لمولاتي فاطمة العليله ع
.
.
بويه أفراگك يـوجع تـدري
بداعت فاطم أرحـم عمري
طفله انه اومو حمل أوداع
لــو تتـركني المـوته ابساع

أرحم عمري
****

اشهالسفره يابويه الأجت فجأة وتريد تسافر
لملمت كل ناسي او هلي وانه العيون اتناظر
شو صرت أحس مالي أثر بين التخبره اوناطر
اليا غربه عايفني اظل وشلون لو طر باچر

باچـر عيني تفيض او رمشي
الما وياهم فاطم تمشي
انظرلك وادموعي ارباع
لو تتركني الموته ابساع

ارحم عمري

****

روحي مثل روح اخوتي بويه اخذها اوياكم
منـي اشتريد ابخـدمتك بس لا اظل أتناكم
بـويـه البعد ما ينحمـل يكـتـل تـره فـرگاكم
وانــه المعودهـا الأمـن مـا تلگه بس ويـاكم

بويه الوحده اتعذب حالي
موحش دارك لو ظل خالي
مدلي ايديك اوفكلي الباع
لو تتركني الموته ابساع

أرحم عمري
****

بـويـه البنيه ابـهـل العمـر تتعلـق ابـوالـدها
من رحمت الله امحنته خالق الحب الودها
هيهات لا ما تنكسر العـدهـا ابـو امسانـدهـا
مابيـه أحچيلك بـعد هـاي العيـون أنشدها


دمعاتي اتسولف واتخبرك
شنطر وأنتَ الموت اينطرك
اودمك يجـاره اعله الگاع
لو تتركني الموته ابساع

ارحم عمري
****

ويـاك اريـد ابهالسفر ما أنـتظر طـير الشـوم
يلفيني غاطي بالدمه جسمه ويجي كله ادموم
واعرف الدم الشايله دمك يبويه المظلوم
لحظتهه متلمني الارض لو صح وجاني المحتوم


ساعتها يوگف كل گلبي
من الصدمه او أسأل ربي
صح يارب هالخبر الشاع
لو تتركني الموته ابساع

ارحم عمري
****

ليش انه دون اهلي اظل ويـاك مـاروح اهناك
ان چان من علتي السبب والزهره اصيرن عيناك
بس لا تـگلي انـتظـر وصبـر تـــرد بويه أنخاك
متأكده هالمره أبد مو مثل كل مره أتنــاك

ما ترجع وسيوف اطعنك
أمكان احضيني اسهام تحضنك
وبلا ناصر وسط اضباع
لو تتركني الموته ابساع

ارحم عمري
****

#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
بويه بعيوني أشفت
موت لو غربه خفت
حتى ما وياك اسافر
واصبر الباچر وناطر

*
أشگد اتاني بويه باچر حتى مامل او انطرك
انطيني چلمه شهر اكثر بويه علمني اعله سرك
منهو بعدك لو عفتني ايعوض النومه اعله صدرك
يا حبيبي اويا طبيبي ياهو يشفي علتي غيرك


يعني وجهك كل صبح
ما اشوفه اعـلي يشح
بخوفي تعلم ما اكابـر
واصبر الباچـر وناطـر
*

ما اودعك يالوداعك يشعـل الجمره ابدليلي
اوداعت الله مني بويه صعبه تطلع يا خليلي
ابأمل طفله ايعود ابوها راح انتظرك تجيلي
اشما عليه انهـار عده ورجع جن اعليه ليلي

الغايب اشما يبتعد ... لا بد الأهله يـرد
تكتحل بيه النواظر
واصبر الباچر وناطر
*

يالشفت بعيوني يتمي وشفت بعيونك وداعي
ابعينك الما گلته ليه أعرفته واعرفت ابضياعي
مايـرد واحـد تگلي او موتـكـم يصبح جمـاعي
جذبت ما حسه گلبي اوچذبت عيني اوطباعي

گلت مو صح او محال
هذي من وهم الخيال
افكاري تعبتني او اصابر
واصبر الباچر وناطر
*

بويه راح ادعي الله ترجع سالم أترد بالسلامه
ما يرد ظعنـك يغالي خـالي بس نسوه ويتامه
وجهك العايفني يضوي يـرد مـا بـي أي علامه
لا على العمات كسره ولا هضـيـمه او لا ظلامه

او لا عله اسنون السنان
يرتــفع نـهـج الـديـان
ماكو ذبح او لا مخاطر
واصبر الباجر وناطر
*

لا ذبيـح الـراس بـويـه ولا دمـاك ابـطـف جـريه
ولا خيـم محتـرگه بـهلي وجــت ابنيـران أميـه
او لا ورم بمتون عمتي او لا احبال ابچف سبيه
ولا فـزع بگليب سكـنه او عطـش تشكـي رقيه


إن شاء الله أفكاري وهم
اويطلع احساسي عدم
لا حقيقه ابلا مصادر
واصبر الباجر و ناطر

*
#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
هلي أن طالت المده لا تگطعوني
هلي ابمرسال بيد اعرابي ذكروني
ابقى انه انتظركم ... الي يلفي خبركم
هلي ان طالت المده لا تگطعوني

****
وحگ اعيون ازغر طفل بخواني
يجيني الليل مو لنوم لحزاني
ابنهار اگضي الوقت عالباب وتأمل
بلكي او عله لحظه اتورد الواني

من أشوف الظعن سالم راجع البيته
أهنا يحتار المن جدمي حاچيته

لبوي احسين أركض لو العبد الله
الحيره البيه چنها من الفرح والله


هلي من الوحده گلبي تعب تدروني
هلي من گد بچيها ذبلت أچفوني

بعد ذاكه سفركم ... الي يلفي خبركم
هلي أن طالت المده لا تگطعوني
****

حنينه موش بيدي اتعلمت منكم
احن واشتاق كل لحظه المحاسنكم
بعد ماظنه صبري يصبر اويايه
وظل اكثر عمر يهلي او أشوفنكم

حلم ارضه ابحلم بس مروا البتكم
طويله السفره جف نهري اعله شوفتكم

وخافن طولة السفره تنسيكم
ابنيه بالمدينه تسأل اعليكم

هلي تركت هله الأيوب تركـوني
عليله موش بس الوحدي عافوني

متى يخلص هجركم ...الي يلفي خبركم
هلي ان طالت المده لا تگطعوني

****
هلي قاس الزمن ما يرحم أبنيه
والكثر منه تـوجـع كلمة اخطيه
خطيه ابهالوضع عافوها أهلها شلون
مو مفروض تتدلل المبتليه

تركتوني ابألم وليل ما نامه
إذا يلفي بديلي اينبّت اسهامه

أشضراكم لون عبد الله خليتوا
بيه أتسله وانسه المرض مرضيتوا


هلي مرسول ودو اوفرّحو اعيوني
هلي الخاطر اللمعة بعيني فگدوني

تعب جدمي النطركم ... الي يلفي خبركم
هلي ان طالت المده لا تگطعوني

****
العليل ابشوفة اهله تضحك اعيونه
الوحده اويه المرض لا ما يخلونه
چا ليش العليله ابوحده عافوها
وهي اكثر بشر محتاجه للعونه

اوياهم ما خذوني او لا أهتمولي
ولا بالچذب گالو امشي گالولي

حبست الحسره جمره ابصدري تحرگني
من شفت الظعن حرك او تاركني


وگعت اعله الارض مصدومه خلوني
ولا داروا نظرهم الي او شافوني
شنو التركي عذركم ... الي يلفي خبركم
هلي أن طالـت المده لا تگطعوني
****

#أم_علي_الشمري

#اللهم_عجل_لوليك_الفرج

المولاي القاسم إبن الحسن ع
.
.
وصاها الحسن رمله
وگلها لو تشوفينه
اخوي اوحيد بين اعداء
جاسم لا تضمينه
****
يم جاسم اوصي ابهاي
وأنتِ أهـل الـهالوصـيه
اخوي احسين لوشفتيه
وحـده اوعازتـه الخيه
محد يبقى إله اينصره
اوحـاطـته بـنـي اميـه
لبسي جاسم او قدميه
العمـه ينصـر احسيـنه
****
لدگـولي وحيـدي هـذا
او گلبـي ما يطـاوعني
ولدگولي اريده اليوم
شـيبـي والكـبـر سنـي
ربيته او تعبـت اعليه
او تالـي تخيـبه الظني
لچن والخلق هالكـون
تتمـني أنتِ تفــدينـه
****

الوحـده لمـن اتشـوفيـن
مـو بـس جاسم اتقدميه
يا رمــله وحـگ عيــناچ
لــو عشره الولـد تـنطـيه
مصابه الما تحمله اجبال
يـم جاسـم فـلا تحمليـه
اولو بيدچ تحملي السيف
قبـل أبنــچ تـلبــيــنه
****

ابن امي اوعزيز الروح
باچر من يظـل وحـده
وزينب تنظره من ابعيد
محد ظـل إله ايـسنده
تشهگ للسمه وتصيح
ويـن المصطفى جـده
ويـن البـي يلوذ الجار
حيـدر ينظــر ابعـيــنه

****

او مـو هـذا بـعـد رمـلـه
ما تخلص ابذبحه الويل
ما يكفي الـذبح عطشان
لازم هـم تسحگه الخيل
ما يبقى الجسد عالگـاع
وبراحه الـدمـاه اتسيـل
لازم وذره وذره يـصيـر
مشــهد مــا تحملـينــه
****
كتبت على لحن لاحد خدمة الحسين ع
يوم 22/6/2024 / مـ
15/ذو الحجة /هـ يوم السبت ظهرا

لمولاي علي الاكبر ع
.
.
ليلى اتوصي بالأكبر
اصبر عالعطش يمه
لا تحچي لبوك حسين
عن عطشك تره اتهضمه

****
لو بيده يجيب الماي
يوليدي او يروينه
طيب تدري ابوك اهواي
ما يرضه العطش بينه
لو بيّنت إله عطشان
تجرح گلبه ابو اسكينه
اصبر يا ضوه العنين
واحمل لجل ابو اليمه
****

أصبر يا لبيب الروح
يوليدي او نظر عيني
باچر ربك المعبود
يجزيك او يجازيني
باچر چف ابو الزهراء
يرويك او يرويني
اوچبد الغالي ابو السجاد
من هالشربه ما يظمه
****

احمل سيفك اورد غاد
يمه المعركة تنطرك
اوشد عطشك ابذكر الله
اوقوي عزمك او صبرك
لا تضعف ابد لعداك
وتبين أنحنه ظهرك
يبني اعيون ابوك اعليك
بشوفك ينسه كل همه

****
من فدوه رحتلك كون
يالراجع تهد وحدك
صول ابسيفك البتار
ونشد وأستمع نشدك
خلي الينظـرك ياحيـد
ايشبك بالوصي جدك
حيدر هذا ابو الحسنين
صوته او قوته او عزمه
****

خل همك يصير احسين
وانصر دينك او دينه
ما نتركه ابهذا الحال
وحده ونرفع ايدينه
من خليه أبـد يحتار
لو لاخـر نفـس بينه
هذا اللي يميزنه
باچر بالحشر يمه
****

كتبت 22/6/2024/مـ
٢٢/١١/ ذو الحجة /١٤٤٥/

حال مولاتي زينب ع
.
.
زينب گلبها الليله ما يرضه ايهيد
چنها يگـلها باچـر احسين وحيد
****
زينب لخوها اتعنت او تبچي العين
مهمومه تنشد عالولي اوتسأل وين
تلـگاهـا كافـلهه الگـمر قبـل احسيـن
حس بيها مغثوثه من اجت هالصنديد
****
حس بيها ابو فاضل أحساس الخوه
گلها يبعد أهلي او بعد كل سلوه
من شنهو زينب بت علي تتلوه
شمطلعچ هالساعه يفهم شتريد
****
ادگله يخويه راحه ما عندي اوشوف
محتاره مدري گلبي واگع بالخوف
إيگلي عليكم باچر أتحشد اصفوف
وانتم قليلين العدد ها يالحيد
****
گلها اللي ويه الباري الباري اينصره
واللي مع الحق يمشي دوم ايقدره
ربچ ابـد مـا ينـسه عبـده او امـره
وبأمره جينه الهالأرض من ابعيد
****

لـو ننتصـر لـو للشـهاده محزميـن
ما عـنه نتخلف امـر حفظ الـديـن
يازينـب او أنـتي البعدنه تكملـين
هاي الحرب لو ذبحونه آل ايزيد
****
اولو شفتي خويه العسكر انهد وندار
وحسين وحـده حايـر او ماكو انصار
ظامـي الجـبد وامحـوطيـنه الاشـرار
صبري الحكمته هيچي بارينه ايريد
****
اوصدفه ابو اليمه اعله الكفل دار اعيون
او شاف العزيزه أگباله مخطوفة لون
گلها يخويه اشجابچ اهنا يم عون
طلبيني وانه ابعيني أجي ابلا ترديد
****
گلتله يا بعد الاهل والاحباب
ريت العمر لا طال خويه او لا طاب
شلون احتمل بعيوني اشوفك تنصاب
تنذبح وانه للسبي امشي ابگيد
****

#أم_علي_الشمري

#اللهم_عجل_لوليك_الفرج

كتبت 13/7/2024/ مـ
٦/١/١٤٤٦/هـ محرم الحرام

آخر موقف بين العباس و الإمام الحُسين
" أخي أنت الآن تضع رأسي في حجرك ولكن بعد ساعة من الذي يضع رأسك في حجره "

😥💔

اتخيل وياي

هذا الرجل العظيم اللي ما همه العطش والجوع
لا حرارة الجو لا ثقل الحديد لا كثرة العدو ويوم اللي أراد العباس " ع " الذهاب قاصدا نهر العلقمي قال له أنت حامل لوائي وكأنه يذكر أبا الفضل اذا ذهب تفكك العسكر بالمعنى أبا الفضل هو كل العسكر والجيش والقوه للحسين " ع "

"الآن أنكسر ظهري وقلت حيلتي وشمت بي عدوي "
💔🥀😥

تنقل الروايات
إن الحسين ع عندما فارق أبي الفضل الحياة
رجع للخيام من غير أن يتكلم مع أحد ذهب إلى خيمة أبا الفضل مباشرة فأسقط عمود خيمة أبي الفضل فعلمت النساء إن أبا الفضل قد مات.


الخيمه الـمن يزينب طاح راعيها
اخوچ اعله النهر ظل ما يرد ليها
تركتـه الروح صعدت لعد باريـها
بعد ما يرجع اوگطعي الأمل منه

****
تـعذرني يخـويه او گـال خلـينـي
اولعند الخـيم لا تاخـذني يحسيني
او يـم زينـب التنـطر لا تــوديـني
اوتعذّرلي يخويه من أبّنـتك سكنه

****

#أم_علي_الشمري

😭💔

ليتني أقوى لأبكي عليك بدل الدموع دما 💔
...

وآ ضيعةَ زينب بعدكَ يا أبا الفضل 💔
...

الشيء الذي جعل في قلبي جمرةً لا تنطفي هو إنَّ زينب قد سُبيت 😥💔

...

أبوذية

يبو فاضل ابطيحك مالمتني
او لون حاضر او شايف مالمتني
وسع هالدنيا كلها مالمتني
شيلمه المنكسر ظهره اعله خيه

#أم_علي_الشمري

أم انه او أميلن دوم لولادي
اوياذني الليالي الياذن الهادي
من السابع ليوم العاشر بعاشور
گلبي اعله الحسين ايسلب ارگادي
...

فد مره أحد خدمة الحسين ع گال أنتن النسوان تميلن للقصائد بيها ذكر ولد لان تحبن الولد والولد بنسبه لمه فد شي عظيم انه گلت هالشي مو صحيح اي قصيده تكون معبره وتوصل للعماق تاخذ حيزهه مو شرط على الولد كأمثال قصائد على السيده العليلة والسيده زينب
بس هي الحقيقية تبقى واضحة ما نگدر نخفيهة الولد حب فطري من الله وعلاقة الام بأبنها ايضا فطرية بحيث الأم اجوع ولا ايجوع ابنها تعطش ولا يعطش أبنها انه هذا احساسي يمكن لأن ما عندي بنت وما احس بطعم حب البنت بس احساس حب الولد
حبيت شي أسمه ولد من أول ولد صار عندي وتعلقت بشي أسمه ولد من فقدت اول ولد اجاني
ليلة الاكبر والقاسم وعبد الله الرضيع هذن الثلث ليالي ايأذني بهذن الليالي بالذات ودي انعزل عن العالم الوحدي لشعوري بالحسين ع وهو يفقد اولاده واحد تلوه الآخر 💔😔

السلام عليك يا أبا عبد الله روحي لك الفداء يا مولاي

المولاي القاسم ع
.
.
الليـله للـقاســم تحـزم رمـله
من تلبسه اعمامة أبو وتكمله
ينظرله لحسين اعله طوله وكله
ياشبه ابوك الحسن هيبه ايگله

ياشبه ابوك الحسن ياضي العين
ياذيني اشوفك لابس الباس البين
المثلك يعمي بالحرب مو له الحين
وأنت تريد ابدمك اتفادي احسين

بدمك تريد اتضحي لجل العطشان
اوتنصر الظل وحده اوغريب اوحيران
ابهذا العمر يوليدي شنهو الميدان
اوسيفك تجره او عني تلهي العدوان

ياعـمي انــه ابن الحسن والقاسم
صـح عمـري ازغـير ولچـن عـازم
بي غيرة الله الدمه من دم هاشم
كلشي فداك ايروح كــونك سالم

#أم_علي_الشمري

#اللهم_عجل_لوليك_الفرج

#يابن شبيب إن بكيت على الحسين عليه السلام حتى تصير دموعك على خديك غفر الله لك كل ذنب أذنبته صغيرا كان أو كبيرا قليلا كان أو كثيرا


#لك_الفداء_سيدي_أبا_عبد_الله 😥💔

#يابن شبيب : إن سرك أن يكون لك من الثواب مثل ما لمن استشهد مع الحسين فقل متى ما ذكرته
{ يا ليتني كنت معهم فأفوز فوزاً عظيماً }
#يابن شبيب : إن سرك أن تكون معنا في الدرجات العلى من الجنان
{ فاحزن لحزننا وافرح لفرحنا وعليك بولايتنا فلو أن رَجُلاً تولى حجراً لحشرهُ الله معهُ يوم القيامة }

#لك_الفداء_سيدي_أبا_عبد_الله 💔😥

إن اول علامة كانت لعلي الأكبر ع

إنَّهُ أشبه الناس خُلقاً ومنطقاً بجدهِ المصطفى صلى الله عليه وآله وسلم

الإمام الحسين. "ع "

ابوذيات لمولاي علي الأكبر ع

عسه لا طال بويه الزمن بعداك
وريت الصار بيك ايصير بعداك
شگل لمك لون تنشدني بعداك
علي عفـتـه عـدل لو عالوطـيه

علي ابطيحك زماني عال وجره
او نـارك يبـنــي بـالـدلال وجـره
لــون دمعـي تحـول دمه وجـره
فــلا ابــطــل وون ون الزچيــه

#أم_علي_الشمري


#أم_علي_الشمري