#القاسم_بن_الحسن_ع ٤
_ - _ - _

رمله تعاين عالولد يا فتشة العين
صارت ييمه زفتك بين الصواوين
___

آ يالولد...تارسني حب _ نبض الگلب...بسمك لهجته
لعمرك ردت...زفة عرس _ يل بالنفس...تضوي شمعته

يالنورك ايضاهي الگمر يا ايه بس ابلا سور
تربات گلبي و السهر يا ذخر السنين

صارت ييمه زفتك بين الصواوين
____

وي كل صبح .. چنت انتظر _ كل العمر .. انظر شبابك
ماچنت اظن..يفرغ حظن _ تصبح حزن..بالطف عذابك

كل تعبي يصبح عالترب نايم ينبضات الگلب
منين و اجتني هالحرب يا جاسم منين

صارت ييمه زفتك بين الصواوين
____

أول حلم .. طولك اصد _ مثل الورد .. انفاسك تفوح
تعب الصبى .. نور الحسن _ هذا الزمن .. رايدها الجروح

تاليها بالدم حنتك و عمك دموعه بزفتك
مو بالهلاهل عمتك بحسرات الونين

صارت ييمه زفتك بين الصواوين
_

حنه وعرس...چانن حلم _ صارن سهم...صوبلي گلبي
لون البياض..احمر صفى _ بچفك غفى..وعيوني تربي

يوليدي نايم من وگت دونك ألف عام اكبرت
روحي و ضنايه قدمت وسط الميادين

صار ييمه زفتك بين الصواوين
_

اترف ولد .. گدما ترف _ صوت النزف .. يذبحني سمعه
يالمنچتل .. حظني فرغ _ چفني نشغ .. ما باقي دمعه

يالغافي بحظان الرمح أنشاف بغيابك جرح
جاسم ينسمات الصبح مگطوع الوتين

صارت ييمه زفتك بين الصواوين
____

ميت وصد .. بلكت ترد _ كثر النشد .. يا ييمه اريدك
يمك متت .. گلبي عرج _ ماتت مهج .. ابحزة وريدك

كل جسمي عگبك يرتعش والترب صارتلك نعش
تفداك رمله من العطش و اسوالف البين

صارت ييمه زفتك بين الصواوين
____

رمله غدت .. مثل الشمع _ ذابت دمع .. لمن عفتها
بلايه احد .. راح الضنه _ ضاع الهنه .. الفرگه عشتها

بعدك مثل خيمه احترگ يالعاهدت ما نفترگ
گلبي بعد ما ظن يدگ فارگله غالين

صارت ييمه زفتك بين الصواوين





حسين الأمين

#القاسم_بن_الحسن_ع ٥
_ - _ - _

اشعلوله الشموع الليله حنته
يزفه حسين و تهلهله عمته

گمر يعمي النواظر يضوّي الحومه باچر
___

أنه امه إلي چنت منتظره عرسه
ازفنه حلم و أنتظر شمسه
عمامة والده بعرسه البسه
و اشوفن كل بنينه و يعلى حسه
حلم چان اعله بالي و صار هسه
استحاله من بعد ما انطه نفسه

اروحن بالحلم لارض المدينه
اهني المجتبى و ادري يجينه

الحسن ندريه حاضر يضوّي الحومه باچر
_

قبل ليموت وصه الوالد اعليه
گال القاسم بعرسه احنيه
اجي لارض الطفوف بدمه الاگيه
احظننه و اشربنه و اداويه
افاخر بيه دوم و راسي اعليه
و يجي وياي جده و يفتخر بيه

يگله شلون طعم الموت يبني
يجاوب انچتل أخره يلني

لذيذ و طعمه ساحر يضوّي الحومه باچر
__

اجه مغتاض يمي و لبس درعه
حرت ما بين ازفه لو أودعه
يحارب من نزل صوته نسمعه
آنه إبن الحسن وراث البضعه
يناظر عمه حربه و ذرف دمعه
يگول بهل الحرب تطفالي شمعه

سمع أدركني صرخاته يعمي
احتار احسين أشوفه بدربه معمي

ركضله بدمعه حاير يضوّي الحومه باچر
___

طبع ماخذ من ادلال المضايف
يفورن من دخل للحومه واگف
كلمن شافه چن الحسن شايف
يرد لصحابه يتراكض و خايف
يشبه جده حيدر بالسوالف
و يشبها القاسم بوگت الگلايف

بگطع شسع النعل ذل العساكر
سبع تالاف فارس باقي حاير

نزل شدها يكابر يضوّي الحومه باچر
_

جاسم بالحرب بيّن عناده
ما يقتل شرط بس إلا قاده
خلاهم چثث كلمن تماده
نص الجيش بيمينه اباده
رجع يوم الجمل بالحومه عاده
مثل ضربات أبوه بسيفه اجاده

وصل للمشرعه و خيم عليهم
ظنوه الگمر لبسوا عبيهم

مثل عمه يفاخر يضوّي الحومه باچر




حسين الأمين

#ليلة_علي_الاكبر_ع ١ ( بداية مجلس )
______

رحيلك فجعني عماني و كسرني
___

يا وجه طه النبي يا لون حيدر
يا ذخر لحسين يا شريانه الابهر
يا كياني و عزتي يا گلبي و أكثر
انهدم حيلي ابمشيتك يبني الاكبر

وجودك عمادي بخطوتك تهدني
رحليك فجعني عماني و كسرني
____

تحد سيفك وانه احد للنوح عيني
تلبس ابدرعك وانه ألبس ونيني
بخيمتي بعدك لچن ذابل حنيني
من رحت مو ماي اطش بعدك سنيني

سكونك وقارك جمالك أخذني
رحيلك فجعني عماني و كسرني
______

بخطوة اجدامك من الخيمه منيتي
يا هواي ابلا هواك اتموت ريتي
لمن ودعتك عليه طاح بيتي
أنغمى اعليه و بدت ساعة رزيتي

وداعك دهاني يمن ما تركني
رحيلك فجعني عماني و كسرني
___

بحربك انه منغمي اعليه نصيبي
و گلبي يدعي ربي رجعلي غريبي
لنّي افزن من منامي و بنحيبي
الگه راسي بوسط حظنك يا حبيبي

ضحكتك يغالي تهودلي وني
رحيلك فجعني عماني و كسرني
_____

يمه من فزيت شفتك فرحتني
مو بحظنك انته لازم وسط حظني
احظنت راسك و المواجع فارگتني
علي يبني امروتك لا لا تهدني

اخذها سنيني إذا تمشي عني
رحيلك فجعني عماني و كسرني
____

لحظه لان صوت الابو فطر دليله
يا علي جدك طلب منك تجيله
أنظر احسين اعله ابنه انهدم حيله
استعدي للنواعي گلي ليله

كلامه سطرني و أخذ گلبي مني
رحيلك فجعني عماني و كسرني
____

شويه لن رديت مشيول الخيامك
اچفوف ابيك شالتك مطبوره هامك
اموذريك شلون لموهن عظامك
يا علي مو للذبح للشم أيامك

ييمه بمشيتك المصايب ولني
رحليك فجعني عماني و كسرني





حسين الأمين

#علي_الاكبر_ع ٢
____

علي هونك ييمه لا گلبي تلچمه
نحرك خل اشمه و اشبع شوف منك

ابمشيتك للمنيه خل وجهك عليه
و اشبع شوف منك
__

من تمشي اعله كيفك يبني و بهونك
انظر طولك و اشبع من عيونك
كل لون الجمال انصاغ من لونك
وحدك نازل و ماكو اليشبهونك

چنت وحدك يغالي تضويلي الليالي
ابمشيتك شوف حالي ومتظل روح بعدك

و بدموعي الجريه خل وجهك عليه
و اشبع شوف منك
___

يالوجهك بدر و بليلنه ايلالي
بعد موتك فقط بس موتي يحلالي
حسرات و مدامع تصبح احوالي
يالتباريني بعدك نوحي يبرالي

الريتي انته انفاس بروحي عايش احساس
خوفي اسيوف هالناس لتذبحك حبيبي

اجروحك كون بيه خل وجهك عليه
____

يبني يا ذخر شيبي و تعب عمري
گاع الطف رادت ينكسر ظهري
المنيه اتحزمتلك و انهدم صبري
بعد عيناك ادفن ضحكتي بگبري

من أتنام يبني يروح النوم عني
و ارافگ يمه وني و افارگها حياتي

و اشوغ بكل مسيه خل وجهك عليه
____

گلب الأم على اوحيّدها شيصبره
إذا حست جرح هاللحظه ينتظره
و بعد ساعه تنظرك عيني عالغبره
و يجيبك والدك وذره بكتر وذره

مو بس جرح مجروح اشوفك يمه مذبوح
و بيه ما تظل روح روحي اوياك ترحل

و ادگ راسي بديه خل وجهك عليه
___

ساعه و لن رجعت امن الحرب و الحال
السيوف اموذراتك حتى ما تنشال
الطمت وجهي و صحت يا روحي و الدلال
ليش ارسومك امخضبيها دم و ارمال

شفتك و انعمه الشوف شعملت بيك السيوف
اجتني امنين الطفوف و ضيعتني يالاكبر

اخذت كلشي ليه خل وجهك عليه
و اشبع شوف منك




حسين الأمين

#علي_الاكبر_ع ٣
__

كربله لو يثرب الشاهده متعجب
طه طلع من الخيم
مو گمر بل اكثر النبي لو الاكبر
هوى على اعتابه النجم
____

يا حيره خيمه لو جبل حوه
الطالع هذا يا هوه من خيامه
يا حيره الجيش اتعجب و شايف
بالحومه النبي واكف هل امامه

طَلَعَ الْبَدْرُ عَلَيّنَا كُلُّهُمْ هَتَفُوا
أ طَهَ أُمْ عَلِيًّاً كَانَ فِي الْغَارِ
أ هَلْ فِي الطَّفِ عَادَ الْمُصْطَفَى حَيًّاً
وَ مَا شُبّهَ لَنَا فِي الْخَلْقِ اسْرَارِ

طلع من خيمته ضوّه السماوات
و قراله حسين عن العين آيات

حرّزه بچم سوره و يمنته مشهوره
مثل علي سيفه حسم
بحومته من كبّر النبي لو الاكبر
هوى على اعتابه النجم
_

بخطواته طگ ظهر الارض جدمه
ماخذ من علي اسمه هم ضربته
بخطواته الفكّر يوصل احدوده
رد يابس مثل عوده من خزرته

عَدَا التَّحْدِيقَ فِي عَيْنَيْهِ كَاذِبَتًاً
كَأَنَّ الْخَوْفِ مِنْ عَيْنَيْهِ قَدْ وُزِّعْ
وَ سَيْفٍ فِي يَدَيْهِ كَأَنَّهُ نَارٌ
سَلِيلٌ مِنْ فَقَّارِ عَلِيٍ الأنْزَعْ

من يغتاض سيفه يگطع الراس
و يبخر الماي من زفرات الانفاس

من وصل للحومه ضربته معلومه
الگصد رجع راسه انجسم
يرتجف العسكر النبي لو الاكبر
هوى على اعتابه النجم
____

بالحومه صال و شايل الحاسم
موج بحربه متلاطم بالبساله
بالحومه متبختر ابن غانم
نازل للحرب عازم القتاله

يُعَدْ بَكْرٌ بِأَلْفٌ مِنْ فَوَارِسِهِمْ
فَلَمَّا قَدْ رَأَى عُمَرَ عَلِيَّ اسْتَصْغَرْ
فَكَانَ الْحَرْبُ بَعْدَ الْأَمْرِ نَاتِجَهَا
بِكَفِّهِ حَامِلَ الرَّأْسَ عَلِيَّ الْأَكْبَرْ

بعد عج الحرب من هدأت الناس
علي الأكبر رجع لحسين بالراس

قاتله بكل همه وانتصر من عزمه
شايل رجع راس و علم
بالحرب هم قسور النبي لو الاكبر
هوى على اعتابه النجم
____

للخيمه رد الوالده بنصره
طاحوا همه عالغبره من شبگته
للخيمه طب لن ينظر الامه
مغمي اعليها يا هظمه وهل دمعته

دُمُوعًاً مِنْ عَلِيٍ نَهْرِهَا جَارِي
لِرُؤِيتْ أُمُّهِ كُلَّ دَمْعِهِ صَلَّى
أَحَسَّتْ فِي لِظَاً شَوْقٌ يَرْمِضُهَا
فَذًّا وَجَّهُ عَلِيًّاً قَدْ رَأَتْ لَيْلَى

ظناهه شبگته و همستله كلمات
ييمه حيلي كله بفرگتك مات

يا ضوه احلامي يا تعب أيامي
الحزن على عيوني انرسم
ابفرگتك اتحير النبي لو الاكبر
هوى على اعتابه النجم
___

عاف أمه ودعها بدمع عينه
و رد يفديهن اسنينه للشهاده
عاف أمه ينصر والده واجب
و طب الحومته ايحارب وبعناده

قُلُوبُ النَّاظِرِينَ أَتَتْ بِلَا قَدَمٍ
جَمَالُ الْخَلْقِ فِيهِ كُلِّهُ جُمْعًا
فَمَا إِنَّ هَلَّ حَتَّى كُلُّهُمْ هَرَبُوا
أَذَاقَ الْجَيْشُ مِنْ ضَرَبَاتِهِ هَلَعًا

واگف مثل جده ابيوم الأحزاب
و يتخيّر ابسيفه گطع الارگاب

المعركه ضيگها و رايته ركزها
گطع رگب كسر صنم
بصولته يتبختر النبي لو الاكبر
هوى على اعتابه النجم




حسين الأمين

#ليلة_علي_الاكبر_ع ٤
____

علي علي يا حلاة اسنيني
علي علي وحدي لتخليني

ما أعيش ابلا هواك كلشي بالدنيه فداك
_

يا سر هوه ريتي و ملامح وجهك انفاس
انته النفس و انته النبض ماليني احساس

يالناوي بهجرك تلجمني كلبي ما يتحمل
بعيونك نظرات اموادع جنك رايد ترحل

علي علي طمنه دلالي
علي علي والله شاغل بالي

يمه ما عندي سواك كلشي بالدنيه فداك
_

يبني قبل لا تمشي خلي نحرك اشتم
و اشبع من اعيونك قبل لا تنترس دم

خل أحفظ وجهك بعيوني يا بلسم لجروحي
و انته المثلك ما يتوادع كون اتضمك روحي

علي علي يلي عمرك آيه
علي علي حسّبت تجايه

للكبر ظني رجاك كلشي بالدنيه فداك
____

لحظات عمري ناطرت حد ما صرت شاب
للشوف الله خالقك مو لجل الاتراب

يالساكن كلبي بخطواتك ايذوب اوياهن صبري
يا فتشة عيني ابلا ضيك يخلص ظلمه عمري

علي علي الكلب نبضه اعزازه
علي علي عازتك يا عازه

ظلمه عمري ابلا ضواك كلشي بالدنيه فداك
____

عين اعله فكدك يا علي و عين اعله الحسين
صديت اله و شفت الهظم بعيونه الاثنين

ماشفت حسين ابهالحاله مخنوك ويتحسر
يالفكدك ماخد كل حيله هوايه اعليك اتغير

علي علي ما شفت نظراته
علي علي حاير بدمعاته

خايفه ايموتن وراك كلشي بالدنيه فداك
_

صوت الحسين استنصرك يا يمه يالحيد
بكصتك نبض عرق الغضب و الحومه الك عيد

صوب الحومه اتعنه بسيفك يل من جدك زودك
بضرباتك يحتار العسكر واملي وبدي بجودك

علي علي هيبتك نوماسي
علي علي بحربك ارفع راسي

للخلود أثبت خطاك كلشي بالدنيا فداك





حسين الأمين

#عبدالله_الرضيع_ع ١
_ - _ - _

ماتت دلول المهد والجفن غافي
ما اكعدك ياعلي نوم العوافي

وليدي نايم عالرمح يضوي لو غاب الصبح
___

جنت انتظر طول العمر
منتظرة اشوف سنينك
آ يالولد هذا المهد
فارغ يظل چا وينك

ماعندي غيرك ياضوه عمري وتعب سنيني
يافتشة عيوني علي تتركني من تجيني

چنت منتظره الولد يوگفلي خيمه
ماچنت اظنك ياعلي تمر بيه غيمه

كون لا طاب الجرح يضوي لو غاب الصبح
__

بطول المسير انه احير
ست اشهر يگتلونك
بعدك رضيع اترف صريع
بالترب طايح لونك

شفت الكبر من انحفر وگطعوا نحر ضنايه
فوك الرمح راسه غفه مو طفل جنه ايه

بهيده مشيكم لا يفز من هذا نومه
الله لا ينطي الشمس غيرت رسومه

ريت وياك انذبح يضوي لو غاب الصبح
___

عمرك شمع عمري دمع
و النبله چانت فرگه
ما جنت اظن يبرد حظن
و اشتاگ يمه الملگه

چفي يهزن بالمهد و اتذكرك يغالي
بنومي و گعدتي يالولد ما ترحل اعله بالي

يالعمرك بعمر الشمع لا تمشي عني
ذاخرتك لشيب الگبر موتك فجعني

ما يلچمك يبني الشرح يضوي لو غاب الصبح
____

چبير الجرح خشن الرمح
يلچمني من ايجرحك
شدوا حبل بجرح النبل
خافن تكع من رمحك

نبتوا راسك بالرمح وانه انظر شبديه
شفتك تون من الألم وانه انغمى عليه

چنت تبجي بالحظن وانده يغالي
هسه تبچي عالرمح والحظن خالي

يا وكت گلبك يشح يضوي لو غاب الصبح
___

كلبي انمرد سمعت الولد
تجري دمعته بكيفه
بحالي شجره من منحره
ما ينكطع نزيفه

للراس واصل هالرمح وانه بدمع اناظر
من شفت عبدلله بچه بكلبي ترض حوافر

ذابلات من العطش ذيچ المعاني
عبدالله ما تگعد بعد موتك سباني

موتي بعدك يتضح يضوي لو غاب الصبح





حسين الأمين

#عبدالله_الرضيع_ع ٢
___

هوه مو هوه كل خطوه انظر للرمح
منخطف لونه وعيونه مو مالت ذبح
___

كلما التفت صوب الرمح يلچمني جرح
نبلة منحره
عبدلله تره نحره ترف مو مالت نزف
ست اشهر تره

شكد حاولت اصد عنه
بس مشتاكه اشبكنه
هلبت لو نزل مره ردت من ابني شبكه
من رمحه نزف دمه
و المتبدي شيلمه
بوجهي يبتسم و انه انهظم بكليبي حركه

يافرح روحي وجروحي ياوجه الصبح
يا تعب حظني كل ظني مو مالت ذبح
__

برمحه ما ثبت نحره يكع ومن دمعي نكع
كل الدرب اليسر
من كثر الجرح وجهه دمه وشفته من الضمه
صارت تنفطر

راسه ما ثبت خطوه
كلسا عالارض يهوه
راسه ازغير وخشن الرمح كدما يلجمه
شدوا بالحبل راسه
و بنحره الرمح جاسه
واصل حد لهاته و النزف ما خله دمه

اسمع اهاته شهكاته ما يكفي الشرح
ميت وشفته يا ونته مو مالت ذبح
_

حظني يالولد فارغ صفه وجفنك من غفه
عيشني السهر
انظر وجنتك كلها دمه وعالخد لاطمه
يولدي بقهر

ما تنزل يبعد أمك
خلي لهفتي اتضمك
ما فاركته حظني من اديه الايد الحسين
هسه برمحك انظرلك
ماكو چف اليحملك
نايم عالرمح يلي جنت مهدك رمش عين

ما برد صدري يا عمري بعدك يتضح
يخلص ابنوحي يا روحي مو مالت ذبح
____

امشي والدمع مني رسم لوعات السهم
ذابح ركبتك
من خالي رجع چف والدك عني بعّدك
انطاك العمتك

ساكت رجعك يبني
اميه شربك ظني
ماكو امناشغك ثاري السهم كاطع لهاتك
عالهزل وانه اتصور
تلجم كطعة المنحر
كون انه المتت يبني كبل ساعة مماتك

وانه عالهزل اتخيل نحرك ينجرح
ريته ذابحني موش ابني مو مالت ذبح
___

بعدك ماكو ظل عن الشمس ولا تهوه النفس
وانته منجتل
ست أشهر كضه منك عمر وانه بهالگدر
عندك ارتحل

يا عيشه بعد تحله
و رايح مني عبدالله
ماتت كل دللول المهد بعدك يغالي
ادعي كون اجي يمك
يلي ما سلم جسمك
رضّوا بالرمح وانه الذبح بعدك هنالي

انهظم بيها امن احجيها مي عنك يشح
هظمة الهظمه يايمه مو مالت ذبح





حسين الأمين

#ليلة_الوادع ١
_ - _ - _

يلا يزينب يختي ودعيني
من يا كتر باچر تشبگيني

بالطف تشوفيني جرح والراس مشيول برمح
يلا يزينب يختي ودعيني
____

اگعدي يختي خل نتوادع بدمعه
باچر عالصدر بس خيل متربعه
خل انسولف شمحلاها هالجمعه
زينب حتى طفلي باچر انودعه

خلينه نحچي يختي خلينه
باچر على الغبره تشوفينه

يصعب يزينب كل شرح والراس مشيول برمح
يلا يزينب يختي ودعيني
____

خليني اسولف يختي و اتسمعين
ماريد بدمعتچ للعدو اتبينين
و هونچ لو ركضتي خايف تعثرين
و عالتل يختي باچر ذبحتي تشوفين

هونچ يخيتي بالدمع هونچ
خايف عالتل تنعمي عيونچ

من الگفه يختي انذبح والراس مشيول برمح
يلا يزينب يختي ودعيني
___

باچر لو ركضتي من الحرگ بالبر
خوفي لا تلمحچ نظرة العسكر
استعدي يختي باچر عينچ التسهر
من تتكفلين ايتام و الخدر

بالچ يزينب بالدرب بالچ
باچر عساكر و أنتي الحالچ

ياذني متنچ منجرح والراس مشيول برمح
يلا يزينب يختي ودعيني
___

احچايه أرد اگلچ يا بعد عمري
لتصدين عينچ من يرض صدري
و لتصيحين بسمي من يحز نحري
و لتمسحين دمي لو يظل يجري

باچر يزينب من تشوفيني
من الخيل يختي ما تعرفيني

والدم على الغبره يسح والراس مشيول برمح
يلا يزينب يختي ودعيني
_

عينچ عالزغار من الحرگ و النوگ
صبريهم يزينب لو دخلتوا السوگ
تلچمني اليتامه و الچدم محروك
يأذي ارقيه خايف يختي من الشوك

لو نظر شامت يجرح ايتامي
و انه اعله رمحي و الوجه دامي

خوفچ إذا طر الصبح والراس مشيول برمح
يلا يزينب يختي ودعيني





حسين الأمين

#ليلة_الوادع ٢
__

احتارت زينب الليله وتگطر بالوداع احساس
مره اتعاين اعله حسين مره اتعاين العباس
_

يا حيره الذي اتمرها مو لحظة اموادع موت
تصد اجبين ابو اليمه و تهل ادموعها ابلا صوت
باچر بالحجر مصيوب و دمه اعله الثياب ايفوت

و ينهد حيله وسط الگوم و تهجم بالرماح الناس
__

صدت عالگمر و تشوف جمال اعيونه و المبسم
وصدى صوت الطفوف ايگول باچر تگطر امن الدم
عين ابسهم عين ادموم يطفن و الصبح أظلم

يروح الچان كافلها الحارس عالخيم نبراس
__

ردت عالحسين و گال صعبه فرگتچ صعبه
و هيه ابلا خبر معلوم شافت منظر ابحربه
شافت سهم المثلث يشلع وصله من گلبه

يطلعه من گفاه حسين وتحيط بحومته الارجاس
____

شافت موقف الكافل من يبقى بلا چفين
من يوگع على الشاطي وسهم مصيوب وسط العين
وسمعت چلمة الخويه و حاير من ركضله حسين

و شافت بين هذا و ذاك طايح و العمد بالراس
_

باست نحر اخوها حسين و المدمع يضوي الليل
وشبگت صدره بالحسرات واتخيلت تسحگه الخيل
تسمع كسرت اضلوعه و تصيح ابچلمة اليا ويل

عگبه توگع اخيمها جسمه بساعة الينداس





حسين الأمين

#ليلة_الوادع ٣
لسان حال الإمام علي السجاد عليه السلام
____

الخيمه رسمتلي صور منيه
اشد من گطع النحر عليه

والدي ايودع عياله كلشي بالدنيا بچاله
____

التمن و صار الدمع كل الحچي
وحده ماتت وحده بيده ترتجي
عمتي زينب سمعته و شبعت بچي
يا عيالي رايح انه و ما اجي

الخيمه صارتله جرح هذا أشد من الذبح
الفرگه صارت تتضح قتيل
شفت دمعات اليتم شبت بروحه الم
بحيله گوه ظل يلم ثچيل

شبگته عمتي و تون سمعها
نشّف ابچفه الجفن دمعها

بخطوه كل دمعي جراله كلشي بالدنيا بچاله
____

ما بقت كل دمعه بينه بخطوته
من ظهر مهره اشاهد طيحته
عمتي من الخيمه تسمع رضته
الله لا ينطي الخيول السحگته

نشّف عيون الدمع استمع كسر الضلع
شفنه راسه منگطع سليب
الخيل تسحگ عالصدر طحنت بعظم الطهر
امن الگفه حزه الشمر تريب

عمتي تركض بالحرب يحيره
من يصدوها الغرب چبيره

منفرش عالغبره حاله كلشي بالدنيا بچاله
__

من وگع شفنه العساكر و الخيول
فوگ صدره تسحگ و ظلت تجول
جتني زينب ناشدت عمه شتكول
فرن اعله الحومه هالموقف يطول

أنظر الحال الحرم اتشگاف و ماكو رحم
السوط و النار ابخيم تطوف
طفل بالحافر عثر طفل متگطع وذر
و ابن مگطوع النحر نشوف

اقسى كل منظر جره عليه
طفله تمشي اميسره وسبيه

جسم أبويه الخيل جاله كلشي بالدنيا بچاله
___

طفله طاحت عالجمر مچويه ادين
ارقيه سلوبها التراچي الظالمين
وحده تصرخ عمتي وحده حسين
بالترب ركضتهن الما أدري وين

راس مرفوع برمح و راس بالعين الجرح
وانه كل لحظه انذبح عذاب
طفله تركض للنهر طفل بالحومه عثر
وحده تنده يالكمر مصاب

حشمت عمي الكفل يجيها
الثوب بالنار اشتعل عليها

عالنهر موته حلاله كلشي بالدنيا بچاله
__

بهيمه تالي گعدوهن عالتراب
لا خيام و لا حراسه بس حجاب
الزينب السوط اعتنى بكل العذاب
من بعد ما شاهدت اعظم مصاب

نامن بوسط الرماد غربه حراس و بلاد
الهوه صاير بس سواد دخان
وحده تنشد يا حسين عمتي يا عباس وين
تريد اخيتك يالحنين مكان

والله حيره حيرتي بعذابي
ألم زيدت عمتي مصابي

والشمر جهز حباله كلشي بالدنيا بچاله





حسين الأمين

#ليلة_الوحشه ١

السيده زينب تخاطب اخيها الحسين عليهما السلام
بعد إنتهاء معركة الطف
_ - _ - _ - _ - _

ليل وحشه وماكو وجهك
لا عطر منك اجاني لا خيال
ياهو اليه بغربه وحدي
اخلاف عينك چتفوني بالحبال

ضيعت كلشي من گلت أمشي
_

شحلاة ارسوم وجهك چانت اطوف
بدليلي و الحزن عن گلبي مكشوف
هسه اعله الشفايف طبرة اسيوف
اشوفنها و عساها عيوني متشوف

شلون ظلت روح عندي
من شفت دم بوجنتك و التراب
طايحه منك عمامه
خويه اول مره اشوفك لسه شاب

ضيعت كلشي من گلت أمشي
___

چنت وياك چن شجره و غصنها
تفي اعليه و انه بسد حضنها
رحت و بروحتك روحي حزنها
ميته وياك يا خويه لونها

عفيه ظلت مهجه عندي
من گلت راح امشي خويه و الوداع
عگب ما ضيعت صوتك
انشده يا خويه حالي و گلبي ضاع

ضيعت كلشي من گلت أمشي
____

اسهرت ليل الهظم بالدمعه اناطر
يتامه خايفه و ابلايه ناصر
لحظه و لن تمر شفت الحوافر
وذر جسمك يخويه اعليها صاير

هنا ردت خويه المنيه
و لا اشوفن خيل تسحك بالعظام
ما دريت اشلون حالي
نباوع و يجري دمعنه ابلا كلام

ضيعت كلشي من گلت أمشي
____

صدك ليل و بعد ما تگصدلنه
وحيده أبقيت و ابلايه زلمنه
اناطر بلكي اشوفن رف علمنه
اشوفه و لكن الشاله شتمنه

شايل بچفه علمنه
و بالسهام امزگينه و النساء
فرحت العباس اجاها
تالي حارس عالظعينه و الخباء

ضيعت كلشي من گلت أمشي
___

شفت حارس يمرنه بعتمة الليل
يگول انه الحرس من عگب الكفيل
يخويه اهنا طحت و اتهدم الحيل
شبچت ايدي اعله راسي ودمعتي اتسيل

درت وجهي عالشريعه
ها يخو زينب أناشد يالكفيل
وسفه شامت يحرسلنه
و باچر بأمره سبايه عالهزيل

ضيعت كلشي من گلت أمشي
_

درت هالعين و الهزل ورايه
ظعنه امسافر ابلايه نهايه
ركبت اعله الهزيله ابلا حمايه
ينشدوني يزينب ماكو رايه

مودع الله بدربي انه
اي يبو اليمه حبيبي و السلام
مروا اعله القتله بينه
الأكبر و جاسم ملوهم بالسهام

ضيعت كلشي من گلت أمشي
___

مشينه و من وصلنه الديرة الشام
نظرات الغرب ترمينه بسهام
أهلها احجار يرمونه عالايتام
بخرايبهم يخويه اطفالك اتنام

صعبه بت ذاك الغضنفر
تدخل بمجلس دعيه ترد جواب
تالي گعدونه بخرابه
لا ستر بيها الحرمنه ابلايه باب

ضيعت كلشي من گلت أمشي





حسين الأمين

#ليلة_الوحشه ٢
__

علي احضر علي احضر زينب حايره بالبر
ظلمه و محد اوياها و الخيمه جمر تسعر
__

علي زينبكم الدمعه تاخذها و توديها
اليتامه حايره بيهم و لا واحد حضر ليها
گوم الها يحامي الجار و امسحهن بواچيها
وحيده زينبك معقول بالغربه تخليها

علي وينك علي ونيك بنتك شوفها بعينك
غريبه بدمعة ابچاها و الخيمه جمر تسعر
___

بالهيمه و ظلام الليل بنتك يا علي احتارت
چفها امن الجمر محروگ بين النار من طافت
گوم و أطوي هالوديان بيها اجيوشهم دارت
و مذبوحين اخوتها و بلا حارس تره صارت

علي زينب علي زينب خدرها ألحك اتسلب
و بيها تحرس اعداها و الخيمه جمر تسعر
____

تصد ابعينها اخوتها كلها اعله الثره نومه
و تطر الجيش وحدها زينبكم المحشومه
و شافتها تره هالناس من ركضت على الحومه
راحت تنشد اعله حسين و جاب الحافر اهدومه

عالتل يا علي عالتل وگفت ساعة المقتل
شافت ذبح ولياها و الخيمه جمر تسعر
____

اگصد زينب الليله باچر ما اظن تلحگ
و حلّ اگيودها ابچفك خاف النوگ تتسبگ
گبل ما تنسبي الحره و متنها بسوطهم ينطگ
هاگ السيف هاگ إلواك و الحگها يراعي الحگ

علي الحگ علي الحگ متن بنتك صبح ازرك
سوط الجيش آذاها و الخيمه جمر تسعر
_

يلي گاصد السلمان و هاي الگاع طاويها
چا بين العده و النار زينبكم تخليها
ما تبعد تراها الطف اگصد يا علي ليها
الهزل للسبي اتحضرت و علوياتك اعليها

چم علويه مختنگه و من النار محترگه
علي يا حامي احماها و الخيمه جمر تسعر
_

من تگصدها يالكرار شاهد كربله بعينك
صفه ظعنك ظعن مسلوب و احترگت صواوينك
و شوف اشچم ابن مذبوح منك الله اليعينك
وميدان اعله صدره الخيل ياحيدر صفه حسينك

لحسينك علي ناظر ابصدره امربع الحافر
اضلوعه الخيل داساها و الخيمه جمر تسعر




حسين الأمين

#ليلة_دفن_الاجساد
_______

من الدفن عمه أرجعت يا ليتني اوياهم متت
ولا عشت كل هذا العذاب
چم غالي وسدته التراب

يا ليتني اوياهم متت
_______

رديتلچ عمه جسد يمشي فقط بجروحه
انه الذي وگت الدفن چم مره طلعت روحه
والدي نايم عالوجه و برگبته المذبوحه
ثالث نهار و بالشمس فوگ الترب مطروحه

منين أبدي يا عمه الشرح كل لحظه يمهم انذبح
شحچيلچ اچبير المصاب
چم غالي وسدته التراب

يا ليتني اوياهم متت
________

امطشرين ابويه عالثره لميته وصله وصله
خنصر يمينه منگطع و بگلبه لسه النبله
نعشه حصيره والدي و ادماه صارت غسله
نزلته بس ابلا رأس و فوگ الصدر عبدالله

يا عمه متگطع وذر عالقبله وسدت النحر
و تغسيله من دم الخضاب
چم غالي وسدته التراب

يا ليتني اوياهم متت
______

يا عمه چم مره متت من شفت حال الأكبر
احزام الظهر فوگ الترب يا عمه شلته اموذر
التشبه محمد صورته بحر الشموس امفطر
لحده حفرته بيمنتي و اتمنه موتي يحضر

ياريت وياا بالگبر اتوسد و أنهي العمر
احزام الظهر يا عمه غاب
چم غالي وسدته التراب

يا ليتني اوياهم متت
_______

أنظر على القاسم صبح يشبه يعمه الشذره
بيض الملابس بالدمه اتحولت تراهي حمره
بالگبر نايم هالولد و أنصار ابويه بكتره
گطعت دليلي امصيبته من شفت گطعة نحره

جسام يا خيط الصبح للعرس لا مو للذبح
واريته بدموم الثياب
چم غالي وسدته التراب

يا ليتني اوياهم متت
_____

صديت صوب المشرعه و ظهري يعمه اتكور
شفت الچفوف اعله الارض يمكن الچ تتعذر
حيرني سهم الصوبه باقي بشلعته اتحير
و راسه يعمه من العمد يم الشريعه امطشر

حيرني عمي بوالفضل شلون ادفنه بعينه النبل
مو شعر راسي رمشي شاب
چم غالي وسدته التراب

يا ليتني اوياهم متت




حسين الأمين

#ليالي_فاجعة_السبي
______

شمر يحدي الضعينه والسباهن
واحد سوطه يضرب والسباهن (اليسبهن )
الأشد مو باليشتّم والسباهن ( السبي هان )

التذبح دخلن بديوان اميه
_______

شفت منظر جرح گلبي و لچمني
أخت عباس تمشي ويه غربه
ناشدت الخلگ چا وين الحسين
گالولي الحوافر فوگ گلبه

واحد گال زينب تمشي للشام
ومن السوط مهشومات العظام
تطيحن عالترب لو عثرت النوگ
وحيده ابين عسكر بين الأيتام

الزينب ما فزع ساقي حرمها ( حرم مكه)
من الماي شامتها حرمها ( منعها )
وحيده اتكفلت تحمي حرمها ( النساء )

يهاشم بتكم اتسمت سبيه
________

مشيت اويه الظعن و اجدامي ميته
لحد ما شوفهن بالكوفه وگفن
بطبول و هلاهل يا هظيمه
و الوادم تناشد وين اهلچن

شماته اتنادست بت حيدر اتفوت
الچان الها اخو يتسمه بالموت
الما لامح گبل كل بشر ظلها
شو فرجه اصبحت ما بين البيوت

الچان الشرف عدها هوه طالب ( يدرس )
غريبه بت علي بن ابي طالب
سليبه ولا اجه من اخو طالب ( يداعي )

و يرد حگ العشيرة الهاشمية
_____

باب الساعه وگفن بيها ساعات
و اعيون البشر صدت على ام عون
وين النذل و الما عنده إحساس
و الما عنده غيره ظل يشمتون

صاحت صوت شيبت منه الانفاس
بت شيخ العرب ما بين الارجاس
تفصگ راح زينب ظلت براح
و صدت عالشريعه اتحاچي عباس

عگب عينك نذل خويه خطاباي (مشه بيه)
و على امتوني سياط الهم خطاباي (خطّه بيه)
مو هذا المهم و اسمع خطاباي ( كلامي )

القصر ايزيد يهدوني سبيه
_______

على الديوان آه اشمكثر الآه
دخلن بالبچي و ايزيد فرحان
بيده الخيزرانه و يضرب الراس
و ربيبات الشرف من دون وليان

بين اهل الطرب آيات قرآن
يسمعوهن حچي ميحمله انسان
واحد صاح زينب وينه الحسين
لعبت على صدره الخيل ميدان

اخبرچ ماكو واحد ظل عالحسين (ايفيي)
عاري و عالترايب ظل عالحسين ( بقه )
كثر السحگ طحنت ضلع الحسين

يزينب خيلنه البالغاضريه
________

بخرابه و سوگ تالي بت علي اتفوت
يا وسفه و لا حامي يجيها
و رقيه اتنام لاكن نومة الموت
بعد ما فسّر الصخره بچيها

نشدت بالبواچي والدي وين
ما يدري ابّناته بالدواوين
لن الطشت جاها اتشوفه بس راس
بشبگة موت شبگت راس الحسين

الگوم الضربوا ارقيه بلا دين (ماعندهم دين)
سبوها ابلا رحم طفله بلا دين ( بلدين )
اجاها احسين لاكنه بلا دين (ماعنده چفوف)

شلون اتشبگه محتاره رقيه





حسين الأمين

#ليالي_فاجعة_السبي ٢
_______

بعد عز ماضيها حرمله يسبيها
الچانت اميره امدلله مگيوده تالي بسلسله
__

ستر الله و خدر حيدر تنسبي و ابلا ولي
و السبي للعرب فشله و عار ابد ما ينجلي
يطلبون ابثار بتهم و الصوارم تعتلي
وسفه ما واحد فزعها بسوگ طبت بت علي

ابلا كفيل و رايه تفوت نص اولايه
دم المدامع سايله مگيوده تالي بسلسله
_______

ادموعها بكل خطوه كوثر و الدمع احمر يصب
الچان ابو فاضل حرسها يشتموها و تنضرب
السوط ما توجع ضربته مثل چلمات الغرب
هاي اخوها ابرمح راسه و جسمه باقي اعله الترب

السبي جارحها و الحچي ذابحها
من بيت أشرف عايله مگيوده تالي بسلسله
_______

كربله اخذت گلبها و السبي ماخذ عمر
طاح يم الشاطي ظلها و صار يحديها الشمر
التحلف الكوفه ابخدرها و بالعفاف و بالستر
طلعت بثوب الاميره و دخلت بگيد اليسر

الدنيه دارت بيها من بعد واليها
المهيوبه اجتي الكربله مگيوده تالي بسلسله
______

درب وحشه تمشي زينب و الجرح يتبع جرح
ابدمعة ايتام و ثكاله حايره ابليل و صبح
اتشوف منظر للسبايه هوايه أشد من الذبح
ارقيه لو ضربوا متنها تركض الصوب الرمح

هظمه كل ايامها احتارت ابأيتامها
نسوان هاشم بالفله مگيوده تالي بسلسله
_________

تالي ما تالي بخرابه بنت باء البسمله
بعد عين الگمر حارس صار ليها حرمله
لا سگف لا باب بيها فرجه أشرف عايله
أحجار و اسياط اضربوها بعد محنة كربله

حيره والله حيره دخلت اشچم ديره
اميسرها گدام المله مگيوده تالي بسلسله





حسين الأمين

#ليالي_فاجعة_السبي ٣ (( شور ))
__

ضعن علويه سليب ضعن علويه غريب
___

سارح بحزني و وصلته و نحره يگطر بالدمه
و انظره بس نور يضوي من الرمح حد السمه

شفت عالم سبايا و راس منحور
شفت دمعة يتيمه تشبه الحور
شفت زينب هلال بوسط عاشور

عجيبه غريبه
بت العرش بيد اجنبي
معقوله زينب تنسبي
تحدي الزلم خدر النبي عجيبه

ضعن علويه سليب ضعن علويه غريب
_ _

اتقربت يم الهزيلة و النفس بيه انچوه
التفت عباس راسه دخن و سد الهوه

ارجعت بس روح بيه ماكو انفاس
متت من شفت حمره عيون عباس
ياهو الباوعلهن يخزره الراس

نظرته دمعته
خايف عله اخته من النظر
ميت ولكن هم حظر
شفت الجرح شفت النحر نظرته

ضعن علويه سليب ضعن علويه غريب
__

خطوه دمعه خطوه عثره دخل للكوفه الظعن
بين شمات و هلاهل هالفواطم ينسبن

اسمعت حچي الشماته اليذبح الروح
هاي اخت الصريع الراسه مذبوح
هاي الچان ظلها امحجب ايلوح

سبيه رزيه
المهيوبه بالكوفه قبل
مچتوفه دخلوها بحبل
بذيالها امچلب طفل سبيه

ضعن علويه سليب ضعن علويه غريب
___

"أم حسبت" تتلوا دخلت تقره ويه راس الذبيح
مره وگفت بين عسكر أسست رايه و ضريح

تغر حيدر اليحجي و سكتت الگوم
ما چنها السبيه التنزف ادموم
خلّت حيره بيهم تبقه لليوم

من ابوها من اخوها
بعزتها فشلت هالعرب
بوجودها محد خطب
و الراس يشرح بالسبب من ابوها

ضعن علويه سليب ضعن علويه غريب
___

بعد هالرحله الطويله بالخرابه المستقر
طفله تنشد ها يعمه حسين ابويه ما حظر

غفت و الدمعه عالخد تنشد حسين
تالي الطشت جاها بصوت الونين
حظنت راس أبوها بشبگة البين

يتيمه هظيمه
فوگ النحر ضاع النفس
ماتت رقيه اعله الرأس
ذبلانه من حر الشمس يتيمه

ضعن علويه سليب ضعن علويه غريب





حسين الأمين

#العلويه_شريفة_بنت_الحسن_ع
_

دعائي يا شريفه ام الكرم
دعائي انحسب من الخدم
__

اقسم عليچ بعلتچ و الحسره
خليني اخدم والدچ و العتره
بهاي الليالي المؤلمات العشره
كون بدمعتي و لطمتي و الطبره

ولائي من دمه نحره انختم
دعائي انحسب من الخدم
__

يالعلتچ چانت رزيه و كلفه
صرتي الطبيبه بدون أي مستشفه
مدينه ادينه و الدعاء الوصفه
و اليدعي بسمچ لا يظن ما يشفه

شفائي ردت من ام الشيم
دعائي انحسب من الخدم
____

التصعد ابأسمچ ترد مگضيه
و يم بابچ اتعنينه يالعلويه
هواي الحوائج بس عليچ شويه
و البابچ امفرعه اجتي النيه

رجائي بالذي شال العلم
دعائي انحسب من الخدم
___

بجاه السبيه امحلفچ المهظومه
وامشي أبو اليمه الذبيح و يومه
خايب ميرجع إلي جاب اهمومه
اگضيها إله يل بالكرم معلومه

ندائي الكرم يمچ مو وهم
دعائي انحسب من الخدم
_

بحر المصايب عاليه امواجه
و الكم إله الكون منطي تاجه
چم گلب حاير ينتظر افراجه
هواي الحوائج و أنتي باب الحاجه

دوائي اعليچ ما يصعب ألم
دعائي انحسب من الخدم
__

آخر دعاء انريده منچ خاتم
الناعي و الرادود ويه اللاطم
للمهدي صاحب الزمان القائم
ايعجل ظهوره و انتصاره الدائم

بكائي مو دمع بعيوني دم
دعائي انحسب من الخدم





حسين الأمين

#ليالي_فاجعة_السبي ٤
_ - _ - _ - _ - _

دم المتن ينزف وعالنوگ ظل طايح
و راس برمح يهتف. وينك يبو صالح

رافجن چتالهن ما دريت بحالهن
__

شلون ابتدي يا سيدي
بسوط السبي بدمعة يتيمه
ايتامه تون سوط المتن
چتّفوهن و الحرگ ما خله خيمه

بالبوادي اطفال تركض عالجمر
و جيش ينظر على الحرمه من تمر
النظره تذبح اشد من درب اليسر

بين الزلم تركض وخيامكم تلهب
وايتيم مترضرض وينادي يا زينب

شماتكم تنعالهن ما دريت بحالهن
____

بدرب السبي لون العبي
احمر غده و الناگه حمره
طيحة مره كلفه تره
يابو صالح عالوجه آثار سطره

و شاهد الحافر عليه صاير دمه
أثر سحگ حسين ضلعه امهشمه
والگطع راسه سبه بت فاطمه

طيحة مره صعبه و الحافر اليگتل
زينبكم بغربه ما واحد اليكفل

بس روس عد وليانهن ما دريت بحالهن
_______

بخوف و حذر يالمنتظر
بالمسير شلون لو حرمه تطيح
بين الغرب دمهن يصب
و راس جدك يمهن برمحه ذبيح

شلون يهدالك گلب يبن الحسن
و الفواطم سلبوهن و انسبن
و البلا غيره صفه يحدي الضعن

يحدي الشمر بيهن يا دم تصب عينك
محد يواسيهن چا الله اليعينك

ما حظر كفالهن ما دريت بحالهن
_____

شحالك صرت من اسمعت
يمشن و يتلفتن صوب النهر
بحسرة ألم شافن سهم
و الچفوف امگطعه وكسرة ظهر

ها يمهدي حگها عينك تجري دم
عين عباس انعمت من السهم
و راسه يم الشاطي ينزف و انهشم

عمتك على الهزل من شافت المنظر
و اليا جرح تحمل اموذرينه و امطبر

غير الدموع اشمالهن ما دريت بحالهن
__

بعيد الدرب كلهم غرب
التموا يمهدي و سلبوهن
عندك علم بين الزلم
بالمجالس يبن هاشم دخلوهن

ادري تذبح و أعتذر راعي الأمر
طبة الديوان تهظم باليسر
زينب ابلايه ولي تدخل قصر

اگبال الزلم وكفن عماتك اتشاهد
و دموعهن يجرن و لا هاشمي گاعد

شكد هظم راوالهن ما دريت بحالهن





حسين الأمين

#ليالي_فاجعة_السبي ٥
_

موقف سبي هاظمنه يا عباس
من العشاير جتنه يا عباس

ردوا النسوه امن السبي و ظلن ربيبات النبي
____

الكوفه من فتنه هاجت الفتنه
كل عشيره شبحت اعلينه النظر
للقصر راحوا للحرب فاتوا
صوب ابن ازياد علنوا هالامر

عار اعله العرب من تسبي مره
عشايرهم اجت سيوف امشاهره

خاف الحرب و الفتنه ابن ازياد
طلعوا النسه من عدنه ابن ازياد

نفذوه حالاً مطلبي و ظلن ربيبات النبي
____

بالخبر دخلوا و النسه طلعوا
امن الخرابه بسرعه طلعن للاهل
خويه يا هظمه دورت زلمه
من بني هاشم اجه لينه عدل

نظرت اعله الحرم يدورن بالزلم
يشوفن يندعن يرفلهن علم

يا خويه ميّت مره تذبحني
من سكنه اسمع حسره تذبحني

ما فزع لينه طالبي و ظلن ربيبات النبي
____

كل عشايرهن صوت حارسهن
يا فلانيه أخرجي سبيج گضه
التفت حيره نشفت الغيره
صاح يبقن بس بنات المرتضى

بقينه باليسر فقط نسوة علي
باسياط و حجر يخويه ننولي

بيت الشرف چنه احنه بالكوفه
تالي الخوارج صرنه بالكوفه

ومن الدمه حمره العبي و ظلن ربيبات النبي
____

للاهل طلعن واخواتك الظلن
بين خولي و حرمله و سوط الشمر
وينه حامينه صاحت اسكينه
وكفت اباب الخرابه تنتظر

كلما التفت رقيه اتنادي إلي
عمي ما يجي و اگلها اتحملي

شوف الهظم و اللوعه بين الناس
چم طفل تجري ادموعه بين الناس

انغر علينه يا أبي و ظلن ربيبات النبي
_

تالي طلعونه لشام يسرونه
بس حرمكم بالسبي خويه سرن
خوله من طاحت من الظعن ماتت
الشام آه الشام من فات الظعن

تتشفه النسه اجني بالدرب
واحنه ابلا أهل و بديرة غرب

بحجارهم لاگونه أهل الشام
و ذاك الحچي سمعونه أهل الشام

سب الصميده الناصبي و ظلن ربيبات النبي




حسين الأمين