#نزله
#أو_لمة_عزاء

خلي بس اعله اللطم تعويدك
غير ابو السجاد ياهو يفيدك

........................................ 1

اخذ مني هالنصح يا صاحبي
ابجي بس اعله النبي و ال النبي
خلي دمعك للعفاف الزينبي

و خلي بس يا كربله ترديدك

........................................ 2

بالدمع بالطمه خلي راحتك
و عالكفل خدر اخته رخص دمعتك
خلي بس حسين تصبح كلمتك

و بنزول الدمعه يصبح عيدك

........................................ 3

تريد تربح انه ادليك بحلول
و التريده انه اضمنك تنول
يا ابا السجاد بس تندب تگول

التريده يصير حتما بيدك

........................................ 4

يصير حتما تاخذه صك الامان
تجوز رأسا بي تفوت انته الجنان
بس فقط لحسين عود هاللسان

و لا تخلي بالذنب تگييدك

........................................ 5

لا تخلي ذنبك يسد جنتك
نعمه هاذي و احفظ انته نعمتك
لمن الزهراء خادم سمتك

يعني مخلص بالخدامه تريدك

........................................ 6

مخلص تريدك تذل ليها النفس
و بمعاني كلمة الـ(خادم) تحس
هالمكان تريده جن الله و انس

صفي گلبك حته خير تزيدك
........................................

#الحمد_لله_على_نعمة_الحسين
✍️ الأقل زين العابدين السعدي

#رئيسية

شمقدم و ال النبي رفعوني
هواي البشر عن هالامر سألوني

شمسوي و عليت الراس
تسألني شكأل للناس

........................................ 1


اجاوب و بجوابي حيل اضل افخر
اليصغر بالخدامه و يالسبط يكبر
الما يدري تره الدنيه خلك معبر
و ناخذ منها قطعة جفن مو اكثر

اترك دنيتي و ابقه اجلب بيهم
خادمهم و محسوب اضل اعليهم

و أبقه الآخر الأنفاس
تسألني شكأل للناس

........................................ 2

اجاوبهم و أصون النفسي و لساني
واحدنه يحب و يطاوع الثاني
حسين الوالد الخدام خواني
و المجلس احبه و هوه رباني

رباني واجب ما اتركه المنبر
شما ازغر بدرس الخدامه اكبر

و يبقالي العشگ مقياس
تسألني شكأل للناس

........................................ 3

يحبني حسين لازم طبعي متواضع
و شينطيني الله مسلم و قانع
و اتعذر اذا مني غلط طالع
اليتعذر لاخوته يموت هم سامع ؟

الآسف زغيره و بيهه يكبر شاني
حسين الأبو و اعله الصبر رباني

و علمني الوفه العباس
تسألني شكأل للناس

........................................ 4

اجاوبهم و اكول الخدمه مو مظهر
الخدمه تعتمد يخواني عالجوهر
الخدمه اكبر تره من هالحجي و اكبر
الما يمشي عدل ويه السبط يخسر

اليمشي بالخدمه نجاحه حاسم
و اقرب مثال انعرفه سيد جاسم

بشانه ينحلف نبراس
تسألني شكأل للناس

........................................ 5

أجاوبهم و أوصي نفسي و الوادم
حسين بكربله ما منه شي سالم
لا خادم يگص و ينكل بخادم
خلينه بعزانه نواسي بالقائم

نواسي الامام الذبحوله احبابه
الكل لحضه يبجي اعله السبط و مصابه

خلي بجرحه عدنه حساس
تسألني شكأل للناس

........................................

#الحمد_لله_على_نعمة_الحسين
✍️ الأقل زين العابدين السعدي

#رئيسية

وفاءً يا إمام | لك العزا يقام

و المدامع و اللطم واجب عليه
حسين وفقني الخدمتك للمنيه

........................................ 1

بگلبي مو لطميه شايلك قصايد
انه حالي وياك مثل الأهله فاگد
و شتضنه الفاگد اهله يبقه گاعد
لو يسولف يضحك و دلاله بارد

دمائي أفتدي | قليلاً سيدي

و اذكر اسمك كل صباح و كل مسيه
حسين وفقني الخدمتك للمنيه

........................................ 2

گلبي بسمك سجليته نبضه نبضه
بداعت سكينه و رقيه اعليه ارضه
و انته التحبه و تقبله شكبره حضه
انته لو ترضه عليه الباري يرضه

عزائي مسكني | بكربي مأمني

و الطم و الدمعه للخادم هويه
حسين وفقني اخدمتك للمنيه

........................................ 3

كلشي ما اريد بدنيتي بس مأتم
الينعه لجلك سيدي اي و الله غانم
ما يموت اليخدمك يبن الأكارم
و ليها صار اقرب مثال الناعي جاسم

و ذِكرُهُ بَقى |مضى و ما مَضى

ما يموت الينعه للراحت سبيه
حسين وفقني الخدمتك للمنيه

........................................ 4

و الله ما رايد أبد غير المناحه
و المَشّقه بخدمتك احسبها راحه
منهو مثلك بالطعن راحت صفاحه
مطيب جروحي و رمل تارس جراحه

يا سيدي الكبير … و عبدك الصغير

يرجه منك تنظره بهاي العزيه
حسين وفقني الخدمتك للمنيه

........................................ 5


ما اعيشن عالهوه العيشه اعله دمعي
و كون مو ضلعك تهشمه الخيل ضلعي
امي ربتني و تگلي حسينك انعي
و صار بس اعليك انعه و هذا طبعي

و اعلم البكاء .... لأجلك شفاء

الدمعه توگع حتماً ابچف الزچيه
حسين وفقني الخدمتك للمنيه

........................................

#الحمد_لله_على_نعمة_الحسين
✍️ الأقل زين العابدين السعدي

#ليلة_القاسم_ع

........................................

يمه ذكريني اذان و حان بيه
يمه ذكريني و ذكرتك مغربيه

و دمعي همل ليك جروح
تحمل فراكك يا روح

........................................ 1

يحروفك احله من الشهد
ووجهك يخجل المرجان
جان الابو يعزب اليجي
و بيدك دلال و فنجان
من الله لا ينطي الدهر
الخله دليلي حزنان
ماخذ من عيوني مَلك
لا و الله ما گول انسان


يا يمه جروحي .... و جروحك سويه
يا يمه جروحي .... تندبك حن عليه

يمه خِذَتّك يا سوح
تحمل فراكك يا روح

........................................ 2

يالروحك رويحة ورد
ترفه و تريد مداراة
و امك يبعد امك تره
خلافك گضت بالويلاة
اتمنه و الله بهالعمر
ترجع الراح الونات
جا ابقه اون طول الدهر
حته يعاودلي المات

روحي تريدك .... من گبل المنيه
روحي تريدك .... لجفوفي تجيه

گلبي ويه راسك مجروح
تحمل فراكك يا روح

........................................ 3

يا كلمة اليمه و علي
شكد حلوه من اشفافك
يا ضوه عيوني يالولد
واجب يصلي الشافك
هو الحِسِن مخلوق الك
لاخر نفس ما عافك
كل الجمال او طلته
كعبه انته كام و طافك


يا جرح العاشر .... راواني الاذيه
يا جرح العاشر .... خلاني سبيه

و الفرحه طير و مذبوح
تحمل فراكك يا روح

........................................ 4

ما سامعه جلمه تغث
منك يوجه الرحمه
داري خليه و موحشه
يا يمه صعبه و زحمه
الفارك ابن فارك شمس
دنياته تصبح ضلمه
و الفاركك يبن الحسن
معناها فارك امه

يغله من روحي .... يالمالك كياني
يغله من روحي .... فراكك ضيعاني

عايفني للغبره تروح
تحمل فراكك يا روح

........................................ 5

اسمك و لا انساه ابد
لا و الله يا ضي العين
الينساك معناها نسه
الحسين و مصاب حسين
كل لحضه التمرني كمت
اتمنه يلفيني البين
نتلاكه كلي يا وكت
يا يمه و مجانك وين

روحي ملهوفه .... و مجمر دليلي
روحي ملهوفه .... اكصد و اعتنيلي

و الدمعه للملگه تلوح
تحمل فراكك يا روح

........................................

#الحمد_لله_على_نعمة_الحسين
✍️ الأقل زين العابدين السعدي

#نزله

اشهد انك حبيبي يا ابا عبد الله

........................................ 1

اشهد ان العشك صاير شعاري
و الله مو بيدي صبح بيدك قراري
من ذنوبي سيدي ليكم فراري
و هذا تعبي و ناتج الخدمه ثماري

و انته لجروحي طبيبي ... يا ابا عبد الله

........................................ 2

كل وكت بسمك يردد بس لساني
انه عاري و خدمتك ثوب و كساني
منهو مثلك من ظلامي طلعاني
و بالمجالس و المواكب و طناني

و صار بالمجلس نصيبي. ... يا ابا عبد الله

........................................ 3

افتخر انه بعزائك گلبي ذايب
و اختنك لو ما اشم عطر المواكب
و الله بالخدمه جرح دلالي طايب
جني ابنك ما تردني مره خايب

يا دعائي و يا مجيبي ... يا ابا عبد الله

........................................ 4

استعد وكت العزه جن عندي طاعه
لو فرض عندي ولا فضل ضياعه
يا حسين و خدمتك اشرف بضاعه
بيها دنيه و اخره اخذ شفاعه

و ابقه بيها الحد مشيبي ... يا ابا عبد الله

........................................ 5

روحي ما تروه بعذب تروه بمجالس
انه ذاكه العاللطم رباني عابس
انه للخدمه فقط بس عندي واهس
و للعزيه ركضتي ركض النوارس

يا فرحتي و يا نحيبي .. يا ابا عبد الله

........................................

#الحمد_لله_على_نعمة_الحسين
✍️ الاقل زين العابدين السعدي

#نزله

افني عمري الخدمتك يبن الزجيه

&&&&&&&&&&&&&&&&&&&&&

گلبي ناذرلك نذكر كل المشاعـــــــــر
وياك اعيش ايامي كلهن يوم عاشــر
و الله و بهذا الوسام امشي و افاخر
بحبك اتفاخر لون سموني كافـــــــر

و الله ما وفيت نص دين العليه

&&&&&&&&&&&&&&&&&&&&&


و الله ما أهوه الفرح أهوه المجالس
و عالمجالس و اللطم رباني عابــس
ما تلوگ إعليه بس سود الملابــــس
بالعشگ أول ألا هل من منافـــــس

بصدري باقي هالأثر تشهد اديه

&&&&&&&&&&&&&&&&&&&&&


عيوني ما تهوه السعد تهوه المدامـع
و انه خدمك و افتخر بالخدمه قانع
بالهخدامه ما ردت جاه و مطامــــــع
و لحروفك سيدي دلالي خاشـــــــــع

و نطي عمري و ما اساوم عالقضيه

&&&&&&&&&&&&&&&&&&&&&



حروف اسمك سيدي تجري بدمائي
و حللت دمي و لگيته كربلائــــــــي
لغيرك ابدا و الله ما اكتب و لائــــي
من ابو فاضل تعلمته وفائ

و ابقه ثابت عالعهد حد المنيه

&&&&&&&&&&&&&&&&&&&&&


انت عندي الأول و محسوب كلشـــي
بس عله ذكرك ينگع دمعي رمشــــــي
انعي لجلك انه كاعد انه امشــــــــــي
و انعي حته بموتي لو شالولي نعشي

و انعه و ابجي اعله الغريبه الهاشمية

&&&&&&&&&&&&&&&&&&&&&

حروف اسمك سيدي اجمل قصيده
منهو مثلي خادم و اخذ الأريــــــده
و الاخدمه بشر لا هاذي بعيــــــــده
اسمه مفتاح و جنان الباري بيـــــده

روحي ما تنساك لا تنسه السبيه

&&&&&&&&&&&&&&&&&&&&&

#الحمد_لله_على_نعمة_الحسين
✍️ الاقل زين العابدين السعدي

#ميمر

تدعيلي امي بكل حين
الله يزيدك خدمه

........................................ 1

تدعيلي و تكلي ييمه إقراله
و تكلي كلنه فدوه اله و لعياله
لحسينك عيونك تضل هماله

و وصتني لو طيح بضيج
انخا و اكولن بسمه

........................................ 2

اتكلي خدمتك خلها ويه انفاسك
الهذا الامام الكبرك وي ناسك
مكطوع راسه و هوه رافع راسك

لو ما تخدمه بدنياك
لا ما احسبك زلمه

........................................ 3

لو صار مجلس اول اللطامه
و من تنذكر زينب تدگ عالهامه
واسي الامام الرضرضوها اعضامه

هذا الامام المذبوح
و الخيل تسحگ جسمه

........................................ 4

صخام الجدر يمه تمسحه بهامك
و تگله احسبني احد ايتامك
و لمن تخدمه يمه حفي اجدامك

حته تحس بالام
و تحس ييمه بهمه

........................................ 5

اكنس مجالس يمه الطم و اقره
شتقدم شويه تره للعتره
خلي بضميرك ترضي بس الزهره

ترضي الاهك بس كون
و ترضي الحسين و امه

........................................ 6

لو متت يم گبري إگف و انعيلي
و اقره ييمه بگبري دمعه ابچيلي
امك الزهره اليتم لا تشكيلي

عالطاهره و عالمذبوح
دمعك ابد لتلمه
........................................ 7


اخدم عدل يمه خدمتك تبگه
اصبر لون بالخدمه تتعب تشگه
خلي امامك بالضمير اتعشگه

(( و خلي احروفه بطرف السانك ))

........................................ 8

خلي الخدامه يمه هي مضمونك
و حسينك اتشيله بدال اعيونك
اخدم ييمه لا تضن يجفونك

(( و بالمحشر خبصه و يلگونك ))

........................................

#الحمد_لله_على_نعمة_الحسين
✍️ الاقل زين العابدين السعدي

ابوذيات عاشورائية

:::::::::::::::::::::::::::::::::::::::::١

لجلكم يهل كـــــوفه … طر فله حسين
الحكم ما جان دايـس …طرفه لحسين
بيمينه و رفع راسه و … طرفه لحسين
يريد الكم سماح ابن الزچيه

:::::::::::::::::::::::::::::::::::::::::٢

گضة خوتهم التــــــنگط …محنه
دهرنه إسبعطعش نجمه …محنه
و حنين النوگ حــنّي لا … محنه
إخوتي مذبّحه و آني سبيه

:::::::::::::::::::::::::::::::::::::::::٣

عله ظــــهر الهزيله … مـاتم حسين
عرش بارينه هذا … مات أم حسين ؟
بدفنته وسفه و الله … ماتم حسين
راسه و جسمه ما ضلن سويه

:::::::::::::::::::::::::::::::::::::::::٤

نشوف الخيمه حاقد … وجهه بينه
و تمنــيــنّه وجـــوده … وجه ابيـنه
تره الحـــادي عگبگم … وجهه بينه
الكوفه وشام و الديوان اميه

:::::::::::::::::::::::::::::::::::::::::٥

صرت حرمه وحيده بدون … واليان
بچه الحالي الإنس عبـاس … واليان
شكثر راحن يخويه الحيد … و الين
اشد منهن عَلَي ديوان اميه

:::::::::::::::::::::::::::::::::::::::::٦

شـفت حاله يـزيـنب … ما رداني
يگلي إرجع يخـويه … مـارد أني
يگلي السيـف خويه … ما رداني
رداني الشگ جربتي و هايهيه

:::::::::::::::::::::::::::::::::::::::::٧

لَـوَن حــاضــر يــخـويه … ما لــمتني
الأرض و السبعه عگـبك … مـالمّـتـني
أحـسّـن مـتني طـايـــح … ماله متني
هِدل مَتني الشتم و إسياط اميه

:::::::::::::::::::::::::::::::::::::::::٨

الجرح مـن الهـجر عـبـاس … يدّي
و عگب يدّك تعال و شوف … يدّي
عله جسـم الاخو و ناديـت … يدّي
تعال حسين داسو باعوجيه

:::::::::::::::::::::::::::::::::::::::::٩

حقيقي عالــمك مــاكــو .. وهم بي
و احبنه الذي يخدمك .. و أهم بي
حفظ أهل الكهف ذكرك .. وهـم بي
الك نصبو عزه و ناحو سويه

:::::::::::::::::::::::::::::::::::::::::١٠

حسين من السحك راحت … وصل بيه
و نزيف الدم لحد جدمه … وصل بيه
يهون اعليه ذبح ابني … وصلبه

و لا انضر اخوي اعله الوطيه

:::::::::::::::::::::::::::::::::::::::::١١

غير الحب لدربك … ما هداني
بخدمتك راسي عالي … ما هو داني
و يچف الرحمه چفك … ما هداني

لان أنحب و انوح اعله السبيه

:::::::::::::::::::::::::::::::::::::::::١٢

يحادي النوك بله - مره لبني
و لا زعلته و الله _ مره لبني
ابد ما رضعيته - مره لبني

اذا ما جنت اوصيه بأبيه

:::::::::::::::::::::::::::::::::::::::::١٣

عاشوريه - زينبيه

جرحي بگلبي ما يبره … و لا هاد
و حزني مچلب بچفي … و لا هاد
و لا يونس صبر صبري … و لا هود

عگب ما حرگوا الخيمه عليه

:::::::::::::::::::::::::::::::::::::::::١٤

الدمع عالمنذبح ما يوم ... كف لاي
و تگيد بالحبل يا حيف ... كفلاي
عكب عباس ذاك الجان .... كفلاي

يسموني الغريبه الخارجيه

#الحمد_لله_على_نعمة_الحسين
✍️ الاقل زين العابـدين السعدي

و لا انسه الشماته و دگ ... طـــــــب الهم
مو بت نبي چن كافر ... طـــــــــــب الهم
اهل الشام ما يرهم ... طــــــــــــــب الهم

مرضه و المرض بغض الزچيه

:::::::::::::::::::::::::::::::::::::::::

تروح ادموعي الك فدوه ... وعــيني
و درب حبك على الرحمه .... وعانـي
لَوَن غيرك احب اتعب ... و أعانــــــي

و تضل دوم الندامه تعيش بيه

:::::::::::::::::::::::::::::::::::::::::

#الحمد_لله_على_نعمة_الحسين
✍️ الاقل زين العابـدين السعدي

#استلالية_محرم_الحرام ١
____

باب امنياتي اسمك حياتي
عن عاطفه و ايمان اسمك حياتي
_

بيك شفت الدين قيم ابلا وجودك شلي بيه
انته مشكاة الهدايه الله حط كلشي بديه
گلبي لو ما يهوه اسمك ابفلس ما اشتريه
آنه كل ايامي انته و الهوه العايش عليه

ابلا طاريّك ظلمه الدنيه
و عميه العين ابلا مصباح
يا خير الغطاني ابعمري
انته الجاي و انته الراح

كلشي بچفوفك وداعت حروفك
و بمصحف الوجدان اسمك حياتي
__

ضيعت كلشي و لگيتك و صار إلي ذكرك حياة
بيك منك الك عمري و اسمك ابشفتي يبات
اشرب الماي و أسلم عالشفاه الذابلات
گلبي دگاته اعله اسمك گلبي لو ينساك مات

انته الميت و انته العايش
و انته الحاكم للازمان
ينبوع الكوثر بچفوفك
طافح بس ميت عطشان

كوثر دليلي ضامي بسبيلي
يالباقي عالتربان اسمك حياتي
___

حرّزت فكري بطفوفك من مفاهيم الزمان
الدهر ما بعّدني عنك انته لحساسي حنان
من مصابك و المصابك عايش ابنار و دخان
خيّمت يم طاري حزنك و دمعي وچدله مكان

رافگ ناگة زينب دمعي
من الخيمه الحد الشام
عاشورك لو هل اهلاله
يتوسم صدر اللطام

رسمت دمعتي حزني و حسرتي
يالمنذبح عطشان اسمك حياتي
___

عاشرت احزاني لجلك و فارگت كلشي بلاك
الليل من ايمر ظلامه دمعي بعيوني بچاك
امصاحب الحسره ولچمتي و روحي تاركها وراك
ابلا هواك اتموت ريتي و عيني تعمه ابلا ضواك

تيّهت اصحابي امن الدنيا
من اندليت اجروحك وين
ما يكفي امحرم ابچيلك
قررت انحبلك للبين

يبقى نحيبي لجلك حبيبي
يا معجم الاحزان اسمك حياتي
__

اباب مأتم حزنك آنه واگف بلوعه و عذاب
رايد امن ادخل عزائك ينترس گلبي مصاب
لون أسمع باقي نايم اتلث ليالي عالتراب
منسحگ مسلوب ضامي وچم سهم بحشاك طاب

مذبوح و جسمك عالغبره
و راسك يفتر فوگ ارماح
مسبيه اعيالك عالهزل
و الي يحديها الذباح

الحره الابيه تدخل سبيه
اعليها الدمع خلصان اسمك حياتي




حسين الأمين

#استهلالية_محرم_الحرام ٢ ( نزله )
_

هاي الشعائر للحشر موجوده
حافظها ربنه وبالكتاب اعهوده

آيه بكتابه امنزله آيه بكتابه امنزله
__

هاي المجالس بالدمه نشريها
ليوم الحشر الله الذي يحميها
يلي تريد من الأصل تلغيها
نص بكتاب الله أمر نحييها
(( نحييها بدمنه للمحشر ))

يلي تحارب افتهم مقصدنه
لهاي المجالس منرخض كل دمنه

آيه بكتابه امنزله آيه بكتابه امنزله
_

الصادق امرنه واحنه تدري انطيعه
لا تدخلنه بكل سنه تشريعه
هذا اللطم بالجنه هم منبيعه
قول النبي خصانه احنه الشيعه
(( خالقنه الباري الخدمتهم ))

احذر كلمتك لا تمس مبدأنه
لوما المجالس الله ما خالقنه

آيه بكتابه امنزله آيه بكتابه امنزله
___

نحيي الشعائر من لطم و قرايه
يا من تعارض كلمن و حر رايه
شوف السنه چم موكب ومشايه
خليها بذنك هاي منه احچايه
(( ما نترك للموت الخدمه ))

بالجنه باچر موكب النه تشوفه
و اليلطم العباس دون جفوفه

آيه بكتابه امنزله آيه بكتابه امنزله
__

قادم محرم و المدامع حمره
و النبي حاضر بالعزه و الزهره
يلي تمانع افتهم هالعبره
كل نبي مرسل واگف يدگ صدره
(( و حيدر يلطم طابر راسه ))

و حسين يحظر مجلسه ايحيينه
للجنه ياخذ ياهو تهمل عينه

آيه بكتابه امنزله آيه بكتابه امنزله
____

لو ما المأاتم چا تضيع الوادم
يل الحاير بذنبك تلوم و نادم
احضر مجالس و اندب و ظل لازم
ينغفر ذنبك بس تنظرك فاطم
(( و يتسجل أسمك خادمها ))

من الله هاي التعزيه هم رحمه
من تدخللها أدخل بكل همه

آيه بكتابه امنزله آيه بكتابه امنزله




حسين الأمين

#استلالية_محرم_الحرام ٣
__

مصابك نبي و عايش بغار خيامك
يل عالترب فرشت الخيل اعظامك

نايم وسط حر الشمس ساكن دليلي
___

الحالتك تبچي السمه صار غيم من الدمه
وانته متوسد الترب طعنه و عذاب
نايم بطول الأرض امفرط و ما تعترض
فرشوا بجسمك مثل فرش التراب
حتى من لمك علي وصله وصله يالولي
و بحصيره جمعك أعظم مصاب
شلون حامل هالوضع موذر شلون الدمع
نايم أنته و كون لأجلك باضطراب

ضاع الفكر من شفت جسم بلا رأس
يالمنچتل و محروگ من نار الشمس

بألف و تسعمية جرح ساكن دليلي
___

اتغيرت ارسوم الوجه و للخيم من تتجه
تسمع أختك تندبك و أنته چتيل
شيخ تلهب غيرتك و الحميه اخذتك
تجمع بحيلك تريد و ماكو حيل
رغم كل هذا الحصل گمت و موذر وصل
من شفتها عالخيم هجمت الخيل
گطعوا الراس و گمت بموقفك هذا همت
غيرتك فزعت من ادماك التسيل

خالد صرت كل زمن شمسك تسطع
لا ما متت مو شمر نحرك يگطع

يل عالرمح راسك بقى ساكن دليلي
__

طحت لكن عالسمه وانته ابن حامي الحمه
ما أظن الگاع تحمل وگعتك
حرت بيك و ما حرت لمن گالولي طحت
شلون توگع و أنته كون بصايتك
أجزم أنه بهل الأمر طحت بس واكف عمر
يلي طبع اجبال ماخذ هيبتك
ما متت لمن متت طول الزمان اتخلدت
و الشمس مصدر ضواها گبتك

يابو علي الباري اجتباك و إيدك
و ابموتتك لا ما متت مو موعدك

تبقى على طول الدهر ساكن دليلي
___

شفافك الصارن خشب وجهك بلون الذهب
ضامي لكن دمك امرويله كون
اتوذرت بس جمعت الدين بالدم احفظت
أنته مصفر و نطيت الدنيه لون
چم أخو شفته وگع چم إبن نحره انگطع
اتكابر بدمعك يملاچ العيون
نشفت ارياگ القلم من تخيلت الألم
فتشت بالطف جروحك ما تهون

شذكر إنه بكل جرح روحك تنچتل
يمهن متت بس ترد لخيامك عدل

وبجروحي بعدك ما متت ساكن دليلي
____

يا بشر ما مثلك بشر انطى للعالم عبر
بيك متجمعة المدامع و الألم
چنت وحدك بالحرب و اترست دلالي حب
يا حقيقة بلا خيال و لا وهم
عشت بيه بلايه حد بكثر طعنات الجسد
بكثر حيرة زينب بحرگ الخيم
عيشتني بلا سبب لأجلي متحمل تعب
سيوف و ارماح و جراحات السهم

گلبك ردت و سلمته اليه بلا ثمن
راس برمح و عيالك لأجلي انسبن

يالمنذبح و المنسلب ساكن دليلي





حسين الأمين

#استهلالية_محرم_الحرام ٤ ( نزله )
_

الله لا يحرمنه من هاي المجالس
__

الصادق اليروي فضلها و عنها اسمع قصته
اليحضر ابمجلس حسيني و يصرخ ابيا ليتى
ينحسب زاير احسين و گعد جوه گبته

من مجلسه زاير مسه الي حضر بالمأتم
منه انقبل افضل عمل الي لطم و محزم

الصادق اليرويها مو فكره و وساوس
الله لا يحرمنه من هاي المجالس
___

بالخصائص اقره عنها و دقق بكلماته
استشهد اويه احسين چنه الجالس ابعزياته
و رحمة الله تنزل اعله الي يهل دمعاته

لا لا تظن هذا الحزن ابلايه فكره و غايه
كلشي انوجد لابد عقد للحسين اقرايه

لليخدمه اتخصصت آية ننافس
الله لا يحرمنه من هاي المجالس
___

الما حظت بالحج سنينه و يحج راد بگلبه
خلي يجلس جوه منبر و العزاء اينصبه
ينحسب طاف المقام و لبى وسط الكعبه

زاير صفه مروه صفه ألي يلطم صدره
طاف انحسب حجي انكتب العينه هلت عبره

ما يفارگ مجلسه لو يرد عابس
الله لا يحرمنه من هاي المجالس
____

إلي يحضر مجلسه يلطم و تجري عينه
تحت ظل العرش باچر يگعد اويه حسينه
و اليريد الجنه ينشد على المأتم وينه

هاي الصفه مو عاطفه بالسند موجوده
و الغانمه ابمأتمه الخير كله ابجوده

هالمجالس للبشر اعظم مدارس
الله لا يحرمنه من هاي المجالس
____

اليبچي لحسين و دموعه اعله الوجن تتجاره
ايطيح الله اذنوبه كلها و ما يعذبه ابناره
و بالحشر ما تضمه شفته و لا تزيغ ابصاره

يوم الحشر كل البشر العين منها تعمى
إلا اليون يدمي الجفن للحسين و دمه

ينحشر فرحان مو خايف و بائس
الله لا يحرمنه من هاي المجالس
_

لون ما تبچي تباچى لو سمعت امصابه
لو فقط تنويها اسمك ينكتب بكتابه
حتى انفاسك تسبح و الأجر بحسابه

ابمجلسه تتنفسه الهوه تاخذ اجره
كلشي ابثمن لم الحسن لو بحجم الذره

الثواب اتحصله لو فقط جالس
الله لا يحرمنه من هاي المجالس




حسين الأمين

#استهلالية_محرم_الحرام ٥
___

فده العمر الك نذر
عيشني بحسينيه كون ابچيلك يوميه
___

رايد بجرحك حياتي ابلايه جرحك كلشي ما تسوه الحياة
أخذ بيدك عمري كله كون كل لحظه الجفون امبللات

عيشني الألم و افجعلي دلالي
رايد كل حياتي اجروحك اگبالي
شما دار الوكت بس انته البالي

مثل وهب الك وهب
عمره بصافي النيه كون ابچيلك يوميه
___

لچمه گلبي من طفوفك العذاب اوياك نعمه مو عذاب
احسبني گطرة ماي بلكت تروي عبدالله و ترده للرباب

رايد صوره من طفك تجي بعيني
يم حرگ الخيم و اللوعه وديني
و بذاك الجمر ابنص گلبي چويني

دموعي دم على الخيم
جمر الخيمه اطفي بيه كون ابچيلك يوميه
____

افرشني يم باب المخيم هيچ و تمر بيه سحگات الخيول
خاف يبقى ضلع سلم اخذه وي راسي على الهزل يجول

رايد راسي ينشال برمح مثلك
و لو ضربوها علويه يدنگلك
كون الضيم يترسني مثل اهلك

على الرمح أنه انذبح
رايد شوغة علويه كون ابچيلك يوميه
___

هاي كل احلامي بيدك طرزتهن چلمه چلمه بالدموع
خاف ما استاهل آنه هاك گلبي و شوفه بس لجلك يلوع

وقف كل المدامع بس على بابك
اترسهن و اوشلهن على امصابك
اقبلني عبد مملوك لاصحابك

عبد ردت ألك صرت
اقبلني و هاك ايديه كون ابچيلك يوميه
__

الله لا يحرمني منك من عزائك من خدمتك يا حسين
الكون لو بچفوفي ينحط ما ابدله بدمعة الخد و الونين

خليني بعزائك محترگ گلبي
رايد ييدي خدمه و ينتهي دربي
چني اويه اليتامه هم رحت مسبي

انتهى الحچي فقط بچي
امحلفك بالمسبيه كون ابچيلك يوميه




حسين الأمين

#استهلالية_محرم_الحرام ٦ ( شور )
______

سنيني ما يسون أي شي من دونه
حنيني يحسبني خادم ممنونه
ونيني ضامي مولاي ايذبحونه ونيني

مصابه خالط افكاري و دلالي
اعله بابه واكف و ادموعي تبرالي
عذابه شاغل گلبي و شاغل بالي عذابه

ساكن الروح حسين وحده حبيبي
گلبي مجروح و جرحه اصبح طبيبي
خالط الذات و روحي بيده ملكها
بس إله النوح يحلى لجله نحيبي

ساكن بين اجروحه و الحافر
و اسرح يمه مجنون و شاعر
و يتحقق حلمي بلهفه امساهر
كل يوم ابچي امصابه چن عاشر

بدموعي الجريه ارسم محنته
و اشعر بالعزيه الطف و غربته
و بعالم خيالي حاله أنظره
نايم عالوطيه و سيف برگبته
______

خدامه الله بهالخدمه امشرفني
كرامه تاج العز دوم املبسني
وسامه دمعاتي و لطماتي و حزني وسامه

امامي لجلي متوسد عالغبره
هيامي من اجري لمصابه العبره
غرامي گلبي من حب غيره اتبره غرامي

رافع الهام بخدمته كل عمري
اكبر اوسام دمعتي من تجري
آنه يا ناس حسين روحي و دمي
اتركه اوهام عاشگه من زغري

رايد بس الجرحه دمعاتي
رايد من دم تنزل عبراتي
بلكي موتي ايحين بآهاتي
و ايرض گلبي حافر لوعاتي

من صوت امي اسمعه بذني كلمته
بيه حبه شمعه تضوي امحبته
همست امي كلمه لحسين العشگ
بحسين خلي طبعه گلبك نبضته
_____

حنانه ما توصله ذره أمي
امانه من حبه اسمه صار اسمي
مكانه ما يتعوض يجري ابدمي مكانه

رسمته وسط عيوني اصبح قبله
عشگته و ما عاشگ لا بعده و قبله
خدمته و ضحيت بهالدنيا لجله خدمته

عاطفه و دين حسين صاير حياتي
بخدمة حسين تنقبل كل صلاتي
أصل هالنور كله شع من وجوده
بدمعة العين تكتمل امنياتي

محلاها يمه يخلص عمري
حد ما اجزع و أخلص من صبري
رايد يوميه اخسفله صدري
يالدمه عالغبره ظل يجري

شعت من خيامه للعالم ضوه
و بنفاس اليتامه شمينه الهوه
كل الدنيا لجله و الكون انوجد
من منهل كلامه ثبتت نينوه
_____

رساله نهجه للعالم يتوصف
دلاله نحره يترتل چن مصحف
بساله و العزمه شاهد ظل الطف بساله

دمائه تنزف ايات و تترتل
سنائه قانون و دستور و مشعل
نسائه لجل الدين ايصعدن هزل نسائه

كل الاديان عبره تاخذ ثورته
صوت قرآن بعالم الذر سمعته
وهج للكون كربله و كل ألمها
لينه عنوان شامخه تبقى گبته

رايد بس دمعه اتظل سچابه
و ما اترك فد لحظه امصابه
و اوگف مثل امجدي يم بابه
و يتيمم حزني بس بترابه

و بصوت المنابر انولدت هالخدم
من وحي المناير رفينه العلم
و زنجيل المواكب اسسنه نهج
بتطبير و شعائر ثبتنه القيم




حسين الأمين

#استهلالية_محرم_الحرام ٧
_____

يالناشدت عني و تريد اخباري
ايدليك بيه دمع عيني الجاري

يالتيهت عنواني بكل تعزيه تلگاني
___

يالتبحث عن العنوان اسمع مني هالكلمه
تلگاني بظلام الليل تضوي دمعتي النجمه
لا تسألني وين اتعيش بيتي مجلس و خدمه
صحباني الدمع و الآه و اللجمات و اللطمه

اويايه دمعتي تنتقل بالعزيات
امسافر على اجناح الجرح و الحسرات

شوف الدمع حلاني بكل تعزيه تلگاني
__

ليليله اعله باب الشوگ كاتب مستهل و انعه
مجلس ناصب ابگلبي كل لحظه يون ضلعه
ياما حارگ ابروحي بس ما أشبه الشمعه
ما اطفه اويه هب الريح لا اذبل من الدمعه

لو چنت منغث السبب مو بيه
كل يوم افك ريگي الصبح لطميه

بحسين افك الساني بكل تعزيه تلگاني
_

ميهمني تذم عذال بكفاي الحچي متروس
مهو البيده گمر ضاوي شلون ايبدله ابفانوس
خليني اعله باب حسين الداخل مجلسه محروس
ترى الشجره التحب حسين فشله اتخاف من الفوس

خليني يمه و بالمجالس شادود
لطام صاير شاعر و هم رادود

امگدي اعله بابه اني بكل تعزيه تلگاني
__

لتحاول تغير أفكار ما تگدر عليه ابهاي
ترى ظهري اسنده عباس من طاح اعله شاطي الماي
كل يوم الحرب تنعاد و يرجع منتصر مولاي
كافي بسك اتعادي حسين امسيطر اعله الراي

شگد حاربوني قبلك و روح أسأل
كلمن على المجلس تگرب ينذل

من هيبته انطاني بكل تعزيه تلگاني
____

عن هاي القضيه أبعد منك ما ردت مأجور
تدريني من ادگ صدري حيدر يعتني مطبور
قبل لا يبتدي المجلس توصل مرأة من النور
بآخر زاويه تگعد تبچي و ابضلع مكسور

يوصلني فارس بس بلايه چفين
من گتله ياهو گلي شادود حسين

الطم بلا ذرعاني بكل تعزيه تلگاني
__

كلما انحني ابابه يرد يرفع إلي الهامه
كلش زايده اعليه لو يحسبني خدامه
شمقدمله حتى اقنع ريت احترگ بخيامه
لو كون اكسر بصدري فدوه الكسرت اعظامه

اشما دمعي يجري و باللطم متوزر
لا ما اوافي شوغه من الخنصر

لمصيبته أحزاني بكل تعزيه تلگاني





حسين الأمين

#ليالي_العليلة_ع ١
___

نجوم الليل ياما ناشدت عنك نجوم الليل
هجرني الحيل ماكو أي خبر منك هجرني الحيل

احسبلك دمعاتي بالنجمه احچاياتي
_

امرافگه الهظمه و تاركه البسمه
يوم ما هدتني ايدك
إيست روحي أحسب جروحي
كلهن ايصيحن نريدك

خلصت دمعات ليلي و ظلت آلام
النجم گد ما عرفني بعتبتي اينام
يامه ناشدته يردلي و ترجع اوهام

گلب محتار .. خطوتك تيهت دربي گلب محتار
ارسمت بالدار ملامح حيرتي وتعبي ارسمت بالدار

و أتصور حسراتي بالنجمه احچاياتي
_

اكتب و ارسل حزني ما يحمل
و الصخر فت من ونيني
النجمه مرسالي عاين أحوالي
اعليها ابعثلك حنيني

للسمه صد من يمر ابدربك الليل
عالنجم مكتوبه بنتك شافت الويل
روحي مطحونه بغيابك طحنة الهيل

على النجمات أكتبلي وأنه اكتبلك على النجمات
بلا لچمات بلگت اگدر اوصلك بلا لچمات

انساهن لچماتي بالنجمه احچاياتي
___

من رحت عني كلشي فارگني
و رافگت علتي و نحيبي
كل ابو البنته اتلمها عاطفته
ضايعه بعدك نصيبي

بويه من حمّل ظعنكم ثگلت الروح
ضيّعت كل السوالف چلمت اتروح
من كثر ما باچيتلك علمت نوح

ردت وياك ابهودج عمتي اتحطني ردت وياك
يمن بچفاك اظل ابحسبتي و ظني يمن بچفاك

ما تخلص حسباتي بالنجمة احچاياتي
____

اتخيلت ليلي وانته تحچيلي
و بوسط حظنك گعدتي
تسأل و أسأل وإني ادلل
و اسمعك تهتف يبنتي

إحساسي هالمره صدمني شايل اخبار
ما ترد كلمة يبنتي اسمعها بالدار
خايفه بويه و دليلي و عقلي محتار

اشوفك جاي يمته اتحقق أحلامي اشوفك جاي
فگدت الراي تخيلتك متت ضامي فگدت الراي

ارجعلي صرخاتي بالنجمه احچاياتي
__

بموطن الجرحه صايره سبحه
امطشره و بس بيدك التم
من بعد نوحي و معركة روحي
ينعه أسمع ابن حذلم

حسين عفته اعله الوطيه و جسمه مسحوگ
و عالرمح يفتر نظرته راسه بالسوگ
و زينب ابلايه الكفلها صعدت النوگ

متت يحسين اعيش شلون من دونك متت يحسين
عشت يومين فقط من غيبة اعيونك عشت يومين

ما طالت ساعاتي بالنجمه احچاياتي





حسين الأمين

#ليالي_العليلة_ع ٢ ( نزله )
_____

من شلت بضعونك بويه ميته ابدونك
_____

هودج الفرگه ابمشيته زاد علتي بيه جسمي ناحل و ابغيابك هالصرت محنيه
ما اگلك رد يبويه بلكي عطرك ليه
ادزه وي نسمات ليلي خل تشمه الريه

خل يگلي شلونك بويه ميته ابدونك
______

ليلي يخلص بنتظارك و انشد بمصباحي
هلبت ايرد خبر منك يشفي ليه اجراحي
ذبلت اجفوني ابغيابك و الدمع ظل صاحي
ذكرياتك رمح بيه و الهجر ذباحي

من درتها اعيونك بويه ميته ابدونك
_____

بير يجري فوگ خدي و اخذ مني ارسومي
من كثر ما باچيتلك امبللات اهدومي
يبتدي امناشد عليك و ينتهي كل يومي
بلكت اسمع خبر جيتك عايشه بهمومي

ما اجي بظنونك بويه ميته ابدونك
_____

اهناك لن مخبر اسمعه جاب اسمك ثغره
گلبي من صدري رگضله بشتياق و حسره
گتله وين حسين گلي و رد عليه ابعبره
راسه فوگ الرمح عفته و جسمه فوگ الغبره

امن العذب حرمونك بويه ميته ابدونك
________

من سمعته الطمت وجهي و اعرفت متردلي
و بعد عمرك يا حبيبي ابهالعمر چا شلي
يالبقيت و عاري جسمك عالرمال التغلي
و سهم المثلث ذبحني و دمعي لجلك يهلي

امن الگفه ايذبحونك بويه ميته ابدونك



حسين الأمين

#ليالي_العليلة_ع ٣
__

يا ريح للغالي وديلي مرسالي
طالت عليه غيبته وديلي مرسالي
___

يا هوه أخذ الرساله و اگصد الظعن الاهل
خاف ناسيني ابويه عني ما مره سئل
روح وصل هالرساله هلبت ايردلي امل
ايّست روحي تراها يوم من يمي ارتحل

ماكو خبر عنهم يا ريح ناشدهم
تارك عليله ابنيّته وديلي مرسالي
_

امساهره يا ريح وحدي والحزن بيه بنه
ديرة اهموم و نوايب بالگلب مستوطنه
بليل ما غمضت عيني ولا نمت بعده بهنه
جامع الون صار بيتي كل جرح بي مأذنه

هلبت يرد ظعني يا ريح جاوبني
تذبح دليلي فرگته وديلي مرسالي
__

اتعودت كل فجر روحي تنوي ليليه الدمع
وشبحت اعله الباب عيني بلكي مره يندفع
فعلاً اشبهها الزجيه امشي محنية ضلع
ايذوب وي السهر عمري مثل ميذوب الشمع

لمن رحل عني بيه استقر حزني
يا ريح گلي بحالته وديلي مرسالي
__

جرحه نايم وسط گلبي واشيطيّب خاطره
چن غصن بالغربه وحدي ذابل ابلايه اشجره
يا هوه ماريد منه بعد يوصل وانظره
هسه كل امنيتي عطره دزه إلي من منحره

خليني اشتمّه تبرد إلي لچمه
خل افرح بشم رگبته وديلي مرسالي
_

كثر ما تعبني هجره اگعد ارسمله صور
رافچت بابي و عتبته هلبت الجيته أثر
بكلشي دزيت الرساله الطير وانجوم و گمر
لو تشوفون الظعينه الوالدي وصلوا خبر

گلوله منتظره رجعتك بالسفره
ادريها تنزل دمعته وديلي مرسالي
___

ها يريح العطر هذا منه كل حيلي انهدم
اشم بي موت و ضحايه و نحر ابويه يجري دم
آخر الشهگات چانت نزلت بريتي سهم
لا تگلي حسين ميت وصدره بالخيل انهشم

شمّيت احساسه برمح انرفع راسه
من الگفه چن ذبحته وديلي مرسالي





حسين الأمين

#ام_الوفاء_والبنين_ع ١
___

ام اربعه انطت ولد وفايه
أولهم إلي سلمتله الرايه

من هذا الإحساس تتعلم الناس
انطت ولد وفايه
____

أربع كواكب سلمت و تكول خاف امقصره
لحسين لو عندي الف كلهم فداء النحره
بلكي يصيرولي حرز و ترضى عليه الزهره
مو مهم مات شچم ولد المهم اوفي العشره

تسولف ولكن مستحاها هوايه
بس لا يقصرون الولد من هايه

تتراجف أنفاس تتعلم الناس
انطت ولد وفايه
_

ماكو مثلها اعله الأرض بالوفه ما إلها أحد
مرت أبو تصبح خادمه الولده گلبها يمتد
تفديه شبان أربعه و منها الجفن ما يرتد
عدها بصيره و عالمه بالطف تعرفه استشهد

دوم تلهج بالطفوف و بالبين
تكللهم انتو قدمتكم لحسين

واحدها نبراس تتعلم الناس
انطت ولد وفايه
____

كالت يولدي من مشوا اتذبحوا دون حسين
ماريدن اتردون الي ياخذكم اوياه البين
كون اربعتكم عالنهر طيحتكم اتعلي الدين
عباس منك رايده عزب سهم وسط العين

انطي جفوف و بعد انطي عينك
كل ذني سهله ولا يطيح حسينك

صوب بعد راس تتعلم الناس
انطت ولد وفايه
__

تشهد عليها أم الحسن قدمتهم و محتاره
ظلت تناشد عن ولد واحد تريد اخباره
ما همها كل الاربعه والگلب شبت ناره
تلهج يربي حسين إلي سالم يعود الداره

هذا الوفه ماله شبه لا والله
حته ما صاحت عليهم ويلاه

شده و عظم باس تتعلم الناس
انطت ولد وفايه
_

اتلگاها هاليوم السبط واكف يرحب بيها
يا هله بأمي الغاليه بـ ام الوفه يسميها
مشتاگة جانتله اشكثر والخاطر ايأذيها
يمسح دمعها بيمنته و الزهره گصدت ليها

مشكوره يم الأربعة و تسلمين
و حيدر اجه يبارك تعبها لحسين

گاصدها عباس تتعلم الناس
انطت ولد وفايه





حسين الأمين