ناحت العليا وبچت سبعة سمــاوات
من ابو الباقر رحل فـخـــر الديانات
والفلك بأعباره دمعته تتجاره

انفجعت العليه وبچت كل الوطيه
الليله بمصاب العليل ابـن الزچيه
نزلـــت نجوم السمه بالغاضريـه
تمسح عيــــون الحسين بهالمسيه

نزلــت وهلت دمع ويـه المياميـن
حضرت بهالتعزيـه ويه المواليـن
بالولي محتاره دمعتـه تتجاره


سورة السجده بحـزن صارت يتيمه
والضحى والأعلى نادت يا هضيمه
ونـــــة آيات الفجـــر ونـــه عظيمه
تلعــــن بونهــــا بني هنـــد اللئيمــه

ضلت بحسـرتها ونـتـها اتـعـالــه
تلعن الأسس ظــلم بيـت الرسالـه
بينت أسراره دمعته تتجاره



كل بحر بالدنيا أنـــقــــل منه صوره
بأرض أبو الباقر إجه ثبـت حضوره
فاضت من دموعها تبچي اعله نوره
وابقيـــع أم الحسن گصـــدت تزوره

گصدت ونصبـــت عــزه يــم الزچــيـه
واســت امـــــه وشاركـــتها بهالرزيـه
واعتنت يم داره دمعته تتجاره


ياعليـــل تنادي آيــــات المدينه
الليله كلها اتجمعت ونت ونينـه
جبنــــه شبلچ يا بتول إستقبلينـه
بنار سم چبده يزهره مگطعينه

چبدته انمـردت بـأثــــر ســـم الأذيــــه
سچبـــت عـيـونــه وهمــل دمع المنيه
من إجوا خطاره دمعته تتجاره



چبده متوذر يويلي ويجري دمــه
شابــه حسين بمحنته وچـنـه عمه
ياهو اليطالبله ثـــاره ويجلي همه
ويگطع الراس الذي بچفوفه سمه

يگطع الراس الوليد ويمحي أمــيــه
ياخـــذ بثاراتــه من ولـــــد الدعيــه
يــرفع لأنواره دمعته تتجاره


صرخة العاشگ علت وصلت حضرته
عظم الله أجـــرك على الصبر الصبرته
يــبقــه للمحشـتر يهــل لأجله عبــرتـــه
بلوعــــة المسمــــوم تـتــلــوع چـبــدتـه

ناده بالحسره وهتف لإبــن الأطـايــب
شمـــا بقه بينـــه النفس ثارك نطـالـب
واليطالب ثـاره دمعته تتجاره

محمد عبد الرضا العيساوي

راح ابو الباقر صحت و شكثر يمه نحت
يا محرم يا محرم


آنه زينب بت علي أرد أحچي وياك
شلك إعلينه ذبحتنه صوتي ناداك
شاهر سيوفك علينه و رافع لواك
باچر بيوم القيامه شتذكر هناك

لو سأل سائل غداً جرحك إلبينه إنعلن
يا محرم يا محرم


ما كفه العاشر جراحه إعلينه رديت
بيتي هدمته إعله راسي ما بقه بيت
عالعليل الليله گاصد چنك نويت
بهالجرح يا بو المآسي لگلبي فتيت

گلبي فتيته بسهم من وراه حيلي إنهدم
يا محرم يا محرم


ما كفه العاشر جراحه و هجمت الخيل
و ليلة الوحشه و هضمها و رهبة الليل
إعلينه راجع هالمسيه تهدم الحيل
تريد ابو الباقر يدهري ويلي يا ويل

تصرخ دموع الجفن ويلي يا شهر الحزن
يا محرم يا محرم



راجع إعلينه بمصايب شاهر سيوف
ما كفاك اللي عملته بيوم الطفوف
گطعت نحر و إذن گطعت الجفوف
عالعليل الليله گاصد تنشر الخوف

شرد أگلك يا شهر كلك جروح و قهر
يا محرم يا محرم





عالعليل الليله راجع تنثر دموم
گلبه من عندك مليته حسره و هموم
بفعلتك لتظن محرم ظلمك يدوم
إحنه أهل بيت إرتقينه فوگ النجوم

إحنه أهل بيت النبي لا تصدگ ننسبي
يا محرم يا محرم


ظلمك و ذيچ الگيود و حز النحور
ما تغيب للهواشم لمظه من نور
باچر آلآف المواكب تگصد تزور
تنحب و تبچي لأجلنه تدگ الصدور

تنظر عيون المله من يجونه لكربله
يا محرم يا محرم



محمد عبد الرضا العيساوي

يا إمام الساجديــــن خـــــذت روحك مرتين
مره بالعاشر ذبحتك مره بالغربه ويه إختك
خذت روحك مرتين


آنه عزرائيل إجـيـــتـك هــالمسيه
رايــد لروحــك يبن حامي الحميه
أذكـــر آنـــه ذبحتـك بچفيــن إديـه
ويه أبوك حسين بأرض الغاضريه

أذكر بوادي الطفــــوف ذبحتـك بذني الچفوف
بمصرع الوالي جرحتك مره بالغربه ويه إختك
خذت روحك مرتين


من إجيتك أذكـر المدمع تسيله
وطرف خيمتكم بچفينك تشيلـه
وگفت أذكر يمك الحره العقيله
چانت لأجـلك تون ونـه ثجيلـه

أذكـر لعمتك تگـــول فـــري يا بـنت البتـول
تنتحب بالخيمه عمتك مره بالغربه ويه إختك
خذت روحك مرتين



من ذبحتك أذكر إحترگت خيامك
وللحسيــن توجهـت إنـته بسلامك
چـان يم النهر مصبـوب إهتمامك
وللشريعه خـاطـبـت إنته بكلامك

صحته يا ليث العرين مـن عرگ بيك الجبين
وقت للـكـلـمه منحتك مره بالغربه ويه إختك
خذت روحك مرتين



ثانـي مــره ذبحتــك بمحنــه شديـده
لمــن عانـيـتوا أسـى السفره البعيده
بيوم إختك صاحت حسين آنه أريده
عمــه أريده حته لو حــزوا وريــده

نادت بمدمعها صوت وين أبويه راح أموت
وإنته بآهاتك سمعتك مره بالغربه ويه إختك
خذت روحك مرتين



لراس أبوها الطفله من گعدت تحاچي
شفــــت بعيونـك فـــرات من البواچي
ومن بـدت تحچي إعله سالفة التراچي
اي ذبحتــــك وإنـتــه للرحمان شاچـي

ذبحتك بــذيــچ الجــــروح ردتك ويه إختك تروح
روح حامي الطفله صحتك مره بالغربه ويه إختك
خذت روحك مرتين


رايـح آخذ روحك وبگليبي جمـره
بنفس شهر حسين هذا وهذا شهره
إنتــه مسموم وإلك بگليبي جمــره
ما توذر جسمك وضل وذره وذره

أدري دمعاتــك سيول مــا دنت ليــك الخيول
لا حجر طـاح بجبهتك مره بالغربه ويه إختك
خذت روحك مرتين


محمد عبد الرضا العيساوي

گربت منيتي و جزعت الروح طف إعله بالي وين ما روح
صورة طفوف بعيني من للغاضريه
أحزاني حتماً تنختم هاي المسيه

جمعت أحزاني گلت أودعها بدمع عيني اليسيل
و رفعت عنواني باچر إعله الموت متوجه العليل
تذكرت صيواني المــــا نسيته بليله يمرد بالدليل
محد من اخواني لا إجوني و لا حظر عمي الكفيل

محد حظرني بساعة الموت منهوا اليفصل لجسمي تابوت
منهوا اليغمضلي الجفن و يسبل إديه
أحزاني حتماً تنختم هاي المسيه

دمعتي بعيوني عايش بطول العمر گلبي حزين
تجري دم جفوني بكل مسيه بروحي يتعله الحنين
ناس اليلوموني عالنحيب و عالهضيمه و عالأنين
خلهم يسمعوني آنه ميت من مشه عني الحسين

صوت الونين يهد الصدور عمري طفوف و حزني عاشور
عايش حياتي بالهضم بأعظم رزيه
أحزاني حتماً تنختم هاي المسيه

عايش ويه جروحي بعيني ما انظر فقط بس الظلام
أذكر لمذبوحي تنقفص روحي إعله طبرات الإمام
كل حياتي و نوحي للذبيح و للسبي و حرگ الخيام
وي مدامع موحي مفارگ الدنيا و على الدنيا السلام

دنيا فقط تنبع جراحات ما شفت منها بس الآهات
هالدنيا راوتني العجب حد المنيه
أحزاني حتماً تنختم هاي المسيه

رددت چلماتي آنه بالدنيا فگدت معنى الأمان
ترتفع آهاتي گمت يوميه أشم ريحة دخان
لو علت صيحاتي أنظر لراس إرتفع فوگ السنان
أركض إعله خواتي بالي بالطف و رجع نفس الزمان

صرخة طفل محروگ الجدام لوعة و ركض من نار الخيام
و آنه أركضت من سمعت صرخة رقيه
أحزاني حتماً تنختم هاي المسيه





من دنت أيامي فرحت العين و بعد ماكو انتظار
تحققت أحلامي گرب الموت و طفت بگليبي نار
أنظر إعله أيتامي يكسر الخاطر تره دمع الزغار
راح أشوف الظامي أسكن وياه بحظن دار القرار

رايح أموت و أنظر حسين و بشوفته تتكحل العين
و أنظر كفيل أم الخدر و أمي الزجيه
أحزاني حتماً تنختم هاي المسيه


بمحنتي يا ويلي صحت من آهاتي بالصوت الرفيع
يا مدامع سيلي على المذبوح و على الطفل الرضيع
لإبني گتله إحچيلي فوض أمرك للعلي الباري السميع
من بعد تغسيلي بويه ادفن للجسد بأرض البقيع

جسمي إنحمل بأطراف الجفوف لا ما توذر بأرض الطفوف
لا ما بقه فوگ الترب جثه دميه
أحزاني حتماً تنختم هاي المسيه


محمد عبد الرضا العيساوي

آني و طفلي هاليوم نلطم عالضلع
گصدنه لخربة الشام هلينه الدمع
تركنه أرض الطفوف و رحنه للشام
نصرخ يا رقيه و نلطم الهام
هلينه الدمع
*******

أنه المتوذره أعضائه أنه الما ضل عضو بيه
أنه التنزل دمه دموعه أنه مضيعلي علويه
أنه المطشر إعله رمال أنه الفاگد ضوه بنيه
احن إعليها هالليله مثل ما حنت إعليه

لمن شافت الماي ما همها العطش
صاحت والدي ليش عالغبره إنفرش
من گصدتلي تشكي بحرگ الخيام
نصرخ يا رقيه و نلطم الهام
هلينه الدمع
***********

گصدت الشام أنه بنوحي دمع إعله الوجن هالي
خذت ويايه عبد الله غالي معتني لغالي
گصدنه رقيه بأرض الشام ونه بهالدرب عالي
أنوح و طفلي يا هالناس هو اليشرح أحوالي

يشرح حال الينوح و يهل عبرته
مثلي هو مخنوگ ينحب لإخوته
نحت ويه الرضيع و ضگت آلآلام
نصرخ يا رقيه و نلطم الهام
هلينه الدمع
***********

گصدناها بدموع العين إبحزن درب الحزن خضر
طريق الشام كله إنوح يواسي منحر بمنحر
لايگ ثوبج إعله الموت يريد بموته يتستر
رقيه بالخرابه هناك نسمع ونة الخدر

نسمع ونه و هموم و صياح و زعل
رقيه بنت الحسين مر بيها الأجل
جفنها بالخرابه من التعب نام
نصرخ يا رقيه و نلطم الهام
هلينه الدمع
***********

وصلنه لمرقدچ و الناس تنعه و تقره لطميه
سبيه و يا سبيه تصيح و تنادي يمسبيه
مرينه بمواكب نوح عيون البيها مدميه
صرخ عبد الله يا بويه أجر هالوادم إعليه

كلمن بچه للناس يكتب لو قره
باچر بيدي أنطيه صك المغفره
و شما عن رقيه كتبت أقلام
نصرخ يا رقيه و نلطم الهام
هلينه الدمع
***********

گعد عبد الله يم إخته و عينه إعليها خلاها
تناديه يا حبيب الروح حبيبة روحي ناداها
كلما تشتكي من سوط أحس عبد الله هداها
مسح إيده إعله إذنها هناك الألم من عدها نساها

طلع من الگماط ترچيه و مسح
إعليها و رجع هناك عالطفله الفرح
من شفنه اثر من ذيچ الأيام
نصرخ يا رقيه و نلطم الهام
هلينه الدمع
***********

ساعات الدفن حانت ساعات لأشد مصاب
تكتل دمعة المهضوم تكتل فرگة الأحباب
عزيزة گلبي أخليها غريبة بديرة الأجناب
و أدفن روحي وي روحي من أدفنها جوه تراب

آه و تكفي يا آه لو حان الدفن
و بتعبير الأحزان أحمل يا حزن
و اليدفن حبيبه بإيده ينظام
نصرخ يا رقيه و نلطم الهام
هلينه الدمع
***********

يوم الموادع صعب شلون أعوفچ بالغربيه
يا رقيه يا رقيه

أحچي وياچ بدمع عيني الجريه
لا تگطعين النفس هاي المسيه
ريت قبلچ عمه تاخذني المنيه
و لا يگولون بغرب ماتت رقيه
لا يگلولي أبد رقيه ما ترجع بعد
يا رقيه يا رقيه


زادت آلامي و دنت أعظم مصيبه
و الغريبه تنتحب يم الغريبه
نحل جسمچ و الگلب أيس طبيبه
شلون أرد لكربله بدون الحبيبه
شلون أعوفچ وحدچ بيش أجاوب والدچ
يا رقيه يا رقيه


باچر من أرجع لأبوچ بأربعينه
و عالضعن آنه أحسه يدير عينه
لو نشد زينب يخويه يا حزينه
وحدچ رديتي چا وين الحنينه
لو سأل شبل النبي موكبچ ناقص عبي
يا رقيه يا رقيه


عمه رحمي بحالتي و رحمي دمعتي
لو رحلتي تزود يا عمه غربتي
عالسياط شلون يرقيه صبرتي
ليش عالموت بغرب عمه إنجبرتي
صعبه حيل المسأله ماتت حچاية هله
يا رقيه يا رقيه


شرد أگله لو سأل من ضل معاها
و من حضرها و من نعاها و چفناها
راح أگله ماتت بحسرة أباها
جيت ازورك و ارد اموت آنه وراها
ينحفر باچر لحد هنه چم يوم و أرد
يا رقيه يا رقيه


ضاعت أيام الوفه و ذيچ الأماسي
و الله يا عمه الحزن شيبلي راسي
صعبه ايامي و غدت كلها مآسي
صعبه كلش فرگتچ يا اغله ناسي
بيچ أشم ريحة هجر يا بعد كل العمر
يا رقيه يا رقيه

نعي للسيده رقيه ع

إجيت الليله أودعك و أحچي وياك
و أريدن أحظنك بثنين إديه
أريد اليوم أقبلك وين الخدود
أبوسك وين يا شبل الزچيه
أشو بس نحر دامي وين العيون
يبويه أرجوك بس عاين عليه
بحوافر خيلهم منك عطر ليش
وذر منك ملاها الغاضريه
خنصر يمنتك يا بويه مگطوع
منك شنهو باقي بهالمسيه
إجيتك و التراچي إنسلبن هناك
جرهن حيل هالما بيه حميه
مد إيدك عليه و حس بالسياط
إنولت بعدك تره بنتك رقيه


بنتك عالجرح بويه تراچي
سلبوا هالليله من عندي تراچي
إجيتك أشتكي الليله ترا چي
حرگوا خيمتي و چتفو إديه


الگلب يمك يرد ردود ونتاه
أصيحن آه يخويه اليوم ونتاه
بنتك ونت إعله الراس ونتاه
لحد ما ماتت من الون رقيه

نعي للسيدة رقيه عليها السلام


مــنهــــو الشاف طفلــه بعـــمــر الورود
تمشي اتطيــح تصرخ بالهضيـمــه
وتــشـــــــب نيــــران بيها بعلو الخيــــام
تفــر لاوين والصحراء هــيــــمـــه
إعله جسم الوالي راحــت تزحف زحوف
تسولــفــله إعله صيوانه وحريمـه
يـــبــويه ويـــاي گــــوم نـطـفـي الخيــام
بعــــد يا بــويــه ما ضلتلي خيـمـه
علامـــه البيــهـــا مو مثــــل العــلامــات
عــــــلامتــهــــا جرح گلب بيتيمــه
يجـــرحهــا الضـــوه لو يـمـهــا يــنـــدار
ويكتــلها الهــوه لـو هــب نسيـمـه
اليجـــر منها التراچــي تگلــه لا حــيـــل
إلـــــك أنــطيهــن وآنــه الكـريـمـه
الفگـــد غاليــه شلــه بـذنـــي الأقـــــراط
شيســون بذنـــه لــو ذبحـوا نديمه
بــس آنــه أعـزهـن چــي مــن حسـيـــن
ولأن بـيهـن عـطـر چـفـه العظيمـه


لـــون تـعــرف الأمـــه من بيها
فــلا بعــدت رقـيــــــــه من بيها
التراچي تصيــح إتـرك من بيها
عطر وأنفاس من إبن الزچيه

بناتـــــك عالمصايـب حـيـــل يرهن
ودليلي إعلــه الجروح بهضم يرهن
خصمــك للتــــراچــي اليــوم يرهن
وگطع إذني وشتم حامي الحميه

الگلب يمـــك يرد ردود ونتاه
أصيحــن آه يخويه اليوم ونتاه
بنتك ونــت إعله الراس ونتاه
لحد ما ماتت من الون رقيه

صدى صوتي لرضيعك لذنه والله
بغيابـك مُــــر يصبـــــح لذنه والله
يبــويـــه آنـــــه وشريفه لذنه والله
بحمه الحره العقيله الهاشميه

إجيــت الليله أسمعـــــك والله أذاني
و أشوفــك يبو الغيــــره والله أذاني
أخـبــرك عــن عـــدوك والله أذاني
يطگني بسوط ويچتف بإديه

تدري الـعــــفـه بنـــتـك ما عفتها
و أبـــد طـــف النـوايب ما عفتها
رقــيـه بـنـيــــتـك أبـــداً ما عفتها
لحد ما گيدوا چفها إبإديه

عـفـة الـكـون تـخــجــل من عفتها
و سنـى النيران بالطف من عفتها
رقـيـــه الـيــوم خـويــه من عفتها
إجتني مسلبه وتركض عليه


محمد عبد الرضا العيساوي

بيش اخبر والدي حاير منين ابتدي
والله يا عمه حرت هاي المسيه شرد أگله لو سألني عن رقيه
حاير منين أبتدي

*****************************

آنـــه يا عمه العليل بگلبي حيــــره
عن أبوي حسين وجهي وين أديـره
لـو نشد عن طفله مسبـيــه وأسيــره
والله متحــيـــر شگــلــه يا أمــيـــره
والله عمـــه تحيــرت وبمسيري تمرمرت
من نصل گبر الولي بالغاضريه شرد أگله لو سألني عن رقيه
حاير منين أبتدي


************************************

من أصل يمه شجاوب لو سألني
إختـــك رقيــه العزيزه وين يبني
إحچي يا بــويه المصايـب ألمني
وطــرق رحلتــكم يبويـه عذبـني
شرد أسولف يا خبر ينهمل دمع النظر
سالت من العيـــن دمعاتي الجريــه شرد أگله لو سألني عن رقيه
حاير منين أبتدي
***********************************

عمه عينيني بجوابچ رحمـي حالي
وإنتي تدريني عليـل وحزني عالي
هـــم أسولــف للسبـط ذيــچ الليالي
بالخرابـــه والدمـع من عيني هالي
من گعدنه اعله الترب بســــوط ظالم ننظرب
كل خواتي تراكضن بويــه عليــه شرد أگله لو سألني عن رقيه
حاير منين ابتدي

********************************

عمه ما ريـــدن ابد زيدت عذابـــه
ولا أجيبن طاري من ذيج الخرابـه
عمه يدري بينه نمنه اعله الترابــه
وتلهب شموس الحقد ماكوا سحابه
بيه يتعله الألم من أسولف عالخيم
طاري ما جيبن أنه لأذن الدميه شرد أگله لو سألني عن رقيه
حاير منين أبتدي
**********************************

عمه راح احچي لأبوي بهالظلامـه
وراح أگله اعله المتن ظلت علامه
ليــــل سفرتـهــــا رقيــــه ما تنامـه
ملوعــــه بنتــــك تـره دون اليتامه
ملوعه وضلت تـون تشكي من جرح الإذن
من أعاينها تشب نيراني بيه شرد أگلــــه لو سألني عن رقيه
حاير منين ابتدي
***********************************

بويــــه بالديـوان نـادت وين أبونـه
بالله جاوبـني يبـــن حيــدر يخونــه
جابوا الراس بطشت شافت عيونـه
واعله راسك ماتت بحسره الحنونه
شمت الراس وبچــت من بچيها ما صحت
زادت إعلينه المآسي بهالرزيه شــرد أگله لو سألني رقيه
حاير منين ابتدي

************************************

عمه يا زينـب لقانـه بروضة الباري وجنانــه
عمه بالرؤيــه شفت راح أموت إعله الطشت
هاي المسيه

عمه زينب راح أسولفلـچ خبــر
والله بيه دلالي هـــــالليله إبتشر
هذا أبويه حسين إجاني ويالگمر
گلــــي يا طفله بعد ماكــو قهــر

بالفرج من بشروني فاضـت بدمعي عيـــوني
وشكثر آنــه فرحـت راح أموت إعله الطشت
هاي المسيه


گلي باچــــر بالقصر أنــده إلچ
وإنتي ودعي الليله يا بويه هلچ
شعندچ بدنياچ بويه أرد أسألـچ
مـن بعـــد عيناي مــن يتكفلـچ

گلي إنسي الون وأفرحي لا تنوحين إعلـه جرحي
آنـــه بالحســـــره صحت راح أموت إعله الطشت
هاي المسيه


عمه أبويــه بدمعته سولـف إلـي
آنه إجـيـتـچ بويــه وإنـتـي ادللي
وصي للسجاد گولي يــــا علـــي
إذكرني خويه لو وصلت لمنزلي

خويه طب إنته لحجرتي گلهـــا ما ترجعلچ إختي
و للمكـــان البــي نـمـت راح أموت إعله الطشت
هاي المسيه


عمه ما تحمل بعد جدمي سبـي
ليـــش بس سياط صايـر ملعبي
طفله آنه و أنچوي بنــار العبـي
راح أروح وأشكي يم طه النبي

راح أروح وأشكي همي راح أسولفله إعله دمــي
الليلــه لــو بالهم نـحــت راح أموت إعله الطشت
هاي المسيه


عـمه چـم ذكره على عيوني تمـر
عالسبي و السوط لـو وجـه الشمر
باچر شيحچي شيقـدم مـــن عــذر
لو وگفت آنه شيسولـــف بـالحـشر

بالحشر أرفع إديه وأدعــي يم رب البريــه
والله منه تـلـوعـت راح أموت إعله الطشت
هاي المسيه


عالارض باچــر مصيبـاتي تجل
وللحشر جرحي فلا ضن ينـدمـل
عمه دفني وياي چم شعرة هــزل
وعالگبر خلليلي قطعه من الحبل

بگبري خليهن علامه شاهـــد ليـــوم القيامـــه
وياهـــن آنـه اتيسرت راح أموت إعله الطشت
هاي المسيه

عل الراس على الراس طفلــه ونخيـت المهدي
على الراس على الراس ضل دمعي من دم يدي
عجـلّـي ثـــــارك طال إنتظارك
يمهدي يمهـــدي


آنه طفله وباليسـر إسمــي السبيـه
بالحبل جابـــوني مــن الغاضريـه
تدري بالديوان خصمي شسوه بيه
گال جيبوا الراس لوعوها لرقـيـه

والأغراب والأغراب كتــلتـنــه بالشماتـه
والأغراب والأغراب شتـموا علي وبناته
يا حـــــــامي جـارك طــال إنتظـارك
يمهدي يــــمهدي


من نظرت لراس ابوي ودمعي يهمي
حرت انخـــامن ســرت نار ويه دمي
جنت انخـــه الكافـل و هاجرني عمي
قــررت انخاك وأحـچـي الليلـه همي

بالدموع بالدموع كتلك يبو الحميه
بالدموع بالدموع إتلگـــه هالرزيه
بيـــهـــــــا انتـشـــارك طـــال إنتــظارك
يمهدي يمهدي


هذا يا مهدي الدمـع إنظــر سيولـه
شنهوا ذنبي وأنحرم من الطفــولـه
الطفل من يبجي بعجل أهله يجوله
وآنه كل أهلي گظوا نبـع الرجوله

بالطفوف بالطفـوف وسفــه گظـوا خواني
بالطفوف بالطفـوف حته احترگ صيواني
ناري ويه نـــــــارك طــــــال إنتظارك
يمهــــدي يمهدي


من سمعني حسين أوجهلك كــلامي
گلي لإبن الحسن وصليلــه ســلامي
بويه گليله أبـد لا يــــنسه ضــامـــي
عالترب مطروح ضل وجسمه دامي

عالتراب عالتراب ينــزف دمــه وريده
عالتراب عالتراب گطعوله خنصر إيده
يـنحـــب فقــــارك طـــال إنتظارك
يمهـــدي يمهدي


عالطشت ما أگــدر لراسي أشيلـه
خاف أشيله وينذبح صبــر العقيـله
بروحي سالوفة ألف ليله ويته ليله
عن أبوي الغالي عن گلبي وخليله

والأيام والأيام تحچي بهضم نياحي
والأيام والأيام تسولف عن جراحي
تنطر قــــــرارك طــال إنتظــارك
يـمهـــــدي يــمهـــدي


راح أروح ويـــــــاه آنه بهالمسيه
إلك من عندي تضل هاي الوصيه
من تجي ياريت ترجعلي الهديـــه
تجيب ترچيتي بحـــزن تقبل عليه

بالچفوف بالچفوف تمسحلي هالبواچي
بالچفوف بالچفوف تلبسني هــالتراچي
بـــيـــك نتبــــــارك طــال إنتظارك
يــمــــــهـــدي يــمهـدي

وين أبوسك و إنته ما عندك خدود
بويه إگعد و إنظـر ألون الزنود
من نظرت لخنصرك گلت أقبل منحرك
ها يبويه


بويه يا شبل الزچيه إگعد و حاچيني
إنته عندك چم رقيه يا بعد ضي عيني
آنه جيتك هالمسيه دمعتي تچويني
دنيتي اندارت عليه و ضيعتها سنيني

ضاعت سنيني و فگدت آنه الحياة
ما بقه عندي أمل بس بالممات
عمري بالطف انترك گلت أقبل منحرك
ها يبويه


احتركت الخيمه و اجيتك بويه شوف دموعي
بويه لضلوعك يروحن فدوه كل ضلوعي
چنه بالخيمه نسولف إنته كل موضوعي
إنته شجرة كل حياتي و إنته كل فروعي

إنته بعيوني چنت چلمة دلال
عني وين إنته رحت بويه تعال
طفله مشتاگه إلك گلت أقبل منحرك
ها يبويه

بويه إحضني إعله كيفك لا تهيج جروحك
أدري مشتاگ لطفلتك فدوه روحي لروحك
خاف أسولفلك جروحي خاف أزيّد نوحك
يا جبل عمري و حياتي ضمني بين سفوحك

ضمني و أدري يمنتك قلعة أمان
يا حنين الليله محتاجه الحنان
بيه چم جرح إشترك گلت أقبل منحرك
ها يبويه


خيمتي زغيره حرگوها بويه حيل أذوني
شنهوا معناة السبيه بهالأمر نادوني
واگفه و أنظر عليها تجري دم عيوني
بويه ذاك اللي سطرني و هذا طگ متوني

طفله شحمل شأعرف بأرض الطفوف
ريتك إعليه تصد بويه و تشوف
لحرمتي خولي إنتهك گلت أقبل منحرك
ها يبويه


بويه أخذوها الهديه البيها أذكرك آني
چم جرح مرني بغيابك چم جرح أذاني
بويه مد إيدك عليه بويه شوف ألواني
بويه سلبوها التراچي و جروحها آذاني

گتله ترچياتي ما تگربها إدين
ذني ذكرة والدي ذاك الحسين
جرهن من إذني و ضحك گلت أقبل منحرك
ها يبويه


بويه جمعونه ضربونه و جيتك إتعنيتك
بويه لو وياك إخذني لو تردني لبيتك
فارس الحب و المدامع كل وكت ناديتك
هذي قبلات المناحه عالنحر حبيتك

بستك و أدري الجفن لمن ينام
ننجمع إحنه سوه و يلمنه شام
كلشي هان لخاطرك گلت أقبل منحرك
ها يبويه

لمولاتي رقية (ع)

—-{ المستهل}——

من طاحت رقيه واحنه ماشين
غرس بالرمل چن راس الحسين

طفله يضربوه
لو رادت ابوه

رقيه...رقيه

———-

دلوني اعله ابويه ارد احجي وياه
وسولفله شجرالي

ولو غايب عليه حسين ساعات
ما نام الليالي

يبو طول الحلو وعيون حلوات
فاكدتك يغالي

نايم عل ترب وحسين عريان
ورايح كل دلالي


من صار العصر حركوه الخيام
بدت رحله السبي يابويه للشام

بنيتك شتموه
لمن مات ابوه

رقيه... رقيه

————

اذا رايد تسافر خذني وياك
ما ضلن وحيده

اضن هذه الغياب يطول هواي
والسفره بعيده

منو غيرك الي يواسيني يحسين
وينيمني اعله ايده

ادييه بنيتك الترفات يحسين
مو مالت حديده


مشونه بدرب بي فحطت النوك
يبويـه صعبه تدري طبت السوك

اربع اسنين عشت
وفوك راسك متت

رقيه ... رقيه

————

اذا راد الحبيب يطيب الجروح
خل يحضن حبيبه

يضل كل اليالي بعمره مخنوك
وشي يسكت نحيبه

وذا يمه اخوته واهله وناس
يحس روحه غريبه

يرفع جف اديه ويرجع يريد
ويضل يدعي لمجيبه

يرد سالم يجيني بلايه مذبوح
ويرد طوله الابو خالي من الجروح


مشتاكه لحنانك
وضل خالي مكانك

رقيه ... رقيه

————

اذا جان القدر ما قاسم تعود
على الدنيا السلامه

اضل مشتاكه اله يا بلسم الروح
وشتاك الكلامه

حلو من يبتسم ويدير العيون
يا عشكه وغرامه

احلى من البشر الحسين بهواي
وذو حسن وسامه


من طول الدرب وطول الايام
عله الناكه يبويه نكعد انام

ردينه بضعنه
خالي من اهلنه

رقيه ... رقيه

————

مشه وما ودعاني شلون يا روح
مشه وراح من ادينه

التقينه بناس ما يرحم حجي الناس
وتباوع لو بچينه

تمنيه المنيه وياك يحسين
ومتنه ولا اجينه

اجه الليل واجن كلهن على البال
جا يمته تجينه

وذا صار الفجر انطر على الباب
هلبت جايني وجايبلي الاحباب

انه انه مدلله
يتمتني كربله

رقيه ... رقيه

————

حسين شبّر

لمولاتي فاطمة العليله (ع)

عليمن عايشه والمن اتاني
الموت الماخذك جا ما خذاني

مشتاكه لحنانك
سلف ماسد مكانك

تفاركنه بوكت مو مالت فراك
________

ادور بالمحامل محملي وين
ردت وياك اروحن بويه يحسين
بعد ماشوف بيهن ذني الثنين
برمشت عين خلصت عشرت سنين

حمل ضعن اهلنه وچنهم نجوم
مشو والذكره ضلت بس الهدوم

ما كلي اصعدي
مشه وخلاني وحدي

تفاركنه بوكت مو مالت فراك
____

اخذني وعادي خله اچوه بالنار
اركض بالفله انه وي الصغار
لتخليني وحدي بهاي الديار
اضل سهرانه ترجع لليل ونهار

اشوفك وين وانه عيوني مشتاكه
صار هواي كلي يمته نتلاكه

مشتاكتلك هواي
اريدك تكعد حداي

تفاركنه بوكت مو مالت فراك
_

ثكل كلشي بغيابك حته ممشاي
انه عطشانه الك مو بويه للماي
بهيده ياوجع من تمشي بهداي
يون كلبي عليكم ونت الناي

اذكرك من تمر بيه اليالي
ابجي اعليك مدري ابجي اعله حالي

تبقى واعدتني
شمالك فاركتني

تفاركنه بوكت مو مالت فراك
_

على عيونك نصبح عودتنه
عمت عين اليالي الفركتنه
بصبح عاشر يبويه ويتمتنه
چنه جبال لكن طيحتنه

دلوني الشريعه صايره منين
بيه اعزاز و ولهم حسين

فاطم التركته
ماتت من عفته

تفاركنه بوكت مو مالت فراك
__

جان الشوفتك كلبي انه هايم
رجع خالي ضعنه من الهواشم
ومثل لون السمه چتف الفواطم
اضن حسين ما ردالي سالم

مشه بجسمي المرض يابويه جناز
من شفت الضعن خالي من العزاز

خبر موتك كسرني
وعبدالله هضمني

وتفاركنه بوكت مو مالت فراك
_

حسين شبّر

شور
لمولاي علي الأكبر (ع)


كوم يبني انطيني جفك خل ارجعك للخيام
بويه خليني بمكاني ولمي وصل هل كلام
كله الاكبر ما يردلج بويه خصه بالسلام
شدي حيلج على فراكه نام ماي عيوني نام

كوم مو كلبي كسرته لايحس ولايه صوت
علي رد وياي لمك يبني لو وياك اموت

كال ماريده انه حلمي انه حلمي
بويه دربالك عله امي عله امي

راح الاكبر ليلى مني راح الاكبر
________

راح حيلي وكوه جيته راح بس كاسرلي ظهري
طحت يمه وبيدي شلته وبني نايم فوك صدري
كتله بويه لا تسافر هزلي راسه ومات دغري
رد عليه علي يبني بعد ساعه يسبه خدري

شلون ترهم هاي كلي ونته الميتمني چنك
رحت ادور عله وليدي يبني والدلاني ونك

مددت يمه وشبكته شبكته
من كثر خوفي لچمته لچمته

راح الاكبر ليلى مني راح الاكبر
_

شلته للخيمه واجينه وغالي شايل بيده غالي
مدري اشيله مدري المه حالي يكسر يختي حالي
راح المسمي ضحكتي وهيبتي وعزت دلالي
شلون بيه وكله ماتو وانه منكم ما صفالي

زينب تلكيني خويه علي شيبني بشبابي
وانتي ضليتي يزينب عاد واسيني بمصابي

مشه وذاني برحيله رحيله
خله خطواتي ثكيله ثكيله

راح الاكبر ليلى مني راح الاكبر
__

چنه من نطلع سويه عيوني بس عليك اصدهن
منين اجيبن انه ثوبك خاطر عيوني يردهن
يا حنين بكد خواتك ويا سوالفنه وعشكهن
مشيك وطولك يبويه ذني كلهن بيك احبهن

كله يمي ونته ماكو چني واحد فكد عينه
لو فكدتك انه لحضه علي رايح علي وينه

علي سالم ما اجاني اجاني
تالي مات وعذباني عذباني

راح الاكبر ليلى مني راح الاكبر
__

حسين شبّر

حسين من انه اذكره ... كلبي يسكت مايدك
حسين علمني المحبه ... وهوه قبله الكُل عشك
قبل لا يكرب محرم ... ابدي اشتم الحرك
وطبر اعله الهامه انه ... بيوم صاحوله الطبك


حسين يا ابا عبدالله
حسين يا ابا عبدالله

*


انه لو كلبي لجمني ... راسن اكصد حضرتك
حسين يا محلاتة عمري ... ويكضي كله بخدمتك
تحترك روحي ويه كلبي ... ولون ذكرو خيمتك
كلشي علمتني بحياتي ... حسين هاي ثورتك


حسين يا ابا عبدالله
حسين يا ابا عبدالله

*


حسين يم بابك وكفتي... ارد اسولف قصتي
حسين مهموم وأعاني ... وفقط يمك راحتي
اني بس يمك اسولف ... لان تفهم غايتي
ويمك اتناسة همومي... ولون تنزل دمعتي


حسين يا ابا عبدالله
حسين يا ابا عبدالله


*


حسين لو ما اعتنيلك ... كون تنشل الجدم
حسين دليني اعله مجلس ... تنجمع بيه الخدم
ارد ادك حيل اعله صدري ... ارد احس جمر الخيم
عيني لو ما تبجي لجلك ... كون يعميهة السهم


حسين يا ابا عبدالله
حسين يا ابا عبدالله


*


حسين نور الدنيا كلهة...و هوة نور الكل ضوه
حسين كلما اذكر اسمة ... ويه اسمه يهب هوى
يحسين بس انتة طبيبي ... وللمرض انت الدوى
عاشكه من گلبي گلة ... وعاشك ويا نينوى


حسين يا ابا عبدالله
حسين يا ابا عبدالله

____

حسين شبّر

لمولاتي سُكينه (ع)


——{ المستهل }——-


عمي جاني الليل شو ما جيتني
عمي ليش الوحدي خليتني

__

عمي ذبلانه شفافي من العطش
كلبي من الخوف گلش ارتعش
عمري صاير مثل ليل هدعش
للمنيه وياك ما وديتني
عمي ليش الوحدي خليتني
__

ما انامن انه اريدن شوفتك
ليش حرموني يعم من ضحكتك
عمي وينك سكنه بتك فكدتك
كون كبلك مييته يا ريتني
عمي ليش الوحدي خليتني
__

رايح الوين يشمعت هلي
ضحكتك الكرار وعيون الولي
انته اعز من النفس بالنسبه الي
بالمهد ونت يعم ناغيتني
عمي ليش الوحدي خليتني
__

انته يالضيفت عينك للسهم
ونته راعي المرجله و راعي العلم
من طحت من المهر طاحت خيم
عمي تدري بطيحتك بجيتني
عمي ليش الوحدي خليتني
___

ما وكف بغيابهم دمع العيون
عالدرب اكعد وكولن هم يجون
وين ابويه حسين وعمي الحنون
ونته تدري بروحتك اذيتني
عمي ليش الوحدي خليتني
___

حسين شبّر

لـمولاتي السيدة رقيه (ع)


------- {المستهل} --------


بل خرابه انتظرتك تجي
يا ابو الاكبر الك عندي حجي

ليش فاركتني ..... ليش فاركتني

---[١]----

بويه من حركو خيمنه الشمر حيل اذاني
ردت اجيك وتدري بويه الشمر ما خلاني
انه لا بيه اجيلك ولا ارد لمچاني
اركض ومسبيه انه والجمر چواني

بويه .. طكني النذل بعيوني
بويه .. عنك ايمنعوني
بويه .. من رحت ماودعتني

ليش فاركتني ..... ليش فاركتني

---[٢]----

طبو اعلينه الخيمنه كامو يضربونه
كلنه كيدونه بحبلهم صارو يجرونه
عل ارض ذبو رمحهم خاطر يعثرونه
والتصيح بأسم ابوهه راسن يشتمونه

بويه .. انته عاري بنينوى
بويه .. زحمه انه اشتم هوى
بويه .. من رحت ما ودعتني

ليش فاركتني ..... ليش فاركتني

---[٣]----

عل رمح راسك حبيبي بكل حقد رفعونه
هدوا اعلينه بسيفهم صارو يخوفونه
استولوا اعلينة بعددهم رادو ان يولونه
جرو امن اذني التراجي وكامو يسلبونه

بويه .. وسفه نايم عل ترب
بويه .. منين اجيك بيا درب
بويه .. من رحت ما ودعتني

ليش فاركتني ..... ليش فاركتني

---[٤]----

انه اذكر من كلتلي أمس وبوسط الخيام
بنتي باجر راح اسافر بس امرلج بل منام
تدري من جابولي راسك مو حقيقة چن وهام
ماترد بويه عليه فدوه رد بس السلام

بويه .. انه وحدي ولوني
بويه .. وبچلاي اضربوني
بويه .. من رحت ما ودعتني

ليش فاركتني ..... ليش فاركتني
____

حسين شبّر

شور
لمولاي سيد الشهداء (ع)


عيـونك ديـره للعشـاك مو مالـت ذبـح انتـه
ما سالم عظم بحسين روحه ورده ساحكته
لا چـادر ولا صحبـان مـامـش منـه فـاتحتـه
وما شايف كبل ميت ضل ينازع بسكته

منو بيكم يوخر الخيل عن جسمه
شمسوي اخويه وينسلب هدمه
بشر مابيهم مروه ولاحته ابد رحمه

كله مذبحه الخوان
ونامت كله بتربان
رفعت چفه وتخاطب
ربي تقبل القربان
_____

رحله من التعب صارت وحسين البطـل غايـب
يم صوب النهر من راح شـاب ومن رجع شايب
زيـنـب راح ارد عـبـاس رد وكـلشـي مـا جـايـب
وظهره المنكسـر ويـلاه يشبـه كسـرت الحاجـب

هد حيله ابو فاضل حارس خيمت الحره
نايم ياحلال اخته وتراب الفله حدره
سهم بعينه مستوطن وسهم غافي بوسط صدره

بحبال مچتفه ايديه
دنيا ودارت اعليه
خضر حته ظهر النوك
من كثرت بواجيه

_

زينب حشمت اخوته وعليهم كثر صاحت
ناكـه عرجـه جابولـي لا وكفـت ولا ناخـت
بلا ثنيـة رجـل عبـاس رادت تركب وطاحت
بلا شيخ العشيره حسين زينب عل هزل راحت

جا وين الكمر عباس ما سير عله العيله
اذا مابي يرد ليه انه تعنه ومشيله
بكثر مابيه شايفته عطره تارس الشيله

غريبه بعدك يصيحون
ليش بوالدي يشتمون
حجيهم ياكل بكلبي
ومايرحم نضر العيون

_

نايم بالشمس يحسين وانت فيايك شكبره
مغطي كربله والكون والتاريخ ويعبره
مصبرنه بمصايبنه وابنك محد يصبره
تكتل يا عزيز الروح مو بس تخنك العبره

هونت كل مصيبه مصيبتك يحسين
حزنك ورث أهالينه وهاي بركبتي دين
موش ادموع اصب اعليك فص العين

ماتكفي الدموع اعليك
ميسد دينك شننطيك
يالمنطينه ابو فاضل
شننطي ارواح مانوفيك

_

نحرك رايه حمره وثار ضل مضموم للقائم
يالطحت وعليك الخيل جالت لمت الوادم
صوت اضلوعك بموضوع مايستحمله الخادم
كلي اتحملتها اشلون زينب منظرك صادم

تعاين والعده فوكك ترك ضلعك
تعاين والولاد مجتله وربعك
نايم عالرمل يحسين مو طبعك

كون اعله الحرير تنام
صدرك هذا لو احلام
عبد الله مكانه هنا
واخذت شو مكانه سهام

____


حسين شبّر
احمد ابو الشون

نزله لـمولاي مسلم بن عقيل



ضحه بروحه لجل الدين
مسلم سفيرك يحسين

_____

طب الحومه بسيفه الباشط
بأسم الدين مسلم ناشط
رگاب جنود العده كاشط

كل القاده تعرفه زين
مسلم سفيرك يحسين

_


رج الكوفه بدكت جدمه
شايل غيرت حيدر عمه
زلمه ومنو يواجه زلمه

يخزرهم بطارف عين
مسلم سفيرك يحسين

_

بالكوفه سئلو چم شاهد
همه ألالاف مسلم واحد
جمع روسهم مثل الوارد

والي شافه يشرد وين
مسلم سفيرك يحسين

__

مسلم ابن بيت العزه
ابو سكينه هواي يعزه
طب وقصر الكوفه هزه

جاب العده من الصوبين
مسلم سفيرك يحسين

__

بسطح القصر موته صبح
بحب حسين الجنه ربح
وبدمه مسلم هم سبح

ضحه بروحه لجل الدين
مسلم سفيرك يحسين

__

حسين شبّر