#ليلة_الانصار
#ليلة_أصحاب_الحسين
#ليلة_6_محرم

#عگيلي
..........................


انصار احسين الوفايه
انصار احسين الوفايه

......................................................

انصار احسين اهل الغيره
وگفتهم بالطف أچبيره
ماعافوا مولانه ابحيره

گالوا نبقه وگَد احچايه
.............................................................

ظحّو لحسين ابأنفسهم
الموت ابكبره وما همهم
خل نتعلم من صحبتهم

صحبة موقف مو عن غاية
.............................................................

وييه احسين وأنطو كلمه
ومن الكلمه اتعرفه الزلمه
فاتوا ع الموت ابكل هِمّه

وبگاع الطف دَگوّ ثايه
.............................................................

ماهمهم جيش ولا عسكر
صاحو زلمتهم خل يحضر
حتماً يرجع كله اموذّر

ماهمهم آلاف الجايه
.............................................................

ما يتكرر منهم واحد
عافوو لهو الدنيه السائد
واختارو موت اويه القائد

ويه احسين وراعي الراية
.............................................................


ونسألكم الدعاء

✍️ حيدر سعدون الخفاجي

#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_الإمام_العباس (ع) (1)
#ليلة_أبا_الفضل
#ليلة_7_محرم

#رئيسية
..............................


شو وحَّدك يابو علي راجعلي وينه كافلي

شو محني ظهرك تمشي گوه اتعاني
وين الكفيل الغالي ثاني اخواني

وينه عباس ... وينه عباس
.............................................................

ثنينكم رحتو وانه ع التل اباوع
دوّرت بس ضايع ايدور اعله ضايع
وين اخيّك وحّدك ياخويه راجع
محني ظهرك بيّنت بيك المواجع


جاوبني شنهو الي حصل شو وحّدك وين الكفل


مو تدري زينب للقاء إتّاني
وين الكفيل الغالي ثاني اخواني

وينه عباس ... وينه عباس
.............................................................

لا تضل ساكت تره تكتل سكتك
وينه عباس الالف مره سألتك
وين اخيي وكافلي مو ماتت اختك
طيّحت عامود اله بعيوني شفتك

شو طيحتها الخيمته مو تدري اموت بروحته

السكته خطفت روحي ويه الواني
وين الكفيل الغالي ثاني اخواني

وينه عباس ... وينه عباس
.............................................................

خويه ماضل أي أمل يرجعلي سالم ؟
گلي يا زينب انصبيها المآتم
گتله متأكد يخويه وبلكي واهم
گلي اخوچ وكافلچ ع الغبره نايم

اهنا طحت وبطيحتي طلعت احسها رويحتي

من اسمعت طايح طحت بمچاني
وين الكفيل الغالي ثاني اخواني

وينه عباس ... وينه عباس
.............................................................

خويه سولفلي شنو الصار بطلعته
گلي گطعوا يمنته وگطعوا يسرته
ويلي فوگ الهامه توجع ياضربته
وما عرفني اتركني گلي من وصلته


امهشم لگيته اعله النهر ويمكن الف طبره انطبر

القاصي وسفه يضربه وسفه الداني
وين الكفيل الغالي ثاني اخواني

وينه عباس ... وينه عباس
............................................................

حسين ليش تعوفه غادِ وترد لينه
يگلي ما ينشال يختي امگطّعينه
حتى لو خنشوفه بلكي يصد علينه
وشتشوفين السهم طفّاها عينه


لو جبته يكتلچن ألم وبصدره وبعينه سهم

يحسين وصلت حدها هاي احزاني
وين الكفيل الغالي ثاني اخواني

وينه عباس ... وينه عباس
.............................................................


ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#يا_أبا_الفضل_العباس
#ياحسين
#محرم_الحرام
#ويبقى_الحسين

للإشتراك : https://www.tg-me.com/haidersaidun

#ليلة_الإمام_العباس (2)
#ليلة_أبا_الفضل
#ليلة_7_محرم
#نزله
...................................


گمر وعليهم هجم يرفرف ابإيده العلم
يرتجز راعي الشيم
جبل ثابت ما يميل ... هذا ابن حامي الدخيل
.......................................................

من صعد ظهر المهر
اعصار وعليهم يمر
منه جيش يضل يفر

يذبح بسيفه ويشيل .... هذا ابن حامي الدخل
.............................................................

بطل واعله الحومة صال
مثل ابوه يهوه القتال
الگابله يرجع مُحال

البارزة يضل مستحيل ... هذا ابن حامي الدخيل
.............................................................

من هجم وبمهره غار
غيره يجدح طبعه حار
ينچوي الّي يجيسه صار

السبع گدامه عليل ... هذا ابن حامي الدخيل
.............................................................

گمر هاشم من طلع
الشرد منهم والوگع
الموت من سيفه شبع

حومر الگاع الدليل ... هذا ابن حامي الدخيل
..........................................................

طب ترفرف رايته
موجه بس من ريشته
يرتعد من غيرته

بيهم اشتدَّ العويل ... هذا ابن حامي الدخيل
.........................................................

للنهر غصباً وصل
سوه قادتهم وصل
زامط اوع المي حصل

والحصيله شچم قَتيل ... هذا ابن حامي الدخيل
.............................................................

فنه يوصل يم حُسين
اگص رجله اعميله عين
يشرد من اسيوفي وين

الوالي هذا والخليل ... هذا ابن حامي الدخيل
...........................................................

ونسألكم الدعاء

📝حيدر سعدون الخفاجي

#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_الإمام_العباس (3)
#ليلة_أبا_الفضل
#ليلة_7_محرم

#نزله_عكيلي
...........................


عباس وطب لارض الحومه
عباس وطب لارض الحومه
......................................

عباس وطب يرعد ليها
يگلب اسفلها وعاليها
والحومه اعصار اشتد بيها

مطّرّها ادموم امن اغيومه
.......................................

طشّر آلاف من العسكر
والبارز منهم يتوذر
هذا ابن الفقار وحيدر

علوم الكرار ويه اعلومه
.......................................

ياويله اليوگف گدامه
حتماً يوگع وابلا هامه
وين الجيش ووين ازلامه

إجيوش ورجعت مهزومه
.......................................

يفتح هذا الجيش بكيفه
ضل ينگط روس ودم سيفه
من عدهم خل ياخذ حيفه

خلي يوصللهم معلومه
.....................................

وبگاع الطف صارت رجفه
زلزلها العباس ابچفه
والواجه چن واجهه حتفه

أصناف الجيش ومهدومه
............................................

زامط يم الماي وجابه
وياهم سواها اطلابه
زلمتهم واكبرهم هابه

بيهم فرّغ كل اهمومه
.....................................

ونسألكم الدعاء

✍️ حيدر سعدون الخفاجي


#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_علي_الأكبر (1)
#ليلة_الأكبر

#تجليبه
..........................


يبني الجنت احسبك للكُبُر ذخري
تشيّعني حسبتك تدخل الگبري

..............................................

يبني شكد تنيتك واتعبت برباك
چنت احسب اخلّص هالعمر ويّاك
تاليها اعله الگاع الطف وذر ألگاك

من عمري اعله عمرك يابعد عمري
................................................

يوليدي وحبيبي وللگلب سلوه
دنيه اخلاف عينك كلشي ما تسوه
حلوه العشره بويه وفرگتك مره

بويه ومن فرگتك ينكسر ضهري
................................................

ودّعّتك بديه وللمنيه تروح
رايح انت بس راحت وراك الروح
رحت والباقي بعدك بس الم وجروح

رحل حتى الصبر ما فاد ياصبري
................................................

يا اكبر عطش انت ، العطش مو ماي
اموتن من ضماك ابساع گوم وياي
ماتبقى انته نايم لو ابوك الجاي

اشو مچفي اعله صدرك يابعد صدري
.................................................

امك بويه موعد ردك اتّاني
بالخيمه عفتها ابحيره وتعاني
ما ادري شگلها وعمرك الفاني

بهاي الحيره حيّرني صدك دهري
................................................

ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك: https://www.tg-me.com/haidersaidun

#ليلة_علي_الأكبر (2)
#ليلة_الأكبر
#نزله
..............................


جيوشهم تشرد وين والأكبر اتلگاها
.............................................

الجيوش اتحظرتله وارفعتله اسيوفها
رغم هاي العده كلها وگف بس م يشوفها
صاح بيهم آنه الاكبر وارجفت من خوفها

ترجف العالم خوف تصفگ نَدم خلّاها
جيوشهم تشرد وين والأكبر اتلگاها
...................................................

حاولوا يتگربوله جرّبوا بس ما نفع
صال بيهم وبجمعهم يمنه ع اليسره دفع
صاحوا التوبه علينه يَمه زلمتهم ركع

زلامهم صاحت ويل چن مجزرة سواها
جيوشهم تشرد وين والأكبر اتلگاها
......................................................

اشبه الناس بمحمد وصل ميدان الحرب
سحبوا الجيش ، يتنطر زلمة من عدهم يطب
تكتروا يتنوعوله عن بُعد مو عن قُرب

حرب صارتله اوناس واتحكم ابمسراها
جيوشهم تشرد وين والأكبر اتلگاها
...................................................

شال غيرة عمه كلها ومن علي ماخذ عزم
هو وحده وجيش كامل ، جيش يطلع منهزم
حچه بزوده وما تردد لو حچه يجزم جزم

غِيره يشبه عباس حرگة علي شالاها
جيوشهم تشرد وين والأكبر اتلگاها
....................................................

يوگف بنصهم يصيح شويه واعليهم يهد
يخسف الجيش بثواني يگصي بيهم من يشد
لو رجع ويريد راحه سيفه ينگط دم يرد

الحرب مهره وتنگاد وابغيرته اتعلاها
جيوشهم تشرد وين والأكبر اتلگاها
................................................


ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_علي_الأكبر (3)
#ليلة_الأكبر
#عگيلي

بالخيمه ادعيلك يالأكبر
..................................

محتاره وبالخيمه ادعيلك
ما اگدر اطلع واشكيلك
عوف الحومه ورد ادخيلك

ارجع لمك عوف العسكر
...................................

مو بيدي الحيله وبس ادعي
ادعيلك ويصب يا دمعي
رايح انته ويختل وضعي

يكبر همي ولا ما يصغر
..................................

يوليدي وثمرة دلالي
يا غالي وما مثلك غالي
ما فكرت شويه ابحالي

مايطول عمري يضل يگصر
.....................................

لحضه ولن صاحوا يا ليله
ابنچ راجع گومي امشيله
شفته امگطع رايح حيله

راجع بس راجعلي اموذّر
...................................

يوليدي بتعبي وربيتك
بعيوني اسنين امخليتك
تتگطع بالطف تاليتك

تعب اسنين اشلون امطَبّر
.................................

ردتك يبني لوكت العازه
ليام الشيب وعكازه
تاليها وترجعلي اجنازه

شعنده الموت ويمك يفتر
..................................

حاسبتك من اكبر ذخري
ويمك يخلص ياكل عمري
تالي اترد ودمك يجري

جاك الموت وب امك ما مر
....................................

ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_الرضيع ع
#ليلة_9_محرم
#رئيسية
...........................................


ليش ... سلوة ايامي
ليش ... ينذبح ضامي

عبدالله مو مالت ذبح
مايرهم ابراسه الرمح

وليدي وليدي
.........................................................

ابني ربيّتك ... بتعبي سويتك
تنذبح ضامي ... هايه تاليتك

هد حيلي الولد بحضاني ربيته
داريته وكحل بعيوني خليته
تاليها السهم ينبت ابلاهيته
ريته وبيّه طايح هالسهم ريته

اصغير ... مادره الرامي ؟
ليش ... ينذبح ضامي
..........................................................

ابني ست اشهر ... بعده م امخضر
وردِتي الحلوه ... بيها سهم ايمر

ست اشهر يودام هالولد عمره
شلون وينگطع من السهم نحره
اي مالت مهد مو مالت الحفره
انعدّلّه المهد مو نحفر ابگبره

راح ... اكبر احلامي
ليش ... ينذبح ضامي
.................................................

چان اصل عيدي ... يكبر اوليدي
مو اشوفنّه ... منذبح بيدي

ازفك بيدي چانت اكبر آمالي
مو ميّت تجيني ، اتغير احوالي
يا غالي وبعد ما يوصَلَك غالي
اباوع ع المهد والگه المهد خالي

هاذ ... موقفي الدامي
ليش ... ينذبح ضامي
.....................................................

لو يدر صدري ... ما حرت بامري
من خلص مني ... چن خلص عمري


العطش لو ادري حايل بينك وبيني
چا گمت وسگيتك من دمع عيني
عطشت لشووفِتك ياهو اليرويني
ماضل حيل عگبك يمه حاچيني

تگوم ... صارت اوهامي
ليش ... ينذبح ضامي
.....................................................

للكُبُر احسب ... توگف امعزب
والظهر تالي ... بفگدك ايحدب

للتالي ذخرتك يالولد يبني
تدفني وتغسلني وتشيعني
اشو باول عمرنه وناوي تتركني
عمت عين المنيه التاخذك مني

ريت ... آخر اعوامي
ليش ... ينذبح ضامي
....................................................


ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك :https://www.tg-me.com/haidersaidun

#ليلة_الوداع
#ليلة_9_محرم
#رئيسية
...............


اشلون اودعچ زينب اشلون ... تفضح يخيتي ادموع العيون

فرگتچ أكبر جرح خويه زينب
حتى أشد من الذبح خويه زينب
....................................................

هاي آخر شوفة أشوفچ بعد م تشوفيني
راح اعوف عيونچ انتي وتبقه ضلمه بعيني
مدري حاير شرد اكلچ يكفي هذا اونيني ؟!
تگله خويه اكشفلي صدرك خل اشم خليني

وصتني امي من تشوفييه ... حاير وحيد ابنحره قبلييه

مثل امي ما يصح خويه زينب
حتى أشد من الذبح خويه زينب
....................................................

خل اودعچ خويه واشبع ولو هم ما ينشبع
من بعد كل المصايب بالموادع انفجع
خل اروح وارد ابشرچ صوت كسري ينسمع
ولا تلطمين اعله وجهچ لو وصل كسر الضلع


راح ابقه ادعي لصبرچ يطول ... لو شفتي صدري تدوسه الخيول



يهشموني وانطرح خويه زينب
حتى أشد من الذبح خويه زينب
....................................................

ودعت چم غالي قبلك بعد ما أحمل وداع
الموادع والرحيل بگلبي سوو إجتمااع
خويه مااگدر اودعك بعدك انضل بالضياع
الگمر قبلك فجعني وبيك اشم ريح انفجاع

خليني يمك فدوه لتروح ... اشلون أقَنع بعدك الروح

كافي دمعاتچ رمح خويه زينب
حتى أشد من الذبح خويه زينب
....................................................

هسه اوصيچ اعله ولدي واسألج خويه الصبر
لا تلطمين اعله راسچ من تشوفيني انطبر
و لفّي خويه اطراف رجلچ باچر يچوي الجمر
ولا تندبيني احلفچ لو شمر بيچن يجر

صبرچ چبير يعادل ارجال ... باچر تره يشدوچ بحبال

للسبي اتحضري الصبح خويه زينب
حتى أشد من الذبح خويه زينب
....................................................

اموادعك مُكلف تگله للگلب ينراد حيل
عمر عشت اوياك هسه بلحضه قررت الرحيل
شلون اخلص عمري عگبك صعبه يغمض عيني ليل
يگلها فوك الم الموادع شوفي صدري اتسحگه خيل

جرحچ شمر ، هين بالوداع ... من المهر يدفعني للگاع

عدل يضربني وصفح خويه زينب
حتى أشد من الذبح خويه زينب
................................................


ونسألكم الدعاء


✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ليلة_الدفنه
#دفن_الأجساد
#رئيسية
.............................


حاچيني ياعمة .... اشحال ابو اليمه

اندفن لو بعده نام
عالتراب ... عالتراب
........................................................
حاچيني ياعمة علي بالولي الضل عالغبره
الضل وحيد بكربله ومامش نصير ينصره
المنجرح مية جرح والماله ثوب يستره
الماكو احد شيّعة ومحد حفرله گبره


الي انحفر صدره ...... والي انكسر ضهره

ماكو اعظم بعد من هذا المصاب
اندفن لو بعده نايم علتراب
عالتراب
...........................................................
ياعمة ابوكم چن جبل شنهو الجبل هم يطيح
المر على احسين الظهر لو مر على الكون يسيح
موتني من شفتة العصر يا قلة انصار يصيح
بذاك الوكت مطرت دمة وبچّة الورد هب الريح

تبچي السمة لكسرة ...... وينّعَة الورد عمرة

بالسمة ذاك الوكت صار انقلاب
اندفن لو بعدة نايم عالتراب
عالتراب
.........................................................
ارد اخبِرك لو تيهت بين الگمر بين حسين
احسين صدره منطحن والگمر من سهم العين
والدك گطعوا خنصره وعمك بقه ابلا چفين
ياحيرة اليدفن هله وفوگاها حاير بثنين

عمك سهم عينه ....... حسينك من اونينه

من بعد كل الجره هذا العذاب
أندفن لو بعد نايم عالتراب
عالتراب
...........................................................
اعظاء ابوك مطشره جسم الولي لميته ؟؟
خليت اصبعة باللحد ؟ لو عفته ما خليته ؟
وع الراس ما سألك بعد فوگ القناة الگيته
الصار بخواني كلف لو بيه صاير ريته

امطشر احسيني ..... اطَشْرت اسنيني

حسين خيمتنه وابو فاضل حجاب
اندفن لو بعده نايم عالتراب
عالتراب
...........................................................
ياعمه الموادع صعب شحالك لمن ودعته
لاعنده راس اتقبله ولا ينشبگ وتنعته
لا طولت بي بالدرب لا شلته لا شيعته
لا فصّلت لا چفنت وابلا غسول ادفنته

ابن الولي البضعه ....... ماله احد يشيعه

هذا ما معنى الظلم عين الصواب
أندفن لو بعده نايم عالتراب
عالتراب
.........................................................

ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك : https://www.tg-me.com/haidersaidun

#ايام_السبي
#السبي
#رئيسية
....................................

صحتك بهذا المصاب ... انتظر منك جواب

عباس أصيح اورموا متني
تحضرني بلكي وبلكي تسمعني

ألّحگ عليه ... ألّحگ عليه
...................................................

اتنطّرك طول الدرب
مات الجسم كثر الضرب
ياخويه تقبلها تره
نمشي سوه ويَ الغرب

تقبلها هيج يصير يابو الغيره
نسوانك ابليّاك تبقى ابحيره
غير الحبل والسوط ذبحتنا عيون
من ديره نطلع ندخل احنه بديره

تقبل بهذا الكلام ؟ ... يم غُرب دچ الضلام

هذا المصاب شكد أخذ مني
تحضرني بلكي وبلكي تسمعني


ألّحگ عليه ...... ألّحك عليه
.......................................................

الجاي والرايح سأل
انتي ماعندچ أهل ؟
شرد اجاوبهن شگول
دنگت گلبي اشتعل

معقولة ياعباس ما تسمعنه
الممشه وي حر الشمس تعّبّنه
هضموني ياعباس من يصيحون
طيّحنه يمنه ويسره هم طيّحنه

گال كافل هالحرم ... نابت ابعينه السهم

اسمع حچيهم والظهر محني
تحضرني بلكي وبلكي تسمعني

ألّحگ عليه ..... ألّحگ عليه
....................................................

توجع اسياط الكُفر
بالضعن گامت تمر
تدري بينه مدللات
ابد ما نحمل زجر

يالتنعرف بالغيرة أهم صفاتك
تقبلها بحبال اليسر خواتك
تقبل يجرهن والحبل صار ادموم
ما ارد اكمل بس يذل بناتك

كلنه رابطنه النذل ... حَزّ بالييدين الحبل


خاين يوكتي وبالغرب ذبني
تحضرني بلكي وبلكي تسمعني

ألّحگ عليه ...... ألّحگ عليه
....................................................

راسك ويانه برمح
يميل من ننطگ صفح
ينحني لمن نصيح
انحسه ابد ما منذبح

كل ما يجنه السوط ننضر راسك
كل ضربه ندعي ايرجّعلنه انفاسك
مگطوع راسك بس نحس بيه احساس
مات الجسم بس ما يموت احساسك

دم نحر راسك يصب ... شفنه ، كل ما ننضرب

كل ما اصيحك راسك يمرني
تحضرني بلكي وبلكي تسمعني

ألّحگ عليه .... ألّحگ عليه
.......................................................

ذَبّل اعيوني السهر
شافن انواع القهر
مشي انصبح والجدم
ميت الكثر السفر

چان السفر وياك أحلى ايامي
هسّا يعذّب والشمر گدامي
چنت اعله هودچ ماتخليني امشي
هسّه مشي وحفاي وي ضلّامي

چان حَديك مستمر ... هسه حادينه الشمر

متوزعه وبس صوتك يلمني
تحضرني بلكي وبلكي تسمعني

ألّحگ عليه ...... ألّحگ عليه
........................................................

ونسألكم الدعاء

✍️ حيدر سعدون الخفاجي

#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك: https://www.tg-me.com/haidersaidun

#ايام_السبي
#السبي
#رئيسية
........................


شحچيلك الموقف صعب
كاتلني هم طول الدرب
تقبلها نمشي ويه الغرب

خويه عباس خويه عباس
..................................................

اخت عباس زينب اني يدروني
سمعوا بيه بس ما مره شافوني
ومو بس شوفه عگبك هسه يسبوني
مسبيه وبعد لا تسأل شلوني

زينب انه ام الخدر
تعرفني عنوان الستر
تقبلها بدروب اليسر

خويه عباس. خويه عباس
.....................................................

ومو بس شوفه خويه وهينه بالشوفه
بحبال اليسر گادوني مچتوفه
الضيّع اهله تدري ايضيع معروفه
يطش حتى النهر لو ضيّع اجروفه

ابلايه الجرف ضاع النهر
واني الضعت دون الگمر
متروكه بدروب الخطر

خويه عباس. خويه عباس
..................................................

گبل لو صاحوا اسمي ها يعلويه
حسافه وصاروا اينادوني مسبيه
گبل عز ودلال وكلشي ما بيه
هسه من المصايب امشي محنيه

بت حيدر وبنت النبي
مالت خدر مالت عبي
ما احمل ادروب السبي

خويه عباس خويه عباس
.................................................

بالحر خويه تدري الدنيا حرّآگه
وع الناگه خذوني ومضّلِعه الناگه
ماهمنّي ذني وهمّي نتلاگه
يكتم گلبي ذن ، ما يكتم أشواگه

حر شوگك ابگلبي يجس
يچويني اكثر من شمس
وابحال اخيتك ما تحس

خويه عباس ..... خويه عباس
......................................................

تگعد خويه يمته هوايه صحنالك
صعبه وبالدرب نمشي اويه چتالك
ما هزّك وضعنه ؟ اشصاير ابحالك ؟
واشكال المصايب شافت اعيالك

مو سهلا خويه وداعِتك
نمشي اوي گاطع يمنِتك
ضلينه ننطر جييتك

خويه عباس ..... خويه عباس
........................................................

ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ياحسين
#ويبقى_الحسين

للإشتراك: https://www.tg-me.com/haidersaidun

#ايام_السبي
#السبي
#رئيسية
.................................


زينب صارت مسبيه والكل جاي لأذيتي
لو باقي الطف والتل وحيل اهون من مشيتي

ريت وراحِله في طف كربله
............................................................
البطف حصل كلش صعب بس اهون اهواي
من المشي بدرب اليسر وي غربه ممشاي
وزينب انه ام الخدر والمشكله ابهاي
رجعوني اتحمّل عطش مو مشكلة الماي

بالطف صار الما صاير صارت كل المصايب
بس اهون من مسبيه وامشي ابين الغرايب

هاي المشكِله في طف كربله
.............................................................
فوگ المصايب والقهر فوگ الرزية
فوگاها من طف كربله اطلع سبيه
الشفته بالطف مو سهل والمر عليه
فوگاها بدروب اليسر اطلع سبيه

بالطف اجروح اهوايه وجرح الأخوه الجفوني
فوگاها اصبح مسبيه ابنوگ الهزّل خذوني

رحت وناحِله في طف كربله
.............................................................
لو ردت اسولف ع السبي حيل الشرح طال
اني العقيله ابيا وكت مچتوفه بحبال
وبيا وكت اشگف بدي عن ظرب الاطفال
وعيوني زين وما عمت الشافت اشكال

ما تسوّلف سالفتي يصعب كلش شرحهه
زين وضلت انفاسي چانت يكتل جرحهه

صعبه المرحله في طف كربله
.............................................................
فوگ انكساري وضيّعتي واخوه الجفوني
وصلوني للكوفه مشي ومن طببوني
كوفة ابوي اتوقعت يستقبلوني
تاليها بحجار وشتم گاموا رموني

فوگ الصار وآلامه وتكتل نار المصيبة
بديار اهلي ينادوني شعندچ ها يالغريبة

وين العايله في طف كربله
.............................................................
الحارگ مهجتي والگلب مو حرگ الخيام
الحارگني طبيت العصر مسبيه للشام
بين الزلم بين الحرم والمنظر العام
الشفته بالشام القهر ما شفته بحلام

ريت وما عشت الموقف ريت وشفت المنيه
متجمعه الناس اهناكَ وكلها اتباوع عليه

الشام القاتِله في طف كربله
.............................................................

ونسألكم الدعاء

✍️ حيدر سعدون الخفاجي


#حيدر_سعدون_الخفاجي
#محرم_الحرام
#ايام_السبي
#ياحسين
#ويبقى_الحسين


للإشتراك : https://www.tg-me.com/haidersaidun

للهلال 💔😭

لاتهل يالذكرك ايبجينـــــــــي
شوفتك يهلال نبــــله بعيني
ــــــــــــــــــــ
يابو حزني التختلف عن كل هلال
بيك يوم امكدر ايهد الجبال
اشما يمر اسمك عليه دمعي سال
ظهري اعدله ومن تهل تحنيني
ــــــــــــــــــــ
ياهلال اجروح تنشر مو ضوه
بيك كل شي يختلف حتى الهوه
جم جرح خليته يدي ابلا دوه
جم مصيبه ايامك اتراويني
ــــــــــــــــــــ
بيك اشوف اجبود ذوبها الضمه
وبيك اشوف اجساد غرگت بالدمه
وبيك اشوف امسلبات ابلا حمه
وبيك اسمع صوت عمه احميني
ــــــــــــــــــــ
بيك اشوفن گمر مخسوف بعمد
وبيك اشوفن ابو اتمدد وي ولد
وبيك مذبوح الرضيع ابلا مهد
وبيك نار استعرت وتجويني
ــــــــــــــــــــ
انا راعي امصاب ماتنشفلي عين
وبيه جانون الحزن ماادوره وين
بگلبي ماتطفه ابد نار الحسين
ومانسيته والشهود اسنيني
ــــــــــــــــــــ
من تهل حافر تدوس اعله الجروح
من اشوفك ماتظل بجسـمي روح
واحسيناه واحسين اصرخ وانوح
وصوت اسمع وين اليواسيني
ــــــــــــــــــــ
من تهل اسمع نواعي الطاهره
وجني اشوفنه القميص التنشره
تصيح ليش اوليدي گطعو منحره
وهاي صيحه الكربله اتوديني
ــــــــــــــــــــ
انا عطشان اسمع بواحد يصيح
والم دمعي واوصله والگاه ذبيح
ويمه اشوفن فاگده اتكوم وتطيح
اتگله يبن امي متت حاجيني
ــــــــــــــــــــ
يگصر الساني شوصفك گلي بيش
گعده خليت العقيله تصلي ليش
واشتضن بعد السبي يهنالي عيش
المهدي انتظره يجي ايداويني
ــــــــــــــــــــ
علي محسن الزيادي

للخدمه والولاء

خدمة الحسين
صك برائه وفوز دنيا واخره
وخادم الحسين
يحشر اويه ام البنين الطاهره
ــــــــــــــــــــ
هالوشاح من السمه
مفصل بجف فاطمه
مسمه للخادم
بعالم الذر يفتخر
على گلبه منحفر
ياقمر هاشم
وعلى راسه الگمر حط اجفوفه
وفوگ گلبه بنـــور خط احروفه
حتى لو اعمه البصر گلبه يشوف
الگلب من العين اوضح شوفــه

حتى من يموت
روحه بالخدمه تحوم وحاضره
وخادم الحسين
يحشر اويه ام البنين الطاهره
ــــــــــــــــــــ
زلم قائدها الكفيــــل
والسجل عد جبرئيل
شكبر هيبتهم
للدموع وللونيــــن
انخلقو وام البنين
هيه ربتــــهم
اشكبر حظهم ولدي اتسميــــهم
بكل زمن عين الله دوم اعليهم
لا عليهم خوف لاهم يحزنـــون
كافــل الحره تكفل بيـــــــــــهم

وهُمّه بالحساب
ذو الوجوه الضاحكه المستبشره
وخادم الحسين
يحشر اويه ام البنين الطاهره
ــــــــــــــــــــ
ابلا شـــــــرح وابلا درس
واضحه اوضوح الشمس
كل معانيها
خدمة اهــــــــــل المعرفه
مــو فقط بس عاطــفه
ماكو شك بيها
المدرسه ام البنين اتحـــاسب
وابو فاضل بيها اشطر طالب
والخدم مو بالتساوي درجات
ابلا عذر يفقد رتبته الغـــايب

يخسر الينام
وبيها ربحانه العيــون الساهره
وخادم الحسين
يحشر اويه ام البنين الطاهره
ــــــــــــــــــــ
تلگه بالخدمـه التقي
وابو الاخلاص النقي
الفطري والعالم
ذره ماتحــــــمل دغش
صح تعب بيها وعطش
بس عمر دايم
حسين من الذر خذاها امن ايدها
تحيي مشروعه الالهي يريـــــدها
والخدم حزب الجليـــــل الفائزون
من علي ومن فاطمه تأييــــــدها

ربحو الجنان
والاقوام الحــــاربتهم خاسره
وخادم الحسين
يحشر اويه ام البنين الطاهره
ــــــــــــــــــــ
فاطمه بيوم الوعيد
تلتقط شيعتها اكيد
والخدم منهم
اتلمهم اباب الجنان
وبيدهم صك الامان
علي امأمّنهم
تفضلي يم البنيــــــــــن اتنادي
للجنان اويـــــاج اخذي اولادي
الشكر يازهراء شكرا ياحسين
يصيح كل خادم اخذت امرادي

الخدمه والعزاء
حتى بالجنه الشرف والمفخره
وخادم الحسين
يحشر اويه ام البنين الطاهره
ــــــــــــــــــــ
علي محسن الزيادي

اسمعنـــي يامن تعترض
صار البجي عندي فرض
علامة الايمـــــان      دمعي على العطشان
ــــــــــــــــــــ ــــــــــــــــــــ
حديث المصطفى واضـح ولا يخفه
حراره يگول لبني حســـــين ماتطفه
(بقلوب المؤمنين) امحـــــدد انعرفه
الگلب معناها خيمه يصير من يصفه

خله علامه الأمّتــــــه
المؤمن تعرفه بدمعته
وللحب صبح عنوان        دمعي على العطشان
ــــــــــــــــــــ
اذا ماقاري انصحـك روح واقراها
احجايه بدمعه ابو السجاد خطاها
قتيل العبره انا حســـــــين گالاها
كل مؤمن ذكرني ادموعــه سالاها

تعترض شنهو الرايده
وحسين دمعي مأيده
لليعترض برهان          دمعي على العطشان
ــــــــــــــــــــ
الي اسوه بعلي السجـــــــــــاد وبگلبه
ناره ماطفت حـــــد ماگضــــــــه نحبه
اقره اشعاش بعد الطف غصص صعبه
جان اكله يخلطه بدمعتـــــــــه وشربه

هذا درس من سيدي
بالدمع اختم وابتدي
بخدي يظل نيشان           دمعي على العطشان
ــــــــــــــــــــ
واذا تدّعي اتگلي جعفري انــه
جا جعفر الصادق بيش وصانه
مو بأقرب طريق العدن دلانـــه
يوم من البجي ماسكت ديوانه

ايگول العيون الهامره
ضاحكة مستبشـــــره
وايثگـل الميزان             دمعي على العطشان
ــــــــــــــــــــ
يالتعترض رايــــــــــد اكف دمع العين
اشوصه ابن شبيب الضامن اسمع زين
گال ان كنت باكي فابكي بس لحسين
البجي اعله حسين هوه الفوز بالدارين

يـوم اقرَحَ جُفوننا
گال اسبل دموعنا
شارَك علي السلطان           دمعي على العطشان
ــــــــــــــــــــ
انصحك بعد لاتعتـــــــرض واتعلم
ماينفع ندم باجــــــــر  اذا تنــــدم
تدري مو دمـــــع يبجي امامك دم
ابجي اوياه وفرح الزهره واتشيم

والمهدي من يستوقفك
بالدمــــــع ثبّت موقفك
خلاني اصير انسان            دمعي على العطشان
ــــــــــــــــــــ

علي محسن الزيادي

گبل عاشور اذا حانت منيتـــــــــي
اعله گبر حسين طوفوني وصيتي
ــــــــــــــــــــ
هاي اوصيتي من گبل المنيه
واجب يهلي تنفيذ الوصيه
من گبل النجف للغاضريه
ودوني اريد اختم هويتي
ــــــــــــــــــــ
روحي ياهلي حق عدكـــم الها
تعرفوني اكثر امن الناس كلها
وي عاشر محرم روحي شلها
ابنكم طبعي تدرونه وسجيتي
ــــــــــــــــــــ

يالتدرون بيش اكضيت دنيــــــاي
وتشوفون حالي امن اشرب الماي
محبوبي الحسين وعشكي واهواي
النسمه المو اله ترفضها ريتي
ــــــــــــــــــــ
كبل عاشور اذا يلفيني موتـــي
ويسكت كبل رفعة الرايه صوتي
اخذوني الكربله يهلي ويخوتي
واريدن رايه مو قطعه اعله بيتي
ــــــــــــــــــــ
يهلي اخذونـــــي للناذرله عمري
بگلبــــي شضامله من جمر يدري
افتحو الجفن يمه وطلعو صدري
ويمه اتذكرو لطمي وبجيتي
ــــــــــــــــــــ
خلو يشوف دمعاتي بعيوني
اه يحسين صيحو وطوفوني
گبل ما لبو فاضل تاخذوني
نزلو اجنازتي ويعرف قضيتي
ــــــــــــــــــــ
حلفوه بالعقيله وگمر هاشــــــم
يسامحني واله يحسبني خادم
وگلوله محرم فاته نــــــــــــادم
أنه الماگلت ياروحي وفيتي
ــــــــــــــــــــ
واخذوني الگمر عدنان ازوره
الخادم يعترف گولو بقصوره
اريده يزيح ظلمة گبري نوره
ومنكر لو اجه ايگله بحميتي
ــــــــــــــــــــ ــــــــــــــــــــ

علي محسن الزيادي

لمولاتي العليله عليها السلام 👇