دم يبن اخوي الغربتك تجــــري العين
بس ماحضرتك ردتك اتواسي حسين
اذكرت حسين      من جرنك
بس الخيـــــل       ماسحكنك
ــــــــــــــــــــ
عمك علي وعيني الك مابطلت مبجــــــــاها
لو سولفتلك غربتي جا غربتك تنســـــــــاها
المر بيك مر بيه واشد من فاركت ضي طاها
واستوحدوني وفاطمه اكبالي الرجس طگاها

غربتك صعبه وحالك بذاك الليــــل
بس يبني كسرة فاطمه اتهد الحيل
ابعيد اعليك         واسمع ونك
بس الخيــل            ماسحكنك
ــــــــــــــــــــ
سهم الغدر ماينحمل اكثر ســهم تعبنــــي
صاباك بس مره لجن مرات أنه مصوبنــــــي
همك صعب بس مو اشد من همي المشيبني
ضُر ماشفت بهلك وانه جتلو ام بيتي وابنــي

اهلك بأمان حسين لمن ذبحــوك
كسرة ضلع خد منصطر ماراووك
ذني اجروح         دم بجنــك
بس الخيل           ماسحكنك
ــــــــــــــــــــ
محتار شفتك وحّــدك مجروح واتدير العين
وانا اليطيح بشده اله افزع ولا اكـــول منين
بس مافزعت بشدتك گلبي انجسملك نصين
تحب الحسين ادري شكثر هالردتك اتواسي حسين

طبع الحبيب ابني حبيبه ايواسيه
ويستلذ بالمَر بحبيبه ايمر بيـــــــه
شفت اسهام       اشكد صابنك
بس الخيل.         ماسحكنـــك
ــــــــــــــــــــ
دارو عليك ومن طحت شفتك خضيب بدمك
فوك الاسر نار العطش وتتمنه فزعــــــة عمك
بروحك اعرفك ماتهم بس ببو الاكبـــــر همك
وارضيت راسك ينگطع والخيل جــرت جسمك

تلجم اجروحك يبني وادري اتأذيك
بس لاتدوسك خلهن ايجرن بيــــك
يجرن بيك وايلچمنــك
بس الخيل ماسحكنك
ــــــــــــــــــــ
يالوفي مااكول اعتذر بالغربه عفتــك وحدك
تنذبح مو مره الف لحســــــين اعرفـك ودك
يفگد اولاده امن اعرفت وديت للطف ولدك
ادريك صبّت دمعتك امنيـــــــه ظلت عندك

گبل الذبح وجه الحسين تشوفه
وللوطن يرجع مايجـــــي للكوفه
فرگه وشوگ حيل اذّنّـك
بس الخيل ماسحگنك
ــــــــــــــــــــ

علي محسن الزيادي

الصاير يمسلم بيك ماصــــار
وعنك حميده اتدوّر اخبــــار
ــــــــــــــــــــ
ضيّعها حضنك عنها مـن راح
الغايب ابـــــوها شلون ترتاح
كل ليله تگضي اتّاني مصباح
وكل مايحل اغروب تحتــــــــار
ــــــــــــــــــــ
اتحاجي امها ساعه وساعه الاخوان
الملگه اويــــــــه ابونا اتكول ماحان
اتضيــــــع السفينه بغيــــــر سفـــان
وابلا ضواها موحشه الدار
ــــــــــــــــــــ
ماتدري بيك بغربه واوحيد
تنطر ترد ماتنطر العيــــــــد
لابد تكول ايعود البعيـــــــد
واتمنتك يوم الضعن سار
ــــــــــــــــــــ
كل بت ابوها اوياها موجود
وحالة حميده اتگطع الجبود
ذل تشبع الوالدها مفگـــــود
ودمعتها تهمل ليل وانهار
ــــــــــــــــــــ
ماشافتك من دارو اعليـــــــك
بس طوعه بالكوفه وفت ليك
ماشافت اخيـــول التجر بيك
جثه اعله سوك الكوفه تندار
ــــــــــــــــــــ
طول الطريج الدربك العيـــن
والكوفه تنشد صوبها منيـــن
ومن وصلت اخبارك للحسين
حبها وبجه وحست بالاخطــــــار
ــــــــــــــــــــ
عن والدج يامن تنشــــــــدين
ايسي انذبح ميعـــود الاحنين
نوحي حميده وزيدي الاونين
بگلبج بعد لاتنطفي النـــار
ــــــــــــــــــــ
ميّت عطش من درت ذبحوك
ومن القصر للگــــــــــاع ذبوك
ذبحوني كون وانت خلــــــوك
صاحت يمن تفديك الاعمار
ــــــــــــــــــــ
علي محسن الزيادي

أنصار سيد الشهداء صلوات الله عليه 💔👇

صوت واحد هاك روحي
امن الزغير وللجبير
ياحسين اجنودك احنه
وماالنه غيرك امير
ــــــــــــــــــــ
اعتذر منك امامي ومن الانصار اعتذر
ابلا قصد من وصفيته البعض منهم بالزغر
تكبر الذره بصحبتك بالزغر قصدي العمر
مو صحبتك فرسك انت النابغه بوصفه يحير
ــــــــــــــــــــ
ابدي من ابن جناده الينحني اگباله الجبل
يوم صاح حسين اميري وصار للعالم مثل
والده استشهد وامه تصيح تفديك الاهل
عايله بحبها وفداها ماكو بالدنيه نظير
ــــــــــــــــــــ
وهب مو بالعرس شاف بذبحه دينه يكتمل
وزوجته اتمنعه وتردله تحشمه والمدمع يهل
وامه مو وجهك تگله دمك العيني كحل
وبالعمد فزعت وماتت سمعتك من تستجير
ــــــــــــــــــــ
ومن برز عابس تغير عدنه مفهوم الجنون
وجون گال حسين رايد گلب صافي وموش لون
وعلمانه ابن لقين الخاطرك كلشي يهون
والصدك لو مثل نافع خادمك لو ما يصير
ــــــــــــــــــــ
وعن ابن عوسجه شحجي وبيش اوصف حبه ليك
طايح وبأخر انفاسه ايوصي ابن ظاهر عليك
واسلم التركي الغيور الروحه فاضت بين اديك
گالك تفديك روحي من عرف ليك المصير
ــــــــــــــــــــ
وهيه مو كل توبه توبه درس والحر وضحه
التايب ابلايه ولايه ماله جنه امفتحه
فرزن الصوت بطلعته ويدري بيك اتسامحه
حر يصير اعرفنه منه اليصبح بحبك اسير
ــــــــــــــــــــ
وانس گال النه اليضحي الدينه مو بس الشباب
حتى لو ظهرك تقوس حتى لو حاجبك شاب
من تشوفه اوحيد امامك اركض واسبگ الهاب
هذا درس الماله ثاني من صحبتك نستنير
ــــــــــــــــــــ
يگصر السان السوالف بعد يم شيخ الشيوخ
عن حبيب العز شسولف تعرف بذكره الشموخ
لون گلبه بلون شيبه من بياضك لونه طوخ
غيره واخلاص وتفاني الگه من كل صوب ادير
ــــــــــــــــــــ

علي محسن الزيادي

لمولاي ابوالفضل عليه السلام 💔👇

يحسين اعزازك
ماظل واحد ماراح
بگد مامتخوصر
ماظلت بيك اصفاح
كلساع بمصرح طايح
شلون وعباسك رايح
ــــــــــــــــــــ
شلون دنيه
العزيز اتذله واتعز الذليــــــل
شلون دنيه
خلت اللي يعدل المايل يميل
اهل الرحمه اشسوت بيــــــهم…اشتطلبهم دين
تكضي امصيبه وتبدي امصيبه… وماتنشف عين
فردتهم ماجمعت ليــــــــــــــــله… بالفرحه اثنين
جم احزام البي متحزمـــــــــــه… بطفك يحسين

كسرت جنحانك
ماخلت ليك اصحــــاب
يمك عباســــــك
وكل شعر الحيتك شاب
بعيونك حزنك لايــح
شلون وعباسك رايح
ــــــــــــــــــــ
ياغربتك
حتى جتالك جرت عينه عليك
ياغربتك
جم عزيز اتگطع وشالنه اديك
ندري اليفكد صاحب واحـــد… يكضيها اونين
شتون الله يساعد گلبـــــــــك… فاكد سبعين
ومايشبه واحدهم واحــــــــد… اخلاق ودين
من عشر اسنين يصيحــــولك… فدوه التسعين

بكل مصرع توگف
من حيلك نص يروح
من وصلت لبنك
طلعت جم مره الروح
مامثلك بالطف نايـح
شلون وعباسك رايح
ــــــــــــــــــــ
ابلايه نگبه
الفاكد اعزازه يبيّـــــــن من بعيد
ابلايه نگبه
من مشيته الوادم اتعرفه الوحيد
يم زينب شيفيد الثامك… حزنك مفضوح
دم هذا البيدك والحيتك… من يامذبــــوح
مثلك هم تعبانه اعيونك… ذبلها النــــــوح
لاتعدل ظهرك واحزامك… هالراح يــــروح

تتشمت كلــها
منتظره تشوف الناس
شيصير بحالك
من يروح العبــــــاس
دمعك ماينضم فاضح
شلون وعباسك رايح
ــــــــــــــــــــ
بيدك امسح
ثگلت وماتحمل اردانك دمع
بيدك امسح
گلب زينب صبّره لا ينصدع
مامتعوده اتشوفك وحــدك… عباس اوياك
من شبگتكم عرفت خصمك… كسرو مگفاك
كلمة خويــــه اتفرحه الفاكد… بس من ناداك
وينك خويه حسين ادركنــي… اعضيدك بجاك

ايوصلك لعضيدك
ظليت اتدور حيــــــــــل
واجدامــــك ثگلن
من شفته اتدوسه الخيل
تسمع بالخيمه الصايح
شلون وعباسك رايــح
ــــــــــــــــــــ
شلون حيره
تموت يمه لو ترد من دون اخوك
شلون حيره
مثل يوم الدار من احتــــار ابوك
جسمه امكطع ردت اتشيله… بس ماينشال
لو شلته ورديت اتشــــوفه… اتموت الاطفال
وزينب شتگلها امن اتنشدك… عن هذا الحال
ولو گالتلك مات الكافــــــــل… وعن اخته اشگال

بيش اتجاوبــها
وانت بكل خطوه تموت
وصيحاتك يَمه
ماخلت عنـــــدك صوت
ذبحك من حالك واضح
شلون وعباسك رايـــح
ــــــــــــــــــــ

علي محسن الزيادي

هاي اول مره زينب ماتعرف حســينها
عينها ابن امج تكلها وماتصدّك عينــها
ــــــــــــــــــــ
هذا اخوها وريحة امها الكضت ويّـاه السنين
همه صح جسمين بس بروح وحــــــده عايشين
اربعه احروف اسم زينب واربعه احروف الحسين
هاي مو صدفه وبخوها ارتبطت بتكوينها
ــــــــــــــــــــ
ابلايه شوف اتعرف اخوها مايعرّفها الوجه
مو شرط يحجي تشمّه اعليــــها لمن يتّجه
حسين جابر مايتيهه شلون زينب تشتبـــه
حسين امانه امن امها عدها وناذرتله اسنينها
ــــــــــــــــــــ
حايره مو هوه گالت لو عيونــــــي ابلا ضوه
حسين ثابت راسه عالي يميل هذا اويه الهوه
لو اخوي اعضيده وينه ليش ماردو ســــــوه
سوه ايردون الهه دوم اخوانها امعودينها
ــــــــــــــــــــ
تنشد النســــؤؤوان عنه وگلب زينب محترك
اتگلها مشتبهه يعينـــــي وخايفه يطلع صدك
بجيته گلبي براحته ايدك صار يرفس مايدك
خاف انا افكدت شوفي اتعرفه سكنه وينها
ــــــــــــــــــــ
اتسابك اويه الريح شفته من سمع صوت الكمر
وليش ماادري تأخّـــــــــــــر عنه خطوات النهر
لو ابن امي ليش محني وليش ايده اعله الظهر
وليش اله بكل خطوه عثره وروحه عالي اونينها
ــــــــــــــــــــ
انا اخته وانا امه ومااعرفـــــه شلون هاي
يصيحلي من يرد هســه ليش ماگلي تعاي
الخيمة العباس سكته ليش راح يريد ماي
طيّح الخيمه وينادي زينب الله يعينها
ـــ
عميه عيني حسين هذا الفاكـــد اهله العذبوه
خويه صاح الا عرفتـــــه فاردينـــه عن اخوه
ماكو شعره بوجهه سوده وشيبه بالدم خضبوه
راح اخوي يصيح زينب جثّته مكطعينها
ــــــــــــــــــــ

علي محسن الزيادي

يبو الغيره ويبن حامــي ادخيله
بظهر اخوك حسين صارت ميله
ــــــــــــــــــــ
جمّع بجفّينك اوصـــــالك يحيد
بعازتك لاتتـــــرك حسينك وحيد
لو كلت لا عين عندي ولا اكو ايد
متن ماسالملك ايتجّيـــــــله
ــــــــــــــــــــ
حاشه ماكولن خلفت اوصية ابـوك
ادري بيهم كطعوك وعذبــــــــــــوك
موش طبعك هذا تكسر ظهر اخوك
وانت تدري حزام ظهره وحيله
ــــــــــــــــــــ
زيح دم عينك اليســـره وبيها شوف
حسين يمك يبجي ويشم بالجفوف
گطّعنّي يصيح ريت انا السيــــــوف
قلّت بطيحتك منّه الحيـــــله
ــــــــــــــــــــ
ماترد للخيمه عذرك ماكــــــــو ماي
بس اخوك شلون ظل ابلايــــه راي
يصيح كوم اسندني لا تكسر كفاي
منحني يمك ودمعه ايسيله
ــــــــــــــــــــ
افه حسين اتشمتت بيـه العده
گالو ايحشّم اخـــــــوه ماگعّده
گضت سالفتــه لمن ظل وحّده
السحك صدره الجيش حضّر خيله
ــــــــــــــــــــ
يالكسرته بطيحتك فاگدله جيش
يبجي ويگلك ارد للعيــــــله بيش
ماگمتلي من صحت عبـاس ليش
شحجي من تنشد عليك العيله
ــــــــــــــــــــ
وحده مامتعوّد ايرد للخيــــــــم
بسيفه ظل يتعكز وحيــله انهدم
يشمّه واعله ازنودك يخلي العلم
هز لواك يصيح خويه وشيله
ــــــــــــــــــــ
حسين مو طبعك يحشمك ماتكوم
هاي ساعة فزعتك مو وكت نــــوم
الجيش لخيامك تدنه وظل يحـوم
وكثر هَم حسين گوم وزيله
ــــــــــــــــــــ

علي محسن الزيادي

برز عبــــــاس       من اربع جهــــات
ذيج الاجموع       سواها شتـــــــات
ــــــــــــــــــــ
گبل لا تبدي الحرب والجيش خوفه عنــده
كلها تدعي من امس بس لا السيف ايجرده
بشده تنخامن بعد هذا ابن راعي الشـــــده
ادخيله اذا غاضب يهد عبــــاس ياهو يرده
فارس جـان     كل حرف بحروفه
وين الجيش.    يفر منه يشوفــــه

الگابلاه دوم     خل ينسه الحياة
ذيج الاجموع    سواها شتـــــات
ــــــــــــــــــــ
حيـــدر الثاني نزل ياهو اليصيــــــر اجبيله
ضيغم وماينكدر وبحيــــــــــدره شد حيـله
زعل والدنيه اظلمت والماي صاح ادخيـــله
الجيش صاح الحل شنو ماتنفع اوياه حيله
انفر من سيف     نلگه خزرة عينــــه
مثل النــــــور      بكل جهه ايلاگينه

يمه الاجبـــال      ماتعرف ثبات
ذيج الاجموع      سواها شتات
ــــــــــــــــــــ
زمجر وطـــاحت زلـــــــم بالجيش بانت خِله
الراسه بعده اعله الجســــد يلگونه ميت كلّه
امن الرعب محد نجه الفارس وفرسه يشله
صوته هذا احسب جثث بتـــــــاره من ايسلّه
من يغتــاض       سيل ينزل عارم
بس بالصوت       يذبح ابلا صارم

يبـــــرد شلون       امحشمته الخوات
ذيج الاجموع       ســــــــواها شتات
ــــــــــــــــــــ
اتراب ماظل بس دمه كربله صارت من كر
وكف عالشط وانگطع عالكــوم درب المعبر
صوته سيفه خزرته يلگاهن اگباله الفـــــــر
طر جمعها ابن الذي ليه حايط الكعبه انطر
بالطف لــــــو         سدت اسكنــــدرها
برمشة عيــن         اخو حسين يطرها

داس الاخشوم       اتريس عالفرات
ذيج الاجمــوع        ســـواها شتات
ــــــــــــــــــــ
هذا سبع الگنطره بصيته تســــولف كلها
يم علي كض شـــــاربه كل مايله يعدلها
اليوم يومه وبت علي هالحشمت كافلها
الحومـــــه ماتعرف بعد اخرها من اولها
من الخـوف       نفس ماظل واحــد
المامگطوع       امن ابوفاضل شارد

هاشمي شلون    عالعيله يبات
ذيج الاجموع     سواها شتات
ــــــــــــــــــــ
الهوه طاف برايته والحومه صارت خنگه
الگابلاه راسه انگطع مالحك جفنه ايطبگه
مايكر اعله اليفر صوته البعيـــــــد ايلحگه
الگالها ابكيفه الاجل گوم ال اميه اتصدكه
مو عبـاس            صاحو اللي يقاتل
عزرائيــــل            هذا بالطـف نازل

اليخطف اعليه       هذا انحسبه مات
ذيج الاجمــوع       سواها شتـــــــات
ــــــــــــــــــــ

علي محسن الزيادي

لمولاي القاسم عليه السلام 💔👇

من صرت وانا احلام اعد واحسبلك ايام
تاليها وي دم منحــرك بدوها الاحــــــلام
ــــــــــــــــــــ
ساعة اصيارك عيد الي وسرّت دليلي
بشدة اگماطك يالولــد شديته حيلي
يتعِب لجن ارتاح الك لو اسهره ليلي
اگضيه سوالف عالمهد كل ليلي ماانـــام
ــــــــــــــــــــ
بيدي امشّط شعرك وتضحكلي عينــاك
احله العمر ياسلوتي خلصتـــــه ويـــاك
منتظره تكبر وانسه تعب الشفته برباك
وبين النســــــــه أتباها بيـــك وارفع الهام
ــــــــــــــــــــ
من راح ابوك ويتّمك خلّالــــي علّه
وكلما يون گلبــي ذخــــر عندك اگله
جاسم اوليدي وكل جرح بيده يشله
يهلال عيدي وحسّبت بيك انســــه الالام
ــــــــــــــــــــ
يوميه اشبر طولك واحلامي تكثــــر
وكلما كُبَرت اشويّه احِن وامالي تكبر
تالي الجمعته بســاعه ياوسفه تطشر
التانيتهن يتحققن شو صـــارن اوهــــــام
ــــــــــــــــــــ
يالبيك اشوفن وجه ابوك اشمحله حسنك
واشمحله طولك جن غصن زيتون غصنك
غير المجازه اعله الربــــــــــه ماردت منك
تاليها بالفرگــــــــــه تجازينــــي يجســــــام
ــــــــــــــــــــ
متفاخره من تمشي اشوفك وي عمامك
وارفعت راسي من گمت لبّيت امـــامك
بس يُمّه من ردوك الي نصيـــــن هامك
كلشي اظلم بعيني ومِلَت دلاّلي الاسهــــام
ــــــــــــــــــــ
ماادري حلم الأم تذبحه الغاضريـــه
وماادري عرسك يبني يتبــدل عزيه
اتبدت الحنه ودمك الحنـــــاها اديه
حلمي وخذك مني الدهر ليّه اشبعد ضام
ــــــــــــــــــــ
ثوب العرس بالدم تخضب ياحســــرتي
من طحت شعلو خيمتي وطفو شمعتي
باجر اشلون اعله الهزل يبنـــــي رجبتي
وياهو اليصد عني الحجر من ادخل الشام
ــــــــــــــــــــ
علي محسن الزيادي

لمولاي الاكبر عليه السلام 💔👇

أستبشر اشما وجه ابوك استبشر
وكلما تغيّــــــــــر گلت راح الاكبر
ــــــــــــــــــــ
رحت وخذت كل امل ربيته اوياك
عيناك اماني وعنـــي راحت عيناك
تدريني مامتعوده يمه الفركـــــــاك
انت التلمني ومن تروح اتطشــــــــــر
ــــــــــــــــــــ
لو بيدي ماسلمتك الجـــف خصمك
وماردت اعطلك خافن ايگُل عزمك
بحسراتي گتـــــلك روح يابعد امك
عن نصرة المظلـــــــــوم لا تتــأخــــــر
ــــــــــــــــــــ
ظليت لاني العدله لانـــي الميته
شگد سولفت وي گلبـي ماسكّتّه
لو مال حملي امعلّمه اتعدله انته
ماهو انت جا بيش الگلب يتصبــــر
ــــــــــــــــــــ
لو عاينت لحســـــين يكثر همــــــي
وياروحي اگلها بحبل صبره اتحزمي
وارجع واگول اوليــــدي ما گال امي
حزنانه لو شافتني راجع تنســــــــــــــر
ــــــــــــــــــــ
واكف اباب الخيمه ابوك ايصدلك
بوجهه تشوفك عينــي واتعاينلك
لحگ عله امك غيـــــــرها مااگلك
محتاره واكثر لو بطيت اتحيــــــــر
ــــــــــــــــــــ
سيدي اتأخر ردت اگله امشيــله
ولنّه التفت ليّـــــــه ونده ياليــله
مهظومه طبي الخيمتج وادعيله
حاطو اوليدج يالغريبه اهل الشـــر
ــــــــــــــــــــ
طبيت وادموعي ملت جف ايدي
ربي صحت بحسين سلم عيــدي
ياراد يوسف رده ليـــــــه اوليدي
مضطره يالماترد دعوة مضطر
ــــــــــــــــــــ
مغمي عليّه امتانيه اتصحينــــــي
وتمسح دمعتي يمه وتحاجينــــي
وافتحت عيني وعمه اتمنه بعيني
وماشفتك امگطع وصل ومعفر
ــــــــــــــــــــ

علي محسن الزيادي

الجانت تشوفه بوجه الحسين
عالثره اموذر شافتــــــه العين
يتطشر اشما رادت اتلمــه
ولا كتر سالم منه واتشمه
ــــــــــــــــــــ ــــــــــــــــــــ
اه ياليلى وحزنـــــــــها وياتعب ذاك الربه
بالشباب اتشد ظهرها وماتطيح امحسّبه
نايبه صار اعله امـــــــــه المنذخر للنايبه
بتسع لشهور وسهرها اتحلفّه واتطالبــــه

تشتاگله لحضات اذا غاب
شتسوي اذا ضماه التراب
متحيّره من ياجهه اتلزمه
ولا كتر سالم منه واتشمه
ــــــــــــــــــــ ــــــــــــــــــــ
ساعة اوداعه عليها اشد من درب اليســــــر
حسين اذا مات بوداعه منيــلها هيه الصبــر
كل حلم عدها اويه ابنها راح واتلاشه العمر
عينها بعين ابو اسكينه خبـــــر مفرح تنتظر
كض گلبه وايگلها يليـله
الخيمتج طبي واندعيله
راح ابني صاحت من طفح همه
ولا كتر سالم منــــــــــه واتشمه
ــــــــــــــــــــ ــــــــــــــــــــ
بعين الحسين المصيبه لاحت ومات الحلم
وبالولد مكروه اذا مَـــر گلب الأم عنده علم
بگد بجيها انغمه اعليها واعله حيل المنهدم
فزت وشافت املها وذر شايلته الزلــــــــــم

ركضت لبنها اتگوم واتطيـح
هذا ابني لا مااصدك اتصيح
جنها انعمت من عاينت جسمه
ولا كتـــــر سالم منه واتشـــمه
ــــــــــــــــــــ ــــــــــــــــــــ
تشوف اليصبّر عليها شابگ اوليده وينـــوح
هذا وكت الجزع صاحت وكشّفت كل الجروح
تشيل وصله اتطيح وصله ليش عن امك تروح
اتگله من تموت يمه جثه اظل ابلايـــــه روح

يحسين امسح بيدك اعليه
بلكي تگله ايرد نفس بيــــه
ويفتح اعيونه ويحجي وي امه
ولا كتــــــــــر سالم منه واتشمه
ــــــــــــــــــــ ــــــــــــــــــــ
جيت من الوطن بيـــــدك بيش اردن للوطن
حسين لو ذبحوه تگله يضيع يوليدي الضعن
غمّضِت ياضوه اعيوني يبني واعيوني عمن
دمّعن والدم عليهن اعيونك اعله امـــك بچـن

يم جسمك الليله بلا انفــــاس
وباجر اگبالي اعله الرمح راس
رادت تشبگه وخافت اتلجمه
ولا كتـــــر سالم منه واتشمه
ــــــــــــــــــــ ــــــــــــــــــــ

علي محسن الزيادي

لمولاتي زينب عليها السلام ليلة العاشر 💔👇

شلون بزينب من تحتـــــرك خيمتها
شلون بزينب من تنفجـــــع بخوتها
تشبع هظم مثل امها
محـــــد بعد يرحمها
ــــــــــــــــــــ ــــــــــــــــــــ
يتغير بليله الحجــــي
تتبدل الفرحه بجــــي
اليتعب بعد ماينتجـي يطيح يطيح
الصيوان اذا دم انفــــرش.
وكوثرهم اينشفه العطش
زينب تظل ماكـــــو نعش تصيح تصيح
ياعلي لحـــــــــك ياعلي
محد بعد غيــــــرك الي
سلبو حســـــين وكافلي ذبيح ذبيح
والجبيره التنولي وتنطگ جبيـره
والمثل عباس عدها شلون اسيره

اتدور الدنيه والغاليه ايرخصوها
اتدور الدنيه والواكفه ايطيحوها
طف كربله تهظمها
محد بعد يرحمها
ــــــــــــــــــــ ــــــــــــــــــــ
بخيـر ويرف كون العلم
بخدورها امأمنه الحرم
يتدنه واحد للخيـــــــم محال محال
لاجن اذا يهـــــــوه اللوه
ومن ينذبح راعي الهوه
ويتهاوه وي زينب سوه الدلال الدلال
النايــــــم بنبـــــله يفـــز
وذل تشبع المتروسه عز
بكل الجفوف اتظل تحز حبال حبال
الهاشميه تنّسي اتصير السبيــــــــه
وينسحك حضن الابو وتسهر رقيه

شيصبرها زينب اذا شافتها
شيصبرها مسلوبه ترچّيتها
تشوف الشمر يلطمها
محــــــد بعد يرحمها
ــــــــــــــــــــ ــــــــــــــــــــ
ماي برمل من تنچفـــــي
اخوتها ويموت الوفــــي
يكبـــــر بعد ماينطفـــــي السعير السعير
وماتوگف الخيمه بعـــــد
لو طيحــو منها العمـــــد
وشلون اذا حومه الجسد يصير يصير
لو ضاع بالخيل الوطـــن
ياهــــو اليلم ذاك الضعن
وشلون لو ذاك الزمــــــن يدير يدير
فاتحه يصير العرس والحنه دم حار
شلون كاروك الطفل من يشتعل نــار

تعله الصيحه امخدرت حيدر طلعت
تعله الصيحه المحد سمعها انسمعت
ودمعتها وين تضمها
محـــــد بعد يرحمها
ــــــــــــــــــــ ــــــــــــــــــــ
يصير الحجي بكيف الشمر
باجر والاجفوف الستـــــــر
لا تظل خوه ولا خـــــــــدر حرام حرام
عكب الضلوع التنطحــــن
يولي الحرم خوف وحزن
بعد الهواشم ياجفــــــــــن ينام ينام
وسفه ربيبات النبــــــــــي
يحرسها واگف اجنبــــــي
بالهيمه باجر والعبـــــــــي خيام خيام
والضحك يعله وتظل تتشمت الناس
من تصيح ام الخدر وينـك يعباس

محد يفزع لو صاحت المسبيــــه
محد يفزع. ويگوم للعلويــــــــــه
اهواي الدهر يحرمها
محــــــد بعد يرحمها
ــــــــــــــــــــ ــــــــــــــــــــ
يوداع الاخوان الصعب
نيران تاكـــــــل بالگلب
وتاليها جم ديـرة غـرب تطوف تطوف
الكوفه تهدل كل چتف
والشام مابيها عــــــرف
تتنطر الحره وتــــــدف دفوف دفوف
ماتنگضي بگطع النحر
زينب يتانيها الحجــــر
ولمن تطب للسوك امَـر تشوف تشوف
باجر ايصير الحجي بس دمع واونين
وبت علي مجتوفه توكــف بالدواوين

من غربتها تتمنه بالطف ميتـــــه
من غربتها. لخوتها تشكي بسكته
الشام اشكثر تظلمها
محــــد بعد يرحمها
ــــــــــــــــــــ ــــــــــــــــــــ

علي محسن الزيادي

يوم العاشر 💔👇

من ذاك الظهر يحســـــين لليل
ماتعبت تدوس بصدرك الخيل
وياك الخدر ضاع        اهنا يالتارس الگاع
تريد تكوم ليّـــــه منيلك حيل
ــــــــــــــــــــ
اخوي الگبل متحل ساعة الموت
عمت عيني شكثر مات
لاشوف العطش خلاك لا صوت
ومشيك كله عثـــــرات
گلبي اعليك فت الصخر مفتوت
وكل انفاسي شوغات
شكثر زتيت وانت ابلايه زاتوت
الليله اعله الثره اتبات

تهوس فوكك ارماح     ولا خلوك ترتــــاح
اسمعنك تون وبراسك تميل
تريد تكوم ليه منيلك حيــل
ــــــــــــــــــــ
مجبوره صحت من هجمت الگوم
حسين الحك عليه
عميه اتمنه كون وگبل هاليــــــوم
خذت روحي المنيه
گمتلي بلايه راس اتطيــــح وتكوم
واشسوّيت بيـــــــه
ساعه تصيح ضامي وساعه مهضوم
وساعه احمي رقيه

عليك اشما تهب ريح    كتر من عندك يطيح
اشوفك تزحف ابّين المجاتيل
تريد تكوم ليه منيلك حيـــــل
ــــــــــــــــــــ
انت الصرت كومه احجار واسهام
اظن لا شـوف ماظل
مابيكم صحت مسلم يظـــــــــلام
خل لبن امي اوصل
اشوف ايدك تأشر كتر الاخيــــــام
ماي اتگلي يحصـــل
لو رايــــــد تلم اوياي الايتــــــــام
وانت امگطع اوصل

اليتامه يجوز تسلم     انت شلون تنــــــلم
عايف روحك اتهم بالمداليل
تريد تكوم ليه منيلك حيــل
ــــــــــــــــــــ
التفت الصخر مستنكينها اعداك
الخيل الساحكاتك
يعبرك هذا يسحك عالصدر ذاك
جنهن طالبــــــاتك
حوافرهن حمر غركانه بدمــــاك
حتى العابراتــــــك
يسألنّي وادنّگ خـــــــاف تلگاك
ويموتن بنــــــــاتك

محد غيري يحمل حالك خويه يكتـــل
من راسك الجدمك دمك يسيل
تريد تكوم ليه منيلك حيــــــــل
ــــــــــــــــــــ
طايح واعله جرة النفس مابيــــــك
خويه اختك تعذرك
ادري اصياحي زاد اجروحك اعليك
وهدّك سلب خدرك
الخيل بگومتك خافن ترد ليـــــــك
وماتكتفي بصدرك
ماتكدر تحاجيني امن احاجيـــــك
حافر فوك نحـــرك

اسكن يابعد عون خل عنك يوخرون
جا شلتك لجن تنلجم بالشيل
تريد تكوم ليه منيلك حيــــل
ــــــــــــــــــــ
علي محسن الزيادي

ابوذيات شهر محرم الحرام 💔👇

مثل طير البلا شجره ولاعش
صرت لا شرب يهنالي ولا عيش
يزهره ابلايه خيمتكم ولاعيش
اشما توسع الدنيه اتضيك بيه

مولاتي العليله ع/
يبويه اعليّه محــــد ليش  مَر سال؟
بطيت وعيني منها اعليك مُر سال
من ازمان الك وديت مرســـــــــال
اتاني وماكو رد اجواب ليه

وحك الرضا الباري مرّضتــــها
بسلْ غيبتك روحـــي مرّضتها
الخيل اعظام صدرك مرضتها
وأنه بداري واحسها ترض بيه

مولاي مسلم ع/
تون گالو واگلــــــهم وني لحسين
اشرِدِت گالو واگولن وين الحسين
گالو تفدي روحـــــك وين الاحسن
گلت بالكوفه گبل الغاضريه

مو مرّه متت لجــــلك مياليت
ولفتني الغايره وعنك ميــاليت
الخيول امقصره جرّتني مياليت
فوگي وكسّرت كل عظم بيه


سيد الشهداء ع مع ابو الفضل ع/

اليلزم ظهره مثــــــلك مايعاني
طحت والحيل اجيلك مايعينّي
علي من صاح بويه مايعاني(اوجعاني)
بكثر صيحتك خويه الحك عليه

يگله  اعضيدك بحيـــــره مناخاك
وذر ماشفتك اعرفتـــــك من آخك
انحنيت وصحت حاجيني  منا اخاك
كوم وخل  تهد اصفاحي اديه

مولاتي زينب ع/
وحك اللي بضربتـــه مايثنّي
اخو مثل ابو فاضل مايثاني
اذا ليّــــــــــه بركبته مايثنّي
كلف رچب الهزل باجر عليه


بوجهه اشجم گلب لاهب بردناه
نشدنه وبيّـــن اضمـــــانه بردناه
مشه ورد يمسح ادموعه بردناه
وينادي راح عباس امن اديه

الكون بيوم عاشــــر ماج ريته
ولا ظل دمع  بالطف ماجريته
سهم عين ابوفاضل ماجريته
خفت لاتنلجم عين الزجيه


ياگلبي اشتكـــــــابر بعد قربان(قُر بأن)
طحت واعليّه يالنسوان قربان
ل الله خل نقدم حسين قربان
وادعنلي الصبح يصبِح عليه


مره احبس دمعتـــــي مره اكتها
گمت واجدامي عثرت من ركتها
اضلوعك خيل اميــــه من راكتها
وصل صوت الكسر بالخيمه ليه


گضه يبن امي دمعك؟ شوبعينك
دمه.  واسهـــام بالطف شابعينك
مَره شبيدي لونّــــي شاب اعينك
وشرط كل السهام تصير بيه


دوه يحســــــين ذاخرتك لهاماي
طحت والهم وصل خويه لهاماي
ساعة ذبحتـــــــك رادت لها امي
تگابلني وعليك انون سويه


اخوي السلبو اعيـــــــاله وماله
ولوني وچفي من التـــل وماله
العطش ماماله عن مهره وماله
سهم الذابح اوليده واخيه


من ثگل المصــــايب حدبينه
ورماد اخيمنه واصل حد أبينه
الذبحكم يابوفاضــل حادبينه
اشتضن واختك عرفني ايحن عليه


حر واعيون ماترحم يصدّن
علينه اوجوهنه ظلن يصدن
حيره اجفوفنه بياهن يصدن
والعيون اكلف امن اسياط اميه


البناتي الماي من جابوه چفنّه
ابوهن ماشرب منــــــه چيفنه
الشمر عكبك يبوفاضل چفلنه
لبن مرجانه ماخذنه هديه


سم اخلاف اخوتي اجرعت مو مر
وعكب عباس صرت انأمـــر ما مُر
بيّه الصار حتـــــــــــى بحلم مامر
بنص سوك وشماته تحيط بيه


الوداع حسين لاظل گلب لا حال
تعبْت ولا بگالي صبـــــــر لاحيل
الهزل جابوها لاظـــل راي لاحل
ومن حبل اليسر مااحرك اديه


ليل انهار گلبـــــــــــي ايلوب ماچن
كلف حيل السده اعله البال ماچان
انعت بالحبل بالســـــــــــوك ماچن
أنه الماشاف جاري اخيال اليه

السيده زينب ع مع السيده رقيه ع//
ابوج الشمر نحره شكثـــر بيداج
وجم حافر ركض للجســد بيداج
هذا حسين ظل بس راس بيداج
موتي اوياه وخل الضيم اليه


ينوگ بعلي امن اتمريـــــن جدماي
خل يسمع رقيه تصيــــــح جدماي
نوبه اتصيح اذانـي ونوب جدماي
ونوبه اتصيح متني ونوبه اديه


بمخاليبه الدهر بالطـف خلبني
صحت لبني حلم واحد خلبني
تمنّيته يزف ابنـــي خال ابني
البنيته انهدم وانذبحو سويه


حرت مرّه تدلّينـــــــــي مردلك
الحافر جم عظم بالطف مردلك
خاف ابلا وداع امشــي مردلك
بكيف الشمر لاتعتب عليه


يقراني امن المّك رايحه اتليك
جم ايه ابسحگهم رايحتـــــلك
اعذرها بليــــل زينب رايحتلك
تودعك باجر تصبّح سبيه


الك وصّلني شوگ الگلب  والشام
اشكيلك امن اهل الشام  والشام
انشدني بالمتن جم ســوط وشم
ولا تنشدني عن خوله ورقيه


السيده رقيه ع //
بخرابه شلون البحضنك تربّات
وعگب چفك وسادتـــها ترابات
مثلك بويـــه ليليـــــــــه تره ابات
بهيمه وراسك الشاهد عليه


لاتنسونا بخالص دعواتكم
الأقل / علي محسن الزيادي
اللهم تقبل منا هذا القليل خالصا لوجهك الكريم هدية لمولاي الغريب سيد الشهداء صلوات الله عليه وبنية تعجيل الفرج وموساة مولاتنا الزهراء عليها السلام