منهاج محرم الحرام ١٤٤٦ هجري
ليلة القاسم عليه السلام
(خرزة محبس )

قاسم يبني ............ خرزة محبس جيش بسيفك
قاسم يبني ............ ضهضب ليهم واخذ بحيفك
وصيتي لعمك...............ارخص دمك
ضهضب ليهم واخذ بحيفك
###############################
اكصد إله يمه واخذ ............ رخصة منه تقاتل
شد العزم وانه اندعي............... ولالا يهمك عاذل
بهدم الحسن كوم انتهض........ وبصيته كون تنازل
يحفظك إلي جدك علي......... وحيلك يشده الكافل

يوليدي اسمع .........طب الحومة وارفع راسي
يوليدي اسمع ........ كلك غيرة يانوماسي
ولا ليهمك ..........ارخص دمك
ضهضب ليهم واخذ بحيفك
###############################
يبني العهد توفي الوعد ...... للغالي رخص نحرك
وكفت عبد يمه تكف ..............وتكله سمعا أمرك
وتكله العمر فدوه إلك ............لحسين يرخص عمرك
لاجن صعب فكد عليّ ............ والله يجبر كسرك
 
بعدك يمه .......خضر جرحك نار بكلبي
بعدك يمه .......امشي وانه متيهه بدربي
فَرِح إمك ............ارخص دمك
ضهضب ليهم واخذ بحيفك
###############################
كوم اعتلي فوك المهر .....واحنيه يبني المهرة
بالموزمة خلك إثر ......... فرحلي كلب الزهرة
يلصولتك صولة علي ...وانته الفرع من شجرة
مضرب مثل عبر الزمن...... دمك يضل عل غبرة

اخطب كلهم ...........انه القاسم سمعوا حجاية
اخطب كلهم ........... فدوة الغالي حسين الغاية
هب بعزمك .........وارخص دمك
ضهضب ليهم واخذ بحيفك
##############################
يمه طلب عندي إلك ........... ردلي خبر بهدومك
راح النظر بس فرحتي ...... من ترخص انته دمومك
بالحومه خليه الزلم ...............تشهد إلك بعلومك
لعمك درع توكف سند ............. كل همك ومهمومك

هاي وصيتي............يبني الغالي شنسوه بدونه
هاي وصيتي............ خل صمصامك من دم لونه  
وخليه همك .........ارخص دمك
ضهضب ليهم واخذ بحيفك
###############################
جان الحلم بيدك انه .......... ريت اندفن يايمه
بس الدهر طبعه الغدر .......لا مارحمني بحكمه
يموت الورد حكمة وجرت ...خلاني اعيش بهمه
يبني إلي بطيفي تمر ........ ..حاجيني يمه كلمه

زهرة روحي .........كوم ومرني وريح عيني
زهرة روحي ......... بعدك صارت ظلمة سنيني
اعتابي يإلمك ..........ارخص دمك
ضهضب ليهم واخذ بحيفك


حسين مجيد العميدي

موشح... استهلال

يا هلال الحزن انشر دمعتك
هلت ادموع الزچيه ابطلعتك
....
يا هلال الالم وابشهر الالم
انشر ادموعك عله ابساط الخيم
ابهلتك چم ضلع للزهره انهشم
وچم مصيبه اتذكرَتها ابرجعتك
......
يا هلال الحزن سلّيت الگلب
بطلعتك هيّجت كل موقف صعب
وكل كتر فاتحة ومأتم ينّصب
وابد ما تبرد نوايح فَجْعِتك
.....
شكثر صبيت الحزن لآل النبي
وبيك اشرف حرم راحت للسبي
راح واليها وحداها الناصبي
آه يا غصه ومرارة لوعتك
.....
يا هلال الحزن وابشهر البله
شصار لحسين وعياله ابكربله
صدگ ثلْث ايام وابْحَرْ الفله
جسد مسلوب ويناطر فزعتك
.....
لا تضن يهلال يصعب هالگدُر
لو تفيي احسين من شمس الظهر
لچن هو الراد ينْفْذ هالامر
حتى ما يضمه الينوح الوقعتك
......
من تهل يهلال تتشفّه العده
يرد طاري (حسين ضل الوحّده)
وترد نار اخيام اهلنا الموگده
وحگها لو ضاگت يمِكْدر وسعتك
.....
خادم الحسين
حسام ناجي الحلي

گعديه...النهظه الحسينية ،استهلاليه


صوت الدم اسس ثورة.. هيهات من الذله
سال ويهتف من نحره... هيهات من الذله
ذبحوا نحر الايمان... وصاح الدم بالميدان.. هيهات من الذله
........
هذا صوت الدم يسجل ثوره للحق عالمية
في زمن كرسي السياسه خانگ انفاس الرعيه
و ابأرض شرفها هالدم (سمّيَت بالغاضريه)
شرّفها ربنا بهالدمه
وصارت محط لهل السمه
واعليها نشرت فاطمه.... چفوف اديها الفاطميّة

ارض الله صارت هيه... مهبط من وحي العتره
ولاذت هالناس ابفيه... مهبط من وحي العتره
حملت اشرف عنوان... وصاح الدم بالميدان... هيهات من الذله
.....
هذا اشرف دم نسمعه بأثر ماضينه والحاضر
ينادي من بين الشواهد الصوته تهتز الضماير
حسين عنوان الحقيقه خلي تنقلها المنابر
اليتصده كون الهالامر
للمنبر يقدّم فكر
لا ياخذه الواهس غدر... هالامر لابد يحاذر

اليتصده الدور المنبر... لابدّ ايحصن نفسه
من سهم الشر خل يحذر... لابد ايحصن نفسه
ابحچيه ايثبت برهان... وصاح الدم بالميدان.. هيهات من الذله
........
صوت دم حسين منهج للي يملك وعي وحكمه
وهو للرايد نجاته هالنهج لابد يلزمه
بوجه كل منْحَدر يبقى صوت دم حسين قمه
لمّن نقارن بالصور
نستلهم دروس وعِبَر
القمه فرق عن القعر... واجب اتميز الامه

لو رادت ثوب العزّه... هالامه تلزم نهجه
تهتف كلا للذله... هالامه تلزم نهجه
نهجه يقَوّم البلدان... وصاح الدم بالميدان.. هيهات من الذله
........
صاح بالميدان هالدم صوت هز عرش المذلّه
وهدّم اسوار الطغاة وصاغ لاهل الحق مسلّه
بس الاعوج الف يوم الگصبه ما تگدر تعدله
الما يمتلك عزة نفس
وبالذله ما چنه يحس
ما ماخذ من الطف درس... هذا عّم اعليه جهله

يهتف بآذان الاجيال... صوت الدم يوم العاشر
واتسمعه آذان العقّال... صوت الدم يوم العاشر
وما يسمع ياهو الچان.... وصاح الدم بالميدان.. هيهات من الذله
........
هاي بالله شلون حيره او ويه اهل الجهل بلشه
وما يفيد الحچي وياهم عين عميه او اذن طرشه
البهره عدهم مثل اعلى ناس التدور الطشه
من الواقفه أخذوا مثل
وعافوا دم احسين النزل
المذهب جبل لا مو جمل... حتى تقسم ظهرة گشه

دم احسين اعله الحگ سال... وعالباطل اسس نهضه
ضد الواقف والمحتال... وعالباطل اسس نهضه
ولاهل الحق كالتيجان... .... وصاح الدم بالميدان.. هيهات من الذله
.......
هذا دم حسين باقي رغم انف اهل الضلاله
خضّب اللحيه الكريمه وسال من باقي اوصاله
والله اليعين الزچيه من تشوفه بهيچ حاله
الله اليعين ام الحسن
لو شافت اجروح البدن
ولو عاينت سبي الضعن
الف يا وسفه تشوفه حسين عالتربان طايح
.......
خادم الحسين عليه السلام
حسام ناجي الحلي

عگيلي.... العليلة عليها السلام

بالغربه الوحدي مخليني
.......
يا ضي عيني يابو الأكبر
تدري أعله افراگ ما اكدر
يالعايفني ابنار اتصبّر
نار الهجران التچويني
.......
يا نوماسي وحضي وبختي
آنه ابدونك تشتد علْتي
يا هو يسد من عگبك خلتي
ورده ويا چف يداريني
........
ترضه تعوف ابنيتك ترضه
معلوله ابهمها ومتمرضه
وما تصبر عنك لو لحضه
يالشاغلهن دوم اسنيني
........
يالشاغل فكري واحساسي
وعايش دومك بين انفاسي
يا خيمة عزّي ونوماسي
يابو الاكبر يا ضي عيني
........
ما مهتمه بهاي العلّه
فكدك اصعب واكبر خلّه
عگب عيونك شنهو اليحله
وشنهو يعوضني ويرويني
........
تدريني ما اصبر دونك
لا اعيشن من عگب عيونك
گالولي الحر غيّر لونك
شصار ابحالي لو تدريني
........
خادم العليلة عليها السلام
حسام ناجي الحلي

موشح....العليلة عليها السلام

من عفتني ابغربتي متألمه
روحي ضلت يبو الأكبر هايمه
........
من عفتني ابغربتي ابدار الاهل
بنار علتي ونار فرگاكم اضل
صرت اتمنه لون يلفي الأجل
ولا اضل طول العمر متيتمه
........
آه يا علّة افراگك والغرب
ابسبته ضلت تشب نار الگلب
يالعفتها مناطره عيوني الدرب
منك يردلي خبر اتوسمه
........
يا سفينة روحي واشراع الدليل
ابقه عگبك عايشه من المستحيل
يالعفت دمع الحزن عالخد يسيل
وضلت الروح ابغايبك لايمه
........
يا كهف امنيتي يا درب الضوه
منين اجيب العلّتي اخلافك دوه
انت يا بويه اعز من الهوه
و أعله حنّيتك يغالي امعلمه
........
عفت گلبي يلهب ابنار الهجر
وما لي حيل واشد بيه چف الصبر
وحشه عگب يا بعد عيني العمر
وضلمة افراگك عليه امخيمه
........
يمن بديار المنيه مبتعد
امل عندي كون لديارك ترد
تشوف گلبي شلون عگبك منمرد
وابسحابه همها عيني امغيمه
.......
خادم العليلة
حسام ناجي الحلي

رئيسية ....العليله عليها السلام


كون يمچ تبقى دوم العافيه
لمّي يا عمه الدموع الدافيه
يا عليلتنه... اطويله رحلتنه...2
يا عليلتنه
.....
يا ريحة هلي و اسمچ اسم امي
عمْتچ زينب آنه اتگرْبي يمي
بدال اهدومچ ادموع الحزن لمّي
تره وضعچ يزيد الهم عله همي

هاي رحلتنه أظنها اطويله
وانتي ياعمه تراچ اعليله
ما تحمليها... موتتچ بيها
يا عليلتنه
.....
تعاي وخل انشف دمعة اعيونچ
واعذريهم عمامچ ما يركبونچ
تره اليسبونه حتما ما يرحمونچ
وعليلة انتي واخافنهم يضربونچ

عن بقائچ عمه لا تشكيلي
وينچ اوين السبي گليلي
ما يرحمونچ... من يضربونچ
يا عليلتنه
......
اذا باچر توّلّونه وتفرهدنه
اضمچ وين لو بأرض الفله اشردنه
واخاف اعليچ لو بالظلمة مگعدنه
واذا صابچ عطش والماي ما عدنا

هالمصايب انتي لو شفتيها
وي رقيه يصير موتچ بيها
تزيد آهاتچ... فوگ مأساتچ
يا عليلتنه
....
الحنين يموت لو عنه مشوا اهله
لچن تصعب يعمه اعليچ هالرحله
ومصايبها التدور اعلينا مو سهله
للتوديع اخذي من الابو مهله

گبل لا تعمي البواچي اعيونچ
تزودي من شوف اليحبونچ
لو مشوا عنچ... ما يخف حزنچ
يا عليلتنه
......
لا تبچين ويزيد المرض علْتچ
كون يصير وسط اعيوني چا شلتچ
وابضعن الفواطم بيدي حملّتچ
لچن مسبيه ويّاهن تخيلتچ

بالسبي يا عمه تنسل روحچ
وين ما رحتي السياط تلوحچ
عوفي احلامچ... حيري بآلامچ
يا عليلتنه
......
خادم العليلة
حسام ناجي الحلي

موشح ....ام البنين عليها السلام


لو شفت حاجتك كلفه ومعْسِرَه
روح دگ باب الوفية الصابرة
......
لو شفت حاجتك كلفه وما تصير
وانعگد بالحاجه فكرك والمصير
آنه ادليك ابدربها وما تحير
أكصد الخلفت سبع الگنطره
......
خاف صعبه تزور گبر ام البنين
ارد اسهّلها بعد واخذ اليقين
بگلبك أكصد كربله وزور الحسين
تلگه ام عباس حتما حاضره
.......
اطلب اشما ردت لا تحتار ابد
بحضرة ام عباس محلوله العگد
اقره الها الفاتحه بوكت الشدد
كل شدايد گلبك تحلهن تره
......
أمن ولا تهم بأيام العسر
ولو كضت بالضيم ساعات العمر
شد وثاقك بالوفيه ام الصبر
ابلايه شك تفوز دنيا وآخره
.......
اخذ درس التضحيه وابلا ثمن
من الانطت اربعه لام الحسن
يا موالي شما قسه وياك الزمن
منها ادرس هالصفاة الفاخره
........
هاي ام عباس مدرسة الوفه
اخذ من عدها طريق المعرفه
والكرم من عدها بيش توصّفه
ويمها كل صعبه تحسها اميسّره
.......
خادم ام البنين عليها السلام
حسام ناجي الحلي

قصيدة رئيسية.... ام البنين عليها السلام



اربع امنيات انطيت.. وامنيتي الچبيره
سالم ترجع اتمنيت.. يا شيخ العشيرة
مو بس اربع اخوه... عمري الك فدوه... يا شيخ العشيرة
.....
يا حلمي وكل ضنوني وكل اسنيني وايامي
گلبي انت والي اسكنته واجروحي وكل آلامي
معقوله من الماي أروي وانت مذبوح وضامي

يا حجة زماني ونهضة الاحرار
يا من لجلك الدنيا وفلكها اندار

يا مؤنس جراح الناس... وامسليها اسمك
آنه العلمت عباس... يحني راسه يمك
مو بس عمره هوه... عمري الك فدوه... يا شيخ العشيرة
......
يا كلمة لا وبوجهه هزت عرش الطغياني
من دمك خضّر ثوره عقل النور الانساني
قائدنا واحنه جنودك آنه اولدي تلگاني

من صوت الحقيقة المنحرك اصله
آنه او ولدي درس التضحيه انحصله

يا قانون عالقانون... وافروعة واصوله
صدرك وابحوافر خيل.. لعبت فوگه جوله
ابدونك شنهي يسوه... عمري الك فدوه... يا شيخ العشيرة
.....
ما ابخل انه وتدري يا سر نجواي ونوحي
منطيتك اربع شبان اوكون افديك ابروحي
اتنطر جيتك واسمع عنك تحچيلي جروحي

الخبر منك اعرفه شلون هم تدري
اذا صابك ألم عيني ابدمع تجري

گلب الام يِحِسْ بالصار... يوليدي طبعها
تعرف عنك الاخبار... من يهمل دمعها
ترجع عندي رجوه... عمري الك فدوه... يا شيخ العشيرة
......
وي عيني الروح تباري وتعاين درب الرجعه
گلب الام يعلم كلشي سولَفلي وسالت دمعه
من خلصوا كل اخوانك يدريك بعازة فزعه

تمنيت آنه لو عشرة زلم عندي
فدوه انطيتهم وامقصّره ابوعدي

لو عشرة زلم مولاي... يا ابن الزچيه
فدوه انطيهم وما اريد... بس ترضه عليه
غيرك مالي سلوه... عمري الك فدوه... يا شيخ العشيرة
......
يا كوكب آمالي انت وحگي احتار ابأوصافك
ترفعني السابع دنيه چلمة يمه من اشفافك
للقمه يوصل كلمن گلبه الابيض بي شافك

يا واضح وضوح الگمره منهاجك
يمن احييت دين الباري بأوداجك

تذكر وگفتي اعله الباب.. وابعينك شفتها
لجلك والحسن وام عون... خدمتكم ردتها
يا باب النبوّة.... عمري الك فدوه... يا شيخ العشيرة
......
خادم ام البنين عليها السلام
حسام ناجي الحلي

ميمر.....ام البنين عليها السلام

يالحاجتك...حيل آذتك
صعبة عليك..وشغلتك
لو چانت ابثگل اجبال ام البنين اتحلها
.......
يا الحاجتك بين النجم تلگاها
وثگل الجبال الراسيه مرساها
بس فاتحة ام البنين اقراها

بغض النظر..بلمح البصر
وشما ردت...يمك حضر
حلفها بعيون حسين تگضيها واتسهلها
........
هالحكمه ترچية اذن خليها
فاقد الحاجه لا تضن ينطيها
معناها روح اطلبها من راعيها

اخذ الگلب.. للينطلب
ولو چان.. هالمطلب صعب
اتنخه بأم العباس تحل الشدايد كلها
........
لو صابتك بالدنيا اكبر شده
وباب الفرج چف النوايب سده
بام الگمر صبرك اكون اتعگده

شد الازر...واخذ الصبر
تحصل الاجر... فوگ الاجر
ومو بس ضعف تلگه اضعاف والاخره تحصلها
.......
درس الوفه من الوفيه حصله
وخليها عندك راسخه هالخصله
سهمك من الدنيا تلفك وصله

خذ عبرتك ...من دنيتك
وصلة چفن... بس حصتك
خليها بيضه للدوم وابلون گلبك خلها
.........
لو ضامك بيوم الدهر واتعسّر
وخلاك بأمرك منشده وامحيّر
دك باب ام الوفه وما تتعذر

منها المدد..حاشاها ابد
تتعذر... بوكت الشدد
ولو تاهت العلّه اعليك ام الكمر تندلها
.......
خادم ام البنين عليها السلام
حسام ناجي الحلي

موشح.... مسلم بن عقيل عليه السلام

يا بو طاهر گوم وانشر رايتك
وادحض اسيوف الضلاله العادتك
.....
يا سفير النهظه يا نعمه السفير
بزمن بيه مات الحيه بگصة الضمير
گوم واردع كل حقود وكل اجير
وافگس اعيون الاصنام الغدرتك
.....
يمن لحسين انذرت هاي النَفِسْ
هالشوائب گوم لقنهم درس
حگها هاي اعداك منك تنخرس
الطاح بيدك ما سلم من ضربتك
.....
يابو طاهر شد عليهم يا همام
ولا تغرك هاي عبّاد الاصنام
يمن ضحيت ابدمه الدين الاسلام
ودافعت عن شرعة الله ابوكفتك
......
انهض وبيدك لوائك يعتلي
وخلهم يذكرون صولات الولي
صيح بيهم لا فتى الا علي
مثل ابو الحسنين تصبح صولتك
......
يا غضنفر يا محارب يا شهم
اگلب الحومه عله اشباه الزلم
والنعم منك يمسلم والنعم
تشهد اعداك ابسالة حضرتك
......
ابحملتك خل ينطق السان الزمن
ومهله لا تنطيها ابد روس الفتن
بسيفك اگطع نسل عبّاد الوثن
يمن نصر الدين غاية غايتك
......
انت لجل الدين روحك قدمت
ومن عله قصر الاماره اتكلمت
ارفعت چفك للحسين وسلمت
ورد سلامك وافتهمها اوصيتك
......
رد عليك احسين وادموعه تسيل
وعلم بوصيتك وانطاك الدليل
مسح راس ابنيتك وصار الكفيل
ومن مسحته هيه عرفت موتتك
.......
خادم مسلم بن عقيل عليه السلام
حسام ناجي الحلي

كعدية... مسلم بن عقيل عليه السلام

يا مبعوث حسين.. انصارك قله
تضحيتك للدين.. انصارك قله
بس طوعه الوفت وياك..صاحت يا مسلم حياك.. انصارك قله
.......
بزمن بي العقول صحره تريد نهضه واقعيه
انت اول غيث نازل من سحابه سماويه
يا سفير الفكر بالطف الك بصمه حيدريه
يا مسلم الموقف الك
بماي الذهب صاغه الملك
وحسين للكوفه ارسلك.... اهل انت الهالقضيه

بيدك شايل لوح... عن عِدل القرآن
بلغ من اتروح... عن عِدل القرآن
وحروف اكتابه بيمناك.. صاحت يا مسلم حياك.. انصارك قله
.......
هالرساله الي احملتها وبلغتها اعله المنابر
هي اعظم درس النه صرخه ضد سلطان جائر
درس ناخذ منه عبره لجل متموت الضماير
بلغت انت او وثقت
وفعلا ابنهجك صدّقت
وبتضحياتك حققت..... نصر من ثورة العاشر

اعظم ما ينگال... نصر الدم عالسيف
چلمه تهز اجبال... نصر الدم عالسيف
واجروح العاشر تنعاك... صاحت يا مسلم حياك.. انصارك قله
........
اليطلب بدنياه الكرسي وللفلس ضعفه وخضوعه
ولَعِق ذكر الدين عنده و چنه تمساح بدموعه
لون عنده بگصته غيره چا خجل من فعل طوعه
طوعه العضيمه الآثرت
حرمه لچن ما قصرت
وهيه الدعوتك آزرت ... ونصرة الدين وفروعه

نسمعه تناديك... يا ليث الحومه
طوعه تآزر بيك... يا ليث الحومه
هذا السيف و هاي اعداك... صاحت يا مسلم حياك.. انصارك قله
.........
انت يا ليث الصميده عمك الكرار الاشجع
الجانت السطره بيمينه عله اوجوه اعداه تطبع
گوم واثبت هالمقوله الشبل من الاسد يطلع
من طوعه هالچلمه اسمعِت
والسيفك بهمه اسرِعت
انت بقتالك ابدعِت.... روس من اجساد تشلع

ذكرهه الهالناس... بحملات الكرار
يبرالك عباس... بحملات الكرار
والحومه تهلّي بمسعاك.. صاحت يا مسلم حياك... انصارك قله
......
بإتباعك مرجعيتك ثبتت نهج ودراسه
ومثل ما انت يمسلم احييت هالدين واساسه
عدنه شبان ابدماهم حرسوا المذهب حراسه
رغم المشاكل والفتن
وافكار عبّاد الوثن
شبان ضحّوا للوطن... بوكت بي خرسه السياسه

و اولد الحله اليوم... ثابت موقفها
يا مسلم للدوم... ثابت موقفها
من عدها هالموقف هاك... صاحت يا مسلم حياك... انصارك قله
..........
گوم هاي الگوم تطلب يابو طاهر سفك دمك
و مو فقط انت يمسلم كل هلك واولاد عمك
انت ضحّيت بوريدك وبالدمه خطيت اسمك
شاهد يمسلم گبتك
عن فعلك وعن وگفتك
وناس الاجيره الظلمتك
حسابهم باچر شعسره لو لفوا يوم القيامه
........
خادم مسلم بن عقيل
حسام ناجي الحلي

قصيدة رئيسيه.... مسلم بن عقيل عليه السلام


من على قصر الاماره... ابعين مسلم هالعباره
ابلوعه وأونين.. آه يحسين... ابعين مسلم هالعباره
.....
فوگ قصر الطاغي تحچي عيون مسلم وابحنين
اوين اليوصّل حچيها وتستقر دمعة العين
مسلم يبلغ سلامه وشوگه لعيون الحسين
يگله اخبارك اخباري زين انت اني زين

ونظرته تفسر كلامه... خويه اودعك بالسلامة
وچلمه بالعين.... آه يحسين... ابعين مسلم هالعباره
.......
ينادي وين اليوصل الهم هلي وينقل چلمتي
ويصل عد شيخ العشيره ويحچي عن سر دمعتي
مثله هم عندي يتيمه وهو يدري ابهضمتي
امنت بيده حميده نظر عيني وبسمتي

ناده وادموعه يهلها... حسين ابوها وكل اهلها
وكل الاسنين... آه يحسين... ابعين مسلم هالعباره
.......
سكن صوت الريح لحضه وسولف السان الدليل
وعالضعن گلبه يشاجر والدمع عالخد يسيل
وين الِ يوصّل اخباره والدرب كلش طويل
و هوه وحده ابلايه ناصر لا معين ولا خليل

وگبل ساعات المنيه... گلبه يمّ احسين اخيه
وگلبه نصين... آه يحسين... ابعين مسلم هالعباره
.......
الله اليعين ابو طاهر عالمصيبه المرّته
ابحين من دارت العسكر هو وحده ابغربته
وعله حسين انقبض گلبه من الحشود الغدرته
خاف باچر ماكو واحد للحسين ونصرته

عله حسين يخاف باچر... يبقه وحده بيوم عاشر
ابعازه امعين.... آه يحسين... ابعين مسلم هالعباره
.......
بآخر اللحضات مسلم خبر رايد ينْقِله
وگام يتصفح وجوه وينظر اعيون المله
عسه لن راعي حميه للحسين يوصله
يگله هضمتنه الچبيره يبن عمي ابكربله

چانت امنيته الاخيره.... ايلحگ ابضعن العشيره
والمجبْلين.... آه يحسين... ابعين مسلم هالعباره
.......
خادم مسلم بن عقيل عليه السلام
حسام ناجي الحلي

عگيلي.... الخدمه الحسينية

للخدمه احزام اتحزمنه
.....
هل عاشور ومرّ اعلينه
وابدرب احسين التمينه
اتحزمنه ابراية والينه
وشگد بمصابه اتألمنه
......
هل عاشور وهاي ايامه
وشدت غيرتها اللطامه
من حرگوا لحسين اخيامه
شبت نار اخيامه ابدمنه
........

فرض اعلينه ولبيناها
وهالصرخه احنه اتعلمناها
حي اعله الخدمه گلناها
من چنه ازغار اتعلمنه
........
خطيناها ابلون ادمانه
وغصبا عالناس الخوّانه
العافت هالخدمه خسرانه
بهالصرخه نقهر لايمنه
.........
لا نقنع احنه ولا نهجع
ومن الخدمه لا ما نجزع
مو بادينا من المرضع
اتغذيناها وصارت أمنه
.........
لحسين شما هل عاشوره
عشنه بهالنعمه المشكوره
وكل خادم معروف ابدوره
وابحب احسين اتشيمنه
.........
خادم اهل البيت عليهم السلام
حسام ناجي الحلي

موشح..... الخدمة الحسينية

غاية الغايات يا والينه
ويه الخدم مولاي تقبل بينه
.......
رغم سود اعمالنه وثگل الذنوب
ونفس ترجع للمعاصي اشما تتوب
لچن عدنا امل وتحس الگلوب
من كرم ايدك تجود اعلينه
........
ما تخلينه الوحدنا ابهالدرب
ايدك ابيدينا يا نبض الگلب
تره اليتمسك ابغيرك ينغلب
والتمسك بيك فاز ابدينه
.......
الدنيا ما بيها امل نتأمله
بس غصص واهموم وانواع البله
أمه تدعيله الذي تتقبله
وهذا سر المنبع وتكوينه
.......
يا شفيع الخدم يا نعمه الشفيع
احنه لو ما دربك نتيه ونضيع
وسط ذاك العالم المر والفجيع
مالنه غيرك يعاين لينه
.......
حيره يابو الاكبر ابدونك تره
دنيا ضلمه شلون چا بالاخره
هناك درب المعبر ابرفع اشعره
غير چفك ياهو الي يدلينا
........
يا نبض گلب الزچيه فاطمه
يمن احييت الشرع باطهر دمه
لجل احنه انال حسن الخاتمه
وابخدمتك لذنا واتنجْينه
.......
انت من دمك رويت ارض الطفوف
وصرت كعبه والخدم حولك تطوف
كون اليعاديك بعيونه يشوف
چان طم ارويحته ابچفينه
........
خادم الحسين
حسام ناجي الحلي

قصيدة رئيسية... الخدمة الحسينية

بديت ابخدمتك وآنه زغير هواي
الى ان شيبت بالخدمه يا مولاي
على مر السنين...تضل انت الحسين...وآنه الك خادم
.......
من زغري ولگيت الخدمه عنواني
وحضوري ابمجلسك هو الي سواني
اموت ويبقه باسمك يلهج الساني
وحشاك بيوم يابو اليمه تنساني

يملجأ امنياتي...وامل روحي وحياتي...اضل اني المماتي...عايش ابخيرك

عرفت آنه التواضع بيه فخر اكثر
وهذاك الي تكبّر عمره ما يكبر
وأنه بگلبي يقين...تضل انت الحسين...وآنه الك خادم
.......
من زغري ولكيت الخدمه ويّه الدم
وعرفت الي يخدْمك عمره ما يندم
رغم درب الخدامه اختبار وهمّ
لچن بالخدمه گلبي امعلگ ومهتم

درس بالخدمه عندي..لون هالدنيا ضدي..اضل آنه اعله وعدي...خادم اقبلني

يعايش بالخواطر سيدي ذكراك
اعيش ابخدمتك تأذنلي اترجاك
أ يا كهفي الحصين...تضل انت الحسين...وآنه الك خادم
.......
من مهدي الى ان تخلص اسنيني
عهد من گلبي ضل يجري ابشراييني
الك ابقه العمر خادم يضي عيني
فضل منك اذا تقبل تخليني

الك يبقه اتجاهي...وشرف هالخدمه جاهي...ابد لا شي يضاهي ...عالم الخدمه

بخدمتك عالمي بل اجمل الاوقات
ارزقني الصدق وامنعني حب الذات
يقرآني المبين....تضل انت الحسين...وآنه الك خادم
.......
الك ناذر دمع عيني وتفاصيلي
واذا حيلي ارتخه اسمك يشد حيلي
يسالفتي التبچيني بوسط ليلى
طفل واسمع صدى المقتل يلوليلي

بحضن امي الحبيبه... انام اعله المصيبه...ويشب گلبي ابنحيبه..لو سمع مقتل

ينوّمني الضمه ويهوّد الآلام
ويصحيني خبر زينب مشت للشام
وصدى گلبي الحزين ...تضل انت الحسين...وآنه الك خادم
.......
حلم عاش ابدليلي من الزغر للشيب
وترجيتك يمن حاشه الرجاي اتخيب
تهذب روحي للخدمه الك تهذيب
وتربيني اعله حبك بالخلق والطيب

يراعي هالاماني...ولا لحضه نساني...الك شخصي وكياني...يا اعز محبوب

تربيت اعله حبك من زغر سني
ومجالس تعزياتك هنّه ربني
عله الهم والانين...تضل انت الحسين...وآنه الك خادم
.......
خادم الحسين
حسام ناجي الحلي

ميمر.... الانصار


بمدرسة الانصار تصير هذا الشرف ما بعده

يبن ادم بهالدنيا مثل الخطار
باچر تروح وفوگك يصير احجار
الزم حسينك خلي گبرك ينزار

اخلص لِمَنْ... جسمه انطحن
وامن الانصار الطيبين.. درس الاخلاص اعتمده
......
اجبر كسر ذنبك ابجو الايمان
درب الحسين يريدك اتصير انسان
وجه التكبر اطوي طي النسيان

گول وفعل.. تواضع مثل
انصار الحسين ودوم... للطيب چفك مده
......
همه الذي رخصوا الروح العدهم
لحسين ابن عقد الوله سيدهم
صاروا مَثَل لهل الوفه ابمقصدهم

انطوا دمه... وضل بالسمه
اسم المجد ليهم صار... نور الشمس من عنده
......
سير بخطه الانصار شكل ومضمون
عون الخدم خوانك ومو فرعون
عندك السان وعندك اثنين عيون

بهاي استلم.. واخذ العلم
عوف الحچي و بيهم شوف... والحچه اعليهم رده
.......
مدرسة الانصار ابخدمتك طبّق
وفق اختصاصك اخدم بكل منطق
مو كلشي شفته تنتقد واتعلّق

حسين الظهر... اصدر أمر
لكل واحد امن الانصار.... دور او اله يتصده
.......
من الانصار استلم درس الخدمه
والتضحيه اعظم درس تستلمه
ولو شفت عيب بثوب غيرك ضمه

وكت الشدد.. صير الضمد
لا تكشف اعيوب الناس... وباب النميمه سده
........
خادم الحسين
حسام ناجي الحلي

عگيلي.... للانصار

انصار حسين اتسمينه
....
احنه انصار حسين الوالي
ارواح انطينه ومنبالي
ما نهتم بس يرضه الغالي
دم الشريان احنه افدينه
.....
احنه انصار حسين القائد
مو بس قائد نعم الوالد
بالدم بيعة موت نعاهد
بس ترضه ام حسين اعلينه
....
كلمن عنه الزهره ترضه
هنياله و يا بخته وحضه
يرضه الله المرضاها بفرضه
واحنه اعله المنهاج امشينه
.....
واجب من ربنه ابتشريعه
گول وفعل حسين انطيعه
بالدم خطيناها البيعه
بيعة دم لحسين انطينه
.....
الگالو عن حسين بغربه
احنه انصاره بوكت الصعبه
من عالم ذرنه احنه انحبه
والغيره الچف ما مدينه
.....
هو المن الدنيه اشرانه
من خيره اكرمنه وآونه
الما لزمت دربه خسرانه
من يوم البي چانت طينه
........
خادم الحسين
حسام ناجي الحلي

قصيدة رئيسية.... الانصار

يا صاحبنه بوكت الشده... مو زلمه الما يوفي بوعده
والله.. والله... لو نتوذر
وياك.. للموت.. يابو الاكبر
.......
يحسين يا نعمه السند.. وصاحبنه بأيام الشدد.... وابمُرّ الاسنين
أنعم علينه الله أواجت... وهالاسم صارلنه بخت.. انصارالحسين

تعودنا.. اعله ذكر اسمك.. من زغرنا
فخرنه انت.. وسند النه... وكل عمرنه

شسوينه احنه وحضنه شكبره.. صرنه انصارك يبن الزهره
الگينا.... الگينا... حضنه الاوفر
وياك.. للموت.. يابو الاكبر
.......
يابو علي منك مدد...ورفگتك احله من الشهد... واحله المسافات
من تمشي وي صاحب ذخر... صاحب يحضرك بالگبر... واصعب الاوقات

تلاگينه... اعله حب الله... واعله حبك
يمن اجمل... درب يُوَصف.. هو دربك

انصارك فدوه لعيونك.. ويا حيرتنه شلون ابدونك
والعاش... عمره.. ابدونك يخسر
وياك.. للموت.. يابو الاكبر
.......
يالشرفتنه ابنصرتك.. وصرنه جنود ابإمرتك...والامر تكليف
سبعين حبر اعله الورق... واحدنه يحسين انخلق.. ينعد بألف سيف

ضوه وجهك.. عذب ماي.. ابظهر عاشور
يمن فدوه... الحروف اسمك.. كل الانحور

يا خيمتنه النلتم بيها... ومالك انفسنه وراعيها
ارواح... ارواح.. لاجلك نذخر
وياك.. للموت.. يابو الاكبر
.......
وياك كل عقل وگلب.. عفناهن افكار الحرب.. و بيك انشغلنه
بس فكره ضلت بالعقل.. باصدورنه انصد النبل... ونفديك كلنه

اخذ چلمة.. عهد منه...يا ضوانه
الى آخر... نفس بينا.. تضل هوانه

التيه نور الباري ودربه... باچر بيش يقابل ربه
والفاز... بإرضاك... حاز الكوثر
وياك.. للموت.. يابو الاكبر
.......
عين العمه الي شافتك.. لمّن بقيت الوحّدك.. وابلايه انصار
اتمنينه نرجع هالعدد.. وانموت وانردلك بعد.. وما تبقه محتار

امانينه... يغالينه... نحصّل ارضاك
واذا متنا..الف مره... نحيا وياك

يا اولنه ويا تالينه... غيرك نقسم ما والينه
انصار... انصار... نفدي المنحر
وياك.. للموت.. يابو الاكبر
.......
خادم انصار الحسين عليه السلام
حسام ناجي الحلي

قصيدة رئيسية... القاسم عليه السلام

نظر عيني يجاسم... يعريس الهواشم
اذا مرت شباب.. احنن للتراب.. يعريس الهواشم
......
يا نور البصر يبني... يسالفتي التسَلّيني
آنه امك يلب احشاي... وچلمة يمه تغنيني
ليل انهار اسولف بيك.. ورسمك ما يجافيني
تريد انساك گلي شلون... يالساكن نظر عيني

تره الشيبي ذخرتك... وتهيل اترابي ردتك
الك دلالي ذاب... احنن للتراب.. يعريس الهواشم
......
آنه امك ينور العين... وانت الحاله تدريها
أم وتفكد ابنيها.... بعد شنهو الينسّيها
يضل درب الگبر سچه.. ياخذها ويودّيها
ومعروفه الفجعها اوليد.. من نشغة بواچيها

انكسر كلبي ابمصابك... خذوا زهرة شبابك
هدم حيلي المصاب...احنن للتراب.. يعريس الهواشم
.....
اصعب لحضه يوليدي.. عله امك يا عزيز امك
عميه ولا تشوفك عين... ذبيح وسابح ابدمك
ركضلك من طحت عالگاع... مهدوم الركن عمك
وأنه گلبي گبل عمك... ركضلك رايد ايضمك

الخبر منك يروحي... اجاني وگلّي نوحي
لمن شفت الخضاب... احنن للتراب.. يعريس الهواشم
.....
امك والالم بيه.. يجرحي وبيش اروفنّك
عگبك يا ربيع الروح... يالوجه البدر چنك
افزّن لو شفت شبان... عسه وياهم اشوفنك
ما خليت رايح راد... تعبت من النشد عنك

ال ابعمرك شفتهم... عليك أنه اسألتهم
لچن ماكو جواب.. احنن للتراب... .. يعريس الهواشم
.......
اعز من النفس عندي.. يكل آمالي و اضنوني
وصرت كل مغربيه انعاك... واهلّن دمعة عيوني
يا لون البقه ابفرگاك.. يوليدي اختلف لوني
ولا حيل البقه بيه... ابذبحك يبني فجعوني

انهدم حيلي يغالي... وعشت صعب الليالي
بمصابك گلبي شاب... احنن للتراب... يعريس الهواشم
.......
خادم الامام القاسم عليه السلام
حسام ناجي الحلي