*#الساعه_أربعه_ونص《14》*
*#بقلم_نرمين_طه*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
يوسف قام من مكانو و كان ماشي على القسم بس صوت نرمين و هيا بتصرخ خلاهو من غير يكون عندو إراده يقعد..

"_شعور أنك تعيش أحاسيس انك مقيد بناس شعور غريب
و تخيل انك تعيشو لأول مره..

تكون انسان مهتم بس بشغلك و فجأه تكتشف انو في حاجات في الحياه احلى من كده
في مشاعر حلوه
و في حُب حِلو ."

نرمين راقت شويه بعد الناس بقو ملمومين حوليناها و بحاولو يهدوها..

بلسان نرمين :

ما كنت عارفه نفسي حاسه ب شنو وقتها..
امكن لو نور كانت جمبي كنت بس ح اترمي في حضنها
و احس انها من ريحة أهلى و اطمن..

بس نور بعيده.. و انا هنا من غير زول..
عاينتا ل سمر و ما عارفه لو كان فاهماني بس وقتها كنت بعيوني بسألها لو يوسف لسه هِنا..

صراحه ما اتوقعتا انو يكون قاعد لسه..

لمن طلعتا فوق و شفتو قاعد لسه قعدتا ابكي اكتر..
حسيت انو البيت ده كلو فاضي و ماف غيرو هنا..
ما ح أنكر أني في لحظه كنت بس ح امشي احضنو و اقول ليهُ " ما تخليني.."

جا مسكني و قعدني و كان بقره قرآن..

"_كأكتشاف جديد
صوتو و هو بقره القرآن كان حلو شديد
في نبره صوتو عموماً في حاجات حلوه بتخلي قلبي يكون فراشات
بس وقتها ما كان قلبي بس الفراشات
أنا ذات نفسي كنت فراشه
حسيت نفسي خفيفه
و نمته
في كتفُ.."

ما عارفه كيف و لا ليه
بس ماسكه يدو
راسي في كتفو
و كأنو الدنيا خاليه من كل حاجه إلا أحنا .❤️

بلسان يوسف :

في حاجات كتيره في الدنيا بالنسبه لي مجرد حِمل زايد

بس وجود نرمين جمبي
خلانى احس اني من غير حِمل
من غير مسؤوليات
و خالي تماماً من الحُزن..

ريحتها تماماً كانت زي الصندل
كان نفسي أعيش معاها في اللحظه ديك للأبد.

بعد نامت مشيت طوالي على القسم..
صح بالي كان عندها بس م بقدر اهمل الشغل كمان..

أول م وصلتا لقيت أحمد واقف..

احمد:ابو حماده هنا.. نكر كل حاجه طبعاً

يوسف:ح ادخل اقابلو بس اول عايز سيد احمد

احمد:ليه حصل شنو

يوسف:بعدين بوريك..

يوسف دخل مكتبو لقا سيد أحمد قاعد..

سيد احمد:اها.. قبضتهم؟؟
يوسف:مالك مستعجل كده انت؟!..
سيد أحمد:م مستعجل
يوسف:عيد لي القصه دي..
سيد أحمد:ليه؟؟
يوسف:اول م طلعتا مشيت وين
سيد أحمد:م متذكر زي الناس.. بس دخلتا القاعه
يوسف:م متذكر زي الناس؟!.. بس قبيل كنت متذكر صح؟؟
سيد احمد:انا زي م قلتا ليك دخلتا القاعه
يوسف:القاعه كانت واقعه شمالك
سيد أحمد:اي
يوسف:وريني الصوره
سيد أحمد:طيب..

سيد أحمد طلع التلفون و وراهو الصوره..

يوسف:م فكرتا تصورهم و هما بعملو الجريمه؟؟
سيد أحمد:انا اتصدمتا وقتها و م عرفتا اتصرف طبعا..

يوسف اخذ نفس عميق و قعد قصادو..

يوسف:طبعا إفادتك دي مهمه شديد.. بس أنتبهه.. لو كذبتا في أقل حاجه.. ح تندم..

يوسف اخذ تلفونو و طلع مشا مكتب تاني كان فيهو جهاز كمبيوتر كبير
نقل الصوره هناك و ناده على صحبو..

يوسف:افحص لي الصوره دي لو فيها حاجه..

قعد ف الكرسي شاب عمرو في بدايه العشرينات لابس نظارات نظر كبيره و شعرو كتير..

فحص الصوره و بعدها قال..

_ده ظل خفيف ل زول ثالث معاهم

يوسف:مع حماده و ابوهو!!

_اي واقف قصادهم بالظبط بس م ظاهر في الصوره..

يوسف:تمام..

يوسف طلع بره و ضرب لأحمد بس احمد م رده..
يوسف طوالي دخل ل ابو حماده كان قاعد في غرفة التحقيق..

مؤمن:انا م فاهم خاتيني هنا ليه
يوسف:سؤال حلو.. بس لعبتكم اتكشفت خلاص..
مؤمن:لعبة شنو.. في سوء تفاهم

يوسف اخذ نفس عميق بعدها قال بثقه..
" أنت و حماده و بيكو عملتو ده كلو.. بيكو اعترف و سيد أحمد اعترف انو ساعدكم و انو كان متفق معاكم.. خلاص اللعبه انتهت و باقي بس انت و ولدك و لو م اعترفتو م مشكله كده كده ح تدخلو السجن. "

مؤمن كان مصدوم و بعدها اتوتر شديد..

مؤمن:أنا.. ما كان لي دخل و الله..

يوسف ابتسم و اطمن انو تحليلو كلو كان صح..

بلسان يوسف :

لمن صحبي في الشغل قال لي انو في زول ثالث في الصوره وقتها فهمتا أنو سيد أحمد كذاب و ما دام كذب يبقا هو مشترك في الموضوع ده
كان عشان احل الأحجيه دي كلها لازم أتوقع منو الزول ال ثالث ال في الصوره..

حسب كلامهم القديم ماف زول بعرف مكان البضاعه غير بيكو و رامي
لو مشينا بمبدء حماده سرق البضاعه و دي حاجه جائزه جداً يبقا الأحتماليه الكبيره انو ساعدو بيكو..
بيكو لمن قرر يعترف بحاجه اعترف انو شاف حماده مع ناصر في حين كان ممكن يقول الحاجه دي من اول
بس هو قالها بعد حماده اختفي و ده ال زاد شكي في الموضوع..

بيكو لمن حسي م عندو عذر غياب مقنع و م اتأكدنا لو فعلاً ما كان موجود داخل المبني

لو عايزين نخته الشخصيه الثالثه ال في الصوره فأكيد كان انسان قريب منهم
كان الخيار الأول بيكو.. "

#فلاش_باك :

يوم وفاة رامي :

رامي و حماده كان بتشاكلو و حصل نفس الكلام ال قالو سيد أحمد أول :

رامي:انت ليه تعمل فيني كده؟؟ حماده انا عملتا ليك شنو وريني؟!..احنا كنا اخوان.. مش كنا بنخاف على بعض من أقل حاجه.. كنا بنجري لبعض عشان نعرف نساعد بعض.. ليه طعنتني من ظهري.. وريني؟؟
حماده:يادوب تتذكر اننا أصحاب.. انت و بيكو بتعرفو شنو عني؟!.. بتعرفو بس أني حماده العاقل الراكز ال م بغلط.. و تاني؟؟
رامي:ده سبب؟؟عملتا ده كلو فيني عشان انت شايف اننا أصحاب م كويسين مثلا؟؟

حماده قعد في الأرض و بقا ببكي..
رامي كان مصدوم في شكلو و م فاهم حاجه..

رامي:وريني حسي.. وريني في شنو.. مالك؟؟

حماده:انا براي.. انا دايما براي..
أنا ما بقدر انوم.. ما قادر حتى أكون راجل زي م ابوي عايز..انا نحس.. كلهم بقولو انا نحس..
عارف يعني شنو تعيش حياتك و انت منبوذ؟؟
و انت زيك زي الكرسي في البيت..
وجودك م فارق مع زول و عدم وجودك م بضر زول..
أنا كنت عايز زول واحد بس في الدنيا يقول لي انت انسان كويس و انت ح تنجح.. يقول لي امك م ماتت بسببك و ده قضاء ربنا..
رامي انا انسان
قتلوني و انا عايش ي رامي💔
اعمل شنو؟؟
برجع البيت ابوي بقول لي رامي احسن منك
وقف على رجولو و انت بس قاعد كده
أنا أعمل شنو؟؟

رامي:بس انت م كده..انت انسان كويس كلنا عارفين

حماده:كذب.. انا م بنوم أبداً انت عارف ال حاجه دي؟؟عندي أرق..
ما قاعد احلم زيكم.. م عندي احلام
تخيل اني انسان بدون أحلام!!
ما قاعد اغمض عيوني و اتخيل حاجات حلوه لانو حياتي كلها سيئه..
ما قادر اشتغل لاني انسان فاشل لانو هما زرعو فيني احساس اني فاشل
رامي انا بخاف غيري ينجح
عشان انا وقتها بكون قدام ابوي افشل انسان

رامي:و خوفك ده ح تتغلب عليهُ و انت بتضر الناس الحولينك يعني؟؟

حماده:اعمل شنو؟!.. ماف زول قاعد يسمعني..
الكوكب ده كلو... بكل الناس ال فيهُ
ماف انسان عايز يسمعني
ماف انسان عايز يقعد جمبي و يقول لي كلمه وحده كويسه
أنا امكن كنت ح اكون كويس لو في زول قال لي كلمه وحده بس
كل الناس بخلت علي بالكلام
كلهم اختارو أنهم يقتلوني بس انا حي..
كيف اثبت للناس أني هِنا
ها..؟؟

رامي:حماده احنا جمبك.. انت ال م شايفنا..

حماده:ما شايفكم؟!..
يعني شنو احنا جمبك وروني؟؟
هو الإنسان بكون جمبه الإنسان و هو بقول بس انا جمبك..
أنا جمبك دي م عندها أفعال يعني؟؟!.
وين كنتُ و انا بحارب الليل براي
وين كنتُ و انا قاعد و ببكي في زاويه غرفتي؟!..
وين كنتُ لمن قررتا أني اختار الطريق الأسهل و ابقا انسان سئ
هو انا ضروري اجي اقول ليكم انا محتاجكم عشان تشوفوني
م لاحظتو اني م كويس؟!..
و لا كان عندكم حاجات أهم!!
أهم من أنكم تشوفوني؟!..
حتى انتو.. قتلتوني.. لأنكم م عرفتو تكونو أصحاب أبداً
لأنكم كنتُ سيئين زي الدنيا
حتى أنتو بخلتو علي بالكلمه الحلوه
في الوقت ال انا محتاج فيهو بس نور بسيط
انتو اخترتو تبقو لي ظلام..
زيهم.. انتو زيهم..
ما تقولو لي احنا جمبك و ما تقولو حاجه لأنكم ما كنتُ جمبي
أنا كنت بحارب براي، ماف زول في الدنيا ليهُ الحق يقول أحنا كُنا معاك..
لأنها كذبه
ما تكذبو لأنكم ما عرفتو تكونو أصحاب.. 💔

حماده قام من مكانو و بقا بعاين ل رامي..

حماده:ما تكذب لاني م بحب الكذب

رامي:و انت حسي استفدتا شنو؟؟انت حققتا كلامهم بس.. بقيت انسان سئ و كذاب.. احنا م عملنا ليك شى عشان تعمل فينا كده.. بس انت سئ.. م نظيف من جوه عشان كده حصل معاك ده كلو
استسلمتا لكلام الناس ليه؟؟ لأنك ضعيف.. شخصيتك ضعيفه زي م ابوك بقول..

رامي كان بستفز حماده بالكلام و ماشي عليهو..

في اللحظه دي جا بيكو و مسك حماده لانو كان منفعل و عايز يضرب رامي...

رامي:خليهو يجي يضربني.. الاخو عامل راجل.. و انت.. انت جاي تقيف هنا ب ياتو وش اساسا؟؟
بيكو:انا حسي دخلني شنو
رامي:دخلك شنو.. انت ال وريتو مكان البضاعه.. خلاص م تمثلو انا عارف كل حاجه.. ليه؟؟ ياخ انتو مش اخواني.. غدرتو بي ليه وروني؟!..
حماده:لسه بتكلم عن اننا اخوان

رامي:انا ح اجن و الله.. ليه عملتو كده؟؟ بيكو قول عملتا كده ليه؟!.. يعني م قادر افهمكم.. عشان قروش؟!. اتفقتو علي الاتنين سوا عشان القروش ؟!..
بيكو:اي عشان القروش.. خلاص ؟!.. كده انت مرتاح بعد عرفتا؟!.. حماده سرق البضاعه بعد انا وريتو مكانها.. و حماده هو ال كلم ناصر انو البضاعه اختفت.. و انا ال قلتا ليهو يعمل كده...
رامي:ليه؟!.. انا و الله بس عايز اعرف ليه عملتو فيني كده.. قولو لي ليه
بيكو:عشان.. انت دايما الأحسن.. في الثانوي في الجامعه.. رامي رامي رامي.. وقعتا الأرض و قمتا عادي و لا كأنو حصل ليك شي.. احنا الحياه دي قاعده تمردغنا زول يجيب خبرنا ماف.. انا العرفتك على ناصر و اقنعتك تشتغل معاهو و في النهايه انت تكسب و انا اعاين ليك..

رامي:ما عارف اقول ليكم شنو.. بس م كان العشم ي اصحابي..

رامي كان بياخذ نفسو بصعوبه..
فجأه طلع تلفون من جيبو و رفعو ليهم..

رامي:ح اقول كل حاجه ل ناصر.. م انتو بس البتعرفو تلعبو..

رامي سجل كلامهم كلو..

في اللحظه دي حماده انفعل و بقا بتشاكل مع رامي عشان ياخذ منو التلفون..
و بيكو واقف و بعاين ليهم..

أثناء م حماده بتشاكل مع رامي رماهو قوي و وقع على الحافه و ضرب راسو..

في اللحظه دي حماده اخذ التلفون و بقا واقف بعيد و بعاين ل رامي و هو بحاول يقيف بصعوبه..

رامي مشا وقف في الحافه و كان خاتي يدو مكان الجرحه..
راسو كان لافي و م شايف قدامو..

في اللحظه دي في زول وقعو..

حماده كان مصدوم..

حماده:قتلتو...ي بيكو قتلتو💔💔

بيكو بعد وقعو بقا برجف و رجع ل وره..

في اللحظه دي ابو روان و ابو حماده طلعو فوق..
كانو جاين سوا..

مؤمن:عملتو شنو؟ ؟
حماده:ي ابوي ده بيكو... وقعو.. و الله بيكو..
سيد أحمد:انتو مجانين.. لازم نمشي من هنا سريع.. الحمد لله انو المبني فاضي و ماف زول..

نزلو كلهم سريع و طلعو..

في الوقت ال حالي :

يوسف:انت و سيد أحمد بتعرفو بعض من وين؟؟

مؤمن:سيد أحمد صحبي.. و هو ناصر كانو بعرفو بعض.. يعني ممكن تقول سيد أحمد كان بشتغل مع ناصر بس حصل بينهم خلاف.. بعد عرفتا انو حماده سرق البضاعه انا كلمتا سيد أحمد عشان ياخذه و يتصرف فيها هو..
حماده م كان بعرف يتصرف و كنت خايف يعمل مصيبه عشان كده كلمتا سيد أحمد و قلتا ليهو لازم نتكلم مع حماده في أقرب وقت و هو قال لي انو ح يمشي الجامعه و ممكن نقابلو هناك و فعلا لمن طلعنا نفتش عليهم لقينا ده كلو حاصل..

يوسف:بيكو و سيد أحمد بعرفو بعض؟؟

مؤمن:م اظن..

يوسف:حماده وين؟؟

مؤمن:م عارف

يوسف:مؤمن حماده وين؟؟

مؤمن سكت و م اتكلم..

يوسف:تمام.. بجيبو براي..و آخر سؤال.. انت كيف عرفتا انو حماده سرق البضاعه..

مؤمن:ولدى غبي.. بعد خاف جا و قال لى بكل العملو.. بس تانى قال لى م ادخل في الموضوع و انو ح يتصرف

يوسف:تمام..

يوسف طلع من هناك و كان معصب شديد و طوالى نزل تحت السجن ..

طلع بيكو و طوالى بقا بضرب فيهو..
جو الرجال يمسكو يوسف بس هو كان معصب شديد..

يوسف:عارف ليه كذبتك وجعتنى؟؟ لأنك كنت بتقول لى انا م عرفتا اكون صاحب و انا كذاب و نسيت تقول لى انك قاتل.. ياخ انا أبداً ما ختيتك تعمل كده.. كنت بشك فيهم واحد واحد إلا أنت...و مشيت وقفتا مع ابو في العزا كيف وريني؟؟ كييييف...

الرجال طلعو يوسف فوق و دخلو بيكو السجن..

وقتها بيكو كان برجف و خايف و في نفس الوقت دموعو بتنزل..

يوسف دخل مكتبو و واضح انو زهجان و قرفان من كل حاجه...

يوسف:و الله لو سألتك سؤال واحد و كذبتا فيهُ اعتبر نفسك ميت..

سيد أحمد كان خايف شديد و متوتر..

يوسف:بتعرف بيكو من وين.. لدرجه تلصق التهمه في غيرك و تحميهو...ها... بتعرفو من وين؟؟

" أنكشفت الحقيقة..
لا أسرار بعد الآن..."

آخر حاجه قالها قبل يموت " ما كان العشم فيكم" 💔

*"Nermeen_Th❤️*
--------------------------------------
---------------------
*☆يتبــــــــــــــــــــــــــــــــــــــــــــع☆☆*

*#الساعه_أربعه_ونص15》*
*#بقلم_نرمين_طه*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
يوسف:حماده!! انا يوسف.. كيف انا منو..

حماده فجأه بقا برجف و خته يدو في ال طربيزه قدامو و بقا بعاين ليهم بتركيز شديد..

يوسف كان مستغرب و ما فاهم حاجه أبداً
حماده بعاين ل يدو و مره بعاين للأرض..

يوسف بعد مسافه طلع بره و ناده أحمد..

يوسف:لقيتو وين ده؟؟
احمد:في واحد من بيوت ابوهو.. بس.. كان مربط يدو مع السرير.. كان في صحن فيه اكل و مرمي جمبو.. و م كان لابس غير شورت و الغرفه كانت بارده شديد
يوسف:ده شنو ده!! ليه ده كلو؟؟ الراجل ده مجنون
أحمد:منظرو كان يقطع القلب.. فجأه كان عباره عن طفل صغير م راجل كبير
يوسف:اتصل بالدكتور طيب خليهو يجي يكشف عليهُ، حالتو العقليه ما كويسه أبداً..
احمد:طيب.. انت م عايز تمشي ترتاح و تنوم شويه
يوسف:لالا.. عندي كم حاجه عايز اعملا
أحمد:طيب..

يوسف دخل مكتبو و كان بقره في ورق كتير
و كان في صور ل جثه ناصر لمن اتوفى..

يوسف شال الورق كلو و جاب بيكو غرفه التحقيق تاني..

يوسف:اها.. زهجتا شكلك من الطلعه و النزله الكتيره.. م تخاف ح نحولك المحكمه العليا خلاص

بيكو:مطلوب مني شنو حسي
يوسف:قتلتا ناصر عشان القضيه تتقفل صح.. كان الواضح انو هو قتلو و بعدها لقينا جثتو و خلاص
بيكو:انا.. ما..
يوسف:بيكو م تكذب..ماف داعي صدقني لانو كلو ح يتكشف في النهايه.. ساعدك فيهُ منو؟؟
بيكو:انا ما قتلتو
يوسف:حماده كان في المستشفي.. منو كان معاك
بيكو:ابو حماده..
يوسف:ما شاء الله.. رئيس العصابه
بيكو:م كنت عارف اننا ح نقتلو.. ابو حماده قال ح نخليهو يقتنع و يلبس القضيه هو.. قال نخوفو شويه..
مشيت ضربتو و لمن قمتا منو هو شال الحجر و ضربو قوي 💔مات..
يوسف:يعني حسي في رقبتك في روحين؟؟
بيكو:انا..
يوسف:في حاجه تاني عايز تقولها؟؟ حاجه م قلتها لي يعني.. عشان م كل مره اجيبك اسألك
بيكو:كان في زول معانا في الطابق فوق وقت حصل ده كلو انا متأكد.. لانو و احنا نازلين سمعنا صوت كركبه فوق
يوسف:مشيتو من غير تشوفو ده منو؟؟
بيكو:سيد أحمد خلانا ننزل و قال هو بتصرف.. بس بعدها قال إنها كديسه و ما كان في زول..

يوسف سمع كلامو ده و سكت..

في مكان تاني في نفس الوقت :

سمر كانت قاعده قصاد القسم في الرصيف..

كانت بتعاين للقسم و عيونها حمره شديد..

سمر:دمو ما ح يمشي ساي.. أبداً..

عنده نرمين :

كانت قاعده في غرفته..
فتحت باب الدولاب و كان في صندوق فوق فيهو حاجات كتيره شديد
نزلتو و طلعت كل الحاجات
كان في كميه من الصور..
كلها كانت عباره عن صورم هما كشله..
نرمين كانت بتعاين لكل صوره و تبكي اكتر من اول..

بدت تشرط فيهم كلهم و تتذكر سمر و هيا بتقول " بيكو قتل رامي.."
كانت بتبكي بحرقه و بتقطع الصور و كل مره بتضرب نفسها بالمقص بالغلط..
سريرها كلو بقا عباره عن دم و عن صور مقطعه و ماليه كل المكان..

نرمين:الله ياخذكم كلكم.. الله ينتقم منكم..

روان كانت واقفه وراها و بتبكي و بتحاول م تطلع صوت في النهايه م قدرت و دخلت الحمام و بقت تبكي بصوت عالي..

"_لحظات الصدمه
لحظات الحُزن القويه

اللحظات البنحس فيها أنو ماف ألم تاني ممكن يكون أقوي من الألم ده..
ماف وجع تاني ممكن يكسرنا بنفس الطريقه دي..
نرمين كانت قاعده فوق سريره وسط كل الصور ال كانت متوقعه انها ح تشوفها بعد كم سنه و تكون مبسوطه بس حصل العكس لانو كل الصور دي كانت عباره عن كذبه كبيره..
روان كانت قاعده في الحمام و بتبكي و بتسأل نفسها كيف ممكن ده كلو يحصل..
سمر كانت قاعده في الشارع و بتعاين للقسم بنظره كلها حسره و وجع..
حماده كان قاعد في زاويه الغرفه و برجف كأنو طفل عمرو اربعه سنين
و بيكو قاعد في السجن و بتمنى لو كل الحقد ده ما دخل قلبو و وصل كل الناس دي للنقطه دي..
اللحظه دي
الساعه دي
كلهم ببكو
كلهم خايفين
كلهم بتمنو الزمن يرجع و يتغير و لو حاجه بسيطه..
مثلا حاجه زي أنو موت رامي يطلع كذبه.. "💔

صباح ال يوم التالي :

كلنا مفتكرين انو حاجات كتيره بدت تتحل
بس في الحقيقه حاجات كتيره على وشك انها تتعقد أكتر..

يوسف صحه من النوم و كان حاسي بتعب شديد..
وقف مسافه و بعدها دخل الحمام و لبس هدومو و كان متحرك على القسم..
جاتو مكالمه من رقم غريب و رده عادي..

_معاي يوسف حسين عز الدين؟؟

يوسف:اتفضل..

_والدك معانا في المستشفي..

يوسف وقف العربيه و بقا م عارف يمشي المستشفي و لا يعمل نفسو م مهتم..
كان نفسو يكمل طريقو بس م قدر..

مشا المستشفي و لقا اتنين من اخواتو من ابواهو واقفين و ببكو..

وحده فيهم اول م شافتو جات عليهُ و مسكت يدو و قعدت في الأرض و بقت تبكي..

_اي ابوي سئ بس هو ابوي في النهايه.. م تعمل فيهو كده.. من يوم شافك و هو بس ببكي.. ربنا بعظمتو بسامح الناس ليه احنا م نسامح.. يوسف م تعمل فيهُ كده عليك الله أعفى ليهو😭😭

يوسف م كان قادر يفهم حاجه.. قومها من الأرض و قال ليها روقي شويه ابوكي م بحصل ليه شى..

الأم كانت قاعده و بتعاين بس للأرض..
يوسف مشا و قعد جمبها..

يوسف:حالتو الصحيه كيف؟؟
نسرين:م عارفه ي ولدي.. م فهمتا كلام الدكاتره ده..
يوسف:وين هو حسي
نسرين:في الغرفه دي.. قال م عايز يشوف زول غيرك
يوسف:يشوفني انا؟؟
نسرين:اي
يوسف:تمام..

يوسف مشا للدكتور و قعد معاهو..

يوسف:مالو..

_و الله ي يوسف ابوك جاتو جلطه مرتين و انت عارف في الثالثه مستحيل نقدر ننقذو.. قلبو ضعيف شديد و حسي جاتو مبادئ جلطه بس لحقناهو.. مفروض يكون بعيد تماماً عن الحُزن و التوتر و الضغوطات

يوسف:امممم.. ادخل ليهو حسي عادي

_اي اصلا عايز يشوفك..

يوسف مشا و دخل غرفتو ..
كان راقد و متغطي نصو و بعاين للسقف و بستغفر..
كان واضح من وشو أنو زعلان شديد و تعبان اكتر..

يوسف قعد جمبو و أخذ نفس عميق..
لمن ابوهو أنتبهه ليهو و شوفو بقا بس ببكي و بتنهد..

حسين:اعفي لي.. انا خفته 💔
م كان عندي قروش عشان تاكلو و لا بيت و لا حاجه.. خفته عليك انت و اخوك و م قدرتا أبهدلكم معاي.. بعد امك أتوفت حسيت الحمل علي تقيل شديد.. م كنت عايز اخليكم و الله بس م قدرتا..
بعد حياتي رجعت كويسه..

يوسف:(قاطعو..) قصدك بعد اتزوجتا..

حسين:انا و الله فتشتكم م لقيتكم..و الله قلبي كان بتقطع عليكم.. كنت كل يوم بقول امكن حصل ليكم شى ،امكن محتاجين لي.. و الله ي ولدي يوم واحد م قدرتا انوم و بالي مرتاح.. بقيت عشان انسى بسكر و بشرب.. بقيت بعمل حاجات كتيره بس عشان اخفف الحُزن ده كلو من قلبي و ماف حاجه نجحت

يوسف:عارف مشكلتك شنو ؟؟مشكلتك بتحاول تألف حاجه و تصدقه.. بتسكر عشان تنسى العملتو؟؟ هو انت من امي عايشه و بتسكر و بتتشاكل معاها.. وقتها كنت بتسكر ليه؟!.. عشان تنسى الحياه القرف ال انت عايشه؟ ؟انت قايل ده عذر؟!.. احنا نمنا في الشارع.. م كان احسن ننوم في الشارع معاك من ننوم برانا خايفين فجأه يجي زول و يعمل لينا حاجه ؟؟
م كنا بناكل احنا برضو!! م كان احسن نجوع معاك؟!..
اتهربتا من المسؤليه و كأنها م جزء من حياتك
ليه؟!..
لأنك جبان و لأنك للأسف م ينفع كان تكون أب..
حسي بعد السنين دي كلها جاي تقول لي انا فتشتكم.. فتشتنا ليه ؟؟
جاي بعد احنا بقينا رجال و كبرنا عايز مننا شنو؟!..
حياتنا مشت من غيرك و م مطلوب حسي منك تجي و تقول لينا انا ابوكم اعفو لي
أنت م ابو
الابو عمرو ما كان كده..
أنا عملتا بأصلي و ح اساعدك مادياً عشان اثبت ليك اني زول كويس و أني تربيه امي ربنا يرحمها و انو السوء الفيك م أثر على الطيب الفيني..

يوسف قال كلامو ده و طلع طوالي من هناك..
اخواتو كانو واقفين بره
بعد طلع رجع ليهم تاني و وقف مع أصغر وحده فيهم كان عمرها تقريباً ١٥ سنه..

يوسف:اسمك شنو
منار:اسمي منار
يوسف:عندك تلفون؟؟
منار:اي
يوسف:جيبيهو

منار ادتو التلفون، يوسف فتحو و سجل رقمو..

يوسف:لو عايزين شي انتى و اخواتك و امك اضربو لي من غير تترددو.. انا..
يوسف كان عايز يقول انا اخوكم بس م قدر..

يوسف:انا موجود دايماً..

ابتسم ليها و طلع من هناك، ركب عربيتو و اتحرك و هو مخنوق شديد..
وقف في الشارع و ضرب مكالمه فيديو..
كان متمنى ياسر يرد عليه بس م رد💔

يوسف سفر ياسر للعلاج بره و بسبب آخر مشاكل بينهم ياسر م كان بتكلم معاهو خالص و قرر م يرد على و لا مكالمه من يوسف💔...

في القسم :

أحمد كان مع مدير القسم و وقع على آخر أوراق و اتحول للمحكمه و مفروض يكون عندو محاكمه العصر..

أثناء م هو ماشي شاف سمر..

احمد:لسه أنتى هِنا؟؟
سمر:اي كنت عايزه يوسف
أحمد:لسه م جا
سمر:اها
أحمد:في شنو؟؟
سمر:يوسف كان قال لي انو ح يتحول للمحكمه متين؟؟
أحمد:بعدين ح يمشي.. زي العصر عندو محاكمه قصيره.. بس الكبيره لسه م اتحددت
سمر:اها.. تمام..

سمر مشت و كانت تصرفاتها غريبه شديد..
اول م طلعت يوسف دخل..

أحمد:وين انت اتأخرتا الليله
يوسف:كان عندي شغله كده
احمد:سمر كانت هنا و صراحه تصرفاتها م عجبتني
يوسف:سيبها البت نفسيته تعبانه شديد
أحمد:على قولك.. عايز تعمل شنو
يوسف:جيب لي سيد أحمد في غرفه التحقيق عايزو..
أحمد:تمام..

يوسف دخل الغرفه و كان مصدع شديد، كان خاتي يدو في راسو و مستنى لمن جا سيد أحمد و قعدو و طلعو..

بوسف:اها قول.. كان منو في فوق غيركم

سيد أحمد اتوتر شديد و كان واضح في وشو التوتر..

سيد احمد:م كان في زول طبعا..
يوسف:كان في.. قول منو؟؟
سيد احمد:و لا زول
يوسف:انا اصلا الليله زهجان.. و عايز اتفشى في زول..

يوسف مسك سيد أحمد و بقا بضرب فيهو و هو بصرخ بس ماف زول دخل عليهم..

سيد احمد:ده ضد القانون..
يوسف:ياتو قانون؟؟ انت في السودان؟؟ بلدنا دي الكبير فيها هو القانون..

سيد أحمد كان بسكت و يوسف بضربو زياده عشان يتكلم و فعلاً في النهايه م قدر و تعب شديد و صرخ و قال " روان ياخ... كان في روان.. كان في بتي" 💔

يوسف خلاهو قاعد في الأرض و قعد هو في الكرسي قصادو..

يوسف:شنو ياخ كل يوم تطلع لي مصيبه جديده.. روان بتعمل هناك شنو؟؟
سيد أحمد:م عارف..
يوسف:قول حصل شنو..
سيد أحمد:...

#فلاش_باك :

بلسان سيد احمد :

أثناء احنا نازلين سمعنا صوت كركبه..
كانو عايزين يتأكدو لو في زول..
طوالي قلتا ليهم انا بشوف و انتو انزلو
فعلاً نزلو كلهم و انا دخلتا كل القاعات
في قاعه دخلتا م لقيت حاجه بس قبل اقفل الباب لمحتا طرف عبايه
فتحتا الباب و دخلتا تاني لقيت وحده قاعده في الأرض بين البينشات و بتبكي زي الطفله..

في البدايه كانت مغطيه وشها و واضح انها خايفه
لمن شالت يدها و شفتها اتصدمتا..
م كنت قادر اتكلم بس كان لازم اخليها تنزل قبل واحد فيهم يعرف انها هِنا..

سيد أحمد:شفتي الحصل؟ ؟
روان:رامي😭ده رامي.. رامي.. رامي مات؟؟ حصل ليهو شنو ؟؟جيبو لي رامي

سيد أحمد قعد في الأرض قصادها..

سيد أحمد:ركزي معاي كويس ، لو زول عرف انك شفتي حاجه و خصوصا ابو حماده ح يقتلك و الله.. لازم تمسحي دموعك و تنزلي من غير زول يحس بيكِ و الا و الله ح يقتلوكِ.. م ينفع تبكي و تقعدي كده..

روان:بس ده رامي

سيد احمد:لو عايزه يحصل فيكي زيو.. خليكي كده.. ح تندمي.. لازم تخافي على حياتك..

في الوقت الحالي :

سيد احمد:خليتها تنزل و بعدها مشيت
يوسف:م كانت عارفه انك ابوها وقتها
سيد احمد:لا..
يوسف:ليه م جات اتكلمت
سيد أحمد:قبل تنزل انا حزرتها.. قلتا ليها لو في حاجه اتكشفت ح اقول ليهم أنو انتى الوحيده ال كنتِ شايفه ده كلو و وقتها م ح يرحموكِ..
يوسف:ههه يعني خافت
سيد أحمد:هيا م عملت شى.. و الله ما عملت شى غلط

يوسف طلع و دخل مكتبو و ضرب ل سمر بس م كانت بترد..
طلع من المكتب و قال ل أحمد رسل ل روان تجي القسم و احمد قال ليهُ تمام..

قريب العصر جات العربيه و أخذت بيكو و معاهو كم زول للمحكمه..
يوسف مشا هناك قبل بيكو و قابل القاضى و حصلت مناقشه طويله و بعدها جا محامي بيكو ال تم توكيلو من جهة ابوهو ال عندو شغل في تركيا بس ح يخلى كل حاجه و يجي عشان ولدو..

أثناء م بيكو قاعد في الممر في المحكمه جات سمر..

وقتها يوسف كان جوه مع المحامي و القاضي
بره كان في راجلين مع بيكو
و كم زول واقف بعيد..

سمر:إحساسك شنو ؟؟
بيكو:سمر خلاص..
سمر:ايه خلاص؟؟ عايزه اعرف إحساسك؟؟
بيكو:حاسي بذنب خلاص؟ مبسوطه؟!
سمر:ذنبك ده م اظن يرجع حبيبي!!
بيكو:صح.. م ح يرجع تاني

يوسف جا طالع من جوه و قال ل بيكو يلا عشان تدخل..
و عاين ل سمر لقاها واقفه..

سمر:انت كمان مفروض تلحقو على فكره!!

أثناء ما الرجال ماسكين بيكو عشان يدخل جوه و يوسف كان بتكلم مع واحد من الرجال في حاجه..
كلهم اتفاجئو بصوت صرخات من بيكو
و صوت سمر و هيا بتصرخ كمان
فجأه الدم بقا في كل مكان و شكل السكين واضح تماماً و هو طالع من حلق بيكو

كلهم فجأه اتفاجئو انو سمر ضربتو من وره بالسكين و في نص حلقو

الرجال مسكو سمر و بقو جايطين و هيا في اللحظه دي بتشوف دم بيكو و هو بينزل و بتضحك..

جو الأمن و الأسعاف و اخذو بيكو سريع على المستشفي..
و سمر كانت بين واعيه و بين م واعيه..

يوسف م كان قادر يستوعب حاجه و مصدوم في الحاجات ال حصلت في كسر من الثانيه دي..

منظر بيكو و هو واقف و السكينه داخله و طالعه منو كان منظر مفاجئ لكل الناس الحاضرين..
بذات يوسف
ما كان مستوعب انو حاجه زي دي تطلع من سمر..

سمر فقدت الوعى تماماً و قبل ينقلوها على السجن نقلوها على المستشفي برضو و معاها كميه من الأمن عشان يضمنو أنها م تهرب..

يوسف كان واقف قصاد المحكمه و م مستوعب حاجه..
في اللحظه دي تلفونو ضرب..

كان رقم غريب، رده عليهُ طوالي..

يوسف:ايوا..

_ابوي مات ي يوسف

يوسف:منو معاي؟؟

منار:منار💔💔يوسف ابونا مات💔💔💔

"لك كامل الأحقية ترفض تسامح إنسان
سرق من عمرك عُمر."

*"Nermeen_Th❤️*
--------------------------------------
---------------------
*☆يتبــــــــــــــــــــــــــــــــــــــــــــع☆☆*

*#الساعه_أربعه_ونص《17》*
*#بقلم_نرمين_طه*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
"_مفروض نبده من جديد.."

سمر لمن صحت م كانت حاسه بالدنيا حوليناها..
كل حاجه كانت غريبه
لقت روان جمبها و ماسكه يدها و بتبكي..

روان لمن شافت سمر صحت بقت بتبكي بصوت عالي..

روان:ليه كده ي سمر
سمر:لمن شفتا دمو حسيت انو دم رامي قصادي💔
روان:ح تستفيدي شنو لو مات؟؟ ح تدخلي السجن و تضيعي حياتك
سمر:حياتي اصلا ضاعت يا روان، م اتوقع اقدر اكمل بعدو
روان:آسفه
سمر:ليه؟؟
روان:انا شفتا كل حاجه اليوم داك💔بعد طلع راجل امي و سمعتا صوت الصرخات انا طلعتا فوق و اتصدمتا انو حماده و رامي بتشاكلو💔وقتها ادسيت عشان م يشوفوني و كنت عايزه اعرف في شنو.. م اتوقعتا ده كلو يحصل💔انا و الله كنت خايفه بس.. وقتها ال ع اساس ابوي ده كان معاهم و شافني و خوفني انو لو اتكلمتا م ح يحصل خير💔لمن شفتو في القسم و طلع ابوي اتصدمتا💔انا كنت خايفه بس و الله.. طول عمري ح أفضل خايفه شكلي.. خفته من راجل امي و حسي خفته منهم.. ي سمر انا وقتها م عرفتهم.. بيكو صحبنا وقتها كان زول تاني تماماً..

سمر م ردت على روان و كانت بتعاين بس لسقف الغرفه..
روان مسكت يدها اقوي و بقت تبكي..
كانو في المستشفي وقتها..
إضائة الغرفه كانت قويه شديد بس نسبه لكل الأحاسيس الجواهم وقتها كانو حاسين بظلام بس
ظلام بسبب كل الكِذب و كل الحُزن الحولينهم..
لا سمر كانت قادره تقول ل روان خلاص م مشكله
و لا روان كانت قادره تقول ل سمر يا ريت وقتها كان عملتا حاجه، امكن رامي م كان مات..

عنده يوسف :

لمن سمع الخبر قبل يتحرك مكان مشا و قعد في المسطبه في الشارع
ولع سجاره و كان بشرب فيها..
جا أحمد و قعد جمبو..

احمد:الحاصل شنو ي مان
يوسف:ابوي اتوفى..

أحمد سكت مسافه بعدها قال..

احمد:البركه فيكم، ربنا يرحمو و يغفر ليهُ ي رب.. حاسي ب شنو؟؟

يوسف:الأنسان الطبيعي في وقت زي ده بزعل.. بحس انو قلبو اتكسر.. بس انا ما حاسي بحاجه..
امكن لو زول سمعني ح يشتمني و ح يقول لي ده ابوك و ده جابك الدنيا
بس الأبوه عمرها ما كانت بس عباره عن زول يجيبني الحياه و يخليني احارب فيها براي..
كان نفسي احضنو و اقعد معاهو و اقول ليهو عفيت ليك كل ال فات
بس تصدق م ندمان.. م ندمان أبداً
في حاجات الإنسان م بقدر يغفر فيها
مقارنة بكل ال شفتو في الحياه م بقدر اغفر لأبوي الأذى الحصل لي و لأخوي
هو انا غلطان كده؟؟

أحمد عاين ليهو مسافه بعدين قال " م تغفر لو ما قادر.. بس كلنا بنغلط.. ماف انسان أتخلق من غير غلطات.. اغفر عشان يغفرو ليك .."

أحمد قام و دخل جوه، يوسف اتحرك على بيت ابوهو..

اتكفل و جاب الصيوان و كان واقف مع اخواتو..

لمن اختو قالت ليهُ ادخل شوف ابوك لأخر مره وقتها هو رفض
و اكتفى بأنو يكون زي الغريب عنو..

وقت الدفن اتحرك مع الرجال و دفنو معاهم..
لمن مشو كلهم هو كان لسه واقف في قبرو..

يوسف:من جوه حاسي بزعل شديد اتجاهك بس عافي ليك
عافي ليك كل الأيام النمنا فيها جعانين و كل الايام الضربتنا فيها الحياه و كل الأيام ال كنت ببكي عشان انت بس تجي
ح اعفيها ليك .. ما عايزك تتعذب و الله .. ربنا يرحمك و يغفر ليك و الناس ال خليتهم وراك ح اكون معاهم .. ماف زول يستاهل يتساب كده من غير حاجه...

يوسف اتحرك من المقابر و رجع ليهم البيت
قضا ليهم كل حاجه، و اداهم قروش في يدهم و طلع من هِناك..

اول ما ركب العربيه مسك تلفونو و رسل ل ياسر رساله نصيه محتواها :

" أبونا أتوفى."

رسل الرساله دي و قفل التلفون طوالي..

في مكان تاني في المصحه :

حماده كان أول يوم ليهُ هناك
كان قاعد في الغرفه و بعاين نظرات عشوائيه لكل حاجه
كان قاعد و برجف بصوره مبالغ فيها..

بلسان حماده :

كنت قاعد و شايف قدامي شباك كبير لمن اقيف هناك كان واضح انو الأرض م بعيده شديد
أمكن كنت في الدور الثاني
كنت بتخيل شكل ابوي و هو واقف تحت و بعاين لي بنظرتو المعتاده

النظره المليانه غضب آتجاهي
رغم اني م عملتا حاجه تستاهل كل الغضب ده..
قررتا اقعد في السرير بس حافه السرير بتذكرني كيف كان بمسكني من يدي و بربطني عشان يعاقبني
كنت بقوم من السرير مخلوع عشان م يربطني و لمن ارجع وره بعاين للحيطه ال وراي و بخاف امكن حسي الأنوار تتقفل و اقعد ف الظلمه مع الحيطه دي برانا
في النهايه قررتا اغمض عيوني و اقعد في الأرض في نص الغرفه
كنت بحاول اتمسك بذكرياتي الحلوه ما كان بجي في بالي غير اصحابي.. 💔

#فلاش_باك :

كنا قاعدين في مطعم من مطاعم الخرطوم و تقريبا طلبنا كل أنواع الاكل في المطعم😂

نرمين:عاينو احنا نتفق كل زول فينا يسمي أطفالو بأسم باقي الشله
حماده:اها ده كلام شنو كمان
نرمين:مثلاً انا لو جاني ولد ح اسميهو حماده عليك
بيكو:بس م يكون شين زيو بعدين😂
حماده:و الله حظو لو جاب صلعتي دي
روان:و حلاتي معترف كمان😂😂
رامي:ماف طريقه غايتو انا بناتي قررتا اساميهم
روان:اي انت ي روميو خليك بره الموضوع
بيكو:حسي انا لو جاتني بت اسميها روان أو نرمين.. ليه اصلو امكن مرتي م عايزه
نرمين:مشكلتك انت و مرتك بعداك
حماده:انا موافق و الله لو ربنا رزقني نعمل قرعه و نشوف ياتو واحد ح يكون اسم ولدي😂
بيكو:خلاص انا قدام معاكم
روان:مع انو اساميكم م حلوه بس اوكي
نرمين:اتفقنا
رامي:خلاص انا زاتي بعد البتين ديلاك بجيب تاني عيال عشان اشيل اسمائكم😂

في الوقت ال حالي :

حماده كان قاعد و بتذكر و بضحك..

عنده نرمين :

كانت قاعده في غرفته و قافله الباب
سمع صوت بت عمها بتناديها، بعد نزلت قالت ليها في زول عايزك بره و فعلاً طلعت لقت يوسف واقف..

نرمين:يووسف

يوسف كان لابس تيشيرت ابيض و بنطلون اسود و مدخل يدو في جيبو..

يوسف:كيفك
نرمين:تمام.. كيف انت
يوسف:نص نص.. بقينا في نفس المكان
نرمين:كيف
يوسف:ابوي اتوفى

نرمين اتخلعت و لون وشها اتغير..

نرمين:انت جادي و لا بتستهبل ؟؟ مالك طيب م متأثر و لا مصدوم و لا في شنو
يوسف:متأثر يعني.. انا و ابوي م كان في بينا علاقه
نرمين:اها.. ربنا يرحمو ي رب
يوسف:بس ده م بغير فكرة اني زعلان.. كنت شايف انو ممكن بكره يجي و كلو يتصلح بس بكره تاني م ح يجي معاهو
نرمين:حاسي بذنب
يوسف:لا أبداً .. حاسي بس انو حياتي ح تفضل ناقصه للأبد..
نرمين:هيا الحياه كده ظالمه دايماً
يوسف:آسف لأني جيت كده.. بس حسيت اني عايز اشوفك
نرمين:تعال اى وقت..
يوسف:ح امشي عشان م ظريفه قدام اهلك
نرمين:طيب..

يوسف أبتسم و مشا طوالي و نرمين دخلت جوه..
لقت عمها قاعد بتكلم مع مرتو و م انتبهو ليها

صمد:ناخذها تقعد معانا
منيره:دي مسؤوليه كبيره
صمد:اها يعني نعمل شنو في النهايه دي من ريحه اخوي اكيد م ح اخليها
منيره:انا م عندي مشكله طبعاً

نرمين م تمت باقي كلامهم و طلعت فوق من غير ينتبهو
دخلت الغرفه و قفلت على نفسها الباب..
كانت بتفكر في ميه حاجه في نفس الوقت..

في المستشفي :

روان مشت تشوف حاله بيكو و قالو ليها انو حالتو خطيره شديد بس لسه م اتوفى

نزلت و قعدت في الكافتيريا تحت، في اللحظه دي جا أحمد و شافها و طوالي قعد قصادها..

أحمد:كويسه انتى؟ ؟
روان:تعب عادي
أحمد:حصل شنو في موضوع راجل امك
روان:تتوقع شنو؟؟ ياها بلدنا.. مستحيل تقدر تاخذ حقك من زول بالساهل
أحمد:بس في النهايه ح تاخذي م تشيلي هم
روان:انا م شايله هم.. خلاص بقيت م بفكر في حاجه و لا بشيل هم حاجه.. اليحصل يحصل بعد ده
أحمد:...

"_أنك تنتظر
تنتظر تعرف مصير كل الناس ديل شنو
نرمين كانت في غرفته ما عارفه كيف ممكن تحارب براها و منتظره الخطوه البعدها
سمر كانت منتظره تعرف مصيرها بعد الجريمه ال عملتها
روان منتظره تعرف شنو ممكن يحصل تاني
حماده فقد كل الأحاسيس بس برضو منتظر، في غرفتو ديك قاعد وحيد منتظر بس انسان امكن يدخل عليهُ و يمسك يدو..
حتى بيكو منتظر
منتظر فرصه تانيه من الحياه.. "

عده أسبوع ..
أسبوع كامل من الأنتظار..
أسبوع كامل من الأستفهام الكبير..
استفهام في حياة كل واحد فيهم..

سمر دخلت السجن و ابوها و امهاا جو من دبي..
بيكو في المستشفي لسه و حالتو خطيره شديد و الأمن رفض انو ابوهو يطلعو بره عشان يعالجوهو..
نرمين اتكلمت مع عمها و وافقت انها تعيش معاهو بس بعد القضيه تنتهي
روان كانت قاعده مع نرمين طول فتره الأسبوع دي عشان ما عندها مكان تمشي ليهو..

بلسان يوسف :

صحيت من النوم و انا نشيط شديد..
الليله ح تكون أول محاكمه في قضيه رامي
صح بيكو في المستشفي بس لازم المحكمه تستمر في شغلها
مبسوط لاني قدرتا اجيب معلومات كتيره عن مجموعه ناصر
صح هو اتوفى بس لسه شغلو مستمر و لازم يقيف..
لبستا بنطلون اسود و قميص اسود و اتحركتا..

لمن وصلتا هناك لقيت نرمين و روان قاعدين
سلمتا عليهم من بعيد و بعدها بدت المحاكمه و دخلنا جوه..

بلسان نرمين :

لمن كانو بتكلمو و لمن ابو حماده قال كل الحصل وقتها حسيت انو قلبي وجعني شديد..
كيف قدرو يعملو كده في رامي؟؟
كنت قاعده و مستنيه الناس دي كلها تسكت بس..
لانو كان مع كل حرف يتقال بحس انو في زول ضاغط على صدري و قلبي ح يتوقف..
لمن ابو روان طلع و قال انو كان أول معاي بسبب تهديداتو لأمي زعلتا شديد

كنت عايزاهو يسكت و م عايزه الناس تسمع الكلام ده عن امي..
لمن القاضي طلب شهادتي انا وقتها كنت برجف..
م كنت عايزه اتذكر امي بالطريقه دي
و م كنت عايزه اتكلم عنها و الناس تسمع ده كلو عنها..
في نص كلامي قعدتا ابكي
وقتها يوسف قال للقاضي انو امي أتوفت ليها كم يوم
و القاضي طلب اني اقعد و م اكمل شهادتي..

بلسان روان :

بعد نرمين قعدت مسكتا يدها و قلتا ليها ح ندعي لأمك و ان شاء الله ربنا ح يغفر ليها ده كلو..
الصراحه اني كنت حاسه ب قرف اتجاهه ابوي..
كيف قدر يعمل كده مع انسانه؟؟
كيف قدر يهدد وحده هو عارف انها أم صحبتي..
لمن طلبو شهادتي وقفتا و قلتا كل حاجه شفتها..
منظر رامي و هو واقف و بيكو برميهو كان كل حاجه واضحه قدامي
حسيت كأنو كل حاجه حصلت امبارح..
كنت زعلانه بس حسيت انو رامي حسي مرتاح
و أنو حقو م ح يضيع..

بلسان سمر :

دخلوني المحاكمه بعد وقت متأخر..
كانو كلهم جوه..
عاينتا ل نرمين و روان و كان نفسي اكون قاعده معاهم و ماسكه يدهم
عاينتا ل امي و ابوي و حسيتهم زعلانين شديد
كان نفسي اعتذر ليهم عن العملتو و اقول ليهم انو م كان بإرادتي..
لمن القاضي سألني ليه عملتا كده كنت حاسه انو سؤال غبي..
كيف يقول لي ليه عملتي كده ؟؟
اكيد ح اكون عملتا كده عشان حبيبي.. عشان الإنسان ال كنت راسمه معاهو كل حياتي
قلتا ليهُ اني م ندمانه على العملتو و انو يستاهل
صوت امي و هيا بتصرخ و بتقول لي م تقولي كده م قادر يطلع من بالي
بس دي الحقيقه و م كنت بقدر اكذب
م كنت بقدر اقول اني ندمانه مثلاً لانو الزمن لو رجع ح اعمل اكتر من كده..
لمن سألوني كنت شايله السكين كيف من غير زول ينتبهه شرحتا ليهم اني كنت مدخلاها في كم العبايه و م كانت واضحه ابدا
القاضي حكم علي بالسجن لمدة ثمنيه سنين وقتها امي بقت جايطه و ابوي بصرخ و ابو بيكو بقول لا تستاهل اكتر من كده..
م كنت قادره اركز في حاجه غير منظر نرمين و روان و هما بعاينو لي بنظره كلها حنيه
حسيتهم حاضنني رغم المسافه ال بينا..
الصراحه م فرق معاي الحُكم و حسيتو م كتير شديد
كنت حاسه انو رامي زعلان مني و فعلاً لمحتو واقف وسط الناس و مكشر بس انا ابتسمتا ليهُ و قلتا ليهُ " ده كلو عشانك .."

بلسان يوسف :

لمن حكمو على سمر زعلتا شديد و دي كانت أول مره ازعل على زول في شغلي..
سمر كانت طيبه شدديد من جوه و انا متأكد انها م تستاهل البحصل فيها..
كان نفسي اساعدها بس كلامها مع القاضي كان هو البورطها اكتر..
بعد حكم على سمر جبنا كل الاولاد ال شغالين مع ناصر و ال كانو شغالين مع بيكو و رامي و كلهم اتحكم عليهم بالسجن و طبعا البضاعه كلها أخذه الأمن..

في النهايه جا حكم بيكو..

بلسان نرمين :

كان نفسي بيكو يكون كويس و يجي يشوف حكمو و يتعاقب على العملو بس هو حسي بين الحياه و الموت و م عارف حاجه من البحصل..
المحكمه حكمت على بيكو ب السجن المؤبد
ابو بيكو كان جايط طوالي طلعو بره..
الصراحه الحُكم خلاني ارتاح شديد..
حسيت انو حق رامي أخيراً رجع، و اتحكم على ابو روان ب اربعه سنين على التهديد ال كان بهددو لي و للأسف لبنات كتير تاني و على مساعدتو في تهريب المخدرات و اتحكم على ابو حماده بالسجن لمده ٢٠ سنه بسبب قتلو ل ناصر و إخفاء الأدله..

اليوم ده أنتهت الفاصله و أتختت نقطه كبيره على بعض الأسئله..

طلعو كلهم من المحكمه و فيهم الزعلان و فيهم ال مبسوط
بس كلهم كانو عارفين انو اليوم ده اتغيرت حياتهم امكن للأسوء أو امكن للأحسن..

يوسف:نرمين
نرمين:ها
يوسف:فاضية بعدين؟؟
نرمين:...

" نحن الآن نقف على وشك أن نقع في الحُب
أتعطيني قلبك مقابل وعد مني بالبقاء في حُبك للأبد؟ .."

*"Nermeen_Th❤️*
--------------------------------------
---------------------
*☆يتبــــــــــــــــــــــــــــــــــــــــــــع☆☆*

رويات شهد عبدالله🤍🤍:
*#الساعه_أربعه_ونص《18》*
*#بقلم_نرمين_طه*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
"_ من البدايه.."

بلسان نرمين :

صحيت من النوم مخلوعه، كانت الدنيا بالنسبه لي واقفه تماماً اللحظه ديك
م قدرتا افرق بين الخيال و الحلم و الواقع للحظه
فضلتا بحاول استوعب مسافه الحاصل شنو
قلبي بضرب سريع
و حاسه يدي بترجف
قعدتا في السرير و بحاول افهم احنا يوم كم
كل الحصل داك حقيقي ؟؟
و لا كان حلم بجد؟!..
م كنت قادره افهم و لا قادره حتى امسك تلفوني
بس فجأه تلفوني ضرب
كنت خايفه اشوف الاسم

مسكتا تلفوني و لقيت مكتوب " حبيبنا كلنا❣️.."
في اللحظه دي م عرفتا ارد و لا اقرص نفسي و لا اعمل شنو؟؟

اتذكرتا لمن سمر شاكلتنا عشان انا و روان سجلنا رامي حبيبنا كلنا
حسي رامي بضرب لي؟؟

فتحتا الخط و دموعي بقت تنزل بصوره خياليه

رامي:وين انتى ياخ ضربتا ليك ميه مره.. اصلو شنو نايمه من امبارح المغرب.. وارثه انتى؟!.. ي بت.. الوووووو .. نرمين..

نرمين:معاك

رامي:شكلك لسه نايمه.. عايني نص ساعه و ح اكون في بيتكم.. الليله سمر جايه من السفر ياخ م عايز اتأخر على المطار بسببك.. م تقعدي لي ساعه بتلبسي..

رامي قال كلامو ده و قفل الخط، فضلتا ماسكه التلفون و بعاين لمده المكالمه كانت دقيقه و خمسه ثواني ..
طلعتا من المكالمات و دخلتا الواتس لقيتهم بتكلمو عادي في القروب..
للحظه حسيت اني جنيت
استغفرتا ربنا و قمتا من مكاني و دخلتا الحمام قبل اغسل وشي طلعتا سريع و نزلتا تحت لقيت امي قاعده في المطبخ طوالي دخلتا و حضنتها و بقيت ببكي..

أمى اتخلعت و بقت تقول لي ي بت بسم الله في شنو و انا بس ببكي..

رانيا:ي بت.. مالك.. حلمتي ب ابوكي صح؟؟
نرمين:حلمتا بحلم كعب شديد ي امي 💔ي امي انا بحبك شديد و الله.. م تخليني عليك الله💔

أمى م كانت قادره تفهم حاجه بقت بس حاضناني و ساكته بعد مسافه انا مسحتا دموعي و عاينتا ليها

نرمين:ي امي الراجل داك بهددك؟؟
رانيا:راجل منو ي بت
نرمين:ال ابوي شافك بترسلي ليهو صورك قبل يتوفي
رانيا:لالا ي بت.. من يوم حظرتو تاني م ضرب لي

امي قالت كلامها ده و نزلت راسها و بقت تعاين للأرض.. رفعتا ليها راسها فوق بيدي

نرمين:أنا عارفه انو العملتيهو غلط، كنت زعلانه منك شديد.. بس كلنا ي امي بنغلط و المهم حسي انك انتى حاسه بالندم
أنا م ح اقول ليك م تعملي كده عشاني او عشانك.. بس ي امي عشان ربنا.. عشان تقدري تقابليهو.. ال فات داك كلو ننساهو.. من الليله يوم جديد.. طيب؟؟

امي حضنتني تاني و بقت تبكي.. مسحتا ليها دموعها و طلعتا فوق..

لبستا لي اسكيرت اسود و بلوزه سوده و معاها طرحه مشجره و طلعتا كمامه لونها اسود
كنت بعاين لنفسي ف المرايه و بتذكر كل تفاصيل الحِلم
كل م اتذكر حاجه قلبي بوجعني شديد..

أثناء م انا قاعده سمعتا صوت ضحكه رامي
م قدرتا امسك دموعي و قعدتا ابكي
مسحتها سريع و نزلتا تحت لقيتو قاعد مع امي و بشرب في الشاي و بضحك
كان لابس تيشيرت لونو ابيض و بنطلون جينز و ماسك النظاره الشمسيه في يدو..

رامي:بتك دي بتحب تأخرني عشان كده م بحب اسوقها معاي حته
رانيا:طول بالك البنات كلهم كده😂
رامي:اصلا البنات ديل هما ال جايبين لينا وجع القلب

أمى شافتني نازله من السلم قالت ليهو ياها جات م تنقنق خلاص
رامي عاين لى و قعد يضحك

رامي:يعني ده كلو عشان في النهايه تجي لابسه لي اسود في اسود و كمان خاته لي الكمامه دي

كنت ساكته و م رديت عليهو
قام على حيلو و خته يدو في جبهتي

رامي:ي بت انتى عيانه و لا شنو؟!.. م قاعده تتكلمي مالك
نرمين:رامي💔
رامي:مالك؟؟
نرمين:انت كويس؟؟
رامي:انتى شايفه شنو؟!..
رانيا:نرمين دي من الصباح م طبيعيه م عارفاها حلمت بي شنو..
نرمين:رامي اشتقتا ليك شديد💔

قعدتا ابكي زي الشفع و هو مخلوع بعاين لي و امي برضو مستغربه

رامي:نرمين م تبكي خلاص بسم الله في شنو؟؟ انا كويس و قدامك بعدين شوق شنو احنا امبارح سوا
نرمين:حمد لله م حاصل ليك شى💔
رامي:م حاصل لي شى.. غايتو الحلم الحلمتي ده شكلو قتلني لكن م تشتغلي بيهو لسه عمري طويل ي الحلوه حقتنا.. م بسيبكم حسي م تخافي

رامي طلع مناديل من جيبو و اداني ليها

رامي:امسحى دموعك دي و ارح نجيب صحبتك انا زاتي الشوق غلبني

أنا و امي قعدنا نضحك فيهو و طلعتا معاهو..

ركبنا العربيه و اتحركنا على المطار..

نرمين:الباقين جاين ب شنو
رامي:بيكو صلح العربيه.. اخذ حماده و روان و اتحركو قبلنا
نرمين:رامي تتذكر الاشاعه ال كانت طالعه عنك انت و بيكو
رامي:ياتا؟؟
نرمين:انكم بتبيعو مخدرات

رامي ملامح وشو اتغيرت

رامي:مالا؟؟
نرمين:وقتها انتو نكرتو الموضوع، أنا عارفه انو م وقتو بس انت عارف انو المخدرات و الحاجات دي م شبهكم.. انتو كبار و واعين و عارفين نفسكم بتعملو في شنو
القروش البتدخل من الشغل ده بتكون على حساب شباب بضيعو
بتكون على حساب اهل روحهم بتتحرق على أولادهم
و بتكون على حساب دينكم و مبادئكم
يعني كلها قروش م فيها بركه اصلا و قصاد كل قرش بتكسبو انت كمان بتكسب غضب ربنا..

رامي وقف العربيه على طرف الشارع و عاين لي

رامي:انتى سمعتي تاني حاجه و لا شنو؟؟
نرمين:لا بس كنت عايزه اقول الكلام ده عشان بعدين م اندم انى م قلتو، و عشان احنا اخوان و انت عارف قدر شنو انا بحبك و بخاف عليك.. انت عندك ابوك ال محتاج ليك و عندك سمر ال راسمه حياتها معاك.. م تضيع نفسك لانو كلهم بضيعو معاك.

رامي اخذ نفس عميق و بعدها رجع و عدل قعدتو و اتحرك على المطار ..

كنت الطريق كلو بفكر لو الحلم ده كان حقيقي
أو امكن هو فعلاً حقيقي
ماف زول فينا بقدر ينكر انو بيكو بغير مرات من رامي
و لا في زول فينا بقدر ينكر حركات روان الغريبه و بذات لمن تشوف راجل امها
حتى حماده.. مرات بنحسو منعزل عننا و بحب يكون براهو و كانو دافن جواهو سر كبير..

لمن وصلنا المطار كانو ناس روان وصلو قبلنا
اول م روان شافتني جات و حضنتني
كانت لابسه عبايه كالعاده

اول م حضنتني مسكتها قوي و حسيت اني م عايزاها تفكني أبداً..

روان:انتى كويسه؟؟
نرمين:كويسه
رامي:م كويسه و لا شى من قبيل بتقول في كلام م مفهوم
حماده:مالك

كنت واقفه في نصهم و بعاين ليهم واحد واحد..
كلهم كانو مستغربين في حركاتي بس انا ما كنت واعيه لنفسي و لا عارفه مفروض اعمل شنو..
كان احساس غريب شديد..

بيكو:اها حركات الافلام دي م بتنفع، عايزه تموتي انتى و لا شنو؟؟
نرمين:لا بس حاسه اني طولتا م شفتكم
حماده:نرمين امبارح كنا سوا.. بسم الله
رامي:قلتا ليكم م طبيعيه م صدقتوني
روان:حاسه ب شنو؟؟
نرمين:خلاص خلاص سمر م وصلت لسه؟؟

قعدنا كلنا و بقينا مستنين سمر و رامي كان واقف و بمشي و بجي قصادنا بس..

اول م سمر ظهرت كلنا بقينا بنصرخ
اول وحده صرخت روان و جرت عليها و حضنتها
سمر كانت لابسه طرحه كبديه و كلنا عارفين انها لابساها عشان رامي بحب اللون ده فيها شديد 😂❤️❤️

بيكو كان ماسك التلفون و بصور و بقول " ها قد جاء القمر، ها قد جئت جوليت حبيبة روميو.. اخيرا روميو ح يرجع سعيد.."

لمن روان سلمت عليها و خلصت انا مسكتها و حضنتها قوي و م قدرتا امسك دموعي كالعاده..
قلتا ليها اني اشتقتا ليها شديد و اني مبسوطه انو شفتها و هيا مبسوطه كده و كويسه..
سمر كانت مستغربه من كلامي بس م قدرت تقول لي في شنو او بقول كده ليه

رامي كان بعاين ليها و كأنو كان منتظر اللحظه دي من سنين
وقتها عيونو كانت فاضحاهو بصوره خياليه

مسك يدها و سلم عليها عادي، بيكو بقا بصفر و بشغلا ليهم..

رامي:بقيتي حلوه ي بت
سمر:من يومي حلوه ع فكره
رامي:اشتقتا ليكي شديد و الله💔

سمر ابتسمت ليهو و قالت " الشوق بقوى الحُب على فكره.."

"_صح الشوق بقوى الحُب
الشوق دايماً بقوى العلاقات ال حقيقيه
أنك تنتظر متين عيونك تشبع و تشوف حبيبك
أنك تنتظر متين تسمع صوتو و هو جمبك
الشوق على قدر ما هو حار
بس حلو شديد
اصلا الحُب لو ما فيهُ شوق عمرو م كان حُب.."

بيكو و حماده سلمو على سمر و بقو بصفقو و يغنو اغاني غريبه 🤣
ناس الأمن جو و طردونا من المكان و سبو لينا و احنا مبسوطين
اتقسمنا في العربات و اتحركنا على مطعمنا❣️

عندنا مطعم دايماً بنقعد فيهُ و اول م نوصل كل ناس المحل بسلمو علينا بحب
قعدنا كالعاده وره شديد عشان ح نعمل ازعاج
اول م قعدنا كنت بعاين ل روان و هيا بتضحك مع حماده

كان واضح في وشها انها م كويسه
بس بتحاول تكون كويسه..
كان واضح كمان انو حماده بحاول يضحك فيها، كالعاده هو المنقذ ال دايم ل روان..

أثناء ما قاعدين سمر اخذت نفس عميق و قالت " تقريباً حياتي هناك كانت م حياه عشان انتو م فيها .."

وقتها بيكو قعد يضحك و قال ليها قصدك عشان رامي ماف
كالعاده بيكو مستحيل يقعد من غير يتريق و يتنمر علينا كلنا و يطول لسانو
كان لابس بلوفر لونو رمادي و كان حلو شديد فيهُ

سمر عاينت لي بنظره حنينه شديد و قالت لي مالك ي نرمين!!

نرمين:عاينو.. كلنا أصحاب
بينا ايام حلوه و طبعا مشاكل و حاجات كتيره خاصه بينا
بينا صور كتيره و اغاني بتخصنا، بينا أماكن بتجمعنا و طفوله وهميه زينا
بس كلنا اكيد عندنا أسرار
يعني خلونا نصارح بعض بكل حاجه.. مثلاً في زول زعلان من زول هنا؟؟

كلهم كانو مستغربين و بعاينو لي

رامي:انتى ليه بتقولي كده حسي؟!..
نرمين:حاسه انو لازم اقول.. م معروف بكره ممكن يحصل شنو.. خلونا نقول بس

بلسان بيكو :

نرمين كانت تصرفاته غريبه شديد بس كلامها هبشني شديد
لمن كانت بتتكلم عننا كأصحاب كنت بعاين ل رامي
مرات بحس اني م بحبو بس دايماً خوتنا بتغطى على الشعور الجواي ده
رامي كان اخوي قبل يكون صحبي..
بينا صور و اغاني و أماكن على قول نرمين
أمكن مرات بفكر اني عايز اضرو عشان م ينجح بس بعدها بحس اني لازم اشجعو عشان ينجح.. لازم اكون معاهو و جمبو

كنت بعاين ليهُ و هو بضحك مع سمر و على قدر كل ال تناقضات ال جواي بس كان دايما احساس اني عايز ليهو الخير بفوز
م كان ممكن تهون علي الصور و لا كل الذكريات ال بينا في يوم.

بلسان روان :

لمن حضنتني نرمين في المطار حسيتها بتقول لي انا جمبك م تخافي
الصراحه كنت محتاجه للحضن ده
و محتاجه احس انو في انسان جمبي
م كنت متشجعه احكي و لا حتى كان جواي حماس اني عايزه احارب بس و احنا ف المطعم م قدرتا اسكت و حسيت اني لازم اتكلم حسي قبل اغير رأي..

روان:عايزه اقول ليكم حاجه..

وقتها عاينتا ل رامي لقيتو بعاين لي بحنيه.. و كأنو بشجعني عشان اتكلم و اقول..

روان:كلكم عارفين راجل امي.. الصراحه.. أنا الفتره ال جايه ح ادخل في أصعب فتره و عايزه منكم تقيفو معاي
هو.. هو بتحرش بي..

حسيت كلهم كانو ساكتين و بعاينو لي و نفسهم يجو يحضنوني بس م عايزني احس بالضعف بالعكس عايزني اكون قويه..

روان:أنا قررتا احارب.. كنت عايشه في خوف طول الفتره ال فاتت و حاسه انو جا الوقت عشان اتكلم و عشان اثور ضد انسان م احترم وجودي و لا حتى مشاعري و لا حتى رفضي ليهُ
أنا صح خايفه بس عارفه انكم ح تكونو جمبي و انو حقي ح يرجع لي

سمر جات و قعدت جمبي و مسكت يدي و في نفس الوقت جات نرمين جمبي بالجهه التانيه و حضنتني قوي..

حماده:احنا جمبك.. م ح نسألك من التفاصيل بس احنا جمبك

بيكو:طول م احنا جمبك ما ح يعمل ليكي حاجه تانيه.. احنا اخوانك على فكره

نرمين:اسفه

روان:ليه؟ ؟

نرمين:عشان م قدرنا نعرف من اول.. عشان م جينا قلنا ليك اتكلمي احنا جمبك.. كان مفروض نلاحظ

روان:م فات شى.. انتو حسي هِنا..💔

رامي ابتسم و كان مبسوط شديد مني..
هو الوحيد ال كان ملاحظ و عارف كل حاجه
وقتها حسيت انو كان فخور بي
و فخور اني أخيراً قررتا أتكلم..

كان في صمت عجيب في المكان وقتها بس كسر الصمت صوت رامي

بلسان رامي :

كنت عارف انو روان م كويسه و خوفها من كل الاولاد و رجفة يدها و احساسها بالضيق و هيا راجعه البيت كان بوضح لي كل حاجه..

كنت عايز منها تتكلم براها و جات اللحظه دي
عشان اكسر الصمت ده كلو قررتا افرحهم شويه..

رامي:انا كمان عايز اقول حاجه..

وقتها عاينتا ل سمر و هيا كانت بتعاين لى بتركيز

رامي:انا حاسي اني جاهز اصل بيتكم ي سمر.. و بما انو ابوك ح يجي بعد اسبوع فأنا عايز اقعد معاهو و اطلب يدك رسمي

بعد قلتا كده لقيت روان و نرمين فجأه بزغردو و بيكو و حماده بقو بقولو ابشر ابشر ي عريس 😂😂❣️❣️

"_حُزن واحد فينا بساوي حُزن الكل
فرح واحد فينا يساوي فرحنا كلنا.."

سمر م كانت مصدقه و بقت بتقول لي انت جادي!! أحلف قول و الله!!

رامي:م خلاص تعبتا و انتى بعيده خليني اجيبك جمبي للأبد

كلهم بقو بضحكو و م مصدقين

سمر:يعني احنا.. ح نبقا لبعض رسمي؟!..

رامي:اي يعني انا ليك و انتى لي قدام الدنيا دي كلها❤️

سمر:رامي💔

رامي:بطلي دراما خلاص😂

بيكو طلع تلفونو و بقا بصور في وش سمر لانو كان وشها كيوت شديد وقتها..

بيكو:أنا ح أوثق كل اللحظات دي عشان اوريها عيالكم بعدين..

كلنا بقينا نضحك و نخطط للعرس و ح نعمل شنو

بيكو جاتو مكالمه و طلع بره.. طلعتا وراهو و استنيتو خلص..

رامي:ده منو ؟؟

بيكو:شغل

رامي:بيكو مش وقفتا الشغل داك صح؟؟

بيكو:وقفتو

رامي:م ح نرجع تاني

بيكو ابتسم لي و بعدها قال " ابدا تاني م ح نمشي في طريق غلط.."

رامي:شكراً
بيكو:على شنو؟
رامي:لأننا قدرنا نطلع من الطريق ده سوا من غير نخسر بعض

بيكو ابتسم لي و حضني

بيكو:بين الإخوان ماف شكر..

نرمين أثناء م هيا قاعده جوه تلفونها ضرب..

نرمين:اي
يوسف:اشتقتا ليكِ
نرمين:..

"_الأصحاب محطات خراب
أو
محطات أمان .." 🖤

*"Nermeen_Th❤️*
--------------------------------------
---------------------
*☆يتبــــــــــــــــــــــــــــــــــــــــــــع☆☆*

رويات شهد عبدالله🤍🤍:
*#الساعه_أربعه_ونص《19》*
*#الاخيـــــــــــــــــــــــــــــرة*
*#بقلم_نرمين_طه*​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏
​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​ ​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​ ‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​ ​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏​​‏ ​​‏​​‏​​‏​​‏​​‏​​‏​​‏​​‏​​‏​​‏​‏​​‏​​‏​​‏​​‏​​
"_أغلبية الناس ال شافتهم نرمين في الحلم هما ناس بتعرفهم مسبقاً في الحياة زي يوسف هو اصلا محقق و شغال في القسم و نرمين بتعرفو من زمان و حصلت بيناتهم قصه حُب و هو حبيبها في الحقيقة..
يعني هيا حلمت بيهُ لانو مسبقاً هو في حياتها .."

يوسف:أشتقتا ليكِ
نرمين:يوسف
يوسف:مالك؟؟ و م داخله من الصباح ليه
نرمين:مش امبارح قلتا ليك سمر جايه الليله و كده.. كنت مشغوله معاها شويه
يوسف:و صوتك مالو كده؟!..
نرمين:حلمتا حلم غريب بس.. لخبط لي يومي
يوسف:اها.. هو حلم في النهايه يعني م حقيقه فما تشيلي هِم

نرمين سكتت مسافه بعدها قالت

نرمين:عملتا شنو في موضوع ابوك؟؟ ح تمشي تتكلم معاهو صح
يوسف:أنا أصلا ضربتا ليكِ لأني حالياً واقف قدام بيتو و م قادر ادخل.. حاسي أني عايز أرجع
نرمين:م ترجع ي يوسف..م معروف يحصل شنو و انت براك قلتا انو هو تعبان شديد.. صح ال عملو زمان كلو غلط و صح هو كسر بخاطرك انت و اخوك و خلاكم تحاربو براكم بس ده أبوك و حسي محتاج ليك
الموضوع صعب شديد بس لازم تكون انت احسن منو و تدخل من الباب داك و تعمل كل ال عليك عشان ربنا و عشان تريح ضميرك.. كل الناس بستاهلو فرصه تانيه لانو كلنا بشر في النهاية، ممكن نغلط و نرتكب حاجات م بتشبهنا لكن ربنا بسامح ليه احنا البشر م نسامح بعض؟؟!

يوسف كان سامع كلامها و ساكت..

نرمين:م ترجع ي يوسف زي كل مره.. ادخل المره دي.. شوف اخواتك..

بلسان يوسف :

سمعتا كلام نرمين كلو و قفلتا منها و انا قاعد في عربيتي و شايف بيت ابوي قصادي
كان قلبي بضرب سريع و حاسي بخوف م طبيعي
اول مره اشوف ابوى بعد كل السنين دي كلها
مع انو أتخلى عني بس م قادر اكون سئ و أتخلى عنو برضو!!

نزلتا و دقيت الباب و الثواني ال أنا وقفتا فيها منتظر زول يفتح لي كانت ثواني تقيله شديد على قلبي..

بعد مسافه فتحت لي بت امكن عمرها ١٧ او ١٨ سنه...
اول م شافتني وقفت وره الباب..

_اي منو؟؟

يوسف:عايز اشوف ابوكي..

_طيب دقيقه..

البت دخلت جوه و بعد مسافه جاتني اختها الكبيره كانت لابسه توب و عيونها وارمه من البكا..
اول م جات م سلمت و لا حتى ابتسمت لي

_عاين انت لو عايز من ابوي قروش اصبر شويه.. هو حسي تعبان.. انتو مالكم م بتحسو؟؟ ياخ قروشكم ح ترجع ليكم هو حسي بحارب الموت و كل شويه يجي زول يدق الباب بدل يدعي ليهو يقول عايز قروشي.. أنا برجع ليك قروشك في أقرب فرصه بس عليك الله م تزيدها علينا حسي..

كانت بتتكلم سريع و منفعله، ابتسمتا ليها و هيا لمن شافتني ببتسم استغربت

يوسف:و الله الزول غالبو زاتو ال يقولو.. أنا م جاي عشان اقول عايز قروش.. جاي اشوف ابوي

لمن قلتا كده البت اتخلعت و بقت تعاين لي مصدومه

_أنت يوسف ؟؟

الصراحه م اتوقعتا يكون ابوي حكه ليهم عني بس توقعاتي كانت غلط
كنت بفكر ح يقول ل بناتو كيف انو اتخلا عن اولادو كده
بس هو قال!!..

البت اول م عرفتني يوسف قعدت تبكي..

_حمد لله انك جيت.. حمد لله انك هِنا.. كان عايز يشوفك قبل يموت💔ادخل.. ادخل ليهُ..

مشت قدامي و انا ماشي وراها لمن دخلنا الصالون كان صغير و فيهُ سريرين و كرسي..

كان في واحد كبير في العمر واضح انو الشيب غطا شعرو
يدو متجعده شديد و لابس عراقي و راقد و متغطي كلو بالبطانية الا وشو و رجولو تحت..

لمن وقفتا قصادو كان هو مغمض عيونو بس فتح عيونو بسبب صوت بتو و هيا بتبكي في الغرفه..

عاين لى و كان مخلوع في شنو و حاصل شنو..

حسين:ي بتي.. في شنو؟؟ بتبكي مالك..

البت م قدرت ترد و طلعت بره و صوت بكاها بقا عالي اكتر وقتها أخواتها و امها جو يفهمو الحاصل و بقو واقفين جمبه الباب بره..

لمن شفته حالتو دي م عرفتا اعمل شنو
فضلتا واقف بس في مكاني و بعاين ليهُ
هو كان بعاين لي و مستنى مني اعمل حاجه او اقول حاجه

كنت عايزو يعرفني براهو بس مستحيل يقدر يعرف

يوسف:أنا.. أنا..

م كنت قادر اقول انا ولدك، ختيت يدي في وشي و بقيت بحاول امسك دموعي..

سمعتا صوتو وقتها و هو بقول

حسين:يوسف؟؟ انت يوسف؟؟

وقتها قعدتا ابكي من غير احس..
كنت فاكر اني قوي و انو اللحظه دي م ح تأثر فيني للدرجه دي بس أثرت للأسف

لمن قعدتا ابكي سمعتا صوتو و هو ببكي برضو
فجأه البيت كلو كان ببكي

م قدرتا امسك نفسي و مشيت عليهُ حضنتو و هو بقا ماسكني قوي و ببكي و بتشهق

حسين:اعفى لي.. اعفى لي.. أنا و الله فتشتكم م لقيتكم.. أنا و الله م كنت بنوم و لا باكل و لا بشرب و لا حتى عايش.. و الله خفته اموت قبل اشوفكم.. خفته اموت و انا م عارف شكلكم و لا عارف حصل فيكم شنو.. و الله قلبي كان بولع نار و بدعي ربنا بس قبل اموت يحقق لي امنيتي و المسك و احضنك و اشم ريحتك💔💔

"_يوسف كان بسمع في كلامو ده و قلبو بوجعو..
كان شايل زعل الدنيا كلو في قلبو
بس م قادر يقول انو م ح يغفر ليهُ..

أمكن ساعه كامله هما بس حاضنين بعض..
ما كانت الكلمات وقتها ممكن تعمل حاجه
كان الحُضن كافى جداً عشان يروى شوق سنين كتيره بينهم..

ما كان وقت عتاب و لا زعل
كان وقت حُضن
يحسسنا انو الدنيا ممكن ترجع كويسه
يحسسنا انو الغلطات ممكن تغتفر
و أننا بشر
ممكن نسامح. "

قعدتا جمبه ابوي و انا م عارف ممكن اقول شنو..
و هو بس بعاين لي و ببكي
سلمتا على البنات كانو اربعه و سلمتا على امهم مره كبيره و واضح الطيبه في وشو..

كان الجو متوتر شديد و حزين في نفس الوقت..

ابوي م كان قادر يقوم بس م كان قادر يرقد كمان
قعد جمبي و أتكه على كتفي الشمال..

حسين:وين ياسر؟؟ اخوك وين؟؟

يوسف:م كلمتو اني جاي اشوفك.. م عارف ردة فعلو كيف.. بس ح يجيك لمن يكون مستعد انو يقابلك

حسين:أنا ما اتوقعتا يجي اليوم التقعد فيهُ جمبي كده.. م اتوقعتا اشوفك قبل اموت
أنا ما قادر اقول ليك اعفى لي لانو و الله كتير علي العفو
بس عايزك تعرف اني ندمتا و الله
و عارف غلطي كبير في حقكم بس و الله و ربنا عالم اني كنت بتعذب كل يوم
كنت بقول ي ربي بعملو في شنو و حصل فيهم شنو
و الله انا خفتا عليكم من العذاب ال ح تتعذبو معاي
م اتوقعتا عمكم يرميكم كده

كان نفسي اقول ليهُ كلام كتير، انو ما كان عندنا مشكله نتعذب معاهو و لا نتعذب برانا
ما كان عندنا مشكله نتعب و ننوم في الشارع بس و هو معانا..

في كلام كتير بس ما كان ح يغير حاجه..
اوقات ندم الإنسان بخليك تنسى الوجع ال اتسبب بيهُ ليك..

و انا عفيت ليهُ..
ما عشان هو ابوي و ده المفروض
بس عشان هو إنسان و وصل لنقطه بقا عارف غلطو و عايز يموت و قلبو مرتاح ..
ماف انسان يستاهل يموت و هو حاسي بالذنب ده كلو!!..

بلسان نرمين :

لمن قفلتا من يوسف كنت قاعده و سرحانه..
جات روان جمبي و قالت لي خلاص اطلعي من الجو ده.. كلو مجرد حلم...

وقتها قعدتا افكر و استنتجتا انو عمرو م كان حلم عادي..
للأسف هو حقيقه كبيره بس امكن انا صدقتها متأخر...

بيكو و رامي جو داخلين و كانو بضحكو بصوت عالي و بتعاورو..
كنت بعاين ليهم و بحمد ربنا ألف مره اني قاعده بشوفهم كده..

سمر قالت تعبانه و عايزه ترجع تنوم و فعلاً طلعنا من المطعم و رامي نزلنا احنا البنات بيتنا..

سمر كانت ح تقعد معاي لمن ابوها يجي و تمشي تقعد في بيت عمهم..
روان قررت تبيت معانا و تعلن الحرب على امها و راجل الأمها ال اخذو كل سعادتها من يدها..

حماده رجع البيت و دخل قعد في غرفتو..

بلسان حماده :

كنت قاعد و بفكر في حاجات كتيره.. بفكر في حياتي ال امكن هيا بائسه..
بفكر في كل الظلم الأتعرضتا ليهُ و كل الحاجات السيئه ال انا بعيشها..

سمعتا صوت الباب بدق
استغربتا لانو الوقت اتأخر و ابوي اصلا بره البلد لانو عندو شغل..
نزلتا فتحتا الباب لقيتهم بيكو و رامي..

رامي:جينا نتكلم معاك في موضوع مهم شديد شديد..

بيكوو و رامي دخلو و انا لسه م فاهم حاجه..
طلعو الغرفه فوق و قعدو في الكنبه بعاينو لي..

حماده:في شنو ي شباب بسم الله؟؟ عملتو حاجه المره دي برضو؟؟ مصيبه صح!!

بيكو:لا ال مره دي م جاين عشانا.. احنا جاين عشانك

حماده:في شنو م فاهم؟؟

رامي:كنا بنحاول نخليك على راحتك و م نضغط عليك بس كلنا ملاحظين انك م كويس.. احنا لمن قررنا نكون اخوان قررنا نقطع الطريق ده سوا.. نقطعو بكل الحاجات الحلوه ال فيهُ و كل الحاجات ال سيئه ال فيهُ..
قررنا نقيف مع بعض م نتجاهل تعب بعض..

بيكو:احنا عارفين انو المشاكل العائليه صعب ال زول يتكلم فيها.. و انو في حاجات م بنقدر نقول انها قاعده تزعلنا بس الزعل ده بكون واضح في وشنا

رامي:م ينفع نشوفك كده و نسكت.. امكن حسي تزعل مننا و تقول اننا بنخرف كلام من راسنا و امكن تطردنا من البيت و تقول لينا اسكتو بس في كل الاحوال احنا واقفين معاك ي مان و حسي لو عايز نتناقش و نفكر في حل المهم انك تبقا كويس

لمن كانو بتكلمو كلامهم ده كنت بعاين ليهم و مستغرب..
كان في شى جواي بقول لي اوعك تظهر ضعيف قدامهم بس بيكو وقتها قطع صوت تفكيري و قال " احنا كلنا ضعيفين.. كلنا وقعنا.. و انت اكتر زول كنت بتقيف مع كل واحد فينا و تساعدنا..
أنت أقوى انسان فينا.."

م اتوقعتا انو كل حاجه ح تتغير بالشكل ده
بس كلامهم وضح لي انو القوه م بتكون اني اسكت..
الحقيقه انو ال قوه اني اتكلم و ابده احل مشكلتي..

ابتسمتا ليهم و قلتا ليهم
" ها الحل شنو؟؟ "

وقتها هما ضحكو و عاينو لبعض بعدها عاينو لي

رامي:ارح ابده بدايه جديده و احنا معاك ي زول
بيكو:بيتنا مفتوح ليك.. نفتش شغل و تثبت ل ابوك انك راجل و م محتاج ليهُ

أمكن كنت من البدايه محتاج ل زول يشجعني و يديني ال قوه عشان ابده انفذ
عشان اقرر اني لازم اطلع من ال قاع ده و ابده حياه جديده خاليه من كل ال حاجات ال ممكن تكسرني تاني..

طلعتا شنطه و لميت هدومي و اتخذتا القرار ال ح يغير حياتي..

قررتا اني امشي..
أني اقيف على رجولي
و اقطع كل الحاجات ال ممكن ترجعني لنفس النقطه دي تاني..

طلعتا و مشيت قعدتا مع رامي في بيتو و بيكو قرر يبيت معانا..

اول م وصلنا لقينا ابو رامي جايب فول و طعميه و مجهز لينا العشا
قعدنا ناكل و نتونس و نتعرص في بعض..

أثناء م بضحكو و بتونسو كنت بعاين ليهم و بحمد ربنا أني عرفتا اختار أصحاب❤️🙏

عده اسبوع..
اسبوع شايل ايام حلوه شديد
طلعات و فسح و صور..

جا ابو سمر و جا ال يوم البحلمو بيهُ كلهم...

البنات كانو مع سمر في بيت عمها..
كان كبير شديد، رتبو ال صاله و جهزو ال حاجات و مع أذان المغرب جو الشباب

جا رامي و ابوهو و بيكو و حماده..

قعدو مع ابو سمر محمد و مع عمها إبراهيم..

كانو بتكلمو عادي و ابو رامي طلب يد سمر ل رامي

الصاله كان فيها شباك كبير كُنا فاتحنو و واقفين في الحوش بنسمع في الكلام كلو
لمن ابو سمر وافق سمر بقت بتبكي و روان حضنتها و نرمين كانت ماسكه التلفون و بتصور اللحظات الحلوه دي..

قبل يطلعو ال رجال يوسف رسل ل نرمين قال ليها انا في المكان ال رسلتي لي عنوانو قبيل اطلعي بره..

نرمين استغربت و لبست ليها توب و طلعت بره..
كان واقف جمبه العربيه و بتبسم..

نرمين:انت مجنون جابك شنو كمان..
يوسف:م ممكن لكن صحبتك جوه يقرو فاتحته و انتى قاعده بتعايني
نرمين:م فهمتا
يوسف:خلينا ننجز احنا زاتو ي بت
نرمين:اها ح ننجز يعني مستنيني اتقدم ليك و لا شنو؟!..

يوسف بقا بضحك بصوت عالي..

يوسف:ياخ انتى مالك لئيمه كده، خلاص اصلا انا ال ح اجي أتقدم م مشكله
نرمين:بجد؟؟
يوسف:أنا عارف انو الجوه ديل اخوانك و انو ابو سمر زي ابوكي و قدر شنو انتى بتحبيهو، م ينفع طبعا ادخل و اطلب يدك منو جوه.. لكن كلميهو لو بكره فاضي يجي بيتكم عشان اطلب يدك منو..

بلسان نرمين :

لمن قال كده طبعا بقيت م قادره أصدق و بعاين ليهُ و انا مستنيه يقول لي انا بهظر او اى شى بس كان جادي

نرمين:يعني انت.. جادي؟؟
يوسف:مش انا بحبك.. اكيد جادي
نرمين:ح تجي بكره بيتنا؟؟
يوسف:و ح اجيب ابوي معاي.. تتذكري لمن قلتا ليكِ انا م زعلان إلا انو ح يجي يوم و اطلبك من أهلك و انا م عندي زول!!
حسي ابوي في.. و ياسر معاي و عندي اخوات..
يعني ح اجي بيتكم و انا رافع راسي عشان كده م عايز اضيع زمن.. ماف سبب يخليني م اجي و اخطفك من أهلك خلاص..

قعدتا ابكي و انا م مصدقه كلامو ده كلو

يوسف:م تبكي ياخ.. يلا ادخلي جوه قبل يطلعو يشوفونا..

مسحتا دموعي و دخلتا جوه و انا حاسه اني ح اطير من الفرح..

اول م دخلتا مشيت حضنتا سمر و روان و بقيت بصرخ و صوتي مسموع جوه في البيت..

نرمين:ح يعرسني.. ح يعرسني..

كلهم بقو ببكو و بضحكو في نفس الوقت و بقينا بننطط و حرفياً اللحظه ديك كانت احلى و ارهب لحظه في حياتنا كلنا..

رامي لمن طلع و ركب العربيه رسل لي سمر " زي م وعدتك، ما ح اخليكي ." ❤️

كلمتهم كلهم انو يوسف بكره ح يجي يطلبني و انو كلهم لازم يجو و فعلاً كلهم جو..

يوسف و ياسر و أبوهم.. قعدو مع ابو سمر و الاولاد

كنت قاعده في غرفتي و ببكي و أمي كل شويه تدخل الغرفه تبكي معاي و تطلع..

سمر و روان كانو بضحكو فيني و بقولو لي خلاص انتى يوم الزفاف ح تعملي شنو طيب..

اليوم ده كان ارهب يوم في حياتي..
يوسف جا طلب يدي
و اتحقق حلمي معاهو
و رسمي احنا على وشك أننا نكون لبعض..

تاني يوم طلعنا كلنا رحله
و جو اخوات يوسف، كانو ظريفين شديد و حسيت بالفرحه في عيون يوسف و هو شايفهم حولينو
ابوهو كان بس قاعد في الكرسي و بعاين ل يوسف و ياسر كأنو م مصدق انهم قدامو
سمر و رامي كانو بس بقعدو سوا و كل شويه ابو سمر يحمر ليهم و احنا نضحك فيهُ..
بيكو و حماده كانو بعملو في الأكل و طلع حاجه سيئه شديد لكن اكلناهو برضو و بقينا نذلهم و هما يبررو انو الغلط في البهارات كيف م عارفين😂😂

عدة الشهور..
روان ابوها م ظهر أبداً في حياتها، المحكمه وقفت مع روان بعد الأدله و الآثار ال في جسمها و تعرضها للعنف من راجل امها و اتسجن سنتين..
م كانت المده كافيه بالنسبه ل روان بس انبسطت شديد لأنها نجحت في انها تتكلم و نجحت في انها تجيب حقها
امها كانت زعلانه شديد و رجعت كسلا لباقي أهلها من غير تهتم ب بتها
روان نزلت شغل و قعدت في داخليه و كملت قرايتها و طبعا كلنا كنا واقفين معاها في الفتره دي..

بلسان روان :

كنت حاسه بزعل انو امي اتخلت عني عشان انسان زيو
بس الموضوع ده خلاني اتعلم اكون قويه
اتعلم اقيف على رجولي و اتعلم ما اخاف و اتكلم دايماً

بديت بزنس و شغل اون لاين و بعدها رامي اداني رأس المال و انا بديت مشروع خاص بي و جبتا بضاعه من بره و نجحتا في أنى اقيف على رجولي و الحمد لله اثبتا لنفسي انى م فاشله أبداً

في يوم و انا داخله على الداخليه وقفني صوت وراي اتلفتا لقيتو حماده..

روان:حماده!! في شنو ؟!..
حماده:في حاجات كتيره لازم نتكلم فيها، أو حاجات كتيره لازم انا اقولها
روان:شنو
حماده:امكن م مفروض اقولها في الشارع هنا.. امكن الطريقه غلط بس المهم اني عايز اقولها
روان:ي ولد مالك
حماده:روان انا بحبك.. م من حسي.. من اول مره عرفتك فيها..
من اول مره ضحكتي و اتكلمتي معانا..
أنا عارف انو امكن م وقتو و انك امكن م حاسه بنفس ال حاجات دي كلها أتجاهي بس انا و الله م بقدر اسكت على مشاعري دي اكتر.. حاسي اني لازم اتكلم و اقول ده كلو عشان ارتاح و عشان م مهم ردك على قدر م مهم اني اعترف..
أنا بحبك.. بحبك و انتى زعلانه و انتى فرحانه و انتى بعيده مني و انتى صحبتى و قريبه و انتى لطيفه و انتى منفعله و انتى صاحيه من النوم و بتقولي كلام م مفهوم و انتى نعسانه و عايزه تمشي تنومي و انتى ناجحه و بتحاولى تقيفي على رجولك.. أنا بكل بساطه بس بحبك..

لمن حماده قال كلامو ده كلو م استغربتا لانو كان واضح لينا كلنا مشاعرو..

الصراحه كنت مستنيه متين يعترف لي عشان اقول ليهو " أنا موافقه.."

تعبتا و انا خايفه من العلاقات، امكن جا الوقت عشان أدى نفسي فرصه و عشان احاول مع انسان واضح في كل تصرفاتو حُبو لي..

بلسان حماده :

لمن قالت إنها موافقه حسيت اني ح اطير من الفرح
كنت مبسوط شديد و حاسي انو كل حاجه حوليني بدت تنور أخيراً..

ابوي كان منفعل عشان سبتا البيت و كان شايف اني فاشل و ح أفشل اكيد و ح ارجع ليهُ تاني بس حصل العكس و قدرتا انجح و انا بعيد عنو
و أهم حاجه قدرتا افوز براحة نفسي و قدرتا ارجع طبيعي شويه..
كان العلاج اني ابعد عن الأذى
و انا بعدتا..

جا الوقت عشان اجتهد اكتر و امشي ل روان المره ال جايه و اقول ليها بحبك و نهاية الحُب دبله.. ❤️

بلسان بيكو :

كنت شايف كل الحوليني بدو ينجحو و وقتها كنت مبسوط شديد..
مبسوط ليهم و لنفسي..

لقيت فرصة شغل حلوه شديد و دخلتا في تجاره مع واحد صحبنا و رامي كان كل م يشوفني مبسوط بجي بقول لي " شفتا القروش الحلال حلوه كيف؟؟"

حقيقي كانت حلوه شديد❤️

بلسان سمر :

كنت مبسوطه شديد و انا شايفه رامي بنجح و بدينا نبنى بيتنا سوا..
كان ألطف حاجه دخلت حياتي و ارهب فرصه انا حصلتا عليها..

كنا بنقعد في الجامعه نقره سوا و نعاين للدبله و نقول لبعض م خلاص ماف داعي كده كده نهايتنا بيتنا😂

بلسان رامي :

سمر كانت حلمي ال بده يتحقق و كنت حقيقي حاسي بأنتصار و انا بشوفها مبسوطه قدامي

كلهم كانو مبسوطين بينا و انا مبسوط انهم جمبنا و معانا..

بلسان نرمين :

رامي و سمر قررو يتخطبو و العرس يكون بعد الجامعه و ده كان قرارنا انا و يوسف كمان..

في يوم طلعنا كلنا و كنت قاعده بعاين ليهم واحد واحد..

كنت بتذكر الحلم و بضحك لانو الحلم كان مجرد خياال
الحقيقه اننا عيله و الحقيقه اننا جمبه بعض و دايما ح نفضل كده..

بكل الهبل ال فينا و بكل العبط احنا اكتر من أصحاب..

و ح نفضل كده..

قطع تفكيري صوت بيكو و هو قاعد جمبي و بقول لي " كلكم ارتبطو و انا طيب؟؟"

كلنا بقينا نعاين ليهُ و نضحك
و ديل احنا
عيله صغيره❤️

_الروايه دي جواها كل الحقايق الحولينا
مشاكل المخدرات و الشباب البضيعو
كل أنواع العلاقات بكل السوء ال فيها..

كلمه وحده قادره تغير حاجات كتيره
حقد
سوء جوانا قادر يتحول لفجوه كبيره سوده

كل الحاجات ال حلوه أو السيئه قادره تترجم لضرر او مساعده للناس الحولينا..