منهاج محرم الحرام ١٤٤٦ هجري
ليلة العباس  عليه السلام



الله اكبر اذن الطف
النجمة كلي شلون توصف
عباس واضح لا يُعرف
لأجل العقيلة ناذر الجف ..... عباس واضح لايُعرف
###############################
عباس جن كوكب سماوي
بعيونه كل الكون ضاوي
متظل جيوش اليوم ناوي
هذا اخو زينب كله غيرة
وبخرزة منه تموت ديرة
موت الزلم شيخ العشيرة .........عباس واضح لا يُعرف
#############################
راعي البطولة والشهامة
من حيدره عنده كرامه
حتى السمه عاشت غرامه
بالموزمة جن موت نازل
غيرة علي بعيونه شايل 
محلة الكفالة لبو فاضل .......... عباس واضح لا يعرف
##############################
عالمهرة صاعد ويتبختر
والجيش كله وجه اصفر
اشجع مقاتل موت احمر
لو ضاكت الوسعه بإهلها
وكت الشدد سيفه يحلها
واخشوم العده كَسره كلها ...... عباس واضح لا يعرف
###############################
بتاره بيده ولو نزلهم
لسابع عرك يكطع نسلهم
لو ضهضب يعرفونه كلهم
ضرغام تشهدله الحرايب
احتارت وصاحت كتايب
عباس لو حيدر يحارب ......... عباس واضح لا يُعرف
###############################
زلزال حذروا ولله زلزال
زلمة ويعادل الف خيال
من هسه خطة تصير بالبال
طفرو نهر لا لا  لتمشون
القادة من اسمه يخافون
عباس لو شفتوه تموتون ......... عباس واضح لا يُعرف


حسين مجيد العميدي

منهاج محرم الحرام ١٤٤٦ هجري
ليلة العباس  عليه السلام
(يسبع الكنطرة)

روحي مجمرة         يسبع الكنطره   
خويه لمصرعك       جيت ميسره  .....يسبع الكنطره
$$$$$$$$$$$$$$$$$$$$$$$$$$$$$$$$$$
جيتك والهلة وبكلبي حجي يعطش بيه نهر
بت حيدر علي علوية انسبت يا كافل قهر
بحماتك انه وادريبك كلف غير انته الكمر
اركض فازعة .......... لصوب المشرعة
بعينك صد إلي ............ انسه الفاجعة
يسبع الكنطره
#######@@@@@@@@@@@@@@@@#
يا عزي انتخي من بعدك انه طاحت خيمتي
عشت بلا وطن واجدامي انجون تجرح غربتي
خوية مخدرة رحت ميسره وهزلة ناكتي
عيني شابحة ........ بدمع النايحة
ترجع لو انه .......... اقره الفاتحة
يسبع الكنطره
###############################
ترجع ما اظن بس خوية شبعد ما كافي الهجر
زينب يا وفي بغربة واشتكي من ظيم اليسر
ومن موقف شفت من حز النحر لحسين الشمر
ساعته صحت ....... وللتل اركضت
لا اخوني شبعد ........ ياريت ومتت
يسبع الكنطره
###############################
يفراكك سهم جن حرك الخيم يا خوية صعب
أرد اعتب عتب تقبل زينبك امشي ويه الغرب
وسفه بنص زلم لا غيرة وشرف وبسوط انظرب
ازرك هالمتن ........ وازرك هالجفن
وحسينك شفت ..... صدره ينطحن
يسبع الكنطره
$$$$$$$$$$$$$$$$$$$$$$$$$$$$$$$$$
خوية لشوفتك مشتاكة وعلي عباس اندبك
جيتك والدمع من دم عل الوجه كوم لزينبك
ما ظلي صبر شمات شكثر واني بشاربك

مو طال الوعد  ......... ياخوية شبعد
كطعوا ركبته ....... حتى ال بالمهد........يسبع الكنطره


حسين مجيد العميدي

منهاج محرم الحرام ١٤٤٦ هجري
ليلة العباس  عليه السلام
(كفيل الخدمة)


يا كافل الخدمة ..... دخيلك دخيلك .... يعباس
##############
هاي اول الليلة ..... خادمك شد حيلة .... لعاشور الحزن
يا ضمان كل عمل .... دمعاتي للأزل....... ومايبردلي جفن
لمحرم ياوفي ما تبرد الحسرة
ياراية علي يا غيرة العترة
اخدم من الصدك ارزقني بالفطرة

ما تبرد الهمه........ دخيلك دخيلك ..... يعباس
######################
يا حلاة اسنيني .... رخيص ومغليني .... بالخدمة وعلي
من جفك عزم ....... يا شيخ الزلم ...... يلتسوه هلي
ما اسوه فلس ياسيدي بدونك
عابس خادمك خليني مجنونك
بلسان وكلب مولاي ممنونك

يا حيل ابو اليمة ...... دخيلك دخيلك .... يعباس
##########################
يا كفيل الخدمة ...... خادمك بالخدمة .... ما يثنيه تعب
ما يهمني الحاقد.......  بحبي الله الشاهد ... علمني وهب
استاذ الخدم في خدمة الغالي
حب وهب علمني حب المثالي
بغير العترة الله اعلم بحالي

ال نبي نعمة ...... دخيلك دخيلك..... يعباس
############################
رحمة الله وخيره ..... حسين ماكو غيره .... واله بالكلب
من حب عاطفة........ بل حب معرفة...... الحب والحرب
مولاي الكمر عون ومدد منك
ارزقنه حزن من عينك وحزنك
بحرورة سهم خليني اخدمنك

سهم العطش اعمه ...... دخيلك دخيلك..... يعباس
########################
خادمك منذورك ....من عطش عاشورك .... ازقني عطش
بهل شعور الصاير.. بصدري كون الحافر . وبالغبرة انفرش
ياريت انذبح فدوة إلك فدوة
ياشيخ الخدم يا مرجع وقدوة
عمري بخدمتك يابالفضل يسوه

من الكلب جلمة....... دخيلك دخيلك..... يعباس


حسين مجيد العميدي

منهاج محرم الحرام ١٤٤٦ هجري
ليلة القاسم عليه السلام
(أجمل انسان )

يا اجمل انسان ...... شو طولك ذبلان
يا فرحتي ويا دمعتي....... يا اجمل انسان
###########################
يا مهجة كلبي ...... ويا حبي .....  وفرحة عيني
يا اعذب نسمة ...... يا نجمة ..... تضوي اسنيني
شو طولك ذابل ..... يا باسل ..... يا اية ديني

بين الخيول اتحسسك ......  كوكب حنينك نازل
يا كمرة بعيون السمة ....... بيك السماء تغازل
مثل الصفات بطلتك ........ هيبة وجمال الكافل

يا نور الأكوان........ شو طولك ذبلان
يافرحتي ويادمعتي ...... يا اجمل انسان
####$#####################
يا مصحف روحي .... ياروحي ...... وكمرة ليلي
يا كنز العصمة ......... بس جلمة..... هدت حيلي
ما شوفك لحظة ..... لو ومضة ..... أيا ويلي

شفتك عطر بين الخيم ....... عنبر غرامك فايح
يل ما يوصفك اي وصف ...... بدمك جمالك سابح
يوليدي يا هرش الكلب ........ شوكي العيونك فاضح

مصحف عد عميان ....... شو طولك ذبلان
يافرحتي ويادمعتي....... يا اجمل انسان
#############################
ياحرز الضايع ....... والجايع ...... من شوفك يشبع
ياماي بصحرة ...... عالغبرة ...... طايح ومكطع
من وحي العاشر ..... والحافر....... ما خذلي مسنع

اكلف مقاتل والحرب ....... من سيفه كله اتحاذر
لو ضهضب وشد مهرته ...... ما يبقى واحد الفاجر
موجة غضب من كصته ...... تذبح الطير الطاير

ما ظلت اغصان ....... شو طولك ذبلان
يافرحتي ويادمعتي....... يا اجمل انسان
###############################
عايش بانفاسي..... بإحساسي....... نسمة من الرحمة
من لون عيونه ...... يسمونه .....  الزلمة ابن الزلمة
لو رف اجفونه ...... يدرونه ....... ما يخلف كلمة

وجه الفجر من كلبه اخذ ...... لون الجمال العنده
لو ميت ب أسمه سمع ....... روح ترد بسده
كوثر غرامه ويه الهوه ...... بشباح روحي شده

يا كوثر عطشان........ شو طولك ذبلان
يافرحتي ويادمعتي...... ياسر الأكوان
$$$$$$$$$$$$$$$$$$$$$$$$$$$
يا تعبي شظنتك....... مو حنتك........ جفينك تنطر
اتنطر طيفك ....... وبكيفك  ........ انه امك واصبر
يازرع إيامي ........ إحلامي ........ ما ظنه تخضر

ياذخري يا هيبة علي ...... ياذكرياتي الحلوة
فرة عيونك جن شمس ...... لو هيج لو ماتسوة
ذبلت شفاك من العطش ....... والنهر منه تروه

يا كوكب احزان........ شو طولك ذبلان
يافرحتي ويادمعتي ...... يا سر الأكوان


حسين مجيد العميدي

منهاج محرم الحرام ١٤٤٦ هجري
ليلة القاسم عليه السلام
(مرمر حالي )

ياروح امك يبني الغالي
افراكك هدني ومرمر حالي
ولا ما اهجع............يبني ارجع
افراكك هدني ومرمر حالي
###############################
يبني القاسم عود ليه وريح كلبي
تدري اخلافك انطر ملكه وضايع دربي
بس يايمه عيوني بهمه لجيتك تربي
نخوة واعرف مترد نخوه ارجع قربي

جا كلب امك ليش تعذبه
اعليه مصابك نار وغربة
وشلون اقنع .......يبني ارجع
افراكك هدني ومرمر حالي
###############################
يا روح امك بعدك انه بدمعي وني
اكظي ايامي بظيم مصيبة الاخذت ابني
وشلون اصبر تعرف جرحك زود حزني
ميته احلامي مثل الوردة وذبلت جني

بشوك ولهفه انطر ملكه
واذكر طولك واشهك شهكه
عيني تدمع .............يبني ارجع
افراكك هدني ومرمر حالي
###############################
فرحة عمري بشوفة عينك صد إعلية
بذاك الموقف انسه الحافر وهجرك لية
واركض ركضت طفل لامه بلهفة جية
حتى اتذكر عزي وفخري وانسه سبية

كاسر ظهري وزايد همي
يبني جاسم عرسك حلمي
جا ما اسمع ..........يبني ارجع
افراكك هدني ومرمر حالي
###############################بوحشة ثكلى وحزن الفاكد اكظيه ليلي
اذكر شفتك بالطف نايم بس ياويلي
مكطع شفتك وبيا حالة اخذت حيلي
تجوة ظهري كوم اعتازيتك تجيلي 

جمرة وتسعر لساه بيه
امك دير اعيونك ليه
بسمه واقنع .........يبني ارجع
افراكك هدني ومرمر حالي
@@@@#@@@@@@@@@@@@@@@@
ابجي بحسرة يبني جاسم عنك إنشد
كليبي يندبك ايا يمه ساكت مترد
بداعة زينب اسمع مني و لا لا تبعد
جازي ربايه وتعبي وحيلي يمه وعود

شيب راسي وكاسر ظهري
غيابك لوعة تشب بصدري
ولا ماينفع ..........يبني ارجع
افراكك هدني ومرمر حالي
 

حسين مجيد العميدي

منهاج محرم الحرام ١٤٤٦ هجري
ليلة القاسم عليه السلام
(عكيلي )

يوليدي ويا نور اعيوني
من اتروح تذبل اجفوني
###############################
امصابك يالقاسم جارحني
يغلاتك يبني ليش تعذبني
جم حسرة بحسرة تمرمرني
بغيابك باهت كل لوني
###############################
يافرحة عمري وضحكاتي
بعدك هاجت كل لوعاتي
وعرسك صاير كل حسراتي
بعدك خابت يمه ضنوني
$$$$$$$$$$$$$$$$$$$$$$$$$$$$$$$$$$
يالحزنك صاير موضوعي
وانه امك بعدك بدموعي 
جن نار وشبت بظلوعي
جم مرة صحتك خيعوني
###############################
فكدك يبني باك إحلامي
هيج حزني ونار إلامي
مكطع شفتك ولله وظامي
ومن طولك يبني يحرموني
#######$#######################
حيلي بايد يمه وطايح
وتعب ربايه مني رايح
مصابك يبني كليبي جارح
واخلافك رسومك يسبوني
###############################
بذيج الغربة ردتك شمعه
موش بنار تلاكي الدمعه
والفاكد ابنه جا شيقنعه
ريت بحذوك ويدفنوني
###############################
عندي حجاية تردلي يمه
يالقاسم جاوبني بجلمة
شاده بالي غيابك همه
وخلافك ثكلى يسموني


حسين مجيد العميدي

منهاج محرم الحرام ١٤٤٦ هجري
ليلة القاسم عليه السلام
(خرزة محبس )

قاسم يبني ............ خرزة محبس جيش بسيفك
قاسم يبني ............ ضهضب ليهم واخذ بحيفك
وصيتي لعمك...............ارخص دمك
ضهضب ليهم واخذ بحيفك
###############################
اكصد إله يمه واخذ ............ رخصة منه تقاتل
شد العزم وانه اندعي............... ولالا يهمك عاذل
بهدم الحسن كوم انتهض........ وبصيته كون تنازل
يحفظك إلي جدك علي......... وحيلك يشده الكافل

يوليدي اسمع .........طب الحومة وارفع راسي
يوليدي اسمع ........ كلك غيرة يانوماسي
ولا ليهمك ..........ارخص دمك
ضهضب ليهم واخذ بحيفك
###############################
يبني العهد توفي الوعد ...... للغالي رخص نحرك
وكفت عبد يمه تكف ..............وتكله سمعا أمرك
وتكله العمر فدوه إلك ............لحسين يرخص عمرك
لاجن صعب فكد عليّ ............ والله يجبر كسرك
 
بعدك يمه .......خضر جرحك نار بكلبي
بعدك يمه .......امشي وانه متيهه بدربي
فَرِح إمك ............ارخص دمك
ضهضب ليهم واخذ بحيفك
###############################
كوم اعتلي فوك المهر .....واحنيه يبني المهرة
بالموزمة خلك إثر ......... فرحلي كلب الزهرة
يلصولتك صولة علي ...وانته الفرع من شجرة
مضرب مثل عبر الزمن...... دمك يضل عل غبرة

اخطب كلهم ...........انه القاسم سمعوا حجاية
اخطب كلهم ........... فدوة الغالي حسين الغاية
هب بعزمك .........وارخص دمك
ضهضب ليهم واخذ بحيفك
##############################
يمه طلب عندي إلك ........... ردلي خبر بهدومك
راح النظر بس فرحتي ...... من ترخص انته دمومك
بالحومه خليه الزلم ...............تشهد إلك بعلومك
لعمك درع توكف سند ............. كل همك ومهمومك

هاي وصيتي............يبني الغالي شنسوه بدونه
هاي وصيتي............ خل صمصامك من دم لونه  
وخليه همك .........ارخص دمك
ضهضب ليهم واخذ بحيفك
###############################
جان الحلم بيدك انه .......... ريت اندفن يايمه
بس الدهر طبعه الغدر .......لا مارحمني بحكمه
يموت الورد حكمة وجرت ...خلاني اعيش بهمه
يبني إلي بطيفي تمر ........ ..حاجيني يمه كلمه

زهرة روحي .........كوم ومرني وريح عيني
زهرة روحي ......... بعدك صارت ظلمة سنيني
اعتابي يإلمك ..........ارخص دمك
ضهضب ليهم واخذ بحيفك


حسين مجيد العميدي

موشح... استهلال

يا هلال الحزن انشر دمعتك
هلت ادموع الزچيه ابطلعتك
....
يا هلال الالم وابشهر الالم
انشر ادموعك عله ابساط الخيم
ابهلتك چم ضلع للزهره انهشم
وچم مصيبه اتذكرَتها ابرجعتك
......
يا هلال الحزن سلّيت الگلب
بطلعتك هيّجت كل موقف صعب
وكل كتر فاتحة ومأتم ينّصب
وابد ما تبرد نوايح فَجْعِتك
.....
شكثر صبيت الحزن لآل النبي
وبيك اشرف حرم راحت للسبي
راح واليها وحداها الناصبي
آه يا غصه ومرارة لوعتك
.....
يا هلال الحزن وابشهر البله
شصار لحسين وعياله ابكربله
صدگ ثلْث ايام وابْحَرْ الفله
جسد مسلوب ويناطر فزعتك
.....
لا تضن يهلال يصعب هالگدُر
لو تفيي احسين من شمس الظهر
لچن هو الراد ينْفْذ هالامر
حتى ما يضمه الينوح الوقعتك
......
من تهل يهلال تتشفّه العده
يرد طاري (حسين ضل الوحّده)
وترد نار اخيام اهلنا الموگده
وحگها لو ضاگت يمِكْدر وسعتك
.....
خادم الحسين
حسام ناجي الحلي

گعديه...النهظه الحسينية ،استهلاليه


صوت الدم اسس ثورة.. هيهات من الذله
سال ويهتف من نحره... هيهات من الذله
ذبحوا نحر الايمان... وصاح الدم بالميدان.. هيهات من الذله
........
هذا صوت الدم يسجل ثوره للحق عالمية
في زمن كرسي السياسه خانگ انفاس الرعيه
و ابأرض شرفها هالدم (سمّيَت بالغاضريه)
شرّفها ربنا بهالدمه
وصارت محط لهل السمه
واعليها نشرت فاطمه.... چفوف اديها الفاطميّة

ارض الله صارت هيه... مهبط من وحي العتره
ولاذت هالناس ابفيه... مهبط من وحي العتره
حملت اشرف عنوان... وصاح الدم بالميدان... هيهات من الذله
.....
هذا اشرف دم نسمعه بأثر ماضينه والحاضر
ينادي من بين الشواهد الصوته تهتز الضماير
حسين عنوان الحقيقه خلي تنقلها المنابر
اليتصده كون الهالامر
للمنبر يقدّم فكر
لا ياخذه الواهس غدر... هالامر لابد يحاذر

اليتصده الدور المنبر... لابدّ ايحصن نفسه
من سهم الشر خل يحذر... لابد ايحصن نفسه
ابحچيه ايثبت برهان... وصاح الدم بالميدان.. هيهات من الذله
........
صوت دم حسين منهج للي يملك وعي وحكمه
وهو للرايد نجاته هالنهج لابد يلزمه
بوجه كل منْحَدر يبقى صوت دم حسين قمه
لمّن نقارن بالصور
نستلهم دروس وعِبَر
القمه فرق عن القعر... واجب اتميز الامه

لو رادت ثوب العزّه... هالامه تلزم نهجه
تهتف كلا للذله... هالامه تلزم نهجه
نهجه يقَوّم البلدان... وصاح الدم بالميدان.. هيهات من الذله
........
صاح بالميدان هالدم صوت هز عرش المذلّه
وهدّم اسوار الطغاة وصاغ لاهل الحق مسلّه
بس الاعوج الف يوم الگصبه ما تگدر تعدله
الما يمتلك عزة نفس
وبالذله ما چنه يحس
ما ماخذ من الطف درس... هذا عّم اعليه جهله

يهتف بآذان الاجيال... صوت الدم يوم العاشر
واتسمعه آذان العقّال... صوت الدم يوم العاشر
وما يسمع ياهو الچان.... وصاح الدم بالميدان.. هيهات من الذله
........
هاي بالله شلون حيره او ويه اهل الجهل بلشه
وما يفيد الحچي وياهم عين عميه او اذن طرشه
البهره عدهم مثل اعلى ناس التدور الطشه
من الواقفه أخذوا مثل
وعافوا دم احسين النزل
المذهب جبل لا مو جمل... حتى تقسم ظهرة گشه

دم احسين اعله الحگ سال... وعالباطل اسس نهضه
ضد الواقف والمحتال... وعالباطل اسس نهضه
ولاهل الحق كالتيجان... .... وصاح الدم بالميدان.. هيهات من الذله
.......
هذا دم حسين باقي رغم انف اهل الضلاله
خضّب اللحيه الكريمه وسال من باقي اوصاله
والله اليعين الزچيه من تشوفه بهيچ حاله
الله اليعين ام الحسن
لو شافت اجروح البدن
ولو عاينت سبي الضعن
الف يا وسفه تشوفه حسين عالتربان طايح
.......
خادم الحسين عليه السلام
حسام ناجي الحلي

عگيلي.... العليلة عليها السلام

بالغربه الوحدي مخليني
.......
يا ضي عيني يابو الأكبر
تدري أعله افراگ ما اكدر
يالعايفني ابنار اتصبّر
نار الهجران التچويني
.......
يا نوماسي وحضي وبختي
آنه ابدونك تشتد علْتي
يا هو يسد من عگبك خلتي
ورده ويا چف يداريني
........
ترضه تعوف ابنيتك ترضه
معلوله ابهمها ومتمرضه
وما تصبر عنك لو لحضه
يالشاغلهن دوم اسنيني
........
يالشاغل فكري واحساسي
وعايش دومك بين انفاسي
يا خيمة عزّي ونوماسي
يابو الاكبر يا ضي عيني
........
ما مهتمه بهاي العلّه
فكدك اصعب واكبر خلّه
عگب عيونك شنهو اليحله
وشنهو يعوضني ويرويني
........
تدريني ما اصبر دونك
لا اعيشن من عگب عيونك
گالولي الحر غيّر لونك
شصار ابحالي لو تدريني
........
خادم العليلة عليها السلام
حسام ناجي الحلي

موشح....العليلة عليها السلام

من عفتني ابغربتي متألمه
روحي ضلت يبو الأكبر هايمه
........
من عفتني ابغربتي ابدار الاهل
بنار علتي ونار فرگاكم اضل
صرت اتمنه لون يلفي الأجل
ولا اضل طول العمر متيتمه
........
آه يا علّة افراگك والغرب
ابسبته ضلت تشب نار الگلب
يالعفتها مناطره عيوني الدرب
منك يردلي خبر اتوسمه
........
يا سفينة روحي واشراع الدليل
ابقه عگبك عايشه من المستحيل
يالعفت دمع الحزن عالخد يسيل
وضلت الروح ابغايبك لايمه
........
يا كهف امنيتي يا درب الضوه
منين اجيب العلّتي اخلافك دوه
انت يا بويه اعز من الهوه
و أعله حنّيتك يغالي امعلمه
........
عفت گلبي يلهب ابنار الهجر
وما لي حيل واشد بيه چف الصبر
وحشه عگب يا بعد عيني العمر
وضلمة افراگك عليه امخيمه
........
يمن بديار المنيه مبتعد
امل عندي كون لديارك ترد
تشوف گلبي شلون عگبك منمرد
وابسحابه همها عيني امغيمه
.......
خادم العليلة
حسام ناجي الحلي

رئيسية ....العليله عليها السلام


كون يمچ تبقى دوم العافيه
لمّي يا عمه الدموع الدافيه
يا عليلتنه... اطويله رحلتنه...2
يا عليلتنه
.....
يا ريحة هلي و اسمچ اسم امي
عمْتچ زينب آنه اتگرْبي يمي
بدال اهدومچ ادموع الحزن لمّي
تره وضعچ يزيد الهم عله همي

هاي رحلتنه أظنها اطويله
وانتي ياعمه تراچ اعليله
ما تحمليها... موتتچ بيها
يا عليلتنه
.....
تعاي وخل انشف دمعة اعيونچ
واعذريهم عمامچ ما يركبونچ
تره اليسبونه حتما ما يرحمونچ
وعليلة انتي واخافنهم يضربونچ

عن بقائچ عمه لا تشكيلي
وينچ اوين السبي گليلي
ما يرحمونچ... من يضربونچ
يا عليلتنه
......
اذا باچر توّلّونه وتفرهدنه
اضمچ وين لو بأرض الفله اشردنه
واخاف اعليچ لو بالظلمة مگعدنه
واذا صابچ عطش والماي ما عدنا

هالمصايب انتي لو شفتيها
وي رقيه يصير موتچ بيها
تزيد آهاتچ... فوگ مأساتچ
يا عليلتنه
....
الحنين يموت لو عنه مشوا اهله
لچن تصعب يعمه اعليچ هالرحله
ومصايبها التدور اعلينا مو سهله
للتوديع اخذي من الابو مهله

گبل لا تعمي البواچي اعيونچ
تزودي من شوف اليحبونچ
لو مشوا عنچ... ما يخف حزنچ
يا عليلتنه
......
لا تبچين ويزيد المرض علْتچ
كون يصير وسط اعيوني چا شلتچ
وابضعن الفواطم بيدي حملّتچ
لچن مسبيه ويّاهن تخيلتچ

بالسبي يا عمه تنسل روحچ
وين ما رحتي السياط تلوحچ
عوفي احلامچ... حيري بآلامچ
يا عليلتنه
......
خادم العليلة
حسام ناجي الحلي

موشح ....ام البنين عليها السلام


لو شفت حاجتك كلفه ومعْسِرَه
روح دگ باب الوفية الصابرة
......
لو شفت حاجتك كلفه وما تصير
وانعگد بالحاجه فكرك والمصير
آنه ادليك ابدربها وما تحير
أكصد الخلفت سبع الگنطره
......
خاف صعبه تزور گبر ام البنين
ارد اسهّلها بعد واخذ اليقين
بگلبك أكصد كربله وزور الحسين
تلگه ام عباس حتما حاضره
.......
اطلب اشما ردت لا تحتار ابد
بحضرة ام عباس محلوله العگد
اقره الها الفاتحه بوكت الشدد
كل شدايد گلبك تحلهن تره
......
أمن ولا تهم بأيام العسر
ولو كضت بالضيم ساعات العمر
شد وثاقك بالوفيه ام الصبر
ابلايه شك تفوز دنيا وآخره
.......
اخذ درس التضحيه وابلا ثمن
من الانطت اربعه لام الحسن
يا موالي شما قسه وياك الزمن
منها ادرس هالصفاة الفاخره
........
هاي ام عباس مدرسة الوفه
اخذ من عدها طريق المعرفه
والكرم من عدها بيش توصّفه
ويمها كل صعبه تحسها اميسّره
.......
خادم ام البنين عليها السلام
حسام ناجي الحلي

قصيدة رئيسية.... ام البنين عليها السلام



اربع امنيات انطيت.. وامنيتي الچبيره
سالم ترجع اتمنيت.. يا شيخ العشيرة
مو بس اربع اخوه... عمري الك فدوه... يا شيخ العشيرة
.....
يا حلمي وكل ضنوني وكل اسنيني وايامي
گلبي انت والي اسكنته واجروحي وكل آلامي
معقوله من الماي أروي وانت مذبوح وضامي

يا حجة زماني ونهضة الاحرار
يا من لجلك الدنيا وفلكها اندار

يا مؤنس جراح الناس... وامسليها اسمك
آنه العلمت عباس... يحني راسه يمك
مو بس عمره هوه... عمري الك فدوه... يا شيخ العشيرة
......
يا كلمة لا وبوجهه هزت عرش الطغياني
من دمك خضّر ثوره عقل النور الانساني
قائدنا واحنه جنودك آنه اولدي تلگاني

من صوت الحقيقة المنحرك اصله
آنه او ولدي درس التضحيه انحصله

يا قانون عالقانون... وافروعة واصوله
صدرك وابحوافر خيل.. لعبت فوگه جوله
ابدونك شنهي يسوه... عمري الك فدوه... يا شيخ العشيرة
.....
ما ابخل انه وتدري يا سر نجواي ونوحي
منطيتك اربع شبان اوكون افديك ابروحي
اتنطر جيتك واسمع عنك تحچيلي جروحي

الخبر منك اعرفه شلون هم تدري
اذا صابك ألم عيني ابدمع تجري

گلب الام يِحِسْ بالصار... يوليدي طبعها
تعرف عنك الاخبار... من يهمل دمعها
ترجع عندي رجوه... عمري الك فدوه... يا شيخ العشيرة
......
وي عيني الروح تباري وتعاين درب الرجعه
گلب الام يعلم كلشي سولَفلي وسالت دمعه
من خلصوا كل اخوانك يدريك بعازة فزعه

تمنيت آنه لو عشرة زلم عندي
فدوه انطيتهم وامقصّره ابوعدي

لو عشرة زلم مولاي... يا ابن الزچيه
فدوه انطيهم وما اريد... بس ترضه عليه
غيرك مالي سلوه... عمري الك فدوه... يا شيخ العشيرة
......
يا كوكب آمالي انت وحگي احتار ابأوصافك
ترفعني السابع دنيه چلمة يمه من اشفافك
للقمه يوصل كلمن گلبه الابيض بي شافك

يا واضح وضوح الگمره منهاجك
يمن احييت دين الباري بأوداجك

تذكر وگفتي اعله الباب.. وابعينك شفتها
لجلك والحسن وام عون... خدمتكم ردتها
يا باب النبوّة.... عمري الك فدوه... يا شيخ العشيرة
......
خادم ام البنين عليها السلام
حسام ناجي الحلي

ميمر.....ام البنين عليها السلام

يالحاجتك...حيل آذتك
صعبة عليك..وشغلتك
لو چانت ابثگل اجبال ام البنين اتحلها
.......
يا الحاجتك بين النجم تلگاها
وثگل الجبال الراسيه مرساها
بس فاتحة ام البنين اقراها

بغض النظر..بلمح البصر
وشما ردت...يمك حضر
حلفها بعيون حسين تگضيها واتسهلها
........
هالحكمه ترچية اذن خليها
فاقد الحاجه لا تضن ينطيها
معناها روح اطلبها من راعيها

اخذ الگلب.. للينطلب
ولو چان.. هالمطلب صعب
اتنخه بأم العباس تحل الشدايد كلها
........
لو صابتك بالدنيا اكبر شده
وباب الفرج چف النوايب سده
بام الگمر صبرك اكون اتعگده

شد الازر...واخذ الصبر
تحصل الاجر... فوگ الاجر
ومو بس ضعف تلگه اضعاف والاخره تحصلها
.......
درس الوفه من الوفيه حصله
وخليها عندك راسخه هالخصله
سهمك من الدنيا تلفك وصله

خذ عبرتك ...من دنيتك
وصلة چفن... بس حصتك
خليها بيضه للدوم وابلون گلبك خلها
.........
لو ضامك بيوم الدهر واتعسّر
وخلاك بأمرك منشده وامحيّر
دك باب ام الوفه وما تتعذر

منها المدد..حاشاها ابد
تتعذر... بوكت الشدد
ولو تاهت العلّه اعليك ام الكمر تندلها
.......
خادم ام البنين عليها السلام
حسام ناجي الحلي

موشح.... مسلم بن عقيل عليه السلام

يا بو طاهر گوم وانشر رايتك
وادحض اسيوف الضلاله العادتك
.....
يا سفير النهظه يا نعمه السفير
بزمن بيه مات الحيه بگصة الضمير
گوم واردع كل حقود وكل اجير
وافگس اعيون الاصنام الغدرتك
.....
يمن لحسين انذرت هاي النَفِسْ
هالشوائب گوم لقنهم درس
حگها هاي اعداك منك تنخرس
الطاح بيدك ما سلم من ضربتك
.....
يابو طاهر شد عليهم يا همام
ولا تغرك هاي عبّاد الاصنام
يمن ضحيت ابدمه الدين الاسلام
ودافعت عن شرعة الله ابوكفتك
......
انهض وبيدك لوائك يعتلي
وخلهم يذكرون صولات الولي
صيح بيهم لا فتى الا علي
مثل ابو الحسنين تصبح صولتك
......
يا غضنفر يا محارب يا شهم
اگلب الحومه عله اشباه الزلم
والنعم منك يمسلم والنعم
تشهد اعداك ابسالة حضرتك
......
ابحملتك خل ينطق السان الزمن
ومهله لا تنطيها ابد روس الفتن
بسيفك اگطع نسل عبّاد الوثن
يمن نصر الدين غاية غايتك
......
انت لجل الدين روحك قدمت
ومن عله قصر الاماره اتكلمت
ارفعت چفك للحسين وسلمت
ورد سلامك وافتهمها اوصيتك
......
رد عليك احسين وادموعه تسيل
وعلم بوصيتك وانطاك الدليل
مسح راس ابنيتك وصار الكفيل
ومن مسحته هيه عرفت موتتك
.......
خادم مسلم بن عقيل عليه السلام
حسام ناجي الحلي

كعدية... مسلم بن عقيل عليه السلام

يا مبعوث حسين.. انصارك قله
تضحيتك للدين.. انصارك قله
بس طوعه الوفت وياك..صاحت يا مسلم حياك.. انصارك قله
.......
بزمن بي العقول صحره تريد نهضه واقعيه
انت اول غيث نازل من سحابه سماويه
يا سفير الفكر بالطف الك بصمه حيدريه
يا مسلم الموقف الك
بماي الذهب صاغه الملك
وحسين للكوفه ارسلك.... اهل انت الهالقضيه

بيدك شايل لوح... عن عِدل القرآن
بلغ من اتروح... عن عِدل القرآن
وحروف اكتابه بيمناك.. صاحت يا مسلم حياك.. انصارك قله
.......
هالرساله الي احملتها وبلغتها اعله المنابر
هي اعظم درس النه صرخه ضد سلطان جائر
درس ناخذ منه عبره لجل متموت الضماير
بلغت انت او وثقت
وفعلا ابنهجك صدّقت
وبتضحياتك حققت..... نصر من ثورة العاشر

اعظم ما ينگال... نصر الدم عالسيف
چلمه تهز اجبال... نصر الدم عالسيف
واجروح العاشر تنعاك... صاحت يا مسلم حياك.. انصارك قله
........
اليطلب بدنياه الكرسي وللفلس ضعفه وخضوعه
ولَعِق ذكر الدين عنده و چنه تمساح بدموعه
لون عنده بگصته غيره چا خجل من فعل طوعه
طوعه العضيمه الآثرت
حرمه لچن ما قصرت
وهيه الدعوتك آزرت ... ونصرة الدين وفروعه

نسمعه تناديك... يا ليث الحومه
طوعه تآزر بيك... يا ليث الحومه
هذا السيف و هاي اعداك... صاحت يا مسلم حياك.. انصارك قله
.........
انت يا ليث الصميده عمك الكرار الاشجع
الجانت السطره بيمينه عله اوجوه اعداه تطبع
گوم واثبت هالمقوله الشبل من الاسد يطلع
من طوعه هالچلمه اسمعِت
والسيفك بهمه اسرِعت
انت بقتالك ابدعِت.... روس من اجساد تشلع

ذكرهه الهالناس... بحملات الكرار
يبرالك عباس... بحملات الكرار
والحومه تهلّي بمسعاك.. صاحت يا مسلم حياك... انصارك قله
......
بإتباعك مرجعيتك ثبتت نهج ودراسه
ومثل ما انت يمسلم احييت هالدين واساسه
عدنه شبان ابدماهم حرسوا المذهب حراسه
رغم المشاكل والفتن
وافكار عبّاد الوثن
شبان ضحّوا للوطن... بوكت بي خرسه السياسه

و اولد الحله اليوم... ثابت موقفها
يا مسلم للدوم... ثابت موقفها
من عدها هالموقف هاك... صاحت يا مسلم حياك... انصارك قله
..........
گوم هاي الگوم تطلب يابو طاهر سفك دمك
و مو فقط انت يمسلم كل هلك واولاد عمك
انت ضحّيت بوريدك وبالدمه خطيت اسمك
شاهد يمسلم گبتك
عن فعلك وعن وگفتك
وناس الاجيره الظلمتك
حسابهم باچر شعسره لو لفوا يوم القيامه
........
خادم مسلم بن عقيل
حسام ناجي الحلي

قصيدة رئيسيه.... مسلم بن عقيل عليه السلام


من على قصر الاماره... ابعين مسلم هالعباره
ابلوعه وأونين.. آه يحسين... ابعين مسلم هالعباره
.....
فوگ قصر الطاغي تحچي عيون مسلم وابحنين
اوين اليوصّل حچيها وتستقر دمعة العين
مسلم يبلغ سلامه وشوگه لعيون الحسين
يگله اخبارك اخباري زين انت اني زين

ونظرته تفسر كلامه... خويه اودعك بالسلامة
وچلمه بالعين.... آه يحسين... ابعين مسلم هالعباره
.......
ينادي وين اليوصل الهم هلي وينقل چلمتي
ويصل عد شيخ العشيره ويحچي عن سر دمعتي
مثله هم عندي يتيمه وهو يدري ابهضمتي
امنت بيده حميده نظر عيني وبسمتي

ناده وادموعه يهلها... حسين ابوها وكل اهلها
وكل الاسنين... آه يحسين... ابعين مسلم هالعباره
.......
سكن صوت الريح لحضه وسولف السان الدليل
وعالضعن گلبه يشاجر والدمع عالخد يسيل
وين الِ يوصّل اخباره والدرب كلش طويل
و هوه وحده ابلايه ناصر لا معين ولا خليل

وگبل ساعات المنيه... گلبه يمّ احسين اخيه
وگلبه نصين... آه يحسين... ابعين مسلم هالعباره
.......
الله اليعين ابو طاهر عالمصيبه المرّته
ابحين من دارت العسكر هو وحده ابغربته
وعله حسين انقبض گلبه من الحشود الغدرته
خاف باچر ماكو واحد للحسين ونصرته

عله حسين يخاف باچر... يبقه وحده بيوم عاشر
ابعازه امعين.... آه يحسين... ابعين مسلم هالعباره
.......
بآخر اللحضات مسلم خبر رايد ينْقِله
وگام يتصفح وجوه وينظر اعيون المله
عسه لن راعي حميه للحسين يوصله
يگله هضمتنه الچبيره يبن عمي ابكربله

چانت امنيته الاخيره.... ايلحگ ابضعن العشيره
والمجبْلين.... آه يحسين... ابعين مسلم هالعباره
.......
خادم مسلم بن عقيل عليه السلام
حسام ناجي الحلي

عگيلي.... الخدمه الحسينية

للخدمه احزام اتحزمنه
.....
هل عاشور ومرّ اعلينه
وابدرب احسين التمينه
اتحزمنه ابراية والينه
وشگد بمصابه اتألمنه
......
هل عاشور وهاي ايامه
وشدت غيرتها اللطامه
من حرگوا لحسين اخيامه
شبت نار اخيامه ابدمنه
........

فرض اعلينه ولبيناها
وهالصرخه احنه اتعلمناها
حي اعله الخدمه گلناها
من چنه ازغار اتعلمنه
........
خطيناها ابلون ادمانه
وغصبا عالناس الخوّانه
العافت هالخدمه خسرانه
بهالصرخه نقهر لايمنه
.........
لا نقنع احنه ولا نهجع
ومن الخدمه لا ما نجزع
مو بادينا من المرضع
اتغذيناها وصارت أمنه
.........
لحسين شما هل عاشوره
عشنه بهالنعمه المشكوره
وكل خادم معروف ابدوره
وابحب احسين اتشيمنه
.........
خادم اهل البيت عليهم السلام
حسام ناجي الحلي