#الليالي_الفاطمية ٧
_

لا يلچمك كسر ضلعي حسين يمه والمنيه
لا يلچمك باچر ادوس اعله صدرك خيل اميه

الضلعي يبني لا تون
جسم منك ينطحن
___

يمه ليجرحك كسر ضلعي و عذابي
انسه سطرت عيني وي دخان بابي

مو الضلعي من اون لا عالجرالي
لأن باچر ينگطع نحرك يغالي
اتلث ليالي اتنام برمال الصحاري

ايشيعوني اربعه صح ويه حماي الحميه
ايشيعوني لكن انته تبقه عاري عالوطيه

جسمي يمه يندفن
جسم منك ينطحن
__

جيش كامل هاجموا كلها على امك
انسطر خدي و الضلع بس بالي يمك

باچر بلا ضلع سالم تبقه يمه
الخيل بالطف كل ضلع منك تهشمه
الحافر بگلبك يطب ما عنده رحمه

من الخيول مو نعش ابنك يلمك بالحصيره
من الخيول ايفلن اعظامك مثل فل الظفيره

بيك گلبي ينطعن
جسم منك ينطحن
_

الصبر قبل النفس يمه اعليك خلصان
شنهو ضلعي يا حبيبي ايذبحوك عطشان

ما شفت مذبوح و اعياله تنظره
راسك ايرفعه الرمح و تجذب الحسره
اختك و دمعتها تنزل منها حمره

يا سبيها زينب ايضربوها و يشتمون بيها
يا سبيها وبالخرايب تگعد ابلايه وليها

اتشوف بالطف الحزن
جسم منك ينطحن
_

على العتبه وگع محسن بالرزيه
و ينفطم عبدالله من سهم المنيه

بسمار بابي هم يجي يختمها الانفاس
محسن و عبدالله عاشوا نفس الاحساس
ابني مكسور الضلع و ابنك بلا راس

ضمه دمعك بحاجته باچر تره تفگد الخوه
ضمه دمعك اتوشل عيونك لمن عباس يهوه

المشرعه اتوشل جفن
جسم منك ينطحن
____

خلصت اجروح العمر و الباقي جرحك
المصايب هونتها بطاري ذبحك

تنذبح من الگفه يبني بطفوفك
مثل كعبه اتصير و اسهام التطوفك
ديرة اسهام اعله جسمك من اشوفك

راح اودعك ونلتقي ليل اهدعش وگت المسيه
راح اودعك اگعد بصف نحرك وانصب عزيه

ما اجيلك لا تظن
جسم منك ينطحن





حسين الأمين

#السيدة_فاطمة_المعصومة_ع
___

فاطمه المعصومه و زينب المهظومه

اتشابهن بالمحنه و دروب السفر
للرضا معصومه زينب للگمر
____

امن المدينه الأرض مشهد گصدت بمدمع يسيل
شوگها اعله الرضا نار و حرگ من عدها الدليل
شابهت بالمحنه زينب امن السبي رجعت تميل
فاطمه للرضا تمشي و تمشي زينب للكفيل

الگلب و اشواگه ثنينهن عالناگه

راحن الصوب الاخو بشوگ و سهر
للرضا معصومه زينب للگمر
__

شابهت عمتها زينب درب اخوها هم بعيد
امنيه اتشوف ابو محمد تحظنه اترد من جديد
لچن زينب موش حظنه تشبگ اترابه تريد
يا حظن و تشبگه زينب منسحگ صدره العضيد

فاطمه لحظانه زينب التربانه

فاطمه لعيونه زينب للنحر
للرضا معصومه زينب للگمر
___

فاطمه چانت اميره من مشت درب السفر
و زينب ابثوب اليساره ردت ابلا مستقر
فاطمه للرضا راحت و منّه واصلها خبر
زينب آخر مره أخوها شافته ابلايه نحر

للاخو اثنيناتهن شگد فرق بيناتهن

سفر مشهد بي فرق عن النهر
للرضا معصومه زينب للگمر
____

الحره نالت مبتغاهه وصلت الحد الترب
لچن معصومه يويلي ماتت بذاك الدرب
ظلت ابحسرة أخوها الشوفته المدمع يصب
و بأرض قم وسدوها و للرضا ايرف الگلب

زينب الحاميها و فاطمه الباريها

وحده ردت وحده ماتت يا قهر
للرضا معصومه زينب للگمر
__

آخر اوجووه التشابه بينهن موت و حزن
كثر ما ناحن يويلي انهدل من عدهن جفن
وحده ماتت على اخوها وحده عالأخ تنسحن
ثنينهن بالغربه ماتن ماكو اخو وكت الدفن

بالغرب مثواهن و لا اخو يبراهن

شافن انواع الرزايا امن الدهر
للرضا معصومه زينب للگمر




حسين الأمين

#الليالي_الفاطمية ٨
__

دافن بروحك كبرها حتى كل لحظة تمرها

تسولفلها عالمضى ما ناسي ذكرياتك
ما عايش بدنيا بعد بالمكبرة حياتك
__

كاعد بكتر المصايب و الكلب حزنه ثجيل
تسولفلها ذكرياتك العشتهن مو قليل
الجان أسد الله ورسوله والعرب عنده دخيل
هسه بالدمعة يسولف غيم اعله انهاره ليل

صار من بعد الزجية ليل مابي كل ضويه

من بعد نور الزجية ضاعت أمنياتك
ما عايش بدنيا بعد بالمكبرة حياتك
____

راحت البسمة الوحيدة الجانت بليلك امان
فززت كل جرح غافي والدوه شوفتها چان
الما مفارگها ثواني و گلبك الها اصبح مچان
للگبر هسه دليلك يمشي صوب أم الحنان

بان شيب براسك حسرتك بأنفاسك

ضيعت كلشي وراها بقت بس دمعاتك
ما عايش بدنيا بعد بالمكبرة حياتك
_

چان ليلك بيه گمره الزهره چانتلك بدار
هسه كل أيام عمرك ليل عتمه بلا نهار
اليوكف بوجه الشدايد تجدح عيونه شرار
هسه متكتر ينوح و كلبه من صوابه حار

الزهره چانت هيه دارك غابت و ظل اسطبارك

وحيد هسه بلا خليلك تنتظر مماتك
ما عايش بدنيا بعد بالمكبرة حياتك
____

اخلاف عافيتك يحيدر ضيعت كل العمر
استوطنت بيك المآسي و عاشرت دنية هجر
مغيرات ارسوم وجهك من كثر دمع الصبر
الكبر من عندك تألم من تسولف عالكسر


ما بقت بالهجر رجعه ذبحت احلامك الدمعه

مصاب زهرائك يحيدر عايش ويه ذاتك
ما عايش بدنيا بعد بالمكبرة حياتك
____

اشكبره صبرك بالمصيبة والصبر بيك أتمن
السطرة والعصرة يشهدن أنته ببهن ممتحن
ضيعت فاطم يحيدر و انته باقي ابلا وطن
غربه من بعد الزجية اشسوه بالحال الزمن

الجانت أهلك يا ذخرها بيمنتك تحفر كبرها

ضاعت البسمة اعله شفتك ضيعت حلاتك
ما عايش بدنيا بعد بالمكبرة حياتك
____

ضاعت البسمة يحيدر كاعد بدارك غريب
ديرة أيتام ابدليلك ما أظن جرحك يطيب
وحيد و أطفالك يتامه و تسمع أصوات النحيب
زينب تريد أمها تنشد و انته ما تكدر تجيب

بنتك الطفله الزغيره وشتجاوب والله حيره

و انته گدام اليتامه اتكابر بثباتك
ما عايش بدنيا بعد بالمكبرة حياتك





حسين الأمين

#الليالي_الفاطمية ٩ ( نزله )
_

يزهراء بالمشي صحنه
يزهراء ترف رايتنه
يزهراء الچ مقصدنه

و المرقدچ نتعنى مشايه
___

نمشيلچ اي نعم
عالهامه مو جدم
بيدينه العلم وانخط كلمه

عالرايه انخط وعد
يا مهدينه المدد
ما يحوينه العدد اليحسب يعمه

ظهر بظهر و الرايه بيدينه
نوصل زحف فشله اعله رجلينه
اترابچ فقط ناخذ تسمحينه
صوغتنه من انرد لهالينه

هالتراب امنيه انشمه
هالتراب نعمة النعمه
هالتراب حاظن الرحمه

الجنه كلها بتربتچ هايه
___

شمحلاته هالتعب
ومن نوصل يا عجب
چم موكب انصب يخدم حاضر

لليمشي ايشاهده
يركضله ايناشده
شرفنه عالغده اتفضل زاير

واحد ينادي اباب كل خيمه
چاي ام حسن ضوگه بمفاهيمه
واحد نشوفه اباله ترنيمه
بآخر الموكب يهرس القيمه

مواكب خدم منتشره
مواكب كلمه بس تقره
مواكب بخدمة الزهره

هذا شرفنه و غاية الغايه
___

كل مرأه وكل رجل
كل شاب وكل كهل
كل طفله وكل طفل شايل رايه

اعداد القافله
تعبرها الكربله
وچلمات الياهله حلوه هوايه

لارض المدينه اليگصد ايباوع
رايات سوده تارسه الشارع
ما شاف واحد گبله لا سامع
مي من بشر يجري على الواقع

ملايين چن نهر سايل
ملايين حيرت العاقل
ملايين والخبر عاجل

للزهره فدوه گد الحچايه
_

من ندخل حضرتچ
و انقبل گبتچ
تروينه بنظرتچ يا سر الله

والدمعه من تصب
للزهره امن الگلب
والمجلس ينصب اباب القبله

ننصب المنبر بالصحن نبدي
نوكف ابابچ وكفة امجدي
وصوت النعاوي بالگلب يحدي
و ويانه يبچي گاعد المهدي

بالاحزان چم گلب هايم
بالاحزان ألكسر فاطم
بالاحزان حسرة القائم

و الكسر ضلعچ ينحب اهوايه
__

بأمر الله المقتدر
نتحشد للنصر
ونبنيلچ هالگبر بحيل القائم

خدامچ يم حسن
عماله بالصحن
امناراتچ ينبنن وتضوي العالم

عماله خدامچ تجي يالزهره
هذا الرواق وذاك يبني الحضره
و يصف ذهب گبّتچ واحد أمره
و يعلگ اعله الگبه رايه الخضره

الايام تشهد اعلينه
الايام و نبني بيدينه
الايام مرقدچ لينه

و يا فاطمه نكتبها عالرايه




حسين الأمين

#الليالي_الفاطمية ١٠
__

كون مو هذا الوضع يا حيدره
كون ذوالفقّار بيدك تشهره

بعد شيفيد التمني و زهرتك بالمگبره
____

امجتف بأمر الوصية والصبر بيك امتحن
گاعد و دارك تنظره تحرگه اتباع الوثن
شبوا النار اعله بيتك وگلبك أتحمل محن
عصروا الزهرة يحيدر وانته تعصر بالزمن

صعبه اليبچي الزلم كاعد يون
خيّم بگلبه المواجع و الحزن

من كثر دمع اليذرفه عيونه كلها محومره
بعد شيفيد التمني و زهرتك بالمگبره
____

چان اليفر من أمامك زلمه هذا مو جبان
مو فراغاً حامي جارك جنت لليندب أمان
هسه ياهو الخله دارك مظلمة بلايه حنان
لومه أمرك و الوصيه ياهو يگرب ليك چان

چان بيدك طاحت ارگاب الزلم
وانته ملّاچ الحرايب يا شهم

ثگل جدمك أثر يترك يا علي فوگ الثره
بعد شيفيد التمني و زهرتك بالمگبره
____

كون ما عندك وصيه وللنبي ما چان أمر
عود واحد خلي يگدر يحرگ الدار و يمر
چان ذوالفقار خله بضلع كل واحد كسر
وبعتبتك يجري دمهم يا علي من كل كتر

چان ما مر اعله گلبك كل جرح
وتنظر بعين الزچية وتنشرح

چان خليت المنية تلزم اعليهم سره
بعد شيفيد التمني و زهرتك بالمگبره
_

تودع بزهرة حياتك وانته مكسور الظهر
شلون صابر من شفتها تلوذ والباب انعصر
كل نبي يگلك يحيدر الصبر مثلك ما صبر
شلون متحمل دليلك من شفت خدها انسطر

حسرتك شابت يحيدر بالگلب
حب حياتك دافنه جوه الترب

و انته ما شاهر فقارك فقط دمعك تشهره
بعد شيفيد التمني و زهرتك بالمگبره
__

لسه نوحك عالمصيبة ياعلي وحيلك ثچيل
ذبل جفنك وانته بعدك دمعتك عالخد تسيل
چنت تشبه جبل يمشي بالهوه هسه تميل
الموت الاحمر و الغضنفر هسه صار بلايه حيل

وسفه يا حيدر تنوح من الألم
وسفه والبسمار بالضلع انرسم

وسفه ما خليت دمهم عالارض يا قسوره
بعد شيفيد التمني و زهرتك بالمگبره
___

شحالك بفگد الزجيه بلا گلب چنك صفيت
يالچنت كهف اليتامه بلايه خيمة أنته بقيت
هسه تدفن ذكرياتك بالكبر وياها ريت
شكثر زينب تشبها أمها ومن تباوعها بجيت

شسوت الفرگه بدليلك يا علي
تشوف زينب يبقى نوحك يعتلي

لفاطمة و زينب يحيدر دمعك اعليهن جره
بعد شيفيد التمني و زهرتك بالمگبره





حسين الأمين

#الليالي_الفاطمية ١١ ( شور )
_

من شاء الله يخلق نور خط احروفچ يا زهراء
لو ما أنتي الناس اتضيع وهاي الدنيه اتصير اهواء
بسمچ فاطر الله الكون وبسمچ متقدسه الاسماء

أنتي نقطة بسم الله
آدم لحروفچ صله

الفضلچ يعود أصل الوجود
ماي الخلود بيمنتچ أنتي الخلود

من عله و بان
نكر ابليس نورچ من عله وبان
لذلك ما سجد و اتسمه شيطان
يمحراب النجاة الكل الاكوان
الجحد فضلچ هظيمه انصيحله انسان
__

يا عطر الجنه القداح يا كوثر عطف الرحمان
سرچ باللوح المحفوظ يا علة خلق الاكوان
اليدرك معرفتچ والله يدرك كل معنى القرآن

الدنيه انخلقت بسرارچ
حجه الباري اختارچ

خصم الكلام خصچ مقام
يا حجة الله اعله الحجج ليچ السلام

داير الكون
على معرفة قدرچ داير الكون
يروح القدس واصل الكاف و النون
فضل ليلة قدر معرفتچ اتكون
و إلي ينكر القرآن ملعون
___

دارچ بيها الكعبه اطوف والرحه اتفر الافلاك
مسبحتچ چانت من طين و اتعلمت منها الاملاك
بابچ ساتر چان الدين شلون ايدفعه ابن الصهاك

قبله بيتچ للناس
عجبه ابلا ذمه انداس

صوت الونين بضربة لعين
الحارگها دارچ يم حسن حارگله دين

شاعل النار
حرگ چفچ و گلبچ شاعل النار
و على خدچ سطرته خله تذكار
دفع بابچ و ضلعچ صابه بسمار
و وكع محسن قتيل ابعتبة الدار
___

بكسرة ضلعچ شلتي الدين ولوما انتي الناس اتراب
بگلبچ حيدر چان ايعيش و الذالك رادوا ينصاب
بدمچ كسرتي الاصنام و شاهد ظل بسمار الباب

بابچ كاتب بدمومه
فاطم ماتت مظلومه

دم و دموع هاي الجموع
سطرتها عالعين وبعد كسرت ضلوع

هجمت الناس
ثلثميه اعله فاطم هجمت الناس
وردة طه حرموها امن الانفاس
و جنين الها وگع عالعتبه ينداس
و ماتت بالألم و امعصّبه الراس
__

باچر بأمر الله اتشفعين يوم المحشر عالاشهاد
الحارگ بابچ يم حسين بوادي اجهنم ينذب غاد
كلشي ما ينفعنه اهناك بس حبچ يالزهره الزاد

انتي يا اكبر نعمه
بيدچ مفتاح الرحمه

أمر الجنان صك الامان
يا رحمة الله الواسعه وأم الحنان

يم الحسين
اقبلينه برحمتچ يم الحسين
إذا ما نرجوا منچ نرتجي امنين
يمشكاة الهدايه و درة الدين
على دربچ نظل عدليين ميتيين





حسين الأمين

#الليالي_الفاطمية ١٢
__

بالتراب دفنت أيامي و عيوني بالتراب
هالغياب فطر يالزهره دلالي هالغياب

المصيبه صعبت اعليه
گوه امشي اعله رجليه
روحي و گلبي و الريه بالتراب
___

يا زهرة حياتي اوياچ وسدت الگلب بتراب
انه يمچ تركت الروح راجع والدمع سچاب
اليدفن حب حياته ايعود صاير للحزن محراب
يظل بالغربه يتلفت لا خل يمه لا احباب

صفه عگبچ يواسيني
حزني وي دمع عيني
رحتي و راحت اسنيني بالتراب
_

يا حسره التمر بالليل من أتذكر العشره
وياخذني الگلب بالشوگ يم گبرچ اشم عطره
تره اليفگد عزيزه ايموت ويتمنى لحد كتره
وانه بعدچ بقيت انفاس عايش بس عله الذكره

بقيت اتمرمر بروحي
غميجه بعدچ اجروحي
عشت و الموت ظل يوحي بالتراب
__

انهدم حيلي على فرگاچ وبقيت ابغربه واتحسر
انه الما يوم رگ جدمي يفاطم عگبچ اتعثر
درت وجهي اعله ذاك الباب ليليه ابعتابه اسهر
تمنيت الكسر بگفاي ولا منچ ضلع كسّر

الضلعچ منكسر كلي
بعدچ بالعمر شلي
اوياچ اندفن احسلي بالتراب
____

عجب عايش اظل اشلون وانتي فاطمه الانفاس
يامن وحده بس تسوين بهاي الدنيه كل الناس
عشت هاي السنين اوياچ طيب وعاطفة وإحساس
لوما هالوصيه اتكون چا ما توصل الارجاس

تعرفين الحرب عيدي
لچن أمر الله مو بيدي
الوصيه استحگمت گيدي بالتراب
__

قسم بالمصطفى وأمره چا دمهم مله هالدار
حيدر بالوغه اتعرفيه من ايشهره ذو الفقّار
چان الروس يم جدمچ و ارميهم حطب للنار
بس چلمة عهد منطي أصبر گتله للمختار

بقه بس الصبر بيه
بدمع يعقوب ليليه
يگود الگبرچ ايديه بالتراب
__

وحكچ يم حسن تدرين من رحتي گبرت اسنين
اظلمت عگبچ الأكوان يالچنتي ضوه الهل العين
صفه فارغ هذاك البيت ما بي بس بچي و ونين
ينشدوني عليچ اهواي زينب والحسن وحسين

يزهره بس هظم حالي
اموت الدمعة اطفالي
يسألوني و أرد تالي بالتراب



حسين الأمين

#الليالي_الفاطمية ١٣ " گعده "
___

رسخ نهجك و ثبت قضيه
و لتجامل ابد ويه الزجيه

و لا تجمع نقيضين هذا دين مو طين
و لتجامل ابد ويه الزجيه
__

أصل للإسلام ثابت بالامامه الباري فارض
وفرع عدنه بالديانه للبغظهم تبقى رافض
أحكم بفكرك وگلبك وشوف گلبك بيش نابض

ويه سقيفة ساعده
وي سيف الله و ساعده
يا طرف توگف أكده لا تراوغ لا تناقض

المن تبصم ابهاي الصحيفه
ماكو اتحب علي و تتبع سقيفه

لتبدل الموازين هذا دين مو طين
و لتجامل ابد ويه الزجيه
___

خل افصلك الموقف حتى تفهم كلشي صاير
ابدي من يوم الغدير العابر احدود التواتر
منهو متنصب خليفه ونصه من الباري صادر

انطيك رايد چم سند
من الصحيحين و بعد
تفسيرهم بالمعتقد شگالوا ابهاي المصادر

اسألهم منو المرفوعه ايده
كلها اتجاوبك هذا الصميده

شنهو الصار بعدين هذا دين مو طين
و لتجامل ابد ويه الزجيه
_

هذا مضمون الخلاف الحدد ابعاد القضيه
احنه طعنه أمر الإله وهمه صاروا ناصبيه
ولا تگلي الفات مات الماتت الزهره الزجيه

من دافعت عن هالامر
الصاحب عصرها انطت عمر
ما همها خدها منسطر المهم عالحگ المنيه

اهنا يتحدد الموقف بالاسباب
ماتت بت نبي من دفعة الباب

ياهو إلي دفع زين؟ هذا دين مو طين
و لتجامل ابد ويه الزجيه
_

گلب التاريخ تلگه بين الاسطور العجايب
بالبخاري تلگه واحد للبتول اتعنى غاضب
هدد ابناره يوجها ويحرگ الدار ويحارب

ياهو على باب العدل
متمادي بالگول و فعل
لو رايد اتعرف الرجل البخاري اسمه كاتب

البي من الله آيه أن نقدسه
باب المصطفى برجله يرفسه

دقق بالمضامين هذا دين مو طين
و لتجامل ابد ويه الزجيه
___

ماكو شي حل وسط عدنه حتى ما نلعن الظالم
شلون للمقتول تنحب وانته للقاتل تساوم
لون ما تبغض الزمره اذاً هم عالباب هاجم

قول النبي ايخلي النقط
الها الله يرضه و لو سخط
وانته تدور حل وسط واتغض بصر عن كسر فاطم

اسهام اعله الضلع هذا كلامك
اتيقن باچر اجهنم مقامك

الندم ما يسوه فلسين هذا دين مو طين
و لتجامل ابد ويه الزجيه
_____
" المصيبه "

بيّنت كل الحقائق من دار طه هاجموها
ما رعوا حرمة نبيهم ولا وصيته إلي رعوها
الجاهليه رد زمنها من عالزهره اعتنوها

باب اندفع ضلع انكسر
محسن وگع خد انسطر
من فاطمه شنهو البدر

من الكسر ونت بألمها وهزت ملائكة الثريه




حسين الأمين

#الليالي_الفاطمية ١٤
____

يا صبر ظل بيه و ام حسن ماهيه

احسب الموتي وراها شگد بعد
الما فگد ما يفهم احساس الفگد
____

غميچ الشوگ زيّد جرحي و آلامي
و مشتاگ انظرلها و الگلب دامي
ولو مو بالحقيقة اتمرني بحلامي
عگب الزهره يمتى تخلص ايامي

الفگد ما يبرد ناره لتظن تخمد

گلبي من الفرگه الف مره انمرد
الما فگد ما يفهم احساس الفگد
____

ظلام الدنيه ماخذ نورها اليضوي
تركني بنايبه و صوت الهظم يدوي
تره الفاگد حبيبه حسرته تچوي
يظل كل باله يمتى الشوفته ينوي

للگبر كل ليله يگصد و يحچيله

يا گبر ماخذ حياتي و السند
الما فگد ما يفهم احساس الفگد
__

خلصت الصبر و اتبدلت احوالي
و للغالي دمع عيناي مو غالي
فاطم حب حياتي و خابت آمالي
مشت عني و بعدها النوح يبرالي

تنتهي ايامي و تبتدي آلامي

اي و حگ القل هو الله احد
الما فگد ما يفهم احساس الفگد
____

انه چنت المدد لليوگع بشده
ما عوفه اليناديني و لا هده
ياهو اليحضر و ظهره إلي يسنده
مثل الماي مني الحيل يتبده

يا عمر ظل ينفع فاطمه ما ترجع

الهجر نار ابدليلي و ما برد
الما فگد ما يفهم احساس الفگد
___

صعبه من يفز گلبك عليها ايحن
و تركض للگبر عطر الترب تحضن
انه حيدر علي الاسمه يهابه الجن
تغيرت و صرت للنايحه موطن

چفي يلوي عسكر هسه صرت اتعثر

بالحرب كلها تسميني الاسد
الما فگد ما يفهم احساس الفگد
___

حمره لليفارگ دمعته تنزل
يخلص الليل گلبه بالحزن يشتل
مو بس متنه كله امن الفگد يهدل
يظل بس الهظم و النايبه ايحمّل

حگها تهمل عيني راحت احله اسنيني

أم حسن ماكو مثلها و الصمد
الما فگد ما يفهم احساس الفگد




حسين الأمين

#الليالي_الفاطمية ١٥ ( نزله )
_____

انگله يمتى الي نشدنه فاطمه
هذا نور الجنه امنه فاطمه
بعاطفه گبرچ يلمنه فاطمه

اليوم نتصور و باچر صوره
من ذهب مرقد الچ و نزوره
تظلم الدنيه و يضيع اضواها
و فقط نورچ يضوي هالمعموره

(( و نتعى الگبرچ مشايه ))

يم الحسن يم الحسن
___

هاذي للشيعه حلمها فاطمه
تصبح الكعبه اسمها فاطمه
و عاصمة گبرچ تضمها فاطمه

قطعه باچر من ذهب مصفوفه
من هنا مرقد الزهره انشوفه
و المناير عابرات السبعه
و الملائك نازلات اتطوفه

(( و فطرس بجناحه ايحيينه ))

يم الحسن يم الحسن
__

امن العراق و للمدينه فاطمه
نگصدچ و انمد ادينه فاطمه
و رحمتچ تنزل علينه فاطمه

امن العراق افواج اجت مشايه
حمزه قائد كربله ملايه
امن النجف عبود لازم موكب
اوياه عبدالرضا شايل رايه

(( و جبرائيل ايعزب بيهم ))

يم الحسن يم الحسن
___

يعتنيلچ من طفوفه فاطمه
و لازمه الكافل چفوفه فاطمه
مرقدچ عينه تشوفه فاطمه

الچ من الناحيه يتعنه
بلهفته سيد شباب الجنه
يجي سالم منحره و لا مجروح
حتى لا گلبچ يلچمه بونه

(( و يوسد خده اعله اترابچ ))

يم الحسن يم الحسن
___

مثل حماي الحميه فاطمه
قالها رب البريه فاطمة
لا فتاة إلا الزجيه فاطمة

مو بعيده هالقضيه اعلينه
هيه چم يوم و يرد مهدينه
يعتني بچفيه خضره ايزورچ
و ينبني اعظم صرح بيدينه

(( و صحنچ يصبح أكبر موطن ))

يم الحسن يم الحسن




حسين الأمين

#الليالي_الفاطمية ١٦
__

نبضي حسرات وخنگه ترست ريتي
بس معانات من أرد البيتي
هالگلب مات من مشت عافيتي
__

انه للرب معجمه
البيدي شيّدت السمه
و بيه رب العزه باهه كل ملائكته

كلشي دار ابچف ادي
انه اصل الكلشي حي
هسه اصل الكلشي مات ابموت فاطمته

اليرجف الموت الحمر من طاري حربي
و انه الاحني ارگاب هسه انحني ابدربي
احس بعد ام الحسن ما نبض گلبي

بغربه محتار و احچي وي دلالي
شنهو الصار شو تغير حالي
ردني كلمات بالگبر حنيتي
____

اسوالف الفرگه حزن
و اليفارگ يندفن
لچن مو تحت الترب هذا الگبر داره

ميت و عايش سوه
اليدفن ابچفه الهوه
يرد بحظان النوايب دمعه يتجاره

و انه مو زهره افگدت من بيتي جنه
چان كل مصباح منها يشرگ النه
و بعد نور الزهره عيني ابلايه معنه

افگدت نور چان يضوي اعيوني
ضلع مكسور منها بي لوعوني
دمها آيات نزف كل بائيتي
_

الموت مو عمر ابن ود
الهجر من مرحب أشد
هاذي معرگة العواطف انه بيها اخسر

الاهدم بحربي زلم
بعد فاطم منهدم
والله ما تعرفني لو ردت الي الكوثر

البير فايض من كثر دمعي الاذرفه
و لو تصد وجهي الزجيه ما تعرفه
حزني كل حزن المجره ما يوصفه

گلبي مجروح و شيطيب اجروحي
شيعت روح مدري كلشي بروحي
شگد حرامات موتي چان امنيتي
__

بابي كلما افتحه
الروحي اقره الفاتحه
اتشوغ روحي و تنعصر من اذكر العصره

الرحه و العطر اليهب
ايگطع انياط الگلب
و الگه سبحة طين بيها ريحة الزهره

عفيه گلبي شيحتمل من هالرزيه
من اطب حجرتها بهموم العليه
و الگه زينب گاعده و تنظر اليه

بدمعة العين تبچي بنتي يمي
اتگلي چا وين بويه راحت امي
أقسى لحظات لو بچت ذريتي
____

خلص عمري اشما يطول
من مشت عني البتول
دارت الدنيه و خذت ثاراتها مني

امفصل ابداري الألم
ابوجه أطفالي انرسم
فرگة أمهم و المواجع زيدت حزني

عالحسن لمن اصد بعيونه هظمه
و الحسين شگد نشد عن گبر أمه
الليل لو مو بالمناحه يگضي لچمه

بيت الاحزان صار بيت اعيالي
و تشب نيران من اشوف أطفالي
بروحي آهات و بالحزن تاليتي




حسين الأمين

#الليالي_الفاطمية ١٧
__

يالرايح اتشيعها ادفن نعشها بروحي
يا حيرتي ابلا امي لاما تهيد اجروحي

و الماتت امها تعيش ابيتمها

____

زينب أنه الما شاهدت فرحه تمر حياتي
هسه شفت نعش العمر مني أخذ غلاتي
وين اتجه وين التفت ما هيّه امنياتي
مو فاطمه انه ردت هذا نعش مماتي

اتمنيت أنه مو امي خلصانه كون ايامي
و لاشوفها الحنيتي اتصير بنعش گدامي

فراكچ لچمها تعيش ابيتمها
_

صعبه الضوه اينام ابگبر فاطمه چانت عشي
ريض إلي بويه علي خليني اودع نعشي
من هالفجر يبدي الهجر وي عمري رايح يمشي
بيتي فرغ من الهوه ويه أمي ميت كلشي

بويه علي تانيني خليني اشم ريحتها
چانت اليه امرايه چانت دفو احچايتها

يذبل جسمها تعيش ابيتمها
__

يا فاطمه بعدچ تره يمّه يتيمه حالي
اعلينه تره طاف الحزن بس الدمع يبرالي
اعله امصيبتچ ناح الحجر غالي يودّع غالي
نامت عُمر بالمگبره ويّاچ كل امالي

بالغربه ظلت زينب والفگد يمشي اوياها
ياهو بعد يحضنها ياهو بعد يرعاها

و شكبره همها تعيش ابيتمها
_

يالغاليه الملگه بعد بالطف يصير اهناكه
بعد الكفل و الفاجعه نار الخيّم حراگه
بليل اهدعش منتظرتچ يم النحر نتلاگه
محتاجتچ يمّه اشكثر من اصعد اعله الناگه

بالغاضريه انتظرچ اتحضرين وتواسيني
بعسكر يتامه اتكفل يمّه الشمر يسبيني

هناكه هظمها تعيش ابيتمها
____

لمن يگع من المهر لحسين فوگ الغبره
اوصل إله واوصيتچ أذكرها هم يالزهره
من ينگطع راسه اجي ولجلچ اقبّل نحره
الكاسر ضلع منچ تره لحسين يسحگ صدره

مو خيل واحد عشره اتهشم ييمّه اعظامه
من الگفه ايحز راسه گدام عين ايتامه

تحير ابألمها تعيش ابيتمها




حسين الأمين

#الليالي_الفاطمية ١٨
__

أيمين الله حيدر و انه يمنته
سيفه ضلعي يصبح ودمي رايته

يظل الي ولي علي و انه يمنته
__

آنه نور الله و فضل احدى الكبر
باب حطه الي سجد عدها انغفر
ما يهمني الضلع لو مني انكسر
المهم حيدر بعده ما تسوه البشر

من هدمه الملائك متبركه ابعلگ
لتراب الصميده فدوه هالخلگ

يظل الي ولي علي و انه يمنته
___

هاي اجلاف العرب ما تنحزر
بالشدد نسوه و زلم وكت الغدر
من اجوا يم بابي گتلهم أمر
وين هاي المرجله بغزوة بدر

ابكل احروب ابويه اعرف بالاسم
كلكم شرده وحده ما بيكم زلم

يظل الي ولي علي و انه يمنته
___

لو علي اعله البيعه رادوا ينغصب
اطوي هالاكوان چن طي الكتب
مو على المسجد وره حيدر اطب
لو يريد الدنيا لجله تنگلب

اسحگ عالمواجع اليوجعني علي
واتحل القيامه لو ميرد الي

يظل الي ولي علي و انه يمنته
_

يلي بالتاريخ ما عدكم أصل
و انه من صلب النبوه اشرف نسل
عالخيانه ابليس بيكم ضل يدل
كومة انذال و يرافگم نذل

بعتوها الامانه وگطرات الخجل
و نصبتوا السقيفه ضد خير العمل

يظل الي ولي علي و انه يمنته
____

هاي ذله و بعد ذله انتظروا زين
يلي صرتوا اعله المهانه امعودين
من لجل ثاري ظهور ابني يحين
عالجذع يصلبكم و تفرحلي عين

جذع النخله شاهد باچر و الحطب
ويحرگم عليها يا احقر عرب

يظل الي ولي علي و انه يمنته





حسين الأمين

#الليالي_الفاطمية ١٩
____

يا محمد يا محمد
هاي الوديعه استرجعت
يا محمد يا محمد
الزهره مظلومه اجت يا محمد
___

يا نبي الرحمه اجتك فاطمه
ايعينك الله ما اجتك سالمه
من وجها المنسطر ينزف دمه
هوايه عانت من الزمره الظالمه

كل مسيه كل مسيه
تگعد تون من الضلع
كل مسيه كل مسيه
يتراجف بخدها الدمع يا محمد
_____

لو حچت بنتك يطه استمع
خل تخبرك من كسر منها الضلع
منهو طيّح محسن بدم منصرع
منهو خله الباب بيها يندفع

هالقضيه هالقضيه
هوايه خطيره و مؤلمه
هالقضيه هالقضيه
ماتت سببها فاطمه يا محمد
__

اگعد و نشف دمعها من تون
انشد اعليمن سبب هذا الحزن
انظر الخدها انسطر مزرگ جفن
بظلمه ليش و تنخفي من تندفن

الناصبيه الناصبيه
خافت ينبشون الگبر
الناصبيه الناصبيه
ما كفاهم هالكسر يا محمد
_

يا محمد بعد عينك ألموها
هجموا اعله الدار بنتك ما رعوها
ضلع من عدها انكسر من أعصروها
النفس صعبه تاخذه الزهره يبوها

يا نفسها يا نفسها
ما تگدر اتشم الهوه
يا نفسها يا نفسها
تتألم و ماكو دوه يا محمد
_

من غدرهم ماتت الزهره برزيه
نابت البسمار بضلوع الزجيه
فدك سلبوها الي من عندك هديه
بسوط و بكعب الرمح ضربوا سويه

الوصيه الوصيه
لولاها چا سيفي حصد
الوصيه الوصيه
بس الك ملزوم بعهد يا محمد





حسين الأمين

#الليالي_الفاطمية ٢٠ ( نزله )
____

يمتى يا أمر السمه
تبدي ثارك ___ فقارك
يرد حق فاطمه
____

يمته سيفك يمهدي تشهره و تبتهل
كسر ضلع الزجيه بدليلك يشتعل
ناره ما تطفي إلا لمن وجهك يهل
اتحاسب الغدروا امك عله كلمه و فعل

تصلب الناس المجرمه
على بابك ___ حسابك
يرد حق فاطمه
_

انته ابنها و يلچمك چفنها المنسطر
يا عجيبه يمهدي بعد تحمل صبر
صابر شلون ضلعها تكسّر بالعصر
انهض و زلزل الگاع يمهدي الهل أمر

يا كلف بالموزمه
بالحرايب ___ يغايب
يرد حق فاطمه
___

كسر فاطم ميبره و ليطيب الضلع
إلا تحرگهم اترد حثالة هالربع
ما ينام الاسد لو سلب حگه الضبع
انهض و خل سطرتك على خدهم طبع

يبن حماي الحمه
سيف جدك ___ ينشدك
يرد حق فاطمه
_

اسرج الخيل و اسحبه المهند عالفتن
ماهو بس ثار ينطرك تره يبن الحسن
اتلطعش ثار يناشد فقارك كل زمن
اول احگوك تردهن من العبدوا وثن

نطوي هاي المظلمه
لمن تظهر ___ على الشر
يرد حق فاطمه
_

بعد ثارك بدينك گبرها ينصب
و تعله لـمك مناره ابد ما تنحجب
و شيعتك كلها وياك يمهدي ترتقب
لا ولي إلا حيدر تخطها من ذهب

رايه خضره خاتمه
الك تهتف ___ ترفرف
يرد حق فاطمه




حسين الأمين

#ليالي_ام_الوفاء_والبنين ١
_______

بعد الطف بتلث اسنين
انفجعت آيه عالوفايه
لمن ماتت

شگد مشتاگه اتشوف حسين
آخر مره بـليل السفره
اهواي اشتاگت

و بهذا الإحساس ماتت ام عباس
_____

اعتنه الموت و تشهدت
عليمن دمع هلت عجيبه

چبيره دمعه طاحت
الولدها چنها ناحت مصيبه

هاي ام البنين الضاله من دون البنين
مصيبه و الوحدها من اجه البين
چانت عدها اربع مو زلم چنهم كواكب
نطتهم فدوه راحوا دون الحسين

بلحظه لن وحدها اتصير
و تربايتها ما بخلتها
لأبن الزهره

حگها ابهاي الساعه اتحير
ام الاربع منها المدمع
عالخد يجره

و بهذا الإحساس ماتت ام عباس
_______

حچت شفتها كلمه
و لكن ما أفهمه بالانفاس

اظن عبدالله گالت
الابنها چا اشتاگت يهالناس

ما تدرون بالطف جسمه متوسد التربان
وگع وبصف اخوته منذبح والراس عالزان
شلون امه تريده تدري أبنها هناك مقتول
يم حسين اخيه مندفن عبدالله عطشان

عبدالله بالطف مذبوح
ياهو صاحت المن نادت
هاي الحيره

يفهم كلمتها المجروح
شنهو نطقت ياهو ندبت
ايحل تفسيره

و بهذا الإحساس ماتت ام عباس
_____

شفتها ادير العيون
يمكن رايده عون أبنها

لو جعفر تريده
يجي ايوسدها بيده أظنها

يا جعفر يجيها الموت أخذ من عدها الاولاد
ويا عون التريده بكربله بالروح هم جاد
يا وسفه تموت ام البنين ابعازة ابنين
يكفي لو فقط واحد حضر من كربله وعاد

لا جعفر جاها لا عون
بهاي اللحظه آخر نبضه
اتريد اموادع

راح اتموت امهم يدرون
چا ما حضروا ليش اتأخروا
محد سامع

و بهذا الإحساس ماتت ام عباس
____

گرّب كلش الموت
حچت بس خافت الصوت سمعته

حرف واضح يهل الناس
اكيد اتصيح عباس ندهته

يبو فاضل الليله أم البنين اتريدك اتعود
ارجع يالوفي وفيت يم الشاطي العهود
آخر لحظه لمّك ارجعلها اتشوفك اتريد
ارجع يابو فاضل حتى لو من دون الزنود

آخر لحظات إلها اليوم
يابو الغيره بهاي الحيره
وانته اتشاهد

يا عباس أرجع بدموم
أنظر لمّك چا متهظمك
ابلايه واحد

و بهذا الإحساس ماتت ام عباس
_______

بده يثگل حچيها
و ارتفعت اديها بونيني

گلت شنهو تطلبين
گالت رايده حسين يجيني

لحظه لن شفتها ابتسمت و فتحتها الايدين
هلا يبني تگول و ماتت و آخر چلمتين
شكثر مشتاگه گالت لنها منها فاضت الروح
اكيد من الطفوف الها المسيه اتعنه الحسين

نادت يا يمه يحسين
يا أنفاسي هجرك قاسي
شگد اذاني

مرتاحه بسد الجفنين
لا متبالي جاها الغالي
كافي أتاني

و بهذا الإحساس ماتت ام عباس





حسين الأمين

#ليالي_ام_الوفاء_والبنين ٢
_______

بين الموت و ما بين
خاف امقصره اويه حسين

متفطره اشفاي خجلانه هواي
______

من الطف لحد آخر نبض بيه
اكولن خاف ولدي الاربعه شويه
حسبه اتجيبني اعله حسين مو ليه
إله عيوني انعمت و اضلوعي محنيه

بدموعي الخد ايبات
و تسكن گلبي اللوعات

و ايدي بمگفاي خجلانه هواي
________

ساعي الموت اجاني و خايفه منه
اگول شلون وجه حسين اصدنه
باچر من اشوفه بساحة الجنه
خاف امقصره انه و ولدي يحسبنه

يا حيره شلون اهناك
بالمحشر و الاملاك

و امقصره ارباي خجلانه هواي
______

يدري حسين بيه و يدري بونيني
لجله مو لجل ولدي بچت عيني
اذا بالطف بنيني ما وفت ديني
لا أمهم أنه و لا همه ابنيني

الما يوفون اويه حسين
ما يتسمون ابنين

فدوه المولاي خجلانه هواي
_______

أنه الضحيت كلشي الخاطر الكلشي
و لجل حسين ابد ما منطبگ رمشي
معقوله وحيده ايعوفني ابنعشي
و ما يحضرني هم بجنازتي و يمشي

ما اطبگ جفن العين
إلا يوصلني حسين

متأكده ابهاي خجلانه هواي
_________

ما همني الولد ياهو انگطع نحره
و لا همني التوذر عالثره صدره
كل همي الحسين ايردلي من سفره
و تقبل تضحياتي فاطمه الزهره

حلمي الأوحد والله
ارجع اگعد وياه

و يحچي وياي خجلانه هواي




حسين الأمين

#ليالي_ام_الوفاء_والبنين ٣
____

بغيابك كل ليله احساسي ابدمعه ايجود
و يهمس بالطف ميت ابنچ لا ميعود

گبل ناعي الخبر شفت گطع النحر
______

من گبل ابن حذلم عندي احساس
فجعني كسرني
و التم حزني ويه لمت الناس
يهظمه ييمه

گلبي يلچمني و اسمع كلماته
عنك من اسأل تهمل دمعاته
بوليدي اخبرني و حال ابنياته

حاچاني و اعرف ما يرجع راح ايگول
حاولت اقنع سالم يمه ما مقتول

و ترد من السفر شفت گطع النحر
____

رديت و سألته و حالي يا حال
بونيني و حنيني
و حقك يمه بس انته العله البال
تلالي يغالي

كل عمري بعدك يبني ما يسوه
يا كلشي و كلشي هم لجلك فدوه
من نور اعيونك هالنور اتضوه

يوليدي اتفز بيه اجروحي بكل لچمه
و يمتى ترجع و تناديني يا يمه

ضگت مر الدهر شفت گطع النحر
______

شافك گلبي طايح يبني مذبوح
بالخضاب عالتراب
و طلعت ويه نبلة حرمله الروح
لچمني ذبحني

شعدها اويه اعظامك خيل الطحنتهن
من تسحگ صدرك اصرخ و انظرهن
يا يمه اتمنيت ابگلبي دووستهن

شيبني كل لحظه افراگك مو بيدي
و احساسي متوذر شافك يوليدي

متت من هالصور شفت گطع النحر
_______

راسك عالرمح من گالوا ايبات
حناني و لواني
و زينب بالسبي و تحديها شمات
يوسفه يكلفه

رسمت شوغاتك احزاني البيه
برماحك تنظر لختك محنيه
بهزله و سياط و تمشي مسبيه

اهاتي رسمت علويه اويه الذباح
مسبيه و راسك تنظرله فوگ ارماح

و اخوها اعله النهر شفت گطع النحر
_____

حنين و خوف شايل گلبي و انخاك
يمولاي على ارباي
خوفي قصروا يا يمه وياك
بنيني يعيني

وصيت أولادي بالدم يفدونك
و من تعطش ماي العين ايشربونك
كل ولدي فدوه النظره من اعيونك

خبرني عن ولدي امروتك يعيوني
كل خوفي لا گدام أمك فشلوني

الك تعبي أنذر شفت گطع النحر




حسين الأمين

#الليالي_الزينبية ١
____

بظهر العاشر موتتها
و فوگ الهزله اجنازتها

الحيره الظلت وين اندفنت
و فوگ الهزله اجنازتها
____

بالغاضريه آخر نفس بركضة التل شاهگته
من شافت حسين انذبح والخيل طحنت جثته
ماتت لمن شافت طفل نار الخيم حارگته
ما صح دفنها ابكربله وعالهزله صعدت ميته

اجنازه اتماشي الچتلوها
و الشيعوها ايشتموها

بيش انطلبت وين اندفنت
____

اجنازه وعلى الهزل مشت والشامت الحاملها
بعيون صلفه التعزيه وتابوتها محملها
صوت الذكر ما ينسمع سوط المتن واصلها
اول جنازه بالفرح كل ديره تستقبلها

بس نحر ايرتل اتسمعه
فوگ ارماحه الها ينعه

ميته و فزت وين اندفنت
و فوگ الهزله اجنازتها
____

هاي الجنازه اتعلعلت محد يون اعليها
امن اهل العزه محد حضر بطف كربله امذبحيها
تمشي و لا من مستقر والكوفه دخلت ليها
و استقبلتها ابيا حچي ميته و تموت بيها


اتمنت ساعه بكوفتها
بس تحظن روس اخوتها

بس ما حظنت وين اندفنت
__

ميته ويچملها الدهر من المصايب لچمه
بالكوفه ما صح الدفن وللشام سارت هظمه
بت حيدره فرجه اصبحت يم المتعرف زحمه
ثالث ايام الفاتحه بسوگ زلم ملتمه

ماتت چم مره ابكلمه
اخت المتگطع جسمه

و اخته انسلبت وين اندفنت
و فوگ الهزله اجنازتها
__

جادرها بالشام انصب من السبي وعاشرها
ما وگع ظل فوگ السنه واترابه ظل ناطرها
من رجعت الطف كربله اهنا تندفن خاطرها
بس يا هظيمه عاودت للغربه تحمل سرها

اندفنت بالشام وماضيها
ديرة شمات اتباريها

بلوعه انختمت وين اندفنت
و فوگ الهزله اجنازتها





حسين الأمين