#نعي_بحق_الشهداء 

الحزن خاويـته يالخاويت التراب
امن اذكرك احـترگ وتغورج العين
الك ناصــب بگلبي بيت الاحــزان
ومثل يعگوب اضلن انحب اسنين
الك كل لحظه يالمحــبوب اشتاگ
وضـل ارسم صــــورك بالحياطين
يلچمني الـجرح لو ســـــولفو بيك
ومــن گد الهظم ينزف سجاچين
امن گولن خويه الزم بيدي الصفاح
وصيــــــحن اخ رحتو يالعزيزين
احس تنــخر ابعظمي ألآم الوداع
وظـهري ينكسر يالــغـالــي نصين
ترى اليفگد عضيده يعيش مالوم
بعد مثل اليفـگده ايحصل امنين
گطعت اهروش گلبي ابروحتك هاي
يالضــــحيت دمك فدوه الحسين

✍كلمات ام زين العابدين اللامي

تلاگن من بعد غيبه طويله وشبگت حيل زينب عالعليله
صاحن هنه الاثنين آه ياريحة حسين
****
من بعد غيبه التقن تعاتبن وتشابگن صاحن حسين وبچن
ضيم مر عليهن
تگلها عمه وين ابوي ولا علي وعبدالله اخوي عمه بس لا مات ابوي
آه ياوليهن
تدور طلعت ودمعتها بالعين ابوي حسين وينه
ماتدري الحوافر سحگت حسين وجسمه مگطعينه

بالطف مادرت ماظلت عيون براس حسين من گامو يهوسون
جرحو گلبي جرحين آه ياريحة حسين
*
من طلع ضعنه ورحل گتله اخذني وماقبل كلها راحت وانه اظل
ليش ما خذاني
كمت اشم بيه وبجيت غير اخذني ماحجيت گلي ارجعي ونحنيت
حيل عذباني
رحل واكسر الخاطر بعده ظليت وبيتي اظلم بدونه
رساله الكربله بدموعي وديت اريد اعرف شلونه

من شاف الرساله والدي شگال تاخر ما رجع من عنده مرسال
انتظرت ودمعي بالعين آه ياريحة حسين
**
عمه وحنه بكربله وصل مرسالج اله انحنه عليه وقبله
صاح ياغلاها
يقره ودموعه تهلي الك مشتاگه وعلي بويه هم مشتاك الي
طاح من قراها
صاح اهواي الج يبنيتي مشتاك ومو هين اعوفج
شسوي وراح بويه ايطول الفراك وبعد ما ضن اشوفج

ما ارجعلج ومرسالي الجروح زينب من تگلج ضامي مذبوح
خايف لا تموتين آه ياريحة حسين
**
عاشر محرم جرح حرگ الخيام وذبح وراس ابوج عله الرمح
ذاك دامي نحره
ظل ابوج عله الثره ضلوعه حيل مكسره والشمر حز منحره
وحيل رفس صدره
عله صدر حسين گامت تسحك الخيل وجسمه طشرنه
هذا يسلبه ذاك ايطعنه بالسيف الحوافر عذبنه

رحتله وبس لگيته اهوايه تعبان أگله شيوجعك ويگلي عطشان
اصبعك گتله جا وين آه يا ريحة حسين
**
طاح عمج عالنهر وظهر الحسين انكسر بعينه صابوه الگمر
وذيج بيده رايه
عليه اصعب مصرعه فرگتنه المشرعه جفوفه يمه مگطعه
جود تبده مايه
علي الاكبر تگطع ونظر حسين انحنه عليه ويشمه
وجاسم لا عرس لا حنه وشموع وتحنه بفيض دمه

انذبح عبدالله ضامي وعالسهم نام ورقيه ماتت وموتتها بالشام
غريبه تموت تدرين آه ياريحة حسين
**
من البجي عيوني عمن وحيل ما خله الزمن تغيرت من المحن
حيل شيبتني
من بعد ذاك الخدر تالي يسبيني الشمر بسوطه عذبني شكثر
راح عمه متني
اركض والسياط مجلبه بگفاي وشگد عذبتني
طحت وگمت اصيح الحگني عباس وينك يالعفتني

سبوني خويه وآنه بعمر خمسين زينب وينها اوين الدواوين
اجتني كربله منين آه ياريحة حسين
***
تمت
#ميثم #العمري


@HxzEU1

قناه نشر القصائد المنبريه

((الفاگدله))


الفــــاگدله بشر ما يگدر يگوم
بس شلون اذا فاگدله معصوم
العمر خلص مواعيد  
روحي الشوفته تريد ...

"""""""""""""""""""""""""""""""""""''''''''''

راح اسكت و دمعي الي يحاچيك
عــلى خدودي كتبلك راح اتانيك
خــــايف خـــاف من تضهر نأذيك
وانته اعـــــله السبايه حيل مابيك

يالمــهدي انتظر مولاي شتگول
بدربك گلبي راح يصير مشتول
يجي و يروح چم عيد
العمر خــلص مواعيد ...

"""""""""""""""""""""""""""""""""""''''''''''

صــــرت شگــــــد أَبذر عاليمرون
على المايسوه وشل شوف العيون
اشوفن بس خـيالك والله ممنون
عشگك خَله منـي انسان مجنون

بطــــــــاريك صرت مولاي طماع
عليها يدوس جدمك احسد الگاع
حـتى الگـاع متــهيد     
العمر خلص مواعيد ...

"""""""""""""""""""""""""""""""""""''''''''''

عني يگـــوم ظل اليگعد أحذاي
هلي گطعو درب مجلسكم وياي
الغيرك ما شكيت وليـك شكواي
المجلس مـــاي وآنه بعازةّ الماي

الغايب منه واحد يدري الغياب
المافاگد عَليهَ يگــــــول چذاب
تبچي هــواي شتريد      
العمر خلص مواعيد ...

"""""""""""""""""""""""""""""""""""''''''''''

انه دم و لحم و احساس و اشواگ
يضحكون من اگولن حيل مشتاگ
بنيـــــته و كــــــمليته بيت الفراگ
تعال الجيتك حــتى النفس ضاگ

بعدني عله العهد بهدومي السود
يالمصعدني رتبه و صـرت رادود
دين الخـدمه تسديد     
العمر خلص مواعيد ...

"""""""""""""""""""""""""""""""""""''''''''''

الفتن سبعين الف بس احنه سبعين
الشمر مــــوجود بس الغايب حسين
ارجع يبن فـــــــــاطم لا تجي الحين
هـــــــــاي حچـــايةّ الما صانو الدين

درو لو طلع نورك تعمي الابصار
وتَكَشف اسرار ويطلعــــون كفار
واحدهم غـــده بعيد
العمر خلص مواعيد ...

عبد زينب
محمد الأبراهيمي

حرق بيت الإمام الصادق (ع)

عليك الدهر يالصـــادق تراها
وملامح كــربله عيونك تراها
النـــــــار الشبّت بـدارك تراها
نفس نــــار الخيم بالغاضريه

فراس المحمداوي

نعي عن فاطمة العليلة

تون وتنوح مهظومه العليله
ليلة اصعب تجي لوگضت ليله
ونتها أصبحت كلش ثجيله
على الغابوا وغيبتهم طويله
ياهو الضال عدها وتشتكيله
عليلة حال تاليها   ونحيله
الدمع نار   على نار الخد تسيله
عال الوكت بيها  شلون عيله
صاحت والظعن طَوَّل رحيله
يبويه مابقت بالأيد  حيله
الحرمه بدون والدها ذليله

الشاعر حسن لعيبي الحريشاوي

#ابوذيات

السيده زينب ع تخاطب أخيها الحسين ع

علي ضيم الفراگ شلون     شجراه
ودمع عيني عله الوجنات    شجراه
يخويه اعليه حسره افياي    شجره
الشمس والسوط يتگاون عليه

يخويه حسين گلي شلون   حالاك  
عفتك عالرمل والليل     حالاك    
صدگ گالو وحوش اتحوم  حالاك  
وهيه اشخلّت خيول آل اميه

سيد غالب الرضوي الكربلائي

#اللهم_عجل_لوليك_الفرج

موشح الى سيدي ومولاي علي الاكبر عليه السلام


بالدمـوع أتـــــودع اصبــي عينـــها
الله بــاچــــــر عالـــــوداع أيعيـنــها
****
الليله ليلى أتــــودع الأكبـــــر علــي
تگله يا روحــي وحياتــي وكل هلـي
باچــــر الدمعــه تظــل بعــدك ألـــي
باچــر الفـــرحه علـــي امــودعينها

*

باچـــر الفــرحه أودعــها أبــدمــــوع
باچــر يمــوت الگلــب بـين  الضلـوع
باچر تموت ابوسط عينـــي الشمـوع
الشمعه بــاچــر يــا علــــي امطفينها

*

تطفه باچــر شمعتـي  فــوگ  التــراب
وعالــرمـل يوليدي اشــوفنك خضـاب
گبل يومك راسي احس يوليدي شاب
الله للتفگـــد ولـــدهـــــــــا  يعينـــــها

*

الله يبنــي يعيــن المضيعــه الحيـاة
بيها كــل سـاعه تمر شــوغــة ممـات
مــن تـــروح انتــه تجينــي النايبات
ومــا تبطـل أمــــــك مــــن اونينــها

*

يبنــي ونتــها التفـــارگ مــــا تهيـد
وهيــه تدريـه الــولـــد عنــها بعيـد
باچر اخـر شوفه يمه أعلى الصعيد
وباچــر أمـــك عالهـــزل  ســابينها

*

باچـــر أمــك كــون يلفيها الاجــــل
گبل لحظــت موتـك يــموت الأمــل
أهلي انتــه وباچـــر  تـــروح  الأهل
بالسيــوف أبكـــربله.  امگطعينـــها
*
الشاعر
موسى البديري

قصيدة وعظية (وزن تجليبه)

مشت عنك الناس الچانت اتهمك
ماضل باللحد بس العمل يمك
★★★★★
اسهام الحذر يوميه عليك اتفوت
ولابد مايصيبك  منها سهم الموت
تغسيل وچفن  تالي ونحيب وصوت
يامهيوب ينحط جسمك ابتابوت
من التابوت لتراب اللحد جسمك
★★★★★
بدارك نايحه اهل وربع تنعاك
من دار الاهل تحت الترب مثواك
رَدِّتّْ كلها عنك يلصفيت اهناك
ضل بس العمل وسط اللحد وياك
انخط تاريخ موتك علگبر واسمك
★★★★★
نصبوا مآتمك أحباب ملتمين
وبعد يوم اليمر ينشال لومين
وذكرى اتصير بعد الشهر لوشهرين
وللنسيان أمره الماتشوفه العين
بس ذكره على الحايط يضل رسمك
★★★★★
يلمثل الحمامه روحك على الدار
تريد تشوف بيهم ماجرى وماصار
مشغولين عنك يلتريد  أخبار
كلمن خاص وكته وبلوكت محتار
وهمهم بعد  صاير مو مثل همك
★★★★★
اعمالك لوقليلة وبالندم ضليت
ماتخسر اذا بهل الكرم ناديت
المحامي بالقيامه اهناك اهل البيت
ويتبره الذي من لحمك ودمك

الشاعر حسن لعيبي الحريشاوي

قصيدة ثكيله بحق العليله ع وكل من فقد الاحبه

هم يرجعون      ونگعد بوكت العصر
هم يرجعون      لو حكم حكمه الدهر

          اتفارگينه بلا ذنب
         شنهي يادنياالسبب
هم يرجعون               هم يرجعون

هم يرجعون واظل احجيلهم
اسولف الهم من چنت ابجيلهم
بگلبي ونات وسوالف ليلهم
كون هسه ويرجعون اشكيلهم
    يسامر بعيني الدمع
    فراگهم يحني الضلع
وصبر شلون............هم يرجعون
➖➖➖
حيل وحشه البيت يمه اخلافهم
    والله گلبي يموت لو ما شافهم
     گوه صار فراگنه وما عافهم
     اهلي يالغالين حلوه اوصافهم
        هذا حالي اعله الاهل
        فراگهم ما ينحمل
تعمه العيون.......هم يرجعون
➖➖➖
عيوني تعمه ومااظن انساهم
شلون اعيشن واصبر ابلياهم
حيل يحرگ بالگلب فركاهم
متاني گلبي وما گطع رجواهم
      تبقى عيني مناطره
      ونار گلبي موجره
ما يهونون......هم يرجعون
➖➖➖
الموت اجرعه وما اريد فراگهم
الف موته تموت روحي خلافهم
   گلبي وياهم جذب ما عافهم
  جلمه جلمه يسولف بجلماتهم
        نبض گلبي وروحه
          وما يبطل نوحه
بگلبي يجرحون........هم يرجعون
➖➖➖
الشاعرة ...ام علي البصراويه
الناشره ام محمد خادمة المنبر الحسيني
غير مبري الذمه من يحذف الاسماء او يغيره
نسأل الله تعالى القبول والتوفيق وحسن الخاتمة 🙏🏻🙏🏻      

#نعي
مولاتي العليلة وهي تنتظر رجوع ابيها الحسين عليه السلام وعياله


الشمس من سلهمت بعيون الغروب 
ونــهـار الـبـلد كـف اعـلـــه ليلـــــــه

تچن گامـــت الناس وتغلگ الـبوب 
ورّوح كــــــل خليل اعـــله خليلــه

ضـــلام الــيـل گـطـع كـل الـدروب
وهـم اليـــل یــا گـــلب الــيــشيلـه

بـيـن الـدور ضـلـت روحـــه اتـلـوب 
والمـــــدلولــه ونـــتــهـه ثـــجــيلــه

تـجـلب الـيـل كـلـه ابـلـوعــة ايـوب 
ومـن عـظم المــرض صارت نحيلـه

تــحن روحــه اليـفارج فـرد محبوب 
اشـــحال الـــفــارگت گومه وقبيلــه

ونتهــــــه تكــسّـــــر صـم الـگـلـــوب 
اوتــديــر الـوجهه لله وتـشــتــكــيلـه

يلـــرديـت يـوسـف عـلــــه يـعـگـوب 
تــره دمــع الهــجر يــحرگ مـــــسيله

انـه گـلبـي اعله شوفت هلي ملهوب 
واخــاف اتــصـير فــرگتهم طـويـله

مـا تـدري ابـدهـــرهــه دار مـگـلوب 
وگـلبـــهه بـعـــد مـايـبرد غـليلــــــه

ظـعـن احبابـهه مـاتـدري ياصـوب 
مـن ريـــح الـزلم بـس ضـل عليــله

لـن تسـمـع منادي ابـصوت منيوب 
يـنادي الظـعــن راجـع مــن رحـيله

طلـعت فـاطمـــه واتـعـثـر بلـثــوب 
تـشـوف الـنوگ تـعبانه وهـــزيلــه

بـس نـسـوان ظـعن الـراح مهيوب 
لا راجـع احــسـيـنـه ولا چــفـيلـه

الشاعر عزيز الفيصلي

#اللهم_عجل_لوليك_الفرج

قناة أّئمًةّ أّلَبًقُيِّعٌ
یوسف الزهراءع 💔