جديده لمولاتي زينب ع
.
.
.
اتخيل ابعقلك او شوف الحايره
زينب ابيوم الطفوف أشصايره

****
روح بخيالك او شاهدها الطفوف
اوشوف عن قرب المشاهد والصفوف
ابيا وضع آل النبي لمن تشوف
اعيونهم غمضت لونهي ساهره

****
شوفهم ليلة العاشر عن قرب
بيمن انشغلو اوشغلو هالگلب
اوللصبح ماظل شي وعليهم حرب
ولد حيدر والبتول الطاهره
****

وأستمع لم عون يم وليانهه
أشحچت من ضيم اوقهر لخوانهه
تريد تبقى لو تـرد لوطـانهه
خايفه لو هم مثلهم صابره

****
عن ظهر عاشور سولفلي اشفت ؟
گلبك أتحمل شلون او ما متت ؟
امنين اجاك الصبر گلي اوكملت
او ما متت حسره او سكنت الاخره
****

شلون گلبك طاوعك شفت الشمر
من گصد لحسين وأچفا عالصدر
او فوگ ظهره گعد برگبته إينحر
اوما طفت عينك او ذبحه اتناظره

****
وآخر احداث الشفت ما ظل أحد
لا اخو لم عون ظل او لا ولد
حتى ابو فاضل الدگ صدره اوعد
الموت سبّگله بچفوف الكافره
****
كافي لتكملي بعد اللي جره
وين ركضت بت علي المخدره
لبو اليمه لو السبع الگنطره
الوسعه ما لمتها شاطت فايره

****

#أم_علي_الشمري

#اللهم_عجل_لوليك_الفرج

جديده لمولاي عبد الله الرضيع
.
.
.
جبـتـه الوالـده يطلب لـه أميـه
وليدي من العطش ذبلت معانيه
****
عمره اشهور أبني او ازغر أطفاله
جبته الوالده ودموعي هماله
گتله احسين ابنك تعبت احواله
گدامي يموت اشلون ما بيه
****

ما احمل اشوفه اتغمض اعيونه
وصوته ما اسمعه اوضحكت اسنونه
مني أخذ الولد بلكت يـرحمونه
شربة ماي ينطونه يا واليه

****
لو شافـو زغـير اوليدي ايرحمو
طفل ابهالعمر مـا ظنـتي يظلمو
ماله أي ذنـب عبد الله ويحرمو
أخذه ابداعتي يروه يابو ارقيه
****
مني ابني خذاه او راح ابو السجاد
او ظليت انتـظر وتأخـر او ما عاد
شو زاد القلق بگليبي والهم زاد
أسألمن منو واجواب ايرد ليه
****
أبني من خذا مو بس خذاها الروح
حضني من الولد ظل فارغ او مجروح
ثاري العمته رد الولد مذبوح
من نحره ابسهم روته اعاديه
****

ريـت انشلت اجدامي ولا جبته
أبـني للــذبــح بـيديـه قـدمتـه
لو عندي علم بالخيمه چا عفته
مو من نحره تطلع روحه مدميه

****

#أم_علي_الشمري

#اللهم_عجل_لوليك_الفرج

على لحن قصيدة
( عريس الولد جبته يتچوله
ما ترهم الزفه ابلايه هلهوله )
....

جديده لليلة العاشر عن لسان مولاتي زينب ع.
.
.
يحسين باچر باچر ... ياهو اليظلي باچر

****
ياهو اليظلي باچر من الوليان
ويحميني خويه لو نمت عالتربان
والعايل ايرده او يرد العدوان

يبن أُمي عصر العاشر ... ياهو اليظلي باچر
****

منكم يظلي ياهو او يبقى وياي
أنت يخويه لو كفيلي الوفاي
لو ابقى وحدي ابلا عشيره اولياي

لتحيّرو گلبي الحاير ... ياهو اليظلي باچر

****
طمـني خويه اوطفي بضلوعي النار
خل تهدئ روحي من ضجيج الافكار
گلي سوه جيـنه او ســوه انرد للدار

مشنه نرد انسافر ... ياهو اليظلي باچر
****

حزّم متعنه او خـل نرد يا مظلوم
وطوي الدروب الدارنه عن هالگوم
المتحضره لدمانه عطشانه أتحوم


مثل الوحوش اتناطر ...يا هو يظلي باچر
****

ماريد اشوف الخايفه منه حسين
هالناس تضمـرلك حقد من أسنين
من حيدر اتوج خليفه اعله الدين

الذبحك عطشهم صابر ... ياهو اليظلي باچر
****

#أم_علي_الشمري

#اللهم_عجل_لوليك_الفرج

( هذي القصيدة كتبتها على لحن نسائي كلش حلو المعذرة ما أگدر ادزه بالقناة )

هذا لحن القصيدة الاصلي

اسألكم الدعاء 🙏🙏

جديد لبو الفضل العباس ع
.
.
كافل ام عون ايصيح عد عينچ اني
شنـهو عيني او جفين أنطيه كياني
****

انه ابـن حامي الجـار ياخـويه زينب
كـل وجــودي لحســين البـاري رتـب
غيرتي او ناري هاي مو صدفه تلهب
الله لجل العطشان كلشـي نطاني
كافل ام عون يصيح عد عينچ اني

****
ضمي حزنچ بالروح ياخويه وهدي
چلمه مو بس انطيچ هاچ اخذي عهدي
باچر الطف ايشوف وانتي التشهدي
حيدر اتصيح اعداچ هالجانه ثاني
كافل ام عون يصيح عد عينچ اني
****

الله مـو كلمـن كان ينّطي العبيـده
الحكمه سوه العباس والمن يريده
وحكمتـه هالعـباس ينصر عضيده
نصرته ابمجره الدم تمشي او لساني
كافل ام عون يصيح عد عينچ اني
****
بالصـبـر والإيـمان ثابـت جعلـني
شبـه أبوي الكرار الله خلقـني
ما يزحزحني الخوف لطف رسلني
أفگس اعيون اعداج لو كلفاني
كافل ام عون يصيح عد عينچ اني

****
آنه راعي النوماس والكافل انه
بيـدي يهتــز الــواي عالي ابسمانه
جدمي لو طب صحراء يخضر مچانه
قائد انه اعله الجيش من وظفاني
كافل ام عون يصيح عد عينچ اني
****

لا تهمي او عيناچ عالوجنه تجري
دامني خويه اوياچ بالخير أبشري
فـدوه عيـني العيناچ لا كله عمري
يرخص الغالي اعليه حضن الرباني
كافل ام عون يصيح عد عينچ اني
****

#أم_علي_الشمري
#اللهم_عجل_لوليك_الفرج

كتبت اليوم 6/7/2024/ عند مولاي أبا الفضل العباس ع

السلام عليك يا حسين
السلام عليك يا حسين
****
السلام على دمه الطهور
السلام على قلبه الصبور
السلام على السانه الشكور
السلام عليك يا حسين
****
السلام على صنع البـديـع
السلام على وجهه الطليع
ابو الاكبر جزء رد الصنيع
السلام عليك يا حسين
****
السلام على الرأس القـطيع
السلام على الجسم الصريع
السلام على مصابه الفضيع
السلام عليك يا حسين
****
السلام على الشيب الخضيب
السلام على الخد التريب
السلام على المولى السليب
السلام عليك يا حسين
****
السلام على الخــلوا وحيـد
السلام على الظل عالصعيد
السلام على حسـين الشهيد
السلام عليك يا حسين
****
السلام على إبــن الكــرام
السلام على عالــي المقام
السلام على ثانــي الإمام
السلام عليك ياحسين
****

الآن من عند مولاي الحسين " ع "

#أم_علي_الشمري

#اللهم_عجل_لوليك_الفرج_أنت_المعزى_يامولاي

#القصائد_تراث


غبت عني ودنيتي وحشة بلياك
لو نسيت امك عليها صعب فركاك
جيت اهز مهدك واناغيلك والولي
يالرباب المهد خالي يكَلولي
أنسى روحي ومهجتي وما اكَدر أنساك
ــــــــــــــــــــــــــــــــــــــ
نايمه وفزيت يبني وجيتك بلهفة حنيني
لني حلمانه گرب وكت الرضاعة وتناديني
وهمت وي نغمات صوتك والنغيط اليناغيني
بحلوة النومة اعتنيت وعالمهد صديت عيني

لن شفت مهدك خالي يوحش يبني
كَلت الدهر بأول سهم صوبني
خله بدليلي النايبه تعذبني
بعدك كَصه بيه الوكت شيبني

در حليبك عالصدر جيف الوكت فات
عالرضاعة ومرت اعله الوكت ساعات
خايفه يبني رحت عني وعفتني
ولو نويت تروح شوما ودعتني
انسى روحي ومهجتي وما اكَدر انساك
ــــــــــــــــــــــــــــــــــــــ
طفح مي عيني وتبده يبني والماي شيلمه
ولو توشل العين ميهه ماتضل اتشوف تعمه
وانه دوهني زماني بفركَتك والله يا يمه
راح حيلي وروحي راحت من جسمهه ومالي همه

هديت حيلي وذوبتني بفركَاك
فتيت كَلبي وراحت الروح وياك
مولحت عيني وانطفت من جدواك
ياماي عيني الي طفح وين الكَاك

اخذ روحي الهايمه تتوسد وياك
عالكَرب يمك تريد شلون تسلاك
عايشه بلياك بالدنيه غريبه
والكَلب يسعر ولا يطفه لهيبه
انسى روحي ومهجتي وما اكدر انساك
ــــــــــــــــــــــــــــــــــــــ
امسيت مهضومه اعله فكَدك والنوايح ترثي حالي
منين ما اصد بالعيون ولن شبح يخطف كَبالي
ايعتني ويهددني بيك يكَلي راح الجان غالي
تغمى روحي واصحيهه وانجفي ابعثرت ذيالي

هم انتظر يوم وعلي يبني اتعود
وافرح بدنياتي وترد ليه اردود
واعلكَـ شموع الفرح وايخضر العود
والكَلب يستر بيك والروح اتهود

لاجت الدمعه ابجفنهه وخنكَت الروح
وعبرتي ضاكَت ابصدري ومنهه مجروح
راح تعبي وسهر كل ذيج الليالي
ضيعتني كربلا وغيرت حالي
انسى روحي ومهجتي وما اكَدر أنساك
ــــــــــــــــــــــــــــــــــــــ
اضل اندب يعبد الله وريتك لصوتي تسمعه
جنت احسب يبني شاب تصير تضوي بليلي شمعه
ولوهضمني الوكت تنغر علي وتنشف الدمعه
مادريت بكربلا تنساني ولكَلبي تفجعه

يا ضوه العين وشلي بعدك بالعين..
يا سلوتي ويا ثمر دلال حسين...
عني رحت الكَاك يوليدي وين؟
ومنين أجيب الصبر دليني منين؟؟

جنت اكَضي ليلتي بكترك واناغيك
ولو كَضه ليلي وصبح كَدامي الاكَيك
النايبه بعدك يعبد الله دهتني
والمصايب عكَب عينك دوهنتني
انسى روحي ومهجتي وما أكَدر انساك
ــــــــــــــــــــــــــــــــــــــ
ما خذت من خاطر امك من رحت ماودعتهه
ولا كَلت ودعتج الله ابكسرة الخاطر عفتهه
وما خفت سهم النوايب من بعد عينك يفتهه
واضن كَلبك ينكسر يوليدي حالي لو شفتهه

تمور الجبال الراسيه لونتهه
وتميد بيهه الكَاع لو سمعتها
تذوب الصخور الجامده لوحشتهه
ضلت وحيده وحايره لغربتهه

جنت اضمك بالكَلب وبجبدي اغطيك
واصد نسمت الهوى خاف انها تاذيك
بعده ثغرك مالحكَـ ينطق الجلمه
رحت عني وحتى ما كَتلي يا يمه
انسى روحي ومهجتي وما اكَدر انساك
ــــــــــــــــــــــــــــــــــــــ
يا ثمر كَلبي ونبعته ويا سهد عيني ووسنهه
ضلت امك عكَب عينك هايمه وساهر جفنهه
وماكَلت خافنها تضمه وعلى افراكَي يجف لبنهه
وفرشت هموم النوايب ونامت وغطاهه ونهه

خليت عين امك تهل دمع ودم
فرشت مصايبهه وتغطت بالهم
تسحن صبرهه وبالنوايب تلهم
وتجوح ابلوعاتها وتتالم

فاركَتني وعلي مرت سود الايام
شابحه عيوني واضل سهرانه ما انام
يا هو يجبر خاطري المكسور يبني
والدهر خلاني محتاره وضهدني!!
انسى روحي ومهجتي وما اكَدر انساك

عبد الرسول الخفاجي

#اللهم_عجل_لوليك_الفرج

أنت عطشان الُميَّة او انه عطشانه عليك 😥💔

#أم_علي_الشمري

ليلة القاسم ع
.
.
طفه شمع الفرح جسام
او رمـله طفـت الأحلام
بعد المن يمحزونه ...شمع ابنچ يعلگونه

****
الچانت تتعب او تسهر
الـرادت هالـولــد يكبر
لو خط شـاربـه تفخر
گدام اهـله او احبـابه
لاچـن هالقـدر راسـم
منـها ياخذه الجاسم
اوبيها يتــرك الظـالم
صورة ذبحه اومصابه
جابو سابح ابدمه
ما عرفته من رسمه
ضاعت صورته من امه
او وجهه اوطلعت اشبابه
ما رد ليها بدرٍ تام
رد اوسابح من الهام
من الدم جامده اعيونه
بعد المن يمحزونه
****

گعدت گعدت البضعه
مكسوره اوعليه تنعى
مثل الشمعه عالشمعه
ذابت عالـولد رمـله
تگله يا ضـوه ناظـر
وين أرباتـي الباچـر
عايفني اكسر الخاطر
دهري اخلافك اشخله
شيب گلبي او راسي
بصدري ضاكت انفاسي
الفاگدته أعز ناسي
الكلشي ابدنيتي أدگله
بعدك شطلب الأيام
وگبالي ابدماك اتنام
بموتك عمري ينهونه
بعد المن يمحزونه
****

دگله ها يبن گلبي
يحلى نعمه من ربي
اعليك أسود صبح ثوبي
الكل ظنها يظل ليها
أمدد لا نفس لا صوت
من امك خذاك الموت
بروحك من سره بسكوت
العله خلف اعليها
ما أدري الزمن غدار
يغدر حتى بالخطار
سيف الشر إلك يختار
او رمله اظل بواچيها
اعليّ يبقى الحزن هندام
يالشح صوتك او ما دام
يبني الغمضت أچفونه
بعد المن يمحزونه

****
حسيتك چوتك نار
رايح راجع اومحتار
عمك مابقتله انصار
بعينك طفحت الغيره
من أسمعته يطلب عون
گتلي ها ييمه شلون
بعينه عمي أنا ازغيرون
وبروحك غدت حيره
ساعتها اكبرت بالعين
من شفتك تهم لحسين
العمك مستعد والدين
يبني اوطيب السيره
العمك هالگلب محتام
يالبعدك زغير اعوام
الهاي الولد يردونه
بعد المن يمحزونه
****

#أم_علي_الشمري

#اللهم_عجل_لوليك_الفرج

كتبت 11/7/2024/مـ
٤/١/١٤٤٦/هـ/ محرم الحرام

جديد ليلة أبي الفضل العباس ع
.
.
صاح واعيونه الغيض بيـهن تجـمع
ويـنه اللي عادي حسين وانـه ابن الأنزع

****
صاح عباس الكفلهه الخدَّر
انه ابو الغيـره و مُبيج العسكر
انه وكت المعركه الموت المُر
انه تربات المعدَّل حيدر

وين اليريد اليوم المـوت الاسرع
صاح واعيونه الغيض بيهن تجمع

****
يله وين الرايد اساعة يذل
رايد اقوه ازلامكم غيره اوفعل
ما تهاب الموت جندل بالقتل
موش اشباه الزلم ليه تصل

اوخل أصدلهم زين بعيوني الاوسع
صاح واعيونه الغيض بيهن تجمع

****
گلهـم انـه الكافـل اتعرفوني
گمر هاشم هاشمي ايلقبوني
انه اخو العطشان نور اعيوني
روحي فدوه اتروح إله سمعوني

انه هذا العباس والدور اللي اسمع
صاح واعيونه الغيض بيهن تجمع

****
انه ابو فاضل اوهاي اعلومي
امـي مثل اليوم رادت يومي
كون قبل احسين تجري ادمومي
والمنية قبله فوگي اتحومي

منطي جلمه وللدين ما عنهه ارجع
صاح واعيونه الغيض بيهن تجمع

****
سيفه بيمنه او نزل بالثامه
يروي غيضه من الكُفر بحسامه
وين اليگابله ايعيد ايامه
يومه يتمنى فلا بحلامه

ملثم او هيچ اشلون لو وجهه يطلع
صاح واعيونه الغيض بيهن تجمع
****

#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
گتلي ترد ما رديت
بويه أنتظرت او ماجيت
ما تدري دلالي اشكثر ... ظل ينتظر ظل ينتظر
گتلي ترد ما رديت
****

ما مش خبر ... يالسرت بظعون الأهل
ما مش خبر ... منك اجاني او لاوصل
ما مش خبر ...خوف أنتظاري ابلا أمل
ما مش خبر ... انـتظـرك أنتظـر الأجل

هـاي انه بنتك يحسين .. يادنيـتي اوضي العين
اشگد أرسلتلك مكتوب ..بي شوگ الي وحزن اغروب
دمع اشكر بي وديت
گتلي ترد ما رديت

****
ويه الهوه ...صرت انه أسولف لوعتي
ويه الهوه ... بلكت يـوصــل قصتي
ويه الهوه ... لحسين ابــوي اوعمتي
ويه الهوه ... يحچيله عن هم غربتي

ايگله العفتهـا ابيـا حال ... ويحن عليه ابمرسال
كلمة ولو يكتب بيه ...بخير ؟ اوهلي كون أدريه
ويكتبلي حيل أشتاقيت ...
گتلي ترد ما رديت
****

نوري انطفه ... او خيم عله اعيوني البين
نوري انطفه ... او ما ظل ضوه تشوف العين
نوري انطفه ... من فارگت وجه احسين
نوري أنطفه ... او عدوني من الميتين

ماتت أجدامي اعله الباب .. وأحساسي الشوف أحباب
والمن بعد ها يعيون ... طال السفر ميردون
والله الصورهم حنيت
گتلي ترد ما رديت

****

من كربله ... بعد أشأريد أتنطّر
من كربله ...حتى أنتظر وأتصبر
من كربله ... يرجع الراح ابخدر
من كربله ... ما گلي هيج أتأخر

هذا اللي ما مر بالبال ... راسك تشيله العسال
جسمك يظل عالتربان ... بويه ذبيح اوعطشان
الطير اجاني وادريت
گتلي ترد ما رديت

****
يمتى ادريت ... من جاني طير من السمه
يمتى ادريت ... فايض او سابح بالدمه
يمتى ادريت ... ميت او جبدك بي ظمه
يمتى ادريت ... لمن نعاك الفاطمه

لمن فهمت اللي صار ... فرفحت والطير احتار
بضلوعي شبت نيران ... ما تنطفي چن بركان
لو ميته وياكم ريت
گتلي ترد ما رديت

****
#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
بويه أفراگك يـوجع تـدري
بداعت فاطم أرحـم عمري
طفله انه اومو حمل أوداع
لــو تتـركني المـوته ابساع

أرحم عمري
****

اشهالسفره يابويه الأجت فجأة وتريد تسافر
لملمت كل ناسي او هلي وانه العيون اتناظر
شو صرت أحس مالي أثر بين التخبره اوناطر
اليا غربه عايفني اظل وشلون لو طر باچر

باچـر عيني تفيض او رمشي
الما وياهم فاطم تمشي
انظرلك وادموعي ارباع
لو تتركني الموته ابساع

ارحم عمري

****

روحي مثل روح اخوتي بويه اخذها اوياكم
منـي اشتريد ابخـدمتك بس لا اظل أتناكم
بـويـه البعد ما ينحمـل يكـتـل تـره فـرگاكم
وانــه المعودهـا الأمـن مـا تلگه بس ويـاكم

بويه الوحده اتعذب حالي
موحش دارك لو ظل خالي
مدلي ايديك اوفكلي الباع
لو تتركني الموته ابساع

أرحم عمري
****

بـويـه البنيه ابـهـل العمـر تتعلـق ابـوالـدها
من رحمت الله امحنته خالق الحب الودها
هيهات لا ما تنكسر العـدهـا ابـو امسانـدهـا
مابيـه أحچيلك بـعد هـاي العيـون أنشدها


دمعاتي اتسولف واتخبرك
شنطر وأنتَ الموت اينطرك
اودمك يجـاره اعله الگاع
لو تتركني الموته ابساع

ارحم عمري
****

ويـاك اريـد ابهالسفر ما أنـتظر طـير الشـوم
يلفيني غاطي بالدمه جسمه ويجي كله ادموم
واعرف الدم الشايله دمك يبويه المظلوم
لحظتهه متلمني الارض لو صح وجاني المحتوم


ساعتها يوگف كل گلبي
من الصدمه او أسأل ربي
صح يارب هالخبر الشاع
لو تتركني الموته ابساع

ارحم عمري
****

ليش انه دون اهلي اظل ويـاك مـاروح اهناك
ان چان من علتي السبب والزهره اصيرن عيناك
بس لا تـگلي انـتظـر وصبـر تـــرد بويه أنخاك
متأكده هالمره أبد مو مثل كل مره أتنــاك

ما ترجع وسيوف اطعنك
أمكان احضيني اسهام تحضنك
وبلا ناصر وسط اضباع
لو تتركني الموته ابساع

ارحم عمري
****

#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
بويه بعيوني أشفت
موت لو غربه خفت
حتى ما وياك اسافر
واصبر الباچر وناطر

*
أشگد اتاني بويه باچر حتى مامل او انطرك
انطيني چلمه شهر اكثر بويه علمني اعله سرك
منهو بعدك لو عفتني ايعوض النومه اعله صدرك
يا حبيبي اويا طبيبي ياهو يشفي علتي غيرك


يعني وجهك كل صبح
ما اشوفه اعـلي يشح
بخوفي تعلم ما اكابـر
واصبر الباچـر وناطـر
*

ما اودعك يالوداعك يشعـل الجمره ابدليلي
اوداعت الله مني بويه صعبه تطلع يا خليلي
ابأمل طفله ايعود ابوها راح انتظرك تجيلي
اشما عليه انهـار عده ورجع جن اعليه ليلي

الغايب اشما يبتعد ... لا بد الأهله يـرد
تكتحل بيه النواظر
واصبر الباچر وناطر
*

يالشفت بعيوني يتمي وشفت بعيونك وداعي
ابعينك الما گلته ليه أعرفته واعرفت ابضياعي
مايـرد واحـد تگلي او موتـكـم يصبح جمـاعي
جذبت ما حسه گلبي اوچذبت عيني اوطباعي

گلت مو صح او محال
هذي من وهم الخيال
افكاري تعبتني او اصابر
واصبر الباچر وناطر
*

بويه راح ادعي الله ترجع سالم أترد بالسلامه
ما يرد ظعنـك يغالي خـالي بس نسوه ويتامه
وجهك العايفني يضوي يـرد مـا بـي أي علامه
لا على العمات كسره ولا هضـيـمه او لا ظلامه

او لا عله اسنون السنان
يرتــفع نـهـج الـديـان
ماكو ذبح او لا مخاطر
واصبر الباجر وناطر
*

لا ذبيـح الـراس بـويـه ولا دمـاك ابـطـف جـريه
ولا خيـم محتـرگه بـهلي وجــت ابنيـران أميـه
او لا ورم بمتون عمتي او لا احبال ابچف سبيه
ولا فـزع بگليب سكـنه او عطـش تشكـي رقيه


إن شاء الله أفكاري وهم
اويطلع احساسي عدم
لا حقيقه ابلا مصادر
واصبر الباجر و ناطر

*
#أم_علي_الشمري

#اللهم_عجل_لوليك_الفرج

لمولاتي فاطمة العليله ع
.
.
هلي أن طالت المده لا تگطعوني
هلي ابمرسال بيد اعرابي ذكروني
ابقى انه انتظركم ... الي يلفي خبركم
هلي ان طالت المده لا تگطعوني

****
وحگ اعيون ازغر طفل بخواني
يجيني الليل مو لنوم لحزاني
ابنهار اگضي الوقت عالباب وتأمل
بلكي او عله لحظه اتورد الواني

من أشوف الظعن سالم راجع البيته
أهنا يحتار المن جدمي حاچيته

لبوي احسين أركض لو العبد الله
الحيره البيه چنها من الفرح والله


هلي من الوحده گلبي تعب تدروني
هلي من گد بچيها ذبلت أچفوني

بعد ذاكه سفركم ... الي يلفي خبركم
هلي أن طالت المده لا تگطعوني
****

حنينه موش بيدي اتعلمت منكم
احن واشتاق كل لحظه المحاسنكم
بعد ماظنه صبري يصبر اويايه
وظل اكثر عمر يهلي او أشوفنكم

حلم ارضه ابحلم بس مروا البتكم
طويله السفره جف نهري اعله شوفتكم

وخافن طولة السفره تنسيكم
ابنيه بالمدينه تسأل اعليكم

هلي تركت هله الأيوب تركـوني
عليله موش بس الوحدي عافوني

متى يخلص هجركم ...الي يلفي خبركم
هلي ان طالت المده لا تگطعوني

****
هلي قاس الزمن ما يرحم أبنيه
والكثر منه تـوجـع كلمة اخطيه
خطيه ابهالوضع عافوها أهلها شلون
مو مفروض تتدلل المبتليه

تركتوني ابألم وليل ما نامه
إذا يلفي بديلي اينبّت اسهامه

أشضراكم لون عبد الله خليتوا
بيه أتسله وانسه المرض مرضيتوا


هلي مرسول ودو اوفرّحو اعيوني
هلي الخاطر اللمعة بعيني فگدوني

تعب جدمي النطركم ... الي يلفي خبركم
هلي ان طالت المده لا تگطعوني

****
العليل ابشوفة اهله تضحك اعيونه
الوحده اويه المرض لا ما يخلونه
چا ليش العليله ابوحده عافوها
وهي اكثر بشر محتاجه للعونه

اوياهم ما خذوني او لا أهتمولي
ولا بالچذب گالو امشي گالولي

حبست الحسره جمره ابصدري تحرگني
من شفت الظعن حرك او تاركني


وگعت اعله الارض مصدومه خلوني
ولا داروا نظرهم الي او شافوني
شنو التركي عذركم ... الي يلفي خبركم
هلي أن طالـت المده لا تگطعوني
****

#أم_علي_الشمري

#اللهم_عجل_لوليك_الفرج