#زوجة_ثانية_بقلمي_سهى_ وليد_1
حا احكي قصتي الواقعية
انا ليلى عمري 27سنة متزوجة و عندي بت عمرها سنتين اسمها رغد
اتعرفت علي ابو رغد بعد اتخرجت من الجامعة كان عندو تخريج ود عمو مع تخريجي سوا شافني في المنصة سال عني لحدي ما جاء بالباب عديل نحن اسرة بسيطة انا و امي و ابوي و اختي لمياء
لمياء مقيمة في السعودية متزوجة عندها 5 اطفاال و هي البكر العوير طبعا 😂
نحن وضعنا المادي كويس جدا و مستقر الحمدلله ابوي مسجل بيتو و املاكو كلها بي اسمو انا و اختي
اها نرجع لي زواجي كان زواج خرافي و رهيب شديد محمد يلي هو ابو رغد زول جميل بي معنى الكلمة ما شاء الله طول و قوام و اسلوب راقي و زوق في اي شي
و انا ما اقل منو زولة معروفة بي جمالي و هيبتي طول عمري جادة و ما بحب اللف و الدوارن انا بعيدة خالص من نسابتي لانهم كعبين كلهم كعبين بقولو النسابة بطلع واحد علي الاقل من الاسرة كويس و الطلع كويس فيهم محمد
نرجع للحاضر
محمد: ليلى البت دي بتبكي من قبيل يخ و انا ما عندي زمن طالع ليلى: اهااااا جيت دقايق بس ما بتمسكها لي محمد: هاك بتك و عليك الله اطلعي من راسي اليومين ديل لسه ما نسيت شكلتك مع وجدان هي في النهاية اختي و انتي زوجتي يعني عاجبك كل مرة تدخليني في حتة ضيقة و اصلو لسانك دا ما بتملى اسي انا ماش اصلح الخراب العملتي في بيتنا من يوم الليلة ما بتمشي هناك الا للضرورة فهمتي و اذا مشيتي لمي نفسك ليلى: اختك تزل فيني و تهين علي كيفها و لما ارد ليها الصاع صاعين تجي تقول خراب يلا مدام دا كلامك بيتكم دا ماف شي بدخلني ليو مشيت خليتو بعد ما خرب مزاجي
غيرت لي رغد و عملت الاكل و قعدت احضر لي المغرب هو ما جا ما اشتغلت بالموضوع كتير اصلا يوم الجمعة دا ثابت عند اهلو بجهز للنوم جا داخل
محمد: اميرتي نامت ما رديت عليو طالعة من الغرفة مسكني من يدي محمد: حلوة و انتي زعلانة بعدين اهلي فاكرين مرتي هارشاني و هم ما عارفين دا ريدة بس ليلى: و بعدين كدي فك يدي عندي حلة في النار فكيت يدي مشيت المطبخ و انا فرحانة من جوا لانه ما حصل خلاني انوم زعلانة منو اسلوبو الفريد غمزاتو و الضحكة حييي ي يمة
اها نزلت الاكل و رصيتو في طاولة العشاء و قعدنا ناكل
ليلى: الاكل ما عاجبك و لا شنوو محمد: ما كدا ي ستهم بس انا امي ملتني لدرجة ليلى: طيب ما تاكل بالغصب خلي محمد: تعبانة قدر دا و واقفة في المطبخ و ما اكل مستحيل حا اكمل الصحن...

#زوجة_ثانية_بقلمي_سهى_وليد2
حا اخلص الصحن اها اكل و هو اصلا شبعان عملتا ليو شاي اخضر و حبوب هضم
محمد: يوم الجمعة طهور اولاد احمد جهزي نفسك و شوفي لو عايزة حاجة عشان اوديك السوق ليلى: وليه ماف زول اتصل لي يعني اهلك ما عزموني و دايرني امشي محمد: ليلى انتي واعية و انا عارف انو نفسك عزيزة عليك و برضو ما بتهوني علي و لا برضى فيك الحبة لكن ديل زي ما اهلي هم اهلك لازم تتقبليهم
ليلى: انا عمري ما حا انسى انو اختك كانت سبب في اجهاضي الاول محمد انا مشيت للموت اجهاض 5 شهور دا ولادة عديل انا دخلت انعاش بي سبب حقدهم علي ليه يعني اتحمل فوق طاقتي اختك عارفاني حامل عملت معاي مشكلة و صربتني في بطني دا ما اسمو قصد كفاية لحد هنا اهلك ما اتصلو و كلموني ما حا امشي و دا اخر كلام لو عايز تسوق رغد معاك سوقها لكن انا ما بمشي لو ما اتنازلو و قيموني
رميت كلامي و مشيت رقدت جمب بتي و نمت صحيت الصباح لقيتو ماف غريبة ما بطلع الا يودعني اتصلت عليو ما رد قمتا نضفت بيتي و بخرتو و بلعب في رغد و اصلو ما حسيت بالوقت بتي مالية لي حياتي قمتا جهزت الاكل و حممت رغد تلفوني اتصل رديت نور: كيفك ليلى: تمام الحمدلله مبروك للعيال نور: الله يبارك فيك اتصلت اعزمك طهور الاولاد والله في بالي لكن ما الجري نسيت اتصل ليك ليلى: ان شاءلله حا اجي قفلت الخط محمد اتصل لي ليلى: الوو محمد: انا ما جاي البيت بايت مع صحبي قبل ارد عليو قفل الخط اول مرة ينوم برا البيت و هنا انا فقدت المنطق و بيقيت ابكي لمن ريقي نشف لمن الساعة عملت 12 لقيتو منشط ما رسلت ليو رفعت حالة
ختيت صورة بتي و كتبت عليها جميلتي و سر سعادتي و قفلت الشبكة حضنت بتي علي و نمت
قمت بدري رتبت البيت و نضفت اتصلت لي لمياء و قعدنا نرغي ساعة انتهيت من المكالمة حاولت اشغل نفسي عشان ما افكر في محمد ربتب دولابي و من عدم الموضوع نضفت الحديقة و زقيت الشجر و خبزت كيك و عملت صينية بطاطس و قاعدة بحضر مسلسل ما وعيت بي نفسي الا بي صوت باب البيت لقيتو دخل الغرفة طواالي ولا حتى سلم علي طوالي مشيت احسم الفوضى
ليلى: ممكن اعرف مالك و لا عشان كلامي معاك محمد: عايني انا فترت من الاسطوانة دي ليلى: انت عايزني اكون بدون كرامة يعني و اطفل علي ناس ما بحبوني ليه يعني كرامتي من كرامتك صح دا كلامك و بقيت ابكي بحرقة لحد جا علي و حضني محمد: خلاص ي بكاية و اسف حقك علي حتى لو انتي الغلطانة...

#زوجة_ثانية_بقلمي_سهى_وليد3
ليلى: طيب ليه اهلك. ما بحبوني ولا احترام ساي ماف لشنو محمد: ليلى ممكن نطلع من الموضوع دا ليلى: تمام
نور: يا احمد انا عايزة بيت براي احمد: وليه ان شاءلله نور: بس كدا عايزة. اسكن براي من اتزوجتني و انا قاعدة في بيت امك ايش معنى ليلى ساكنة براها و باقي زوجات اخوانك مغتربين انتو ناوين تخلو المسؤلية كلها علي بعد مي تتزوج صح و رشيدة باقي ليها اخر سنة في الجامعة و برضو حا تتزوج حا افضل براي في بيت حدادي مدادي احمد: ما تقارني نفسك بي زول امي بتحبك و دا المطلوب و بعدين ليلى البتقارني بيها نفسك دي امي ما بتحبها ولا حتى اخواتي عشان شنو ما بعرف خليك رايقة ما تعملي مشاكل
محمد: ما عايزة تمشي السوق انتي ولا شنو بعدين دقيقة ليك. فترة ما بتطلبي شي نصحية انتي ولا حرارتك مرتفعة ليلى: نووو ماف شي بس ما ناقصني شي بالمناسبة نور اتصلت لي و عذمتني محمد: حلوو طيب بعد بكرة ان شاءلله نكون معاهم ليلى: تمام
نادية: حا تعملي شنو ي بتي نور: كله علي كيفك عمتي نادية: انتي الام قرري و شوفي حا تعملي شنو ما باقي وقت كتير بعد يومين طهور ياسر و يامن نور: عملت قائمة الحاجات كلها رشيدة: حيانا الله لي الجمعة مي: الشي الامسها ليلى دي جاية و لا لا نور: عذمتها من امس مي: امممم
ليلى: وصلني محمد: وين ليلى: بيتكم محمد: انت جادة ليلى: ايوا ما صح امشي زي الضيفة وصلني و تعال سوقني المسا
اهااا اتحركنا علي بيتهم و اصلي ما رايقة بس ماسكة نفسي لان اغلب مشاكلي مع محمد بي سبب اهلو
وصلنا رشيدة: اخويا و جات سلمت و سلمت لي بي مساخة وضاحة ما ركزت معاها نور استقبلتني بي طريقة راقية محمد قعد شوية و مشا
مشيت جهزت مع نور غرفة الاولاد و غيرنا الديكور كلها و رويتها اصناف اكلات حلوة جوها صحباتها و اهلها و اصلا هي حامل ف قمت ضيفتهم دخلت المطبخ و دي كانت المرة التانية ادخل مطبخ نسابتي عملت القهوة عمتي قاعدة برا مع بناتها و رغد معاهم وديت القهوة و جيت اشوف رغد احتمال عايزة تعمل حمام ولا جعانة شلتها
مي: حا ناكلها ليك يعني رشيدة: دي اتخلعت بي بت اخوي ما شايفها حلوة كيف مي: شبه اخوي اسم الله عليها ما رديت عليهم لاني عارفة عواقب النقاش معاهم و انا ما عندي استعداد اخسر محمد بحبو
غيرت لي رغد و قالت ماشة لي حبوبتها اديتا لي حماتي. و اتصلت لي محمد يجي يرجعنا البيت
تعبانة و مرهقة نمت بدون ما احس
سمعت صوت

#زوجة_ثانية_بقلمي_سهى_وليد4
سمعت صوت زغاريت قمت مخلوعة نزلت تحت لقيت البيت كله لامي و بسلمو لي محمد قلت احتمال دا كابوس اها نزلت و انا في راسي الف كلام و سؤال
ليلى: ان شاءلله خير مي: و الزغاريت شنو لو ما خير رشيدة: تعالي باركي لي محمد مشيت بكل عفوية و باركت ليو و ما فاهمة شي مي: بس ما سالتي سبب الفرح ليلى: فشنو ي جماعة نادية: محمد حا يتزوج ليلى: شنووو و بقيت مصدومة جاتني ضحكة لا ارادية و بقيت اضحك و تاني سلمت عليو و علي عمتي و بناتها ليلى: رغد بابا حا يعرس و مسكت بتي مشيت الغرفة و انا ما عارفة جنيت ولا دي اعراض الجن و الشي الاغرب انو ولا دمعة نزلت من عيني و دي كلها صدمة اها جهزت نفسي و طلعت مبتسمة للضرس الاخير خليتهم في حيرة هوو انا زاتي محتارة في نفسي ليلى: يلا يا قلبي نمشي طلعنا من ركبنا العربية. و انا ساكتة و لا اتكلمت وصلنا طوالي غيرت لي رغد ملابسها رغد نامت قفلت الباب علي من جوا و داك شغال يدك في الباب ساعة ابيت افتح
و بقيت افكر انا غلطت في شنو ولا. عملت شنو عشان يعرس فيني ايي هو شرع و من حقو بس يا خسارة يا خسارة علي نفسي و سنيني الضيعتها معاه نمت من التفكير الكتير
و الصباح دق الباب ما فتحت كان يوم الكرامة بتاعة الطهور
خليتو بعد. طلع و مشا حتى جهزت نفسي و اخير كشخة طلعت بي عربيتي وصلت من دخلت الناس كلها تعاين لي نظرة شفقة اصلو ما اديتهم فرقة يشمتو فيني
اهااا دخلت لي الاولاد قعدت شوية محمد جا طوالي قمت سلمتو بتو و مرقت دورت عربيتي و جري مشيت لب اعز صديقاتي كانت برا البلد بس رجعت في زمن انا محتاجة ليها فيو اكتر من اي وقت....
اتفااعلو يخ
ما ممكن اكتب رواية حلوة و اتعب فيها و ما تتفاعلو
الجاي حمااااااس
دمتم بخير 🌹

#زوجة_ثانية_بقلمي_سهى_وليد5
ليلى: ريم و قعدت اجعر بي اعلى حس هي زاتها اتخلعت ريم: بسم الله بسم الله مالك اقعدي كدي اشربي و روقي احكي لي مالك من كم يوم اتصلت ليك كنتي كويسة تاني الحصل شنو ليلى: محمد حا يتزوج ريم: اااااا بتقولي فشنو انتي اصلو ما ممكن محمد الواحد دا و يعرس فيك.؟ ليلى: اي ريم: انا كدا راسي ضرب و ما عارفة اقول ليك شنو بس اهم شي انتي عايزة تعملي شنو ليلى: حا اقعد ليو في قلبو زي السم الهاري والله اسود عيشتو ريم: يعني ما جا تتطلقي ليلى: منو هههههههههيييي مستحيل اطلب الطلاق اعذبو كدا بس ريم: بالمناسبة هو الحا يعذبك ما انتي اصحي ي مرة ماف زول غيرك حا يتوجع عشان كدا لمي نفسك و بتك و اطلعي من حياتو ليلى: دي انتي صحبتي الوحيدة تقولي كدا بدل ما تقولي لي اقعدي و انتقمي منو ريم: ليلى نحن ناس كبار و واعين صح بدل ما تستذفي كل طاقتك في علاقة سامة انفصلي بس دا اهون قرار و مع الوقت حا تنسيه ليلى: اظن اني غطلت لمن جيتك اسفة لاني دخلتك في حوار انت ما قدرو يلا سلام
طلعت و انا محتارة في صديقتي اتغيرت كتيير زمان لو قلت ليها مضايقة من فلان ساي تقعد تخطط معاي عشان تجيب حقي و اسي بقت تقول اتجاوز و بتتكلم معاي بي اختصار اي جايز كلامها يكون صح بس عمري ما انسى عملتو دي ولو ما رديت الصاع صاعين ما برتاح لان دي حياتي انا و عمري الضاع كله مشاكل مع اهله و حوارات ما ليها اول ولا اخر
وصلت البيت لقيتو قاعد
محمد: ممكن نتكلم ما رديت مشيت غرفتي لقيت رغد مافي ليلى: وين رغد محمد: مع ناس امي ليلى: و ليه محمد: عشان هم اهلي و امي قالت اخليها كم يوم معاها ليلى: و انا ما مطرة ابعد عن بتي ايام عشان عيون امك بكرة من الصباح تمشي تجيبها و الا انا الحا امشي و بتعرف حا اسوي شنو لو مشيت ما انتظرتو يرد زاتو دخلت و رزعت الباب كرررو ما قدرت انوم او بالاصح ما بعرف انوم من غير رغد
الصباح
صحيت لقيت رغد راقدة جمبي شكلو صحا بدري و مشا جابا الكلب لمست وشها لقيت الحرارة مرتفعة و لون لسانها متغير
قمت لبست و لبستها طالعة لقيت محمد شاف الدموع في عيوني و فهم انو رغد عيانة عارفني ما بستحمل فيها الحبة لو مرضت ساي تقول المرض فيني مشا معاي الدكتور و طلعت عندها انفلونزا من تغير الجو و هنا عرفت انو اكيد حمموها و ما نشفو جسمها من الموية عشان كدا مرضت محمد: دي الادوية لو احتجتي لي شي من برا اتصلي لي.....

#زوجة_ثانية_بقلمي_سهى_وليد_6
قال كلامو دا وقف دقيقة لما ما لقى مني اي رد طلع
الحمدلله رغد بقت احسن و حرارتها نزلت بقيت افكر في كلام ريم من جهة منطقي و من جهة تانية ما بقدر اطلب الطلاق و اطلع مهزومة من المعركة دي و بقيت افكر في مليون حاجة كيف محمد يقرر الزواج في وقت نحن علاقتنا حلوة و دايما فخورة بيو خصوصا انو هو ما مقصر في حقي و لا حتى انا يا ربي دا شنو البحصل
اتصلت لي ريم جوالها مشغول تاني حاولت بعد ساعة و لسه مشغول
طلعت السطح اشم هوا و اشوف حل لي مشكلتي شايفة محمد بتكلم في الحديقة و يضحك للضرس الاخير الشي البعرفو هو ما بحب يتكلم بالفون كتير و حتى زمن كان خاطبني بفضل يلاقيني عديل ولا يتكلم معاي مكالمة يلا بالنار انت و البتتكلم معاها تاني اتصلت لي ريم و برضو مشغول و هنا الشك انتهاء مني و اعصابي باظت ما قدرت اتحمل و قررت اواجه انتظرتو لمن خلص حتى نزلت مشيت ليو
ليلى: ليه محمد: و المعنى ليلى: انت فاهم قصدي محمد: عشان انا راجل و الاهم انو دا حقي الشرعي ولا ناسية اهاااا حا تطلبي الطلاق ولا تعملي شنو خلي في بالك انا طلاق ما بطلق و لوو حصل طلاق حا اخد رغد و بقدر اعمل كدا ببساطة عارفة ليه لانو انا ما مقصر في حقك و حتى ما خنتك و لو وقفنا محاكم بتي حا اخدها غصبا عنك او بي رضاك ليلى: هي منو محمد: قصدك العروس ههههه بعيدا عن اسمها بس هي انسانة فاهمة و ست بيت و الاهم من دا انها ما مغرورة و عنيدة زيك و حا تحترم اهلي مهما عملو و فات خلاني فاتحة خشمي و دموعي عشرة عشرة والله كسرني كسر العالم كله ما بجبرو فكرت تخد بتي و اهرب بيعد بس تاني راجعت نفسي انو لو لاقاني حا ياخد حضانة رغد
نمت في الحديقة صحيت الصباح لقيت حالتي بالبلاء
دخلت جوا و جاتني انفلونزا من البرد لقيتو نايم جمب بتو و رغد صاحية تعلب بي شعرو شلتها و جهزت شنطة رغد انتظرتو صحا
ليلى: ارح وديني بيتنا محمد: بالسرعة دي ليلى: الثقالة دي ما وقتها حا اودي رغد ناس امي محمد: وليه ليلى: دي بتي و امي امها و اهلي جزء منها و الاهم ما حا يخلوها تمرض و حا يهتمو بيها كويس
طلعنا و كل واحد بحمر للتاني و اصلا ما عايزة احسس اهلي بي حاجة وصلنا
من شفت امي و ابوي العبرة مسكتني سلمنا عليهم و قعدنا بقينا نتونس محمد: انا عازمكم يوم الجمعة الجاية عرسي بتمنى تحضرو
اهلي انصدمو و حتى انا لاني ما اتوقعت يدرعا قدام اهلي ولا ذرة احساس ما عندو...

#زوجة_ثانية_بقلمي_سهى_وليد7
ذرة احساس ما عندو و استاذن و قام طلع انا قمت او بالاصح عايزة اهرب بس امي وقفتني
ايمان: في شنو ي بت حاصلة مشاكل و نحن ما عارفين؟ اشرف: انا محتار مالو زوجك ليلى: ما عارفة ما عارفة شي والله و انا ما عملت شي ي ابوي ما عارفة ليه عمل كدا و انفقعت بكا ايمان: كدي قومي تعالي معاي و دخلنا جوا
ايمان: ماف مرة بترضى بالتعدد حتى لو كان شرع عشان كدا ي بتي اطلقي و تعالي دا بيتك و حا يفضل بيتك ليلى: بس ي امي لو اطلقت حا ياخد رغد ما بقدر اطلب الطلاق انا حا اقعد ليو شوكة والله يا امي اندمو و اضوقو من نفس الكاس قعدت شوية حتى طلعت و خليت رغد
رجعت البيت لقيتو قاعد و شكلو رايق و مبسوط دخلت لميت ملابسي في شنطة صغيرة طالعة كدا لقيتو في وشي
محمد: علي وين ما رديت و طلعت شكلو فاكرني ماشة بيت اهلي بس في الحقيقة مشيت قعدت في فندق بعيد
عدو 3 ايام بتكلم مع ناس بيتنا ولا كانو في شي
محمد: كيفكم وين رغدي ايمان: اليوم لعبت كتير مع الجيران نامت محمد: وين ليلى. ايمان: اجي هي ما معاك يعني يومي بتتكلم معانا علي اساس قاعدة معاك محمد: استغفرالله العظيم طيب ما تاكلي هم انا حا اشوفها و اعرف الحاصل بتصل. ليك تمام
تلفوني اتصل لقيتو محمد ما رديت و اتصل كتييير برضو ما رديت
دخلت اخدت حمام بخار ظابط قاعدة بتصفح الباب دق افتكرتهم خدمة الغرف بس لما فتحت كان محمد و عينو حمر و وشو ما بتفسر
ليلى: خير محمد: لا خييير لا زفت انتي عايزة تجننيني صح بتسوي شنو هنا و قاعدة مع منو و ليه قاعدة هنا اصلا ليلى: وطي صوتك بعدين دخلك شنو اقعد وين ولا مع منو فلنفترض قاعدة مع راجل بهمك بشنو انت
ما حسيت غير بي كف في وشي لمن وقعت و راسي لفا من حرارة يدو جراني زي الكلبة في الارض و رماني جمب شنطتي محمد: سرعة البسي و قومي ارح قبل ارتكب فيك جريمة هنا ليلى: علي ايه امشي معاك خليني في حالي و امشي اتزوج و اللهي تحرق و قلبك يحرق زي ما ضريتني الله يضرك و تففف تفيت في وشو
قفل الباب و ماشي علي خطوات خبيثة زيو
محمد: انتي شكلك ما بتعرفيني كويس فك حزام بنطلونو و خنقني لمن روحي قربت تطلع فكاني من الوجعة الفيني ضربتو بي الكباية راسو كله اتملا دم شفتو جاي علي شلت قزازة ليلى: لو عايز تموت قبل عرسك ابقا راجل و مد يدك علي تاني اتراجع لاني بالجد حا اعملا ملابسو كلها اتملت دم رفع التلفون اتصل لي امي و اداني ليها......

#زوجة_ثانية_بقلمي_سهى_وليد8
امي اتكلمت معاي و تحنس فيني عشان امشي معاه وافقت طلعت لي عباية لسبت و مسحت وشي بي منديل في جرحة صغيرة جمب خشمي عاينت ليو و قميصو المليان دام
طلعت تيشيرت اسود اصلا حقو بس ما عارفة الخلاني اشيلو شنو مديتو ليو محمد: دا حق منو شكلو نسى انو حقو ليلى: حق حبيبي البسو بدل تطلع كلك دم عاين لي مسافة ابا يلبسو و طلع بي دمو قدامي و انا وراه و الناس تعاين و تتكلم فينا ركبت من سكات وصلنا البيت طوالي دخلت الغرفة و قفلتها علي بكيييت قدرتي و ما متصورة في يوم من الايام يرفع يدو علي
طلعت برا لقيتو راقد في الصالة و ماسك راسو
شلتا علبة الادوية و مشيت وقفت جمبو مافي شي خطير بس جرحة صغيرة و شكلها سطحية عقمت الجرح و لفيتو بي شاش ماشة كدا مسك يدي
محمد: خليني اعرس بي سلام و بدون مشاكل لسه ما عرست و بتسوي كدا و بتعملي عمايل بطالة اها لو عرست حا تقتلي مرتي ولا شنو
ليلى: خليك بعيد مني بس
تاني يوم من الصباح جو مهندسين الديكور و شغالين في الغرفة بتاعة العروس و محمد مافي شكلو مشا يجهز للعرس اصلا باقي يومين بس للعرس
طلعت مشيت حجزت في احسن بيوتي و ماكن تجميل و اخترت تصميم خرافي لي فستان كان نفسي البسو من زمان بس محمد ما خلاني و اسي لا في محمد ولا بطيخ بعمل البريحني
قصيت اطراف شعري عشان تمشي مع الفستان و الميكب و الليلة حنة العريس ما مشيت قلتا امشي في العرس بس احسن رجعت البيت و هاك ي ماسك و ي قناع و ما خليت شعرة طايرة في جسمي بقيت نايرة اكتر من اول و لوني ابيض فما محتاج جلخ باب الغرفة دق ابيت افتح عارفاه دا محمد
اصبح صباح الجمعة يلي هو يوم عرسو💔
قمت و انا حيلي ما شايلني من التعب و الف بتاع امس دخلت استحميت لسبت و طوالي مشيت الكوفير لحدي بعد الصلاة
لقيتو رافع استوري الحمدلله الذي بنعمته تتم الصالحات اليوم عقد قراني
ما قدرت اكمل قراية جات دمعة نازلة مسحتها
و كملت تجهيز نفسي رسمت شكل صفق شجر ناعم. و حلو و الميكب كحل اسود علي شدو كحلي و دهبي و الوان ممزوجة حلو
و الفسات لونو كحلي مع الركبة و اكمام نص
و الشبشب فضي عااااالي عملت وشم جمب رقبتي بتاع فراشة و التسرحية شقة نص و الباقي جادعة لي ورا و اكسسوارات فضية و قاعدة منتظرة متين الساعة تتم قررتا امشي مع نهاية الزفة
الزمن جا ركبت العربية و اصلا شايلة هدية ورد و ماشة بي اللوكيشن لي الصالة وصلت الصالة......

#زوجة_ثانية_بقلمي_سهى_وليد9
وصلت الصالة نزلت في كمية عربات و ناس مبالغة لمن عاينت لي اسم الصالة لقيتها نفس الصالة بتاعة عرسي دخلت و طبعا كل الانظار علي لاني الهاملة الاتزوجو فيها نسابتي يعاينو لي من فوق لي تحت و صراحة عاملة شغل و كنت قمر بس ما شايفة لا محمد ولا مرتو. من الزحمة جمبهم قعدت قلت الزحمة تخف حتى امشي ابارك ليهم
جاني اتصال طلعت من الجوطة لقيتها اختي لمياء رديت ليلى: الوو لمياء: صحي الخبر السمعتو ليلى: اي محمد حا يعرس لمياء: لا ما خبر العرس انتي عارفة العروس منو ليلى: لا لا ما بتهمني كتير والله لمياء: العروس ريم الوووو ي بت وينك اتم ليك باقي الخبر الوووو التلفون وقع من يدي و الدنيا بقت لافة بي لا قادرة افقد الوعي ولا قادرة اصحا راسي تقيل و مشوش ما قادرة اقيف جاء سندني واحد كدا ما قادرة اعاين كويس ما قدرت اعرف دا منو بس قعدني في كرسي و جاب لي موية وشي اتملا دموع و الكحل سااال علي الوجع الفيني اتوجعت زيادة كانو كبو علي جرحي ملح ما قادرة اصدق جريت الحمام و نفسي ضااع غسلت وشي دا وقت ما لازم انكسر فيو لازم اطلع و اقيف قدام اي زول كسرني بي قوة و شموخ حا اوريهم انو البكسرني لسه امو ما جابتو عملت الميكب من اول و جديد و طلعت
شلت الورد من الطاولة و ماشة عليهم بي كل ثقة و ابتسامة قاتلة شايفاها قاعدة جمبو و مبسوطة بي توب الجرتق و مع منو راجلي طلعت ريم صحبتي في محلي و في نفس الصالة و مرت منو راجلي مديت الورد بكل اناقة و من غير ما اسلم عليهم قلت مبروك كلهم قالو الله يبارك فيك مشيت قعدتا بعيد من نسابتي خلصو الجرتق و جا وقت الوداع لا و كمان عندهم نفس يمشو شهر عسل اللهي يبقى ليكم شهر مر
محمد: مفاجاة حلوة صح ريم: طبعا بيبي ليلى: ما مفاجاة والله لاني عارفة اي شي و عموما استمتعو بالعطلة و ما تتاخر علي حبيبي استغربو فيني
وانا زاتي مستغربة في نفسي جايبة القوة دي من وين والله صدق من قال انو الضربة الما بتقتلك بتقويك مشيت بيتي و بقيت لافة في البيت بستحضر ذكرياتي مع محمد يلي بقت عبارة عن سراب و بتذكر في ريم مقعولة صحبتي البريئة تعمل كدا و الدافع شنو مثلا من عدم الرجال انا و هي درسنا الروضة مع بعض. و حتى الاساس بس هم وضعهم المادي كان صعب و انا ما رضيت اغير المدرسة عشان ما تحس انها اقل مني درسنا في مدرسة حكومية اهلي حاولو يقنعوني اغير المدرسة بس رفضت عشان ما ابعد عنها.....

#زوجة_ثانية_بقلمي_سهى_وليد10
ريم كانت اكتر وحدة قريبة لي هي دايما ما كانت راضية بي حياتها و قدرها انا عشانها اتنازلت عن حاجات كتير لما ابوي قرر انو انا و لمياء نمشي تركيا نخلص الثانوي هناك انا رفضت و حردت الاكل عديل لحدي ابوي وافق يخليني جمب ريم ولمياء سافرت
درسنا من الروضة لي ثانية ثانوي مع بعض بس في الشهادة انطريت اغير المدرسة عشان ارضي ابوي هو ما كان عايز لي غير النجاح بالنسبة لي اسرة ريم 7 و كلهم ما متعلمين الا ريم نسبة للظروف المادية و هي اكتر وحدة في بيتهم عندها طموح لما دخلت الجامعة هم سافرو. البلد و بعد فترة سمعت انها ما سافرت مع اهلها. و انها قاعدة الفترة دي كلها استغربت ليه ما اتصلت علي ولا حتى جاتني حاولت اتصل ليها كتير بس ما بترد عدت فترة طويلة ما لاقيتها ولا عارفة عنها شي بعد اتخرجت و محمد خطبني حتى ظهرت في حياتي تاني كانت قاعدة في داخلية و شغالة ويتر و علاقتنا حلوة لحدي ما لقت شغل في قطر و. سافرت و ياها لمن جات شلبت راجلي
انا بقيت ما عارفة هل هم متواصلين من زمان ولا الزواج دا صدفة و راسي حا يضرب من التفكير طلعت و الساعة كانت 4 مشيت النيل في قهاوي فاتحة تقريبا شغالين للشروق و طلبت قهوة تقيلة و قاعدة بفكر في حياتي الخربت بين يوم و ليلة في بنات جمبي كانو بدخنو شيشية و سجاير و مبسوطين اخر رواق وحدة فيهم جات علي
وجن: هااي ي حلو ليلى: اهلين وجن: معليش بس شايفاك شاردة بعيد و واضح انك بكيانة ما عارفة ليه حضنتها و بكيت لمن حسي راح يمكن لاني كاتمة كتير جواي في الحظة المفروض انفجر فيها سكت و مجرد سوال سالتني ليو بت غريبة خلاني انفق بكاا كلهم جو علي يهدوني قعدو معاي حاولو يخلوني اتكلم بس ما انا البرجع اثق في زول تاني رحمة: هاك السجارة دي بتخفف عليك وجن: رحمة الزمي حدك بدل ما تدعي ربنا يفك كربها جاية تغطسي حجرها هوي خلي امور الشارع دي انا قاعدة بعاين بي عيوني بس و بقيت اشوف الناس كلها واحد خلصت قهوتي و حاسبت لي نفسي و ليهم هم و مشيت الساعة كانت 6 مشيت بيت امي لقيتهم بشربو في الشاي طوالي دخلت غرفتي لقيت رغد نايمة حضنتها علي شديد و نمت علي كدا
ايمان: اهاا ي اشرف الحل شنو ما ممكن اشوف بتي بالحالة دي والله قلبي بتقطع عليها اشرف: هي لو دايرة الطلاق والله باقي اليوم دا يتم ولا غصبا عنه انا زول عندي نفوذ و انتي عارفة البقدر اعملو بس......