#لمة_عزه
#تصلح_شور_خاتمه

حسين … يا ابا عبد لله

:::::::::::::::::::::::::::::::::::::::::

ضايع و الله يا مولاي
بس بالحضره تلگاني

غيرك ما يجي ببالي
لا اول و لا ثـــــــاني

منهو الفضله جن فضلك
و بين خيامه ربـــــــاني

و لو ما ردد حروفك
واجب اگطع لساني

حسين … يا ابا عبد لله

:::::::::::::::::::::::::::::::::::::::::

رباني العشگ و النوح
و لجلك روحي مچويه

اعطش و أروه مو بالماي
اروه امن أقره لطـــــــميه

من مثلك يبو السجاد
طيب كله حنينـــــــــه

بكل تقصيري و ذنوبي
و كامش لسه بايديـــه

حسين … يا ابا عبد لله

:::::::::::::::::::::::::::::::::::::::::


لو ميت يرد يحســـــين
من يشتم هوه الحضره

ما زاير اليّه هـــــــــــواي
الشوگ بگلبي جن جمره

لو عيني انظرت صوره
جرح الشوك مايبــــــره

دخيلك يا سليب الثوب
خليني ولو مــــــــــــــره

حسين … يا ابا عبد لله

:::::::::::::::::::::::::::::::::::::::::

خليني وياليـزورون
مجدي وواگف بابك

تسوه الدنيه و البيهه
لو ذره من تـــــــرابك

آنه ادري يبو السجاد
أهل الدمعه أحبــابك

و ليلي و كل نهاري وياك
أبچي و أنعه بمصابــــــك


حسين … يا ابا عبد لله

:::::::::::::::::::::::::::::::::::::::::


بس هذا الطلب منك
خلني ببابك مجـــدي

مجدي بباب أبو اليمه
الله يبارك ابـــــيـــــدي

يخلص عمري يم بـابك
و أرجع من جديد أبدي

ابجيلك لحد ما موت
لو من يظهر المهـدي

حسين … يا ابا عبد لله

:::::::::::::::::::::::::::::::::::::::::

#الحمد_لله_على_نعمة_الحسين
✍️ الاقل زين العابـدين السعدي

#رئيسيه_ليلة_مسلم_(ع)

اعتذر ما احضرك يوم الطفوف
و لا مثل عباس تتگطع جفوف

من فوك القصر و ابعث سلامي
و اتعذر الك اخر كلامــــــــــــي




:::::::::::::::::::::::::::::::::::::::::

اتعذر الطفك ما اجي و احــــــــــــظر
و لا مثلك اشوفن مصرع الاكبــــــــــر
و نحري يواسي بالطف گطعت المنحر
وجسمي يواسي جسمك بالحبل ينجر

عمري يخلص و القصر ليه نصيب
هناكه يتلاگه الحبيب و يالحبيب

بدايه وياك و المذبح ختامي
و اتعذر الك اخر كلامــــــــي



:::::::::::::::::::::::::::::::::::::::::

اتعذر و اخافن قصرت مــــــــــــــــــره
ما وفيت و الله انه احــــــــــــــس ذره
ما يوجعني نحري و جسمي و الشمره
يوجعني السبي ذاكه البني الزهـــــــــره

انه راح تروح روحي و استـــــراح
و راسي ما يعله عله روس الرماح

موتي قربتاً منك إمامي
و اتعذر الك اخر كلامي

:::::::::::::::::::::::::::::::::::::::::


مو من موت روحي تريدك و ترجع
لا و الله الشهاده هوايه بيها اطمـع
اتمنه الم حيلي و الك افـــــــــــزع
يا زلمه اليگابلني و الي و يطلـــــــع

انه و العباس نهجم بالصبـٕـاح
ناذن بحيَ على فرض الجراح

من طف كربله شويه سهامي
و اتعذر الك اخر كلامــــــــــي

:::::::::::::::::::::::::::::::::::::::::


صح جسمي يطيح من القصر ينزف
بس جرحك يبو الاكبر صعب يكـلف
زينب جسمك من السحك ما تعــرف
و روحك جن حمامه اعليهم ترفرف

انه جرحي محتمل يبره و يطيب
لو طفل لمصيبتك راسه يشيــــب


و ايصير النحر عالغبره دامي
و اتعذر الك اخر كلامــــــــي

:::::::::::::::::::::::::::::::::::::::::

وصل صوتك و الله شاهد و يعلم
من صوتك يمسلم صبري يتهـــدم
مجانك ولدك هنانه الي تلـــــــــزم
لا تتعذر و ما قصرت تسلم

انته اول ناصر و هذا الوســـــــــــام
و انه امامك راضي و عليك السلام

للجنه تفوت انته أمامي
و اتعذر الك اخر كلامـي

:::::::::::::::::::::::::::::::::::::::::


#الحمد_لله_على_نعمة_الحسين
✍️ الاقل زين العابـدين السعدي

#الانصار

ردي يم عون الخيم بحمانه
الخيل لـــو هدوا تهد ويانه

حسين ابونه و احنه كلنه اولاده
و كـــلنه نفـــداكم يــعمة الساده

::::::::::::::::::::::::::::::::::::::::: 1

للخيم وينه اليكرب و احنه نشتم الهوه
لو دنو احـــنه نسوي مكبره بطف نينوه
ما يطيح ابيدي هاذي امني هذا اللوه
ويه ابوج انه اقاتل و العدو مني نجوه


نجوه هوه اليخاف يگابل اخياله
بعد ياهو اليعيل و احنه عياله
اليلاوينه بعد جا منهو يبراله

امني و الله كلنه نوكف ساتر
بجفنه نلوي و الله لو مر كاسر

احنه للعيله نحب صياده
و كلنه نفداكم يعمة الساده

::::::::::::::::::::::::::::::::::::::::: 2

امني زينب بويه امني و كعدي بالخيمه برغد
اليوصل الحد المخيم لسه ما مولود ابد
نرتل احنه حروف اسمج عدنه بيهن معتقد
زينبٌ بنتُ علي (قل هو الخدر أحد)


يمصحف فاطمه يالايه و السوره
اليمسج و الله ترجع ايده مكسوره
و كُبر سني فله تضني اخذ دوره

شيبي ابيض سيفي يشهد سيفي
اليگربلكم منه آخذ حيفي

حيدر الناصرته اعيد امجاده
و كلنه نفداكم يعمة الساده

::::::::::::::::::::::::::::::::::::::::: 3

احنه يمج يالعقيله و عابس و جون و وهب
الما نصركم و الله اعمه و ما عله الأعمه عتب
احنه نغديهن رگبنه حسينج اغله من الذهب
احنه حبينه و نصرنه و حبنه هوه اكبر سبب

اليحب لازم يضحي و لينه مشهوده
و لا احلف باخوج انه احلف بجوده
نوكفه لليضدكم و نعبر حدوده

امني زينب و الامان بألله
روحي امني و لولي يم عبدالله

اليكرب عمره ابد ما راده
و كلنه نفداكم يعمة الساده

::::::::::::::::::::::::::::::::::::::::: 4

احنه اجينه يالعقيله و احنه نعرف بالمصير
و اليضكم احنه ضده نصيده و الله لو يطير
احنه عدنه ازغار كلها بس الحسين الچبير
و اليعادي جبير عدنه نجيبه يم رجله اسير

المريض گليبه ما فاهم ابد عشگه
مثل الحسين ابد بالدنيه ما نلگه
حنين بكل وكت يتلگه يا ملگه

نروح كلنه فدوه تحت جدامه
نفتخر مو جنده لا خدامه

نحسبه و الله الكل جريح ضماده
و كلنه نفداكم يعمة الساده

::::::::::::::::::::::::::::::::::::::::: 5

يالعقيله جهزينه روح من گبل السيوف
الواحد البينه يساوي الف من هاي الصفوف
و البواتر لينه زينب امني ما تطعن تطوف
حيث باجر لمن انهب نعجّبه كلمن يشوف

نعجبه يضل يشاهد نادم و حاير
و اليعاديكم انحسبه شخص كافر
و نسويها قيامه باجر العاشر


هذا اقل ما ننطي لجل الغالي
هوه عالي من علو العالي

حسين انطي گلبي لو بس راده
و كلنه نفداكم يعمة الساده

:::::::::::::::::::::::::::::::::::::::::

#الحمد_لله_على_نعمة_الحسين
✍️ الاقل زين العابـدين السعدي

#نزله_الانصار

سجلنه حبيب .. خدام الغريب

::::::::::::::::::::::::::::::::::::::::: 1

سجلنه خدامه نواسي كل عزه
و يمنه اكتب (مجاني) ما نطلب جزه
حسين كتاب و طلسم شنهو اليوجزه
مگطع هوه و لمنه اعظم معجزه

و هوه اعظم طبيب .. خدام الغريب

::::::::::::::::::::::::::::::::::::::::: 2

سجلنه بلطمتنه و المدمع ختم
و الخدمه مو سهله و تريد الزلم
و خدامه تحزمنه و الخدمه الحزم
و كل صعبه برجلينه نسحگ ما نهم

و الحب ما يغيب .. خدام الغريب

::::::::::::::::::::::::::::::::::::::::: 3

صار حسين ويانه نأدي جن فرض
نترك كلشي و نحضر للمجلس ركض
هالخدمه نحفضه و من الله الحفظ
نعثر من العثره نقوه و نتعض

و للعاشر نحيب .. خدام الغريب

::::::::::::::::::::::::::::::::::::::::: 4

تعلمنه من عابس ما نهوه و نذل
و الأعوج منجامل و نگله عدل
درب حسين بالله حتما متصل
تعلمنه من اصحابه مانگطع وصل

يسهل مو عصيب .. خدام الغريب

::::::::::::::::::::::::::::::::::::::::: 5

شما رحنه عن بابه يم بابه نرد
كلشي نبعده و عنه لا ما نبتعد
تعلمنه من عشگه نعلم كل فرد
اليشمرنه بحجاره نرجعها بورد

و عدنه مو عجيب .. خدام الغريب

:::::::::::::::::::::::::::::::::::::::::
#الحمد_لله_على_نعمة_الحسين
✍️ الاقل زين العابـدين السعدي

#ليلة_العباس_ع


من رخصتك يا كمر خلينه نحجي
و لأن من زندك رحلنه هوايه نبچي

الفركتك يا بالفضل
من دمعنه ما نمل

........................................ 2

آنه اليمنه أنوح و استمع وني
و لمن فاركيتك خاب كل ضني
و اتعذر اجيتك بلكي تقبلني
مو طبعي اضل فوگه الرمل ذلني

انه جفك حكي لو ابجي و أريدك
انته فايدني و انه اللي ما افيدك

طايح بعينك نبل
من دمعنه ما نمل

........................................ 2

انه لمن طحت ادري وكع سيفك
و اجيتك كاصده يالما ترد ضيفك
و ادري ما ترده الداخل مضيفك
عسه لزندك تردني و ضلت بكيفك

شفت ضيم و بس وِنّيني عندي حيله
مثل طفل و ماكو الد يشتكيله

و يتمتني جن طفل
من دمعنه ما نمل

........................................ 3

و انه اليسره اجيتك جية الملهوف
ولو مسدوده عينك ما اضن تشوف
زغير هواي صاير طولك المعروف
دگوم انهض يالتخيط الجرح و تروف

هيجي صارت رحلتي عنك طويله
و من اشوفك فرحتي مثل العليله

يا بدر يمته تهل
من دمعنه ما نمل

........................................ 4

مثل ون الثواكل و انتظر جيتك
الدنيه تغثني بس انته الفرح شفتك
ثلث تيام جنها سنين انه عفتك
اجيت و ارجو تقبلني و انه بختك

الونه تطلع بيها بس اربع حروفك
الأصابع انطي بس حي كون اشوفك

لا طريح و منجتل
من دمعنه ما نمل

........................................ 5

صح احنه جزء يا بالفضل منك
شكد ردنه السيوف اهنا يتركنك
و حامينه لجن كطعنّه و آذنك
و عله زينب ابد مو من الم ونك

انته ما تبجي و تون جي ماكو ايدك
تبجي جي ضل وحده هنانه عضيدك

و تنتظر زينب هزل
من دمعنه ما نمل

........................................

#الحمد_لله_على_نعمة_الحسين
✍️ الأقل زين العابدين السعدي

#ليلة_العباس_ع


لا تعتذر يا عباس
وفيت الي بوعودك

........................................ 1

ما قصرت كلك شجاعه و غيره
انته الچبير و كربله الزغيره
يا طلسم انته و النهر تفسيره

تفسيره طبرة عامود
و سهم الذي شگ جودك

........................................ 2

من المهد اعرف يخويه اطباعك
شارب لبن مدري بخت برضاعك
الخِدّر سفينه و اليمشي شرعك

مصيونه و الله النسوان
يا بالفضل بوجودك

........................................ 3

مصيونه يا زلمه الذي يحاجيهن
و ايد القدر ما تگرب و تلويهن
هسه الشمر لو حرمله يسب بيهن

ينادن يخونه العباس
گوم افزعلنه بزودك

........................................ 4

كوم افزع و فل الحبل نادنك
يا خويه نمشي شو يساره عنك
ندري الجفوف و طبرتك ياذنك

كوم انهض و خلي ايديك
يا خونه فوگ ازنودك

........................................ 5

خليهن و شمر الخنه گص ايده
احنه يساره منه شهو يريده
الكوفه عله ظهر الخيول ابعيده

ممشه و عله الهزل ذيج
و نرجع نجيك انعودك

........................................ 6

محلل يخويه ارتاح نام بگبرك
زينب كفيله و خلي بارد صدرك
و عمري عسن لا طال فدوه العمرك

و نتلاگه يا خويه هناك
يم فاطمه معهودك

........................................

#الحمد_لله_على_نعمة_الحسين
✍️ الأقل زين العابتدين السعدي

#نزله
#أو_لمة_عزاء

خلي بس اعله اللطم تعويدك
غير ابو السجاد ياهو يفيدك

........................................ 1

اخذ مني هالنصح يا صاحبي
ابجي بس اعله النبي و ال النبي
خلي دمعك للعفاف الزينبي

و خلي بس يا كربله ترديدك

........................................ 2

بالدمع بالطمه خلي راحتك
و عالكفل خدر اخته رخص دمعتك
خلي بس حسين تصبح كلمتك

و بنزول الدمعه يصبح عيدك

........................................ 3

تريد تربح انه ادليك بحلول
و التريده انه اضمنك تنول
يا ابا السجاد بس تندب تگول

التريده يصير حتما بيدك

........................................ 4

يصير حتما تاخذه صك الامان
تجوز رأسا بي تفوت انته الجنان
بس فقط لحسين عود هاللسان

و لا تخلي بالذنب تگييدك

........................................ 5

لا تخلي ذنبك يسد جنتك
نعمه هاذي و احفظ انته نعمتك
لمن الزهراء خادم سمتك

يعني مخلص بالخدامه تريدك

........................................ 6

مخلص تريدك تذل ليها النفس
و بمعاني كلمة الـ(خادم) تحس
هالمكان تريده جن الله و انس

صفي گلبك حته خير تزيدك
........................................

#الحمد_لله_على_نعمة_الحسين
✍️ الأقل زين العابدين السعدي

#رئيسية

شمقدم و ال النبي رفعوني
هواي البشر عن هالامر سألوني

شمسوي و عليت الراس
تسألني شكأل للناس

........................................ 1


اجاوب و بجوابي حيل اضل افخر
اليصغر بالخدامه و يالسبط يكبر
الما يدري تره الدنيه خلك معبر
و ناخذ منها قطعة جفن مو اكثر

اترك دنيتي و ابقه اجلب بيهم
خادمهم و محسوب اضل اعليهم

و أبقه الآخر الأنفاس
تسألني شكأل للناس

........................................ 2

اجاوبهم و أصون النفسي و لساني
واحدنه يحب و يطاوع الثاني
حسين الوالد الخدام خواني
و المجلس احبه و هوه رباني

رباني واجب ما اتركه المنبر
شما ازغر بدرس الخدامه اكبر

و يبقالي العشگ مقياس
تسألني شكأل للناس

........................................ 3

يحبني حسين لازم طبعي متواضع
و شينطيني الله مسلم و قانع
و اتعذر اذا مني غلط طالع
اليتعذر لاخوته يموت هم سامع ؟

الآسف زغيره و بيهه يكبر شاني
حسين الأبو و اعله الصبر رباني

و علمني الوفه العباس
تسألني شكأل للناس

........................................ 4

اجاوبهم و اكول الخدمه مو مظهر
الخدمه تعتمد يخواني عالجوهر
الخدمه اكبر تره من هالحجي و اكبر
الما يمشي عدل ويه السبط يخسر

اليمشي بالخدمه نجاحه حاسم
و اقرب مثال انعرفه سيد جاسم

بشانه ينحلف نبراس
تسألني شكأل للناس

........................................ 5

أجاوبهم و أوصي نفسي و الوادم
حسين بكربله ما منه شي سالم
لا خادم يگص و ينكل بخادم
خلينه بعزانه نواسي بالقائم

نواسي الامام الذبحوله احبابه
الكل لحضه يبجي اعله السبط و مصابه

خلي بجرحه عدنه حساس
تسألني شكأل للناس

........................................

#الحمد_لله_على_نعمة_الحسين
✍️ الأقل زين العابدين السعدي

#رئيسية

وفاءً يا إمام | لك العزا يقام

و المدامع و اللطم واجب عليه
حسين وفقني الخدمتك للمنيه

........................................ 1

بگلبي مو لطميه شايلك قصايد
انه حالي وياك مثل الأهله فاگد
و شتضنه الفاگد اهله يبقه گاعد
لو يسولف يضحك و دلاله بارد

دمائي أفتدي | قليلاً سيدي

و اذكر اسمك كل صباح و كل مسيه
حسين وفقني الخدمتك للمنيه

........................................ 2

گلبي بسمك سجليته نبضه نبضه
بداعت سكينه و رقيه اعليه ارضه
و انته التحبه و تقبله شكبره حضه
انته لو ترضه عليه الباري يرضه

عزائي مسكني | بكربي مأمني

و الطم و الدمعه للخادم هويه
حسين وفقني اخدمتك للمنيه

........................................ 3

كلشي ما اريد بدنيتي بس مأتم
الينعه لجلك سيدي اي و الله غانم
ما يموت اليخدمك يبن الأكارم
و ليها صار اقرب مثال الناعي جاسم

و ذِكرُهُ بَقى |مضى و ما مَضى

ما يموت الينعه للراحت سبيه
حسين وفقني الخدمتك للمنيه

........................................ 4

و الله ما رايد أبد غير المناحه
و المَشّقه بخدمتك احسبها راحه
منهو مثلك بالطعن راحت صفاحه
مطيب جروحي و رمل تارس جراحه

يا سيدي الكبير … و عبدك الصغير

يرجه منك تنظره بهاي العزيه
حسين وفقني الخدمتك للمنيه

........................................ 5


ما اعيشن عالهوه العيشه اعله دمعي
و كون مو ضلعك تهشمه الخيل ضلعي
امي ربتني و تگلي حسينك انعي
و صار بس اعليك انعه و هذا طبعي

و اعلم البكاء .... لأجلك شفاء

الدمعه توگع حتماً ابچف الزچيه
حسين وفقني الخدمتك للمنيه

........................................

#الحمد_لله_على_نعمة_الحسين
✍️ الأقل زين العابدين السعدي

#ليلة_القاسم_ع

........................................

يمه ذكريني اذان و حان بيه
يمه ذكريني و ذكرتك مغربيه

و دمعي همل ليك جروح
تحمل فراكك يا روح

........................................ 1

يحروفك احله من الشهد
ووجهك يخجل المرجان
جان الابو يعزب اليجي
و بيدك دلال و فنجان
من الله لا ينطي الدهر
الخله دليلي حزنان
ماخذ من عيوني مَلك
لا و الله ما گول انسان


يا يمه جروحي .... و جروحك سويه
يا يمه جروحي .... تندبك حن عليه

يمه خِذَتّك يا سوح
تحمل فراكك يا روح

........................................ 2

يالروحك رويحة ورد
ترفه و تريد مداراة
و امك يبعد امك تره
خلافك گضت بالويلاة
اتمنه و الله بهالعمر
ترجع الراح الونات
جا ابقه اون طول الدهر
حته يعاودلي المات

روحي تريدك .... من گبل المنيه
روحي تريدك .... لجفوفي تجيه

گلبي ويه راسك مجروح
تحمل فراكك يا روح

........................................ 3

يا كلمة اليمه و علي
شكد حلوه من اشفافك
يا ضوه عيوني يالولد
واجب يصلي الشافك
هو الحِسِن مخلوق الك
لاخر نفس ما عافك
كل الجمال او طلته
كعبه انته كام و طافك


يا جرح العاشر .... راواني الاذيه
يا جرح العاشر .... خلاني سبيه

و الفرحه طير و مذبوح
تحمل فراكك يا روح

........................................ 4

ما سامعه جلمه تغث
منك يوجه الرحمه
داري خليه و موحشه
يا يمه صعبه و زحمه
الفارك ابن فارك شمس
دنياته تصبح ضلمه
و الفاركك يبن الحسن
معناها فارك امه

يغله من روحي .... يالمالك كياني
يغله من روحي .... فراكك ضيعاني

عايفني للغبره تروح
تحمل فراكك يا روح

........................................ 5

اسمك و لا انساه ابد
لا و الله يا ضي العين
الينساك معناها نسه
الحسين و مصاب حسين
كل لحضه التمرني كمت
اتمنه يلفيني البين
نتلاكه كلي يا وكت
يا يمه و مجانك وين

روحي ملهوفه .... و مجمر دليلي
روحي ملهوفه .... اكصد و اعتنيلي

و الدمعه للملگه تلوح
تحمل فراكك يا روح

........................................

#الحمد_لله_على_نعمة_الحسين
✍️ الأقل زين العابدين السعدي

#نزله

اشهد انك حبيبي يا ابا عبد الله

........................................ 1

اشهد ان العشك صاير شعاري
و الله مو بيدي صبح بيدك قراري
من ذنوبي سيدي ليكم فراري
و هذا تعبي و ناتج الخدمه ثماري

و انته لجروحي طبيبي ... يا ابا عبد الله

........................................ 2

كل وكت بسمك يردد بس لساني
انه عاري و خدمتك ثوب و كساني
منهو مثلك من ظلامي طلعاني
و بالمجالس و المواكب و طناني

و صار بالمجلس نصيبي. ... يا ابا عبد الله

........................................ 3

افتخر انه بعزائك گلبي ذايب
و اختنك لو ما اشم عطر المواكب
و الله بالخدمه جرح دلالي طايب
جني ابنك ما تردني مره خايب

يا دعائي و يا مجيبي ... يا ابا عبد الله

........................................ 4

استعد وكت العزه جن عندي طاعه
لو فرض عندي ولا فضل ضياعه
يا حسين و خدمتك اشرف بضاعه
بيها دنيه و اخره اخذ شفاعه

و ابقه بيها الحد مشيبي ... يا ابا عبد الله

........................................ 5

روحي ما تروه بعذب تروه بمجالس
انه ذاكه العاللطم رباني عابس
انه للخدمه فقط بس عندي واهس
و للعزيه ركضتي ركض النوارس

يا فرحتي و يا نحيبي .. يا ابا عبد الله

........................................

#الحمد_لله_على_نعمة_الحسين
✍️ الاقل زين العابدين السعدي

#نزله

افني عمري الخدمتك يبن الزجيه

&&&&&&&&&&&&&&&&&&&&&

گلبي ناذرلك نذكر كل المشاعـــــــــر
وياك اعيش ايامي كلهن يوم عاشــر
و الله و بهذا الوسام امشي و افاخر
بحبك اتفاخر لون سموني كافـــــــر

و الله ما وفيت نص دين العليه

&&&&&&&&&&&&&&&&&&&&&


و الله ما أهوه الفرح أهوه المجالس
و عالمجالس و اللطم رباني عابــس
ما تلوگ إعليه بس سود الملابــــس
بالعشگ أول ألا هل من منافـــــس

بصدري باقي هالأثر تشهد اديه

&&&&&&&&&&&&&&&&&&&&&


عيوني ما تهوه السعد تهوه المدامـع
و انه خدمك و افتخر بالخدمه قانع
بالهخدامه ما ردت جاه و مطامــــــع
و لحروفك سيدي دلالي خاشـــــــــع

و نطي عمري و ما اساوم عالقضيه

&&&&&&&&&&&&&&&&&&&&&



حروف اسمك سيدي تجري بدمائي
و حللت دمي و لگيته كربلائــــــــي
لغيرك ابدا و الله ما اكتب و لائــــي
من ابو فاضل تعلمته وفائ

و ابقه ثابت عالعهد حد المنيه

&&&&&&&&&&&&&&&&&&&&&


انت عندي الأول و محسوب كلشـــي
بس عله ذكرك ينگع دمعي رمشــــــي
انعي لجلك انه كاعد انه امشــــــــــي
و انعي حته بموتي لو شالولي نعشي

و انعه و ابجي اعله الغريبه الهاشمية

&&&&&&&&&&&&&&&&&&&&&

حروف اسمك سيدي اجمل قصيده
منهو مثلي خادم و اخذ الأريــــــده
و الاخدمه بشر لا هاذي بعيــــــــده
اسمه مفتاح و جنان الباري بيـــــده

روحي ما تنساك لا تنسه السبيه

&&&&&&&&&&&&&&&&&&&&&

#الحمد_لله_على_نعمة_الحسين
✍️ الاقل زين العابدين السعدي

#ميمر

تدعيلي امي بكل حين
الله يزيدك خدمه

........................................ 1

تدعيلي و تكلي ييمه إقراله
و تكلي كلنه فدوه اله و لعياله
لحسينك عيونك تضل هماله

و وصتني لو طيح بضيج
انخا و اكولن بسمه

........................................ 2

اتكلي خدمتك خلها ويه انفاسك
الهذا الامام الكبرك وي ناسك
مكطوع راسه و هوه رافع راسك

لو ما تخدمه بدنياك
لا ما احسبك زلمه

........................................ 3

لو صار مجلس اول اللطامه
و من تنذكر زينب تدگ عالهامه
واسي الامام الرضرضوها اعضامه

هذا الامام المذبوح
و الخيل تسحگ جسمه

........................................ 4

صخام الجدر يمه تمسحه بهامك
و تگله احسبني احد ايتامك
و لمن تخدمه يمه حفي اجدامك

حته تحس بالام
و تحس ييمه بهمه

........................................ 5

اكنس مجالس يمه الطم و اقره
شتقدم شويه تره للعتره
خلي بضميرك ترضي بس الزهره

ترضي الاهك بس كون
و ترضي الحسين و امه

........................................ 6

لو متت يم گبري إگف و انعيلي
و اقره ييمه بگبري دمعه ابچيلي
امك الزهره اليتم لا تشكيلي

عالطاهره و عالمذبوح
دمعك ابد لتلمه
........................................ 7


اخدم عدل يمه خدمتك تبگه
اصبر لون بالخدمه تتعب تشگه
خلي امامك بالضمير اتعشگه

(( و خلي احروفه بطرف السانك ))

........................................ 8

خلي الخدامه يمه هي مضمونك
و حسينك اتشيله بدال اعيونك
اخدم ييمه لا تضن يجفونك

(( و بالمحشر خبصه و يلگونك ))

........................................

#الحمد_لله_على_نعمة_الحسين
✍️ الاقل زين العابدين السعدي

ابوذيات عاشورائية

:::::::::::::::::::::::::::::::::::::::::١

لجلكم يهل كـــــوفه … طر فله حسين
الحكم ما جان دايـس …طرفه لحسين
بيمينه و رفع راسه و … طرفه لحسين
يريد الكم سماح ابن الزچيه

:::::::::::::::::::::::::::::::::::::::::٢

گضة خوتهم التــــــنگط …محنه
دهرنه إسبعطعش نجمه …محنه
و حنين النوگ حــنّي لا … محنه
إخوتي مذبّحه و آني سبيه

:::::::::::::::::::::::::::::::::::::::::٣

عله ظــــهر الهزيله … مـاتم حسين
عرش بارينه هذا … مات أم حسين ؟
بدفنته وسفه و الله … ماتم حسين
راسه و جسمه ما ضلن سويه

:::::::::::::::::::::::::::::::::::::::::٤

نشوف الخيمه حاقد … وجهه بينه
و تمنــيــنّه وجـــوده … وجه ابيـنه
تره الحـــادي عگبگم … وجهه بينه
الكوفه وشام و الديوان اميه

:::::::::::::::::::::::::::::::::::::::::٥

صرت حرمه وحيده بدون … واليان
بچه الحالي الإنس عبـاس … واليان
شكثر راحن يخويه الحيد … و الين
اشد منهن عَلَي ديوان اميه

:::::::::::::::::::::::::::::::::::::::::٦

شـفت حاله يـزيـنب … ما رداني
يگلي إرجع يخـويه … مـارد أني
يگلي السيـف خويه … ما رداني
رداني الشگ جربتي و هايهيه

:::::::::::::::::::::::::::::::::::::::::٧

لَـوَن حــاضــر يــخـويه … ما لــمتني
الأرض و السبعه عگـبك … مـالمّـتـني
أحـسّـن مـتني طـايـــح … ماله متني
هِدل مَتني الشتم و إسياط اميه

:::::::::::::::::::::::::::::::::::::::::٨

الجرح مـن الهـجر عـبـاس … يدّي
و عگب يدّك تعال و شوف … يدّي
عله جسـم الاخو و ناديـت … يدّي
تعال حسين داسو باعوجيه

:::::::::::::::::::::::::::::::::::::::::٩

حقيقي عالــمك مــاكــو .. وهم بي
و احبنه الذي يخدمك .. و أهم بي
حفظ أهل الكهف ذكرك .. وهـم بي
الك نصبو عزه و ناحو سويه

:::::::::::::::::::::::::::::::::::::::::١٠

حسين من السحك راحت … وصل بيه
و نزيف الدم لحد جدمه … وصل بيه
يهون اعليه ذبح ابني … وصلبه

و لا انضر اخوي اعله الوطيه

:::::::::::::::::::::::::::::::::::::::::١١

غير الحب لدربك … ما هداني
بخدمتك راسي عالي … ما هو داني
و يچف الرحمه چفك … ما هداني

لان أنحب و انوح اعله السبيه

:::::::::::::::::::::::::::::::::::::::::١٢

يحادي النوك بله - مره لبني
و لا زعلته و الله _ مره لبني
ابد ما رضعيته - مره لبني

اذا ما جنت اوصيه بأبيه

:::::::::::::::::::::::::::::::::::::::::١٣

عاشوريه - زينبيه

جرحي بگلبي ما يبره … و لا هاد
و حزني مچلب بچفي … و لا هاد
و لا يونس صبر صبري … و لا هود

عگب ما حرگوا الخيمه عليه

:::::::::::::::::::::::::::::::::::::::::١٤

الدمع عالمنذبح ما يوم ... كف لاي
و تگيد بالحبل يا حيف ... كفلاي
عكب عباس ذاك الجان .... كفلاي

يسموني الغريبه الخارجيه

#الحمد_لله_على_نعمة_الحسين
✍️ الاقل زين العابـدين السعدي

و لا انسه الشماته و دگ ... طـــــــب الهم
مو بت نبي چن كافر ... طـــــــــــب الهم
اهل الشام ما يرهم ... طــــــــــــــب الهم

مرضه و المرض بغض الزچيه

:::::::::::::::::::::::::::::::::::::::::

تروح ادموعي الك فدوه ... وعــيني
و درب حبك على الرحمه .... وعانـي
لَوَن غيرك احب اتعب ... و أعانــــــي

و تضل دوم الندامه تعيش بيه

:::::::::::::::::::::::::::::::::::::::::

#الحمد_لله_على_نعمة_الحسين
✍️ الاقل زين العابـدين السعدي

#استلالية_محرم_الحرام ١
____

باب امنياتي اسمك حياتي
عن عاطفه و ايمان اسمك حياتي
_

بيك شفت الدين قيم ابلا وجودك شلي بيه
انته مشكاة الهدايه الله حط كلشي بديه
گلبي لو ما يهوه اسمك ابفلس ما اشتريه
آنه كل ايامي انته و الهوه العايش عليه

ابلا طاريّك ظلمه الدنيه
و عميه العين ابلا مصباح
يا خير الغطاني ابعمري
انته الجاي و انته الراح

كلشي بچفوفك وداعت حروفك
و بمصحف الوجدان اسمك حياتي
__

ضيعت كلشي و لگيتك و صار إلي ذكرك حياة
بيك منك الك عمري و اسمك ابشفتي يبات
اشرب الماي و أسلم عالشفاه الذابلات
گلبي دگاته اعله اسمك گلبي لو ينساك مات

انته الميت و انته العايش
و انته الحاكم للازمان
ينبوع الكوثر بچفوفك
طافح بس ميت عطشان

كوثر دليلي ضامي بسبيلي
يالباقي عالتربان اسمك حياتي
___

حرّزت فكري بطفوفك من مفاهيم الزمان
الدهر ما بعّدني عنك انته لحساسي حنان
من مصابك و المصابك عايش ابنار و دخان
خيّمت يم طاري حزنك و دمعي وچدله مكان

رافگ ناگة زينب دمعي
من الخيمه الحد الشام
عاشورك لو هل اهلاله
يتوسم صدر اللطام

رسمت دمعتي حزني و حسرتي
يالمنذبح عطشان اسمك حياتي
___

عاشرت احزاني لجلك و فارگت كلشي بلاك
الليل من ايمر ظلامه دمعي بعيوني بچاك
امصاحب الحسره ولچمتي و روحي تاركها وراك
ابلا هواك اتموت ريتي و عيني تعمه ابلا ضواك

تيّهت اصحابي امن الدنيا
من اندليت اجروحك وين
ما يكفي امحرم ابچيلك
قررت انحبلك للبين

يبقى نحيبي لجلك حبيبي
يا معجم الاحزان اسمك حياتي
__

اباب مأتم حزنك آنه واگف بلوعه و عذاب
رايد امن ادخل عزائك ينترس گلبي مصاب
لون أسمع باقي نايم اتلث ليالي عالتراب
منسحگ مسلوب ضامي وچم سهم بحشاك طاب

مذبوح و جسمك عالغبره
و راسك يفتر فوگ ارماح
مسبيه اعيالك عالهزل
و الي يحديها الذباح

الحره الابيه تدخل سبيه
اعليها الدمع خلصان اسمك حياتي




حسين الأمين

#استهلالية_محرم_الحرام ٢ ( نزله )
_

هاي الشعائر للحشر موجوده
حافظها ربنه وبالكتاب اعهوده

آيه بكتابه امنزله آيه بكتابه امنزله
__

هاي المجالس بالدمه نشريها
ليوم الحشر الله الذي يحميها
يلي تريد من الأصل تلغيها
نص بكتاب الله أمر نحييها
(( نحييها بدمنه للمحشر ))

يلي تحارب افتهم مقصدنه
لهاي المجالس منرخض كل دمنه

آيه بكتابه امنزله آيه بكتابه امنزله
_

الصادق امرنه واحنه تدري انطيعه
لا تدخلنه بكل سنه تشريعه
هذا اللطم بالجنه هم منبيعه
قول النبي خصانه احنه الشيعه
(( خالقنه الباري الخدمتهم ))

احذر كلمتك لا تمس مبدأنه
لوما المجالس الله ما خالقنه

آيه بكتابه امنزله آيه بكتابه امنزله
___

نحيي الشعائر من لطم و قرايه
يا من تعارض كلمن و حر رايه
شوف السنه چم موكب ومشايه
خليها بذنك هاي منه احچايه
(( ما نترك للموت الخدمه ))

بالجنه باچر موكب النه تشوفه
و اليلطم العباس دون جفوفه

آيه بكتابه امنزله آيه بكتابه امنزله
__

قادم محرم و المدامع حمره
و النبي حاضر بالعزه و الزهره
يلي تمانع افتهم هالعبره
كل نبي مرسل واگف يدگ صدره
(( و حيدر يلطم طابر راسه ))

و حسين يحظر مجلسه ايحيينه
للجنه ياخذ ياهو تهمل عينه

آيه بكتابه امنزله آيه بكتابه امنزله
____

لو ما المأاتم چا تضيع الوادم
يل الحاير بذنبك تلوم و نادم
احضر مجالس و اندب و ظل لازم
ينغفر ذنبك بس تنظرك فاطم
(( و يتسجل أسمك خادمها ))

من الله هاي التعزيه هم رحمه
من تدخللها أدخل بكل همه

آيه بكتابه امنزله آيه بكتابه امنزله




حسين الأمين

#استلالية_محرم_الحرام ٣
__

مصابك نبي و عايش بغار خيامك
يل عالترب فرشت الخيل اعظامك

نايم وسط حر الشمس ساكن دليلي
___

الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض امفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس

بألف و تسعمية جرح ساكن دليلي
___

اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع

يل عالرمح راسك بقى ساكن دليلي
__

طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك

تبقى على طول الدهر ساكن دليلي
___

شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل

وبجروحي بعدك ما متت ساكن دليلي
____

يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب لأجلي متحمل تعب
سيوف و ارماح و جراحات السهم

گلبك ردت و سلمته اليه بلا ثمن
راس برمح و عيالك لأجلي انسبن

يالمنذبح و المنسلب ساكن دليلي





حسين الأمين

#استهلالية_محرم_الحرام ٤ ( نزله )
_

الله لا يحرمنه من هاي المجالس
__

الصادق اليروي فضلها و عنها اسمع قصته
اليحضر ابمجلس حسيني و يصرخ ابيا ليتى
ينحسب زاير احسين و گعد جوه گبته

من مجلسه زاير مسه الي حضر بالمأتم
منه انقبل افضل عمل الي لطم و محزم

الصادق اليرويها مو فكره و وساوس
الله لا يحرمنه من هاي المجالس
___

بالخصائص اقره عنها و دقق بكلماته
استشهد اويه احسين چنه الجالس ابعزياته
و رحمة الله تنزل اعله الي يهل دمعاته

لا لا تظن هذا الحزن ابلايه فكره و غايه
كلشي انوجد لابد عقد للحسين اقرايه

لليخدمه اتخصصت آية ننافس
الله لا يحرمنه من هاي المجالس
___

الما حظت بالحج سنينه و يحج راد بگلبه
خلي يجلس جوه منبر و العزاء اينصبه
ينحسب طاف المقام و لبى وسط الكعبه

زاير صفه مروه صفه ألي يلطم صدره
طاف انحسب حجي انكتب العينه هلت عبره

ما يفارگ مجلسه لو يرد عابس
الله لا يحرمنه من هاي المجالس
____

إلي يحضر مجلسه يلطم و تجري عينه
تحت ظل العرش باچر يگعد اويه حسينه
و اليريد الجنه ينشد على المأتم وينه

هاي الصفه مو عاطفه بالسند موجوده
و الغانمه ابمأتمه الخير كله ابجوده

هالمجالس للبشر اعظم مدارس
الله لا يحرمنه من هاي المجالس
____

اليبچي لحسين و دموعه اعله الوجن تتجاره
ايطيح الله اذنوبه كلها و ما يعذبه ابناره
و بالحشر ما تضمه شفته و لا تزيغ ابصاره

يوم الحشر كل البشر العين منها تعمى
إلا اليون يدمي الجفن للحسين و دمه

ينحشر فرحان مو خايف و بائس
الله لا يحرمنه من هاي المجالس
_

لون ما تبچي تباچى لو سمعت امصابه
لو فقط تنويها اسمك ينكتب بكتابه
حتى انفاسك تسبح و الأجر بحسابه

ابمجلسه تتنفسه الهوه تاخذ اجره
كلشي ابثمن لم الحسن لو بحجم الذره

الثواب اتحصله لو فقط جالس
الله لا يحرمنه من هاي المجالس




حسين الأمين

#استهلالية_محرم_الحرام ٥
___

فده العمر الك نذر
عيشني بحسينيه كون ابچيلك يوميه
___

رايد بجرحك حياتي ابلايه جرحك كلشي ما تسوه الحياة
أخذ بيدك عمري كله كون كل لحظه الجفون امبللات

عيشني الألم و افجعلي دلالي
رايد كل حياتي اجروحك اگبالي
شما دار الوكت بس انته البالي

مثل وهب الك وهب
عمره بصافي النيه كون ابچيلك يوميه
___

لچمه گلبي من طفوفك العذاب اوياك نعمه مو عذاب
احسبني گطرة ماي بلكت تروي عبدالله و ترده للرباب

رايد صوره من طفك تجي بعيني
يم حرگ الخيم و اللوعه وديني
و بذاك الجمر ابنص گلبي چويني

دموعي دم على الخيم
جمر الخيمه اطفي بيه كون ابچيلك يوميه
____

افرشني يم باب المخيم هيچ و تمر بيه سحگات الخيول
خاف يبقى ضلع سلم اخذه وي راسي على الهزل يجول

رايد راسي ينشال برمح مثلك
و لو ضربوها علويه يدنگلك
كون الضيم يترسني مثل اهلك

على الرمح أنه انذبح
رايد شوغة علويه كون ابچيلك يوميه
___

هاي كل احلامي بيدك طرزتهن چلمه چلمه بالدموع
خاف ما استاهل آنه هاك گلبي و شوفه بس لجلك يلوع

وقف كل المدامع بس على بابك
اترسهن و اوشلهن على امصابك
اقبلني عبد مملوك لاصحابك

عبد ردت ألك صرت
اقبلني و هاك ايديه كون ابچيلك يوميه
__

الله لا يحرمني منك من عزائك من خدمتك يا حسين
الكون لو بچفوفي ينحط ما ابدله بدمعة الخد و الونين

خليني بعزائك محترگ گلبي
رايد ييدي خدمه و ينتهي دربي
چني اويه اليتامه هم رحت مسبي

انتهى الحچي فقط بچي
امحلفك بالمسبيه كون ابچيلك يوميه




حسين الأمين