(الظليمه الظليمه من امة قتلت بنت نبيها )

الظـلـيـمـه الظـلـيـمـه .. مـُهـرك ينادي الظـليمه
طاح الحسين يزينب .. سابـح ابـدمـه هضيمه
……………………………

مـُهـرك اتـعـنــه الخـيمنـه سرجـه ملـوي
يصهـل ينـادي الظـلـيمه وصوتـه يـدوي
وانـي محـتـاره يخـويـه شـراح اسـوي
ولـنـه مـُهـرك عـن مـصابـك صـار يـروي

مـُهـرك ايگـلي بصهـيلـه .. لحگـي اخـيـچ يالعقـيله
الگوم اجـته تريد ذبحه .. مصيبة حسينـچ عظيمه
……………………………
گـومـي لحگـيلـه يزيـنب ذاك الحسين
دارت اعلـيـه الاعـادي يخـتـه صوبـيـن
ضعف حيله من الـنزف ميشوف بالعين
عـفـتـه نايـم عالـتـرب سـابـلـها الايدين

بـيـه مـا ضلـت بـعـد روح .. حيل تعبان من الجروح
ومن نزيف اجروحه ذيچه .. خضب الشيـبـه الكريمه
……………………………
عـفـتـه فـوگ الـغـبـره يـتـلوه ولـيـنـه
ومـن جـروحـه يسمـع الشامت ونينـه
يالعـقـيـلـه بالحـجــر صابـو جـبـيـنـه
ونـزل دمـه على عـينـه وطفـه عـيـنـه

عفـتـه اخيچ فوگ التراب .. دمعه وي ادمومه سچاب
راد يزحف صوب الاخيام .. ومنـعـتـه الما عدها شيمه

……………………………
گـالي مـُهـرك اخـيـچ روحي لحگـيه
بالگـلب سهـم المـثلـث منـه طلـعـيه
يالعـقـيـله وبـعـبـاتـچ روحـي غـطـيه
بالشـمـس عـاري يزينـب راح تـلـگـيه

انـي ادلـيـچ امـشـي ويـاي .. ابعـباتـچ سوي الـه افـياي
الشمس تچوي والرمل حار .. وما مش عله حسين غيمه
……………………………
اخـذي لحـسـينـچ عـسه مـن المـاي گـطـره
ولـو لـگـيـتـيـه مـنـذبـــح شـربـيـه بـنـحـره
ولا تـلـچـمـيـنـه علـه كـيـفـچ ويــه صـدره
من السحگ صدره انطبگ يخـته ويه ظهره

بـهـيـده مسحـيله دمـوعـه .. لا تـلچـمـيـهن ضلوعه
بهذا وضعه وفكره مشغول .. بـيچ واطفاله وحريمه
……………………………
وخـاف تـلـگـيـن الشمـر ايحـز وريـده
لا تـگـربـيـلـه تــره اتـسـطـرچ ايــده
روحـي اركـضي للـنهر حشمي عضيده
ولــو ذيــچ الـمـشـرعـه عـنـچ بـعـيـده

روحي حشمي الگمر عباس .. حسين گـليلـه بلا راس
والـزلـم فـزعـت عـالخـيـام .. والحـرم فـرت ابـهـيمه

الشاعر عقيل الحسناوي..
.

ابوذيات نعي لأبالفضل العباس ع

يخويه الرايه طاحت مال اخينه
رحت والگيت جسمه مالـخـيـنه
ومـن مـهـره يزيـنب مال اخينه
بدون اچفوف طاح اعله الوطيه ..

تعـب من النزف حيلـه وگـل باه ـ قل حيله
اشيلـه اشلـون حيرني وگـلبـاه ـ
السهام ابظهر وبصدره وگـلبـاه
رمح نصين طـر گـلبه يخيه..

عله الناگه ودرت وجهي ورايه
شفت جود الكفل طايح ورايه
شني شوره بسبي زينب ورايه
اضل لويرضه اروح اني سبيه..


شني الحصلته من فرگاك وجناي
غير اسياط خويه وسطر وجناي
الشمر من وج خيمنه النوب وجناي
احترگت وليلى گام اطفي بيه.

الامام الحسين ع يخاطب ابا الفضل ع

خبر موتك وصلني وصار علماي
عگبك ياهو خويه يشيل علماي
نايم لا تـضــل عـباس عـالماي
بعـد سـاعـه تـدوس الخـيل بيه..



موتـك خله گـلبي بجـرح يدماي
هدم حيلي وشلـّل صابالي يدماي
طحـت بيدك عـلم عباس (يد ماي)
العـلم والمــاي مـارجـعـن الــيـه..

الشاعر عقيل الحسناوي..
.

يوم ام البنين ع

يالزهره اعذريني .. بـبنـيـني .. راحو فـدوه الأبنـين
ريت انـي علـويه .. ومسبيه .. وي نسوان الحسين
اعـين العـقـيـله
بمحنها الطويله .. واحـرسها بالعـيـن
……………………………………

يافاطمة اسمعت الخبر ولسه بحزن مفجوعه
گـالـو عـزيز ام الحـسن امـهـشمـيـن اضلـوعه
يافاطمة وروحي احس من الجـسد مـنـزوعه
وياريت راسي المنگطع ولا رگـبـته المگـطوعه

يوم الخبر جاني .. ولسه اني .. اسكن ماتم النوح
انـصبلـه تعـزيـه .. لـيــلـيــه .. لمـن تـطلـع الروح
اهـيـم ابـمـناحي
واذوب ابجراحي .. كـل هاي السنين
……………………………………

عذريني يا ام الحـسن وياچ احـس امقـصره
ياريت مـو بـس اربعـه بالطـف بنـيـني عشره
والخيل تسحگـهم سوه وعاـفت عـزيز الزهره
شماضحي لبنـيـچ ولــد مـا وافـي فـضلـچ ذره

خـالقـنـي الـچ الله .. وما اسوه .. يالزهـره ابــلاياچ
كل عمري واسنيني .. وابنـيني .. بكل الغالي نفداچ
لخدمتچ وجودي
اوفـي ابـعـهودي .. يبقـه العهد دين
……………………………………

يا ريت ويـاهـم رحـت واخدمهم ابشيباتي
ياريت من ذاك العطش ارويـهـم ابـدمعـاتي
وسوط الشمر بيه يطگ ولا طگـهن ابنـياتي
يافاطمه وحـرگ الخيم هـو سبب مأسـاتي

من حرگـو الخـيمه .. بالهيمه .. طلعت اخت الحسين
ما تدرين وين اتروح .. للمذبوح .. للمگـطوع الايـدين
يگـلـبـي التـعـذب
عله حيرتها زينب .. كـل هذا الاونين
……………………………………
يافاطمة وگـلـبـي انـمـرد لمـن سمـعـت اعلـومه
گـالـو حبـيـب المصطـفى غـارگ ابفـيض ادمومه
عـطشان نـايـم عالـتـرب ومـسلـيـبـيـن اهـدومه
وخيل العده بصدره ترض وجسمه تطش بالحومه

يا فاطمة لظـهـره .. مـن صــدر .. نـازل حـافـر الخيل
الحافر شلع روحه .. من اجروحه .. ماضل بي بعد حيل
حبـيـبي وعـذابه
ذبحـنـي مصـابه .. مگـطوع الوتـيـن
……………………………………
يافاطمه وابـنـي الـبـچـر راعي الوفه والنوماس
عيونه انطفت عالمشرعه ويلي انفطر منه الراس
وياوسفه اخـته ابغـيبـته اتـشـمـتـت بـيـها الناس
وبكـل ديـواويـن الـغـرب ينـشـدوها عـن العباس

چا وين ابو فاضل .. والكافل .. خـدرچ يالعـقيله
اليبرالـچ ابـعـيـنـه .. چا وينه .. بهالسفرة الطويله
بهذيـچ الشماته
بهـضيمه خواته .. وين الگـمر وين
……………………………………

ويا هضمة الماعدها اخو لـمـن تـطــب للـديــوان
ديـوان مـتـروس بـغـرب وشماتـه زلــم او نـسوان
زينب تـطر وسفـه الزلم يعاينها ضل ياهـو الچـان
اي هاي اخت المـنذبح عالشاطي واخت العطشان

بـيـن الزلم صعبه .. بالغربـه .. شلون الطاهره اتفوت
يالشام وخرايبها .. متحبها .. وتـالـي بـيـهـن اتـمـوت
هـضيمه وظلـيمه
الخرابه الها خيمه .. ويـه النساوين


الشاعر عقيل الحسناوي..
.

يوم العباس ع

گوم ارجع يا خويه  وياي .. لا تـكـسر ظهري
عبـاس  اخـلافـك دنـيـاي .. حافـرها بصدري
بانت للعسكر خلـتي .. خلافك ما ترحم دنيتي
…………………………………………
گـوم  ويــاي  يا عبـاس  اروحـن  فـدوه للخـوه
لتخـلـينـي بـيـن اعـداي  اكـابـر  عالجـرح  گـوه
وحگ عين الطفتها ادماك  وراس الينزف امروه
قـلــة  حـيلـتي  هــسـه  وظـهـري أنـكـسر  تـوه

ياعباس الحگـني وگـوم .. ياخويه اسندني
بعدك ساعة وهاي الگوم .. راح.  تـفـرهـدني
يصير المصار ابجـثتي .. خلافك ما ترحم دنيتي
…………………………………………

يبو فاضل يروح حسين  تره حسينك صفه بحيره
شيسوي الاخـو مذبـوح   ومـا عنـده  اخـو غـيـره
ياهـو بـولـيـت العــدوان   يفــزع  للاخـو ايجـيـره
بمـثـل هالشـده ياعباس  يبـيـن  كـل اخــو خـيـره

بس هسه اني ابلا خوان .. وحـدي ابـلا ناصر
تـتـشمت  بـيـه العـدوان .. محضريلي الحافر
متشمته الناس ابغربتي .. خلافك ما ترحم دنيتي
…………………………………………
گوم ارجع لعد زينب  تراها عليك قلقانه
گـلبها خايف ومرتاب  تصهر بـيـه نيـرانه
اخلـيك وارد اشلـون  الها وهي عـطشانه
شگـللها كـفيلچ مات  وبين الغربـة خلانه

ياعباس وصعبه هواي .. من دونك ارجع
ترجع الها تجيب الماي .. زينب  تـتـوقـع
بهل موقف حيره حيرتي .. خلافك ما ترحم دنيتي
…………………………………………

شگـل لسكينه ياعباس  العطشانه وتريد الماي
شگـللها انـذبـح عالماي  يا عبـاس اريـدن راي
شگل لام الرضيع اهناك  سولفلي يخوي بهاي
وحگـك حيرتي حـيـرة  وما ينقاس ابد بلواي

كـلـها تـريـدك يا عـباس  .. تـرجـع  تـرويـها
واني الحاير افر بالراس .. شلون ارجع ليها
ياخويه چبيرة مصيبتي .. خلافك ما ترحم دنيتي
…………………………………………
اذا ارجـع واعـوفـنـك  السلامة اعليه اقـراها
بعد ساعة يبو فاضل  الرماح بصدري تلگاها
فوگ الجـثة حافر خيل  وحافر خيل جواها
وتلگـه حجار والتربان  هذيچ الجثة غطاها

ياعـباس تـشـوف  الخـيـل  .. اتروح وترجع
وماضل من احسينك حيل ..  تلگاني مگطع
ومن دمي حمرة شيبتي .. خلافك ما ترحم دنيتي
…………………………………………

اذا عـوفك يبـو الغيره   خـيمـنه مـا يخـلـوها
يسلبوها ويـهـدمـوها  وعله الخـدر يحرگوها
وبنات الزهره ياعباس  يخويه الگوم يولوها
يشتموها ويضربوها   وخواتـك راح يسبوها

يصفن راح ابلايه اخيام .. ياخـويه الخدر
ويسبوهـن لديـار الشام .. بوليت هالعسكر
وهامك وياها وهامتي .. خلافك ما ترحم دنيتي

الشاعر عقيل الحسناوي..
.

ابوذيات للهلال
الظهر مثلك يظل يهلال يَـنـحان ( ينحني )
وتظل اعيوني عالخـــوّان يَـنـحان ( ينوحن )
اطيحن طير جن مكسور يَـنـحان ( جنحان )
مِـتِـت بس ظلت الانفاس بيّـــه
** ***
شهر الاحزان والـهَـم طل علينه ( بان وبزغ )
وغياب المهدي ياذي طل علينه ( طال )
بجاه احسين يا رب طلعه لينه ( اظهره )
يشافي اللّي انسحكَـ بالاعوجيّه
* * **
عَـسـنّـه اهـلال حـــزني اللـيـله مـنـشـــاف ( ماشفته )
ودمع عيني اعله اخوي احـسـيـن مـنـشاف ( ما نشف )
حكَـه يـنــوح لـيــــل انـهــــــــــار مـنـشـاف ( اللي شافه )
شلـــــــــــــــــــــون من انذبح بالغاضريّـــه
** * ***
لخادم اهل البيت (ع)
حسام الناصري

نعي للرايه
رفعنه الرايه الك ويّاها الف دمعه
نريد نواسي زينب وأمّك البضعه
مصابك بالكَلب ما ينتهي وجعه
كل نبضه ويخلي بي اثر صدعه
وكلما تخفكَـ الصوت الذي نسمعه
ألا من منتظِـر للثار والطلعه
** * ***
على كل بيت علـكَـنه وحسينـيّه
الك راية حزن خفاكَه يوميه
الك جمرات مستعره بوسط رِيّـه
الك كلشي نعه وتسمع نعاويّه
شمقدمين الك ودموعنه شوّيه
وانته من الجروح الف وتسعميّه
* *
اجه عاشور والخدّام متحزمه
خل يشبع صدرنه الماشبع لطمه
الف حسره الك بينه والف هظمه
ناس اللي تظن ننساك متوهمه
اليرزفه الله خدمتك عايش بنعمه
والحظه ردي ما ينرزق خدمه
** * **
عهد كل عام نرفع هاذي رايه ( راية )
ولا نـقـبـل بـكـلمن هاذي رايه ( يهذي بالرأي )
ها نـتـكَـطّع اوصل هــا ذرايه ( نـتوذّر )
ولا نـتـرك شـعايـرنه الابـيّـــه
** **
لخادم اهل البيت (ع)
حسام الناصري

نعي للهلال مع رباطات هوسات

اشوفن بيك آه ودمعه وحسره
واشوف لخاطري يهلال كسره
عليك انظر وأحسّن توجع النظره
احس ضلع الزجيه يعود الي كسره
ومثل حيدر زماني راسي يطبره
بعيد الماي اشوفه ونار مستعره
نيران اخيامي مجريها ... ولهبة دلاّلي اشيطفيها
* * ***
اشوفك قوس ترمي سهام جتاله
اشوفن بيك حيرة ودمعه همّاله
اشوف احسين ظامي هوّه وعياله
ومصايب تنرسم واحزان تتواله
اصير ليا وضع ياظيم يا حاله
وتطيح اعله الشريعه جفوف كفّاله
لا جود اليرجع لا مايه ... ولا صوت البفزع لا رايه
** ***
شهر ما بيك بس مصايب و احزان
وأجناب التحاوطني وبلا وليان
لا اولاد يمّي تبقه لا خوّان
بس صوت اليتامه وحسرة النسوان
بين الخايف ومرعوب والعطشان
وبنات ازغار بيهن جوية النيران
هاي الشافت سوط وخافت ... هاي التركض ذيج الطاحت
** **

مقدمة الليلة الاولى
~.~.~.~.~.~.~.
لخادم الحسين (ع)
حسام الناصري
اوّل لـيـلـة بالـغـربـه ... و دمـعـها زيـنـب تـصبّه
* * ***
غـريـبـه والحـزن لـمـها بـعـيـدة عـن وطن أمها
نعم إخوتها هل يمها لجـنّ الـفـركَة هَـم صعبه
* * ***
تـشـوف هـلال غـربتها وتصب مدرار دمعـتها
تـصد لـوجـوه إخوتها قُــربـة مـن قُــربــة
* ***
قريبة ويبعد الملكَه وتقره بكل وجه فركَه
وكَلبها ينبض بحركَه ويناجي بالصبر ربّه
* * ***
هذا أوّل مسه و حنّت و كَعدت ناحت و ونّت
شلون بغربه لو ظلّت بعْد العاشر و حربه
* * ***
عليها اخوتها ملتمّه زلم للنخوة متحزمه
تِـطَـيْـب الخاطر بكلمه بنظرات الحزن تربه
* * ***
تكَلهم لا تخلوني صور تبجيكم عيوني
اريد جفوف بمتوني اخاف من الدهر ضربه
&&&&&&&&&

شهر المصيبة
~.~.~.~.~.~.
لخادم أهل البيت (ع)
حســام الناصري

بزغ شهر المصيبة وبيّـن اهلاله
* * ***
لاح اهلال المْحـرّم على الأكوان
وبكل عين هـلّـت دمعة الاحزان
على حسين وعلى اولاده وعلى الصحبان
القـدر حـتّـم عـلـيـهـم بالطف آجـاله
* * ***
الدمعه ويـا بدَت والحسرة واللوعه
ورايات الحزن هالليله مرفوعه
حُـسيْناً وا حُـسيْناً صرخة مسموعه
تهـزّ العـالم وتـتـصدّع اجبـاله
* * ***


طلع وسط السمه الهلال هـاللـيله
يجدّد ما جره اعله حسين والعـيـله
ومواساة الكَلب بالنوح يـبـديـله
الجفن من دم على مصابه الدمع ساله
* * ***
يكَول أتـذكّـر بهالليله وأتـألّم
ضعنهم من نزل وبهيبته ملتم
وأبو فاضل نصب بجفوفه المْخَـيّـم
وياهـيـبة ضعن متواجدة ارجاله
* * ***
شفت الأكبر محمد بي يشوفونه
وكَف والغيرة نار اتلوح بعيونه
ويكَول احنه الكَصدنه الموت وفنونه
ولا نقبل تصير الذلّة ابداله
* * ***




وكَف جسّـام يحلف بالحسن عوده
لأخلّي كربله وعملتهه مشهوده
بطل ومْنِ المراجل والهِـمَم زوده
العزم لايكَـ عليه والهمّة تفصاله
* * ***
وشفت زينب تكَلهم لاتعوفوني
اجيت اوياكم وإنـتـم تـردّوني
تراني كل قهر ما تحمل متوني
ولا أحمل طريق الشام واحباله
* * ***
ونسألكم الدعاء

راية نصر
~.~.~.~.~.~.
لخادم اهل البيت(ع)
حسام الناصري
رايــــة نـصـر وإيـمـــان رفّـت على الاوطــان
اتـسـولف قـصص أحـزان مـــــن هَـل مُـحـرّم
* * ***
على كل قـمّـة شهكَت بالعلو رايه وتـشـاهـدها الخلكَـ بعيون بجّايه
مثل قـرآن يـنـشـر آيـه والآيــه يسولف عن نصر ونحور و دْمايه
قرآن وقريناه رددّنا كلنه وياه
زينب واحـسـيـناه مـــــن هَـل مُـحـرّم
* * ***
رايه للنصر لاجنها ملجومه وعلامات الحزن وآلام مرسومه
تستذكر مآسي العاشر ويومه والرايد يغالط بالحكَـ اتلومه
ظـلت طول الايام وترفرف بكل عام
وبكل حسرة وآلام مـــــن هَـل مُـحـرّم
* * ***
صبر كَـد الحزن بيها انرسم تلكَـه يتامه وفاكَـدات وخيم محتركَـه
دموع ونايبه وزينب وألم حركَـه وخيل اعله الجسم تتراكَـض اتسحكَـه
من ترتفع رايات تسمع صده الآهات
وزينب تجر حسرات مـــــن هَـل مُـحـرّم
* * ***
انتصر بيها النحر والدم على سيفه وراس اعله الرمح عالي وأخذ حيفه
فضح كل ظالم وجائر على زيفه بـكـيـفه اليـقـتـنع والما قـنع كـيـفه
كل رايه تسولف دَيْــن ظل خالد دم حسين
شد حيلك وإجري العين مـــــن هَـل مُـحـرّم
* * ***
تِـرِف وتـكَـــــول إنظرو لحالتي يانــاس
عِـليت ومارضيت أخضع وأطخ الراس
أنا اللّي ما طحت من طاح جف عباس
مدى الايام لازمني يظل بإحـســـاس
من جف عباس الزود وأتنطّر الموعود
وأحسبله يمته يعود مـــــن هَـل مُـحـرّم
* * ***
مثل كَلب الموالي الرايه مـنـتـظره يجي يـعـلّـيها بيده قائم العتره
مرفوعه وتظل هالرايه منتصره وكلما ترتفع توحي وتجي إبُـشره
اتبشّـرنه بالاخبار وإتقرّب يوم الثار
وتترقب الانظار مـــــن هَـل مُـحـرّم
* * ***
ونسالكم الدعاء

راية حزن
~.~.~.~.~.
لخادم أهل البيت(ع)
حســام الناصري
راية حزن لاحت ... ترفرف ولا طاحت
لـبّـيْـكَ يــا حُـسَـيْـن ... بصوت الألم صاحت
* * ***
اهلال المصايب منوِلِد بأكــوانه
ينشر حزن عالــعالَـم وأركـانه
بيه السـمـاوات الـسـبِـع حـيرانه
وأهل الارض ويّه الأرض حزنانه
بلوُن المصاب ايهِلْ ... ويفجع اكَلوب الكِلْ
والدمعة من كل عين ... بصوت الألم صاحت
* * ***
الليلة الحزن يبدي بشرح آيــاته
ومن كل منارة ترتفع رايــاته
عـرش الجـلالة نـسـتـمـع آهـاته
وتنزل على الدنيه مطر دمعاته
وبكربله تسجد ... وبأي ذنب تنشد
عالغبرة مذبوحين ... بصوت الألم صاحت
* * ***
كل راية يحسين المُـحِب يرفعها
ويّـاها حسرات الكَلب تسمعها
عيونه لمصابك دم تهل مدمعها
وحتّه الجبال بصرخته يصدعها
وينادي هالليله ... من يسمع العيله
يا كربلاء البين ... بصوت الألم صاحت
* * ***
بيعتنه هاي الليلة جدّدناهه
وإعله العهد كلمة شرف كَلناهه
هاي الشعاير باقية ومعناهه
بس رايتك فوكَـ النجم شفناهه
كل راية تتغـيّر ... بس رايتك تكبر
خفّـاكَه هاي اسنين ... بصوت الألم صاحت
* * ***
انته الحبيب اللّي جمع عـشّـاكَه
وبمصيبتك يـــا سـيّـدي تـتـلاكَه
مـشـتــاكَه تبقه للـلّطم مـشـتــاكَه
بحسرة وتموت لمجلسك وفراكَه
يا هيبة المأتم ... بيه الشمل يلتم
خدّامك بكل حين ... بصوت الألم صاحت
* * ***
هالراية إيد الثار بس تحملها
كلما تميل الدنيه جن تعدلها
جن باب خيبر محّـد اينزّلها
ومنتظرة للمهدي يجي ايبدّلها
وتنادي يا وعدي ... لـبّـيْـكَ يا مهدي
منتظرة ثارك وين ... بصوت الألم صاحت
* * ***
ونسألكم الدعاء

إسمي الخادم
~.~.~.~.~.~.~.
لخادم الحسين (ع)
حسام الناصري
ما تِـهـمـني شـما تـكَـول الـوادِم ... وأفـتـخِـر يـحـسـين إسـمي الخــادِم
* * ***
سيّـدي من زغري وإبديت أخْـدِمَك وأحضر لمجلس عزاك ومأتـمك
ألـطم ودمعي اعله خدّي يرسِـمَك وكل وكت ودمعي لمـصابك سـاجِـم
* * ***
لو نسيـتك أنسه روحي وأنـصرِع ومن أذكـرك كَـلبي بالهَـمْ ينصدِع
أسمع بطاري إسمك إيـصُمّ السـمِع ولو شِـفِـت رسـمك أظـلّن هـايِـــم
* * ***
لو نِـمِـت بالّـلـيل أشوفـنّـك جرِح ينزف من ادْماي ويظل منـفِـتِـح
وإنته جرح العين اذا صار الصبِـح يعني انته بعـيـني صاحي ونـايِـم
* * ***
آنه خـادم من كَـبـل لا أنـوجِــد انته وحـدك سـيّـدي وآنه الـعـبِـد
ما رِدِت تـعـتـقـني عنّـك وأبـتـعِــد انته حُـرْ وآنه عـبـدك لازِم
* * ***
بعالم الذَرْ والـكَـلب لِـسْـمك عِـشَـكَـ بنار حُـبّـك ذايب وبيها احترَكَـ
ما تِـهـمني شما حِجِت عنّي الخَـلَكَـ وما تِـهـمـني بـيـك لـومَة لايِــم
* * ***
أبـكًـه مجنون بهـواك وأعترِف وحتّه عن الناس بـجْـنوني أخـتـلِـف
هذا يا مجـنون ما شـايـف ولِـف وبـاكًي بـحـبّه وغـرامه غــــارِم
* * ***
والله لو كـلـها علـيّه تـعْـتـرُض خِـدْمِـتـك فرضي ولاعـوف الفـرُض
حـتّه لو يـنـطوني كـنوز الأرُض بْـلا مُـقابِـل أبـقـه أخـدْمَـك قـاسِــــم
* * ***
للخدامة اشْـكُـبـره اسمه اللّي وِصَل وما أعـوفَـن خِـدْمِـتـك مهما حِصَل
خـــــادِم لخـدّام خِـدّامَـك أظَــل وأصغـر الـخـــــدّام والله العـــــالِم
* * ***
ما أخاف بموتي باجر ما أهِم وبْـهـويـتي خـادم احـســــين الاسِم
موقّـعـه ومخـتومه من أمّـك خـتِـم يعـني ما أحـزَن ولاظَــل نـادِم
* * ***
ونسألكم الدعاء

خادم واكَظي سنيني
لـخادم اهــل البيت
( حسام الناصري )
خادم واكَظي سنيني ... خادم واكَظي سنيني
* * ***
آنه اللّي خدمت حسين من صغري
واتمنّه اكَضّي بخدمته عمري
يظل شمعه حياتي وشمعتي بكَبري
سلطان بخدمته صاير بقدري
الوادم كلها تدريني . . . خادم واكَظي سنيني
* * *
طيف مصابه دوم معاشر عيوني
وصور طف كربله مطبوعه بجفوني
جنّيت بخدمته وراضي بجنوني
ولاعوفه لون كلهم يلوموني
خِدمته دَم شراييني . . . خادم واكَظي سنيني
* * *
تظل ناره لهيبه وتسري بظلوعي
ويظل دم المحاجر يجري بدموعي
اذكره بكل نَفس من همي ولوعي
وأشعل كل سنيني بخدمته شموعي
وعهد مابينه وبيني . . . خادم واكَظي سنيني
* * *
كثر ما الهج بأسمه نسيت اسمي
ولكِيت حروفه بالشريان وي دمي
ونسيت همومي صار حسين كل همّي
وخيال احزانه يمشي اخيال وي جسمي
وتايه بيه تلكَيني . . . خادم واكَظي سنيني
* * *
احضر بالمجالس وانحب والطم
وافتر بالمواكب سيّدي واخدم
المنبر كعبة اطوفه وبالسواد احرم
اذا ما اخدم بكل يوم متندم
مديون واسد دَيني . . . خادم واكَظي سنيني
* * *
اصيح وخلي كلها تستمع صوتي
واعلن خدمتي بكل صوتي وسْكوتي
عساه يحضرني ساعه سكرتي وموتي
ومن ذنبي خفيف ايصير تابوتي
ابليل الوحشة يلفيني . . . خادم واكَظي سنيني
* * *

خادم للحسين
* * ***
لخادم الحسين(ع)
حسام الناصري
خادم للحسين ... كـــــاتب اعله جبهتي
خادم للحسين ... وأبقه ماضي بخدمتي
من المهد حدّ اللحِد ... وبالخدمة هاذي معتقِد
وأبقه ماضي بخدمتي
* * ***
هاذه عهدي من الصغر امعاهده وناذر نذر
وماأخون بعهدي وماخذ قراري
كل حياتي والعمر لخّصتها بهالسطر
خادم حسين وخدمته اتظل شعاري
بالرخاء وباليسر بالشدايد والعسر
أخدم بكل وقتي وليلي ونهاري
وماأطالب بالأجر رايد بيوم الحشر
آخذه وبالمحشر ايصير افتخاري
وابرفعة الراس ... وكل حياتي منوّره
وابرفعة الراس ... أبقه دنيه وآخره
وأتمنّه يحسبني عبِد ... وبالخدمة هاذي معتقِد
وأبقه ماضي بخدمتي
* * ***
حبّه ساكن بالكَلب وخدمته نور الدرب
شلون اعوف النور وأبقه بدنيه ظلمه
صعبة اعوفنه صعب وإسمه بوْريدي يصب
والوريد شلون يحيه بدون دمّه
أرتجي منّه الكَرب صرْت أذكره ويالشرب
ظامي وايروّيني لو من ذكره أظمه
امحارب اليعلن حرب ولليحبّه آنه حب
وخادم ازغيّر أظلّن لليخدمه
وإمقدّم الروح ... بس قليله الروح أحِس
وإمقدّم الروح ... وباذل الدم والنفِس
وامضحّي بهلي والوِلِد ... وبالخدمة هاذي معتقد
وأبقه ماضي بخدمتي
* * ***
اليمشي دربه مايظِل ماشي بدرب العدل
وآنه ماشي بدربه مااغيّر طريقي
بحبّه مجنون العقل وابجنوني مو سهل
عاشكَـ وإسمه يظل أول عشيقي
شلون من حبّه انتقل وعن خدمته أنفصل
تنفصل روحي وتفاركّني بشهيقي
لو ألف مرّة انقتل روحي منّه ماتمِل
لو تِمِل كَلتلها ياروحي أفيقي
عايش بالأحداق ... والفكر هم شاغِلَه
عايش بالأحداق ... بكل نظر أتأمّله
وعالخدمة هاذي أنحِسِد ... وبالخدمة هاذي معتقد
وأبقه ماضي بخدمتي
* * ***
ياملاذي ومأْمني يللّي حبّك مفْتني
أفدي روحي ودمَي ليك وأفدي كلشي
وماأذلّ وأنحني بكل زيارة أعتني
طاير بأشواكَي مو عالكَاع أمشي
عزمي لا ماينثني لوأموت وأنْفني
حتّه لو يرجع على الاكتاف نعشي
وبطريقك مدْفني وكَبري يصبح مسْكني
يعني سلطان آنه اصير وكَبري عرشي

متْمسني النار ... اتراب زوّارك كَبر
متْمسني النار ... تسكَـ إعليّه وتمر
وبكَبري فايز وأنسِعِد ... وبالخدمة هاذي معتقد
وأبقه ماضي بخدمتي
* * ***
ونسألكم الدعاء

(( خدّام الحُسين )) لخادم اهل البيت
حسام الناصري
* * *
نرفع الهام .. خدّام الحسين
نبكَه خدّام .. خدّام الحسين
* * *
احنه خدامك يبو اليمه نظل
والف هنياله لخدمتك من وصل
ومانعوفك سيدي مهما حصل
هم شفت شريان من كَلبه انفصل
وفصله اعدام .. خدّام الحسين
نبكَه خدّام .. خدّام الحسين
* * *
بالخدامه بعالم الذر والعدم
وانتقلنه ابين اصلاب ورحم
نمشي دربك ماتزل بينه الجدم
خل يلومون بخدمتك من خِدَم
يخسه من لام .. خدّام الحسين
نبكَه خدّام .. خدّام الحسين
* * *
ارضعنه درّ محبتك وي اللبن
وطيّب المرضع فليغيّره الزمن
وتجري بعروك الدمه حروفك سرن
بخدمتك باقين بالسر والعلن
نعلّك وسام .. خدّام الحسين
نبكَه خدّام .. خدّام الحسين
* * *
عنه مجنونين كَالت هالبشر
مو كَبلنه للنبي كَالو هجر
لان وصه كتابه والاثناعشر
واللي خالف للنبي سالك سقر
واحنه كل عام .. خدّام الحسين
نبكَه خدّام .. خدّام الحسين
* * *
مانهاب الموت نمشي لكربله
بالمنايه نصيح اهلا يا هله
لو ندوس اعله الجمر نتحمله
بالمسير نواسي سبي العايله
ونحمل الآم .. خدّام الحسين
نبكَه خدّام .. خدّام الحسين
* * *
خل تدنكَـ الروس كل العادتك
ينمحي ويروح ذكرك رادتك
وشيعتك ظلت وفيّه شيعتك
وظلت اترف عالخلايق رايتك
نرفع اعلام .. خدّام الحسين
نبكَه خدّام .. خدّام الحسين
* * *
منك اتعلمنه درس التضحيات
وعلّمتنه انعيش احرار واباة
العاش بالذل يعني معدوم الحياة
واللي بعز مات ابد مو بالممات
انعيش اكرام .. خدّام الحسين
نبكَه خدّام .. خدّام الحسين
* * *
مانخدمك خوف من نار الجحيم
ولا طمع يا سيدي بجنّة نعيم
لاجن امصابك يبو اليمه اليم
وما نعوف الخدمه لا والله العظيم
والعَـزَه دام .. خدّام الحسين
نبكَه خدّام .. خدّام الحسين

احلى خدمة
~.~.~.~.~.~.
لخادم الحسين (ع)
حسام الناصري
محلاها ويه احسين الخدمه
* * ***
كل خدمة مو حلوة وذلّـه بس ويا حسين تصير احله
اسمك عالي وصيتك يعلـه ويا محله الخادم من اسمه
* * ***
محلاها الخدمة بكل ساعه بيها لله قُـربه وطاعه
والمايرضه يسد اسماعه ويكرمنه لو يـغـلـق فـمّـه
* * ***
كَـالو عن هالخدمة بُـدعه ومأثــوم اللي بيها يسعه
تجاوبهم هالعين بدمعه كل حرف من اسمه بي لجمه
* * ***
يسوه تخدمه القـدّم نحره يسوه تذكره الداسـو صدره
يستاهل كلشي ابن الزهره قـدّم لله روحه ودمّـه
* * ***
مـكَضيه الدنيه وخلصانه وبس هاي الخدمة الربحانه
لحسين اخـلصله وإتـفانه وإتواضع وإبـذل كل هِـمّه
* * ***
خل يـقـوه بالخـدمه ايـمانـك لا تـتـكـبّر فـوكَـ اخـوانك
بس احسين يظـل عنوانك خـدّام وكلها مـتـحـزمه
* * ***
خل الزهره تسجّل اسمك خادم والاملاك اتخدمك
والوادم تـترحّم لأمّـــك وتـدعي للـوالـد بالـرحــمه
* * ***

قرآن الخدامة
~.~.~.~.~.~.
لخادم خدام الحسين (ع)
حـســـام النـــاصري
إخـلـص إلـهه وتـِنْـفِـتِـح بـيـبـــــانـهه
خـدمـة احـسـيــن الـتـواضع شــــانهه
* * ***
يـللّي قـرآن الخدامة اترتـلّه المنبر آيه والتواضع بسمله
الخدمة أخلاق و درسهه بكربله عالنهر نازل وحي قرآنهه
* * ***
كون توزن كل كلام و تِحْسِبَه التقرَه بي والتِحِسّه وتِـكْـتِبـَه
وكون بأحزان القصيدة امْحَجّبَه وزين تاخذ بالك من ألحانهه
* * ***
مـنـبـر احـســيـن الـيـصعْـدَه ما نِـزَل
يـبـقـه إسـمه حتى لـو هـوّه رَحَـل
كون قدوة وبالخُـلُـق مَضْرَب مَـثَـل
وكـون يحذر دنـيـتـه وشـيـطــانـهه
* * ***
عالي المنبر يريد اليعتلي كل تَـكـبُّـر منّه لازم ينجلي
واللّي يـتواضع يرفعه الله العـلي
اتصير شخصيته المجد عنوانهه
* * ***
بالـخـدامـة إخـلـص وقَــدْمِ الـنَـفِـسْ
هـوّه هذا الـمـنـبـر الـيــــوم وأمِس
وكون من اللّي مِضَوْ ماخـذ دَرِس
ولا تـكَـول أموات نِـنْـسَـه أزمـانهه
* * ***
شـوف يـاسـيـن وخَـدِمْـتَـه الصادقه
نـال أعظم مـنزلة وبيـهه رَقَــــــه
كَـال يـحـســيـن بـضمايـرنه وبَـقَـه
صوت الاجـيال و نـشـيـد إلـســانهه
* * ***
وهاك إخذ عبدالرضا وصوت النجف
صاحْـلَـه المـنـبــر أعِـد لـمّن هِــتَــف
يـقـره زيـنـب يا غـريـبه ودمعه جَف
وزيـنـب بـهاذي بِـجَـت لأحـزانـهه
* * ***
ولـو شِـفِـت دمـعـات بـخـدودك جَـرَن
يعـني سِـمعَـن صوت مـن ملا وطَـن
يردّد بـ ( رحنه بضعينه ) بكل شَجَن
والـظـعـيـنه تـنـوح كل نـســــوانـهه
* * ***
وللـمـنـاحة وللـحـزن كَـــــوم إسـتـعِـــد
وتـسـمع بـحـمـزة الـزغيّر مـن يِــرِد
كَــلّي يالـمـيـمــون وإيـكَـــلّه أعِــــــدْ
خـيـمـه روحي وماطـفـت نـيـرانـهه
* * ***
ولو رِدِت من تخدم بطور الأسه
إكَصد طويريج عندك مدرسة
حجي جاسم جان عامر مجلسه
يقره ( آيبني ) بنغم أشجانهه
* * ***
ونسألكم الدعاء

كلنه خدامك

فـــدوه لجدامــك . . . كلنــه خدامـــك
ومانعوفك سيدي حد المنيه
ومانعوفك سيدي حد المنيه
* * * * * * *
ابعالم الذر والعدم لجـلك شهدنــه
وعالخِدامه وياك خطينـه عهدنــه
سرنه دربك والرياح تسير ضدنه
وللمنــيــه ويــاك مانخلف وعدنه
انته بدمـــانــه عايــش ويـــانـه
وانتـــه نبض كَلــوب كــل الجعفريّه
ومــانعوفـــك سيــدي حــد المــنيــّـه

احنــه بصلاب الرجال وشفنه دربك
وصرنــه برحــام امهات اللي تندبك
ويلحـليـب الطــاهـر اتغـذينـه حبــك
وانتمينه من الصغر لصفوف حزبك
لسلمـــك نسالــم لخصمـــــك نخاصم
وما تهمنه شماتكــول الناصبــيـّـه
ومـــانعوفك سيــدي حـد المنــيـّـه
***
شفنـه بـــالفطره السليمـه وبـالفراسه
عدنـــه واقــع حـال مو عِلم ودراسه
خادمــك سـلطان يمشـي ابيــن ناسه
يعني كل خادم لبس تاج اعله راسـه
والكــــل تخــدْمَــه بــــسم ابـو اليـــــمّه
وصــار اسمــك عالصدر شلناه هويـــّه
ومـــانــعوفـــك سيــدي حــــد المنيـــّـه
* **

موبدينــه كَلــوبنه مــولاي تهوَه
سيدي وارواحنه نرخصها فدوَه
إلنه صايــر بالوفه العباس قدوَه
وهـوّه للخدام امير اعليــنه هوّه
قائـــد انشوفــــه وفّـــه بجــفوفــه
ومــــانوفيـــلك ابد يبن الزجيـــــه
ومــــانعوفـــك سيــدي حد المنيــه
* * * *
احنــه جبرائـــيل علمنــه الخــدامه
من نزل هزمهدك وصارت علامه
خدمتــك بـــالدنيه توفيـق وكرامــه
وباجر النه اكبر شرف يوم القيامـه
انخـــدمــك وتــامر ونــفتــخر بــاجر
وبــــالشفاعــــه تكرم الخادم هديــــه
ومـــــانعوفــــك سيدي حد المنيـــــه
* * * *
حتـــه مـن بعد الممات احنه نخدمك
بعالــــم البرزخ نظل نصيح بسمــك
نريد تحضر يمنه واحنه نروح يمك
بلكـــي نستاهل نشوف الزهره امك
وتلــتــم الشيــعــــه وامــرك نطيــعه
وبــالجنان تصير خدامــــك سريــــه
ومــــانعوفـــــك سيدي حــد المنيـــه
* ***
ونسألكم الدعاء
لخادم اهل البيت (ع)
الشــــــــــــــــــــاعرحســـام الناصـــــري

موسم الخدمة
~.~.~.~.~.~.
لخادم اهل البيت(ع)
حسـام الناصري
هل محرّم وابتدت احزانه ... وموسم الخدمة يظل عنوانه
* * ***
هل محرّم والخدامة اتوسّـمَـت ووصلت لذروة معاليها وسِـمَـت
كَامت الخدّام ليها اتزاحِـمَـت كلمن وموقعه ظل ومْـجانه
* * ***
كلمن محزّم يحضّر موكِـبَـه ورفعو الرايات بالعِـز والإبـه
والمدامع ( ياحسيناً ) تكتِـبَـه ولبست ثياب العَـزَه دنيانه
* * ***
لبست الخدّام إيثار العزه اتسابكَت بالخدمة والكل فايزه
والتـقـبله الزهرة هي الجائزه يشعر بتوفيق حُـسْـن ايمانه
* * ***
يشعر بتوفيق كل واحد خِـدَم الحِـضَر مجلس لو نعه لو بس لطم
واليحس كَلبه عله حسين انهظم واليهل ادموعه عالي شانه
* * ***
هذا موكبنه ورفعها رايته بي مجانين الحسين بخدمته
عدهم اخلاص وتفاني لحضرته كالمخيّم بالكَلب نيرانه
* * ***
عاهدو الحسين هالليله بعهد ما يتركون الخدامة للأبد
بالاهل يفدونه والمال وولد وجيل يتبع جيل كل ازمانه
* * ***
ونسألكم الدعاء

سلطان الخدامة ( گعدة)
~.~.~.~.~.~.
لخادم أهل البيت(ع)
حســام الناصري

سـلـطــان ... بالـمـحـشـر تـجي بـتـاج الـخـدامـة
و تـتـخـطّـه الـسـلاطـيـن ... وإسـمـك خـادم احـسـيـن
بالـمـحـشـر تـجي بـتـاج الـخـدامـة
* * ***
الدنـيـه هاي أيّـام تـكَضي ويـنـتـهي ويـاهه عـملهه
لا تـغـــرّك لا تـخـدعــك بـالـك و تـبـقـه بـأمـلــهه
مـو إلـك مـخـلـوقه هـيّـه و إنـتـه مـا مخلوق إلهه
بـاجـر وراك انـته أجـل والآخـرة اتـريـد العـمل
مـشـروط عـدّ الله انـقـبَـل وترجع اللّي ما قِـبَـلهه
و هـنــاك ... يخلَـص من خِـدَم بيت الرسالة
جامع دنيه والدّين ... و إسمك خادم احسين
بالـمـحـشـر تـجي بـتـاج الـخـدامـة
* * ***
إخلص ويالله بحياتك بكل عـمـل وإشـما تِـقـدِّم
صح تصوم و صح تصلّي بس تجي ذنوبك تهدِّم
لا تـجـامـل بـالـعـبـادة وتـكَـعـد بـنـفـسـك تـقـيِّــم
هـاك الـدرب يا صاحبي مـقـبـول تصبح انـتَه بي
إخـدم أهـل بـيـت الـنـبي وإشـكـثـر ما تـكـدر إخـدم
رادود ... شاعـر _ تـلـطـم وتـخـدم مـواكـب
و لو تـغـسـل امـواعـيـن ... و إسـمـك خـادم احـسـيـن
بالـمـحـشـر تـجي بـتـاج الـخـدامـة
* * ***
خِـدْمـتـك لـحـسـيـن بيهه ادروس وأخلاق ومعاني
الـخـدمة إخـلاص وسـماحة الخـدمة إيـثار وتـفـاني
طـيـب وإحـسـان وتـواضع لا تَـكـبُّر على الـثـاني
إتـنـافَـس نـعَـم في خـدمـتَـك وإبـدي لـخـوك امـحـبّـتَـك
بـالـك تـنَـزِّل رتـبـتَـك مـــن تـفـاخـر آني وآني
الـخـدّام .. سـادات وتصيـر انـته عـبـدهُـم
اتصير اجْـبـيـر بالعـيـن ... وإسمك خادم احسين
بالـمـحـشـر تـجي بـتـاج الـخـدامـة
* * ***
يـالـتـمَـسّـكْـت الـخـدامة لا تـضيّـع هـالـوسـيـلة
هاذي رحمة وهاذي نعمة وهاي توفيق وفضيلة
لا تـكَـول اشـويّـه هاذي تـكـبر اشـماهي قلـيلة
ينهان من يخدم بشر يصبح ذليل ومحتقَر
بس خدمتك بيهه الفخر خدمة احسين الجليلة
هنيال ... من يـتـسـجّل بـدفـتـر إمـامـه
بأسـماء الـمُـخـلْـصيـن ... وإسـمـك خادم احـسـيـن
بالـمـحـشـر تـجي بـتـاج الـخـدامـة
* * ***
إسـمـك اتـسـجْـلَه دمِعْـتَـك مـن تـهـلـهه بـالـمـآتِـم
وعالصدر نـيـشـان عـنـدك لو جـنـت لحـسـين لاطم
بـس حُـسـيـنـيّة صفـاتـك بـالـفـعـل والـقـول لازم
هـاذي إلـك بـاجـر ذخـر واجـب تـنـفـعـك بالـكَـبر
ومن توكَف بيوم الحشر تـوكَـف بـعـنـوان خـادم
أنـهـار ... بالـجـنّة وثَـمَـر أجـرك تـنـوله
والـولـدان والـعـيـن ... وإسـمـك خـادم احـسـيـن
بالـمـحـشـر تـجي بـتـاج الـخـدامـة
* * ***
عـــوّد اعله النوح كَـلـبـك يِحيَى لو الكَـلـوب ماتـت
باجـر هـنـاك الـمـجـالـس اتشوفها بكل جنّة صارت
ومـوكـب الخـــدّام يـنـزل هـيـئـة التـطـبـير فــاتـت
وتنادي حيَّ اعله الدمَه
وتـطـبّـر ويـاها السـمَه
اتواسي الزجيّة فاطمة
والمصطفى وحامي الحمَه
و زينب على الخد لاطمه
وتـحـضر رقـيّـة مـألّـمَـه
وحته عرش الباري يحزن ... يبجي لحسين ومصابه
* * ***
ونسألكم الدعاء