رواياتي📖📚

عارف يا معتز
لما معز كان عايش انا وأنت كنا بنتناقر كتير لأنك كنت طوالي بتشب لي في حلقي وما بتفوت لي كلمة
بقيت بكرهك
وبكره يوم يقولو انت جاي
وأن علي تقعد في جامعتك دي وما تجي
مات المعز
وماتت فيني كل الأماني
انساوت جواي كل الفصول
حتي الفرح ما عندو قيمة
وكل السبل جواي تؤدي الا اللا شئ
انا كنت عارفة اني بحب المعز شديد
بس بعد موتو اكتشفت انو هو بالنسبة لي الحياة زاتها
المشكلة انو مافي زول حاسي بي وجعي
البجيني كلو يقول لي انتي ما مكسورة
بي اولادك وبي حقك تحمدي سيدك
نفسي أرد ليهم وأقول الحق طاير
يا ريت لو مشي الحق وقعد المعز
بس ردي ما بجيب شي يلزم السكات
لما خالتي جات وقالت انك عايز تتزوجني
حسيت إني ماشة ع حبل المشنقة
في الأول رفضت
بس ناس أمي اقنعوني بالمنطق
وافقت مجبرة وما كان عندي نية أقرب منك اصلا
مرت بينا الأيام
وكل ما أقرب ليك اكتشف انو الصورة المحفورة ليك في ذاكرتي صورة مقلوبة
بس المشكلة كانت انو لسة المعز في دمي جاري
وأنت ما كنت منتبه لي وجعي ولا للضغوطات الأنا عايشاها
اكتر صراع الزول يعيشو
لما يكون مشدود بين الحاضر والمستقبل
كنت شايفني مرة نكدية ما اكتر
صراحة ما كان عندي نية أنجب منك خالص
لحدي ما كان اليوم السالتني فيه خالتي
وأنا رديت ليها رد ما جميل في حقك
وحصل ال حصل
ما جات فرصة عشان أعتذر منك
وهسي بعتذر
الكلام دة هي بتقولو وماسكاه من يديه الاتنين
معتز واقع تحت تاثير الدهشة من كلامها ومعقولة دي خنساء
وتحت تأثير لمسة ايدها
وواصلت
بعد انت اتزوجت رشا
حسيت انك بتضيع مني
وحسيت كمان انك اتغلغلت جواي
ومليت كل فراغ فيني
وأي حزن بدلتو فرح
بس للاسف انا عرفت الحقيقة بعد انت بقيت مملوك لي غيري
بقيت بتمناك مني
ويوم تجيني دة يوم عيدي
بس الكان واجعني حتي لما تجيني بحس بيك جايني بي آخر نفس حتي ابتسامة ساي ما بتكون كاسية ملامحك
عشان كدة كنت عايزة أنجب منك
يمكن الولد البجيبو يقرب بينا
بما انو انا غلبني اقربك مني
والحمد لله اتحقق مناي
معتز بقي يقول يا ربي انا بحلم ول دة حقيقة
دي مشاعر خنساء فعلا
ول متملكها سلطان الغيرة
ول دي افاعيل الليل اصلو بسترخي بالاعصاب ويخلي الزول يهضرب ساي
اللهم حس انو الليلة دي تاني ما أظن تتكرر
ولا خنساء القدامو هسي تاني ح يكون ليها وجود
ما حب ينكد علي نفسو
ويضيع اللحظات الحلوة
قال ليها ما عارف اقول ليك شنو بس صراحة فاجأتيني بي حاجات كتيرة
عموما انتي في حياتي
وقبل أي شي
انتي بت خالتي
يعني عوجة بتجيك مني مافي
وخليك واثقة من شي
انا يوم واحد ما حملت ليك مشاعر ما طيبة حتي لما كنتي معانا وأنتي زوجة المعز اي كنت بناقرك شديد
بس لأنك بتستفزيني بي تعاملك مع أمي وانتي عارفة ومتأكدة انو أمي عندي خط أحمر لا يمكن تجاوزه بي أي حال من الاحوال
يعني في كل الأحوال انا ما كرهتك ولا فكرت في يوم اني أكرهك
وحتي لما بقيتي حلالي
وعلي فكرة انا كمان كنت مجبر
ما لأنك فيك اي علة لا سمح الله
بس انا كنت بحب رشا وعايز اتزوجها
وغير دة كلو انا ما كان بحمل ليك اي مشاعر غير انك بت خالتي
بس ما رضيت أكسر بي خاطر أمي
وأنا كمان كان بهمني مصطفي وفطومة ما يبعدو مني
حاولت اتأقلم معاك بس كان دايما بحس المعز واقف بينا
الأحاسيس القلتيها دي انا ما حسيتها منك ع الإطلاق
خنساء حاولت تختصر الكلام
عشان لو مشي في الكلام تاني كم خطوة ما معروف يمكن يكتشف تمثيلها دة
لانو الكلام القالتو نصو غلط
وقالت احسن تطرق الحديد وهو ساخن
قالت ليه الفات مات
وهسي ما فات شي
والحمد لله انك عرفت اني بريدك وما يستغني منك
خنساء قدرت نقنعو انو كان مقصر شديد في حقها
وحتي لو كان تعاملها معاه نكدي
هو السبب لانو ما قدر يفهمها
اللهم فرطمتو ع الآخر
وقالت في سرها
اصبري لي يا رشا
بعد كدة ح تشوفي شغل الضرة ع اصولو
واوعدك اني اتغدي بيك قبل ما تفكري تتعشي بي
رشا تمت تلاتة يوم حتي جات
والتلاتة يوم فطومة معاها
حتي مع أمها فاطمة أبت تمشي
رشا حست بالتعامل الطيب بين رشا ومعتز
من جواها ما كانت رافضة التعامل دة
لانو علي قناعة انو دة اصلا من حقها
وفي النهاية إذا شاءت او ابت حقيقة خنساء زوجة معتز ما بتتغير
بس كمان حبها الشديد ع معتز خلي احساس الغيرة يطغي علي المنطق
بس كانت كل ما تحس بي الضيق تحاول تنشغل مع ولدها او بأي شي تاني
وتحاول تدس إحساسها
بس معتز كان بحس بي ضيقها
مرة قال ليها
انتي مهما تخبي عني ما بتقدري
انا بعرفك في كل حالاتك
وما يعاين ليك ف ملامحك عشان اعرف
انا بكلمني قلبي الساكن بين ضلوعك
بس اعرفي انو خنساء واقع ما بتغير

651 views- ᗯᕮᔕᔕᗩᙢ ҺคɱძคՈ ۦٰ‏┋❥ ͢˓🦁💛ۦٰ‏, 10:14