إگصد شريفه بدمعة العين
بحضرتها مد إيديك الإثنين
ناديها يا بنت الحسن لمن تطب وسط الصحن
يا باب المراد يا باب المراد
*******************************

ياللي تدور عالفرج بدموعك المجريه
من ونتك مل الصبر تبچي و تون عصريه
إتوجه لباب السمه يمها الشدد مگظيه
أوگف على باب الكرم ناديها يا علويه

ناديها و أوگف و اطرق الباب
دنگ عليها و شم الأعتاب
حضرتها صارتلك وطن لمن تطب وسط الصحن
يا باب المراد يا باب المراد
*******************************

إگصد لعد بنت الحسن و إعرض عليها همومك
يمها إتبدل حالتك بسرعه يتبدل يومك
شگد ما شلت هم و قهر محروم لذة نومك
تلبسك ملابس عافيه هدم الشفاء هدومك

دكتوره هاي و تشفي الأمراض
يم القبر ما تبقه أعراض
تشفي العلل سر و علن لمن تطب وسط الصحن
يا باب المراد يا باب المراد
*******************************

لمن تصل باب الصحن للحره مد چفوفك
بنت الكريم أم الكرم حتماً جفنها يشوفك
تفرح لون زاير گصد تكتب بديها حروفك
تنادي يبويه يالحسن گوم و تلگه ضيوفك

يالگبرك ويه الگبه مهدوم
زواري يمي تذكرك اليوم
يا زايري علي الشجن لمن تطب وسط الصحن
يا باب المراد يا باب المراد
*******************************

لتعلي صوتك من تطب حاچيها بأحله حچايه
گلها عليچ أم الخدر و جود الكفيل و مايه
آنه الإجيتچ مختنگ و بصدري حيل هوايه
گالولي يمچ تنگضي حنيت إلچ چم رايه

جيت و شفت هاي الكرامات
مشكوره مشكوره العبارات
حسباتي گالولي صفن لمن تطب وسط الصحن
يا باب المراد يا باب المراد
*******************************

أوصيك من تطلب طلب من تدگ باب الرحمه
إقرالها أبيات و نعي و رددلك شكم چلمه
نوح لرقيه و فاطمه و لزينب أم الحشمه
تاخذ مرادك لو صحت يحسين يا ابو اليمه

نوح بگبرها و دنگ الراس
لو يمها تذكر عمها عباس
نوح إعله حماي الضعن لمن تطب وسط الصحن
يا باب المراد يا باب المراد
*******************************
يامن تزور أم الكرم تگلك أنه الناديتك
ياللي إعتنيت بأي مرض من عندي إخذ عافيتك
من عندي تاخذ حاجتك تعنيت إلي و عنيتك
لو تگصد بأصعب طلب تفرح ترد لبيتك

شما زادت أعداد اليگصدون
تنشر كرمها إعله اليزورون
حاجاتك الصعبه إنگضن لمن تطب وسط الصحن
يا باب المراد يا باب المراد
*******************************
خادم العلويه شريفه
الحاج محمد عبد الرضا العيساوي

نصبت الليله مجلس نوح فگدت الليله علويه
ماتت من سياط الجور من أخذوها مسبيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

آنه المجتبى و حنيت للتبچي دمه من العين
للزورگ متنها بسوط لمن طاح عمها حسين
للصاحت يبويه بصوت لمن چتفو الإيدين
التتمنى يمرها بساع بدروب الطفوف البين

الشگفت عنها عمتها سوط بدمعه مجريه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

إجيت بلهفه هذا اليوم تجري الدمعه بعيوني
إجيت لمرقد بنيتي أتلگه اليواسوني
مواكب كثره يمها اليوم بالدكتوره عزوني
شچم موكب عزاء زنجيل لطمت وياهم متوني

و على قراياتهم ونيت ألطم خدي بإديه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

دخلت الحضره و الخدام نصبوا هالمسه قرايه
و شفت بالمجلس الزهراء حضرت تنعه ويايه
نضرتلي و تگلي بصوت هالخدام وفايه
إنظر يمه هاي الناس دگت بالعرش ثايه

إلهم مني يوم الدين قصور الجنه مبنيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

مجالس كثره منصوبه على الموتها درب البين
على اللي ماتت بعاشور مو مره تره مرتين
أول موته بالطف غادة يوم الطاح عمها حسين
و ثاني موته هذا اليوم بأسرها مگيده الچفين

ماتت من سياط الجور تنزف دمعه مدميه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

عفت گبري و إجيت بآه هليت الدمع أحمر
و صرخات الهضيمه اليوم بقت بأسماعي تتكرر
بحضرتها شفت عباس و تعناها أبو الأكبر
صاحوا يالحسن مأجور ردنه بمجلسك نحظر

إجينه بهالمسه نواسيك نقره الليله تعزيه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

وگفت آنه إعله باب النوح أستقبل أنه لهالناس
من أنظر لطمهم حيل أبچي و أشهگ الأنفاس
دين التعزيه بهاليوم فضلهم احمله إعله الراس
وقسم يوم القيامه هناك تسگيه جربة العباس

دين و لازم نوفيه حگهم واجب إعليه
شريفه شريفه شريفه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

نتمايل بألمنه لمن شمر ضربنه
آنه و رقيه و عمتي نذرف سوه دمعنه

آنه شريفه أم الحزن آنه الطبيبه
جتفوا إديه بالحبل ويه الحبيبه
كل واحد و مكتوب إله كلمن نصيبه
ضليت أتاني و أنتظر موتي شيجيبه

من راحوا الغوالي ضليت أرد سؤالي
يا موتي تلفيني شوكت بين المآسي ضعنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

لمن وگع حامي الخدر بالغاضريه
مستعجل إتعنه الشمر چتف إديه
من الرعب تبچي و تون ضلت رقيه
صحتلها و بلايه نظر ركضت إليه

نادتني يا شريفه عيون الشمر مخيفه
و تشابگينه بكربله صوب النهر ركضنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

نتلوع و نحمل ألم مدمعنه سايل
و إنادي وين أهل الشيم وين الكوافل
وين اللي جابونه بترف فوگ المحامل
بس روس ضلوا يا وسف فوگ العواسل

ما شاهدو سبينه و حبل اليسر بدينه
و لا سمعو لصوت أجنبي بدرب اليسر شتمنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

كلها جراحات و ألم رحلة سبينه
نتگاود و نهمل دمع لمن مشينه
حبل اليسر كلش خشن يذبح بدينه
صحنه و لا واحد سمع ينغر علينه

محد فزع و إجانه يمسح دمع بچانه
بس الأعادي بهالدرب نتماوج بهضمنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

كلما مشينه بهالدرب دمعتنه تنصب
تنظر علينه و تنتحب عمتنه زينب
بيا حاله يمشي المنفجع و جدامه تتعب
و الرمش من گد البچي ننظرله شيب

و الشيبت جفونه تلهب جمر عيونه
صاحي بقه طول الدرب لا ما غمض جفنه
،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،،

ما ردت يخلص هالشهر ما يبره همي
ردت آنه أفارگ دنيتي و أمشي ويه عمي
لا ما تهمني رويحتي لو يجري دمي
ردت آنه أموت بهالدرب يتعله إسمي

و تصير إلي مناره من تمشي للزياره
يوم اربعينه شيعته للمرقد إتعنه

انه بنت الحسن و أم الحزن آنه
إلي مرقد شفه بالحله عنوانه

أنه بنت الحسن و أنفاسه و جروحه
من بيت الكرامه أحمل ملوحه
بكراماتي رسمت لأهل الأرض لوحه
و بيباني تضل لناسي مفتوحه
تفرح من يجيها و تكشف أحزانه


أنه حيدر أبوي و فاطمه أمي
حرسو خدري وين النشمي و النشمي
بكثر ما بالحياة تحملت همي
صبحت عندي كرامه لليجي يمي
الگصدلي بهمه يخلص يرتفع شانه


عندي جروح لا تخلص و لا تنعد
حزن عيوني فاض و عالوجن ورد
ردت موتي و يه عمي و خالقي يشهد
المصايب بخلافه إعله الگلب تشتد
تمنيت أنذبح بالحومه بمچانه


أسيرة نوحي صرت بعالمي وحدي
جراحاتي الچبيره بدنيتي تحدي
سرت درب السبي وي عمتي إولدي
سرت و الدنيا سارت بالدرب ضدي
صرت يا ناسي للحسرات سلطانه


صرخت بآهتي بالعاشر و يومه
من شفت الحسين مسلبه هدومه
سگت ارض الطفوف بكربله دمومه
نظرته آنه و بگيت لحاله مهضومه
مو للماي روحي لوجهه عطشانه


بدرب سبي الاطايب ينتظر موتي
صحت يا ويلي بس محد سمع صوتي
وسف بس النسه يشيعن بتابوتي
بامان الله شريفه إعله القبر فوتي
على درب المشي لحسين نيشانه

يا شريفه جيت أشم ترابچ
يا شريفه أرد أنوح إبابچ
************************

آنه إجيتچ و أسچب إبابچ دمع
و أدري تتأذين من طاري الضلع
شمعه ما أعلگ و أذكرچ بالشمع
خاف چبدچ من أسولف ينصدع

يالحنينه گلبي حزنچ راسم
خاف أسولف تذكرين القاسم
************************

لمن اوصل حضرتچ يأم الكرم
يمچ أشتم ريح دخان الخيم
بحضرتچ مفتوحه بيبان الشيم
تخلص الحاجات يمچ و الألم

يا غريبه أهمل بدمعاتي
آنه إجيتچ قدمت حاجاتي
************************

يالحنينه الما ترد چف الضيوف
يمن عندچ شاره من يوم الطفوف
شفتي عمچ تلعب إعليه السيوف
و الگمر عباس باقي بلا جفوف

شفتي عمتچ تركض بهالهيمه
نارچ أعله من دخان الخيمه
************************

أرد أسألچ يا شريفه بمسأله
و أعتذر من الدموع الهامله
شچان حالچ من حضرتي بكربله
لمن صاحوا آه ينبلة حرمله

من إجاكم ويلي ناشف دمه
ويلي ويلي و السهام تفطمه
************************

يا شريفه إعليچ من الله السلام
بكثر ما شفتي مآسي بالخيام
صرتي باب الله الوسيعه للأنام
أم إمام و مرت إمام و بنت إمام

فاطمه إنتي و إنتي ريحة فاطم
و بحضرتچ گلب هاي الوادم
************************

بكثر ما ريح الحزن هبت عليچ
رحمة الله تكونت ما بين إديچ
سولفوا عن هاي ناس التعتنيچ
الدنيا تتمنه يبت حيدر تجيچ

ما تردين لليمد چفينه
و اليگصدچ مرقدچ گر عينه

هذي أم الباقر المرضيه
من نسل حامي الحمه العلويه
أوسع أبواب الرجاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

هذي ام الباقر و بنت الكريم
هي باب الرحمه
يم شريفه إنفتحت أبواب النعيم
و شكبر هالنعمه

هذي باب من السمه
هيه إسمها فاطمه
من نسل حامي الحمه

وعالكرم متعلمه

تحمل اوصاف الولي المهيوبه
الصغرى فاطم بالعرش مكتوبه
للعلل تنثر شفاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

عدها طب لكل مرض ماله مثيل
تشفه بيه كل عله
عد شريفه نضره تكفي للعليل
و المرض تندله

تحمل شگد من صبر
عدها من زينب عطر
صار إلها أعظم قبر

نوره ضوه الحله

الحله الإتسمت بإسم والدها
تفتخر چي تحتضن مرقدها
چي تضم كعبة وفاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

بت علي الحضرت حزن يوم الطفوف
هناك صبت دمعه
من تجي لمرقدها چم رايه تشوف
تنظر إچم قطعه

باب رحمه لهالبشر
چنها عباس الگمر
زاير اليمها حظر

يگظي همه بسرعه

يگظي و تنطي بيده مراده
بت إمام و هيه أم الساده
حاضره بطف كربلاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

يالتريد الحاجه و تدور مراد
چلمه بيني و بينك
عدها باب إنفتحت لكل العباد
يمها مد چفينك

إگف يمها و هل دمع
و إلطم بچفك ضلع
نوح لأجل المنصرع

حتماً تگر عينك

عزي إلها و بالسبط واسيها
دمعتك يم الشريفه إجريها
لو عله منك بكاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

شكثر بنت المجتبى قرت عيون
فرحت وادمها
إسأل بمرقدها كل ناس اليجون
و إسأل اليخدمها

يجاوبوك بكل شجن
تنطي بالسر و العلن
و النعم بنت الحسن

بدمعتك كلمها

كلها إجيتچ و إنتي أدرى بهمي
يا بعد ولدي و أبوي و أمي
ما تخليلك بلاء ينقبل يمها الدعاء
من نسل حامي الحمه العلويه
""""""""""""""""""""""""""""""""""""

شأخبر الحسن لو رد الضعن
بنتي ما إجت يعتلي الشجن
يشريفه يشريفه يشريفه


آنه عمتچ يا شريفه الهاشميه
شلون أدفنچ عمه ما تنطيني إديه
بغربه تبقين و أنه أمشي سبيه
و أنتي أمانه من الحسن راعي الحميه

حيره حيرتي مضيعه دنيتي
ونتي علت بفرگة إخوتي
************************

گومي وياي لدرب سبيي أريدچ
ليش عمه بسرعه سبلتيها إيدچ
أنظر ألوان المرض عمه إعله جيدچ
شلون من سوط العده ينشف وريدچ

عمه بالسبي من بني النبي
وحده لو مشت تنقص العبي
************************

عمه يوم التوگع حبال البدينه
من يرد الضعن لديار المدينه
لو نشدني الحسن يا خيتي الحزينه
بنتي وين شأرد أجاوب يا حنينه

بيش أخبره شلون أصبره
بنتك الغفت تغطت بثره
**********************

شرد أگله لو سأل وين الحبيبه
و هو يدري بدنيتچ عشتي غريبه
لاچن اللي يصبره و يگطع نحيبه
يدري باچر تصبح بنيته طبيبه

تشفي للعلل تزرع الأمل
بنته فرّحت زاير الوصل
**********************

گلبي يا بنت الحسن مستعره ناره
و دمعة الخدر على الخد إتجاره
آنه أخبرچ و إخذي من عندي البشاره
فوگ گبرچ تنبني باچر مناره

ينبني صحن للگصد وطن
عالگبر صفت يشهد الزمن
**********************

الله باچر يوضع بگبرچ سلامه
تصبح لكل زاير بگبرچ علامه
إلچ يم أهل الأرض تصبح كرامه
و ينحب إعليچ الذي يهوه الخدامه

تنحب الخدم رفعت العلم
بالدمع بچت لشمعة الكرم

آه إعليچ آه إعليچ بنت الحسن آه إعليچ

يا بت علي و بت فاطمه
دنياچ صعبه و مظلمه
يالعينچ بعين السمه
دمعاتچ بعينچ مزن

يالعشتي كل عمرچ ألم
حيلچ على حسين إنهدم
لمن علت نار الخيم
شفتيهن و شفتي المحن

من شفتي عبد الله الطفل
مذبوح يا ويلي بنبل
دمعچ عليه ضل ينهمل
ويلي إعتله بيچ الشجن

شفتي لمصايب كربله
لگليبچ آنه أرد أسأله
من شفتي بالطف حرمله
عيونچ من الخوف نشفن

يالحره من طاح الگمر
و الأكبر موذر وذر
و القاسم براسه إنطبر
صرخاتچ البطف علن

بحر الشمس ذاك الظهر
من ذبحوا آيات الفجر
و الخيل سحگت عالصدر
هم رحتي يم ذاك البدن

بداعة علي و راعي الشيم
و القافله و ذيچ الحرم
تگضين حاجات اللطم
و اللي وصل هذا الصحن

مشتاگه لحسين شكثر مشتاگه
يا عمي گلي بيا وكت نتلاگه

الفرگه مو هينه يبو اليمه عليه
و الله لو بيدي أضل بالغاضريه
بكترك تمنيت تاخذني المنيه
مشيت من يمك أنه لخاطر رقيه

عنك مشيت و ما رحت من بالي
يا عمي بخلافك شنو اليحلالي
***************************

شفت الخيام إتوجر خيمه خيمه
كل يتيمه تلوذ يا عمي بيتيمه
عمي من شفت المهر يصرخ هضيمه
إنهدم حيلي و إعتله بگليبي ضيمه

شفت المهر ضهره إنصبغ بدمومك
صحت بعجل يومي فداء ليومك
****************************

عالجمر أركض و تتألم جدامي
و آنه أصيح بحسرتي حرگوا خيامي
مثل گلبك گلبي يابو الغيره ضامي
أركض و نار الخيم خلفي و أمامي

شح الستر نار و جمر يچوينه
ناس شكثر تركض إجت تاذينه
**************************

أسمع يصيحون طلعوهن سبايه
آنه أركض و الشمر يركض ورايه
من مآسي الطف فقط هاي البدايه
الله يعلم عمي چا شنهي النهايه

درب السبي بنات النبي بچاهن
بس اليتامه و العليل وياهن
***************************

عمي من أنظر على عمتي العقيله
تحسب النسوان من فوگ الهزيله
هذي سكنه و هذي رمله و هذي ليله
للضعن زينب غدت هيه الكفيله

نادت ينسوان النبي العدناني
كفالي راح و آنه كافل ثاني
**********************

عمي من أتذكر آنه لذيچ الأيام
بالصحاري و عالرمال بلا غطه إنام
من تسولفلي رقيه سوالف أيتام
هنا تموتين و أموتن آنه بالشام

لرقيه أنظر چن شمس مخنوگه
بنار الخيم چفيها أظن محروگه

أعشگ آنه چفوفك ما أعوف طفوفك
ما أعوف طفوفك

آنه الغريبه أم الحزن بنت الحسن آنه
يا عمي بغيابك أبد ما صحه دنيانه
يالما نسينه مصيبتك أبداً لتنسانه
مر بيه لو لمحة ضوه يا نجمة سمانه

يا عبير أنفاسي يا أعز كل ناسي
يا أعز كل ناسي


من حرگوا الخيمه صحت ها يا أعز ناسي
لا إنته يمي و لا علي و لا ضلي عباسي
من شفتك آنه إعله الرمل و إختنگت أنفاسي
ضليت أدگ إعله الوجه و الطم على راسي

و صبغت وجناتي من دمه دمعاتي
من دمه دمعاتي


كلمن سأل عن حالتي عن گلبي و أخباره
بي مستعر جمر الهجر لا ما طفت ناره
من والدي ذاك الحسن أتوارث آثاره
ضيعت چلمات الفرح ما ضاعت أنواره
من حبيبي الغالي ينرسم كل حالي
ينرسم كل حالي


ودعتك و ضاع الصبح لمن گرب يومي
ناداني دهري إعله الهضم و إعله الحزن گومي
يا عمي عطرك ما رحل تارسها لهدومي
ينسيني جرحك هالعطر و يخفف همومي

إنسه كل آلامي لو صحت يا ضامي
لو صحت يا ضامي


دكتوره صرت من الزغر چي حاضره طفوفك
چفي دوه لكل العلل چي لامس چفوفك
سيوف و رماح برگبتك حاسبهن ضيوفك
لولا السياط إعله المتن لا و الله ما أعوفك

و الله ميبعدوني لولا سوط متوني
لولا سوط متوني

كلمن إجاني لحضرتي و نزلها دمعاته
و ناح و هتف يم مرقدي يدو علاها آهاته
يمي أسجل من خلص بالخدمه چلماته
أكشفله كل همه بعجل و أگظيله حاجاته

و يتسجل ناصر بالمآتم حاضر
بالمآتم حاضر

آنه و عمچ حسين إجينه لحضرتچ
لمن حان الوداع رفت رايتچ
من سوط الشمر نمسحلچ متون
وصلناچ و جرت دمعات العيون
رفت رايتچ
******************************

أنه العباس ابو الغيره إجيت الليله يم گبرچ
إجيت و دمعتي بعيني اجيت أتوله أنه أمرچ
إجه وياي أخوي حسين ينحب گاعد بكترچ
يفجر المجتبى جينه نظم حدر الثرى فجرچ

گصدنه و عفه الطفوف إجيناچ بدمعنه
نبچي و نقره و نصيح بس محد سمعنه
و المخنوگه روحه يبين شلون
وصلناچ و جرت دمعات العيون
رفت رايتچ
******************************

إجينه لحضرتچ نقره يا بنت باب الكرم تدرين
أريد ألطم على مصابچ عازه عازة الچفين
أعاين عمچ من يصيح كاسر گلبي حيل حسين
شريفه آنه إلچ حنيت يبعد أهلي ويه ماي العين

جيت بلهفتي إعليچ من گربت وفاتچ
هذا بكتري عباس يالطيبه صفاتچ
شفنه هوايه يمچ شيعة يقرون
وصلناچ و جرت دمعات العيون
رفت رايتچ
******************************

دخلنه لحضرتچ بالآه و من الحسره نتألم
و شفنه يم ضريحچ ضال أثر من نار المخيم
صحنه بصوت وا ويلاه و المدمع همل من دم
عليچ بكل وكت عمي صلى الخالق و سلم

صلى الخالق إعليچ گد ما صحتي ويلاه
أسمع منچ الصوت يطلع وا حسيناه
صوت الونه منچ هزت الكون
وصلناچ و جرت دمعات العيون
رفت رايتچ
******************************

مواكب شفنه منصوبه قرب گبرچ يبت حيدر
تواسي المجتبى بفگدچ تواسي حسين ابو الأكبر
كلها يا شريفه تصيح و الله و هزني هالمنظر
ذكرتچ صحتي يا عباس جدمچ بالجثث يعثر

شگد صحتي من الآلام من رادوا يسلبوچ
خلقلچ الله خدام بمصابچ يواسوچ
خدامچ عليچ الليله يبچون
وصلناچ و جرت دمعات العيون
رفت رايتچ
******************************

بكثر ما شلتي من هموم بكثر ما صحتي أريدن ماي
خله الخالق بگبرچ كرامات و أدله هواي
يشفه الگاصدچ معلول لشباچچ گصد عناي
هذي وصفه التشافيك بس ون عالحسين وياي

اجيناچ إحنه هاليوم نصرخ يا غريبه
من باچر تصيرين للعالم طبيبه
اليجيچ بلون يطلع منچ بلون
وصلناچ و جرت دمعات العيون
رفت رايتچ
******************************

يعمي مو بعيد إعليچ ما نبعد أبد عنچ
نفل حبل العده البالإيد نمسح سوط البمتنچ
اجينه و عفنه كل جروح إجينه نشاركچ حزنچ
إجينه بلهفة المشتاگ نريد نشارك بدفنچ

اجينه و نلطم الراس و نواسي السبايه
لمن نقصت اليوم من عدهن عبايه
و نواسي العليل الگلبه مطعون
وصلناچ و جرت دمعات العيون
رفت رايتچ
******************************

مو دمع الفرح هذا دمع ظام
شكثر يا عمه بعيونك دمع ظام
أشوفن يجري من إيدك دمع ظام
أمسحه و يرجع يسيل إعله إديه

ابوي الإيده رحمه بيده خلو
على الطاغي معانه بيده خلو
عليل و صعب حاله بيده خلو
حديد و جامعه و جمرة أذيه

على گلوب أنبياء الله مر ألماي
وسف بعدك على شفافي مر ألماي
شربت الماي بس اشعر مر ألماي
مرورة ظهر طف الغاضريه

آه وا ويلاه زين العابدين


تنختم هالليله كل ذيچ الجروح
من علي السجاد تطلع منه روح
من وكت عاشر محرم ضل ينوح
من نظر عالغبره مذبوح الحسين

جمرته بگليبه ما ساعه نطفت
ودمعته بعيونه ما يوم نشفت
لمن جمع بيده أوصال البخت
و دفنه بتراب بچفوفه الثنين

جمرة المذبوح أبوه ما تنطفي
و الجروح العنده ما ظن تنشفي
الذبحو إخوانه إبچي ما يكتفي
لازم يموت إعله ذكر الطيبين

شتذكر شتنسى إتحمل يا ألم
تذكر العباس عنوان الشيم
تذكر النار إعتلت فوگ الخيم
و عمتك زينب إجت يمك تعين

بگلب غيرك هالحزن ما ينحمل
بالخصوص من نظرت جابو هزل
كل عيالك چتفوهن بالحبل
لحال زينب نزلت دمع الحنين

آه وا ويلاه من ذاك الدرب
إنته معلول و دمع عينك يصب
من تشوف رقيه إختك تنضرب
تندعي يصبرك إله العالمين

تندعي من السحر حد السحر
بونتك مولاي بچيت الصخر
تنقبض روحك تريد بهالشهر
بشهر ابوك تريد موتك من يحين


ما عليك من الحزن هذا حرج
ويه أكلك مدمع العين إمتزج
ميت و تدعي يعجل بالفرج
فرج مهدي الزهره شبل الطاهرين

يا حجة الله المنتظر يبن الميامين
يعضملك الله الأجر بعليـل الحسين


يا حجــة الله إبن الحسن يبـن الزچيــه
يا نسل الأطياب وشبل حـامي الحميه
حضرت تواسيك الخلگ هاي المسيه
وتهل على جدك دمه مو دمعة العيـن


حضرت تواسيك وتهل دمع الرزايــه
فاضت بالأحـزان وبچـت حد المنايــه
تنــدب عليــل بكربلــه شـاف البلايــه
تصرخ يبن طه النبي ويبن الحمه الدين


تندب عليـل بكربلــه وتذكــر همومــه
ألمهــا حالــه والچـبـد ألمهـــا يــومــه
تبچي لقيــود الجامعـه وجرية دمومـه
وإعله الدماء السايله من چفوفـه الإثنيـن








تبچي لقيـود الجامعــه الخلــوها بيــده
وإعله الجـراح برگبته ونزفت وريـده
وتنـادي يبن المصطفى ويبن الشهيـده
يبن السراج الما طفه ضل يضوي صوبين


وتنـادي يبن المصطفى وتلعـن عـدوه
سـم چبـــدك الليلـه نضل بيــه نتچــوه
يالعلمتنه إعلـه الصبـر إلنـه إنته قـدوه
يمزلزل بصبرك عـرش كـل السلاطيـن


يا مهـدي يا شبل الحسن إقبل عزانــه
سجلهــا عنــدك ساچبـه دمعـة بچانــه
بيدك رضى الباري العلي وبيدك جنانه
بيدك مصير اللي إجـوا لأجلك معزيـن


محمد عبد الرضا العيساوي

ناحت العليا وبچت سبعة سمــاوات
من ابو الباقر رحل فـخـــر الديانات
والفلك بأعباره دمعته تتجاره

انفجعت العليه وبچت كل الوطيه
الليله بمصاب العليل ابـن الزچيه
نزلـــت نجوم السمه بالغاضريـه
تمسح عيــــون الحسين بهالمسيه

نزلــت وهلت دمع ويـه المياميـن
حضرت بهالتعزيـه ويه المواليـن
بالولي محتاره دمعتـه تتجاره


سورة السجده بحـزن صارت يتيمه
والضحى والأعلى نادت يا هضيمه
ونـــــة آيات الفجـــر ونـــه عظيمه
تلعــــن بونهــــا بني هنـــد اللئيمــه

ضلت بحسـرتها ونـتـها اتـعـالــه
تلعن الأسس ظــلم بيـت الرسالـه
بينت أسراره دمعته تتجاره



كل بحر بالدنيا أنـــقــــل منه صوره
بأرض أبو الباقر إجه ثبـت حضوره
فاضت من دموعها تبچي اعله نوره
وابقيـــع أم الحسن گصـــدت تزوره

گصدت ونصبـــت عــزه يــم الزچــيـه
واســت امـــــه وشاركـــتها بهالرزيـه
واعتنت يم داره دمعته تتجاره


ياعليـــل تنادي آيــــات المدينه
الليله كلها اتجمعت ونت ونينـه
جبنــــه شبلچ يا بتول إستقبلينـه
بنار سم چبده يزهره مگطعينه

چبدته انمـردت بـأثــــر ســـم الأذيــــه
سچبـــت عـيـونــه وهمــل دمع المنيه
من إجوا خطاره دمعته تتجاره



چبده متوذر يويلي ويجري دمــه
شابــه حسين بمحنته وچـنـه عمه
ياهو اليطالبله ثـــاره ويجلي همه
ويگطع الراس الذي بچفوفه سمه

يگطع الراس الوليد ويمحي أمــيــه
ياخـــذ بثاراتــه من ولـــــد الدعيــه
يــرفع لأنواره دمعته تتجاره


صرخة العاشگ علت وصلت حضرته
عظم الله أجـــرك على الصبر الصبرته
يــبقــه للمحشـتر يهــل لأجله عبــرتـــه
بلوعــــة المسمــــوم تـتــلــوع چـبــدتـه

ناده بالحسره وهتف لإبــن الأطـايــب
شمـــا بقه بينـــه النفس ثارك نطـالـب
واليطالب ثـاره دمعته تتجاره

محمد عبد الرضا العيساوي

راح ابو الباقر صحت و شكثر يمه نحت
يا محرم يا محرم


آنه زينب بت علي أرد أحچي وياك
شلك إعلينه ذبحتنه صوتي ناداك
شاهر سيوفك علينه و رافع لواك
باچر بيوم القيامه شتذكر هناك

لو سأل سائل غداً جرحك إلبينه إنعلن
يا محرم يا محرم


ما كفه العاشر جراحه إعلينه رديت
بيتي هدمته إعله راسي ما بقه بيت
عالعليل الليله گاصد چنك نويت
بهالجرح يا بو المآسي لگلبي فتيت

گلبي فتيته بسهم من وراه حيلي إنهدم
يا محرم يا محرم


ما كفه العاشر جراحه و هجمت الخيل
و ليلة الوحشه و هضمها و رهبة الليل
إعلينه راجع هالمسيه تهدم الحيل
تريد ابو الباقر يدهري ويلي يا ويل

تصرخ دموع الجفن ويلي يا شهر الحزن
يا محرم يا محرم



راجع إعلينه بمصايب شاهر سيوف
ما كفاك اللي عملته بيوم الطفوف
گطعت نحر و إذن گطعت الجفوف
عالعليل الليله گاصد تنشر الخوف

شرد أگلك يا شهر كلك جروح و قهر
يا محرم يا محرم





عالعليل الليله راجع تنثر دموم
گلبه من عندك مليته حسره و هموم
بفعلتك لتظن محرم ظلمك يدوم
إحنه أهل بيت إرتقينه فوگ النجوم

إحنه أهل بيت النبي لا تصدگ ننسبي
يا محرم يا محرم


ظلمك و ذيچ الگيود و حز النحور
ما تغيب للهواشم لمظه من نور
باچر آلآف المواكب تگصد تزور
تنحب و تبچي لأجلنه تدگ الصدور

تنظر عيون المله من يجونه لكربله
يا محرم يا محرم



محمد عبد الرضا العيساوي

يا إمام الساجديــــن خـــــذت روحك مرتين
مره بالعاشر ذبحتك مره بالغربه ويه إختك
خذت روحك مرتين


آنه عزرائيل إجـيـــتـك هــالمسيه
رايــد لروحــك يبن حامي الحميه
أذكـــر آنـــه ذبحتـك بچفيــن إديـه
ويه أبوك حسين بأرض الغاضريه

أذكر بوادي الطفــــوف ذبحتـك بذني الچفوف
بمصرع الوالي جرحتك مره بالغربه ويه إختك
خذت روحك مرتين


من إجيتك أذكـر المدمع تسيله
وطرف خيمتكم بچفينك تشيلـه
وگفت أذكر يمك الحره العقيله
چانت لأجـلك تون ونـه ثجيلـه

أذكـر لعمتك تگـــول فـــري يا بـنت البتـول
تنتحب بالخيمه عمتك مره بالغربه ويه إختك
خذت روحك مرتين



من ذبحتك أذكر إحترگت خيامك
وللحسيــن توجهـت إنـته بسلامك
چـان يم النهر مصبـوب إهتمامك
وللشريعه خـاطـبـت إنته بكلامك

صحته يا ليث العرين مـن عرگ بيك الجبين
وقت للـكـلـمه منحتك مره بالغربه ويه إختك
خذت روحك مرتين



ثانـي مــره ذبحتــك بمحنــه شديـده
لمــن عانـيـتوا أسـى السفره البعيده
بيوم إختك صاحت حسين آنه أريده
عمــه أريده حته لو حــزوا وريــده

نادت بمدمعها صوت وين أبويه راح أموت
وإنته بآهاتك سمعتك مره بالغربه ويه إختك
خذت روحك مرتين



لراس أبوها الطفله من گعدت تحاچي
شفــــت بعيونـك فـــرات من البواچي
ومن بـدت تحچي إعله سالفة التراچي
اي ذبحتــــك وإنـتــه للرحمان شاچـي

ذبحتك بــذيــچ الجــــروح ردتك ويه إختك تروح
روح حامي الطفله صحتك مره بالغربه ويه إختك
خذت روحك مرتين


رايـح آخذ روحك وبگليبي جمـره
بنفس شهر حسين هذا وهذا شهره
إنتــه مسموم وإلك بگليبي جمــره
ما توذر جسمك وضل وذره وذره

أدري دمعاتــك سيول مــا دنت ليــك الخيول
لا حجر طـاح بجبهتك مره بالغربه ويه إختك
خذت روحك مرتين


محمد عبد الرضا العيساوي

گربت منيتي و جزعت الروح طف إعله بالي وين ما روح
صورة طفوف بعيني من للغاضريه
أحزاني حتماً تنختم هاي المسيه

جمعت أحزاني گلت أودعها بدمع عيني اليسيل
و رفعت عنواني باچر إعله الموت متوجه العليل
تذكرت صيواني المــــا نسيته بليله يمرد بالدليل
محد من اخواني لا إجوني و لا حظر عمي الكفيل

محد حظرني بساعة الموت منهوا اليفصل لجسمي تابوت
منهوا اليغمضلي الجفن و يسبل إديه
أحزاني حتماً تنختم هاي المسيه

دمعتي بعيوني عايش بطول العمر گلبي حزين
تجري دم جفوني بكل مسيه بروحي يتعله الحنين
ناس اليلوموني عالنحيب و عالهضيمه و عالأنين
خلهم يسمعوني آنه ميت من مشه عني الحسين

صوت الونين يهد الصدور عمري طفوف و حزني عاشور
عايش حياتي بالهضم بأعظم رزيه
أحزاني حتماً تنختم هاي المسيه

عايش ويه جروحي بعيني ما انظر فقط بس الظلام
أذكر لمذبوحي تنقفص روحي إعله طبرات الإمام
كل حياتي و نوحي للذبيح و للسبي و حرگ الخيام
وي مدامع موحي مفارگ الدنيا و على الدنيا السلام

دنيا فقط تنبع جراحات ما شفت منها بس الآهات
هالدنيا راوتني العجب حد المنيه
أحزاني حتماً تنختم هاي المسيه

رددت چلماتي آنه بالدنيا فگدت معنى الأمان
ترتفع آهاتي گمت يوميه أشم ريحة دخان
لو علت صيحاتي أنظر لراس إرتفع فوگ السنان
أركض إعله خواتي بالي بالطف و رجع نفس الزمان

صرخة طفل محروگ الجدام لوعة و ركض من نار الخيام
و آنه أركضت من سمعت صرخة رقيه
أحزاني حتماً تنختم هاي المسيه





من دنت أيامي فرحت العين و بعد ماكو انتظار
تحققت أحلامي گرب الموت و طفت بگليبي نار
أنظر إعله أيتامي يكسر الخاطر تره دمع الزغار
راح أشوف الظامي أسكن وياه بحظن دار القرار

رايح أموت و أنظر حسين و بشوفته تتكحل العين
و أنظر كفيل أم الخدر و أمي الزجيه
أحزاني حتماً تنختم هاي المسيه


بمحنتي يا ويلي صحت من آهاتي بالصوت الرفيع
يا مدامع سيلي على المذبوح و على الطفل الرضيع
لإبني گتله إحچيلي فوض أمرك للعلي الباري السميع
من بعد تغسيلي بويه ادفن للجسد بأرض البقيع

جسمي إنحمل بأطراف الجفوف لا ما توذر بأرض الطفوف
لا ما بقه فوگ الترب جثه دميه
أحزاني حتماً تنختم هاي المسيه


محمد عبد الرضا العيساوي

آني و طفلي هاليوم نلطم عالضلع
گصدنه لخربة الشام هلينه الدمع
تركنه أرض الطفوف و رحنه للشام
نصرخ يا رقيه و نلطم الهام
هلينه الدمع
*******

أنه المتوذره أعضائه أنه الما ضل عضو بيه
أنه التنزل دمه دموعه أنه مضيعلي علويه
أنه المطشر إعله رمال أنه الفاگد ضوه بنيه
احن إعليها هالليله مثل ما حنت إعليه

لمن شافت الماي ما همها العطش
صاحت والدي ليش عالغبره إنفرش
من گصدتلي تشكي بحرگ الخيام
نصرخ يا رقيه و نلطم الهام
هلينه الدمع
***********

گصدت الشام أنه بنوحي دمع إعله الوجن هالي
خذت ويايه عبد الله غالي معتني لغالي
گصدنه رقيه بأرض الشام ونه بهالدرب عالي
أنوح و طفلي يا هالناس هو اليشرح أحوالي

يشرح حال الينوح و يهل عبرته
مثلي هو مخنوگ ينحب لإخوته
نحت ويه الرضيع و ضگت آلآلام
نصرخ يا رقيه و نلطم الهام
هلينه الدمع
***********

گصدناها بدموع العين إبحزن درب الحزن خضر
طريق الشام كله إنوح يواسي منحر بمنحر
لايگ ثوبج إعله الموت يريد بموته يتستر
رقيه بالخرابه هناك نسمع ونة الخدر

نسمع ونه و هموم و صياح و زعل
رقيه بنت الحسين مر بيها الأجل
جفنها بالخرابه من التعب نام
نصرخ يا رقيه و نلطم الهام
هلينه الدمع
***********

وصلنه لمرقدچ و الناس تنعه و تقره لطميه
سبيه و يا سبيه تصيح و تنادي يمسبيه
مرينه بمواكب نوح عيون البيها مدميه
صرخ عبد الله يا بويه أجر هالوادم إعليه

كلمن بچه للناس يكتب لو قره
باچر بيدي أنطيه صك المغفره
و شما عن رقيه كتبت أقلام
نصرخ يا رقيه و نلطم الهام
هلينه الدمع
***********

گعد عبد الله يم إخته و عينه إعليها خلاها
تناديه يا حبيب الروح حبيبة روحي ناداها
كلما تشتكي من سوط أحس عبد الله هداها
مسح إيده إعله إذنها هناك الألم من عدها نساها

طلع من الگماط ترچيه و مسح
إعليها و رجع هناك عالطفله الفرح
من شفنه اثر من ذيچ الأيام
نصرخ يا رقيه و نلطم الهام
هلينه الدمع
***********

ساعات الدفن حانت ساعات لأشد مصاب
تكتل دمعة المهضوم تكتل فرگة الأحباب
عزيزة گلبي أخليها غريبة بديرة الأجناب
و أدفن روحي وي روحي من أدفنها جوه تراب

آه و تكفي يا آه لو حان الدفن
و بتعبير الأحزان أحمل يا حزن
و اليدفن حبيبه بإيده ينظام
نصرخ يا رقيه و نلطم الهام
هلينه الدمع
***********

يوم الموادع صعب شلون أعوفچ بالغربيه
يا رقيه يا رقيه

أحچي وياچ بدمع عيني الجريه
لا تگطعين النفس هاي المسيه
ريت قبلچ عمه تاخذني المنيه
و لا يگولون بغرب ماتت رقيه
لا يگلولي أبد رقيه ما ترجع بعد
يا رقيه يا رقيه


زادت آلامي و دنت أعظم مصيبه
و الغريبه تنتحب يم الغريبه
نحل جسمچ و الگلب أيس طبيبه
شلون أرد لكربله بدون الحبيبه
شلون أعوفچ وحدچ بيش أجاوب والدچ
يا رقيه يا رقيه


باچر من أرجع لأبوچ بأربعينه
و عالضعن آنه أحسه يدير عينه
لو نشد زينب يخويه يا حزينه
وحدچ رديتي چا وين الحنينه
لو سأل شبل النبي موكبچ ناقص عبي
يا رقيه يا رقيه


عمه رحمي بحالتي و رحمي دمعتي
لو رحلتي تزود يا عمه غربتي
عالسياط شلون يرقيه صبرتي
ليش عالموت بغرب عمه إنجبرتي
صعبه حيل المسأله ماتت حچاية هله
يا رقيه يا رقيه


شرد أگله لو سأل من ضل معاها
و من حضرها و من نعاها و چفناها
راح أگله ماتت بحسرة أباها
جيت ازورك و ارد اموت آنه وراها
ينحفر باچر لحد هنه چم يوم و أرد
يا رقيه يا رقيه


ضاعت أيام الوفه و ذيچ الأماسي
و الله يا عمه الحزن شيبلي راسي
صعبه ايامي و غدت كلها مآسي
صعبه كلش فرگتچ يا اغله ناسي
بيچ أشم ريحة هجر يا بعد كل العمر
يا رقيه يا رقيه