل
: ما انتبهت ، مصدعه وعاوزه انوم
صرا وشو وقال ل صفاء : امشي نومي
طوالي صفاء طلعت
قبل يقتح خشمو قلت له : أنس م ح ينفع كدا ، انت ناسي وجود وتين؟
: بس نحن ماشين غرفتنا ، ما تزهجيني عليك الله بالممطاله الكتيره
: ما بماطل ، انا مصدعه شديد والله ، تعبت من نضافة الغرفه اليوم كلو ، ولعبنا انا ووتين مع بعض

سكت مسافه وهو بعاين ، بعداك قال بزهج : كدا يا سمر؟ ماشي ، اقعدي ماطلي كدا لمن احردك
مشى زعلان ، وقال ل صفاء : تعالي شيلي العشاء دا من هنا نفسي انسدت

جاتني جاريه : دا شنو العملتيه دا يا سمر؟ والله يوم يض*ربك
: خليك مني ، وامشي بسرعه ، أنس محتاج يعمل مساج😉
: سمر والله العظيم م اتقصدت كدا
: انا ما زعلانه يا هبله ، دا زوجك ، وانتي محتاجه مصاريف يلا بسرعه قبل يحردك انتي زاتك ، انا شفتو كيف بعاين لك من الصباح ، ح ياكلك بنظراتو اكل ، يلا اسرعي

جرت الغرفه ظبطت نفسا وماشه على غرفة أنس وانا بعاين لهم بالشباك
دقت الباب كذا مره كان مقفول ، لمن كترت الطرق على الباب جاها صوت حليمه من جوا
: دا منو؟

انخلعت وغلبا الرد ، قالت بصوت ضعيف : اانا صفاء
أنس قال لها : غيرت رأيي خلاص ، وعاوز اتعشى امشي نومي

رجعت غرفتا زعلانه وانا اكتر منها ، قربت اطق ، من المخلوقه العبيطه الفقر دي ، الليل كلو ما نمت ، وهي طلعت بعد فتره ، جات تجدع ، وتكوش برجولا جنب بابي عشان تسمعني

تاني يوم طبعاً صحى متأخر ، وانا مغيوظه منو ، كان بجينا من الصباح الا الليله ما جاء ، قربت امشي له غرفتو

في قعدتي ديك مي اتصلت ، وزكرتني تاني بموضوع الايجار قلت لها : انس قال دافع وما تشتغلو بالراجل الحرامي دا

وتين لمن صحت مشت جابت الشاي لي ولها وكانت شايله بسكويت ، باستني في خدي وقالت لي : بابا بصبح عليك
رفعت حاجبي وقلت لها : لقيتيه وين؟ جاء لمن انا كنت فب الحمام؟

هزت راسا وقالت لي : لا انا مشيت له ، واداني قروش رسلت خالد جاب لينا بسكويت
: وهو مالو ما جاء؟
: نايم ، قال لي كان مساهر ؛ عشان كدا هو اسي نعسان
: كويس والله

قعدنا شربنا الشاي وانا قلبي ينتح من الزعل والغيظ من حليمه دي ، اسي بتكون صفاء زعلانه يحليلا ، وانا السبب لأني عشمتا فيه

بعد شربنا الشاي طوالياتصلت به ، رد لي بصوت خشن
: الو
: انت لسه نايم يعني؟
: بفتح في عيوني يداب
: والله كويس انك صبحت علينا

ابتسم وقال لي : رسلت لك صباحي مع وتين ما وصلك؟
: ما عاوزه صباح منك ، عاوزه اتكلم معاك في موضوع مهم تعال
: انا نعسان وما قادر اقوم من السرير دا ، تعالي انتي
: ما كل يوم قاعد تجي تصبح الليله في شنو؟
: ما عادي لمن انا م اجيك ، تجي انتي وتصحيني وتصبحي علي
: أنس انا جاده معاك ، اسي كنت بتكلم مع أمي ، قالت سيد البيت تاني جاهم وقال عاوز القروش بتاعة الإيجار
: ما قلنا دافع ، شنو؟ ...... تاني الموضوع دا ما تفتحيه معاي .

يتبع


تابعونا لتصلك قبل الاخرين

https://www.facebook.com/share/1YHW59jqru/